أقــــــــــــــــــدار (تحديث صغنون)

بسم الله الرحمن الرحيم
السلام عليكم ورحمة الله وبركاته
********
نظرا للظروف النتيه البحته
وان الدنيا عندنا فى شبكة المعلم رفيق متلخبطه على الاخر
انا بعتذر على تأخرى فى الرد على تعليقاتكم الجميلة
وربنا يسهل والدنيا تتظبط واعرف ادخل على النت تانى
بدل الشحططه اللى انا فيها دى
(كان معكم المعتصم ابوالعافيه من سيبرلقيه فى سكته وهو مروح)
************
دى قصه قصيرة كنت كتبتها من فترة
صحيح انا مش ناشرها كلها هنا ومختصر فيها على قد مااقدر
بس ياريت تقولولى رأيكم فيها
وفى تصاريف الاقدار
*******
هو اسمه عصام

وهى اسمها ريهام

كان بينهم قصة حب جميلة جدا

عصام كان بيحب ريهام لدرجة الجنون

واول ماربنا اكرمه واشتغل شغلانه كويسه

راح جرى على والد ريهام وخطبها منه

ووالدها وافق لانه لقى عصام مايتعيبش

شاب كويس وابن ناس محترمين واخلاقه عاليه

وكان الاتنين عصام وريهام عايشين فترة خطوبه فى منتهى السعاده اللى فى الدنيا

كل البنات اللى تعرف ريهام بتحسدها على عصام

وكل الولاد اللى يعرفوا عصام بيحسدوه على ريهام

ماهى كمان بنت ناس كويسين ومؤدبه وجميلة ومثقفه

وفى يوم تعب عصام شويه

وراح للدكتور فطلب منه شوية تحاليل

راح لمعمل تحاليل بتاع دكتور صاحبه

وعمل التحاليل المطلوبه كلها

وهو قاعد مع الدكتور صاحبه بتاع التحاليل

سأله هل ممكن يكون التعب ده له تأثير على علاقته بريهام بعد الجواز

(على اساس ان التعب كان فى الكلي)

صاحبه طمنه وقاله انه زى الفل ودى حاجه ماتقلقش

بس هو كان فيه حاجه مش مريحاه فى الموضوع

وطلب من صاحبه ده انه يعمله تحاليل القدرة على الانجاب

الدكتور رفض فى الاول وبعدين وافق لما لقى الاصرار الكبير من عصام

وكانت الصدمه انه فعلا عنده مشاكل ممكن تعوق عملية الانجاب بعد الزواج

كانت حالته صعبه جدا واصر انه يصارح حبيبته بالحقيقه

وفعلا صارحها وقالها انه ممكن ماتكونش ام بسبب مرضه ده

وطلب منها انها تفكر كويس وتاخد قرارها

هل هتستمر معاه وترتبط بيه وتضحى بأمومتها

ولاا هترفض وتتمسك بغريزة الامومه وتسيبه وتضحى بحبها

وبعد كام يوم

اتصلت ريهام وبلغته قرارها انها مش هتقدر تعيش من غير ماتكون ام

وتم فسخ الخطوبه وساب لها كل الهدايا والحاجات اللى كان جايبهالها

واتنقل فى شغله لمكان تانى وساب البلد

وبعد اربع سنين نزل فى اجازة

وماشى فى الشارع وقابل ريهام صدفه

وقفت عشان تسلم عليه

وهو وقف وابتسم لها

سألته عن احواله اتهرب منها وسألها عن احوالها

ردت عليه: ان ربنا خلصلك حقك منى ومقبلش ظلمى ليك

وانى اتطلقت من جوزى بسبب انى مش هقدر اجيب له الذريه اللى كان بيحلم بيها

لأنى عاقر

وفجأة انتبهت لحاجه وسألته والحت فى السؤال:

مين البنوته اللى زى القمر اللى على كتفك دى؟؟؟؟

رد عليها: دى ريهام بنتى الكبيرة

**********

انتهت
***********

السؤال هنا لو انت مكان عصام كنت هتعمل اللى هو عمله؟؟
بمعنى تانى ممكن تصارح خطيبتك او حبيبتك بحاجه ممكن تهدد مشروع زواجكم بالفشل؟؟
ولو انتِ مكان ريهام ياترى رد فعلك هيبقى زيها ولا العكس ؟؟ وعلى اى اساس؟؟
************
والسلام عليكم ورحمة الله وبركاته

************

بسم الله الرحمن الرحيم

السلام عليكم ورحمة الله وبركاته

اولا كل عام وانتم بخير

ويارب يارب يكون عيد سعيد علينا وعليكم وعلى الناس كلها

*******

ثانيا كل الشكر لكل الناس اللى سألت عليا فى الاجازة

وكمان للناس اللى علقت على الموضوع اللى فات

*******

ثالثا بقى انا جاى النهارده علشان احتفل وتشاركونى الاحتفال

بعيد ميلاد مدونتى ( مش عارف ) النهارده يبقى ليها سنه بالتمام والكمال

زى النهارده السنه اللى فاتت كنت قاعد قدام النت وانا مخنوق ومتضايق

وبفتح مواقع كده وبس

ولقيت الاخ بلوجر فى وشى

هوووووووووووووووووووووب

عملت مدونة وسميتها مش عارف لانى مكنتش عارف انا عملتها ليه

بس بجد المدونة دى كانت حاجه كويسه قووووى فى حياتى

كفايه انها عرفتنى على احسن ناس فى الدنيا

يلا بينا بقى نشوف التورته



واللى مش عجباه التورته دى ياكل من اللى تحت منها دى

وااادى العصير والمشروبات بالهنا والشفا

***************

اما بقى التورته الاخيرة دى

فسببها غير عيد ميلاد المدونة

دى بتاعة الخطوبه اللى كانت النهارده

فيا اهل بلوجر الكرام

يسعدنى ان ازف اليكم هذا النبأ العظيم

انه فى يوم الاربعاء الموافق السادس والعشرون من شهر نوفمبر
الثامن من شهر ذى الحجه

تمت خطبة زعيم الحلف اللى هو سيادتى

على الانسه N اللى هتبقى سيدة الحلف الاولى

وهيصوا بقى مع التورته ان شالله ماحد حوش

**************

على الهامش كده

اى حد يعرف اى حاجه عن ام مالك ياريت يطمنى عليها

وخصوصا اخواننا المدونين اللى من اسكندريه

لانى بحاول اتصل بيها ومش بترد خالص وبجد بجد قلقان عليها جدا جدا

**************

كل سنه وانتوا طيبين وبكل خير يارب

والسلام عليكم ورحمة الله وبركاته

طلب اجازة ... وموضوع منقول

بسم الله الرحمن الرحيم

السلام عليكم ورحمة الله وبركاته

هو مش طلب اجازة بالمعنى يعنى لانى مأجز فعلا بقالى كام يوم

بس انا حبيت انى اعرف الناس اللى مش عارفه وممكن تزعل منى لانى مقصر معاهم

بس فعلا انا اليومين دول مش متظبط وخصوصا نفسويا ومعنويا

وعندى شوية مواضيع كده ملخبطين الدنيا معايا

(فيه ناس منكم تعرف ايه المواضيع دى)

واخدلى بالك ياعمنا ياللى مراقبنى وكل اما اكتب حاجه فى حته تعرفها

هههههههههههههههه

هحاول انى مااغيبش كتير وارجع بسرعه ان شاء الله

*********

اما بقى الموضوع بتاع البوست ده

فهو موضوع لذيذ جدا عن فن التطنيش

مش انا اللى كاتبه او ناقله

ده وصلنى على الميل ولقيت انه موضوع حلو وممكن يعجبكم

.....

فن التطنيش لمن أراد أن يعيش
د. عائــــــض القرني

قال أحد الصالحين: طنش تعش تنتعش،

ومعنى ذلك أن لا تبالي بالحوادث والمنغصات،

وقد سبق إلى ذلك زميلي وصديقي الدكتور أبو الطيب المتنبي، حيث يقول:

فعشت ولا أبالي بالرزايا.....لأني ما انتفعت بأن أبالي
وأنت إذا ذهبت تدقق خلف كل جملة وتبحث عن كل مقولة قيلت فيك وتحاسب كل من أساء إليك،

وترد على كل من هجاك، وتنتقم من كل مَنْ عاداك،

فأحسن الله عزاءك في صحتك وراحتك ونومك ودينك واستقرار نفسك وهدوء بالك،

وسوف تعيش ممزقاً قلقاً مكدراً، كاسف البال منغص العيش، كئيب المنظر سيئ الحال،

عليك باستخدام منهج التطنيش،

إذا تذكرت مآسي الماضي فطنش،

إذا طرقت سمعك كلمة نابية فطنش،

وإذا أساء لك مسيء فاعف وطنش،

وإذا فاتك حظ من حظوظ الدنيا فطنش،

لأن الحياة قصيرة لا تحتمل التنقير والتدقيق،

بل عليك بمنهج القرآن:
(خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ).
سبّ رجل أبا بكر الصديق رضي الله عنه وأرضاه

فقال أبو بكر: سبُّك يدخل معك قبرك ولن يدخل قبري،

الفعل القبيح والكلام السيئ والتصرف الدنيء يُدفن مع صاحبه في أكفانه ويرافقه في قبره ولن يُدفن معك ولن يدخل معك، قال العلامة عبد الرحمن بن سعدي:

وأعلم أن الكلام الخبيث السيئ القبيح الذي قيل فيك يضر صاحبه ولن يضرك،

فعليك أن تأخذ الأمور بهدوء وسهولة واطمئنان ولا تُقِم حروباً ضارية في نفسك

فتخرج بالضغط والسكري وقرحة المعدة والجلطة ونزيف الدماء،
لقد علمتنا الشريعة الإسلامية أن نواجه أهل الشر والمكروه والعدوان

بالعفو بالتسامح والصبر الجميل الذي لا شكوى فيه،

والهجر الجميل الذي لا أذى فيه،

والصفح الجميل الذي لا عتب فيه،

إذا مررت بكلب ينبح فقل: سلاما،

وإذا رماك شرير مارد بحجر فكن كالنخلة أرمه بتمرها،

إن أفضل حل للمشكلة أن تنهيها من أول الطريق،

لا تصعّد مع من أراد التصعيد،

انزع الفتيل تخمد الفتنة،

صب على النار ماءً لا زيتاً لتنطفئ من أول وهلة،

ادفع بالتي هي أحسن وتصرف بالأجمل وأعمل الأفضل

وسوف تكون النتيجة محسومة لصالحك؛

لأن الله مع الصابرين ويحب العافين عن الناس وينصر المظلومين،

إننا إذا فتحنا سجل المشكلات وديوان الأزمات ودفتر العداوات

فسوف نحكم على أنفسنا بالإعدام،

انغمس في عمل مثمر مفيد يشغلك عن الترهات والسفاهات والحماقات،
إذا رفع سفيهٌ صوته بشتمك فقل له: سلام عليكم ما عندنا وقت،

إذا نقل لك غبي تافه كلاماً قبيحاً من عدو فقل له: سلام عليكم ما سمعنا شيئاً،

إذا تذكرت أنه ينقصك مال أو عندك أزمة أو عليك دين

فتذكر النعم العظيمة والكنوز الكبيرة التي عندك من فضل الله من سمعٍ وبصر وفؤاد وعافية وستر وأمن ودين وذرية وغير ذلك لتجد أن الكفة تميل لصالحك،

وأن المؤشر الأخضر يبشرك أن النتيجة تدل على أرباحك ونجاحك وفوزك،

أفضل رد على النقّاد والحسّاد هي الأعمال الجليلة والصفات النبيلة والأخلاق الجميلة،

أما المهاترات والسباب فهذا شأن كلاب الحارة،

والله يقول في وصف النبلاء الأبرار:
(وَإِذَا سَمِعُوا اللَّغْوَ أَعْرَضُوا عَنْهُ وَقَالُوا لَنَا أَعْمَالُنَا وَلَكُمْ أَعْمَالُكُمْ سَلَامٌ عَلَيْكُمْ لَا نَبْتَغِي الْجَاهِلِينَ)،
ونعود إلى أبا الطيب المتنبي ليقول لنا:

لو كل كلب عوى ألقمته حجراً.....لأصبح الصخر مثقالاً بدينارِ
فلو ذهبنا نرمي الكلاب إذا نبحتنا بحجارة فسوف يرتفع سعر الحجارة ولا نستطيع شراءها،
........

يارب يكون الموضوع عجبكم

واشوفكم على خير بإذن الله

والسلام عليكم ورحمة الله وبركاته

نحــــــو الأميه

بسم الله الرحمن الرحيم
السلام عليكم ورحمة الله وبركاته

النهاردة كان عندى امتحان محو الاميه لخمسه المفروض (واخدين بالكم من المفروض دى) انى بعلمهم علشان امحى اميتهم
الحقيقه انا ماليش فى الموضوع ده على الرغم من انه موضوع مربح عند بعض الناس
بس انا مش فاضى
انما لما جيت استلم الشغل وابقى معلم اجيال قد الدنيا الباشمهندز المحافظ بتاعنا اشترط انه اى شخص هيستلم تعاقد ويبقى مدرس لازم يجيب خمسه يمحو اميتهم
وطبعا بما انه كله فى الكليتش اكتب اى خمس اسامى وهات اى خمسه ناس يدخلوا يمتحنوا مكانهم وخلاص واهو كله شغاااااااااااااال
ومحدش يقولى طب ماتمحو الاميه بجد
اللى بيتكلم وايده فى الميه مش زى اللى ايده فى النار
ييجى هو ويورينى شطارته
انا راجل بشتغل الصبح مدرس وبقبض 300 جنيه

وعاوز اتجوز وابقى صاحب بيت واسرة

يعنى بشتغل كمان شغل تانى بيدخلى بتاع 200/300 جنيه كمان

(ده اقل ايجار شقه دلوقتى 350جنيه)

يعنى مش فاضى اعلم حد

واصلا الناس الكبيرة دى والعيال اللى طفشت من المدرسه عشان اقنعهم واقولهم تعالو محو الاميه يبقى كأنى بشتمهم بعيد عنكم

(تبص تلاقى الواحد راح زاغرلك كده وعنيه بتطق شرار وقالك اطلع من نافوخى ياافندى احسنلك يبقى من الاحسن انك تحترم نفسك وتمشى من وشه بالذوق والاااااا......)
فاضطريت اعمل زى الناس

(ماتفهمونيش غلط)

واضرب كشف نحو الاميه خصوصا انه انا مكنتش عاوز استلم الشغل ده

(لو تفتكروا)

وروحت متأخر خلصت الاوراق وكان لازم وضرورى وحتما كشف نحو الاميه
وفعلا

وكان النهارده الامتحان
طب لما انتو مهتمين قوى كده بمحو امية الناس الجاهله بتفبركو فى الامتحانات ليه؟؟؟
بعد القرف دا كله واروح الف على الناس واتحايل عليهم عشان ييجوا الامتحان ومايرضوش
واجيب ناس مكانهم عشان يدخلوا باساميهم وفعلا المراقب يوافق على تلاته (المشكله انه طلع الوحيد اللى كان فعلا اسمه فى الكشف بجد والله العظيم) ويدخلوا ويمتحنوا ويكتبوا
يطلع بعد ده كله انه اللى بيدخل الامتحان بيكتبوله على السبورة وهو يادوب ينقل

وممكن لو مش بيعرف ينقل حد من الموجودين يكتب له
طب لزومه اييييييييييييييييييييييييييييييييه ياناس ؟؟؟؟
حد يقولى ويفهمنى
هى فى الاخر انا عرفت انها سبوبه والناس القائمين عليها بيطلعوا من وراها بلقمة عيش حلوة
عشان كده انا هفضل مُصر على انها

نـــحـــــــــــــــو الاميــــــــــــــــــه

ولينا رب اسمه الكريم
وربنا يصلح الاحوال

ســـــــــــــــــلام

الثــــــــــأر

بسم الله الرحمن الرحيم

السلام عليكم ورحمة الله وبركاته

اولا انا بشكر كل الناس اللى شاركت وقالت رأيها الجميل فى الموضوع اللى فات

وتقريبا كده فيه إجماع على رأى واحد

وإن كان الاسلوب فى سرده مختلف

وكمان بشكر كل اللى دعالى ودعا لأم مالك بالشفاء

......

النهارده بقى عاوز اننا نتكلم عن مشكلة الثـــأر

صحيح هى عندنا فى الصعيد بس

انما ده مايمنعش اننا نتكلم فيها ونقول رأينا فيها كقضيه

يعنى لما واحد يلاقى اخوه (لاقدر الله)او اى حد قريبه مثلا

وفيه واحد تانى قتله

ياترى رد فعله هيكون ايه؟؟؟

ياخد بتاره ولا يسيبه للحكومه هى اللى تتخذ معاه الاجراءات القانونيه؟؟؟

ولما الموضوع يبقى بسبب حاجه اى كلام ومايستاهلش والانسان اللى اتقتل ده هو اللى كان السبب فى المشكله

يبقى اهله يسكتوا ولا ياخدو بتاره

وهل الرأى يكون هو هو نفس الرأى لو كانت الحادثة دى بسبب قضية شرف مثلا ؟؟؟

.......

على فكرة ملحوظه صغيرة

مافيش عندنا فى الصعيد مهما كانت درجة التعليم حد مش بيفكر انه ياخد بتاره

لما بتحصل مشكله

احنا نتكلم كويس وحلو قوى وبكل عقل واحنا بعيد عن المشكله

انما اول ماالواحد تحصل المشكلة معاه هو

يبقى العار والعيب وازى اسيب حقى ودمى

.........

مستنى رأيكم فى الموضوع ده

ســـــــــــــــــــــــــــــــــلام

موضوع للنقاش

بسم الله الرحمن الرحيم

السلام عليكم ورحمة الله وبركاته

اولا انا بعتذر عن تقصيرى معاكم فى الكام يوم اللى فاتو

بس ده كان لظروف كده

وكمان البشمهندس بتاع العظام قالى مااقعدش كتير قدام الكمبيوتر

علشان الفقرات بتاعة الرقبه جالى فيها واوا

هههههههههههههههه

يعنى سماح (وكمان اخواتها شيماء وصفاء واسماء)

.............

نيجى بقى للموضوع اللى عاوز نتكلم فيه

وهـــــــــــــــــــو

هل ينفع ان الانسان يحكم على نفسه انه احسن من حد تانى ؟؟

بمعنى:

هل ممكن انى انا احكم على نفسى انى احسن من فلان ده

انا ممكن اكون شايف انه الشخص ده مقصر فى حاجات كتير

وانا شايف نفسى والحمد لله مش مقصر

فهل معنى كده انى ممكن اقول على نفسى انى احسن منه ؟؟

طبعا الحكم فى الحاله دى هيبقى على الظاهر بس

لاننا لنا الظاهر والله - سبحانه وتعالى - هو العالم بالسرائر

وكمان رسولنا الكريم - عليه الصلاة والسلام - قال

((اذا رأيتم الرجل يعتاد المساجد فاشهدوا له بالايمان))

يعنى مجرد رؤيتنا له بيروح المسجد نقول عليه رجل مؤمن

واحنا مش عارفين هو فعلا كده ولا لأ

يبقى ايه رأيكم بقى

ينفع انى احكم على نفسى مثلا بأنى احسن من حد انا شايف انه مش كويس؟؟

انا مش هرد على التعليقات هنا على انى صاحب المدونة

انما هشترك فى النقاش زى اى حد فيكم

..............

على الهامش كده

ماننساش كلنا ندعى لأم مالك

ان ربنا يشفيها ويعافيها ويحفظ لها نور عنيها

وياريت بجد نخلص فى الدعاء

ســـــــــــــــــــــلام

نعمة الرضا

بسم الله الرحمن الرحيم

السلام عليكم ورحمة الله وبركاته

نعمة الرضا دى من اعظم النعم اللى انعم بيها المولى عز وجل على الانسان

الرضا هو أن تشعر بالارتياح لما يختاره الله لك

كتير بنشوف الناس ساخطه ومش راضيه عن احوالها اللى عايشه فيها

والناس اللى عندها رضا عددهم قليل جدا

يعنى نشوف اللى مش موظف طبعا مش راضى بحاله ونفسه فى الوظيفه والشغل

طب هو معنى كده ان الموظف راضى بقى عن حياته وعيشته؟؟

نبص نلاقى برضو الموظف مش راضى وعايش ساخط

ولو رجعنا وشوفنا نفس الشخص اللى كان ساخط وكل امله فى الدنيا

انه يتعين فى حتة وظيفه يعيش منها

بعد ماحصل اللى كان بيتمناه برضو مش راضى وساخط ومش عاجبه حاله

على الرغم من اننا لو بصينا على الناس اللى عندها نعمة الرضا

ممكن يكون مستواهم المادى بسيط جدا ومع ذلك عايشين فى سعاده تامه ومصالحه مع النفس

والقليل اللى عايشين فيه ده مكفيهم وفايض منهم كمان

يعنى الاكل لما يبقى فول وطعميه تلاقيهم بيستمتعوا بطعمه ولا كأنه كباب من عند ابوشقرة

كوباية الشاى بقى اللى بعد الاكله الحلوة دى تبقى غاية المراد من رب العباد والحياة حلوة وزى الفل

وتسأل الواحد فيهم ايه اخبار الدنيا معاك ؟؟

يرد عليك بكل انبساط وقناعه ورضا ويقولك زى الفل والواحد لو طلب اكتر من كده يبقى طماع

ونشوف ناس تانيه صحتها زى الفل وعند اى شكوى بسيطه نجد السخط وعدم الرضا

فى حين نجد ناس ربنا ابتلاها بامراض خطيرة وبتعيش بيها سنين وهى بتعانى وبتتألم

ولما تتكلم مع واحد منهم تلاقيه بيقولك الحمد لله دى نعمة كبيرة من رب العالمين انا احسن من غيرى كتير

ياعم ازاى ؟؟ ده انت تعبان والناس كلها سليمه وصاحيه؟؟

يقولك ايوة بس فيه ناس تانيه برضو تعبانه عنى

وفيه ناس سليمه بس ربنا مش راضى عنهم

وسايبهم بصحتهم علشان يزيدوا فى الذنوب وبعدين انتقامه منهم هيكون شديد

انما احنا الحمد لله هما شوية التعب دول وانا عارف ان المولى عز وجل بيكفر بيهم ذنوب ممكن اكون عملتها وانا مش عارف

يبقى كده انا احسن منهم كتييييير

لانى على مااموت هيكون المرض ده طهرنى من كتير من الذنوب اللى انا ممكن اكون عملتها

ولو ماكنش فيه ذنوب تبقى حسنات بتتحط فى حسابى

عرفت بقى انى انا احسن منهم؟؟؟

بجد بجد نعمة الرضا دى نعمة عظيمه جدا

بس ياريت نعرف قيمتها

انما نقول لمين

كلنا ماشيين فى الدنيا مش عاوزين نستكفى منها

صحيح ربنا امرنا بالسعى والجد والعمل

انما ده مايكونش على حساب حاجات تانيه كتير

وبعدين احنا نسعى ونشتغل ونعمل اللى علينا ونرضى باللى ربنا قدره لينا وقسمهولنا

وزى ماربنا قال فى الحديث القدسى

((إن أنت رضيت بما قسمته لك، أرحت بدنك وعقلك، وكنت عندي محموداً.

وإن لم ترض بما قسمته لك، أتعبت بدنك وعقلك وكنت عندي مذموماً))

وقال رسولنا الكريم - صلى الله عليه وسلم -

((ارضى بماقسم الله لك تكن اغنى الناس))

انا كتبت البوست ده علشان انا شوفت ناس عندها النعمة دى

وشوفت هما عايشين سعداء ومبسوطين ازاى

وعلشان كده انا كتبته علشان اذكر نفسى بالنعمه دى واشرككم معايا

وبدعو المولى عز وجل انه ينعم علينا بنعمة الرضا

والسلام عليكم ورحمة الله وبركاته

Back 2 School

بسم الله الرحمن الرحيم

السلام عليكم ورحمة الله وبركاته

كل سنه وانتوا طيبين

المدارس خلاص هتفتح بكره

وهنرجع تانى لوجع القلب والصحيان بدرى

(صحيح انا كده كده بصحى بدرى بس بمزاجى انما ده صحيان غصب عنى)

ونرجع تانى ندور على الكشاكيل والكراسات

وعملت ياحبيبى الواجب ولا نجيب الفلكه

واسكت يابابا واسكتى ياماما

وياحسن هاتلى العصايه

ياخرااااااااااااابى ماكنا مرتاحين

وكمان كله كوم وموضة انفلونزا الخنازير السنه دى كوم

مش هنخلص بقى من الجماعه اللى زى الفل

اللى كل واحد فيهم عامل فيها ابوالعريف

وجاى المدرسه يفتش ويشوفنا هنعرف نحوش الانفلونزا عن العيال ولا لأ

وطبعا مش هنخلص من الفتاوى اللى زى الفل بتاعتهم

وياسلام بقى على الكارثة الكبيرة فى اول يوم
الساده الافاضل المدرسين زمايلنا

والعاده المنيلة بستين نيلة بتاعتهم

لازم اول يوم نقابل بعض ناخد بعض بالاحضان وهاتك يابوس

(وانا مابحبش اصلا ابوس حد)

واللى تلاقيه بقى عنده زكام

واللى واكل بصل ع الصبح

واللى عنده هسهس واللى عنده استبحس وغيره كتيييير

وماتقدرش تقوله لأ يزعل منك

والكل يغلطك بقى الراجل جاى يسلم عليك وانت ترفض

بجد اخص عليك انت وحش

وبما انى رخم بطبعى والحمد لله مش بسلم على الابلوات

(وهما مش بيطيقونى اصلا)

ماهى مش ناقصه

دى تقعد تقول هو انت لسه مااتجوزتش

ودى تقولك طب ليه

ودى تقولك طب انا عندى ليك عروسه تحفه

(اختها طبعا)

ادب واخلاق وجمال ماتحكيش

(وفى الاخر تطلع شبه عيشه الكيلانى)

ياسلااااااااااام لو مااقدرش اروح اول يوم

بس بشرط انهم تانى يوم يعتبرونى روحت ومايعملوش معايا مراسم الترحيب نفسها

اييييييييييييييييييييه ماعلينا

هنعمل ايه بس قدر ولابد منه وربنا يسترها

(لو غبت عنكم شويه ابقوا اسألوا عليا احسن يكون جالى اسمه ايه ده من كتر السلامات)

واه من الكارثة التانية
وهى تسليم الكتب

اللى هى اصلا جاية ناقصه

والعيال وطلباتهم الغريبه بقى

اللى ييجى يقولك يااستاذ انا عاوز اغير الكتاب

ده ليه ياحبيبى

اصله ماعليهوش نقطه حمرا زى الكتاب بتاع زيزو

وشويه وييجى زيزو يقولك يامستر انا عاوز كتاب غير ده

ليه يازيزو

اصله عليه نقطه حمرا يعنى مش نضيف

وحسبى الله ونعم الوكيل

وصبرنى ياااااااااااااااارب

ســـــــــــــــــــــــــــــــــــــــلام

يوميات مُدرس (عكننة الموجهين)

بسم الله الرحمن الرحيم

السلام عليكم ورحمة الله وبركاته

اولا انا بشكر كل الناس اللى سألت عليا

وبشكر مرورهم الجميل ودعواتهم الاجمل

وربنا مايحرمنى منكم ابدا يارب

*********

صحيت من النوم الساعه6.30 الصبح فايق كده

وليا مزاج اروح المدرسه اظبط شويه حاجات هناك قبل الدراسه ماتشتغل

بعد الطقوس اليوميه المعتاده طلعت من البيت وركبت العربيه

وبعد رحلة العذاب اللى قلتلكم عليها قبل كده وصلت المدرسه على الساعه 8 كده

كنت واخد معايا الغلايه والشاى والنعناع ومروق المسائل على الاخر

عملت واحد نعناع محترم وبعدين طلعت العده

الاسطوانات بتاعة الويندوز والاوفيس والسى دى روم وال دى فى دى روم بتوعى

وكمان المفك التست والبيلور علشان اعرف اظبط الكيسات بتاعة المعمل

وابتديت اركبهم على الاجهزة واحط الاسطوانات وافرد النسخه

ولقيت المدير بينده عليا

سلامات وطيبون وكل سنه وانت طيب والكلام ده كله

وبعد اذنك ياباشا علشان مش فاضى

طيب اتفضل ربنا يقويك

خمسه كده وتعالى كلم علشان الباشا الموجه بتاع المتابعد جه

حاضر ياعم حسن

نزلت اهلا وسهلا ومش عارف ايه

الباشا اخد لفه فى المدرسه وكل اما يشوف حاجه يقول انا هكتب مذكرة كده غلط ده انتو تروحو فى داهيه

انا هعمل انا هسوى

وكأنه اول مرة يجى المدرسه بتاعتنا على الرغم من انه كل اسبوعين مشرفنا

ليه دا كله يااستاذنا بس؟؟؟؟

علشان انفلونزا الخنازير

طب وهى انفلونزا الهباب مالها ومال القزاز المكسور؟؟

ده بيعمل تيار هوا وممكن يتعب الاولاد

والله ؟؟؟؟ تصدق مكنتش اعرف وهو على كده احنا لازم نقفل كل الشبابيك ؟؟؟

طبعا

وايه كمان؟؟

قعد واتجعص وحط رجل على رجل وابتدى يقول :

اولا الدراسه هتبقى 3 ايام و3 ايام

يعنى سبت واتنين واربع لمجموعه

والمجموعه التانيه حد وتلات وخميس

والطلبه اللى تشكوا انهم مصابين تحجزوهم فى فصل لوحدهم

طب معلش ياباشا سؤال والنبى

اتفضل

مين بقى اللى مستغنى عن عمره وهيدخل يشرح للطلبه دول؟؟؟؟؟؟

ماليش دعوة

نعم يااخويا

انا مااعرفش انا التعليمات بقولهالكم وخلاص

طب كده تبقى الحصص اتضاعفت يعنى اللى بيدى 20 حصه هيدى 40 حصه دى حلها ايه؟؟

مااعرفش هو اكيد الوزارة هتشوفلها حل بعدين

بعدين امتى ياعم ؟؟ المدارس بعد كام يوم

هو كده واللى مش عاجبه يخبط دماغه فى الحيط ويستقيل استحملوا البلد شويه دى ظروف قهريه الله عليكم

طب مااحنا طول عمرنا واحنا مستحملين فى القهريه وفى الغير قهريه

هو كده ولازم تتصرفو وتظبطو المدرسه قبل ماالدراسه تبداء والا هتاخدوا جزاءات كبيرة

طب ياعم ادونا الميزانيه واحنا نشتغل

ده انا ماليش فيه روحو اشتكوا بتوع الشئون الماليه انا ماليش دعوة

طبعا بعد البقين الحامضين دول نفسى كانت مفتوحه للشغل جدا جدا جدا

المدير بيقولى اطلع كمل شغل يامصطفى

نعم ؟؟؟ شغل ايه اللى اكمله ؟؟ انا مش مسئول عن صيانة الاجهزة دى ادونى بلاغ اعطال

كتبت البلاغ ومضيت عليه واديته للمدير وطلعت لميت العده بتاعتى وانا بدعى على الموجهين وعلى التربيه والتعليم وعلى الظروف وعلى ..... ولا بلاش احسن

ويبقوا يقابلونى لو الاجهزة دى بقى اتصلحت دا انا مبلغ يجى 9 مرات السنه اللى فاتت

وحسبى الله ونعم الوكيل يعنى مقدرش المنيل يتأخر يوم واحد كان زمانى ظبطت الاجهزة

ادى اللى واخدينه منهم العطله وقلبة الدماغ على الفاضى

ودى طبعا السياسه العليا فى البلد واحنا بنفذها على بعض

وكفايه كده علشان انا متغاظ وممكن اخبط فى الحلل

ســـــــــــــــــــــــلام

حالة ركوود

بسم الله الرحمن الرحيم

السلام عليكم ورحمة الله وبركاته

اولا كل سنه وانتو طيبين وبكل خير

معلش هى صحيح متأخرة شويتين

بس معلش سمااح مش ذنبى والله

النت فاصل من عندى بقاله كتيييير

انما ان شاء الله ربنا يسهل واول مايرجع النت هرجع تانى اتابع مدونتاكم الحبيبه

وموضوعاتكم الجميلة

ان شاء الله يرجع قريب وتنتهى حالة الركوود اللى انا فيها دى

ســــــــــــــــــــــــــــــــــــلام

انفلونزا الخنازير

بسم الله الرحمن الرحيم

السلام عليكم ورحمة الله وبركاته

الدنيا كلها بتتكلم عن انفلونزا الخنازير

يبقى اشمعنى انا يعنى مااتكلمش

بس هى المشكلة انى مش عارف هتكلم اقول ايه

وبعدين بفتح الايميل بتاعى لقيت رساله جاية من ميمى بوخارست

عن الموضوع ده وفيها شوية نصايح كده حلوين وممكن يكونوا مفيدين

نقرا الرساله مع بعض :

**********

السلام عليكم ورحمه الله وبركاته
دكتور كويتي
تحدث عن مرض
(H1N1) إنفلونزا الخنازيروذكر أمور مهمه جدا
بطريقة سلسة سهله وقام بتجربة عملية
للوقاية من ذلك الفايروس بإذن الله حفظكم المولى من كل شر
تعريف بسيط
بالبداية مرض إنفلونزا الخنازير ينتقل من الإنسان إلى الخنزير نفسه فى حين يتناول الإنسان لحمه يتكون لديه نوع من الفايروس ومن ثم تنتقل العدوى
من الإنسان إلى الخنازير
كالمزارع الذي يمتلك مزرعة خنازير فينقل المرض لجميع خنازيره عبر الإحتكاك بها أو السعال أو العطاس حتى تصبح مصابة بذلك الفايروس
الأعراض تكون مشابهة للإنفلونزا العادية ولا تظهر الأعراض حين الإصابة بل يأخذ المرض فترةحضانة أيام ومن ثم تظهر علامات كإرتفاع الحرارة والإعياء .....الخ من الأعراض
كيفية الوقاية من ذلك المرض بإذن الله ؟هنا الطبيب قام بتجربة عملية بمنتهى الروعة بإمكانكم القيام بها بالمنزل
قام بإحضارورق تباع الشمس ومعروفة علميا بإسم(PH - PAPER )
وأحضر أمامه3 أكوابالأول / وضع به ماء + ماده بيضاء سنعرفها لاحقاالثاني / وضع به ماء فقط الثالث / وضع به مشروب غازي وحين وضع شريط تباع الشمس بالكوب الأول أصبحت الورقة لونها غامق جداوبالكوب الثاني لم يتغير لون الورقة ظلت صفراء
وبالكوب الثالث أصبحت الكارثة وتحولت الورقة إلى لون أصفر فاتح جدا جدا بعد تلك التجربةأوضح الدكتور بإن الوقاية من أي فايروس على وجه الأرض حتى السابق منها( كفايروس إنفلونزا الطيور وسارس )تكون بجعل الدم ذا وسط قلوي لأن الفايروسات تحب الدماء ذات الوسط الحمضي
فالوسط القلوي لا تتحمله الفايروسات فتموت على الفورسبحان الله وأما الدم ذا الوسط الحمضي فهو بيئة ممتازة للفايروس فورقة تباع الشمس حين تغير لونها للأغمق كان الوسط قلوي وحين تغيرت للون الأصفرالفاتح كان الوسط حمضي إذا الوقاية تكون بجعل دمائنا ذات أوساط قلوية كيف ؟أخبر الطبيب بأن أخذ ملعقة صغيرة جداملعقة شاي ممسوحة من بيكربونات الصوديوم موجودة بالسوبرماركت وهي تستخدم للخبز وإذابتها بكوب ماء ومن ثم شربها كفيلة بإن تجعل الدم قلوي
وبيئة تقتل أي فايروس على الفور سبحان الله وهي مادة لا خوف منها أبدا ونأكلها يوميا نحن عبر تناول الساندويتشات والخبز لأنها مكون رئيسي فيهاونبه الدكتور على أن تناول الوجبات السريعة والمشروبات الغازية والسكريات والشوكولاتة هي عوامل مساعدة تجعل الدم حمضي على الفورلإرتفاع الدهون فيها والسكربالتالي الدم يكون مستجيب تما ما لأي نوع من الفايروس حتى فايروس الإنفلونزا العادية لذلك يجب التقليل من تناول ما سبق ذكره بالذات لمن هو كثير إحتكاك بالأجانب
ملاحظة / حتى الآن لم يتم التوصل لمصل مضاد حتى وإن وجد سيكون بتكلفة عالية جدا جدا
تجربة مني منذ أيام قليلة مضت إستيقظت و إذا بأعراض الزكام بدأت علي كإرتفاع بسيط بالحرارة والرشح وفورا تذكرت حديث الطبيب وقمت بشرب كوب ماء مذاب به بيكربونات الصوديوم وأقسم بالله وأشهده على ذلك سبحانه وتعالى إختفت الأعراض بعد ساعات قليلة جداسبحان الله بعض الأشخاص يتخوف من الأضرار أو من كثرة إستخدام البيكربونات رغم انه لاخوف منها أبدا شرط إستخدام (ملعقه شاي صغيرة جدا ممسوحة )وإذا أردت ان تكون بالجانب الآمن إستخدم ( المشروب ) في الأيام التي ستكون فيها بإختلاط مع العديد من الأشخاص كالبنوك أو المستشفيات
كما أكد أطباء صينيون أن إحتساء كوب من اليانسون الدافيء وليس المغلي عقب الاستيقاظ صباحاُ يعد أفضل وقاية من الاصابة البشرية من مرض انفلونزا الخنازير الذي تفشى في بقاع شتى من العالم وذكرت مجلة ( ميديكال ريسيرشيز) الصينية المعنية بالشؤون الطبية أن إحتساء اليانسون الدافيء يفوق في فاعليته تناول عقار(تامفيلو) الذي طورته شركة "روش" السويسرية ويستخدم حاليا على نطاق عالمي واسع للوقاية من انلفونزا الخنازير ذلك أن أحد المكونات الاساسية المستخدمة في إنتاج ذلك العقار هو ( حمض الشيمكيك ) الذي يستخرج من قرن ثمرة اليانسون ويترك عدة اسابيع ليتخمر
*****************

انا عارف ان الموضوع ده طويل

بس متهيألى انه كويس ولو الكلام اللى فيه صحيح

يبقى مفيد جدا

بس سؤال كده قبل ماامشى

هى ايه بيكربونات الصوديوم دى بالظبط؟؟؟؟؟

يعنى الخميرة ولا البيكنج بودر ولا ايه بالظبط

ياريت والنبى حد يقولى علشان انا عندى انفلونزا

وعايز اجرب الوصفه دى يمكن تجيب نتيجه

ســــــــــــــــــــــــــــــــــــلام

إفـــــــــــــــرررراااااااااااااااااج

بسم الله الرحمن الرحيم
السلام عليكم ورحمة الله وبركاته
الحمد لله رب العالمين
والدى طلع النهارده من المستشفى قبل المغرب
واخد إفرررررراااااااااااااااااااااااااااااااااااااج
صحيح هو لسه تعبان شويه
انما الحمد لله احنا كنا فين وبقينا فين
14يوم من العناء المتواصل فى المستشفى
وطبعا كلكم عارفين يعنى ايه مستشفى حكومى حتى لو كانت بفلوس
وطبعا مش هقدر اجيب سيرة المستشفى من غير مااذكر العلامه المسجله بتاعتها
وهى الصراصير
اه الصراصير او بمعنى اصح جحافل الصراصير
وياسلام بقى على ملائكة الرحمة
ياناس هو فيه كده
لا بجد بجد حاجه ماتتوصفش
مش عارف بصراحه الممرضات دول يعنى الواحد يديهم حقهم ازاى
يعنى لو كل مرة مكنتش أعد البرشام واعرف نوع العلاج
كان زمان ابويا راح فى ابو خليعه
الجرعه تبقى 200 يجيبوا هما 400
وبدل ماهما 6 برشامات يجيبوا 3
وخد من ده كتييييييييييييييييييييييير
يللا ماعلينا
بس مش هجيب سيرة زكريا اللى هو التمرجى او العامل اللى هناك
اللى هو عاوز قبل ماتنده عليه تأبجه طبعا والا هيصدرلك الطرشه
ولا حياة لمن تنادى
واه بقى على الدكاترة الحلوين

النواب الصغيرين
اللى عاملى فيها انه احمد زويل

واللى فاكره نفسها خليفة مدام كورى فى الملاعب

اما الكبار فحدث ولا حرج
وحسبى الله ونعم الوكيل
ده انا شفت ايام سواااد فى الهبابه دى الله لا يرجعها

***********
وبحب طبعا اشكر كل الناس اللى دخلت هنا
ودعت من قلبها لوالدى بالشفاء
واخص منهم
*لقد خلقنا الله احرارا(الزميلة فى رحلة التعب التعليمى)
*بدراوى(حبيب قلبى اللى زعلان من الدنيا)
*البشمهندز احمد ابوالعلا(والله حاسس انك صاحبى من زمان مش عارف ليه)
*عاشقة الاحزان(نوسه بتاعة هايأكلونا بطاطا وحزينه علشان كده)
*محمد غاليه(اخويا الصغير على الرغم من انه منوفى)
*ستيته حسب الله الحمش(اختى الكبيرة ياناااااااااااااااااااااااااااااااااس )
*فاتيما(الحنان كله)
*ريمان(لماضه هانم)
*ميمى (بتاعة بوخارست واصل الشقاوة)
*اللؤلؤة(صديقى العزيز التمام ومنوفى برضو)
*عادل بتاع الحكومه(اخف دم وكمان بلدياتى )
*د/ياسر عمر(اخويا بتاع الرصيف(هو عارف) بس بجد اخويا اخويا)
*زيزو(بلدياتى وحبيبى ومشروع نصاب فاشل)
*ام مالك (دى بقى مش عارف اقول عليها ايه بجد ام فعلا يااخوانا وكله كوم وانها كل يوم تتصل بيا تتطمن ده كوم تانى )

*مسدس صغير(ابوصلاح حبيب قلبى وهيبقى ابو نسب لانى نويت اتجوز من عندهم)

*ميخو (بتاع التحكم الالى والشكولاته)

*الفراغ (ست الكل )

*نوارة (الجمال كله وكانت هتبقى خالت العيال بس مافيش نصيب بقى)

*ايوشه بنت خالى العزيزة

*مروة (الناطق الرسمى باسم فتيات الصعيد)

* شيما (بتاعة الجماعه المشكومين اللى احنا مالناش دعوة بيهم خالص)

*بستان الحب (امنا الفاضلة )

*فلور جيرل (العلومنجيه)

*شارم (بتاع الاعدام )

*غربتى (الاميرة)

كل الشكر ليكم بجد وخصوصا للناس اللى كلمونى فى التليفون

وحسسونى انى فعلا ليا اخوات تانيين غير اللى كانو معايا فى المستشفى

دلوقتى اسيبكم واروح انام شويه علشان هموت من النعس

ســـــــــــــــــــــــــــــــلام

محتاج دعواتكم

بسم الله الرحمن الرحيم

السلام عليكم ورحمة الله وبركاته

طبعا الناس فاكرة انى مختفى بسبب رمضان

وانى واخد اجازة رمضانيه

بس الموضوع مش كده ابدا والله

انا كنت ناوى انزل فى رمضان كام بوست كده من التراث دمهم خفيف

وحكايات عن البخلاء وحاجات قديمه كده حلوة

بس تأتى الرياح بما لاتشتهى السفن

الوالد تعبان ومحجوز فى المستشفى الجامعى بقاله 5 ايام

وانا متواجد معاه باستمرار واول مرة اسيبه دلوقتى مضطر علشان استحمى بس واغير وراجع تانى

ياريت واحنا فى الايام المفترجه الجميلة دى تدعوله بالشفاء لان الحاله المرة دى صعبه جدا

اسف لو كنت بنكد عليكم فى رمضان

ســــــــــــــــــــــــــــــــــــلام

حكاية العريس

بسم الله الرحمن الرحيم

السلام عليكم ورحمة الله وبركاته

كل سنه وانتم طيبين

ورمضاااااان كريييم

طبعا الناس كلها مستنيه تعرف حكاية العريس اللى انطخ علشان مسك ايد عروسته يوم الفرح وهو بينزلها من الكوشه علشان يروحوا بيتهم

وطبعا كل واحد وواحده فيكم راسم احداث للحكاية فى دماغه

زى ابه ده مسك ايدها ياولد طخه بسرعه وكده

انما الموضوع غير كده خااااااااااالص

وطبعا انا يؤسفنى انى هخيب ظنكم ومايطلعش فيها السسبنس اللى كنتوا متخيلينه

ده لايمنع طبعا انها فيها سسبنس انما مش بنفس الحجم

طبعا كلكم دلوقتى اتخنقتوا منى ومن الرغى بتاعى

هههههههههههههههههههههههههه

نخش على الحكايه

.............

هنسمى العريس احمد والعروسه منى ماشى؟

منى بنت كويسه اتقدم لها ابن عمها(بسطويسى) علشان يتجوزها ولكن ابوها رفض

وبعد كده بفترة بسيطه جدا اتقدم احمد وخطبها وابوها وافق وهى قبلت

طبعا النار مسكت فى قلب بسطويسى وحاول بشتى الطرق انه يطلع قدامهم ان احمد ده وحش ماعرفش

واتكتب الكتاب والناس اتفقوا على يوم الفرح

وهوووووب جه اليوم الموعود وطبعا فرح عندنا يعنى ضرب نار للصبح

وكل عيلة لازم تتفشخر بكمية السلاح اللى عندها قدام العيلة التانيه وكل الناس تبقى معلنه حالة التأهب والاستنفار ولا كأنهم طالعين حرب

جه عمنا بسطويسى يوم الفرح وراح متخانق مع عويس اخو العريس

يبقى عويس ضرب بسطويسى

جه سيد اخو العروسه يدافع عن بسطويسى ابن عمه وراح ماسك عويس ومظبطه والدنيا هاجت وماجت

الناس الكبار هدوا الجو شويه

انما الشباب كان سخن خلاص

فضلوا على الحال ده شويه مابين شد وجذب ومناوشات من كلا الطرفين

لحد ماخلاص الفرح خلص والعريس والعروسه هيتزفوا ويروحوا على بيتهم

العريس نزل من الكوشه وبيمسك ايد عروسته

راح عمنا بسطويسى قايل لسيد اخوها وكمان بيمسك ايدها ايه قلة الحيا دى

هووووووووووووووووووب الخناقه قامت وماقعدتش وفى النص احمد اخد رصاصه ومات

طبعا عويس اخوه ماسكتش راح طاخخ بسطويسى وسيد

يبقى طاخ من هنا على طاخ من هناك مات سته من العيلتين

بــــــــــــس هى دى الحكاية

بس على فكرة الحكايه دى حصلت من فترة كبيره جدا

يعنى تاريخ

انما مايمنعش انه لما حد مننا يعوز يتلكك لحد ممكن يعملها تانى

ههههههههههههههههههههههههههههه

وكل سنه وانتوا طيبين
ســــــــــــــــــــــلام

رغى وكلام فاضى

بسم الله الرحمن الرحيم

السلام عليكم ورحمة الله وبركاته

اولاً كل سنة وانتم طيبين بمناسبة شهر رمضان العظيم

اعاده الله علينا وعلى امتنا الاسلاميه والعربيه بكل خير

ويارب السنه الجايه كل واحد يكون محقق احلامه

امين

............

ثانيا بما انى مهيس خالص ومش عارف اكتب حاجه وهموت علشان انام

قلت اكتب اى حاجه وخلاص

لان الناس كلها افتكرتنى اختفيت تانى

امبارح نايم الساعه خمسه صباحا بعد فاصل من الرغى والهزار

مع مجموعه زى العسل من المدونين فى مدونة الدكتورة ستيته وكان الكلام اون لاين

وطبعا كان عندى شغل واضطريت اصحى الساعه 7 وربع الصبح علشان اروح المدرسه

والمدرسه دى مشوارها مشواااااااااااار

اولا مالهاش مواصلات خالص

قريه كده نائيه فى حته مجهوله فى بلدنا

بروح اركب عربيات بتاعة قريه تانيه وانزل على الطريق واكمل مشى لغاية مااوصل

المشى رياضه طبعا انا عارف دى بس الجزمة بتاعتى صعبانه عليا قوووى والله

كل يوم بتشيل كميه تراب بالعبيط ده غير الحاجات التانيه طبعا

وبعد رحلة العوده اللى بتزيد فى تعبها عن رحلة الذهاب قلت هنام شويه

يطلعلى مشوار من تحت رجليا لأسيوط المحافظة

ودى بعيد عنكم بينا وبينها 65 كيلو بس

يعنى ساعه بالعربيه فى عز جهنم الحمرا فى عز الظهر

وطبعا على ماالمشوار خلص ورجعت كان اليوم انضرب

وبعد كده كان لازم اعمل كام مشوار فى البلد هنا تبع الشغل

ولسه يادوب راجع وبنام على نفسى

ان شاء الله هبقى انزل لكم بوست فيه الحكايه بتاعة العريس

اللى انطخ علشان مسك ايد عروسته يوم الفرح

وده علشان خاطر الدكتورة ستيته مش مصدقه

هههههههههههههه

وكل سنه وانتم طيبين وبخير ورمضان كريم (واحمد ومحمد وعمر وسيد وحسين ........ وعيشوا انتو بقى)

ســــــــــــــــــــــــــــــــــــــــــــــــــــــــــــــلام

لقاء المدونين

بسم الله الرحمن الرحيم
السلام عليكم ورحمة الله وبركاته

النهارده وفى الازهر بارك كان يوم جميل جدا
وحصل اللقاء المنتظر للمدونين
صحيح فيه ناس كتير ماجتش
انما برضو فيه ناس كتير اتصلت وسلمت
من مصر ومن بره مصر
وكان اللقاء ممتع والجو أُسرى وعائلى
وكنا بالظبط زى مانكون نعرف بعض من زمان
******
انا وصلت الساعه 9 ونص ودخلت الجنينه
واستنيت عند الباب
واول واحده اتصلت بيا هى فاتيما (مدونة روح قلب ماما)
ودخلت وقعدت معايا نستنى الناس بعد كده الكل هل
ودى الناس اللى حضرت اللقاء
(طبعا الترتيب مش مهم)
الدكتورة ستيته (مش عارفه)
خالد فوده
رامز عباس
محمد غاليه (هل تبحث عن السعاده)
المهندس احمد ابوالعلا
بدراوى (طعم البيوت)
عادل (البلد دى فيها حكومه)
ايمى بيبى

اينو(رقة الاحساس)
مبتسمه دائما
كيكى فكك منى
دموع ملائكيه
د/ياسر عمر عبدالفتاح(ومضات)
مصطفى (هرتله )
فاتيما (روح قلب ماما)
عم صلاح (فشكووول)
الاستاذهانى (نط فى الكوز)
ميمي(ميمايا)
عيش احلامك
صلاح (مسدس صغير)
وكان الكلام فى الاول بعد التعارف
ازاى كل واحد فينا دخل عالم التدوين ونوع الكتابه فى المدونة بتاعته
وكمان اتصلت المدونة ايناس علشان تسلم علينا
وام مالك اتصلت وسلمت وخصوصا على الدكتورة ستيته
وبعد كده الناس اتكلمت فى السياسه شويه بس مش كتير
وكمان فى موضوع ال دى اس ال وقانون الاستخدام العادل
واننا لازم نعمل اعتراض على الحاجاات بتاعه وزارة الاتصالات
والهبل اللى كل شويه يألفوة فى العقود بتاعة الاشتراك فى خدمة النت
وبعد كده الكلام بقى عن عيوب التدوين ومميزاته
وكل واحد من الموجودين قال رأيه عن اكتر حاجه هو شايف انها
من عيوب التدوين واكتر حاجه هو شايف انها من المميزات
ثم كان الحوار عن الاختلاف فى الاراء وازاى نتقبل نقد الاخرين من غير تجريح او اهانه
واننا ماعندناش ثقافة تقبل النقد بصدر رحب
وبعدين رامز قال قصيده كتبها من وحى المكان
وبعد كده مصطفى (هرتله)قال 3 قصايد من الديوان بتاعه
وبعدين رد عليهم وزير الصحه حدا الحلف بتاعنا الدكتور ياسر
بقصيدتين باللغه العربيه الفصحى(صعايده بقى ومحدش يقدر علينا)
وبعد كده الناس ابتدت تمشى علشان اللى وراه مشوار واللى مسافر
واللى مش فاضى ومزوغ من الشغل(سورى يابشمهندس احمد)
وبعدين قعدت انا ومحمد غاليه وايمى بيبى واخت محمد
ايمى بيبى واخت محمد كان بيلفوا شويه فى الجنينه
وانا محمد كنا بنحاول نصور شوية مناظر كده

بس للاسف الصور طالعه وحشه خالص علشان الكاميرا بتاعة تليفونى مش قد كده
وبدين جه اتصال لمحمد من ابوعلى (shape your life)
وجه عند البوابه وبعد كده دخل قعد معانا لغاية الساعه 6 ونص
بس بصراحه شخصيه جميلة جدا ومثقف وله حضور ودمه خفيف خالص
وبعد كده قام ابوعلى مشكورا بتوصيلنا
وصل محمد واخته لغاية محطة المترو
ووصل ايمى لغاية اقرب شارع لبيتهم وانا لغاية شارعنا
وانتهى اللقاء بس كان يوم جميل جدا والحمد لله
وكفايه عليكم كده علشان انا تعبان على الاخر
ولو كنت نسيت حد من الناس اللى حضرت ماكتبتش اسمه او مدونته
يسامحنى علشان انا مكتبتش فى ورق انا بكتب من الذاكرة
والزهايمر يدينى العذر
والسلام عليكم ورحمة الله وبركاته

اللقاء

بسم الله الرحمن الرحيم

السلام عليكم ورحمة الله وبركاته

ان شاء الله لقاء المدونين هيكون بعد يومين

والناس اتفقت انه هيكون فى الازهر بارك

ده كويس وجميل وزى الفل

انما الحوسه بقى انه ماحدش عارف هو هيبقى فين جوه الازهر بارك

يعنى المفروض انه يكون فيه مكان محدد نتقابل فيه

انما المشكله اننا قلنا الازهر بارك وسكتنا

فمعلش اخوكم مارحش الازهر بارك قبل كده ومايعرفش ايه الكافيهات اللى فيها جوه

فياريت اى حد يعرف اى كافيه جوة يلحقنى بيه بسرعه

اشوفكم يوم السبت ان شاء الله

ســــــــــــــــــــــــــــــــــــــــــــــــــــــــــــــلام

عدنا والحمد لله

بسم الله الرحمن الرحيم
السلام عليكم ورحمة الله وبركاته
اولا انا بشكر كل الناس اللى سألت عليا
وحبت انها تتطمن عليا فى فترة غيابى
واحب اطمنكم انه الحمد لله انا بخير
بس هى كانت شوية ظروف كده خاصه صعبه شويتين
يمكن ابقى افضفض معاكم فيها بعدين
المهم انى رجعت تانى لعالم التدوين الجميل
لانه بجد وحشتنى مدوناتكم الجميلة
وان شاء الله هبتدى اتابع تانى زى الاول
*******
طبعا قاهرة المعز لدين الله الفاطمى منورة
انا عارف ومش محتاج انكم تقولولى
ان انا السبب بوجودى فيها
ههههههههههههههههههههههه
(غرور زعماء بقى هو مش انا راجل رئيس حلف قد الدنيا ولا ايه؟؟)
وان شاء الله ربنا يسهل واقدر احضر لقاء المدونين اللى هيكون فى الازهر بارك يوم السبت 8/8 الساعه 10 ونص صباحا لانى بجد نفسى اتعرف على الناس اللى انا بعتبرهم مش بس اصدقائى لأ دول اخواتى
ياريت فعلا كل اللى يقدر انه يحضر اللقاء ييجى
*********
نداء مخصوص للى عارفه نفسها
انا هنا اهه ومش ناسى عزومة الكشرى
وادينى قلت قبلها بكتير واما نشوف بقى
هههههههههههههههههههه
اشوفكم على خير ان شاء الله
والسلام عليكم ورحمة الله وبركاته

حبة تهييس

بسم الله الرحمن الرحيم
السلام عليكم ورحمة الله وبركاته

كنت قاعد كده زهقان وشطحت بدماغى وسرحت
واتخيلت موقف غريب قووووووووووى
خير اللهم اجعله خير
قال ايه قال
البشمهندس اللى ماسك الحكم

(الريس بتاعنا يعنى)
واقف على المنصه وهو لابس الجلابيه
وقدام جموع الجماهير العريضه اللى بتهتف له
راح داخل دخلة سخنه قووووى
وراح رازع يمين كبيييييييييييييير وقال ايه:
على الطلاق بالتلاته ماهنستورد ولا حبة قمح تانى من اى حته
ولا اى سلعه تانيه
وهتزرعوا اللى هاتكلوه بايديكم

وغصب عن بوزكم هتشجعوا الصناعه الوطنيه
وعليا اليمين اللى هيبنى على قيراط ارض زراعيه
اذا لم يستصلح قصاده 10فدادين فى الصحرا
لاخرب بيته واصادر منه البيت اللى هيبنيه

واديه لاى شاب كويس هيستصلح العشر فدادين
والبلد اللى عاوزانا نشترى المنتجات بتاعتها
ماتبعتلناش المنتجات دى مشحونه فى الطيرات والسفن
لاااااااااااااااااااااااااااااااااااااااااااااااااااا على جثتى
البلد اللى عاوزانا نبقى زباينها

يبقى تيجى تبنى مصنع للمنتج بتاعها هنا
وبشرط ماتجيبش عمال من عندهم
يادوب ممكن نسمح بحدود 7 أو 8 موظفين اللى هيديروا المشروع
وهيكونوا هما اصحاب راس المال او من ينوب عنهم
والعماله من عندنا اهه وحاجه زى الفل
واللى مش عاجبه يخبط دماغه فى اتخن عمووود
وخدوا بقى القرار ده
ها........................
باب الاوضه انرزع قوى فطبعا انا اتخضيت وافتكرتها كبسة حكومه
وعرفوا انى كنت بحلم الحلم المهبب ده
طلع البشمهندز اخويا الصغير كان ناسى الموبايل بتاعه عندى
والحمد لله اتسترت ده انا كنت هخربها
هههههههههههههههههههههههههه
والسلام عليكم ورحمة الله وبركاته

طــــفولــة

بسم الله الرحمن الرحيم
السلام عليكم ورحمة الله وبركاته
الحمد لله رب العالمين
مصطفى باشا الصغنن اتحسن وابتدى يبقى كويس
بس اللى تاعبه شويه اليومين دول انه بيسنن
والحمد لله رب العالمين
*******
وبما ان كلامى وتعليقاتكم فى الفترة الاخيرة كانت عن الاطفال
وبرضو بما انى عايش فى مورستان هنا
بسبب بنت عمى اللى ولدت وربنا اكرمها بعبدالرحمن
والسبوع بتاعه بكرة ومصدعينى
يبقى هكتب النهارده عن الاطفال
مش عارف ليه مشغلين الاغانى بتاعة رمضان
يكونوا هيسموا الواد رمضان من ورايا ؟؟؟؟
ماعلينا
المهم ان اغانى رمضان فكرتنى بابن واحد جيراننا
الولد كان اسمه رمضان
وكان شقى قووووووى
فى يوم رمضان كان مشترى جاز(كيروسين)
وراجع والجركن اللى فيه الجاز وقع من ايده
وطبعا اتدلق منه شويه على الارض فى الشارع
اخد الجركن وروح
وشويه كده لقيت رمضان جايب حتة حديد
وبيحفر فى الارض
*بتهبب ايه يامنيل يارمضان عندك
- بطلع الجاز بتاعنا ياعم مصطفى
ههههههههههههههههههههههههه
مقدرتش امسك نفسى من الضحك
ومعرفتش اقنعه ان الجاز ضاع خلاص
وفى الاخر شخطت فيه علشان يروح
*********
صديقى العزيز والانتيخ بتاعى ابوعبده
(ربنا يخليله عبده يارب )
راجع من الشغل
دخل البيت لقى المدام ام عبده فى المطبخ
كتر خيرها بتحضر الغدا
امال فين الوااااااد
بيلعب جوا
دخل الاوضه يشوف ننوس عين ابوه عبده باشا
لقى عبده بيحط صباعه فى الفيشه بتاعةالكهربا
* ابوعبده : بتعمل ايه ياعبده
- عبده : عبده مش راضى ينور يابابا
وكان زعلان مووووت ان صباعه مش فايت فى فيشه الكهربا
ههههههههههههههههههههههههههه
بجد بجد الاطفال دول وعلى الرغم من كل شقاوتهم
الا انهم اجمل شيئ فى الدنيا
يارب يرزق كل اللى نفسه فى طفل ويفرح قلبه
وسلامو عليكم