السبت، 31 يناير، 2009

عزة ومحسن

بسم الله الرحمن الرحيم

تحديث تحديث تحديث

المعلم محسن اتظبط ياجدعاااااااااااااان

تم بحمد الله اليوم فى تمام الواحده والنصف ظهراً القيام بتنفيذ الخطه ع م 11

وقد تم تنفيذ الخطه بنجاح منقطع النظير

نتكلم بقى واقولكم كده باختصار على اللى حصل

محسن كان طالع من شغله وكنا عاملين له كمين فى حتة هاديه كده بيعدى منها وهو مروح علشان مايكونش فيه ناس كتير تحوش عنه وكنا فى انتظاره خمسه شباب زى الفل

هوماشى بالعجلة وفيه واد صغير كده حوالى 15سنة معدى من قدامه وراح واقف وابتدى الحوار ده

#انت ياابنى اوعى كده ولا كده

* ايه ياعم انت مانعديش يعنى ولا ايه

#انت يااد حمار فيه حد يمشى كده فى الشارع انت

* ايه هو ده انت بتشتم ليه انا امشى براحتى فى اى حته

#تمشى براحتك ايه هو انت فاكرة شارع ابوك

*بقولك بلاش غلط احسنلك والله العظيم هتندم انت سامع

#وده مين ان شاء الله اللى هيندمنى يا000000000

* اهو انت وهوريك دلوقتى يا ابن 00000000000

هوووووووب عمنا محسن راح ماسك فى الواد وعاوز يضربه

ايه يااستاذ مش عيب عليك تمسك فى عيل قد ركبتك وكمان عاوز تضربه ؟

# ده عيل مش متربى

* ياعم وانا معدى الشارع خبطنى بالعجلة وعورنى وكمان نازل علشان يضربنى

(وطبعا مع الكلام ده الواد عامل نفسه بيعيط)

لأ لأ لأ كده عيب عليك انت كده بصراحه راجل مش محترم

# ايه ده وانت مال000000انت كمان

الله عليك كمان لسانك طويل لأ ده انت كده عاوز تربيه من اول وجديد

وخد عندك

احنا الخمسة طحناه

بس المهم فى دا كله انى ابتديت اول واحد وهبشته قلم ولا قلم عزة على صداغى

وبعد كده عمل فيها صايع وطلع مطوة قرن غزال ياعينى خدناها منه غنايم حرب

بس الناس اتلمت وحاشت والواد الصغير خلع فى وسط الزيطه

وياعم ماتزعلش حقك عليا

لا ياعم بس اصل انا كنت متضايق شوية

كانى مانى خلص الموضوع بعد ماصاحبنا اتظبط والحمد لله

طبعا البشمهندس الصغير ده كان ابن عمى

وامعاناً فى الكيد لمحسن كنت واخد اخواته الاتنين الكبار علشان لو ضرب الواد ياكلوه اكل

طبعا انا كنت بقول اننا هننفذ الخطة الاسبوع الجاى

بس ده كان مجرد تمويه احسن حد يكون بيقرا المدونه وبينقل الاخبار لمحسن

شوفتو تخطيط الصعايده

عفاريت

والحمد لله اتسترت


السلام عليكم ورحمة الله وبركاته

الموقف ده حصل من يومين كده تقريبا انا حاولت اكتبه زى ماحصل مع مراعاة انه طبعا لازم يكون هناك بعض الاختلاف بين الحقيقى والمكتوب بس الاختلاف مش كتير يعنى كده حاجه بسيطه وهو الموقف سواء كان كده او كده موقف مهبب . ياريت بعد اما تقروة تقولولى ايه رأيكم فى اللى حصلى ده وكان ممكن اتصرف ازاى :-
ماشى فى امان الله بعد ماخلصت شوية مشاوير كده ورجعت من البنك قلت اروح ابرم شويه على الصيدليات اللى فى وسط بلدنا وانا ماشى لقيت بنوته كده حلوة وشيك على الاخر راحت واقفه قدامى وبتتنهد جامد
*خير يا ابلة فيه حاجه
- يعنى انت مش عارف فيه ايه يا00000(شتيمة)
* يانهار اسود ليه الغلط ده يابت الناس ليه كده
- ليه كده ؟ ايوة ياخويا استعبط استعبط واعمل نفسك مش عارفنى وهى جديده عليك يا 0000000(وابل شتيمة)
*يانهار ابوكى اسود ايه يابنت ال000(شتيمة برضو)اللى بتقوليه ده وبعدين انا اعرفك منين انتى هتجبيلى تهمة
- ده انا هوديك فى داهيه يا 00000000000000000000000000000000000
الناس اتلمت علينا و واحد يسأل فيه ايه يا ابله وواحد تانى هو ماله بيكى الجدع ده وواحد تالت مش تحترم نفسك ده حتى باين عليك ابن ناس ورابع يقول ياعم دى اشكال زباله وفاكرة نفسها عيال روشه وووووووو

(كنت هتروق ترويقه صح الصح)
* ايه ياخوانا كل واحد يحترم نفسه ومش عاوزين كتر كلام دى واحده مجنونه انا مااعرفهاش اصلا حتى اسئلوها انا عملتلها ايه مش هترد عليكم
- يسلام يعنى انا هرمى بلايا عليك وهب طااااااااااااااااااااااااااااااااااااااخ (بالقلم على وشى)
انا ايدى راحت على طول على الطبنجه بتاعتى وطلعتها وهسحب الجرار والناس مسكتنى هتعمل ايه
سيبوووووووووووووووووونى ان ما وريتك يابنت 00000
كان فيه واحد فايت وشاف الحكاية طلع يعرف الاخت (اللى طلع اسمها عزة)راح داخل وحاش الناس ونده عليها
= عزة روحى على البيت بسرعه يللا اااااااا بسرعه انتى فاهمه
وبصلى كده وقالى معلش ياابنى حقك عليا امسحها فى راسى وهى اخدت بعضها ومشيت بكل بساطه ولا كأنها لسه هبدانى كف من شويه
* نعم ياعم حقك عليا ؟ ودى اصرفها منين ان شاء الله ؟ ده انا كلت كف مااكلوش حرامى فى مولد ومش هسيب حقى يعنى مش هسيب حقى وهعرف هى بنت مين وسنينها وسنين اهلها هباب معايا
وروحت مدخل الطبنجه وانا بستحلف لها ومشيت مع الراجل ده بعد ما الناس اتفضت من حوالينا وطبعا هيموتو من الفضول علشان يعرفو انا عملت ايه لعزة عشان تهبدنى القلم المحترم ده
مشيت مع صاحبنا ده وقلت له ايه بقى موضوع عزة قالى مافيش وياعم ماتزعلش وحقك عليا وهات راسك ابوسها اهه وانسى الموضوع بقى وكأن مافيش حاجه حصلت
* طب وحياة أمى انا لو ماعرفت الموضوع ماانا ساكت وشوف انا هعرف عزة دى منين وبنت مين وهفضحهم واجرسهم هو انتو مش عارفين انا مين وواد مين ولا ايه ؟ ده انا فلان الفلانى ابن الحاج فلان وهروح دلوقتى على البيت واجيب باقى ولاد عمى وهخليها دمار النهارده
الراجل قالى طب انا هروح لابوك واعتذر له
* ماليش دعوة ده انامضروب فى قلب البلديعنى كده مش هعرف امشى فى المنطقه دى تانى وبعد كده هتفضح فى البلد كلها
- قالى طب بص هقولك بس ماتعرفش حد
* ليه ان شاء الله هو سر حربى ولا ايه
- ايوة ياابنى دى سمعة بنت
* وهى دى ليها سمعه دى مجنونه ياعم الحج
- عيب كده امال
* ماشى قول ولما نشوف اخرتها فى اليوم الاسود ده
- دى كانت مخطوبه لواحد اسمه محسن وقعد خاطبها سنتين وبعد كده سابها وراح اتجوز واحده تانى كانت صاحبتها
* ياسلام الفيلم ده اناشوفته ابيض واسودبتاع شكرى سرحان وشادية وناديه لطفى ايه ياعم انت هو انت جاى تسرح بيا
- ياولدى اسمع بس زى مابقولك كده حتى لو مش مصدقنى تعالى معايا
واخدنى ورحنا الحتة اللى ساكنه فيها الابله وسألت الناس هناك وعرفت هى بنت مين وطلع الموضوع بجد
بعد ماسابها صاحبنا قعدت حوالى اسبوعين فى المستشفى وبعد كده تغيب وتجيلها حاله توهان كده وتشوف اى حد تفتكره الباشا وتروح ملبساه قلم محترم زى اللى انا خدته
لا حول ولا قوة الا بالله
بس كده ماينفعش انا اتضربت قلم وقلم جامد كمان وانا مش من النوع اللى بيسيب حقه
طب اعمل ايه ؟؟
لميت ولاد عمى (بيتلمو فى المصايب والخناقات بسرعة البرق زى مايكونو رايحين فرح) وعقدنا مجلس حرب
طبعا ده كله علشان نجيب حق العيلة اللى متمثل فى شخصى
وقــــــــــررنا

اولا البحث عن المدعو محسن (وحياة امى لاهبده كف يطلع من عينه )وتخليص حق العيله منه ورد اعتبارها
ثانيا عمل نشرة توضيحيه بأن الموقف اللى حصل ده فى الحته الفلانيه دى كان فيه سؤ تفاهم وغير مقصود
(انا مش عارف اطلع من البيت بعد الكف اللى خدته)
ثالثا بمبداء الاستفادة من الكوارث الكف لخلخ الضرس اللى كنت هروح احشيه عند الدكتور يعنى هيقع ومبقاش له لازمة الدكتور والمصاريف رُب ضارة نافعة
وحسبى الله ونعم الوكيل فيك يامحسن يا ابن ام محسن ومش هسيبك
لو اى حد مكانى بقى كان هيعمل ايه فى الموقف المهبب ده
ومش عاوز ضحك
انا بتكلم بجد
( ولو ان انا عارف زينب مش هتسكت )

والسلام عليكم ورحمة الله وبركاته

الثلاثاء، 27 يناير، 2009

الصداقة

بسم الله الرحمن الرحيم

السلام عليكم ورحمة الله وبركاته

من النعم الكثيرة اللى انعم ربنا عز وجل علينا بها نعمة الصداقة

الصداقة هى الوجه غير المرئى للحب

الصداقه هى التى تجمع بين شخصين لغير غرض الا الود والمحبة فى الله

ولكن هل مازال فى زماننا هذا صداقه حقيقيه من التى نتكلم عنها ؟

زمان قالوا فى المثل الصديق وقت الضيق

وقال الشاعر(اعتقد المتنبى) :

خليلك انت لا من قلت خلى ... وإن كثر التجمل والكلام

فنحن كثيرا مانقول اننا فى زمن المصالح والماديات

زمن انتهى منه الحب وصار فيه كل شيئ بثمن

فهل هناك فى هذا الزمن توجد صداقه حقيقيه ؟

قديما قالو المستحيلات ثلاث : الغول والعنقاء والخل الوفى

ياسبحان الله يعنى مش فى زماننا بس ده من زمان والموضوع صعب

وعشان كده من السبعه الذين يظلهم الله فى ظله يوم القيامه كما اخبرنا رسولنا الكريم

(( رجلان تحابا في الله اجتمعا عليه وتفرقا عليه ))

وقد سئل ابوحيان عن اطول الناس سفرا: فقال من سافر فى طلب صديق

وقال الشاعر

جزى الله الشدائد كل خير ... عرفت بها عدوى من صديقى

وقال الامام الشافعى

صديق ليس ينفع يوم بؤس --- قريب من عدو في القـياس

ومـا يبقي الصـديقُ بكل عصر--- ولا الإخوان إلا للتآسي

عبرت الدهر ملتمسا بجهدي --- أخـا ثقة فألهـاني إلتماسي

تنـكرت البلادُ ومن عليها --- كـأن اناسـها ليـسوا بنـاس

انا كنت عاوز اكتب عن الصداقه واقول فيها كتير لقيت ان الموضوع كبير جدا

وان فيه ناس كتير مش مؤمنه بإن فيه حاجه اسمها صداقه فعلا وان كل اللى بين الناس

مجرد علاقات شغل ومصالح ومنفعة

بس انا شايف انه فعلا فيه صداقه حقيقيه وانه فيه ناس بيكون بينها ود وحب خالصين لله مش علشان مصلحه او علشان شغل وده عن تجارب شخصية ولله الحمد(بس هما بصراحه قليلين شوية انما موجودين)

انا كتبت البوست ده علشان اعرف ايه رأيكم فى الموضوع

ياترى فيه فعلا صداقه حقيقيه؟

ولا زى ماكتير من الناس قديما وحديثا بيقول انه مافيش حاجه اسمها صداقه؟

ياريت اللى يكتب تعليق يقولى رأيه فى الموضوع بصدق

فى انتظار ارائكم

والسلام عليكم ورحمة الله وبركاته


الأربعاء، 21 يناير، 2009

التاج لغربتى والاسئلة للعبد لله

بسم الله الرحمن الرحيم




ده كان التاج اللى بعتته الاخت زينب لاختنا غربتى وبعد كده الاتنين اتفقو ودبسونى فيه ولانى مقدرش ارفضلهم طلب هجاوب عليه وامرى الى الله
بسم الله نبداء
س 1 – بدأت تدون امتى ودخلت عالم التدوين ازاى ؟
جــ1 – بدأت تدوين فى شهر نوفمبر 2008 وساعتها كانت نفسيتى تعبانة شويتين لان البنت اللى بحبها اتجوزت بعد ماابوها رفض انى اتجوزها لظروف ماديه والله اعلم فكنت متضايق ومش لاقى حد اكلمة فى الموضوع ده فلقيت بالصدفه الصفحه اللى هى بتاعة ازاى الواحد يعمل مدونة طقت فى دماغى الفكرة وقلت اكتب اللى نفسى اقوله فيها وعلى فكرة كتبت فيها حاجات كتيرة خالص بس بعد كده كنت بمسحها يعنى هى بالنسبة ليا نوع من انواع الفضفضه
س 2 – مين اكتر حد بتحب تعليقه على بوستك الجديد؟
جـــ2 – اكتر حد بحب تعليقه على البوست الجديد كل اللى بيعلقو عندى لانهم والحمد لله رب العالمين ناس محترمين وفكرهم عالى ومثقفين واهم من ده كله ناس ملتزمين وبيدونى النصيحه السليمة لو كنت على خطاء وبيشجعونى لو كنت على صواب
س 3 – ايه اهم حاجه اتعلمتها من التدوين ؟
جـــ3 – اهم حاجه اتعلمتها من التدوين مش عارف بصراحه بس هو حسن كتير من حالتى النفسيه وكمان كان سبب فى بداية رجوعى الى الطريق القويم (وده موضوع كبير شويتين)
س 4 – حاسس ان التدوين له تأثير ؟
جـــ4 – اكيد التدوين له تاثير لان اى واحد لما بيتناقش مع اى حد تانى بيكون فيه نتيجه للنقاش ده هى دى بالظبط نفس نتيجة التدوين وتأثيره انا بعرض موضوع واللى بيقراه بيعلق عليه ونتناقش فيه
س 5 – اذكر خمسة احلام تخص مستقبلك ؟
جـــ5 – خمس احلام تخص مستقبلى:
أ‌- ان شاء الله ربنا ينصر امتنا الاسلاميه وتتوحد ونحرر بيت المقدس (ده بالنسبة للامة)
ب‌- ان شاء الله ربنا يكرمنى واروح الحج واصلى فى الكعبة
جـ - ان شاء الله مشروعى يكبر وينجح ولا الحوجه للوظيفه الحكومى اللى ذلتنا
د- ان شاء الله ربنا يوفقنى ويرزقنى زوجه طيبه بنت حلال على خلق تشاركنى مستقبلى
هـ - ان شاء الله ربنا يرزقنا الذرية الصالحه ونعرف نربيهم على دينه ويكونوا من اعمالنا اللى تبقالنا بعد مانموت
س 6 – اذكر على الاقل شخصين متواجدين فى حياتك حاليا كنت تود وجودهم من زمن ؟
جـ6 – شخصين متواجدين دلوقتى كنت اتمنى تواجدهم من زمن مش عارف بس انا متهيألى ان كل واحد فى حياتى له ميعاد معين بييجى فيه علشان حاجه معينه تحصل فبالتالى يبقى ماينفعش انهم كانو يبقو موجودين زمان
س 7 – على من تطلق الرصاص ؟
جــ7 – كتييييييييييييييييييييييييييييييييييييييييييييييييييييييييييييييييير
س 8 – ماهى السعادة من وجهة نظرك ؟
جـ8 – السعادة حاجه بسيطه جدا تتمثل فى القناعه والرضا يعنى الواحد يعيش عيشه بسيطه وهو راضى وقانع ويؤدى فروض ربنا ويبعد عن معصيته يبقى ملك الكون كله ويبقى اخر انبساط
س 9 – كيف تصل الى السعاده ؟
جــ9 – نصل للسعاده عن طريق الرضا بقضاء الله وقدره ونعمل اللى علينا وبعد كده نسيب الباقى على ربنا
س 10 - هل السعادة وهم ام انها حلم صعب ؟
جـ10 – السعاده مش وهم دى حقيقيه جدا بس هى صعبه شوية لاننا بعدنا عن طريق ربنا وهو اللى بيرزقنا السعاده دى وانشغلنا بالبحث عن الدنيا فشغلتنا ونستنا السعاده
س 11 – ماهى اكثر اللحظات التى شعرت فيها بالسعاده ؟
جـ11 – اكثر اللحظات التى شعرت فيها بالسعادة اول حاجه هفتكرها لانها كانت قريبه جدا لما جه مصطفى الصغير ابن اخويا للدنيا وده كان يوم 16/12اللى فات كنت طاير بيه طيران
وكمان لما الواحد ربنا يقدرة ويعمل حاجه كويسه ويشوف فعلا جزاء عمله من ربنا عز وجل وازاى بينعم عليه وييسرله اموره
س 12 – هل انت متفائل وعندك امل ؟
جـ12 – موضوع متفائل ده بيكون متوقف على الحاله النفسيه بس هو والحمد لله فى اغلب الوقت متفائل ويحدونى الامل
س 13 – ايه اكتر شيئ بتحبه واكتر شيئ بتكرهه ؟
جـ13 – اكتر شيئ بحبه الهدؤ والسكون ولذلك انا من عشاق الليل (لعدم الازعاج فيه)
واكتر حاجه بكرهها هى الجدل على الفاضية والمليانه انا بكره الجدل جدااااا فى اى حاجه
س 14 – ضع مرادف او تعريف من عندك لكل كلمة ؟
جــ14 – مرادفات :
الحب : شعور جميل ربنا مايحرم حد منه
الحنان: اكيد الامومة
الرحمة: نعمة من الله عز وجل
التفاؤل:من اسباب السعادة
السعادة: القناعه والرضا وطبعا ده برضا ربنا عنى
س 15 – ماهى مواصفات فتاة احلامك ؟
جـ15 – مواصفات فتاة الاحلام انها تكون مؤدبه على خلق تراعى ربنا فيا وتكون ست بيت شاطرة ومتكونش عصبية وتكون عاقلة وراسية كده ومش طماعه وكمان دمها خفيف
س 16 – صفات تتمنى ان تكون موجوده فيك ؟
جــ16 – صفات اتمنى انها تكون موجوده فيا : نفسى اكون مثقف لانى ساعات كتير بحس انى جاهل وكمان نفسى ابقى جريئ اكتر واكون اجتماعى اكتر لانى منطوى ع الاخر
س 17 – اصعب موقف حصلك واطرف موقف ؟
جــ17 – اصعب موقف حصل كان والدى تعبان شوية وكنت فى البيت وحدى وفجأة اغمى عليه ومكنتش عارف اتصرف ازاى واخواتى الاتنين كانو فى القاهرة وعلى الرغم من ان قرايبنا جنبنا فى البيت الا انى محبيتش انهم يشوفوه فى الحاله دى اتصلت بدكتور صيدلى صاحبه جه قعد معاه واداله حقنة فوقته على ماجبت الدكتور هو صحيح بعد كده تعب تانى انما نقلناه المستشفى وربنا انعم عليه بالشفا
اطرف موقف بقى لما كنت فى قاهرة المعز و كانو عاملين العربيتين بتوع الستات فى المترو فى الوسط وكان الموضوع ده لسه جديد وانا مااعرفش انا اعرف ان اول عربيتين هما بتوع الستات ومتعود انزل السلم اركب العربيه اللى فى الوش على طول واركب الاقى كل اللى فى العربيه ستات ايه ده وشى جاب الوان ومحدش فيهم قالى حاجه كانو يبصو عليا ويضحكو انا فضلت واقف جنب الباب نزلت المحطة اللى بعدها وركبت العربيه التانيه يااااادى النيله هو القطر كله ستات ولا ايه وقاعد دماغى هتفرقع من الكسوف وكل الدم اللى جسمى جه بقى فى وشى وودانى مش احمرت لا ده الدم كان طالع منها بعد كده بمحطتين لاحظت انه فيه رجاله لسه عايشه اهو وبتركب المترو وجه اتنين يركبو ففيه واحده قالتلهم دى عربية الستات طب ماتقولى ياحاجه من الصبح حرام عليكى عنها ونزلت زى الصاروخ كان موقف مهبب
س 18 – الصفات اللى بتحبها وتكرهها فى نفسك ؟
جـــ18 – الصفات اللى بحبها فى نفسى الاصرار والصبر والصفات اللى بكرهها الخجل والطيبة الزيادة
س 19 – حاجه عملتها قبل كده وتتمنى تعملها تانى ؟ وحاجه عملتها قبل كده وماتتمناش تعملها تانى ؟
جــ19 – حاجه عملتها قبل كده واتمنى اعملها تانى انى ارجع اختم القرآن حفظ بإذن الله اما الحاجه اللى عملتها ولا اتمنى انى اعملها تانى هى محاولة الانتحار بعيد عنكم
س 20 – ايه رايك فى الحب وبكل صراحه ؟
جــ20 – ماقلنا الحب شعور جميل لأى حد ولأى حاجه يعنى الواحد لازم يحب الناس ويحب شغله ويحب حياته وبالتأكيد مش هيحب ده كله الا لما يكون فى الاول وفى الاخر بيحب دينه ومتمسك بيه
س 21 – لخص الحياة فى سطر واحد ؟
جــ21 – الحياة هى امتحان لينا اما اننا ننجح فيه وندخل الجنة او نفشل والعياذ بالله وعالنار عدل
س 22 – امتى وليه تخبى دموعك وضحكتك ؟
جــ22 – انا بخبى دموعى على طول لدرجة انى احيانا بكون لوحدى ومش بعرف اعيط لان ده عندنا بيعتبر ضعف والراجل المفروض ميكونش ضعيف
اما الضحكة مش بخبيها الا لو كانت هتجرح اللى قدامى
س 23 – لو جتلك الفرصه تعبر عن شعورك تجاه شخص معين هتقوله ايه قدام الناس ؟
جــ23 – عادى هقوله كل حاجه موجوده فيه بكل صراحه واحيانا بكل بجاحه على الرغم من انى خجول على الاخر بس دى فرصة بقى مش هتتعوض
س 24 – اكتر حاجه بتعملها فى يومك ؟
جـ24 – اكتر حاجه بعملها فى يومى دى مش عارفها دى حسب الشغل يعنى ممكن انام وممكن اقعد قدام النت وممكن لا دى ولا دى وادور الف على الصيدليات كله حسب الشغل
س 25 – مثلك الاعلى اللى تتمنى تبقى زيه ؟
جــ25 – طبعا هو قدوتنا الرسول عليه الصلاة والسلام مافيش شك فى كده بس لما بنشوف حد كويس فى اى حاجه وناجح بنحب نكون ناجحين زيه فى الحاجه دى
س 26 – الحاجه اللى لو ربحتها اكنك ملكت العالم كله ؟
جــ26 – الحاجه اللى نفسى اكسبها هى رضا ربنا عنى بعد كده مافيش حاجه تفرق معايا
س 27 – نقطة ضعفك ؟
جــ27 – نقطة ضعفى هى الطيبة الزياده عن اللزوم (خاربه بيتى )
س 28 – لو تحب تهدى التاج ده لشخص تهديه لمين ؟
جــ28 – مش ههديه لحد



ولا اقولك تعالى هنا يا ابلة زينب انا بهديكى التاج ده اهداء شخصى جدا ولازم تجاوبى على كل الاسئلة اجابات مستفيضه وتشرحيها شرح وافى

من أعمالكم سلط عليكم

ههههههههههههههههههههه

انا جاوبت على الاسئلة بصراحه شديده جدا واللى شجعنى على كده انه مافيش حد يعرفنى معرفة شخصيه فلو فيه بعض اجاباتى معجبتش حد يبقى يقولى رايه بس يراعى يعنى انه مافيش حد كامل وان الكمال لله سبحانه وتعالى
والسلام عليكم ورحمة الله وبركاته

الثلاثاء، 20 يناير، 2009

بوست مقتبس لما به من الحكمة

بسم الله الرحمن الرحيم
السلام عليكم ورحمة الله وبركاته
البوست ده شفته فى مدونة اسمها ديوان الامام الشافعى وعجبنى وصاحب المدونة اسمه ابويحيى ياريت يسامحنى على الاقتباس ورابط مدونته هو
سأل بعض الناس الامام الشافعي عن ثمانية اشياء
فقالوا له :
مارايك في واجب وأوجب , وعجيب وأعجب , وصعب وأصعب , وقريب وأقرب ؟
فرد عليهم بقوله :
من واجب الناس أن يتوبوا... ولكن ترك الذنوب أوجب
والدهر في صرفه عجيب ... وغفلة الناس عنه أعجب
والصبر في النائبات صعب ... ولكن فوات الثواب أصعب
وكل ماترتجي قريب ....والموت من دون ذلك أقرب
ياريت ناخد حكمة من الابيات السابقه
والسلام عليكم ورحمة الله وبركاته

الجمعة، 16 يناير، 2009

الدعاء


بسم الله الرحمن الرحيم


السلام عليكم ورحمة الله وبركاته


كلنا يعرف ويعيش الظروف المريرة التى تمر بها أمتنا الاسلامية


وبعضنا يقول اننا لانملك الا الدعاء


فيرد عليه البعض الاخر ويقول وهيعمل ايه الدعاء


مااحنا طول عمرنا ندعى


وانا مش هقول حاجه


انا بس هقول بيتين شعر قالهم الامام الشافعى رحمه الله



أَتَهْزَأُ بِالدُّعَاءِ وَتَزْدَرِيهِ ..... وَمَا تَدْرِي بِما صَنَعَ الدُّعَاءُ

سِهَامُ اللَّيلِ لا تُخْطِي وَلَكِنْ ..... لها أمدٌ وللأمدِ انقضاءُ


بس مش معنى كده اننا نقول اننا مانملكش غير الدعاء ومانعملش اى حاجه تانى


لأ


لازم نحاول نصلح من نفسنا ونعمل اللى علينا


ساعتها الدعاء بتاعنا هيتحقق


اللهم انصر الاسلام وأعز المسلمين


وأعلي بفضلك كلمتى الحق والدين


اللهم آمين


والسلام عليكم ورحمة الله وبركاته

الأربعاء، 7 يناير، 2009

اجازة قصيرة


بسم الله الرحمن الرحيم

السلام عليكم ورحمة الله وبركاته

لظروف شخصية سأسافر الى القاهرة فى رحلة قصيرة بإذن الله

دعواتكم لى بالتوفيق

والسلام عليكم ورحمة الله وبركاته


الاثنين، 5 يناير، 2009

اللامبالاه




بسم الله الرحمن الرحيم

السلام عليكم ورحمة الله وبركاته

النت كان قاطع عندنا وده عادى وطبيعى يعنى مش جديد ولما ربنا اكرمنا واشتغل حبيت اتصفح بعض المدونات اللى بحب اقراء اراء اصحابها وكمان التعليقات عندهم لانى بستفيد منها جدا ومنهم مدونة اخ فاضل كله حماس للاسلام وغيرته على دينه واضحه جدا وفى التعليقات لقيته بيقول على الناس اللى بتقول واحنا مالنا ومال بتوع غزة والكلام ده بيقول عليهم منافقين

اللى اثارنى انى وبعد العمل كنت قاعد مع مجموعه من الناس بنتكلم وفيهم ناس كانت بتقول واحنا هنعملهم ايه نروح نموت وباقى العرب قاعدين يتفرجو واشمعنا احنا يعنى وعلى فكرة الناس دى فيها ناس كتير ملتزمة جدا وكويسه جدا بس مش فاهمه الموضوع صح
يااخوانا انا مش عاوز الواحد ياخده الحماس والغيرة تخليه يتعصب على ناس قريبه منه

احنا نشوف ايه السبب اللى يخلى حد مسلم يقول الكلام ده ونتكلم معاه ونشرح له ونفهمة القضيه

ماتنسوش اننا فى بلاد الناس فيها مش بتعمل اى حاجه بارادتها وعشان كده تلاقى غالبيه الناس عندها لامبالاه فظيعه وقبل اللامبالاه دى يأس من كل حاجه
احنا بقى دورنا والواجب علينا اننا نحاول نصلح العيب الخطير ده فى اللى حوالينا

يعنى انا لما قعدت اتكلم مع اللى حواليا ونتناقش ونختلف بس كل مايقول حد فيهم حاجه ارد عليه عليه واقوله الدين بيقول كذا وكذا واننا بعد كده الدور جاى علينا واننا لازم نتكاتف ونقف مع بعض علشان نخلص من اللى امتنا فيه ده ونحسن من احوالنا ويكون عندنا امل فى الله كبير اننا نعيش عيشة احسن من اللى احنا عايشينها دى ويكون لينا رأى
الكلام ابتدى يجيب نتيجة ومبادرة اننا مثلا نصوم مع بعض بكرة وندعى المولى عز وجل واحنا صايمين لعله يتقبل مننا ودى كانت البداية
لقيت فيه كلام كتير اتغير وابتدى ياخد منحنى تانى غير واحنا مالنا وهو مافيش حد يحارب غيرنا وفيه بارقة امل اننا نكون ايجابيين ونرمى السلبية ورا ظهرنا
ممكن ناس كتير تختلف معايا فى رأيى ده بس اللى انا عاوز اقوله اننا مش هنقدر نغير اللى حوالينا فى يوم وليلة ولازم نتكلم ونتحاور ونشرح القضية ونعرف الناس ايه اللى لازم علينا نعمله ومانطلقش الاحكام عليهم لمجرد انهم مش فاهمين
وبعدين احنا عشان نحقق اللى عاوزينة فعلا مش هينفع نحققه من غير اهلنا وناسنا اللى عايشين معانا فى بلدنا لان دول هما اللى هيكونو السند والعون لينا
زمان من كام سنة كده لما كنت فى الجيش بقضى الخدمة العسكرية كان معانا عساكر كتير من العينة اللى بنتكلم عليها وكنا بنسميهم السكلية بس ساعة الجد لما كان بيبقى فيه تدريب بالذخيرة الحية او مشروع (وده ممكن الواحد يموت فيه عادى يعنى) كنا بنلاقى العساكر كلها موجوده حتى الجماعه السكلية على الرغم من انه ممكن ناس فيهم تقدر تزوغ بس ماكنش بيحصل وكنا بنروح التدريب كلنا مع بعض عشان احنا شايفين ان دى حاجه بجد تنفعنا وتنفع بلدنا والكل بينسى الكلام اللى بيتقال بتاع واحنا مالنا ومش عارف ايه
فيه واحد صاحبى مات قدام عنيه تلاتة اصحابة فى مشروعين بالذخيرة الحيه وكانو اصحابة خالص واول ماخلصنا كان بيسب ويلعن فى الجيش واصحابة ومع ذلك اول ماجتلنا الاستدعا هو اول واحد راح لما عرف ان المشروع عبارة عن مناورة حيه وقبل كده لما كان فيه استدعا عادى مش مشروع حرب ماراحش
هى دى الروح اللى انا بتكلم عليها والواجب اللى علينا اننا نعمله هو اننا لازم نكلم الناس ونعرفهم القضية ونحركها فيهم ونحاول نخرجهم من حالة اللامبالاه دى وبعد مانعمل اللى علينا هنلاقى فيه تغيير كبير وهايل واللى بعد كده هيقول وانا مالى وهو انا اروح اموت ليه هو ده اللى هيبقى منافق فعلا ومش حريص على دينه ولا على بلده
هو ده رأيى
وطبعا الخلاف فى الراى لايفسد للود قضية
ياريت نتناقش بموضوعيه فى الكلام ده ولو حد شايف ان كلامى غلط ياريت ينصحنى ويعرفنى غلطى فين له منى كل الشكر والتقدير

سبحانك اللهم وبحمدك اشهد ان لا اله الا انت استغفرك واتوب اليك

والسلام عليكم ورحمة الله وبركاته

الخميس، 1 يناير، 2009

2009


بسم الله الرحمن الرحيم

السلام عليكم ورحمة الله وبركاته

من شوية وصلتنى رساله كل سنة وانت طيب بالعام الجديد 2009 ومش عارف ليه قلقت لما قريت الرساله
يمكن علشان انه العام الجديد هالل علينا واحنا فى الظروف دى (حصارغزة وموت اهلها)
الواحد مش عارف يعمل ايه
يتشائم من العام اللى من اوله كده ظلم وموت وقهر وخراب

ولا يقول ((وعسى ان تكرهو شيئا وهو خير لكم))

ويكون فى العام بداية الصحوة والانتفاضه بسبب كثرة الظلم اللى واقع علينا
انا قربت اتجنن مش عارف اتفاءل ولا اتشائم
صحيح احنا بنحاول اننا ناخد موقف ايجابى من اللى بيحصل حوالينا

بس لسه مش عارفين هننجح فعلا ولا شوية كده وهنتعب ونرجع نسكت تانى زى الاول

ربنا يستر

اللهم انصر الاسلام واعز المسلمين

اللهم امين

والسلام عليكم ورحمة الله وبركاته