السبت، 31 يناير 2009

عزة ومحسن

بسم الله الرحمن الرحيم

تحديث تحديث تحديث

المعلم محسن اتظبط ياجدعاااااااااااااان

تم بحمد الله اليوم فى تمام الواحده والنصف ظهراً القيام بتنفيذ الخطه ع م 11

وقد تم تنفيذ الخطه بنجاح منقطع النظير

نتكلم بقى واقولكم كده باختصار على اللى حصل

محسن كان طالع من شغله وكنا عاملين له كمين فى حتة هاديه كده بيعدى منها وهو مروح علشان مايكونش فيه ناس كتير تحوش عنه وكنا فى انتظاره خمسه شباب زى الفل

هوماشى بالعجلة وفيه واد صغير كده حوالى 15سنة معدى من قدامه وراح واقف وابتدى الحوار ده

#انت ياابنى اوعى كده ولا كده

* ايه ياعم انت مانعديش يعنى ولا ايه

#انت يااد حمار فيه حد يمشى كده فى الشارع انت

* ايه هو ده انت بتشتم ليه انا امشى براحتى فى اى حته

#تمشى براحتك ايه هو انت فاكرة شارع ابوك

*بقولك بلاش غلط احسنلك والله العظيم هتندم انت سامع

#وده مين ان شاء الله اللى هيندمنى يا000000000

* اهو انت وهوريك دلوقتى يا ابن 00000000000

هوووووووب عمنا محسن راح ماسك فى الواد وعاوز يضربه

ايه يااستاذ مش عيب عليك تمسك فى عيل قد ركبتك وكمان عاوز تضربه ؟

# ده عيل مش متربى

* ياعم وانا معدى الشارع خبطنى بالعجلة وعورنى وكمان نازل علشان يضربنى

(وطبعا مع الكلام ده الواد عامل نفسه بيعيط)

لأ لأ لأ كده عيب عليك انت كده بصراحه راجل مش محترم

# ايه ده وانت مال000000انت كمان

الله عليك كمان لسانك طويل لأ ده انت كده عاوز تربيه من اول وجديد

وخد عندك

احنا الخمسة طحناه

بس المهم فى دا كله انى ابتديت اول واحد وهبشته قلم ولا قلم عزة على صداغى

وبعد كده عمل فيها صايع وطلع مطوة قرن غزال ياعينى خدناها منه غنايم حرب

بس الناس اتلمت وحاشت والواد الصغير خلع فى وسط الزيطه

وياعم ماتزعلش حقك عليا

لا ياعم بس اصل انا كنت متضايق شوية

كانى مانى خلص الموضوع بعد ماصاحبنا اتظبط والحمد لله

طبعا البشمهندس الصغير ده كان ابن عمى

وامعاناً فى الكيد لمحسن كنت واخد اخواته الاتنين الكبار علشان لو ضرب الواد ياكلوه اكل

طبعا انا كنت بقول اننا هننفذ الخطة الاسبوع الجاى

بس ده كان مجرد تمويه احسن حد يكون بيقرا المدونه وبينقل الاخبار لمحسن

شوفتو تخطيط الصعايده

عفاريت

والحمد لله اتسترت


السلام عليكم ورحمة الله وبركاته

الموقف ده حصل من يومين كده تقريبا انا حاولت اكتبه زى ماحصل مع مراعاة انه طبعا لازم يكون هناك بعض الاختلاف بين الحقيقى والمكتوب بس الاختلاف مش كتير يعنى كده حاجه بسيطه وهو الموقف سواء كان كده او كده موقف مهبب . ياريت بعد اما تقروة تقولولى ايه رأيكم فى اللى حصلى ده وكان ممكن اتصرف ازاى :-
ماشى فى امان الله بعد ماخلصت شوية مشاوير كده ورجعت من البنك قلت اروح ابرم شويه على الصيدليات اللى فى وسط بلدنا وانا ماشى لقيت بنوته كده حلوة وشيك على الاخر راحت واقفه قدامى وبتتنهد جامد
*خير يا ابلة فيه حاجه
- يعنى انت مش عارف فيه ايه يا00000(شتيمة)
* يانهار اسود ليه الغلط ده يابت الناس ليه كده
- ليه كده ؟ ايوة ياخويا استعبط استعبط واعمل نفسك مش عارفنى وهى جديده عليك يا 0000000(وابل شتيمة)
*يانهار ابوكى اسود ايه يابنت ال000(شتيمة برضو)اللى بتقوليه ده وبعدين انا اعرفك منين انتى هتجبيلى تهمة
- ده انا هوديك فى داهيه يا 00000000000000000000000000000000000
الناس اتلمت علينا و واحد يسأل فيه ايه يا ابله وواحد تانى هو ماله بيكى الجدع ده وواحد تالت مش تحترم نفسك ده حتى باين عليك ابن ناس ورابع يقول ياعم دى اشكال زباله وفاكرة نفسها عيال روشه وووووووو

(كنت هتروق ترويقه صح الصح)
* ايه ياخوانا كل واحد يحترم نفسه ومش عاوزين كتر كلام دى واحده مجنونه انا مااعرفهاش اصلا حتى اسئلوها انا عملتلها ايه مش هترد عليكم
- يسلام يعنى انا هرمى بلايا عليك وهب طااااااااااااااااااااااااااااااااااااااخ (بالقلم على وشى)
انا ايدى راحت على طول على الطبنجه بتاعتى وطلعتها وهسحب الجرار والناس مسكتنى هتعمل ايه
سيبوووووووووووووووووونى ان ما وريتك يابنت 00000
كان فيه واحد فايت وشاف الحكاية طلع يعرف الاخت (اللى طلع اسمها عزة)راح داخل وحاش الناس ونده عليها
= عزة روحى على البيت بسرعه يللا اااااااا بسرعه انتى فاهمه
وبصلى كده وقالى معلش ياابنى حقك عليا امسحها فى راسى وهى اخدت بعضها ومشيت بكل بساطه ولا كأنها لسه هبدانى كف من شويه
* نعم ياعم حقك عليا ؟ ودى اصرفها منين ان شاء الله ؟ ده انا كلت كف مااكلوش حرامى فى مولد ومش هسيب حقى يعنى مش هسيب حقى وهعرف هى بنت مين وسنينها وسنين اهلها هباب معايا
وروحت مدخل الطبنجه وانا بستحلف لها ومشيت مع الراجل ده بعد ما الناس اتفضت من حوالينا وطبعا هيموتو من الفضول علشان يعرفو انا عملت ايه لعزة عشان تهبدنى القلم المحترم ده
مشيت مع صاحبنا ده وقلت له ايه بقى موضوع عزة قالى مافيش وياعم ماتزعلش وحقك عليا وهات راسك ابوسها اهه وانسى الموضوع بقى وكأن مافيش حاجه حصلت
* طب وحياة أمى انا لو ماعرفت الموضوع ماانا ساكت وشوف انا هعرف عزة دى منين وبنت مين وهفضحهم واجرسهم هو انتو مش عارفين انا مين وواد مين ولا ايه ؟ ده انا فلان الفلانى ابن الحاج فلان وهروح دلوقتى على البيت واجيب باقى ولاد عمى وهخليها دمار النهارده
الراجل قالى طب انا هروح لابوك واعتذر له
* ماليش دعوة ده انامضروب فى قلب البلديعنى كده مش هعرف امشى فى المنطقه دى تانى وبعد كده هتفضح فى البلد كلها
- قالى طب بص هقولك بس ماتعرفش حد
* ليه ان شاء الله هو سر حربى ولا ايه
- ايوة ياابنى دى سمعة بنت
* وهى دى ليها سمعه دى مجنونه ياعم الحج
- عيب كده امال
* ماشى قول ولما نشوف اخرتها فى اليوم الاسود ده
- دى كانت مخطوبه لواحد اسمه محسن وقعد خاطبها سنتين وبعد كده سابها وراح اتجوز واحده تانى كانت صاحبتها
* ياسلام الفيلم ده اناشوفته ابيض واسودبتاع شكرى سرحان وشادية وناديه لطفى ايه ياعم انت هو انت جاى تسرح بيا
- ياولدى اسمع بس زى مابقولك كده حتى لو مش مصدقنى تعالى معايا
واخدنى ورحنا الحتة اللى ساكنه فيها الابله وسألت الناس هناك وعرفت هى بنت مين وطلع الموضوع بجد
بعد ماسابها صاحبنا قعدت حوالى اسبوعين فى المستشفى وبعد كده تغيب وتجيلها حاله توهان كده وتشوف اى حد تفتكره الباشا وتروح ملبساه قلم محترم زى اللى انا خدته
لا حول ولا قوة الا بالله
بس كده ماينفعش انا اتضربت قلم وقلم جامد كمان وانا مش من النوع اللى بيسيب حقه
طب اعمل ايه ؟؟
لميت ولاد عمى (بيتلمو فى المصايب والخناقات بسرعة البرق زى مايكونو رايحين فرح) وعقدنا مجلس حرب
طبعا ده كله علشان نجيب حق العيلة اللى متمثل فى شخصى
وقــــــــــررنا

اولا البحث عن المدعو محسن (وحياة امى لاهبده كف يطلع من عينه )وتخليص حق العيله منه ورد اعتبارها
ثانيا عمل نشرة توضيحيه بأن الموقف اللى حصل ده فى الحته الفلانيه دى كان فيه سؤ تفاهم وغير مقصود
(انا مش عارف اطلع من البيت بعد الكف اللى خدته)
ثالثا بمبداء الاستفادة من الكوارث الكف لخلخ الضرس اللى كنت هروح احشيه عند الدكتور يعنى هيقع ومبقاش له لازمة الدكتور والمصاريف رُب ضارة نافعة
وحسبى الله ونعم الوكيل فيك يامحسن يا ابن ام محسن ومش هسيبك
لو اى حد مكانى بقى كان هيعمل ايه فى الموقف المهبب ده
ومش عاوز ضحك
انا بتكلم بجد
( ولو ان انا عارف زينب مش هتسكت )

والسلام عليكم ورحمة الله وبركاته

هناك 41 تعليقًا:

zainab يقول...

السلام عليكم و رحمة الله و بركاته

أخى المعتصم

بجد والله موقف يهلك من الضحك
ايه اللى بيحصل لك ده
ماكانش حد ماشى فى الشارع غيرك و لا ايه

نصيبك بأه

ايه ده معقوله ؟؟؟؟؟؟؟؟؟ تضرب يا خبر أبيض !!

تعيش و تاخد غيرها


كويس انها جت على قد القلم أمال لو الناس كانوا إتلموا عليك و انت عارف بأه الباقى يا نهارى

بس تصدق استفدت من الموضوع برده مش هتروح تحشى ضرسك

بس معلش يا معتصم اقبلها من أختك زينب ماكانش له لازمه ذكر الكلمة دى فى البوست (يعنى انت مش عارف فيه ايه ياواطى)

و عملت ايه فى الموضوع ده لقيت محسن و لا لأ ؟؟؟؟؟؟

بس تصدق البنت غلبانه و الله
ربنا يشفيها و يعافيها و يعفو عنها

و بعدين ايه موضوع الطبنجه ده انت بتتكلم بجد و لا بتهزر انتم بتمشوا بطبنجه عندكم كده فى بلدكم ؟؟
رايح تلف عالصيدليات و معاك طبنجه ؟؟

ايه ده و عملتم انت و ولاد عمك مجلس كمان خد بالك بأه أصل الموضوع يقلب بتار ربنا يستر

تحياتى

موناليزا يقول...

ههههههههههه غصب عنى ضحكت اعذرنى بجد
اسلوبك كوميدى ساخر مالوش حل

مش عارفة بجد لو مكانك كنت هعمل ايه يمكن لانى بنت مش ولد

بس احب اقوللك بجد ان شكلك كده متربى وابن ناس لان اتحكالى على موقف مشابه من بنت لولد برضه وكمان كانوا اصحاب والولد كان رد فعله انه ضربها بالقلم
وموقف تانى الولد كان هيضربها(دى بنت تانية) لولا تدخل زمايلهم
ايه المواقف دى بجد الناس مابقتش طايقة بعضها كده ليه!!
ربنا يخرجنا منها على خير ويكملها معانا بالستر

نصيحة اخوية:خلاص بقى خلى قلبك ابيض دى برضه بنت ومايصحش راجل يضرب بنت مهما كان
-لو كنت عايز تضرب محسن براحتك خالص محدش هيمنعك-
ده غير كمان انها تعبانة وماكنتش فى حالتها الطبيعية
اقوللك انت تروح البيت عندهم وتحكيلها اللى حصل وهى اكيد هتعتذرلك
ولو على اهل البلد اللى يسألك قوللهم اصلها كانت بتمشى وهى نايمة
سؤال جانبى:هو العادى بتاعك انك تبقى شايل طبنجة ليه؟؟

غير معرف يقول...

السلام عليكم ورحمة الله وبركاته

نحن أمة شرفنا الله بقرءانا الكريم لكي ناخذ منه الموعظه الحسنه

وقد قال عز وجل

لاَّ يُحِبُّ اللّهُ الْجَهْرَ بِالسُّوَءِ مِنَ الْقَوْلِ إِلاَّ مَن ظُلِمَ وَكَانَ اللّهُ سَمِيعاً عَلِيماً

ولو وجدتم في أنفسكم شئ من الاحساس بالظلم فستجد كتاب الله يقول لك

وَلَمَن صَبَرَ وَغَفَرَ إِنَّ ذَلِكَ لَمِنْ عَزْمِ الْأُمُورِ

كلام ربي يقول ما ينبغي لنا ان نعمل به

فَمَا أُوتِيتُم مِّن شَيْءٍ فَمَتَاعُ الْحَيَاةِ الدُّنْيَا وَمَا عِندَ اللَّهِ خَيْرٌ وَأَبْقَى لِلَّذِينَ آمَنُوا وَعَلَى رَبِّهِمْ يَتَوَكَّلُونَ{36} وَالَّذِينَ يَجْتَنِبُونَ كَبَائِرَ الْإِثْمِ وَالْفَوَاحِشَ وَإِذَا مَا غَضِبُوا هُمْ يَغْفِرُونَ

فغفر لها بل وكن من الكاظمين الغيظ والعافين عن الناس وياريت تبقي من المحسنين ( والله يحب المحسنين )
صلي لها ركعتين وادعلي لها الله ان يشفيها ويعفيها ويصبرها ويعوضها بالخير



كان لابد لي ان اتكلم وابدي برأيي ومن غير ضحك فمصائب الناس تحتاج منا التعاطف وليس شئ اخر ربنا يعافي كل مريض ومبتلي


من خارج نطاق الخدمة

والسلام عليكم

بستان الحب يقول...

ماحدث لك ابتلاء وباءذن الله لن يتكرر ولكن لابد ان نتعلم من هذه الحادثه:قبل الخروج من المنزل لا ننسى دعاء الخروج :بسم الله توكلت على الله اللهم انى اعوذ بك من ان اضل او اضل او اذل او اذل ،او اظلم او اظلم او اجهل او يجهل على ،بفتح الالف الاولى وضم الالف الثانيه فى اول كل كلمه .والحمد لله الذى عافاك مما ابتلى به عزه حفظك الله من كل سوء

zainab يقول...

معلش يا معتصم اسمح لى بعد إذنك

( كان لابد أن أتكلم ) و ( بستان الحب )

طبعا يا جماعه أنتم عندكم حق وجزاكم الله خيرا

أكيد طبعا انا متعاطفه مع الأخت
( عزة )اللى حكى عنها معتصم
و ربنا يشفيها و يعافيها و يعفو عنها

الحمد لله الذى عافانا مما ابتلى به غيرنا

بس مش فى نيتى خالص انى أسخر من الأخت (عزة ) ربنا يعافيها



تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
**********
أختى زينب
وعليكم السلام ورحمة الله وبركاته
انا عارف انك هتضحكى والله ده انا قايل فى اخر البوست اسمك انتى بالذات
ولا يهمك
كان فيه ناس كتير بس حظى اللى زى الفل انى كنت ماشى قريب منها والحمد لله
وكمان اعيش واخد غيرها؟ماشى يازينب
وبعدين ماالناس اتلمت فعلا بس الحمد لله لحقت احجمهم والا كان زمانى الله يرحمنى
وللاسف هروح لدكتور الاسنان عشان احشى الضرس لانه ماتخلعش يعنى بقت مصاريف زياده حشو وترميم لخلخه
بالنسبه للكلمة اياها انا اسف بس فعلا انا مااخدتش بالى وشيلتها على طول
والحمد لله عرفنا طريق محسن وجارى رسم خطه محكمه لتظبيطه
والله هى البنت غلبانه خالص انا لما عرفت الموضوع بجد وعرفت تفاصيله صعبت عليا خالص وزاد اصرارى انى اضرب محسن
وبعدين موضوع الطبنجه ده عادى خالص بس هو انا اللى مش بحب اشيلها كتير يعنى انما لما ببقى هتأخر برة البيت لازم اخدها معايا
احنا عملنا المجلس اه هو اللى انضرب ده شوية ولا ايه بس هى ان شاء الله مش هتوصل للتار انا هحاول اظبط المسائل
واضحكى براحتك ياست زينب
تقبلى تحياتى ودمتى بكل خير
*****************
أختى الكريمة موناليزا
تحياتى وتقديرى
كويس خالص ان الموضوع ضحكك والله دى حاجه اسعدتنى
وعلى فكرة انا نفسى دلوقتى بفتكر الموقف واضحك (وجه مبتسم)
بس انا اسلوبى مش كوميدى هى الحادثه ماتتقلش الا كده
وشكرا على حسن ظنك بشخصى
بس متهيألى انه ماينفعش فعلا ان راجل يضرب بنت او ست ده كده مايبقاش راجل واللى انتى بتحكى عليهم دول شباب يعنى 000000 مش عاوز اتكلم ربنا يهديهم
وبالنسبه للنصيحه ماشى وهعمل بيهاان شاءالله ماتقلقيش لانه ماينفعش الا كده
وبالنسبة لمحسن هيتظبط اصل انا عرفت انه عمل حاجات انى خلتنى اصريت انه يتظبط وبعدين انا مستحلف له تمام
اخاف اروح عندهم البيت دى ايدها تقيله وانا مااضمنش تكون الحاله رجعتلها تانى المرة دى مش همسك نفسى هديها عيار ونلخص فى الموضوع
جواب جانبى:العادى لما هكون بتأخر برة البيت انى اشيلها معايا لانه فيه ظروف تحتم ده(بسبب الجماعه بتوع مجلس الحرب)
دا كمان المفروض انى اشيلها على طول بس انا اللى بنفض
شكرا على مرورك وتقبلى تحياتى
ودمتى بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
أختى كان لابد ان اتكلم
وعليكم السلام ورحمة الله وبركاته
تحياتى وتقديرى
بجد تعليقك اسعدنى جدا
بس هو انتى ناويه تطولى فى موضوع خارج نطاق الخدمة ده ولا ايه؟ لا ماينفعش كده
اشكرك على رأيك
بس هو الواحد ممكن يضحك على موقف حصل زى كده من غير مايقصد والضحك هنا بيكون على الموقف كا كل مش على الانسان اللى عنده مرض لاسمح الله او بيتريق على عيوبه دى نقطه للايضاح فقط علشان محدش يزعل انا شخصيا بفتكر الموقف واضحك على القلم اللى انا انضربته (تخيلى)
بعد ماعرفت حقيقة موقفها وظروفها انا مسامحها ويمكن ماتصدقيش انى متعاطف معاها جدا لانها بتمر بظروف صعبه او مرت بيها ولسه بتعانى من تبعاتها وربنا يشفيها وييسر لها الاحوال ويرزقها بابن حلال يصونها لانها انسانه كويسه خالص ومحترمه
وربنا يجعلنا من الكاظمين الغيظ يارب لانى بصراحه فى احيان كتير مش بكون منهم انا اللى سكتنى عليها انها بنت لو كان راجل انا ماكنتش هسيبه على الاقل الا وهو واخد 3 او 4 كفوف لانى بصراحه فى حالة الغضب ببقى غبى جدا
بدعيلها ان ربنا يشفيها ويشفى كل مرضى المسلمين
اختى الكريمة غربتى اسعدنى تعليقك وشكرا على مرورك
تحياتى ودمتى بكل خير وود
************
بستان الحب
تحياتى
اولا اسعدتنى الزيارة والتعليق (بس اول مرة تيجى فيها المدونه تيجى وانا مضروب كده)
ثانيا الحمد لله ان الابتلاء ده كان خفيف كده ولو كل الابتلاءات كانت سهله كده كان الواحد يبقى مرتاح ومطمن
الحمد لله انا احفظ دعاء الخروج من المنزل منذ اكثر من 18 سنة والحمد لله حتى لو كنت طالع ارش ميه قدام الباب بقوله وشكرا على التذكرة
والحمد لله الذى عفانا مما ابتلى به غيرنا
ونسأل الله ان يعفو عن كل مسلم مبتلى ان شاء الله برحمته وعفوه ومغفرته
وأن يشفى مرضى المسلمين اللهم امين
شكرا على الزياره(ويارب ماتكون اخر مرة وتتكرر)
تقبلى تحياتى
ودمتى بكل ود وخير
والسلام عليكم ورحمة الله وبركاته

zainab يقول...

أخى المعتصم

المسامح كريم و لازم تضبط المسئله فعلا

على فكرة أنا حكيت لهم فى البيت واحد واحد على الموقف اللى جرالك ده و الله صعب عليهم عزة و متغاظين قوى من محسن و لما سألتهم عن رد فعلهم قالوا مش هنعمل حاجه


ربنا يشفيها يارب

بس لحد دلوقتى مستغربه انت بتشيل طبنجة ازاى ؟؟

تحياتى

المعتصم يقول...

بسم الله الرحمن الرحيم
ايه يازينب ماتكبريش المواضيع غربتى كانت تقصد الكلام اللى انا كاتبه عن الضحك فى اخر البوست مش كانت تقصدك انتى
وبعدين انتى ضحكتى على موقفى انا مش ضحكتى على عزة ربنا يشفيها ان شاء الله
وبستان الحب ماقالتش اكتر من انها ذكرتنى بدعاء الخروج والحمد لله على انه عافانا مما ابتلى به غيرنا
وياستى محدش قال انك سخرتى منها ماتأفوريش يازينب
بس انتى ايه رأيك فى اللى بيحصلى ده مع البنات والستات ؟؟
مرة عربية المترو بتاعة الستات والمرة التانية اختنا عزة
اقولك انا شكلى كده هنضم للحزب اياه بتاع المجلس القومى للرجل
هههههههههههههههههههههههههه
تحياتى
ودمتى بكل خير وود
والسلام عليكم ورحمة الله وبركاته

zainab يقول...

حبيبتى أميرة ( غربتى )

صحيح يا أميرة يا حبيبتى انتى هتفضلى كتير كده خارج نطاق الخدمة ارجعى بأه وحشتينا

و خدى هنا يا ست أميرة يعنى انتى معقولة ممكن تعتقدى انى أضحك على مريض
لا طبعا ربنا يشفى مرضى المسلمين يارب


تحياتى

المعتصم يقول...

بسم الله الرحمن الرحيم
أختى زينب
تحياتى
وانا مالى ومال كريم انا معتصم
(عادى انا سامحتها هى انما محسن لأ)
وبالنسبة للتظبيط بتاع المسائل خلاص ماتقلقيش عرفنا هو بيشتغل فين وحطينا خطه علشان واحد يروح يجر شكله وتبقى خناقه عاديه وانا طبعا هروح علشان احامى لواد عمى وهنا بقى اقع فى عمنا محسن واللى رايده ربنا هيكون هو وحظه بقى
بقى بتسيحيلى يازينب فى بيتكم ؟؟؟؟؟؟
ماشى
ماشى
ماشى
تلاته ماشى يازينب
وبعدين ايه بتشيل طبنجه ازاى
عادى يعنى بحطها فى حزام البنطلون مافيهاش حاجه دى
دمتى بكل ود وخير
والسلام عليكم ورحمة الله وبركاته

zainab يقول...

أخى المعتصم

أنا مش زعلانه من أميرة حبيبتى و لامن بستان الحب بالعكس أنا بحبهم فى الله و ربنايشهد
بس زى ما تقول كده أخاف يكونوا فهموا غلط فصححت الموقف فقط لا غير تقول ايه بأه ( أصلى حساسه زياده عن اللازم )

و بعدين عايز تنضم للمجلس القومى للرجل يا نهارك أبيض

ده احنا مش هندخلك عالم التدوين تانى

تحياتى

المعتصم يقول...

بسم الله الرحمن الرحيم
طب اعمل ايه يازينب ماكل المواقف النسائيه معايا نص كم
مافيش حاجه شتوى خالص زى ماانتى شايفه
اروح بقى ادور على حد يحوش عنى شويه (الجماعه المهابيش بتوع المجلس القومى للرجل)
وبعدين بتهددينى كمان
ماشى يازينب
ليكى يوم
وربنا اكيد هيخلصلى حقى
وابقى بطلى حساسيه زياده(دوا الحساسيه غلى 30فى الميه على فكرة)بطلى علشان توفرى وخليكى شاطرة
تحياتى ودمتى بود
والسلام عليكم ورحمة الله وبركاته

Unknown يقول...

السلام عليكم ورحمة الله وبركاتة
اولا
سامحنى
هههههههههههههههههههههههههههههه
مش قادرة امسك نفسى من الضحك
ثانيا
معلش المسامح كريم
وبلاش تفضح البنت
بس اضرب اللى اسمة محسن دا وعلشان خاطرى قلمين مش قلم واحد
وشفاك الله وعفاك علشان ضرسك
دمت بالف خير

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة حتى تشرق الشمس
تحياتى
ياستى ولا يهمك وربنا يجعلك تضحكى كده على طول وسعيده
بس انا مالى ومال كريم ده اللى كل شويه حد يقولى عليه ؟
وبعدين هفضح البنت فى ايه ؟ بالعكس دى بنت كويسه والكلام اللى سمعته عليها يؤكدلى كده
يبقى انا هفضحها فى ايه بس لا سمح الله دول كانو بقين حامضين كده ساعه ماهبشتنى القلم وخلاص
اما المعلم محسن ف خلاص ماتقلقيش الخطه بتاعته هتتنفذ الاسبوع اللى جاى وهيتظبط
بس علشان محدش يقول عليا مفترى اقولكم هو عمل ايه مع البنت بعد ماسابها وسرق منها حاجات طلع عليها اشاعات مش كويسه وده اللى جبلها الصدمه والحاله اللى هى فيها
يبقى كده اظن انه يستاهل اللى هعمله فيه ان شاء الله وعلشان خاطرك بعد مااخلص هفقعه قلم زيادة اللى انتى باعتهوله مخصوص
الله يسلمك وشكرا على سؤالك على موضوع الضرس ده وربنا يسهل واروح للدكتور علشان انا كسلى قوى فى الموضوع ده ادعيلى
اختى الكريمة تحياتى
ودمتى بكل ود وخير
والسلام عليكم ورحمة الله وبركاته

الفراغ يقول...

سلام عليكم
ابنى العزيز معتصم
نحمد ربنا ان عافانا مما ابتلى به غيرنا وفضلنا على كثير من خلقه تفضيلا
متعرفش ايه حكمة ربنا من اللى حصل
بما انك قلت انها جميله جدا
وواضح انها كانت مخلصه جدا للبى ادم اللى خانها
شوف لو ينفع انك تخطبها ويمكن تشفى على ايدك وتبقى ياعم ربنا رزقك ببنت الحلال
ولله فى خلقه شئون

فتــافيت (رحاب الخضري) يقول...

اولا سوري لاني مش قادرة امسك نفسي من الضحك بجد.. مش عليك والله بس على نفسي لان حصل معايا موقف شبيه كدا
خلصت الشغل وطلعت اخد تاكسي وكان عندي ضغط شغل في اليوم ده فخرجت الساعه 9 وشوية وواقفة مستنية تاكسي والدنيا ضلمة شوية.. ولاقيت حد بيبسس من ورايا.. طبعا ولا عبرته.. وبعدين سامية بت يا سامية .. اكيد مش انا خالص سامية دية.
وفجأة لقيت واحدة قامة لازقاني بالكومية في دراعي وبتقولي:
انت انترشتي يا تيييييييت عمالة انادي على تييييت اهلك
بصيت لها.. وقمت رزعاها بالكومية زي ما ادتهالي.. وقولت لها تصدقي بالله اللي زيك لازم يتكمموا قبل ما ينزلوا الشوارع
جه جوزها واعتذر ليا واللي شلني انه شتم مراته بالفاظ فظيعة في الشارع.. هم ناس باين عليهم اصلا تيييييت

بس طبعا الموقف مختلف لاني بنت والبنت سهل انها تاخد حقها من ست وممكن تودي راجل في دهيه
لكن انت ماكنش ينفع انك تضربها ابدا

بس لوعى تروح البيت تاني عندها لان ممكن والله تتعلق بيك وتلاقي نفسك مدبس في جوازة لوز

ام عن الاخ محسن ده.. فربنا ينتقم منه علشان بوظ مخ بنت كانت بتحبه(حبه برص في ليلة العورس).. وكمان تارك اوعى تسيبه.. غير ان امل شباب مصر (من اللي خدوا من الحب جانب.. وكف الاخت علم على خدودهم).. فيك كبير جدا علشان تاخد حقهم

ممكن كمان تعمل جروب على الفيس بوك وتسميه المتضررين من كف عزة.. وتتشهروا بقى
وتبقى مصائب قوم عند قوم فوائد

طولت عليك بس ده العادي بتاعي
واكيد نورت المدونة.. من غير ماتقول يا راجل هو احنا بينا الحاجات ديه

وبوست جامد واللهي جدا

تقبل مروري وتحياتي
سلااااااااام

المعتصم يقول...

بسم الله الرحمن الرحيم
السلام عليكم ورحمة الله وبركاته
****************
الفراغ
وعليكم السلام ورحمة الله وبركاته
سيدتى الفاضلة وأمنا الكريمة
تحياتى وتقديرى
اولا شكرا على تشريفك لمدونتى المتواضعه
انتى بتنوريها بزيارتك
ثانيا الحمد لله الذى عافانا مما ابتلى به غيرنا الف حمد والف شكر
انما ياست الكل موضوع الجواز ده ماينفعش خالص
صحيح هى البنت جميلة (مش جدا يعنى) واهلها ناس كويسين انما جواز
لايجوز
دى اول معرفتى بيها قلم كان هيطير عينى اتجوزها ازاى دى؟ عشان بعد كده لو حصلت اى ظروف او زعلتها ولا حاجه تعمل نفسها جاتلها الحاله وتدينى حتة علقه محترمه مش كده ؟ لاااااااااااا ماينفعش
وبعدين كمان دى كانت متعلقه بمحسن ده ع الاخر وانا مااضمنش بقى اذا كانت لسه بتحبه ولا نسيته
مش عارف بس هو الموضوع ماينفعش وعلى العموم انا منديلى لسه طاير وماوقعش فى حجر صاحبة النصيب (ده كلام الحاجه ام محمد امى ربنا يخليهالى)
شرفتينى بالزيارة ياست الكل
تقبلى تحياتى
ودمتى بكل خير وود
********************
أختنا فتافيت
تحياتى
اولا يامرحب بيكى فى اول زيارة (رزقك فى رجليكى اول زيارة ليكى مضروب فيها)
اضحكى براحتك ياستى ولا يهمك عليا بقى او على الموقف بتاعك مافيش مشاكل
بس انتى عرفتى تاخدى حقك انما انا لسه بس ربنا يسهل ان شاء الله
وصدقتى والله انتو بتعرفو تاخدو حقكم من الستات او من الرجاله
انما احنا ياعينى غلابه ومساكين منقدرش نكح مع واحده فيكم والا كلابشات على طول ( لينا رب )
بس عجبتينى فى الحته بتاعة اوعى تروح عندهم البيت لأ واعيه
مش قال والنبى ممكن اتدبس فى الجوازة هى البنت مش وحشه واهلها ناس كويسين بس ماينفعش (اناعملت بنصيحتك من قبل ماتقوليها ومش بعدى حتى من شارعهم)
الله عليكى بتشتغلينى جروب على الفيس بوك واللى خدوا من الحب جانب والكف علم على خدودهم
ماشى ماشى
بس خدى بالك الايام دول ومسيرى امسكلك فى مدونتك موقف وساعتها ابقى اتحملى بقى (انتى اللى جبتيه لنفسك)
ولايهمك طولى براحتك انا مش بزهق بالعكس انتى دمك خفيف
واكيد طبعا نورتى المدونه بس انا مش عاوز اقول كده علشان احنا مافيش بينا المجاملات دى برضو كده
شكرا على مرورك الجميل وتقبلى تحياتى
ودمتى بكل خير وود
والسلام عليكم ورحمة الله وبركاته

ريمان يقول...

ههههههههههههههه

ههههههههههههههههههه

هههههههههههههههههههههههههههههه

ههههههههههههه

مش قادره امسك نفسى من الضحك ابدا

دى يعينى شكلها تعبانه نفسيا اوى من خطيبها ده

شوفت الرجاله ممكن يجننوا الستات ازاى بقه

اهى واحده مش طبيعيه اهى بتمشى تتضرب الناس فى الشارع من جنانها

المعتصم يقول...

بسم الله الرحمن الرحيم
السلام عليكم ورحمة الله وبركاته
أختنا ريمان
تحياتى
صحيح هى اتجننت من اللى حصل معاها وفيه حاجات تانى طبعا ماكنش ينفع انى اقولها فى البوست
بس اللى عمل معاها كده ده واحد ندل
انما مش معنى كده ان كل الرجاله زيه واندال
والا كنت انا بقى اول ماضربتنى بالقلم كنت روحت هابدها قلمين على وشها وماكنش فيه حد من الناس وقف علشان يدافع عنها ولا ايه ؟؟؟؟
وبعدين لو ركزتى شويه هتلاقى ان عدد الرجاله اللى جننتهم الستات اكتر من الستات اللى جننتهم الرجاله
هههههههههههههه
على العموم كويس انك ضحكتى
نورتى المدونه وشكرا على المرور
تحياتى ودمتى بكل خير
والسلام عليكم ورحمة الله وبركاته

القلم السكندري يقول...

السلااام عليكم ورحمة الله وبركاته

أهلا بالحبيب


أولا أعتذر عن التأخير بس بعذر :) مش عارف بقيت حجة بايخة من كترها بس معلش


ثانيا بقي ده موقف معقد ومنيل بنيلة

هو بصراحة.. لو بتجيلها حالة توهان فعلاً فهي مرفوع عنها القلم في حالة تغيب العقل دي.. لكن يلزم وليها كفّ اذاها عن الناس

وهو مسئول بقي ميخرجهاش أو ميخرجهاش لوحدها أو يتصرف بأي وسيلة يمنع أذاها.. لأن فعلا الموقف صعب

وبصراحة لو كنت سحبت الجرار وشديت الزناد مكنتش هعرف أقولك حاجة.. مسألة الإعتبار دي مش سهلة.. أنا مش بسخن والله بس أنت عارف بقي :) الظاهر صعايدة زي بعض


وأعتقد أن حفظ اعتبارك متحقق بمجرد علم أهل المنطقة بس أنه سوء تفاهم وكدة وخلاص


تحياتي يازعييم

Kiara يقول...

لا حول ولا قوة الا بالله موقف صعب اوي

حسبي الله ونعم الوكيل في اللي يظلم بنت بالشكل دا

بس برده انت ذنبك ايه

في رايي احتسب القلم دا عند الله والمسامح كريم

المعتصم يقول...

بسم الله الرحمن الرحيم
السلام عليكم ورحمة الله وبركاته
***************
الاخ الغالى القلم السكندرى
وعليكم السلام ورحمة الله وبركاته
منور ياهندسه
ياعم ولا يهمك وكان الله فى العون انا عارف الظروف (اسكت النت عامل فياعمايل بايخاااااااااااااااااااه)
هو الموقف منيل صحيح بس انا عذرت البنت وهما عندها فى البيت مش بيخلوها تخرج الا قليل جدا والمفروض ان حالتها اتحسنت خالص بس هو تقريبا فى اليوم ده من حظ اخوك اللى زى الفل كان فيه حد ضايقها فطلع عليا انا يللا الحمدلله
بس انت عارف انا سحبت الطبنجه ليه ؟
اولا كنت متغاظ جدا وده اول رد فعل
ثانيا علشان الناس والمجاميع اللى كانت واقفه يامؤمن لو مكنتش عملت كده كنت اخدت علقة موت وكل اللى يحب النبى يضرب انما اول ماعزيزة طلعت خلصت الكلام على طول وكله بقى يحوش فيا انا مش بيضرب معاها
انما طبعا ماكنش ينفع انى اضربها عيار حتى ولو كنت متغاظ ومنفعل كانت الناس هتعايرنى بيها يابشمهندس
وانا عارف انك مش بتسخن ولا حاجه انت جاى تهدى النفوس انا عارفك
الموقف اتعرف كويس وبعدين الناس اخرهم يومين وبينسوا وكمان المشاكل هنا كل يوم فالناس مش ملاحقه تفتكر مين اللى اتضرب بالقلم امبارح والحمد لله العمليه ماشيه تمام
انما ماتقلقش مش هنسيب حقنا وهنظبط المعلم محسن وحددنا المعاد الاسبوع الجاى ان شاء الله وهبقى اقولك على اللى حصل
نورت المدونة يا باشا
واسعدنى مرورك
تقبل تحياتى ودمت بكل خير وود
**************
الاخت كيارا
تحياتى
حسبى الله ونعم الوكيل فى كل اللى بيظلم
ذنبى انى كنت ماشى قريب منها بس
انما مش مشكله الحمد لله انها ماوقعتش مع حد سافل كان غلط فيها وهانها دى برضو انسانه مريضه وعذرها مقبول
لو قلت لك انى احتسبت القلم عند ربنا ابقى بكدب عليكى وعلى نفسى من قبلك انا هخلص القلم بس من الاخ اللى ظلمها ومش هبقى كريم
الاسبوع الجاى ان شاء الله مظبطينله حتة خطه كده علشان نرنه علقه محترمه
وربنا يقدم مافيه الخير
اسعدتنى زيارتك لمدونتى المتواضعه ولو انى مكسوف منك اول مرة تيجى المدونة تلاقينى مضروب كده! هههههههههه
تقبلى تحياتى
ودمتى بكل خير وود
والسلام عليكم ورحمة الله وبركاته

Kiara يقول...

كدا تمااااااااااام

وبحدين مكسوف دا انت حتي قايل الاخت كيارا يحني في اخ بيتكثف من اخته


وربنا يوفقكوا في الخطة :)

د/عرفه يقول...

ههههههههههههه
فعلا ضحكت بجد
بس بصراحه احتسب ثوابك عند ربنا والمسامح كريم

ومش عايزك تتحمس بعد كده وتخرج بالطبنجه اصلا
والقلم السكندرى بيولع فيها
بس انا فعلا كده اقتنعت انه صعيدى بجد ومش من الاسكندريه
لو عايز اى علاج للقلم
انا فى الخدمه
ههههههههههههههههه
ولا هو خف دلوقت

م/ الحسيني لزومي يقول...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
الاخت كيارا
تحياتى
وشكرا طبعا على مرورك
انما مكسوف صحيح يعنى احنا اخوات بس اول زيارة كانت المفروض كده يبقى فيها حاجه انتى بتحبيها (المثاثه) مش ضرب اقلام
اما بخصوص الخطة فقد تم التنفيذ بحمد الله والمدعو محسن اتظبط النهارده
ممكن اعمل تحديث بعد شوية بس اما اخلص شوية حاجات ورايا كده
تقبلى تحياتى
ودمتى بكل خير وود
**************
حبيبى د/ عرفه
تحياتى
والله كويس انك ضحكت
اما موضوع احتساب القلم عند ربنا فالحمد لله اخدنا بتارنا من محسن
اما المهندس حسام (القلم السكندرى) فده حبيبى وانا عارف انه كان بيهدى النفوس وبعدين ده طلع من الجماعه اللى هما افظع من الصعايده ياعم
وحكاية الطبنجه دى انا بحاول انى مطلعش بيها كتير بس خلاص اتعودنا على كده هنعمل ايه بس خد بالك لو ماكنتش موجوده انا كنت اتروقت ترويقه صح
ونشكر كرمكم الزياده ده ياسيدى بس القلم خف وهروح لدكتور الاسنان بتاعى وانت شايلينك للحاجه الكبيرة يادكتور
بس والنبى انا مش عاوزك تزعل نفسك بسبب ماتش النهارده عادى يعنى الكورة مكسب وخسارة ومافيهاش حاجه لما تتغلبولكو ماتش من المحله ده حتى كويس علشان الحسد والعين
هههههههههههههههههههههههههه
انا بهزر يادكتور
تقبل تحياتى
ودمت بكل خير وود
***************
استاذنا العزيز
واخونا الفاضل
المهندس/ الحسينى لزومى
تحياتى
طبعا انا عارف انك ماقريتش البوست بس احسن لانه يعنى هايف شوية
وان شاء الله هروح دلوقتى اهه اقرا نص الاتفاقيه بسرعه
وربنا يسترها معانا ومنشتركش فى مصيبه جديده بالاتفاق مع الكلاب والخونه
تحياتى
ودمت بكل خير وود
والسلام عليكم ورحمة الله وبركاته

zainab يقول...

اخى المعتصم

السلام عليكم ورحمة الله وبركاته

الحمد لله تمت الخطة

أكيد يا معتصم ربنا له حكمه من اللى حصل ده ( من ان البنت تقابلك و تاخد منها القلم و تصر انت على انك تضرب محسن )

بس معلش يا معتصم مالوش لازمه الكلمه دى "وبعد كده عمل فيها صايع" أختك بأه و الظاهر عليا اتعديت منك ههههه
وربنا يستر أصل محسن يعرف و الموضوع يتطور

تحياتى

zainab يقول...

و بعدين يا معتصم شكل المطوه دى يخوف

انت بتعمل لنا رعب فى المدونه و لا ايه ؟؟

تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة زينب
تحياتى
الحمد لله الخطة تمت وانا اخدت حقى وممكن اكون اتفشيت شويه من اللى عمله فى عزة بصراحه لانه كان مضايقنى جدا
اكيد طبعا ربنا له حكمة فى الموضوع لان كل حاجه بتحصل مكتوبه ومقدرة ومافيش حاجه بتحصل وبس
لأ يازينب دا انتى كده مش اتعديتى بس دا انتى كده حالتك بقيت خطيرة وماينفعش تسكتى على نفسك لازم تروحى للدكتور (بس مش هشيل الكلمة)
وبعدين مايعرف محسن انى كنت مدبرله الموضوع ده هيعمل ايه يعنى ؟ ولا حاجه اخرها خناقه تانى وبرضو هيتضرب فيها
بس ايه رأيك فى جو الرعب اللى انا عامله ده ؟ مطاوى وطبنجات واكشن اهه يعنى جو عصابات ولا بتوع المافيا
بس عارفه يازينب مش عارف ليه ارتحت بعد اما ضربته على الرغم من انى مش بحب المشاكل والخناق خالص والله العظيم بس انا كنت حاسس انه مش بنى ادم بعد اللى عمله فى البنت وده اللى خلانى اصريت على ضربه
ماعلينا
شكرا على مرورك وتقبلى تحياتى
ودمتى بكل خير وود
والسلام عليكم ورحمة الله وبركاته

zainab يقول...

أخى المعتصم

الحمد لله بجد انا كنت متغاظه من محسن ده و كان صعبان عليا عزة قوى ربنا يشفيها و يعافيها و يرزقها الزوج الصالح اللى يعوضها خير ( دعوة لأخيك المؤمن بظهر الغيب )

أما بالنسبه للكلمه يا معتصم اللى قلت لك عليها مالهاش لازمه ( انت و راحتك )معلش أختك بأه

أما بالنسبه لمحسن و انه يعرف الموضوع فعلا ربنا يستر أصل الموضوع يكبر و تقضيها شكل و خناق وضرب

تحياتى

Kiara يقول...

يالهووووووووووووووووووووي دا ولا تخطيط الحلفا في الحرب العالميه ولا تمويه ونظام فين المثاثه بقي حلاوة مااخدت حقك ؟؟؟؟

فتــافيت (رحاب الخضري) يقول...

الله .. مبروووووووووووووك

وخدت تارك وبردت نارك

الف مبروووك .. وهاطخ لك عيارين تحية يا ولد العم

طخخخخخخ طخخخخخخخ

بس المطوة شكلها جامد بصراحة .. ديه بتاعته بجد .. ولا من على النت

المعتصم يقول...

بسم الله الرحمن الرحيم
السلام عليكم ورحمة الله وبركاته
************
أختى زينب
تحياتى
الحمد لله اتسترت
وربنا يشفيها ويعافيها وريرزقها الزوج الصالح(بس بعيدعنى)هههههههههه
وماتقلقيش حتى لو عرف انا عامل حسابى ومظبط ومسيطر
تحياتى ودمتى بكل خير وود
************
أختى كيارا
تحياتى
كل دى يالهووى ليه يعنى هو احنا عملنا حاجه تستاهل ؟ دا كله كلام فاضى
بخصوص المثاثه سيادتك انا باعت اجيبلك مثاثه من التركى(من مصنع حلويات عمك اردوغان شخصيا)ومن النوع المفتخر
ياخبرواحنافى ديكى الساعه بس ماتقوليش لحد علشان انا مش هجيب كتير انتى عارفه شحن ومصاريف وكده ههههههههههه
نورتى المدونه
تحياتى ودمتى بكل خير وود
*************
أختى فتافيت هانم
تحياتى
الله يبارك فيكى
وعقبال مالو عندكم تار تخلصوه
صح كده امال ايه مش احنا ولاد عم يبقى لازم تطخيلى عيارين بس ماكانش له لزوم التعب انا امبارح كنت فى فرح وعملنا احتفاليه تمام وضربنا لما قلنا ياكفا
طبعا المطوة من على النت لان المطوة بتاعته شبهها بس مصديه
نورتى المدونه
ودمتى بكل خير وود
والسلام عليكم ورحمة الله وبركاته

fL0weR-giRL يقول...

السلام عليكم

هههههههههههههه

ايه الموقف الجامد دا الي عاملته في محسن

بس كان ناقص حاجة تعملوها في الأخر

تقولوا لمحسن احنا في برنامج الكا ميرا الخفيه تحب نزيع ولا ما نزعش

ههههههههههه

الفراغ يقول...

اجمل تعليق قرأته عندك هو اخر تعليق
للاخت فلاور جيرل
بس كانت علقه ابهه
...........
حلوه لو زعلتها تعمل الحاله جاتلها
لا يا شاطر ماهى تفكر قبليها 100 مره دانت صعيدى جامد وخدتلها حقها
ولا اقولك ابعد عن الشر وغنيله
............
وعلى راي الست الوالده
لسه منديلك ماوقعش فى حجر صاحبة النصيب
ربنا يقرب البعيد ويرزقك بست البنات

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
أختى flower-girl
تحياتى
اضحك الله سنك
بس ايه رأيك ؟ ظبطناه صح ؟
انا خفت لاحسن اعمل كده ابراهيم نصر بتاع الكاميرا الخفية يرفع علينا قضية سرقة حقوق الملكية الفكرية ومحسن يشهد معاه وتبقى حكاية
ههههههههههههه
شكلك كده مش مصدقه الموقف بس ماعلينا
شكرا على مرورك
ودمتى بكل خير وود
***************
الفراغ
تحياتى وتقديرى
نورتى البوست ياست الكل
هو التعليق فعلا دمه خفيف
والعلقه كانت علقه محترمه اتظبط اتظبط يعنى
...........
ساعتها مش هتفكر لما ازعلها انى ضربت البشمهندس واخدت لها جزء من حقها وهتتحجج بليس على المريض حرج واكل انا العلقه
لأ احنا كده كويسين وزى الفل وزى ماحضرتك قولتى ابعد عن الشر وغنيله وكمان ارقص له (مش ناقصه بتنجان)
..........
ربنا يخليكى على دعواتك
تقبلى تحياتى
ودمتى بكل خير وود
والسلام عليكم ورحمة الله وبركاته

القلم السكندري يقول...

السلام عليكم:

أخي الحبيب زعيم حلف (أبر إيجبت) الدولي

نبارك لكم النصر والضربة الجوية الناجحة في موقعة (محسن) ..

ولكن أيها المعتصم.. الواحد برده بيسمع ديما في مواقعكم مثلا يقولك تلاتين قتيل وخمسين جريح مع إصابة بعض أهالي المحافظات المجاورة بجروح طفيفة.. ولا مثلا أن المعركة دارت علي أنغام الرشاشات..

إلا ما سمعنا عن أي حاجة من دي هنا يعني في الموقعة دي؟؟!!


يا جماعة أنا مش بسخن ولا حاااجة

ألا الدكتور عرفة ييجي يقول أني بسخن مثلا .. لا ده الاتنين حبايبي برده وده مجرد استفسار بسيط

وبررييئ جدا



تحياتي يا زعييم

المعتصم يقول...

بسم الله الرحمن الرحيم
السلام عليكم ورحمة الله وبركاته
أخى الحبيب القلم السكندرى
تحياتى
ايه ياعم حسام
دا انت جاى مش تسخن بس دا انت جاى تولع وتدمر
اولا الله يبارك فيك وعقبال النصر القادم ان شاء الله لما نفصل الصعيد عن الوجه البحرى ونعمل جمهورية مستقله وبعد كده نروح على طول طالعين على فلسطين ومخلصين الموضوع بتاع شويه البتوع دول اللى مسميين نفسهم اسرائيل
مش ذنبى انك مش مثقف ومش بتسمع الاذاعات الاجنبية الموقعه اتذاعت على قناة الذخيرة وقناة الآليه 1,2 (السريع والنص آلى)
بس هو فعلا احنا كنا متكتمين على الموضوع علشان الامن القومى انت عارف
زطبعا برضو علشان الرأى العام انت فاهم
واكيد فيه نوع من الخداع والتضليل انت هارش
انما علشان انت حبيبى وانا عارف انك بتسأل بكل برأأأأأه احب اقولك ان المشرحة الاسبوع اللى فات كان فيها امممممممم 6 جثث وخمسة مصابين فيهم اتنين حالات حرجه (الموضوع ده بجدولو مش مصدقنى ابعتلك نمرةالمستشفى ابقى كلمهم)
ياريت تهدى بقى وتبطل توليع فى الدنيا
ســـــــــــــــلام ياهندسة

Sweet Violet يقول...

هههههههههههههههههههههههههههههههههههه
ههههههههههههههههههههههههههههههههههههههههههههههههههههه

مش قادره بجد همووووووت من الضحك ... امى دخلت عليا بتقولى انتى اتجننتى ولا ايه

هههههههههههههههههههههههههههههههههههههههههههه

لالالا بس الموقف جامد على فكرة بس من الواضح انك اخدت حقك وحقها من محسن

ماانا جيت بقى بعد التحديث ((:

بس كل الاسلحه اللى قولت عليها مينفعش انا اشيل حاجه منها

انا قولت هجى الاقى حاجات بناتى

لالالالا انا عايزة بوست مخصوص للاسلحه البناتى بقى هه

ادعى لى بقى ان الشهر ده يعدى على خيييييييييييير

مش الموبايل بتاعى وقع من الدور التالت عااااااااااااااااااااااااااااااااااااااااااااااااااااا

المعتصم يقول...

بسم الله الرحمن الرحيم
السلام عليكم ورحمة الله وبركاته
sweet
تحياتى
اه انتى جيتى بعد تنفيذ عاصفة الصحراء على المدعو محسن
ده كان موقف منيل بستين نيلة
الحمد لله عدى على خير
انما بقى ايه حكاية انه مافيش حاجه تنفع تشيلها البنات دى ؟؟؟؟؟
وايه الاسلحه البناتى اللى انتى عاوزانى اشيلها دى ؟؟؟؟؟؟
وبعدين بناتى انا مالى ومالها ؟؟؟
انا حتى معنديش اخوات بنات
وكمان ماالبنات ممكن تشيل الطبنجه عادى خالص يعنى
فيه طبنجات صغيرة كده وخفيفه فى الضرب وزى العسل
شاورى نفسك وممكن نجيبلك واحده وهعلمك عليها كمان
صدقينى ضرب النار متعه متعه يعنى
وكويس انك ضحكتى الحمد لله
ياستى فداكى الموبايل والحمد لله انها جت فيه وانتى كويسه
وربنا يسهل والشهر ده يعدى على خير ان شاء الله واهو خلاص هيخلص اهه
هههههههههههههههههههه
تحياتى ودمتى بكل خير وود
والسلام عليكم ورحمة الله وبركاته