الخميس، 21 مايو 2009

اخر الاخبار

بسم الله الرحمن الرحيم
السلام عليكم ورحمة الله وبركاته
اولا انا بعتذر عن التأخر فى الرد
وكمان عن التقصير فى الزيارة لمدوناتكم الحبيبه
بس معلش اعذرونى
كان اسبوع كله تعب
امتحانات ومراقبه وتصحيح وكنترول
ولسه تبييض النتيجه
وطبعا فوق ده كله شوية التزامات من الشغل التانى
فمكنتش بقدر ابص على الكمبيوتر مش حتى افتحه
فياريت تقبلو اعتذارى
***********
نيجى بقى للموضوع اللى كان مطروح فى البوست اللى فات
واللى طبعا كتير منكم مستنى يعرف اخر اخبارى مع العروسه ايه
انا صليت استخارة وروحت
وكله تمام التمام لغاية كده
البنت كويسه ومؤدبه
وهى عاديه لاوحشه ولا حلوة
بس اللى يميزها ان دمها خفيف
وطبعا انا كنت قايل قبل كده ان اخلاقها زى الفل
وانا موافق وهى موافقه وحصل القبول والحمد لله
لغاية كده والامور ماشيه عنب
لكن
اختلفت مع ابوها
تقولولى ليه
اقولكم انا ليه
-ياعم الحج هجيب شبكه ب8000جنيه
دى مقدرتى وحدودى
- لا قليل ماينفعش
- طب ما انا ان شاء الله بعد كده هبقى اشتريلها دهب تانى
- ده كلام ومش بيحصل
- ليه هى مش هتبقى مراتى ؟؟
- ايوة بس احنا فى دلوقتى
- طب والعمل ؟؟
- مافيش المبلغ ده مش كفايه احنا عاوزين بـ15000جنيه شبكه
- كتير وانا لسه داخل على تجهيز واوضة نوم وانتريه وتوضيب الشقه
ده غير باقى الحاجات الى هجيبها
- دى مش مشكلتى
- يعنى مافيش امل ؟؟
- هى دى شروطنا ياابن الحلال
بس لغايه كده والكلام خلص
انا مش رايح اشترى حاجه وهقف افاصل فيها
ده موضوع بيبقى بالتراضى من الاول يعنى اول مابيحصل فيه خلاف يبقى مش هيكمل
وده اللى حصل
وجارى البحث عن عروسه جديده
تكون هتقبل بامكانياتى الماديه دى
طبعا انا عارف انه فيه كتير هيزعل
بس والله العظيم مش ذنبى
وفى الاول وفى الاخر ده نصيب
والمنديل لسه طاير
تقبلوا تحياتى واعتذارى عن التأخير
والسلام عليكم ورحمة الله وبركاته

هناك 32 تعليقًا:

عمرو جويلى يقول...

حضرة الصعيدى الهمام
السلام عليكم
والله يا أخى كل شىء نصيب وأقلهن مهوراً أكثرهن بركة وبعدين لسه الصعايدة دماغهم ناشفة كدة
أسأل الله أن يرزقك بأخت تعينك على طاعة الله

د. ياسر عمر عبد الفتاح يقول...

تبقي إبعتله بوست من بوستات الدكتورة ستيتة يقراها
ولا تزعل نفسك يا زعيم
قدر الله وما شاء فعل
الحمد لله علي كل شيء

وحمد الله علي السلامة
ربنا يجعلها أخر الغيابات

zainab يقول...
أزال المؤلف هذا التعليق.
zainab يقول...

أخى المعتصم

ربنا يعينك يا سيدى اه ما انت بقيت مدرس أد الدنيا خلاص

أما بالنسبه للعروسه هموت من الغيظ بسبب والدها قال ايه مش عاجبه تمن الشبكه

أاااااااااااااااااااااااااااااااااااااااااااااااااااااااااااااااااااااه يااااااااااااااااااااااااااااااانى

بس أقولك خير ان شاء الله بكرة ربنا يكرمك ببنت الحلال و الناس اللى مش يدققوا فى حاجات هايفه كده

يارب يرزقك ببت الحلال يا رب ( شايف بدعيلك أهو ) يارب تكون بتدعيلى

تحياتى

zainab يقول...

الا صحيح يا معتصم

طيب انت كنت هتجيب شبكة ب8000 جنيه و غير باقى الجهاز طبعا و كنت هتحدد ميعاد الجواز امتى ؟؟؟؟؟

د/عرفه يقول...

الخيرة فيما اختاره الله
ان شاء الله
متعوضة
ويرزقك بعروسة تسعدك وترزقك بالزرية الصالحة

Sweet Violet يقول...

ربنا معاك فى الشغل

اما بقى الموضوع التانى زى ماانت قولت كل شئ نصيب

مع انى متغاظة من موقف باباها مش فاهمة يعنى ايه الحكمة فى كده ؟؟؟ هو الواحد بيجوز بنته لراجل ولا لبنك

ربنا يهدى الاهالى اللى بجد كده و يكون فى عون الشباب

ستيتة يقول...

يالطيف يارب
اللهم عافنا من العقول الضاني
لا تري مصطفى اصناف منيلة تاني
وارزقه حما عدل من غير كاني وماني

اللهم ارحمنا من تفكير الخرفان
وكتر الرجالة الجدعان
واشفي اللي بنفوخه مرضان

انا مش زعلانة على الموقف لأن النصيب لما بيجي كل شيء بيتيسر
بس زعلانة ان الناس تتقدر بالقروش


ربنا يرزقك انت وكل بنات وشباب المسلمين بمن ييسر ويقدر ويعرف ان الدنيا مش على قد عقولنا
الدنيا والرزق دي تصاريف ربنا

تحياتي

z!zOoOo يقول...

السلام عليكم

أزيك يا معتصم يارب تكون بخير

حمدالله علي سلامتك

والله خير طيب فعلا ربنا دايما بيقدر الخير لينا عشان كده قولتلك صلي استخاره

واهو ديه نتيجه الصلاه لقيتها مش متسهله يبقي مفيش توفيق

ثم بيني وبينك انا مبسوطلك ان الراجل طلع صريح واتفشكلت

لإن فيه ناس وإسئلني انا صريحه زي الراجل ده بتجيبهالك من الاول بترتاح

لكن فيه ناس تفضل تنفخ فيك وتقولك إحنا بنشتري راجل ومش عايزين وخلافه

واول ما تدخل في المعمعه تلاقي الطلبات اشتغلت وإحنا ماتفقناش علي كده

وتفضل تشد في شعررك لغايه ما تقرع

وفي الاخر يا تفشكل برضه .. يا تدبس طول العمر

شوفت انت قد ايه في نعمه كبيره

يلا يا سيدي خيرها في غيرها وإعرف إن ربنا مقدرلك الاحسن ..

وكل شيء بميعاد

ربنا يوفقك

في رعايه الله

ريمان يقول...

نعم نععععععععععععععم؟



لا اله الا الله


من امته الآباء بيكلموا فى سعر الشبكه؟


من امته يعنى


انا اعرف ان الشبكه دى هديه للعروسه

المفروض الاب مش يتشرط على تمنها

لانها هديه

فى حد بيجيب لحد هديه والحد ده يتشرط على تمنها؟


لاء طبعا

سبحان الله

حاجه غريبه

ماتزعلش نفسك يا مصطفى

قدر الله وما شاء فعل

بس بجد كلمه لكل اب

المفروض تعف بنتك وتطمن عليها وتدخلها بيت الزوجيه انت مش هتعيش لها طول العمر بلاش بقى التعقيدات والشروط اللى مالهاش لازمه دى

يعنى ليه توقف جوازه عاشن تمن شبكه ولا عشان تلاجه ولا غساله ولا بتاع من ده

حرام

اتقى الله فى بنتك

ويسر ولا تعسر

امال ليه بترتفع نسبه العنوسه والطلاق بين الشباب ما هو بسبب كده والله

ـــــــــــــــــــــــــ

المهم يا مصطفى ربنا باذن الله هيرزقك بعروسه وهى اللى ربنا كاتبهاللك

هو بس لسه النصيب مجاش

mimi يقول...

أنا عندي ليك عروسة ... قلت إيه ؟

لا يهمها دهب ولا شبكة ولا حاجة غير انسان مثقف ومتدين بس ...

انت عندك كام سنة وساكن فين؟

الكلام بجد غير قابل للهزار

المعتصم يقول...

بسم الله الرحمن الرحيم
السلام عليكم ورحمة الله وبركاته
************
اللؤلؤة
وعليكم السلام ورحمة الله وبركاته
صديقى العزيز المنوفى التمام
تحياتى
ليك وحشه ياعمرو والله
الحمد لله على كل حال
وده نصيب
انما موضوع اقلهن مهورا اكثرهن بركه ده مش فى الصعيد عندنا
هههههههههههههههه
وبعدين الصعايده هيفضلوا دماغهم ناشفه كده طول عمرهم ماانت عارف
هههههههههههههه
شكرا على مرورك ودعواتك الجميله
نورت المدونة ياباشا
تحياتى ودمت بكل خير وود
**************
د/ياسر
تحياتى
منورنى ياوزير
ولا ابعتله ولايبعتلى ياعمنا
ده نصيب وكل واحد ودماغه
ومين قالك انى انا زعلان ؟؟
وهزعل ليه هو كان فيه بينا لاسمح الله قصة حب ولا حاجه
عادى يعنى وبعدين خلى بالك انا اترفضت قبل كده فالموضوع مش بيفرق معايا خالص
ههههههههههههههههه
الله يسلمك وشكرا على مرورك ودعواتك الجميله
نورت المدونة يادكترة
تحياتى ودمت بكل خير وود
***************
مين اللى حذف التعليق ؟؟؟؟؟؟؟؟
هعرفك برضو
******************
اختى الكريمه زينب
تحياتى
اه مدرس قد الدنيا اتريقى يازينب اتريقى
ماشى ماشى
ع العموم شكرا على الدعوة
وتموتى من الغيظ ليه
بعد الشر عليكى
على فكرة هو ده النظام عندنا للاسف
يعنى مش الراجل ده بس اللى كده
لأ فيه ناس كتيييييير كده زيه
وانا عارف انك بتدعيلى يازينب ومش محتاج انك كل شويه تفكرينى
(دا ايه يااخواتى الغيظ ده)
هههههههههههههههههههههه
ربنا يكرمك يارب وييسرلك امورك انتِ وخطيبك ويرزقكم الذريه الصالحه ويفتح لكم ابواب الرزق
اللهم امين
..........
ميعاد الجواز كان هيبقى غالبا كده على العيد الصغير لانى كنت هبتدى اوضب فى الشقه كده وابيضها واستنى لما اخويا الكبير ييجى من السعوديه علشان يحضر فرحى طبعا
اديكى عرفتى الميعاد ارتحتى
هههههههههههههههه
نورتى المدونة يازينب
تحياتى ودمتِ بكل خير وود
والسلام عليكم ورحمة الله وبركاته

غير معرف يقول...

إنت عارف يا زعيم أنا لو اتكلمت ف الموضوع ده هاقول إيه.. إن كان على الاباء.. ولا إن كان ع البنات






خليني كاتم وساكت


تقديري

zainab يقول...

أخى المعتصم

بجد و الله مش عارفه أقولك ايه على والد العروسه أنا كل ما افتكر أتضايق قوى مش عارفه ليه التحكمات دى وقريت التعليقات اللى هنا كمان كل اخوانى و اخواتى عندهم حق

يعنى كمان كنت عايز تتجوز فى العيد الصغير و هتجيب شبكه ب8000 و تجهز الشقه و الله العظيم كتر خيرك

ان شاء الله ربنا هيكرمك ببنت الحلال

تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
د/عرفه
صديقى العزيز
تحياتى
منورنى يادكترة
ياعمنا الحمد لله ده نصيب
والخيرة فعلا فيما اختارة الله
شكرا على مرورك ودعواتك الجميله
تحياتى ودمت بكل خير وود
**************
سويت هانم
اهلا اهلا بالصحافه والمعارضه
تحياتى
شكرا على دعواتك
ومتغاظة ليه ؟؟ بعد الشر عليكى من الغيظ
هو النظام عندنا فى بلدنا كده
ده فيه ناس بتطلب ب30000واكتر كمان شبكه
دا الراجل كان متهاون معايا
بس انا اللى طلعت وحش
هههههههههههههههههههههه
نورتى المدونه وشكرا على دعواتك الجميله
تحياتى ودمتِ بكل خير وود
***************
د/سوتيته اختى الكبيرة
تحياتى
شكرا على مرورك الكريم
ودعواتك الجميلة اللذيذه دى
واللهم امين
معاكى حق طبعا انه لما النصيب بييجى كل حاجه بتبقى سهله ومتيسرة
والحمد لله
نورتى المدونة يادكتورة
تحياتى ودمتِ بكل خير وود
***************
زيزو
صديقى العزيز
وبلدياتى الهمام
وعليكم السلام ورحمة الله وبركاته
تحياتى
الله يسلمك انا الحمد لله فى احسن الاحوال
معاك حق فى كلامك
والحمد لله انها رسيت على كده من الاول
بس بخصوص موضوع انى اشد فى شعرى لغاية مااقرع ده هيبقى صعب شويه
ليييييييييييييييييه
قولتلى ليه
اقولك
لانى انا اصلا اقرع ومش فاضل شعر علشان اشد فيه
ههههههههههههههههههههههههه
اسعدتنى زيارتك يازيزو
ونورت المدونة وشكرا على دعواتك الجميله
تحياتى ودمت بكل خير وود
***************
ريمان هانم
(اللماضه كلها)
تحياتى
نعم الله عليكى
من زمان وهما عندنا بيتكلمو فى سعر الشبكه
هو النظام عندنا هنا كده
يعنى مثلا خدى عندك
الشقه على العريس واوضة النوم على العريس وباقى العفش وكل حاجه على العريس الا المطبخ بس هو اللى على العروسه
يعنى العريس بيطلع عينه ياعينى عليه وعلى اهله على مايتجوز
شوفتى
هو انا معتصم من شويه
ههههههههههههههههه
وبعدين مين قالك انى انا زعلان
انا ولا تفرق معايا
انا تقريبا متعود على الموقف ده
حصل معايا قبل كده
عادى يعنى
وبعدين ان شاء الله لو كان فيه نصيب وبقيت اب هبقى افكر فى الكلمه بتاعتك اللى موجهاهه لكل اب دى
هههههههههههههههههههه
معاكى حق لسه النصيب مجاش
نورتى المدونة يالماضه هانم
وشكرا على مرورك الجميل ودعواتك الاجمل
تحياتى ودمتِ بكل خير وود
**************
ميمى
تحياتى
انا موافق على العروسه
بس يعنى هل هى هتوافق عليا ؟؟؟
هههههههههههههههههههه
وبعدين مش لازم نشوف بعض ونتعرف على بعض انا وهى ولا هو الجواز بقى كده وخلاص
ابقى شوفى الميل بتاعك
نورتى ياميمى
تحياتى ودمتِ بكل خير وود
****************
غير معروف
محمد افندى
تحياتى ياباشا
طب وهو انت لازم تكتب يامحمد الكلمتين دول
ماانا عارف ياعمنا رأيك كويس
ومافيش داعى انك تقوله الله يخليك
ماتوديناش فى داهيه
ههههههههههههههههههه
خليك ساكت احسن برضو
هههههههههههههههههههههه
نورت المدونة ياباشا
تحياتى ودمت بكل خير وود
والسلام عليكم ورحمة الله وبركاته

المعتصم يقول...

يازينب ماتزعليش نفسك قوى كده
هو النظام عندنا هنا كده
العريس هو اللى بيطلع عينه
والعروسه واهلها كتر خيرهم عليهم المطبخ
بس للامانه فيه ناس بتبقى فاهمه ومحترمه وبتساعد يعنى مثلا ممكن العريس يجيب النوم والانتريه وهما يجيبو المطبخ والسفرة وكده
هههههههههههههههه
شكرا على دعواتك الجميله يازينب
وبجد انا بيسعدنى مرورك
نورتى المدونة
تحياتى ودمتِ بكل خير وود

المعتصم يقول...

بقولك ايه يازينب
ماتشوفيلى عروسه من عندكم
تكون كويسه كده وبنت حلال
وتقبل تعيش فى الصعيد
ههههههههههههههههههههههههه

بـسـمـــة صـــــلاح يقول...

وعسى ان تكرهوا شيئا وهو خير لكم

ربنا يعوضك بواحده احسن منها ويقبلوا بيك زي ما انت يا استاذ معتصم والله بدعيلك من كل قلبي
وربنا يعينك في انشغلاتك وفي الانطحانات اصدي الامتحانات
وبجد حكايه الاهل اللي بيحبوا يكتروا على العريس دي كتير جدا
ومحدش عارف ان افضل النساء ايسرهن مؤونه
ربنا يعين
ليك من قلبي كل الامنيات بالسعاده والتوفيق

ولو مهما اتأخرت والله مقدره ظروفك
ربنا معاك
مودتي (:
بسومة أختك الصغننه

موناليزا يقول...

مش عارفة اقول ايه
عموما خيرها فى غيرها:)
وربنا يرزقك بالزوجة الصالحة

غير معرف يقول...

اول مره ادخل المدونه
حضرتك صعيدى وواضح انك من اسيوط.....وكمان قريب ايوشه طيب كويس.....المهم قريت كتير من المدونه....بالنسبه للموضوع الاخير....كل شىء نصيب....لو نصيبك كنتم تراضيتم
خيرها فى غيرها
دمت بخير......تقبل مرورى

غير معرف يقول...

يا زعيم انت نسيت حاجة.. مش بيجيبوا غير المطبخ بس اللي اعرفه السفرة ع العريس برضه..

لا البنات بتعرف تحب ولا تتمسك.. وأهاليهم بيتاجروا يا زعيم

قلتلك خليني كاتم وساكت



الواحد لازم يتخلص من لحيته.. ويعود لزي الفرنجة


والسلام عليكم يا أخ علي

MaNoOoSh يقول...

ان شاء الله ربنا يوفقك فى بنت الحلال.. وربنا معاك فى الامتحانات.

ريمان يقول...

جاتلك لحد عندك


وكمان من المنطقه


هههههههههههههههه


يا ريت تكون فاهم قصدى ايه


بس ابقى فكرنى اقولك انا اقصد ايه

ههههههههههههههههههه
ه
ههههههههههههههههههههههههه

مش قادره هفطس من الضحك

مش عارفه اقفل بؤتى

ههههههههههههههههههههههههههههههه

طب بص كويس


جاتلك لحد عندك والله

ههههههههههههههههههههههه


يالهوى مش قادره ابطل ضحك

ريمان يقول...

تؤتؤ


تؤ


تؤتؤ

مش ينفع اقولك هنا



هههههههههههه

خليك كده على نار

يوميات شاب منوفى يقول...

معلش خيرها فى غيرها ربنا يرزققك بعروسة احسن منها وابقى اعزمنى بقى

zainab يقول...

اخى المعتصم

بجد الله يكون فى عون العريس عندكم

انت عارف عندنا العروسه عليها أوضه (الأنتريه )+ المطبخ إما يكون خشب أو ألوميتال + الأجهزة الكهربائيه + الفرش يعنى السجاد و الستاير وغيييييييييييييييييييييييييييييييره كتير من أدوات المطبخ

أما العريس بيعمل 3 أوض يعنى 2 نوم + سفرة + التنجيد

وممكن العروسه تنجد بس فى الحاله دى هو يعمل الأنتريه

شفت النظام عندنا عامل ازاى

بجد انت عايز عروسه من عندنا من دمياط هههههههههههه

تحياتى و تمنياتى بالتوفيق

Unknown يقول...

ليه حق يتشرط وانت ترفض وتقعدوا تفاصلوا كدة اصل الموضوع شبه البيعة والشروة.....

عجبتنى لما قلت انا مش هفاصل انا مش جاى اشترى...هيستنى لحد ما ييجى واحد معاه فلوس ويعرف يشترى بفلوسه

Kiara يقول...

ياااااااااااااااااربي

طيب ماهو ممكن تجبلها بعد كدا

هيا بيعهوشروه

اللي تقدر بيه جيبه

وربنا هيفرجها بعد كدا

خسارة :((((

زعلتني بجد

ربنا يرزقك الزوجه الصالحه

رحلتنا في الحياة يقول...

ايه ده ايه ده البوست ده نزل امتى وكنت فين انا شكلك عملته لما كنت فى البيات الصيفى اللى كنت فيه من كام يوم
المهم ربنا يكرمك ان شاء الله بالزوجة الصالحة باذن الله وانت صليت استخارة وسيبتها على ربنا
وربنا دايما بيقدم الخير ومعلش للاسف ده حال اغلب الاباء بيفرضوا شروط تعسفية على الشباب ومش بيقدروا ظروفهم
ربنا يكرمك بالانسانة اللى تسعدك ويوفقك دايما فى حياتك يارب





بس تصور زعلتنى انا كده مش هحضر الفرح ولا ايه بس على العيد الصغير ايه ده كنت ناوى تتجوز فى بعد كام شهر كده ايه الكروتة دى :)

المعتصم يقول...

بسم الله الرحمن الرحيم
السلام عليكم ورحمة الله وبركاته
************
بسمه صلاح
وزيرة السكافه ونحو الاميه
تحياتى
موضوع افضل النساء ايسرهن مؤونه ده تقريبا محدش سمع عنه هنا
ههههههههههههههههه
الحمد لله على كل حال
ده نصيب وانا لسه نصيبى مجاش
شكرا على مرورك الجميل ودعواتك الاجمل
تحياتى ودمتِ بكل خير وود
****************
اختى الكريمة موناليزا
تحياتى
مش عارفه تقولى ايه فى ايه ؟؟
ماانتِ قلتى الخلاصه
وخيرها فى غيرها ان شاء الله
وهيكون قريب بإذن الله
نورتى المدونة بمرورك
وشكرا على دعواتك الجميلة
تحياتى ودمتِ بكل خير وود
***************
فتاة من الصعيد
تحياتى
اهلا بيكى فى اول زيارة نورتى المدونة
ويارب ماتكونش الاخيرة
انا فعلا من الصعيد ومن اسيوط
بس مش قريب ايوشه ولا حاجه
صحيح انا بقولها بنت خالى انما ده من باب الهزار ليس الا
قريتى كتير فى المدونة !!!
ياترى الموضوعات العبيطه اللى كنت منزلها قبل كده كان رأيك فيها ايه ؟؟
اما الموضوع الاخير ده
فعلا معاكى حق كل شيء نصيب والحمد لله على كل حال
اسعدنى مرورك ودعواتك الجميلة
نورتى المدونة
تحياتى ودمتِ بكل خير وود
***************
غير معروف
يامحمد ماانا قلتلك خليك ساكت
علشان انا عارف انت بالذات لو اتفتحت مش هنخلص
وبعدين ماانا قلت انه العريس هو اللى بيجيب كل حاجه وساعات كمان بيشارك فى المطبخ
ههههههههههههههههه
وعليكم السلام ورحمة ا لله وبركاته
يااخ محمد
فى رعاية الله
******************
منووووووووووووش
تحياتى
نورتى المدونة
وشكرا على مرورك ودعواتك الجميلة
تحياتى ودمتِ بكل خير وود
****************
ريمان هانم لماضه
حساباتك طلعت كلها غلط
اتبطى وارتاحى شويه بقى
هههههههههههههههه
****************
يوميات شاب منوفى
تحياتى
منور المدونة ياعمنا
شكرا على مرورك ودعواتك الجميلة
تحياتى ودمت بكل خير وود
**************
اختى زينب
تحياتى
اه والله الله يكون فى عون العريس عندنا
ماانا قلتلك عاوز عروسه من عندكم يازينب انتِ مش راضيه تشوفيلى
ههههههههههه
ربنا يكرمك ويسعدك يازينب يارب
تحياتى ودمتِ بكل خير وود
****************
انجى
اهلا وسهلا بيكِ فى اول مرور بالمدونة
تحياتى
الموضوع تقريبا بقى شبه البيعه والشروة
حاجه كده بقت مالهاش طعم ولا لون
ماعلينا
كل واحد ودماغه بقى
وكل واحد عارف مصلحته وحاله فين
وفعلا انا كنت رايح عاوز انسانه تشاركنى حياتى نكافح مع بعض ونبنى اسرة صغيرة ونحاول نعيش سوا عيشه كويسه
انما مافيش نصيب والدنيا قلبت فلوس وفصال وللاسف والحمد لله انا طول عمرى ماليش فى موضوع الفصال ده
نورتى المدونة ويارب مايكونش اخر مرور ليكى هنا
تحياتى ودمتِ بكل خير وود
*****************
كيارا
تحياتى
ولاتزعلى نفسك ولا الموضوع يستاهل اى زعل
لانه مافيش نصيب
وعلشان كده ربنا جعلى الحكايه دى سبب ان الموضوع مايتمش
اما لو كان فيه نصيب فكانت الدنيا كلها مشيت والامور بقت زى الفل
سيبك انتِ
نورتى المدونة
وشكرا على مرورك ودعواتك الجميلة
تحياتى ودمتِ بكل خير وود
**************
ايوشه بنت خالى
تحياتى
طب وهو فيه حد يعمل بيات صيفى برضو
مش هتبطلى شغل البتنجان بتاعك ده ؟؟
الحمد لله على كل حال
وكل شيء نصيب ومالناش نصيب مع العروسه دى
يبقى نشوف وندور على صاحبة النصيب
هههههههههههههه
قال يعنى لو كان ابوها وافق كنتِ هتحضرى الفرح
وبعدين احنا عندنا مافيش خطوبه تقعد اكتر من 6 شهور ولازم يتجوزو بعد كده
ايه هنفضل مخطوبين عشر سنين ولا ايه ؟؟ تقوليلى كروته
علشان مانلحقش نزهق من بعض
على مانزهق نكون اتدبسنا وامرنا لله
هههههههههههههههههههههه
شكرا على مرورك ودعواتك الجميلة
نورتى المدونة ياايه
تحياتى ودمتِ بكل خير وود
********************
والسلام عليكم ورحمة الله وبركاته

غير معرف يقول...

الابن المعتصم
علشان انا صعيدية مش مستغربة
من طلب الاب اهم حاجة عندهم الدهب
حاقولك على حكاية طريفة
احنا صعايدة ولكن نقيم فى اسكندرية
ولى اخت فى الصعيد وابنها يقيم عندنا
ولما جه يخطب ذهب وخطب من الصعيد وجاب شيكة ب 10000 جينه ورفض يخطب من اسكندرية اللى كان ممكن مايجبش شبكة خالص
احنا اتفقنا ان لو ماحصلش نصيب
فيكون من دلائل الاستخارة
واللى نصيبك فيها ستجد كل الامور ميسرة باذن الله
بس الدهب لازم لازم
ربنا يعينك ويوسع رزفك
وتحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
الاخت الكريمه ام مالك
تحياتى
كويس انك عارفه موضوع الدهب ده
بس انا كان ممكن اغشه ووافق على طلبه وبعد الجواز ابيع الشبكه وارد الفلوس اللى هبقى مستلفها
بس انا محبش اعمل كده واحب انى ابقى واضح وصريح من الاول
وبعدين ابن اختك جاب ب10000جنيه بس
طب والله كويس ده مبلغ معقول
هههههههههههههه
بقولك ايه
ماتشوفيلى عروسه كده من الجماعه اللى مش بيجيبوا شبكه خالص دول
بس تكون تقبل انها تعيش فى الصعيد
هههههههههههههههههههه
الحمد لله على كل حال
وماليش نصيب فيها
اسعدنى مرورك
واشكر دعواتك الجميلة
تحياتى ودمتِ بكل خير وود
والسلام عليكم ورحمة الله وبركاته