الثلاثاء، 27 أكتوبر 2009

نحــــــو الأميه


بسم الله الرحمن الرحيم
السلام عليكم ورحمة الله وبركاته



النهاردة كان عندى امتحان محو الاميه لخمسه المفروض (واخدين بالكم من المفروض دى) انى بعلمهم علشان امحى اميتهم
الحقيقه انا ماليش فى الموضوع ده على الرغم من انه موضوع مربح عند بعض الناس
بس انا مش فاضى
انما لما جيت استلم الشغل وابقى معلم اجيال قد الدنيا الباشمهندز المحافظ بتاعنا اشترط انه اى شخص هيستلم تعاقد ويبقى مدرس لازم يجيب خمسه يمحو اميتهم
وطبعا بما انه كله فى الكليتش اكتب اى خمس اسامى وهات اى خمسه ناس يدخلوا يمتحنوا مكانهم وخلاص واهو كله شغاااااااااااااال
ومحدش يقولى طب ماتمحو الاميه بجد
اللى بيتكلم وايده فى الميه مش زى اللى ايده فى النار
ييجى هو ويورينى شطارته
انا راجل بشتغل الصبح مدرس وبقبض 300 جنيه

وعاوز اتجوز وابقى صاحب بيت واسرة

يعنى بشتغل كمان شغل تانى بيدخلى بتاع 200/300 جنيه كمان

(ده اقل ايجار شقه دلوقتى 350جنيه)

يعنى مش فاضى اعلم حد

واصلا الناس الكبيرة دى والعيال اللى طفشت من المدرسه عشان اقنعهم واقولهم تعالو محو الاميه يبقى كأنى بشتمهم بعيد عنكم

(تبص تلاقى الواحد راح زاغرلك كده وعنيه بتطق شرار وقالك اطلع من نافوخى ياافندى احسنلك يبقى من الاحسن انك تحترم نفسك وتمشى من وشه بالذوق والاااااا......)
فاضطريت اعمل زى الناس

(ماتفهمونيش غلط)

واضرب كشف نحو الاميه خصوصا انه انا مكنتش عاوز استلم الشغل ده

(لو تفتكروا)

وروحت متأخر خلصت الاوراق وكان لازم وضرورى وحتما كشف نحو الاميه
وفعلا

وكان النهارده الامتحان
طب لما انتو مهتمين قوى كده بمحو امية الناس الجاهله بتفبركو فى الامتحانات ليه؟؟؟
بعد القرف دا كله واروح الف على الناس واتحايل عليهم عشان ييجوا الامتحان ومايرضوش
واجيب ناس مكانهم عشان يدخلوا باساميهم وفعلا المراقب يوافق على تلاته (المشكله انه طلع الوحيد اللى كان فعلا اسمه فى الكشف بجد والله العظيم) ويدخلوا ويمتحنوا ويكتبوا
يطلع بعد ده كله انه اللى بيدخل الامتحان بيكتبوله على السبورة وهو يادوب ينقل

وممكن لو مش بيعرف ينقل حد من الموجودين يكتب له
طب لزومه اييييييييييييييييييييييييييييييييه ياناس ؟؟؟؟
حد يقولى ويفهمنى
هى فى الاخر انا عرفت انها سبوبه والناس القائمين عليها بيطلعوا من وراها بلقمة عيش حلوة
عشان كده انا هفضل مُصر على انها

نـــحـــــــــــــــو الاميــــــــــــــــــه
ولينا رب اسمه الكريم
وربنا يصلح الاحوال

ســـــــــــــــــلام

السبت، 24 أكتوبر 2009

الثــــــــــأر

بسم الله الرحمن الرحيم

السلام عليكم ورحمة الله وبركاته

اولا انا بشكر كل الناس اللى شاركت وقالت رأيها الجميل فى الموضوع اللى فات

وتقريبا كده فيه إجماع على رأى واحد

وإن كان الاسلوب فى سرده مختلف

وكمان بشكر كل اللى دعالى ودعا لأم مالك بالشفاء

......


النهارده بقى عاوز اننا نتكلم عن مشكلة الثـــأر

صحيح هى عندنا فى الصعيد بس

انما ده مايمنعش اننا نتكلم فيها ونقول رأينا فيها كقضيه

يعنى لما واحد يلاقى اخوه (لاقدر الله)او اى حد قريبه مثلا

وفيه واحد تانى قتله

ياترى رد فعله هيكون ايه؟؟؟

ياخد بتاره ولا يسيبه للحكومه هى اللى تتخذ معاه الاجراءات القانونيه؟؟؟

ولما الموضوع يبقى بسبب حاجه اى كلام ومايستاهلش والانسان اللى اتقتل ده هو اللى كان السبب فى المشكله

يبقى اهله يسكتوا ولا ياخدو بتاره

وهل الرأى يكون هو هو نفس الرأى لو كانت الحادثة دى بسبب قضية شرف مثلا ؟؟؟

.......

على فكرة ملحوظه صغيرة

مافيش عندنا فى الصعيد مهما كانت درجة التعليم حد مش بيفكر انه ياخد بتاره

لما بتحصل مشكله

احنا نتكلم كويس وحلو قوى وبكل عقل واحنا بعيد عن المشكله

انما اول ماالواحد تحصل المشكلة معاه هو

يبقى العار والعيب وازى اسيب حقى ودمى

.........

مستنى رأيكم فى الموضوع ده

ســـــــــــــــــــــــــــــــــلام

الجمعة، 16 أكتوبر 2009

موضوع للنقاش

بسم الله الرحمن الرحيم

السلام عليكم ورحمة الله وبركاته

اولا انا بعتذر عن تقصيرى معاكم فى الكام يوم اللى فاتو

بس ده كان لظروف كده

وكمان البشمهندس بتاع العظام قالى مااقعدش كتير قدام الكمبيوتر

علشان الفقرات بتاعة الرقبه جالى فيها واوا

هههههههههههههههه

يعنى سماح (وكمان اخواتها شيماء وصفاء واسماء)

.............


نيجى بقى للموضوع اللى عاوز نتكلم فيه

وهـــــــــــــــــــو

هل ينفع ان الانسان يحكم على نفسه انه احسن من حد تانى ؟؟

بمعنى:

هل ممكن انى انا احكم على نفسى انى احسن من فلان ده

انا ممكن اكون شايف انه الشخص ده مقصر فى حاجات كتير

وانا شايف نفسى والحمد لله مش مقصر

فهل معنى كده انى ممكن اقول على نفسى انى احسن منه ؟؟

طبعا الحكم فى الحاله دى هيبقى على الظاهر بس

لاننا لنا الظاهر والله - سبحانه وتعالى - هو العالم بالسرائر

وكمان رسولنا الكريم - عليه الصلاة والسلام - قال
((اذا رأيتم الرجل يعتاد المساجد فاشهدوا له بالايمان))

يعنى مجرد رؤيتنا له بيروح المسجد نقول عليه رجل مؤمن

واحنا مش عارفين هو فعلا كده ولا لأ

يبقى ايه رأيكم بقى

ينفع انى احكم على نفسى مثلا بأنى احسن من حد انا شايف انه مش كويس؟؟

انا مش هرد على التعليقات هنا على انى صاحب المدونة

انما هشترك فى النقاش زى اى حد فيكم
..............
على الهامش كده
ماننساش كلنا ندعى لأم مالك
ان ربنا يشفيها ويعافيها ويحفظ لها نور عنيها
وياريت بجد نخلص فى الدعاء

ســـــــــــــــــــــلام

الجمعة، 9 أكتوبر 2009

نعمة الرضا

بسم الله الرحمن الرحيم
السلام عليكم ورحمة الله وبركاته
نعمة الرضا دى من اعظم النعم اللى انعم بيها المولى عز وجل على الانسان
الرضا هو أن تشعر بالارتياح لما يختاره الله لك
كتير بنشوف الناس ساخطه ومش راضيه عن احوالها اللى عايشه فيها
والناس اللى عندها رضا عددهم قليل جدا
يعنى نشوف اللى مش موظف طبعا مش راضى بحاله ونفسه فى الوظيفه والشغل
طب هو معنى كده ان الموظف راضى بقى عن حياته وعيشته؟؟
نبص نلاقى برضو الموظف مش راضى وعايش ساخط
ولو رجعنا وشوفنا نفس الشخص اللى كان ساخط وكل امله فى الدنيا
انه يتعين فى حتة وظيفه يعيش منها
بعد ماحصل اللى كان بيتمناه برضو مش راضى وساخط ومش عاجبه حاله
على الرغم من اننا لو بصينا على الناس اللى عندها نعمة الرضا
ممكن يكون مستواهم المادى بسيط جدا ومع ذلك عايشين فى سعاده تامه ومصالحه مع النفس
والقليل اللى عايشين فيه ده مكفيهم وفايض منهم كمان
يعنى الاكل لما يبقى فول وطعميه تلاقيهم بيستمتعوا بطعمه ولا كأنه كباب من عند ابوشقرة
كوباية الشاى بقى اللى بعد الاكله الحلوة دى تبقى غاية المراد من رب العباد والحياة حلوة وزى الفل
وتسأل الواحد فيهم ايه اخبار الدنيا معاك ؟؟
يرد عليك بكل انبساط وقناعه ورضا ويقولك زى الفل والواحد لو طلب اكتر من كده يبقى طماع
ونشوف ناس تانيه صحتها زى الفل وعند اى شكوى بسيطه نجد السخط وعدم الرضا
فى حين نجد ناس ربنا ابتلاها بامراض خطيرة وبتعيش بيها سنين وهى بتعانى وبتتألم
ولما تتكلم مع واحد منهم تلاقيه بيقولك الحمد لله دى نعمة كبيرة من رب العالمين انا احسن من غيرى كتير
ياعم ازاى ؟؟ ده انت تعبان والناس كلها سليمه وصاحيه؟؟
يقولك ايوة بس فيه ناس تانيه برضو تعبانه عنى
وفيه ناس سليمه بس ربنا مش راضى عنهم
وسايبهم بصحتهم علشان يزيدوا فى الذنوب وبعدين انتقامه منهم هيكون شديد
انما احنا الحمد لله هما شوية التعب دول وانا عارف ان المولى عز وجل بيكفر بيهم ذنوب ممكن اكون عملتها وانا مش عارف
يبقى كده انا احسن منهم كتييييير
لانى على مااموت هيكون المرض ده طهرنى من كتير من الذنوب اللى انا ممكن اكون عملتها
ولو ماكنش فيه ذنوب تبقى حسنات بتتحط فى حسابى
عرفت بقى انى انا احسن منهم؟؟؟
بجد بجد نعمة الرضا دى نعمة عظيمه جدا
بس ياريت نعرف قيمتها
انما نقول لمين
كلنا ماشيين فى الدنيا مش عاوزين نستكفى منها
صحيح ربنا امرنا بالسعى والجد والعمل
انما ده مايكونش على حساب حاجات تانيه كتير
وبعدين احنا نسعى ونشتغل ونعمل اللى علينا ونرضى باللى ربنا قدره لينا وقسمهولنا
وزى ماربنا قال فى الحديث القدسى
((إن أنت رضيت بما قسمته لك، أرحت بدنك وعقلك، وكنت عندي محموداً.
وإن لم ترض بما قسمته لك، أتعبت بدنك وعقلك وكنت عندي مذموماً))
وقال رسولنا الكريم - صلى الله عليه وسلم -
((ارضى بماقسم الله لك تكن اغنى الناس))
انا كتبت البوست ده علشان انا شوفت ناس عندها النعمة دى
وشوفت هما عايشين سعداء ومبسوطين ازاى
وعلشان كده انا كتبته علشان اذكر نفسى بالنعمه دى واشرككم معايا
وبدعو المولى عز وجل انه ينعم علينا بنعمة الرضا
والسلام عليكم ورحمة الله وبركاته

الخميس، 1 أكتوبر 2009

Back 2 School


بسم الله الرحمن الرحيم


السلام عليكم ورحمة الله وبركاته

كل سنه وانتوا طيبين
المدارس خلاص هتفتح بكره
وهنرجع تانى لوجع القلب والصحيان بدرى


(صحيح انا كده كده بصحى بدرى بس بمزاجى انما ده صحيان غصب عنى)
ونرجع تانى ندور على الكشاكيل والكراسات
وعملت ياحبيبى الواجب ولا نجيب الفلكه
واسكت يابابا واسكتى ياماما
وياحسن هاتلى العصايه
ياخرااااااااااااابى ماكنا مرتاحين
وكمان كله كوم وموضة انفلونزا الخنازير السنه دى كوم
مش هنخلص بقى من الجماعه اللى زى الفل
اللى كل واحد فيهم عامل فيها ابوالعريف
وجاى المدرسه يفتش ويشوفنا هنعرف نحوش الانفلونزا عن العيال ولا لأ
وطبعا مش هنخلص من الفتاوى اللى زى الفل بتاعتهم
وياسلام بقى على الكارثة الكبيرة فى اول يوم
الساده الافاضل المدرسين زمايلنا

والعاده المنيلة بستين نيلة بتاعتهم
لازم اول يوم نقابل بعض ناخد بعض بالاحضان وهاتك يابوس
(وانا مابحبش اصلا ابوس حد)
واللى تلاقيه بقى عنده زكام
واللى واكل بصل ع الصبح
واللى عنده هسهس واللى عنده استبحس وغيره كتيييير
وماتقدرش تقوله لأ يزعل منك
والكل يغلطك بقى الراجل جاى يسلم عليك وانت ترفض
بجد اخص عليك انت وحش
وبما انى رخم بطبعى والحمد لله مش بسلم على الابلوات
(وهما مش بيطيقونى اصلا)
ماهى مش ناقصه
دى تقعد تقول هو انت لسه مااتجوزتش
ودى تقولك طب ليه
ودى تقولك طب انا عندى ليك عروسه تحفه
(اختها طبعا)
ادب واخلاق وجمال ماتحكيش
(وفى الاخر تطلع شبه عيشه الكيلانى)
ياسلااااااااااام لو مااقدرش اروح اول يوم
بس بشرط انهم تانى يوم يعتبرونى روحت ومايعملوش معايا مراسم الترحيب نفسها
اييييييييييييييييييييه ماعلينا
هنعمل ايه بس قدر ولابد منه وربنا يسترها
(لو غبت عنكم شويه ابقوا اسألوا عليا احسن يكون جالى اسمه ايه ده من كتر السلامات)

واه من الكارثة التانية
وهى تسليم الكتب
اللى هى اصلا جاية ناقصه
والعيال وطلباتهم الغريبه بقى
اللى ييجى يقولك يااستاذ انا عاوز اغير الكتاب
ده ليه ياحبيبى
اصله ماعليهوش نقطه حمرا زى الكتاب بتاع زيزو
وشويه وييجى زيزو يقولك يامستر انا عاوز كتاب غير ده
ليه يازيزو
اصله عليه نقطه حمرا يعنى مش نضيف


وحسبى الله ونعم الوكيل


وصبرنى ياااااااااااااااارب


ســـــــــــــــــــــــــــــــــــــــلام