الاثنين، 5 يناير، 2009

اللامبالاه




بسم الله الرحمن الرحيم

السلام عليكم ورحمة الله وبركاته

النت كان قاطع عندنا وده عادى وطبيعى يعنى مش جديد ولما ربنا اكرمنا واشتغل حبيت اتصفح بعض المدونات اللى بحب اقراء اراء اصحابها وكمان التعليقات عندهم لانى بستفيد منها جدا ومنهم مدونة اخ فاضل كله حماس للاسلام وغيرته على دينه واضحه جدا وفى التعليقات لقيته بيقول على الناس اللى بتقول واحنا مالنا ومال بتوع غزة والكلام ده بيقول عليهم منافقين

اللى اثارنى انى وبعد العمل كنت قاعد مع مجموعه من الناس بنتكلم وفيهم ناس كانت بتقول واحنا هنعملهم ايه نروح نموت وباقى العرب قاعدين يتفرجو واشمعنا احنا يعنى وعلى فكرة الناس دى فيها ناس كتير ملتزمة جدا وكويسه جدا بس مش فاهمه الموضوع صح
يااخوانا انا مش عاوز الواحد ياخده الحماس والغيرة تخليه يتعصب على ناس قريبه منه

احنا نشوف ايه السبب اللى يخلى حد مسلم يقول الكلام ده ونتكلم معاه ونشرح له ونفهمة القضيه

ماتنسوش اننا فى بلاد الناس فيها مش بتعمل اى حاجه بارادتها وعشان كده تلاقى غالبيه الناس عندها لامبالاه فظيعه وقبل اللامبالاه دى يأس من كل حاجه
احنا بقى دورنا والواجب علينا اننا نحاول نصلح العيب الخطير ده فى اللى حوالينا

يعنى انا لما قعدت اتكلم مع اللى حواليا ونتناقش ونختلف بس كل مايقول حد فيهم حاجه ارد عليه عليه واقوله الدين بيقول كذا وكذا واننا بعد كده الدور جاى علينا واننا لازم نتكاتف ونقف مع بعض علشان نخلص من اللى امتنا فيه ده ونحسن من احوالنا ويكون عندنا امل فى الله كبير اننا نعيش عيشة احسن من اللى احنا عايشينها دى ويكون لينا رأى
الكلام ابتدى يجيب نتيجة ومبادرة اننا مثلا نصوم مع بعض بكرة وندعى المولى عز وجل واحنا صايمين لعله يتقبل مننا ودى كانت البداية
لقيت فيه كلام كتير اتغير وابتدى ياخد منحنى تانى غير واحنا مالنا وهو مافيش حد يحارب غيرنا وفيه بارقة امل اننا نكون ايجابيين ونرمى السلبية ورا ظهرنا
ممكن ناس كتير تختلف معايا فى رأيى ده بس اللى انا عاوز اقوله اننا مش هنقدر نغير اللى حوالينا فى يوم وليلة ولازم نتكلم ونتحاور ونشرح القضية ونعرف الناس ايه اللى لازم علينا نعمله ومانطلقش الاحكام عليهم لمجرد انهم مش فاهمين
وبعدين احنا عشان نحقق اللى عاوزينة فعلا مش هينفع نحققه من غير اهلنا وناسنا اللى عايشين معانا فى بلدنا لان دول هما اللى هيكونو السند والعون لينا
زمان من كام سنة كده لما كنت فى الجيش بقضى الخدمة العسكرية كان معانا عساكر كتير من العينة اللى بنتكلم عليها وكنا بنسميهم السكلية بس ساعة الجد لما كان بيبقى فيه تدريب بالذخيرة الحية او مشروع (وده ممكن الواحد يموت فيه عادى يعنى) كنا بنلاقى العساكر كلها موجوده حتى الجماعه السكلية على الرغم من انه ممكن ناس فيهم تقدر تزوغ بس ماكنش بيحصل وكنا بنروح التدريب كلنا مع بعض عشان احنا شايفين ان دى حاجه بجد تنفعنا وتنفع بلدنا والكل بينسى الكلام اللى بيتقال بتاع واحنا مالنا ومش عارف ايه
فيه واحد صاحبى مات قدام عنيه تلاتة اصحابة فى مشروعين بالذخيرة الحيه وكانو اصحابة خالص واول ماخلصنا كان بيسب ويلعن فى الجيش واصحابة ومع ذلك اول ماجتلنا الاستدعا هو اول واحد راح لما عرف ان المشروع عبارة عن مناورة حيه وقبل كده لما كان فيه استدعا عادى مش مشروع حرب ماراحش
هى دى الروح اللى انا بتكلم عليها والواجب اللى علينا اننا نعمله هو اننا لازم نكلم الناس ونعرفهم القضية ونحركها فيهم ونحاول نخرجهم من حالة اللامبالاه دى وبعد مانعمل اللى علينا هنلاقى فيه تغيير كبير وهايل واللى بعد كده هيقول وانا مالى وهو انا اروح اموت ليه هو ده اللى هيبقى منافق فعلا ومش حريص على دينه ولا على بلده
هو ده رأيى
وطبعا الخلاف فى الراى لايفسد للود قضية
ياريت نتناقش بموضوعيه فى الكلام ده ولو حد شايف ان كلامى غلط ياريت ينصحنى ويعرفنى غلطى فين له منى كل الشكر والتقدير

سبحانك اللهم وبحمدك اشهد ان لا اله الا انت استغفرك واتوب اليك

والسلام عليكم ورحمة الله وبركاته

هناك 10 تعليقات:

موناليزا يقول...

متفقة معاك جدا
فاذا أمرت أن تطاع فأمُر بما يستطاع

saheda.com يقول...

إصابة أربعة جنود صهاينة في الساعة الأخيرة من القتال في غزة... استشهاد 70 فلسطينيًّا بينهم 21 طفلاً و11 سيدةً وإصابة 371 آخرين منذ بدء التوغل الصهيوني في قطاع غزة... مستشفيات القطاع تعاني من أزمة كبيرة بسبب الحرب الصهيونيه وصعوبة وصول الطواقم الطبية... كتائب القسام تقصف تجمع مغتصبات أشكول بصاروخ جراد... الجيش الصهيوني يعترف بسقوط قتلى في صفوفه... القسام تؤكد مصرع وجرح 25 جنديًّا صهيونيًّا... سرايا القدس: المجاهدون في غزة بالآلاف جاهزون لسحق العدوان... القسام تقنص 3 جنود صهاينة ببيت لاهيا... قصف مغتصبة "جوليت" الصهيونية بصاروخ قسام رغم التحليق المكثف للطيران الصهيوني... سقوط صاروخ على بلدية مغتصبة أشكول بشكل مباشر... القسام تفجر عبوتي أفراد بقوة صهيونية خلف جبل الكاشف... القسام تقصف قاعدة بتسليم الصهيونية أكبر قاعدة برية في المنطقة الجنوبية بصاروخي جراد.

بـسـمـــة صـــــلاح يقول...

السلام عليكم ورحمة الله وبركاته
وأنا كمان متفقه معاك
ماشاء الله كلامك مقنع
ربنا يكرمك

عابر سبيل يقول...

بسم الله الرحمن الرحيم
السلام عليكم ورحمه الله وبركاته
اولا نشكر حضرتك علي هذا الطرح وهذه الايجابيه لان كل واحد مننا علي ثغر من ثغور الاسلام فليحظر ان يؤتي الاسلام من قبله
ولكن لدي راي قد يكون صواب وقد يكون خطا
ان كويس ان نشجع بعض علي عمل الخير من صوم وصلاة وغيرها وكمان نبث روح الامل في المسلمين لان النبي عليه الصلاة والسلام قال
اذا قال الرجل هلك الناس فهو اهلكهم او اهلكهم او كما قال عليه الصلاة والسلام اي ان الذي يقول هللك الناس فهو واحد من اتنين اما سبب في هلاكهم او هو اكتر واحد فيهم هلاكا
اما راي فهو ان حال الامه وما وصلت اليه من فرقه هو حال اسرنا احنا لان من وجهة نظري ان الاسرة هي مثال صغير للامه فلو نظرنا الي الفرقه بين المسلمين سواء في فلسطين او العراق هنلاقي برضه فرقه اصغر ولكن جوا اسرنا احنا علشان كدا لازم نبقي اكتر ايحابيه ومش صوم وصلاة بس بس كمان معامله لو حد مننا قاطع لرحم أو شايف حد قربي منه قاطع لرحمه فليعينه علي الصلح قال تعالي (واصلحوا ذات بينكم)
ولازم نعرف ان احنا مأمورين بالامر بالمعروف والنهي عن المنكر
وتقبل مني هذا الرأي القابل للنقاش
نفع الله بنا جميعا الاسلام
قال تعالي (ان اريد الا الاصلاح ما استطعت)
وجزاك الله خيرا
عابر سبيل

مدحت محمد يقول...

الحقيقة

احنا مش فى ايدينا

غير الدعاء

والؤساء محتاجين يفوقو الشعب شوية

المعتصم يقول...

بسم الله الرحمن الرحيم
السلام عليكم ورحمة الله وبركاته
***************
أختى الكريمة موناليزا
تحياتى وتقديرى
دايما كده والله رافعه من روحى المعدنية
جزاكى الله خيرا ودمتى بكل ود
***************
أختنا شهيده
لك كل الشكر على ماتمدينا به من اخر الاخبار
تحياتى ودمتى بكل خير
***************
أختى الصغيرة بسمة
وعليكم السلام ورحمة الله وبركاته
ماهو انتى لازم تتفقى معايا هو مش احنا صعايده زى بعض
يعنى تفكيرنا واحد هههههههههه
ربنا يكرمك وينجحك
تحياتى ودمتى بكل خير
***************
أختى عابر السبيل
وعليكم السلام ورحمة الله وبركاته
تحياتى وشكرى لكى انت على ماتثيرينه من نقاش كله فائده لنا وهو ان شاء الله فيه نفع لنا ولامتنا
اختى انا لم اتكلم فى الموضوع لكى اتحدث عن اخونا الفاضل الذى قال انهم منافقين ليس هذا هو بيت القصيد وانا ارى من كلامة انه انسان ملتزم ومحترم وانما قال ما قال بسبب غيرته على دينه وحماسه فقط ليس الا ولا يقصد بذلك اى شيئ اخر انا بس حبيت اننا نناقش الموضوع مع بعض ونشوف ايه اللى واجب علينا اننا نعمله علشان نصحى همة الناس شوية
وعلى فكرة انا لسه من شوية صغيرين قاعد بتكلم مع اتنين فى تاكسى كان فيه مظاهرات وكده بيتكلمو عليها وبيقولو بقى وانا احاول اقنعهم انها مش حاجه وحشه وانها مظاهرات سلمية يعنى مجرد تعبير عن رأى اصحابها يووووووووووة مااقولكيش طلعت انا مش بفهم ووووو الخ
بس مش مهم لانه الناس اللى عاشت طول عمرها فى وضع معين مش هنقدر نغيرها من اول مناقشه وعشان كده مش لازم نيأس ونستمر فى المحاولة
ومتفق معكى فى رأيك تماما لاننا مبقيناش نشوف الاسرة زى الاول دلوقتى كل واحد فى دنيا وحده والوضع الاسرى كله متفكك ومن هنا لازم تكون البدايه ان شاء الله لازم نحاول اننا نرجع نلم شمل اسرتنا وبعد كده بشوية نلم شمل البيت الكبير الاعمام والاخوال والعيلة وبكده نكون نجحنا اننا نوحد الصفوف الداخليه وتكون دى بداية التوحد العربى (يارب ادينى الامل اللى يخلينى اشوف امتنا موحده)
أختى الكريمة دائما نقاشك يسعدنى واستمتع بالحوار معك
بارك الله فيكى وجزاكى كل الخير
تقبلى تحياتى ودمتى بكل ود
****************
أخى مدحت
تحياتى
بس موضوع احنا لانملك الا العاء ده غلط
ايوة احنا ندعى ربنا فى كل وقت ومع كل ركعه وفى كل موقف
بس فى نفس الوقت لازم علشان ربنا يستجيب للدعاء بتاعنا اننا نعمل الاعمال اللى تخليه يقبل دعائنا ونبداء نصلح من نفسنا
ساعتها هنلاقى الدعاء اتحقق
تحياتى وشكرى ودمت بكل خير
**************
والسلام عليكم ورحمة الله وبركاته

ghorBty يقول...

السلام عليكم ورحمة الله وبركاته

بارك الله فيك بجد كلام رائع كذا نقطه عجبتي واحب اتناقش فيها

احنا بقى دورنا والواجب علينا اننا نحاول نصلح العيب الخطير ده فى اللى حوالينا

ودا عين العقل بعيدا عن القضيه ودورنا فيها شوفوا كدا لو حد التزم بتلاقيهم عاملين مع بعضهم حزب وجماعه سواء في الجامعه او غيره ومالهومش دعوي بالناس التانيه ودول يبصوا لدول انهم متعصبين ودول يبصوا لدول علي انهم منحرفين وحصل الفرقه الكبيره اللي احنا شايفينها فين رحماء بينهم وفين التناصح والحب في الله انت لو بجد التزمت وربنا فتحها عليك واجب عليك تنبه الغافل وتساعده وتمد له ايديك وتفهموا بالحكمه والموعظه الحسنه ونتبع نهج الرسول عليه الصلاة والسلام في الدعوة لكن تقفل علي نفسك وتقول انا مالي كل واحد فينا مامور ينهي عن المنكر ويغيره فياريت بجد الكل يدرك كدا ويتحرك وبلاش اللامبالاه في الموضوع دا بالذات لو كل حد وضع علي عاتقه هم الدعوة والتناصح الحال كان اتغير كتير لان كما قال رسولنا الكريم الخير في امتي الي يوم الدين الناس فيهم خير والله بس عايزين اللي ينورهم ويفهمهم الصح من الغلط مش نقعد ننقد وبس

:
كمان نقطه لازم تكون اللي بينصح دا قدوة بالفعل قدامهم علشان يتقبلوا منه الكلام ولازم يكون عنده رصيد حب عندهم فيسمعوا منه ويفهموا ويكون كلهم في ميزان حسناته ولو حصل والناس برضوه ما تغيرتش يبقي السبب علي فكره مش فيهم في الليس نصح اما انه ما قدرش يوصل لهم اللي هو عايزه صح وما اقنعهمش بمعني اصح او انه لم يصدق النيه مع الله فما حصلش التوفيق منه سبحانه وكدا والا كدا احنا مش مفروض نقعد نحاسب في بعض ونرمي بعض بالتهم احنا لو مؤمنين بجد يجب علينا التناصح والامر بالمعروف علشان ربنا عطانا الخيريه بالسبب دا

وبرضوه لازم نتعلم الصبر فعلا مش من يوم وليله الناس هتتغير شوفوا الانبياء قاسوا اد ايه في الدعوة سيدنا نوح قعد اد ايه 950 سنه ودا بيعملنا اننا ازم نكون عندنا صبر كمان

ودا في اي شئ عايز تقنع الناس بيه لازم نتبع الحاجات ديه
1: صدق النيه اني عايز اغير احوالهم علشان ربنا وعلشان يكون مجتمعنا اسلامي بجد

2: بالحكمة والموعظه الحسنه

3: الصبر ثم الصبر ثم الصبر وعدم الياس

4: الاستمراريه مهما كانت النتايج لعل كلامنا معاهم مش هياثر فيهم غير بعدين احنا نعمل اللي علينا ووقت ما ربنا هياذن هيقتنعوا ويهتدوا

5: لازم يكون عندنا حصيله كويس من المعلومات علشان كدا لازم دائما نكون في تطور

6: نعتبر دا هو هدفنا الاصلاح والتغيير ونعرف ان الطريق طويل ومستمر حتي نهايه عمرنا ونعمل ولا ننتظر النتايج ونقول مفيش فايده ونلقي بالللوم علي الناس لا بل نصبر وان شاء الله نجد النتيجه في ميزانا يوم الدين وبلاش نعقد نفسنا ونقول احنا بتكلم وبس كل شئ بيبدا بالكلام وهل كان دور الانبياء الا الكلام والتبليغ عن رب العزه وفي الاخر
انما عليك البلاغ وعلينا الحساب

لازم نفضل نتكلم ونتكلم الي عنده هدف يوصله بالطريقه اللي يقدر عليها بس المهم ان يوصل بعون الله وبلاش نقول كله كلام لاننا لو حتي سكتنا وما اكلمناش دي بقا السلبيه بعينها
شوفوا كدا
لُعِنَ الَّذِينَ كَفَرُواْ مِن بَنِي إِسْرَائِيلَ عَلَى لِسَانِ دَاوُودَ وَعِيسَى ابْنِ مَرْيَمَ ذَلِكَ بِمَا عَصَوا وَّكَانُواْ يَعْتَدُونَ{78} كَانُواْ لاَ يَتَنَاهَوْنَ عَن مُّنكَرٍ فَعَلُوهُ لَبِئْسَ مَا كَانُواْ يَفْعَلُونَ{79}

سبب اللعن انهم كانوا ساكتين ما نهاوش عن منكر بيعملوا

والرسول قال عن تغيير المنكر بثلاث حاجات
بيده واللسان والقلب

يعني لازم يكون هناك كلام باللسان ويبقي كدا انت عملت اللي عليك لما ربنا يسالك هتقول يارب انا بلغت

فاللهم اني بلغت اللهم فشهد

والسلام عليكم

غربتي

المستنصر بالله يقول...

طبعا كلامك فى محله جدا
يمكن الامبالاه اصابتهم بسبب قله حيلتهم باب الجهاد مقفول السفر لمساعده الجرحى ممنوع
فالناس بدل ما تحبط اتحول الامر عندهم للامبالاه
لكن لو احسوا بوجود تحرك حقيقى هاتلاقى مارد ظهر وخرج من القمم

تحياتى لحضرتك

حتى تشرق الشمس يقول...

السلام عليكم ورحمة الله وبركاتة
انا اتفق معاك
وارى ان معك كل الحق
فوسائل الاعلام بطلع حماس وفلسطين انهم
وحشين وارهابيين وعوزين الضرب بالرصاص
وبعض الناس للاسف بتقول يستهلوا مش هما اللى باعوا بلادهم
على الرغم لنهم ولا باعوا ولا حاجة اسرائيل خدتها منهم بالقوة عنوة
واللى يعرف التاريخ الحقيقى مش المزور يعرف انهم ماتوا وهما بيدفعوا عن ارضهم ضد الصهينة الملاعين
وايضا النصح بالمعروف والحسنى افضل شئ
لان الدين المعاملة
لما يكون انسان كويس بيعامل الناس بطريقة مش كويسة
الناس هتكرهه هو و الدين والالتزام
اما لما يكون بيعامل الناس عادى و
بطريقة كويسة
الناس هتحبة وهتحب الدين
وجزاك الله خيرا
اسفة على الاطالة

المعتصم يقول...

بسم الله الرحمن الرحيم
السلام عليكم ورحمة الله وبركاته
****************
أختى الكريمة غربتى
وعليكم السلام ورحمة الله وبركاته
بارك الله فيكى ودائما مااستفيد الكثير من مناقشاتك وارائك
معاكى حق والله دايما نلاقى حكاية التحزبات فى كل مكان الجماعه الملتزمين يقولو على الغير ملتزمين منحرفين والتنيين يقولو عليهم معقدين طب ليه مانتكلمش مع بعض ونتناقش والملتزم يقنع غيره بالالتزام ويدله على طريق الهداية؟ مش عارف(رجعنا تانى لمش عارف)
وياريت الكل يعرف ويتحرك لعلنا ننجح فى النصيحه وفى تغيير حالة اللامبالاة
واكيد طبعا لازم اللى يحاول ينصح الناس يكون قدوة حسنة وربنا يكرمة ويثبته ويصبره ودى اهم نقطه لان كتير مننا (وانا منهم بصراحه)مش بنصبر على حد وعند اول اعتراض بنترك الموضوع ونقول احنا عملنا اللى علينا وهما اللى مش قابلين نصايح من حد
اللهم ارزقنا الصبر وصدق النوايا واكرمنا بالعزيمة القويه
اختى الكريمة أتشرف دوما بارائك ونقاشك واستفيد منه الكثير
بارك الله فيكى وجزاكى عنى كل خير
تقبلى تقديرى ودمتى بكل ود
*****************
أخى الفاضل المستنصر بالله
تحياتى وتقديرى واهنئك على البوست المنشور فى مدونتك والذى اقل مايوصف به هو الروعه ففيه الداء والعلاج من القرآن الكريم والسنة النبوية الشريفه
حاله اللامبالاه مترسخه منذبعيد وليست وليدة اليوم او امس وتحتاج منا الى جهد كبير وكما قالت اختنا غربتى الى القدوة الحسنة والصبر وصدق النوايا وعنئذ سنجد التحرك بدء والعمل والمضى فى طريق النصر بإذن الله
اخى الفاضل تحياتى ودمت بكل خير وود
*****************
اختى الكريمة حتى تشرق الشمس
وعليكم السلام ورحمة الله وبركاته
بارك الله فيكى وجزاكى خيرا وفرج كربتك وازاح عنك همومك
اختى الفاضلة معكى كل الحق فى كلامك ولكنى لااتحدث عن قضية فلسطين وحدها انما نتحدث عن حال امتنا الاسلامية كلها ففى غزة يحدث مايحدث وفى العراق وفى كثير من بلداننا الاسلامية بل واقول فى بلدنا هذا ايضا
فنحن نتحدث عن حال الامه والذى نرجو صلاحه لكى تقوم وتفيق امتنا من غفوتها وتعود الى سابق مجدها وعزتها
اختى لاعليكى من الاطاله فكلنا نستفيد من النقاش ونتعلم تقبلى تحياتى ودمتى بكل خير
والسلام عليكم ورحمة الله وبركاته