الجمعة، 23 يوليو، 2010

الدعـــوة عـــــامــــــه + إضافه بسيطه

بسم الله الرحمن الرحيم
السلام عليكم ورحمة الله وبركاته

اخوانى واصدقائى الاعزاء والافاضل
انا عارف انى مقصر من فترة طويله
وان الغيبه طالت زياده عن اللزوم
بس والله عندى اعذارى

انا النهارده جاى علشان اعزمكم على فرحى
يوم الخميس الجاى
والدعوة عامه للجميع
والحاضر يعلن الغايب
واهه جه اليوم اللى ناس كان نفسها فيه عشان تشمت فيا

هههههههههههههههههههههههه
هنعمل ايه قدر ومكتوب وممنوش مهروب
وعقبال عندكم جميعا وربنا يفرح الناس كلها
الفرح يوم الخميس فى نادى ديروط الرياضى الساعه9مساءاً
ومحدش له حجه ادينى اهه قلت على المعاد ومكانه
اما اشوف هتيجوا ولا برضه هتفضل عزومة مراكبيه وشغل اسايطه
ســــــــــــــــــــــــــــــــــــــلام

الجمعة، 12 مارس، 2010

صــــــــــــــــــدفه

بسم الله الرحمن الرحيم
السلام عليكم ورحمة الله وبركاته
اولا انا بشكر كل الناس اللى دخلت عندى المدونة
وقدمت واجب العزاء فى والدى الله يرحمه
وبجد ياجماعه انتوا مش عارفين كلامكم أثر فيا ازاى
شكرا للجميع
للى بيزورنى ويعرفنى باستمرار وكمان للناس اللى كانت اول زيارة ليهم علشان يواسونى بكلماتهم الجميلة
**********
طبعا انتوا عارفين قصة تععينى مدرس
(ده انا كنت كاتبها فى بوست مستقل قبل كده )
وطبعا عارفين المعاناه الرهيبه اللى بعانيها فى المواصلات علشان اقدر اوصل لمدرستى الحبيبه مقر عملى الفريد والعبقرى
علشان ادرس للجهابزة الافذاذ اللى بديهم كمبيوتر
المهم كل يوم الصبح وانا رايح المدرسه فى الطريق بعد شارعنا بشويه كده
اقابل واحده ماشيه فى الاتجاه العكسى يعنى انا رايح وهى جايه
اطلع بدرى عن معادى اقابلها فى نفس المكان
اتأخر شويه عن معادى برضو اقابلها فى نفس المكان
الاول ماكنتش بهتم بالموضوع ده ومكنتش بفكر فيه اصلا
لغاية ماالحكاية دى بقيت ملفته للنظر بشكل كبير جدا
كل يوم نتقابل تقريبا فى نفس المكان مهما كنا متأخرين او طالعين بدرى
مش عارف ايه ده ؟ فيه توارد خواطر مش عادى فى المواعيد او الظروف الوقتيه بتاعتنا
انا بعد كده اهتميت بصراحه انى اسأل واشوف دى مين
عرفت انها بشتتغل مُدرسة لغة عربيه فى مدرسه قريبه من بيتنا
وهى بنت ناس كويسين وقمة فى الادب والاخلاق الحقيقه
انا ساعتها كنت لسه باعت المراسيل علشان يتوسطوا بينى وبين ابو خطيبتى الانسهN
ومكنش الرد جانى ففكرت انهم لو رفضونى انى اتقدم فعلا للبنت دى
وهى فيها كل المواصفات المطلوبه
بس طبعا النصيب حكم والحمد لله ربنا اكرمنى وانعم عليا بخطيبتى فلغيت طبعا الفكرة من نافوخى
بس كنت برضو كل يوم وانا طالع الصبح اقابلها
حتى انا احيانا كنت بتعمد انى اتأخر عن معادى بشكل كبير وبرضو الاقيها رايحه شغلها
وساعات كمان وانا راجع الاقيها راجعه هى كمان
المهم جينا بقى اتفقنا انا ووالد خطيبتى على اننا نروح نجيب الشبكه (فاكرينها طبعا)
وفى اليوم ده الصبح شوفتها وضحكت وهى كمان بصت فيا وضحكت مش عارف ليه
رجعت من المدرسه لبست واتشيكت واخدت عربيه وروحت اجيب العروسه واروح بيها عند الجواهرجى علشان تختار الشبكه
ودخلت انا وعروستى عند الجواهرجى ولسه بنقول على اللى هى عاوزاه وابص الاقى البنت دى داخله هى وعريسها علشان يختاروا شبكتهم
هههههههههههه
بصينا لبعض باستغراب فى الاول وبعد كده احنا الاتنين انفجرنا فى الضحك والكل مستغرب الموقف جدا
ولما بيسألوها ايه الموضوع
قالت الاستاذ ده كل يوم الصبح اقابله وانا رايحه الشغل حتى لو اتأخرت الاقيه متأخر
ولو طلعت بدرى بلاقيه هو كمان طالع بدرى زى مايكون بيراقبنى
لدرجة انى فكرت انه فعلا بيراقبنى وعاوز يخطبنى ولا حاجه
بس مش معقوله يعنى بيراقبنى وجايب خطيبته معاه هنا يختارلها الشبكه
هههههههههههههههههه
ولغاية النهارده كل يوم وانا رايح الشغل اشوفها ونضحك احنا الاتنين ونصبح على بعض بس من غير كلام بهزة راس خفيفه كده
شوفتوا الصدفه اللى كنت عاوز احكيلكم عليها
بجد مش حاجه غريبه واننا احنا الاتنين نجيب شبكتنا فى نفس اليوم ومن عند نفس الصايغ
يلا بقى كفايه عليكم صداع لغاية كده
ومرة تانيه بشكركم
ســـــــــــــــــــــــــــــــلام

الجمعة، 5 فبراير، 2010

إنا لله وإنا إليه راجعون

بسم الله الرحمن الرحيم
السلام عليكم ورحمة الله وبركاته
معلش اعذرونى على تقصيرى فى حقكم وعدم انضباطى فى زيارتكم وزيارة مدوناتكم
بس حصلت ظروف صعبه شوية
والدى اتوفى الاسبوع اللى فات
ولله مااخذ ولله مااعطى وكل شيئ عنده بمقدار
والحمد لله على كل حال
وشكرا ليكم كلكم على مساندتكم وعزائكم ودعواتكم الجميلة
ســــــــــــــــــــــــــــــــــــــــلام

الثلاثاء، 19 يناير، 2010

صـــــــــــــــدفه + إضافة بسيطه(للديوان)


عن دار العين للنشر
صدر حديثا ديوان عالم واسع في حجرة مغلقة للشاعر محمد المصطفى
يحمل الديوان عدد من القصائد منها سودوكو وكلمات متقاطعة ووصية وزفاف
وأتمنى تقروه ويعجبكم

بسم الله الرحمن الرحيم
السلام عليكم ورحمة الله وبركاته
*****

طبعا فيه حبايب كتير عاوزين يعرفوا اسباب الغياب اللى كان
نقول شويه
اول سبب المعلم رفيق بتاع الشبكه اللى انا واخد منها الوصله ياعين امه
اتمسك والشبكه بتاعة النت حدانا راحت فى الكازوزة
والجماعه بتوع شرطة الاتصالات وبتوع المصنفات
ملبسين الواد ياعينى مش عارف كام قضيه (الله يكون فى عونه)
وبالتالى سيادتى لما بيحب يدخل نت بيدخل عن طريق الاتصال التقليدى بالتليفون
(ايووووووووه شاطرين اللى هو الدايل اب )
وكمان بعد كده انا فى الفترة اللى فاتت كنت مشغول شويتين لانى كنت بجهز علشان اشترى الشبكه
(خربوا بيتى واخدوا كل اللى حيلتى ماانا كنت قاعد ومبسوط)
وفعلا اشترينا الشبكه وعمكم عبدالعزيز الجواهرجى قشطنى ومخلاش ورايا ولا قدامى ولا جمبى
(اخد منى تمانيه وعشرين الف جنيه ابن المفتريه)
هوووووووووووب قوم ايه بقى
زى مااكون اول واحد فى العالم يجيب شبكه
القر والنق نازل عليا على ودنه ومناخيره كمان
وانا والبنيه ياعينى نقوم من دى نقع فى دى
انا تعبت وهى تعبت وروحنا عند الدكتور وهاتك يابراشيم وادويه
ونخف من دى نلاقى دى
ياعينى الانسهNوقعت من على السلم وهى طالعه الدور التانى ونزلت تكركب
بس ربنا سترها الحمد لله والموضوع طلع بسيط
ده غير الضغط بتاع سيادتى لما حسيت انى مصدع شويه وقسته
لقيت الدكتور بيقولى هو انت ايه اللى مضايقك
قلت له مافيش حاجه ده حتى انا عريس وفرحان ومبسوط
ازاى يعنى ده انت فاضلط نفخه وتفرقع ده انت ضغطك 190
شوفتوا الهنا اللى انا كنت فيه
والحمد لله ربنا برضو سترها وعدت على خير
وربنا يجيب العواقب سليمه
واخر حاجه بقى البورده بتاعة جهاز الكمبيوتر بتاعى جنابى ضربت وعاوز اغيرها
واجيب واحده جديده
بس كده كفايه عليكم نكد لحد كده
نبقى نكمل مرة تانيه
***********
نيجى بقى لموضوع الصدفه
اقولكم انا شايف انى رغيت كتير خالص

احنا نخلى صدفه للبوست الجاى
وربنا يخليلنا الدايل اب
ســــــــــــــــــــــــــــــــــــــلام

الاثنين، 18 يناير، 2010

العــــــــــــــــــودة

بسم الله الرحمن الرحيم
السلام عليكم ورحمة الله وبركاته
بجد بجد وحشتونى جدا جدا جدا
وانا آسف على الغيبه الطويلة دى بس كانت ظروف مش بإرادتى
هو صحيح لسه الدنيا مااتظبطتش قوى يعنى انما اهه بنحاول معاها
وبشكر كل الناس الحلوة اللى افتكرونى وسألوا عليا
انا مش هطول واعتبر انه بوست
انا بس حبيت ادخل اسلم وكمان الدايل اب مطلع عنيا
وان شاء الله بكرةولا بعده كده هنزل بوست اسمه صدفه
ومرة تانيه بشكركم بجد من قلبى
ســــــــــــــــــــــــــــــــــــــلام