الأحد، 29 مارس، 2009

خبر(المفروض انه حلو)



بسم الله الرحمن الرحيم



السلام عليكم ورحمة الله وبركاته






نايم فى امان الله(لسه يادوب واكل معلقتين رز بس مع الملايكه وهكمل)ولقيت الحاج داخل عليا الاوضه
*الله اكبر اصحى دى الدنيا مقلوبه
- الله اكبر ولله الحمد ومين الحمار اللى قلبها ؟ هو احنا عارفين نعيش فيها وهى عدله؟؟ وبعدين يعنى هى كانت عدله اصلاً ؟؟ انا شاكك فى الموضوع ده
* خبر حلو
- خير القدس اتحررت ؟
* لأ
- يبقى اللى بالى بالك مات وولده مش هيمسك مكانه وانت هترشح نفسك للمنصب؟
* لأ
- هيعملوا كاس العالم 2010فى اسيوط ؟
* لأ
- امال ايه بس ؟
* انت هتتعين
- طارق عامر اتصل بيك وقالك ان العملاء بتوع البنك الاهلى عاملين اضراب بسببى وانهم هيرضخوا اخيرا ويعيينونى ؟
* لأ
- بسسسسسسسسسسس كده يبقى مافيش غير سامح فهمى أكيد طلبك وقالك انه هيعيينى رئيس مجلس ادارة شركة بترول اسيوط صح؟؟
* لأ
- لا اله الا الله (مع دوسه مش خفيفه على طقم الشنان)
* انت هتتعين مدرس
- حسبى الله ونعم الوكيل
* فى مين ياابن ال00000
- مش انت ياحاج ربنا يخليك لينا وهو انا اقدر برضو ,, بس مش كنت سيبتنى نايم احسن ؟؟
* قوم علشان تحضر الورق
- دلوقتى ؟؟ حاضر
طبعا انا نفسى افتكر مين الجزمة اللى قدملى فى المسابقه دى وبعدين ماانا كنت مقدم فى مليون مكان اشمعنى دى اللى رشقت يعنى ؟؟ ولا هو علشان انا بكره التدريس عمى واكتر ؟؟
بصراحه انا مش عاوز اودى الورق ومنفض للعمليه بس الدنيا كلها مغلطانى وابويا زعلان منى بسبب الموضوع ده
مش عارف اعمل ايه ؟؟ بس انا عمرى مااتخيلت نفسى مدرس خالص , وبعدين انا اصلا ماانفعش مدرس نهائياً انا معنديش موهبة وفن توصيل المعلومه حتى لو انا فاهم الحاجه دى كويس خالص مش بعرف اشرح مش كده يبقى حرام ؟؟؟؟؟؟؟؟
حد يشور عليا اعمل ايه
اخلص الورق واقبل الوظيفه دى ؟؟ ولا انفض واكبر دماغى ؟؟
بجد مش عارف


والسلام عليكم ورحمة الله وبركاته

الجمعة، 27 مارس، 2009

سؤال

بسم الله الرحمن الرحيم


السلام عليكم ورحمة الله وبركاته

اولا انا بشكر كل اللى سأل عليا اثناء سفرى

وكل اللى زار المدونة

وكل اللى دعالى دعوة كويسه

وكل اللى ماعزمنيش (وهما عارفين نفسهم)

هههههههههههههههه

الحمد لله انا رجعت بلدنا العزيزة بالسلامه

نيجى بقى للسؤال وياريت كل واحد يجاوب عليه بس بعد تفكير شويه

هو ممكن حد يحب حد من غير مايشوفه ؟؟؟؟

يعنى مثلا واحد يحب واحده من غير مايشوفها او يتعرف عليها كويس ؟؟

مستنى اجاباتكم وردكم

تحياتى ودمتم بكل خير وود

والسلام عليكم ورحمة الله وبركاته

الثلاثاء، 24 مارس، 2009

إعتذار

بسم الله الرحمن الرحيم
السلام عليكم ورحمة الله وبركاته
اولا بعتذر لكل اللى دخل المدونة وسأل عليا وبشكره
بس النت كان عامل عمايله عندنا وفاصل من البلد كلها تقريبا
ويادوب لسه شغال من ساعات بسيطه
ومعلش سامحونى انى هغيب كمان كام يوم
لانى مسافر قاهرة المعز لدين الله الفاطمى بعد شويه وهاخد قطار الفجر
وادعولى ربنا ييسرلى الاحوال وارجع بسرعه
احسن انا مش بحب الزحمة بتاعة القاهرة خالص
تحياتى للجميع
والسلام عليكم ورحمة الله وبركاته

الثلاثاء، 17 مارس، 2009

سوار الذهب


بسم الله الرحمن الرحيم
انا اسف يا جماعه
بس النت عندنا فاصل وحتى التليفون مش شغال
السلام عليكم ورحمة الله وبركاته

المشير عبدالرحمن سوار الذهب هو الرئيس الاسبق للسودان هو الرئيس العربى الوحيد الذى تنازل عن الحكم طوعية واختياراً لغيره
المشير عبدالرحمن محمد حسن سوار الذهب - من مواليد السودان عام
1935 و الرئيس السابق للجمهورية السودانية، ورئيس مجلس أمناء منظمة الدعوة الاسلامية. استلم السلطةاثناء انتفاضة ابريل 1985 بصفته اعلى قادة الجيش وبتنسيق مع قادة الانتفاضةمن احزاب ونقابات ثم قام بعمل غير مسبوق في العالم العربي إذ قام بتسليم السلطة للحكومة المنتخبة في العام التالي. إعتزل العمل السياسي وعكف على عمل الدعوة الاسلامية. كان يشغل منصب رئيس هيئه اركان الجيش السودانى ، ثم وزير الدفاع وذلك في عهد الرئيس الاسبق جعفر نميري ، رفض تسليم حاميه مدينه الابيض العسكريه عندما كان قائدا للحاميه عند انقلاب الرائد / هم العطا عام 1971، حتى استعاد النميرى مقاليد الحكومه بعد ثلاثه ايام.
تخرج من الكلية الحربيه فى السودان عام 1955 وتقلد عدة مناصب فى الجيش حتى وصل الى وزير الدفاع
ثم تم ابعاده تعسفيا عام1972وذهب للعمل بقطر مستشاراً للشيخ خليفه بن حمد ال ثانى
ثم عاد للسودان عام وتم تعيينه رئيس هيئة الاركان وعام 1985 تم تعيينه قائداً اعلى للقوات السودانية
وفى ابريل 1985 وبعد الانقلاب العسكرى تقلد رئاسة المجلس الانتقالى الى حين قيام حكومة منتخبة
وفي بادرة لم يعهدها
التاريخ العربي المعاصر، سلم المشير سوار الذهب مقاليد السلطة للحكومة المنتخبة وبعدها اعتزل العمل السياسى
يشغل حاليا منصب رئيس مجلس أمناء منظمة الدعوة الاسلامية في السودان، ويعود الفضل إلى تلك المؤسسة في تشييد
المساجد، المستشفيات، ملاجئ الإيتام ومراكز رعاية الطفولة.
وعلى الرغم من ان هناك اراء اخرى تختلف حول سوار الذهب وتقول بضعف شخصيته وانه كان مجرد اداه تتحرك كما يريد الاخرين
الا اننى ارى فى هذا الرجل نموذجا ً جميلا للرئيس والحاكم وليت الكثير من حكامنا مثله

(منقول من عدة مواقع وارجو ان ينال اعجابكم)

والسلام عليكم ورحمة الله وبركاته

الاثنين، 9 مارس، 2009

قصيده بالنحوى(2)

بسم الله الرحمن الرحيم

السلام عليكم ورحمة الله وبركاته

بناءاً على طلب الجماهير

ونظراً للنجاح منقطع النظير الذى حققه الجزء الاول من القصيدة

ودعوه للضحك (علشان انا متضايق شويتين)

أزف اليكم وبكل سرور الجزء الثانى

تدفق في البـطـحـاء بعد تبهطل = وقعقع في البيداء غير مزركلِ
وســار بأركان العقيش مقرنصاً = وهام بكل القارطات بشنكــلِ
يقول وما بال البـحاط مـقرطماً ِ = ويسعى دواماً بين هك وهنكـلِ
إذا أقـبـل البعـراط طاح بهمةٍ = وإن أقرط المحطوش ناء بكلكلِ
يكاد على فرط الحطيـف يبقبـق = ويضرب ما بين الهماط وكندلِ
فيا أيها البغقوش لسـت بقاعـدٍ = ولا أنت في كل البحيص بطنبلِ

وطبعاً مش هنسى معانى الكلمات الصعبة

علشان محدش يبقى عنده حجه ويقول مفهمتش

معاني الكلمات
تبهطل : أي تكرنف في المشاحط
المزركل : هو كل بعبيط أصابته فطاطة
العقيش : هو البقس المزركب
مقرنطاً : أي كثير التمقمق ليلاً
البحطاط : أي الفكاش المكتئب
مقرطماً : أي مزنفلاً
هك : الهك هو البقيص الصغير
البعراط : هو واحد البعاريط وهو العكوش المضيئة
أقرط : أي قرطف يده من شدة البرد

المحطوش : هو المتقارش بغير مهباج
يبقبق : أي يهرتج بشدة
الهماط : هي عكوط تظهر ليلاً وتختفي نهاراً
الكندل : هو العنجف المتمارط
البغوش : هو المعطاط المكتنف
البحيص : هو وادٍ بشمال المريخ
الطنبل : هو البعاق المتفرطش ساعة الغروب



يارب بقى تعجبكم وتفهموها المرة دى من غير شرح
ههههههههههههههههههه
والسلام عليكم ورحمة الله وبركاته


الثلاثاء، 3 مارس، 2009

بحبك يامصر




بسم الله الرحمن الرحيم

السلام عليكم ورحمة الله وبركاته
بما اننا فى شهر مارس والشهر ده فيه عيد الام فأنا حبيت اننا نتكلم عن حب الام شويه
بس انا مش هتكلم معاكم عن الام اللى هى الام الفعليه
انا هتكلم عن الام المجازيه اللى هى بلدنا الغاليه مصر
عاوزين نتكلم عن حب مصر
مصر اللى عشنا وهنفضل عايشين فيها طول حياتنا
مصر اللى اتربى فيها اهلنا وكبروا فيها وربونا فيها
مصر اللى نفديها بحياتنا ودمنا
مصر اللى ربنا ذكرها فى القرآن وكرمها وفضلها عن كل بلاد العالمئ

مصر اللى كانت القائد للعرب وهتفضل كده على طول
مصر اللى العالم كله بيتمنى انه يكون مكانها ومنها
مصر اللى علمت العالم كله الرقى والحضارة
مصر اللى كانت منارة العلم
مصر ارض النيل
مصر التاريخ
مصر اللى طلع منها اعظم واكبر العلماء والمفكرين والادباء
مصر دى حاجه كبيرة خالص
ليه بقى انا حاسس ان حبها قل فى قلوبنا؟؟؟؟؟
لانى بصراحه فى الفترة الاخيرة ملاحظ ان فيه شباب معندهاش الحب لبلدها
وأى حد يسافر برة او يعرف حد سافر برة ورجع اتكلم معاه شويه
تلاقيه بيقول شعر فى بلاد بره
وبيقول ما قاله مالك فى الخمر فى مصر ويبدأ يقارن بقى
الشوارع هناك نظيفه وهنا الدنيا كلها زباله
الناس هناك بتتعامل بكل احترام وادب وذوق
والناس هنا بعيد عنك عاوزة تتحرق بجاز
المواصلات هناك سهله ومريحه
وهنا ياساتر يارب قرف وتعب وحاجه فظيعه
المصالح الحكوميه هناك حاجه زى الفل
وهنا الروتين والرشاوى والفساد
الاسواق هناك فيها كل حاجه متوفرة ورخيصه
وهنا بقى احتكار وغلا وبلا ازرق
وغيره وغيره كتييييييييييييييييييير
وكأنه لما كان عايش هنا مكنش عارف كل الحاجات دى
وكأنه مكنش واحد من الناس اللى وصلت بمصر للحال ده
وكأن مصر دى حاجه وحشه ومفيهاش اى حاجه كويسه
وبعد دا كله يقول انه بيحب بلده بس يعنى لو تنظف شويه
بس يعنى لو يبطلوا الحاجات الوحشه اللى فيها
بس يعنى لو يوفرو فيها الزبده اللورباك والقشطه المش عارف ايه
بس يعنى لو العربيات اللى ماشيه فى الشوارع تبقى كلها حديثه
وبس وبس وبس
فين الحب ده ؟؟؟؟؟؟؟؟؟؟؟؟؟
صحيح فيه عيوب كتير فى بلدنا
بس مين السبب فى العيوب دى ؟؟؟
مش احنا ؟؟؟؟
حتى ولو كان بشكل غير مباشر ؟؟
احنا بسكوتنا على الفساد وعلى كل حاجه وحشه
احنا بقبولنا للوضع اللى احنا فيه
احنا بكسلنا وعدم عملنا على التغيير للاحسن
احنا بعدم اللامبالاة اللى عايشين فيها
احنا بنظام الفهلوة اللى مش بنشتغل الا بيه
احنا بعدم العمل بتعاليم ديننا الحنيف والحرص عليه
احنا بمحاولة تقليدناالاعمى للغرب
احنا باستهتارنا وتسيبنا
وبعدين لو بصينا للبلاد التانيه دى هنشوف ايه ؟؟؟؟
الناس اللى هو بيتكلم عليها دى بتشتغل واى تقصير يقابله عقاب
فيه قانون الكل بيحترمه ومافيش فهلوة
هو لما يقعد يتكلم عن الرزق والشغل يقول انه هناك المعايش صعبه والفلوس اللى بيكسبها دى بيدفع بدالها من دمه واعصابه
طب مااحنا لو عملنا ده هنا فى مصر بلدنا
احترمنا القانون
حافظنا على نظافة الشوارع
احترمنا بعض
بطلنا فهلوة وتزويغ
راعينا ربنا فى شغلنا
لو كل واحد فينا عمل اللى عليه وحب البلد بجد من قلبه
هنبقى اعظم بلد
هنرجع مجدنا الغابر وحضارتنا البائده
انا مش عاوز كلامى يبقى كلام انشا ومن نوعية الخطب والمواعظ
انا عاوز نتكلم مع بعض ونحاول نفكر فعلا فى حلول عملية
يمكن نقدر من خلال كلامنا اننا نتوصل لحاجه تنفعنا وننفع بيها بلدنا
ومش عاوز حد يزعل من كلامى ويفتكر انى بتهمه بعدم حب البلد
لأ والله
انا اللى خلانى افكر اكتب الموضوع ده
حالة عدم الانتماء اللى شوفتها عند شباب كتير
لما نتكلم ونقول كلمة مصر الاقيه قال مصر ايه ياعم
هو احنا شوفنا منها ايه كويس
لاتعليم ولاشغل ولاعيشه ترضى ربنا
سخط وكره وبلاده فى المشاعر
ليه دا كله ؟؟
ياريت تشاركونى التفكير فى الموضوع ده


تحياتى ودمتم ودامت مصرنا الغاليه بكل خير وود وسعادة

والسلام عليكم ورحمة الله وبركاته