حــــــــــــــــــــــــــداد

حسبى الله ونعم الوكيل

مرسى ابن المعلم الزناتى اتهزم يارجاااااااله

بسم الله الرحمن الرحيم

السلام عليكم ورحمة الله وبركاته

ازيكم كلكم عاملين ايه ؟

يارب تكونوا جميعا فى احسن الاحوال

(مش هكتب اعتذارات ومش هقول انى هرجع اكتب تانىفى المدونة علشان عارف ان الناس زهقت من كلامى)

المهم عاملين ايه فى البرد ده ؟؟

مش عارف الشتا السنه دى مالها كده جايه شديده قوووى

ربنا يسترها وتعدى على خير هو مش فاضل فيها غير شويه قليلين

**********

كنت واقف فى الفصل فى تانية اعدادى وكالعاده كتبت عناصر الدرس على السبورة

وبعد كده شرحت وهزرت مع الطلبه

وقوم انت ياهريدى قولى بنعمل دى ازاى

وقومى انتى يانعناعه قوليلى نسوى دى كيف

وهكذاااااا

الطبيعى بتاعى

وانا من النوع اللى مايحبش يقعد اثناء الحصه ( هما حصتين بصراحه)

وخلاص وتمام والحمد لله حسيت ان الدرس اكبر نسبة من الطلبه مستوعباه (الا من آبى)

فقررت انهم يكتبوا الدرس فى الكشكول

كله يطلع الكشكول ويكتب التاريخ والعنوان فى نص السطر

تمام وميه ميه وابتديت امليهم

وابص الاقى محمد قاعد مش بيكتب الدرس

- مش بتكتب ليه يامحمد بيه؟

- مش معايا الكشكول يااستاذ

- طيب طلع ورقه واكتب الدرس فيها ولما تروح ابقى انقل الدرس فى الكشكول

- هبقى انقله من زميلى

- معلش طلع ورقه وبلاش لماضه يامحمد واكتب الزفت ولا هو انت لازم كل حصه تتلامض معايا؟؟

- يلا طلع ورقه ( بشخط كده )

- حاضر حاضر

وانتهت الحصه وكملت باقى اليوم عادى جدا وروحت

بالليل كان فيه واجب عزاء كده فى قريه جنبنا وكان لازم اخد والدتى تعزى هى ومراتى

فطبيعى يعنى اخدت معايا المسدس (محدش يضمن الظروف والدنيا ليل)

وربنا سترها ورجعنا على بيت ابوياوانا هناك طلعت الحاجه اللى معايا على الترابيزة(بما فيها المسدس)

وبعد كده اخدت مراتى والواد صلاح وروحنا على شقتنا ببص لقيت انى نسيت المسدس فى البيت

قلت مش مهم مافيش داعى انى ارجع اجيبهابقى اخده بكره

وتانى يوم وانا رايح المدرسه ماشى فى امان الله انا وزميلى الاستاذ حسن مدرس اللغة العربية

واذ فجأة الاقى الدنيا خبطت فوق راسى وادوخ ومش عارف فيه ايه

واتعدل ابص ورايا الاقى الاستاذ حسن ماسك الواد محمد بيحوش فيه ويتخانق معاه ومحمد فيه فى ايده شومة خشب (اتاريه كان بيقولى حاضر حاضر )

واحوش ايدى من على دماغى الاقى دم والناس كلها اتلمت حواليا

المهم ربنا سترها واخدت اربع غرز بس

وندمت اشد الندم على انى ماروحتش جبت المسدس بتاعى من البيت واخدته معايا كنت ريحت محمد من الدنيا

بس اهه اللى حصل

بعد كده الحمد لله فصلت محمد فصل نهائى من التربيه والتعليم ( نوهاااائى )

ومعمولاله قضيه ومطلوب ضبطه واحضاره

وربنا يكرمه ويروح الاحداث قريب

**********

المهم ان فيه ناس كتيييييير مغلطانى انا انى قلت له اكتب الدرس

ياترى انا فعلا غلطان ؟؟؟؟

وادى يوم جديد من يوميات مدرس فى الصعيد

ههههههههههههههههههههه

( الله يرحمك ياابويا ماانا قلتلك انا ماانفعش ابقى مدرس ماسمعتش كلامى)

ســــــــــــــــــــــــــــــــــــــــــــلام

الخيـــــــــــــــــــــــــــــــــانه

بسم الله الرحمن الرحيم
السلام عليكم ورحمة الله وبركاته
عارف كل اللى هيتقال ومنقطع ومبتعد وكده
بس هى الظروف الصعبه وياريت تلتمسوا لى العذر
******
وعلشان الغيبه ماتطولش لغاية ماصلاح باشا يروح المدرسه
(واخدلى بالك انت ياابراهيم)
انا قلت انزل اى حاجه من المسوده موجوده من قبل كده
اهو تعملى منظر برضو
الموضوع ده كنت كاتبه من سنتين ومش عارف ليه مانزلتوش
ياريت اللى يقراه يقولى رأيه
********
قاعد وانا ومجموعه من الشباب فى مكان كده
وسمعت حوار اتنين منهم مع بعض واللى فهمته من الحوار
ان البشمهندس اللى بيتكلم ده بيكلم بنتين وواحده فيهم واعدها بالجواز
ويبكلم التانيه من وراها
ولما صاحبه قاله انه كده دى تبقى خيانه اعترض وقال لأ
مش خيانه لانى لسه مش متجوزها او مش مرتبط بيها رسمى
ياترى هى الخيانه ماتبقاش خيانه الا بعد الارتباط الرسمى
ولا هو مفهوم الخيانه انحصر فى ان الزوج يعمل علاقه مع واحده تانيه غير مراته وبس
ولا الخيانه دى هى اننا نخون مبدائنا ونخالف ضميرنا فى اى حاجه تانيه مش بس العلاقه الزوجيه
الخيانه ممكن تكون انى ماقلتش لواحد على حاجه ممكن تنفعه وانا كنت عارفها
ممكن تكون انى قصرت مع حد عنده ظروف ومن غير عذر ومتعمد
الخيانه ممكن تكون بالكلام
الخيانه ليها اشكال كتير مش بس محصورة فى صورة العلاقه بين الزوجين
ولما ابتديت اتكلم واقول رأيى للناس اللى كانوا قاعدين معايا لقيت ردود افعال مختلفه منهم اللى موافق ومنهم اللى معترض على كلامى ومنهم اللى شايف انى مكبر المواضيع زياده عن اللزوم
لدرجة انهم خلونى شكيت فى روحى
فى الاخر وعلشان انا مابحبش الجدل واللى ابتدينا ندخل فيه من غير لزمه انهيت الموضوع
وكل واحد يعمل اللى يريحه واللى هو شايف انه صح
مع انى مش مقتنع
بس هعمل ايه؟؟؟؟
ياترى بقى مين فينا اللى صح ومين اللى غلط؟؟؟

والسلام عليكم

صـــــلاح الدين وصــــــل

بسم الله الرحمن الرحيم

السلام عليكم ورحمة الله وبركاته

ازيكم يااهل بلوجر الكرام وحشتونى جدااااااااااااا

يارب تكونوا كلكم بكل خير وفى احسن الاحوال

طبعا انا عارف انه فيه ناس كتيييييييييييييييير نسيتنى

وده طبعا من حقهم لانى بقالى كتيييييييييير كتييييييييييييير مش بدخل على النت خالص

بس معلش يااخواننا الظروف والدنيا والجواز ( ودى نهاية كل معتصم )

هههههههههههههههههههههههههه

طبعا فيه خبر حلو عاوز اقلكم عليه وهو ..........

الحمد لله رب العالمين ربنا انعم عليا وزوجتى ورزقنا بطفل جميل اسميناه صــــــــلاح الديـن

فحبيت بس اعرفكم

وطبعا بما انى فى البيت الكبير وفيه النت موجود

(لانه فى شقتى مافيش عندى نت)

فلازم استغل الظروف واهه حتى اسلم على الناس اللى وحشانى

وان شاء الله ربنا يسهل قريب وارجع تانى للمدونة وللعالم الجميل بتاع التدوين

مش هطول عليكم وارغى كتير

بس ان شاء الله البوست اللى جاى هيكون من يوميات مدرس لو لسه فاكرينها!!!!!!

ســـــــــــــــــــــــــــــــــــــــلام

الدعـــوة عـــــامــــــه + إضافه بسيطه

بسم الله الرحمن الرحيم

السلام عليكم ورحمة الله وبركاته

اخوانى واصدقائى الاعزاء والافاضل

انا عارف انى مقصر من فترة طويله

وان الغيبه طالت زياده عن اللزوم

بس والله عندى اعذارى

انا النهارده جاى علشان اعزمكم على فرحى

يوم الخميس الجاى

والدعوة عامه للجميع

والحاضر يعلن الغايب

واهه جه اليوم اللى ناس كان نفسها فيه عشان تشمت فيا

هههههههههههههههههههههههه

هنعمل ايه قدر ومكتوب وممنوش مهروب

وعقبال عندكم جميعا وربنا يفرح الناس كلها

الفرح يوم الخميس فى نادى ديروط الرياضى الساعه9مساءاً

ومحدش له حجه ادينى اهه قلت على المعاد ومكانه

اما اشوف هتيجوا ولا برضه هتفضل عزومة مراكبيه وشغل اسايطه

ســــــــــــــــــــــــــــــــــــــلام

صــــــــــــــــــدفه

بسم الله الرحمن الرحيم

السلام عليكم ورحمة الله وبركاته

اولا انا بشكر كل الناس اللى دخلت عندى المدونة

وقدمت واجب العزاء فى والدى الله يرحمه

وبجد ياجماعه انتوا مش عارفين كلامكم أثر فيا ازاى

شكرا للجميع

للى بيزورنى ويعرفنى باستمرار وكمان للناس اللى كانت اول زيارة ليهم علشان يواسونى بكلماتهم الجميلة

**********

طبعا انتوا عارفين قصة تععينى مدرس

(ده انا كنت كاتبها فى بوست مستقل قبل كده )

وطبعا عارفين المعاناه الرهيبه اللى بعانيها فى المواصلات علشان اقدر اوصل لمدرستى الحبيبه مقر عملى الفريد والعبقرى

علشان ادرس للجهابزة الافذاذ اللى بديهم كمبيوتر

المهم كل يوم الصبح وانا رايح المدرسه فى الطريق بعد شارعنا بشويه كده

اقابل واحده ماشيه فى الاتجاه العكسى يعنى انا رايح وهى جايه

اطلع بدرى عن معادى اقابلها فى نفس المكان

اتأخر شويه عن معادى برضو اقابلها فى نفس المكان

الاول ماكنتش بهتم بالموضوع ده ومكنتش بفكر فيه اصلا

لغاية ماالحكاية دى بقيت ملفته للنظر بشكل كبير جدا

كل يوم نتقابل تقريبا فى نفس المكان مهما كنا متأخرين او طالعين بدرى

مش عارف ايه ده ؟ فيه توارد خواطر مش عادى فى المواعيد او الظروف الوقتيه بتاعتنا

انا بعد كده اهتميت بصراحه انى اسأل واشوف دى مين

عرفت انها بشتتغل مُدرسة لغة عربيه فى مدرسه قريبه من بيتنا

وهى بنت ناس كويسين وقمة فى الادب والاخلاق الحقيقه

انا ساعتها كنت لسه باعت المراسيل علشان يتوسطوا بينى وبين ابو خطيبتى الانسهN

ومكنش الرد جانى ففكرت انهم لو رفضونى انى اتقدم فعلا للبنت دى

وهى فيها كل المواصفات المطلوبه

بس طبعا النصيب حكم والحمد لله ربنا اكرمنى وانعم عليا بخطيبتى فلغيت طبعا الفكرة من نافوخى

بس كنت برضو كل يوم وانا طالع الصبح اقابلها

حتى انا احيانا كنت بتعمد انى اتأخر عن معادى بشكل كبير وبرضو الاقيها رايحه شغلها

وساعات كمان وانا راجع الاقيها راجعه هى كمان

المهم جينا بقى اتفقنا انا ووالد خطيبتى على اننا نروح نجيب الشبكه (فاكرينها طبعا)

وفى اليوم ده الصبح شوفتها وضحكت وهى كمان بصت فيا وضحكت مش عارف ليه

رجعت من المدرسه لبست واتشيكت واخدت عربيه وروحت اجيب العروسه واروح بيها عند الجواهرجى علشان تختار الشبكه

ودخلت انا وعروستى عند الجواهرجى ولسه بنقول على اللى هى عاوزاه وابص الاقى البنت دى داخله هى وعريسها علشان يختاروا شبكتهم

هههههههههههه

بصينا لبعض باستغراب فى الاول وبعد كده احنا الاتنين انفجرنا فى الضحك والكل مستغرب الموقف جدا

ولما بيسألوها ايه الموضوع

قالت الاستاذ ده كل يوم الصبح اقابله وانا رايحه الشغل حتى لو اتأخرت الاقيه متأخر

ولو طلعت بدرى بلاقيه هو كمان طالع بدرى زى مايكون بيراقبنى

لدرجة انى فكرت انه فعلا بيراقبنى وعاوز يخطبنى ولا حاجه

بس مش معقوله يعنى بيراقبنى وجايب خطيبته معاه هنا يختارلها الشبكه

هههههههههههههههههه

ولغاية النهارده كل يوم وانا رايح الشغل اشوفها ونضحك احنا الاتنين ونصبح على بعض بس من غير كلام بهزة راس خفيفه كده

شوفتوا الصدفه اللى كنت عاوز احكيلكم عليها

بجد مش حاجه غريبه واننا احنا الاتنين نجيب شبكتنا فى نفس اليوم ومن عند نفس الصايغ

يلا بقى كفايه عليكم صداع لغاية كده

ومرة تانيه بشكركم

ســـــــــــــــــــــــــــــــلام

إنا لله وإنا إليه راجعون

بسم الله الرحمن الرحيم

السلام عليكم ورحمة الله وبركاته

معلش اعذرونى على تقصيرى فى حقكم وعدم انضباطى فى زيارتكم وزيارة مدوناتكم

بس حصلت ظروف صعبه شوية

والدى اتوفى الاسبوع اللى فات

ولله مااخذ ولله مااعطى وكل شيئ عنده بمقدار

والحمد لله على كل حال
وشكرا ليكم كلكم على مساندتكم وعزائكم ودعواتكم الجميلة

ســــــــــــــــــــــــــــــــــــــــلام