الأربعاء، 26 نوفمبر، 2008

الفشل

بسم الله الرحمن الرحيم

السلام عليكم ورحمة الله وبركاته


الفشل ده طبعا خاص بيا انا ونبتدى نحكى عنه

الفشل فى النجاح فى الثانوية العامة بمجموع محترم (جبت 72%) ودخول كلية من كليات القمة وده بعد كده اثر تأثير كبير فى باقى الفشل اللى فى حياتى

بعد كده فشلى فى تحقيق طموحى وانى احصل على تقدير مرتفع واتعين معيد فى الكلية (تقديرى هو التقدير الشعبى جــيـــــــد) وبعد كده فشلى فى العمل فى مجال تخصصى او بمعنى اصح فشلى فى مجال العمل عموما وبالتالى ترتب عليه الفشل فى مشروع جوازى من الانسانه اللى بحبها وده انا بعتبره هو النتيجه الاهم لكل الفشل بتاعى

طبعا اى حد يشوف الموضوع ده يقول ده واحد معقد واخد صدمة عاطفيه عامله له وش انا اقوله كلامك صح

بس شوف معايا الجاى ده

*لما ماتعرفش تدافع عن حقك فى شغل انت احق بيه من واحد اخد نفس كليتك بس فى 7 سنين وتقديرة العام مقبول وهو يتعين وانت يستغنو عنك وايه السبب انه هو معاه واسطه وانت فاشل مش معاك واسطه وتسيب الشغل والمنصب المحترم اللى كنت بتعد نفسك انك هتبقى فيه (يادوب كنت هتبقى محاسب فى بنك كبير بس )

*لما تبقى انسان صادق واى شخص يسألك عن أى حاجه تقولة الحقيقه وتلاقى الناس مش بتمدح فيك انك صادق او طيب او حتى على نياتك وتلاقيهم بيقولو عنك انسان عبيط وماتعرفش حاجه فى الدنيا

*لما تبص تلاقى كل اللى من حواليك بيستغلوك لاغراض شخصيه ليهم ومش مهم اى حاجه انت عاوزها حتى الناس القريبه منك جدا بيعملو كده

*لما تحس انك وحيد فى الدنيا على الرغم من كل الناس اللى حواليك
* لما يبقى عندك شعور بالغربه وانت عايش فى بلدك ووسط اهلك
* لما تبقى مش لاقى اى حد تشتكي له همك والحاجة اللى مزعلاك
-- اعتقد بعد دا كله ان العيب فيا مش فى الناس اللى حواليا وطبعا ده اثبات اكيد ودليل قاطع على الفشل
مش كده برضه ؟

برضه مش عارف

بسم الله الرحمن الرحيم
السلام عليكم ورحمة الله وبركاته
اولا انا عارف انه محدش هيقرا المدونه دى لانى مش هبعت العنوان بتاعها لحد عشان يدخل عليها
ثانيا انا مش عارف انا عملت مدونه ليه ؟ يمكن عشان مش لاقى حد اتكلم معاه قلت اكتب اللى انا عاوز اقوله وبعدين ابقى اقراه برضه مش عارف ؟
ثالثا انا حالتى النفسيه وحشه خالص اليومين دول وليه ؟ برضه مش عارف
اعرفكم على نفسى
ممكن نقول ان اسمى معتصم ( هو مش اسمى هو شبيه له بس انا بحب الاسم ده ) عندى 30سنه اعمل ولا اعمل فى نفس الوقت حاصل على بكالوريوس بس بعتبر نفسى جاهل
نفسى اعيش حياة هادئه وبسيطه من غير منغصات ومش عارف كل احلامى ( كانت ) انى اتجوز البنوته اللى بحبها ونعيش فى حتة شقه صغيرة وربنا يكرمنا بولد وبنت وده كان يبقى غاية المراد من رب العباد بس والحمد لله على كل حال حلمى مش هيتحقق لانها اتجوزت من شهرين
الكارثه انى مش عارف انساها
عرفتو ليه انا سميت المدونه مش عارف
باختصار لانى مش عارف اعرف اى حاجه