الأربعاء، 27 مايو، 2009

لا تحـــــــــزن

بسم الله الرحمن الرحيم

السلام عليكم ورحمة الله وبركاته



لا تحزنْ :
لأنك جرّبتَ الحزن بالأمسِ فما نَفَعَكَ شيئاً ،
رَسَبَ ابنُك فحزنتَ ، فهل نَجَحَ؟!
مات والدُك فحزنت فهل عادَ حيّاَ ؟!
خسِرت تجارتُك فحزنت، فهل عادتْ الخسائرُ أرباحاً؟!

لا تحزنْ :

لأنك حزنت من المصيبةِ فصارتْ مصائبَ ،

وحزنتَ من الفقرِ فازْددْتَ نَكَداً ،

وحزنتَ من كلام أعدائك فأعنتهمْ عليك ،
وحزنْت من توقُّع مكروهٍ فما وقع .

لا تحزنْ :
فإنهُ لنْ ينفعك مع الحُزْن دارٌ واسعةٌ ،
ولا زوجةٌ حسناءُ ،
ولا مالٌ وفيرٌ ،
ولا منصبٌ سامٍ ،
ولا أولادٌ نُجباءُ .

لا تحزنْ :
لأنَّ الحُزْنَ يُريك الماءَ الزلالَ علْقماً ،
والوردةَ حَنْظَلَةً ،
والحديقةَ صحراءَ قاحلةً ،
والحياة سجناً لا يُطاقُ .

لا تحزنْ :
وأنت عندك عينانِ وأذنانِ وشفتانِ ويدانِ ورجلانِ ولسانٌ ،
وجَنَانٌ وأمنٌ وأمانٌ وعافيةٌ في الأبدانِ : ﴿ فَبِأَيِّ آلَاء رَبِّكُمَا تُكَذِّبَانِ ﴾ .


لا تحزنْ :
ولك دينٌ تَعْتَقِدُهُ ،
وبيتٌ تسكُنُهُ ،
وخبزٌ تأكلُه ،
وماءٌ تشربُهُ ،
وثوبٌ تَلْبَسُهُ ،
وزوجةٌ تأوي إليها


بعد كل هذا لماذا تحزنْ ؟!
........................
البوست ده مش انا اللى كاتبه
انا ناقله
هو جالى كذا مرة على الايميل
والكلام عجبنى قوووووى
فحبيت انكم تقروه معايا
ويار ب يعجبكم
والسلام عليكم ورحمة الله وبركاته

الاثنين، 25 مايو، 2009

شكراً ... جوزيه


شكراً

ووداعاً

ايها الساحر

مبروك للنادى الاهلى

الخميس، 21 مايو، 2009

اخر الاخبار

بسم الله الرحمن الرحيم
السلام عليكم ورحمة الله وبركاته
اولا انا بعتذر عن التأخر فى الرد
وكمان عن التقصير فى الزيارة لمدوناتكم الحبيبه
بس معلش اعذرونى
كان اسبوع كله تعب
امتحانات ومراقبه وتصحيح وكنترول
ولسه تبييض النتيجه
وطبعا فوق ده كله شوية التزامات من الشغل التانى
فمكنتش بقدر ابص على الكمبيوتر مش حتى افتحه
فياريت تقبلو اعتذارى
***********
نيجى بقى للموضوع اللى كان مطروح فى البوست اللى فات
واللى طبعا كتير منكم مستنى يعرف اخر اخبارى مع العروسه ايه
انا صليت استخارة وروحت
وكله تمام التمام لغاية كده
البنت كويسه ومؤدبه
وهى عاديه لاوحشه ولا حلوة
بس اللى يميزها ان دمها خفيف
وطبعا انا كنت قايل قبل كده ان اخلاقها زى الفل
وانا موافق وهى موافقه وحصل القبول والحمد لله
لغاية كده والامور ماشيه عنب
لكن
اختلفت مع ابوها
تقولولى ليه
اقولكم انا ليه
-ياعم الحج هجيب شبكه ب8000جنيه
دى مقدرتى وحدودى
- لا قليل ماينفعش
- طب ما انا ان شاء الله بعد كده هبقى اشتريلها دهب تانى
- ده كلام ومش بيحصل
- ليه هى مش هتبقى مراتى ؟؟
- ايوة بس احنا فى دلوقتى
- طب والعمل ؟؟
- مافيش المبلغ ده مش كفايه احنا عاوزين بـ15000جنيه شبكه
- كتير وانا لسه داخل على تجهيز واوضة نوم وانتريه وتوضيب الشقه
ده غير باقى الحاجات الى هجيبها
- دى مش مشكلتى
- يعنى مافيش امل ؟؟
- هى دى شروطنا ياابن الحلال
بس لغايه كده والكلام خلص
انا مش رايح اشترى حاجه وهقف افاصل فيها
ده موضوع بيبقى بالتراضى من الاول يعنى اول مابيحصل فيه خلاف يبقى مش هيكمل
وده اللى حصل
وجارى البحث عن عروسه جديده
تكون هتقبل بامكانياتى الماديه دى
طبعا انا عارف انه فيه كتير هيزعل
بس والله العظيم مش ذنبى
وفى الاول وفى الاخر ده نصيب
والمنديل لسه طاير
تقبلوا تحياتى واعتذارى عن التأخير
والسلام عليكم ورحمة الله وبركاته

الأحد، 10 مايو، 2009

إســـتـشــارة



بسم الله الرحمن الرحيم


السلام عليكم ورحمة الله وبركاته

الموضوع ومافيه وبكل اختصار
انهم جايبينلى عروسه


العروسة دى


فيها كل المواصفات اللى الواحد بيتمناها


من ناحية التدين والاخلاق والادب


وبعد السؤال والفحص والتمحيص


عرفت ان كل الكلام اللى اتقالى صح مليون الميه




بس فيه مشكلتين




هما ايه ؟؟؟؟


الاولى :


انى لسه ماشوفتهاش


التانيه :


انى لما سألت عرفت انها متوسطة الجمال


يعنى لاهى حلوة ولاهى وحشه




بصراحه مش عارف اعمل ايه


اتكل على الله واروح اشوفها


ولاااااااااااااااا


استنى ابحث الموضوع شويه كماااااااااان


؟؟؟؟؟؟؟؟؟؟؟؟؟؟


محتار




(اللى بالى باله وهو عارف نفسه مش عاوز اعرف رأيه)


ياريت فعلا تشوروا عليا


وزى مابيقولوا لاخاب من استشار


والعاقبه عندكم فى الاستشارات


والسلام عليكم ورحمة الله وبركاته

الأربعاء، 6 مايو، 2009

إمسك حرااااامى


بسم الله الرحمن الرحيم

السلام عليكم ورحمة الله وبركاته


نايم فى امان الله وفجأة كده اسمع صوت بيقول
- بتعمل ايه عندك ياابن ال.......
اقف عندك ماتتحركش

وصوت شوية كركبه كده بسرعه

وهوووووووب

طاااااااااااااااااااااااااااااااااااااااخ

ايه ده ؟؟؟؟

دا كده الموضوع كبير بقى

ضرب نار فى المنطقه من غير مايستأذنوا منى ؟؟
ايه ؟ رئيس حلف اونطه انا ولا ايه ؟؟
قمت بسرعه من على السرير وطلعت اشوف فيه ايه
وطبعا لقيت الحاج طالع فى رجليا هو كمان يشوف اللى بيحصل
نلاقى واحد جيراننا باصص من فوق بيتهم وبيقول حراااامى

فين الحرامى ده

نط من عند السور اللى قدام بيتكم وجرى فى الناحيه دى

- الحاج : وراه ماتسيبوش
- حاضر (اه يااااانى وانا كان مالى ومال الحكايه دى )

- الحاج: تعالى من هنا هو اكيد دخل الشارع ده
اقولك ارجع تانى ولف من الباب اللى فاتح على الشارع التانى وقابلنى منه
وكده نبقى طوقناه

- حاضر (هرجع تانى جرى !!! حرام عليكم انا كبرت على الحاجات دى)

وهوب اروح الف من الشارع التانى
والحرامى يشوفنى بجرى عليه افتكر نفسه ناصح وقال اجرى ناحية الراجل العجوز ده

(طلع عبيط جدا)

وراح ناحية ابويا وهو فاكر نفسه هيعرف يفلت منه

- تعالى هنا ياابن ال............
جاى تسرق الشارع اللى انا ساكن فيه
اقف مكانك احسنلك

وطخ طرخ طروخ

(ياعينى الواد هياخد بعدها اربع غرز بسبب غبائه المستحكم)

ماهو لو كان جرى من ناحيتى انا كنت هسيبه لانى كان نفسى مقطوع

طبعا بعد كده اتروق الترويقه الصح الميه الميه

وكل واحد فى الشارع ضاعت منه حاجه يبقى هو الحرامى ده اللى جه سرقها من حوالى عشر سنين كده

واللى اتكسرت منه حاجه يبقى هو الحرامى اللى كسرها وهو جاى يسرقها

واللى مراته كانت منكده عليه قبل ماينام يبقى هو الحرامى السبب فى انها نكدت عليه

واخيرا وبعد استغاثات مريرة من الحرامى

وصل السيد المسئول امين الشرطه اسم النبى حارصه وصاينه اللى فى المنطقه

وتم تسليم الحرامى له علشان يقوم باتخاذ الاجراءات اللازمه

بس انا فيه حاجه كده ماريحتنيش مش عارف ليه

وبعد مااخد الحرامى ومشى قلت لهم

- اراهن وادفع 10جنيه اذا سلمه فى المركز
- ليه يعنى ؟؟
- مش عارف بس حاسس انه هيسيبه
- يسيبه ازاى ؟؟ ده متلبس
- هنشوف بعد شويه

وبالفعل كل واحد راح كمل نوم واللى كان وراه مصلحه بقى راح يستعد لها ماخلاص الصبح قرب يصبح

وعلى مارجعت من الشغل وبسأل ايه اخبار الحرامى بتاعنا ؟؟؟

يقولولى اصل الباشا وهو ماشى معاه قعد يولع سيجارة

الحرامى جرى منه وماعرفش يمسكه


- ههههههههههههههههههههههههههههههههههههههههههههههههههههههه

- الحمد لله كده مش هدفع ال10جنيه

هههههههههههههههههههههههههههههههه

لكِ الله يامصر

فعلاً فعلاً

حاميها

حاميها برضو

(انتو كنتوا فاكرينى هقول ايه )

ماتودوناش فى داهيه

هههههههههههههههههه

ســـــــــــــــــــــــــــــــــــــــــــــــــــــــــــــلام