الأحد، 10 مايو 2009

إســـتـشــارة



بسم الله الرحمن الرحيم


السلام عليكم ورحمة الله وبركاته

الموضوع ومافيه وبكل اختصار
انهم جايبينلى عروسه


العروسة دى


فيها كل المواصفات اللى الواحد بيتمناها


من ناحية التدين والاخلاق والادب


وبعد السؤال والفحص والتمحيص


عرفت ان كل الكلام اللى اتقالى صح مليون الميه




بس فيه مشكلتين




هما ايه ؟؟؟؟


الاولى :


انى لسه ماشوفتهاش


التانيه :


انى لما سألت عرفت انها متوسطة الجمال


يعنى لاهى حلوة ولاهى وحشه




بصراحه مش عارف اعمل ايه


اتكل على الله واروح اشوفها


ولاااااااااااااااا


استنى ابحث الموضوع شويه كماااااااااان


؟؟؟؟؟؟؟؟؟؟؟؟؟؟


محتار




(اللى بالى باله وهو عارف نفسه مش عاوز اعرف رأيه)


ياريت فعلا تشوروا عليا


وزى مابيقولوا لاخاب من استشار


والعاقبه عندكم فى الاستشارات


والسلام عليكم ورحمة الله وبركاته

هناك 57 تعليقًا:

fnoonh يقول...

اول تعليييييييييييييييييق

fnoonh يقول...

طبعا موضوع صعب صعب صعب صعب صعب -------------------- كفاية كده



لانه تحديد مصير وتحديد حياة
اقولك من وجهة نظري
اتوكل على الله وروح شوفها مش هتخسر حاجة بس بعد ما تشوفها ما تاخدش قرار بسرعة فكر كتير حتى لو قالولك انهم مستعجلين على الرد
ما تسمعش كلامهم في الحكاية دي بالذات

لانها هتحدد مصيرك وموقفك انت لوحدك


لو عرفت ان اخلاقها حلوة جدا بس شكلها مش تقبلته
انصحك تفكر كتير ولو مش قبلته ابدا بعد تفكير طويل

يبئه بلاش من الموضوع لانه اصعب شئ ان الانسان يعيش مع شخص مش تقبل شكله من اول لحظة

لان الحكاية دي بصراحة معقداني

لبابا صاحب على قدر كبير من الجمال واخد وحده اقل منه جمالا وبعد عشرة 23 سنة

اصر انه يتجوز وحده احسن منه وبالفعل حصلت السنادي الحكاية دي


فالاقتناع اهم شئ في الحكاية دي

انت روح واتوكل على الله ويارب يقدرلك الخير يارب يارب
ولو كانت خير ليك تكون من نصيبك وان كانت شر يبعدها عنك

ربنا يعينك ويوفقك

تقبل خالص تحياتي وتقديري

ريمان يقول...

ماشى ماااااااااااااشى


واللى بالى بالك بقه مش عايز اصلا يرد ع البوست ده ولا يشور عليييييييك

ريمان يقول...

ابقى خلى بقه الناس دى تنفعك بقى


اما نشووووووووووف هتعمل ايه من غيرى

ريمان يقول...

استشاره؟

بقه بالذمه ده موضوع اصلا

هو ايه ده؟

متوسطه الجمال؟

فيها ايه يعنى

وبتقول اعمل ايه؟

ولسه مش شوفتها

ما تروح يا اخويا شوفها

حد ماسكك؟

حد حايشك؟


ده ايه ده


ده من ايييييه ده

ربنا يكون فى عونها بجدددددد

ريمان يقول...

قال اللى باله بالى مش عايز استشارته قااااااااااااال


قال يعنى انا بقى هموت يعنى واشور عليك لاااااااااااااااااء براحتك خالص ولا هشور ولا حاجه


انا بس بدعى انك انت اللى تعجبها عشان هى تضطر توافق بقى ونخلص منك ونرتاح

ريمان يقول...

وعلى فكره بقى


اللى بالى بالك ده قالك على شكلها واكيد هيطلع شكلها كده

وعلى فكررررررره

انسى ان العروسه دى فى طعامه وحلاوه اللى بالى بالك

هع هع هع


عارفه انك هاتطق يا عينى يا كبدى عليك

fnoonh يقول...

نسيت اقولك ابقى بشرنا وطمنا عليك ولو خير لازم تعزمنا اوك يلا ربنا يوفقك

موناليزا يقول...

هى فين المشكلة أصلا؟؟؟؟!!!
؟
؟


قولتلى بقى أنت مش عايز تروح ليه؟؟؟


عشان سمعت انها متوسطة الجمال!!!!

على فكرة الجمال ده شئ نسبى يعنى ممكن انت تشوفها جميلة جدا واللى حواليك مايبقوش شايفينها كده والعكس صحيح
وبعدين انت عايز ايه اكتر من واحدة تتقى ربنا فيك وتخاف عليك وتحافظ على اسمك
أذكرك بحديث خير الانام صلوات الله وسلامه عليه"خير متاع الدنيا المرأة الصالحة"
واخد بالك الصالحة مش الجميلة
لانها ممكن تكون جميلة وتخلى حياتك تعيسة
وممكن تكون عادية وتبقى معاها اسعد واحد

الغريب بجد انك قلقان من غير حتى ماتشوفها!!

احساسى انك متردد من فكرة الزواج من اصله وبتدور على أى حجة عشان ماتروحش
ولو كان احساسى صح يبقى اسمع كلام عقلك ولما تكون مهيأ نفسيا ابقى اقدم على هذه الخطوة والى ان يأتى ذلك الوقت تقدم بالشكر لكل من يعرض عليك الزواج قائلا انك لسه مش مستعد نفسيا

اما لو كان احساسى غلط وانت بجد قلقان من شكلها وجمالها المتوسط
فاتكل على الله وماتحكمش على حد الا لما تشوفه وتقعد معاه

وفى كل الاحوال ربنا يهيئلك كل الخير ويسرلك جميع امورك
(وابقى وافينا باخر الاخبار):)

حسام غانم يقول...

روح شوفها

mimi يقول...

مين اللي بالك بالك باله وماباله ده؟

هاه مين ؟
مين ... قول متخافش

محدش هيعرف ... أنا مش هقول

بس أنت قول ... يلا يلا قول

mimi يقول...

يا خوفي أنت بالنسبة لها ما تطلعش حلو ....
واللي بتعمله في الناس يطلع عليك يا حلو

سلامو عليكو

د. ياسر عمر عبد الفتاح يقول...

يا نهار ابيض يا جدعان
الزعيم بتاعنا هيدوز
يادي الهنا يادي الفرح

روح يا ريس شوفها .. ميهمكش اي حاجة
وبعدين محدش هيضربك علي إيدك
(هوه حد أصلاً يستجري .. ده إنت زعيم حلف)
هيه هيبقي فيها إحراج شوية للعروسة يعني لو روحت وبعدين مشيت
بس مش مشكلة

وبعدين هيه لو مش منتقبة ممكن تشوفها في الشارع أو في الجامعة أو في الشغل الأول أو اي مكان بتروحه(مش عارف ليه حاسس إنها منتقبة)
وده من السنة علي فكرة يعني مش حاجة عيب ولا حرام .. ولو حتي تختبيء لها

أنا مش عارف ليه برضه حاسس إن مش مطمن أوي
من كلمة جايبينلك عروسة
وكمان مش عارف أروح ولا لا
لازم تبقي مطمن الأول إنك فعلاً عاوز تتجوز
وتبقي مطمن للي إنت اخترتها

بقلك إيه هات ودنك
ظبط حتة نضيفة كده من علي الحبل
واضرب شعرك اي حاجة ..
ولمع الدزمة يا ريس
أهم حاجة الدزمة
ومتنساش صلاة الإستخارة
صليها بتاع الف ريعومية وتمانين مرة

بقلك إيه
لو حصل نصيب
متنساش تلغي البوست ده خالص
أحسن تقول إنك مكنتش عاوز تروح من الأول وتبقي مشكلة
والله أنا خيف اصلاً حد يقلها علي المدونة بتاعتك وتدخل تشوفها من دلوقت
يا خوفي يا بدران

أخر حاجة بقي
يا ريس مفيش بدل طبيعة عمل
أنا كنت وزير صحة
ودلوقت بقيت مستشار خاص .. خاص أوي
هههههههههه
ربنا يوفقك
ويزرقك بالزوجة الصالحة

خديجة عبدالله يقول...

ممتاز :)
بفرح أنا اوى بالتدوينات الخاصة بأى سيرة للأفراح من قريب أو من بعيد
ربنا يرزق حضرتك بالزوجة الصالحة التى تصلح لك وتناسبك وتكون قرة عين لك إن شاء الله وتكون طريقها للجنة

نيجى للمهم أتفق مع رأى أختى الكريمة موناليزا فمسألة الجمال نسبية جدا والله أنا كان ليا واحدة صحبتى وهى ماشاء الله المهم اتقدملها واحد اسود :) عجبها جدا وتزوجا يعنى هى شافته تحفة .. ولذا الرسول صلى الله عليه وسلم أمر بالنظر إليها حتى تعرف هل تتقبلها أم لا المهم حضرتك ممكن لو تقدر تشوفها من بره من غير هى ما تعرف يكون أحسن عشان الاحراج لإن ممكن حضرتك تروح وترجع يسألوك تقولهم مشوفتش حاجة فيتغاظوا منك عندى قرايبى بيعملوا كده أمهاتهم هيطقوا :)
المهم حضرتك استخير وفى كل وقت واحنا أكيد هندعيلك إن شاء الله
ولكن فى نقطة بس مهمة : لازم حضرتك تحدد هدفك ونيتك من الزواج يعنى نبرة هما اللى عاوزينى _ جابولى_ قالولى _ والخ أعتقد شوف حضرتك عاوز ايه لنفسك وايه خطتك وتصورك مش رغبات الآخرين
عذرا لو أطلت أو تجاوزت فى آخر كام سطر بس عشمنا حضرتك كريم إن شاء الله

نقول : مبارك ولا لسه :) ربنا يقدر لك الخير ويرضيك به

norahaty يقول...

السلام عليكم ورحمة
الله تعالى وبركاته
السؤال مش تروح ولا لأ
السؤال هو:انت عايز تتزوج فعلاً؟

norahaty يقول...

استاذ معتصم بجد ومن غير هزار
هل انت عايز تتزوج فعلا؟
ان كان نعم :فأذهب على بركة الله
وإن كان لأ :فأتقى الله ولا تذهب ولا تعشم البنت وتكلف اسرتها وتكلف نفسك مشقة الذهاب.

norahaty يقول...

بس قولى مين اللى بالى بالك دى؟
انا بالى فى عشوة حلوة محترمة كده؟

ايوشة يقول...

السلام عليكم ورحمة الله وبركاته
بص بقى انت خايف ليه الاول استخير ربنا وبعدين اتوكل على الله وروح شوفها وان شاء الله هيحصل قبول والامور كلها هتتيسر
وهى مش مسالة جمال متوسط او جمال عالى هى مسالة قبول قبل كل شئ
ولو لا قدر الله محصلش نصيب برضو مش مشكلة لان ده شئ عادى وانت بتقول انها اخلاق وملتزمة وده الاهم
بس ممكن فى حل تانى علشان برضو مش تسبب ليها اى احراج شوفها من بعيد لبعيد من غير هى ما تعرف عجبتك اروح لغاية البيت
وربنا يتمم بخير يارب ونسمع خبر حلو وتعزمنى بقى على الفرح ولا ابن عمتى كده اونطة :))

MaNoOoSh يقول...

لو انت ناوي تستقر فعلا
استخير وتوكل على الله وروح شوفها.. وربنا هو اللى بيزرع فى قلبنا القبول بغض النظر عن الجمال
ربنا يوفقك يا استاذ معتصم

Sweet Violet يقول...

نعم !!!!!!

سيبك من اول مشكلة لانها عادية يعنى و ممكن تشوفها

لكن تعالى هنا فى التانية

معلش لو قولت انها وحشة كان الواحد قال فعلا مشكلة جامدة لان الواحد بردو لازم يدور على قبول الشكل

لكن انت بتقول ان جمالها كويس يعنى مقبولة ..رغم انى مش عارفة هو انت بتتجوز شكل ياعم انت

بص بقى علشان مش اتعصب و اولع فى المدونة دى

هو من الواضح ان المشكلة مش اللى انت قولتها خالص لأ

من الواضح انك انت اللى متردد انك تاخد الخطوة دى

صلى الاستخارة و ان شاء الله خير

و يلا بقى علشان اخلص من اخويا الكبير لانه طووووول فى القاعدة الصراحة و مش ينفع كده

و يابخت من زار و خفف يعنى

ده ايه الغلب ده ياخواتى .. الواحد مش عارف يشرب كوباية نسكافة بمزاج فى بلوجر )):

ghorBty يقول...

السلام عليكم والرحمه :

اولا :ربنا يهيئ لك ما فيه الخير لك في الدنيا والاخره ..

وما شاء الله كل اللي علقوا قالوا كل اللي مفروض يتقال

بس انا عايزاك تسأل نفسك سؤال واحد

انت عايز تتجوز بني ادمه من لحم ودم تعيش معاها حياه كريمه علي طاعة الله والا عايز تتجوز برواز تعلقه علي الحيطه وتتفرج عليه وتتباهي به قدام الناس ؟؟؟

وبعدين كل راجل بيفتكر نفسه ياما هنا وياما هناك واول شئ بيدور عليه انها تكون حلوه جداااااا وبينسي انها حاجه مش باٍيده وان الموضوع بيحكمه النصيب والموضوع كله بيد الخالق الذي لم يخلق الا كل شئ جميل وان المسائله مش مسئلة شكل الموضوع كله موضوع قبول وارواح ما تعارف منها ائتلف وما تناكر منها اختلف ...

استاذ معتصم رأينا لم يفيدك كثيرا .. انت اللي لازم تقعد مع نفسك وتحدد نيه وتعرف هدفك من الزواج ايه اصلا وحط ضمن اهدافك ديه ان هيكون هناك اولاد ان شاء الله اللي هيربي اولادك دول امراه هتربيهم بعقلها وحكمتها مش بشكلها يبقي اللي هيحكمك لو انت بدور علي النقطه ديه هو كلامك معها ومعرفه اركان شخصيتها عن قرب لكن لو بدور علي شئ تاني وهو دا اساس الاختيار عندك يبقي عقلك مش هيدور الا علي الشئ دا اللي انت بعد كدا هتعرف انك اخترت علي اساس خطأ لو كان جمال خارجي فقط لانه شئ هتعتاد عليه لكن الشخصيه والروح هي اللي هتتعامل معاها ...

استخير ربك ان يرزقك بالصالحه اللي تتقي الله فيك وتربي لك اولادك وتجعلهم لك ذريه صالحه ينفعوك فيما بعد وان شاء الله لو هي كدا يبقي ربنا ييسر لك الامور.. وياريت تكون مساحه تفكيرك اكبر من كدا لان الموضوع مصيري ويمكن اكتر موضوع محتاج حكمه في الاختيار لانها هتبقي عشره مش يوم ولا اثنين ولا مشوار هتروحه وهترجع منه لازم يكون القناعه والراي نابع من جواك انت مش من حد تاني حواليك ايا كان ...

ربنا يوفقك وينور بصيرتك بما ينفعك ..

mohamed ghalia يقول...

فكر ثم فكر ثم فكر

المعتصم يقول...

بسم الله الرحمن الرحيم
السلام عليكم ورحمة الله وبركاته
************
فنونة
تحياتى
ومبروك ياستى اول تعليق
(ولو انا مش عارف على ايه يعنى)
ههههههههههههههه
........
الله يطمنك (صعب صعب صعب صعب صعب)
ماهو فيه مشكله انها عرفت
وكمان هى بتقول لو عاوز يشوفنى ييجى يشوفنى فى البيت
وانا متنيل على عين اهلى ومكسوف اروح هناك
افرضى ماعجبتنيش ؟؟
يبقى شكلى وشكلها هى ايه ؟؟
الموضوع محرج
وبعدين ماهو انا بسأل دلوقتى علشان انا مش عاوز اعمل زى ناس كتير ساعة الجواز يقولوا كلام حلو وزى الفل وانه الاستقرار وانه وانه وانه وبعد فترة تلاقيهم بيعملو حاجه مش تمام او عاوزين يتجوزو تانى
مش عارف
بجد الموضوع ده قرب يجننى
بس هى اخلاقها الصراحه زى الفل
عموما اللى فيه الخير يقدمه ربنا
نورتى المدونه يافنونه
وشكرا على نصايحك ودعواتك
تحياتى ودمتِ بكل خير وود
***************
ريمان هانم
ماشيه ليه ماتقعدى شويه هو انتى لحقتى
هههههههههههههه
وبعدين انتى اخدتيها عليكى انتى ليه ؟؟
انا قلت اللى بالى باله مش اللى بالى بالها
ياريت تبقى تركزى شويه
مش هتبطلى الطبع الهباب اللى فيكى ده
داخله تتشاكلى معايا من طريق ونص كده
صحيح انا اخ كبير ديموقراطى
بس اتقى شر الحليم اذا غضب
وبعدين ماهى عرفت انى ممكن اتقدم لها وده اللى عاملى احراج انى اروح اشوفها
خايف اروح اكسر بخاطرها لو محصلش قبول
وبس خليكى انتى قاعده كده تناكفى فى مخاليق ربنا
وعلى فكرة بقى
انا عاجبها وبتقول عليا زى القمر هه
هههههههههههههههههههههههه
ومش هى اللى الناس اياهم وصفوها
دول تقريبا كده كانو بيبصوا فى المرايه وبيتكلموا
ههههههههههههههههههههههههه
وبعدين انا عاوز دليل على موضوع الطعامه وال مش عارف ايه ده
منين وبتاع ايه وليه وبامارة ايه ؟؟
هههههههههه
روحى نامى احسن
هههههههههههههههههههههههههههه
نورتى المدونه ياريمان ياللى مش اللى بالى بالك
تحياتى ودمتِ بكل خير وود
*****************
موناليزا
تحياتى
طب هو انتِ داخله تشخطى فيا كده ليه؟
اه انا شايف الشخطه اهه
وكمان بتفكرى ترفعى ايدك
لالالالا اعقلى ومش عاوز تهور
انا ماقولتش انى مش عاوز اروح
انا محتار اروح ولا لأ
ومش السبب انها متوسطة الجمال لا والله بس انا خايف اروح بعد ماهى عرفت لا مايحصلش قبول اكسر بخاطرها وتزعل
الموضوع ده هيضايقنى قووووووووووووى
انا عارف كل الكلام اللى هتقوليه عن ان الجمال نسبى
يعنى مثلا اخويا شافها وبيقولى عليها انها جميلة
بس ده انا اللى احكم عليه
انما حتى لو جميلة جدا ما ممكن مايحصلش قبول ده اللى عاملى قلق بس
وعلى فكرة انا من امبارح وانا بذاكر كل الاحاديث المتعلقه بالموضوع ده
ممكن يكون معاكى حق شويه فى حكاية متردد دى
بس انا كده تخطيت المرحله القانونيه لسن الجواز
يعنى ماينفعش انى اقعد تانى
وانا بحالو اظبط نفسوياتى كويس وعلشان كده انا بستشير كل اللى ممكن يدينى نصيحه كويسه لوجه الله
علشان اكون متهيأ تماما انى اخد الخطوة
وماتقلقيش الحمد لله مش انا اللى ممكن اظلم معايا انسانه علشان ارضى حد غير ربنا
شكرا على نصايحك ودعواتك
نورتى المدونه
تحياتى ودمتِ بكل خير وود
**************
حسام غانم
تحياتى
ان شاء الله يادكترة
ربنا يسهل
منور ياباشا
تحياتى ودمت بكل خير وود
************
ميمى
تحياتى
هو اللى بالى بالك ده شاغلكم قوى كده ليه ؟؟؟؟
مش هتبطلو فضول ؟؟
وبعدين انا قلت اللى بالى باله
مش اللى بالى بالها
يعنى هو مذكر مش مؤنث
وهو ماعلقش وعارف نفسه
ومش هقول اكتر من كده
...
لا اطمنى هى عارفانى ورايها فيا كويس
ههههههههههههه
وعليكم السلام ورحمة الله وبركاته
نورتينا الحبه دول
هههههههههههه
تحياتى ودمتِ بكل خير وود
*************
د/ياسر
تحياتى
شوفلنا ياعم مصل ولا انتيى بيوتك للحاله دى وخلينا نخلص
امال وزير الصحه بتاعى ازاى بس ؟؟
مش فالح غير عاوز بدلاااات وخالص
وبعدين انا لسه بقول انا عاوز اشوفها خليتنى انت هتجوز خلاص
هى مش منتقبه بس هى عرفت انى عاوز اتقدملها وكمان انا مش من العيال بتوع الحركات بتاعة اقف لها وهى راجعه البيت دى وكده
يااخوانا المصيبه انى انا بتكسف ابص على بنت ماشيه فى الشارع
عاوزينى اروح اقعد ابص فى واحده وافحص وامحص فيها وممكن بعد ده كله مايحصلش قبول يبقى شكلى ايه بعد دا كله قدامها ؟؟ واكيد هى هتتأذى نفسيا جامد وده هيكون بسببى
وبعدين هما جايبنللى عروسه عادى يعنى
هو نظام الجواز عندنا كده
مافيش نظام الحب واللى مش عارف ايه ده
خد ودنى بس انا ممكن اظبط حتة نضيفه من على الحبل انما اضرب شعرى لايمكن
وبعدين هضرب ايه ياحسرة
دا اللى قاعد فيه مايجيش ربع اللى وقع اسكت بلاش فضايح
ههههههههههههههههههههههه
بصلى استخارة من امبارح ومافيش حاجه ظهرت
وماتقلقش ياادهم انا عامل حسابى هلغى البوست بعد مانخلص نقاش على طول
هههههههههههههه
شكرا على نصايحك ودعواتك الجميلة يادكتور
تحياتى ودمت بكل خير وود
والسلام عليكم ورحمة الله وبركاته

ستيته حسب الله الحمش يقول...

ايه يا سيدي؟
كل التعليقات محسساني اني داخلة حرب
واستخير
واستشير
وطراطير

هو انت لسه شفت الوليه علشان نتكلم؟
وبعدين بعد ما تشوفها يا يؤدم الله او يصرف الله وكل عام وانتم بخير

روح عاين يا جبيصي ياولدي
ربنا يرزقك الصالحة الطيبة الوديعة
دي ها تتجوز رئيس الحلف
وها تبقى سدة الرااااااااااابطة الأولى

عقل مهوي يقول...

ههههههههههههههههههههههههه
معلش اسف ان اول تعليق ليا يبقي كده
بس اصل فعلا كلمه جايبيلي واختارولي ونقوولي عروسه دي بتخليني اكركر قوي قوي قوي

هاتروح تعاين وبعدين

هاتعاين فين اصلا
طيب لو السلعه ما عجبتك احساس السلعه دي ايه قصدي الانسانه دي
وبعدين يعني ايه متوسطه الجمال م هاقولك الجمال جمال الروح بس هقولك ان الجمال نسبي
يعني اللي قالك انها متوسطه الجمال ممكن انت تلاقيها فتاه احلامك

يمكن ارجع تاني
مازعلش بس
:)

المعتصم يقول...

بسم الله الرحمن الرحيم
السلام عليكم ورحمة الله وبركاته
*************
خديجه عبدالله
تحياتى
كويس انك بتفرحى
الحمد لله
ربنا يخليكى وشكرا على دعواتك الجميلة
بس انا مشكلتى انها عرفت انى عاوز اتقدم لها يعنى لو روحت ومحصلش قبول اكيد الموضوع ده هيجرحها خالص وانا مش قادر اتخيل انى اعمل حاجه زى دى
وكمان فيه مشكله تانيه
وهى انى انا بتكسف ابص على البنات وكسوفى ده كسوف بشكل مرضى يعنى بعيد عنك ماقلكيش حالتى بتبقى عامله ازاى وشى بيبقى احمممممررررررررررررررر
وحالتى بتبقى بالبلا
وادينا بنستخير وربنا يقدم مافيه الخير
مافيش اطاله ولا حاجه
بس فيه حاجه انا دخلت على الحلقات بتاعتك قريتها حوالى ست مرات وكل مرة اكتب تعليق مختلف عن المرة اللى قبلها وبعد كده ارجع فى كلامى واقول المرة الجايه ولحد دلوقتى مش عارف ارسى على بر فعذرا على تأخرى فى التعليق
نورتى المدونه
تحياتى ودمتِ بكل خير وود
****************
الدكتورة نور
تحياتى
يامراحب يامراحب
وعليكم السلام ورحمة الله وبركاته
اكيد طبعا عاوز اتجوز
هو فيه مش عاوز يتجوز ؟؟ دا اللى متجوز عاوز يتجوز تانى
ههههههههههههههههههههه
المشكله بقى انى انا عاوز اتجوز بس هما عشمو وانا خايف بعد العشم ده انه مايحصلش قبول وتكون الحكايه دى فيها جرح نفسى للبنت ده اللى قالقنى
ومش هقول على اللى بالى بالك ده لحد خالص
وهو عارف نفسه كويس
وبلاش فضول يادكتورة ماتبقيش زى ناس معلقين فوق هيموتو من الفضول وكاتبين حوالى خمس تعليقات
هههههههههههههههههههههههه
لما تيجى تحضرى الفرح ان شاء الله هخلى الحاجه ام محمد تعملك عشوة مفتخرة تاكليها بالهنا والشفا
هههههههههههههههههه
نورتى المدونه يادكتورة
تحياتى ودمتِ بكل خير وود
****************
ايوشه بنت خالى
تحياتى
وعليكم السلام ورحمة الله وبركاته
انا بستخير وربنا يقدم اللى فيه الخير ان شاء الله
بس المشكله انها عرفت يعنى لو شوفتها ومحصلش قبول هتبقى الامور مش قد كده والموقف محرج شويتين وخصوصا ليها هى
والحكايه مش حكاية جمال متوسط
بس هى حكاية القبول من عدمه
ربنا ييسر بقى ويعمل اللى فيه الصالح
نورتى المدونه يابنت خالى
واكيد اكيد ساعة الفرح هتتعزمى بس تبقى تيجى بقى
ههههههههههههههههه
تحياتى ودمتِ بكل خير وود
**************
منوووووووش
تحياتى
بستخير والله يامنى
بصى اقرى الردود اللى فوق وانتى تعرفى المشكله فين
وربنا ييسر ان شاء الله
نورتى المدونه بمرورك الجميل
تحياتى ودمتِ بكل خير وود
*************
سويت هانم (الصوحفيه)
تحياتى
انا ماقلتش انها وحشه وماقلتش انها حلوة
ماهى ممكن تكون حلوة وماتعجبنيش
المشكله قصدى انا انها تكون فى القبول ليس الا مش الشكل فى حد ذاته
ممكن اكون معرفتش اعبر عن المشكله فى البوست
انما الحكايه مش فى الجمال او عدمه وانا مش بتجوز شكل
بس ممكن مايحصلش قبول وتبقى حاجه محرجه خصوصا انها عرفت انى عاوز اتقدملها
يعنى موقف بايخ كده
حاضر نصلى استخارة عشرتاشر مرة تانى
وبعدين مش هتبطلى الهجص اللى فيكى ده
تولعى فى مدونة مين يابت انتى انتى ناسيه انى انا اخوكى الكبير ولا ايه ؟؟
ايه ده
روحى روحى كده بدل مااعملها معاكى
يللا امشى
وبرضو حتى لو اتجوزت هفضل قاعد على قلبكم كده وماتفتكريش انى هخلع
ههههههههههههه
وبعدين خلاص النسكافيه قرب يخلص وهيبطلوا ينزلوه ان شاء الله
ههههههههههههههههههههههههه
نورتى المدونه
تحياتى ودمتِ بكل خير وود
*************
غربتى
وعليكم السلام ورحمة الله وبركاته
شكرا على دعواتك الجميله
شوفى انا عارف الكلام اللى هتقوليه كويس والله بس هو فيه لبس فى الامور
ممكن اكون انا معرفتش اعبر عن المشكله كويس فى البوست
انا كنت اقصد بس حكاية انه ممكن مايحصلش قبول شكلى بينا وخصوصا بعد ماهى عرفت انى عاوز اتقدم لها وممكن ده يسبب لها ضيق وزعل وده اللى قالقنى
انما طبعا مافيش شك وانا قلت فى اول البوست انها انسانه ممتازة
انا بس كل اللى مخوفنى حكاية الاحراج ليس الا
ولو قريتى الردود هتعرفى كده
نورتى المدونة واسعدنى مرورك اختى الكريمه
تحياتى ودمتِ بكل خير وود
*************
صديقى العزيز محمد غاليه
تحياتى
منور يامحمد
معلش انا مقصر معاك قوووى ومكسوف منك قوووى
شكرا على مرورك وعلى نصيحتك الجميلة جدا
نورت المدونة
تحياتى ودمت بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم ورحمة الله وبركاته
*************
د/ستيته
تحياتى
والله بنت حلال مصفى
كنت بفكر ابعتلك ميل
ماهى المشكله انى خايف اروح اشوف الوليه مايحصلش قبول وهى عرفت انى عاوز اتقدملها يبقى الموقف محرج ومنيل وهى البونيه هيتكسر بخاطرها وهتتضايق
هى دى كل المشكله
على العموم ربنا يقدم مافيه الخير
بس هى مش هتبقى سيدة الرابطه الاولى
دى هتبقى سيدة الحلف الاولى
ركزى شويه يادكتورة
ههههههههههههههههههههه
نورتى المدونة
وشكرا على دعواتك الجميلة
تحياتى ودمتِ بكل خير وود
**********
عقل مهوى
تحياتى
اهلا بحضرتك فى اول زيارة
ولا يهمك ياعم اضحك براحتك
ده شيء بيسعدنى
انما عاوز اقولك على حاجه
احنا نظام الجواز عندنا كده
تقول انا عاوز اتجوز يقولولك خد بنت فلان او بنت علان وكده
انما الافلام العربى بتاعة قصص الحب مابتمشيش هنا
وبعدين ماهى المشكله مش هعاين فين
المشكله دلوقتى انها عرفت الموضوع ولو الحكايه ماكنش فيها قبول هتبقى محرجه قوووى هى دى المشكله
انا عارف ان الجمال نسبى
بس انا بتكلم على القبول مش على الجمال
ممكن تكون التعبيرات خانتنى
انما ده قصدى
عموما شرفت المدونة
ويارب ماتكونش اخر زيارة
تحياتى ودمت بكل خير وود
والسلام عليكم ورحمة الله وبركاته

wesoooooooooo يقول...

السلام عليكم
انا رأيى انك تصلى إستخاره وتتكل على ربنا
يعنى بتقول انها فيها
كل المواصفات اللى الواحد بيتمناها

من ناحية التدين والاخلاق والادب
عاوز إيه أكتر من كده؟"علامات تعجب بالهبل"
أتكل على الله عاوزين نفرح فيك بقى
مستنين نعرف باقى التفاصيل
ربنا يوفقك ويرزقك ببنت الحلال اللى تصونك يارب
تحياتى

ايوشة يقول...

انا جييييييييييت تانى :))
وعندى ليك حل ان شاء الله هيحل كل المشاكل بما انها مش منتقبة يبقى اكيد عندها صور اطلب من والدتك مثلا بطريقة لبقة وكده انها تاخد منها صورة قبل ما تروح وتشوفها
او مش لازم والدتك اى حد من المعارف وده حل مؤقت بدل الحيرة اللى انت فيها دى :)
ومتخفش انت بس اتجوز وانا ان شاء الله ان شاء الله مش هحضر ههههههههه
ان شاء الله ربنا يوفقك ويتمم كل الامور على خير باذن الله

د. ياسر عمر عبد الفتاح يقول...

يا زعيم دي مش حركات عيال
بجد إنك تشوفها بره البيت أحسن الف وخمسمية مرة من إنك تشوفها جوه البيت

وفيه حديث بكده وكان الصحابي ده بيختبيء لها
وبعدين من الأخر بقي
إنت روح وتوكل علي الله
حصل قبول كان بها
ومحصلش .. افتح الباب واجري
ولا أقلك
قلهم إنك تعرفني بس وهمه هيقلشوك علي طول


علي فكرة أنا مكنش قصدي يبقي فيه قصص حب والهجص ده
بس إسلوبك كان باين عليه إنك مغصوب ومتكدر ومش عاوز تتجوز

وبصراحة بقي إحنا معندناش زعما حد يغصبهم علي حاجة
ولا إيه يا ريس ..!!

بقلك إيه؟
هوه الفرح هيبقي فين إن شاء الله؟
ألف مبروووووووووووووووك
فرحتلك أوي والله

ريمان يقول...

ايييييييييه ده


اييييييييه فى اييييييييييييه


الناس دى داخله تعللللللللق لييييييييه


هو ده بوست يعلق عليه


قال استشاره قال

قال اروح اشوفها ولا ماشوفهاش

ده ايه يا اخواتى ده

ريمان يقول...

لاء لا ءلا

تؤتؤتؤ

الدنيا حر موت اوى هنا


اووووف

سوفاااااااااااج

عقل مهوي يقول...

انما عاوز اقولك على حاجه
احنا نظام الجواز عندنا كده
تقول انا عاوز اتجوز يقولولك خد بنت فلان او بنت علان وكده
انما الافلام العربى بتاعة قصص الحب مابتمشيش هنا
ياراااااااااااااااجل يا عسل دا كلام .. مش بقولك حب وعيش فيلم واعمل فيها عبد الحليم حافظ ولا الاستاذ زكي رستم .. بوقلك كن انت .. انت .. انت .. انت ..

د.آيه يقول...

بسم الله الرحمن الرحيم

الناس هنا قالت كل حاجه ممكن تتقال..
أنا رأيي مع د. ياسر إنك تشوفها بره البيت و تخلى الموضوع يجي كأنه بالصدفة بس طبعا إنت فاهم و هى فاهمة و الناس كلها فاهمة إنك جاى تشوفها بس بتعملوا نفسكم مش فاهمين..
الموضوع هيبقي أقل إحراجا بكتيييييييير ..
يعنى حاول تروحلها في مكان شغلها أو أى مكان مناسب..

دخوووووول البيوووووت مش بالسهل ..
ههههههههه
مش أوى يعنى ممكن يكون سهل بردو

zainab يقول...

السلام عليكم و رحمة الله و بركاته

أخى المعتصم

أنا و خطيبى بخير الحمد لله دعواتك لينا ربنا يصلح الحال و ييسر الأمور

كويس و الله انى جيت على بالك لو كلامك صحيح كنت جيت عندى المدونه سألت عنى صح ولا غلط ولا ايه
صحيح اه الظاهر بأه انك مشغول فى العروسه و بتفكر

شوف يا معتصم أولا انت أكيد عارف ان جمال الشكل مش كل حاجه و ان الجمال ده حاجه نسبيه يعنى ممكن انت لما تشوفها تحس انها أجمل واحده فى الدنيا و غيرك يشوفها يحس ان جمالها عادى

صلى صلاة استخارة و روح شوفها و بعدين فكرو صلى تانى استخارة و ربنا يقدم لك الخير و يبعد عنك الشر يارب اللهم أمين

و بعدين طلب صغنون لما أجى على بالك يا سيدى ابقى ادعيلى ماشى

تحياتى

د/عرفه يقول...

اهلا اهلا
ربنا يوفقك حبيبى
اظن انك تسال على اخلاقها وتتاكد من اهلها الاول وده اهم شىء
بالنسبة للجمال فده شىء نسبى
يعنى على حسب
ممكن الناس شايفنها متوسطة
بس تعجبك اوى
وربنا يوفقك للخير ان شاء الله

z!zOoOo يقول...

السلام عليكم

كيف احوالك أتمني من الله ان تكون بخير

بص هو انا رأيي اولا تعمل استخاره شوف هتهتدي للخير فين

وكمان ممكن تشوفها بتدرس فين او شيء مماثل لكده وتشوفها من غير ماهي تاخد بالها

ده الي في دماغي دلوقتي

لو لقيت نفسك متوفق ومطمن ومرتاح نفسيا يبقي اتوكل علي الله

وفقك الله لما تحبه وترضاه

ومبروك مقدما

تحياتي

قيس بن الملووووح يقول...

الجمال مسألة نسبية
لذا عليك بلقاءها ولا مانع من التراجع عن الامر اذا لم تأنس اليها فالزواج قسمه ونصيب

اللؤلؤة يقول...

حضرة الصعيدى الهمام
وحشتنى وحشتنى وحشتنى
من النهاردة لحد السنة الجاية

اللؤلؤة يقول...

على فكرة أنا فاتح الإيميل لو وقتك يسمح نراسل بعض

اللؤلؤة يقول...

حضرة الصعيدى لاالهمام
الموضوع سهل جدا وهو أنك لا بد أن تراها ولعل كما قال رسول الله
لعل الله يؤدم بينكما ونصيحة ألا يكون إختيارك الأول الجمال أو المال فاظفر بذات الدين تربت يداك لأنها حياة وعشرة وعمر
دمت بكل الخير

م/ الحسيني لزومي يقول...

ما لهاش حل غير انك تشوفها وتتكلم معها ثم تقرر.
علي فكره انت منين من الصعيد

الشيماء صلاح يقول...

اتكل على الله ياراجل

شوف اولا انت صلي استخارة (طبعا عارفها الصلاة دي)
واللي يحصل اكيد هو اللي فيه الخير "الخيرة فيما اختاره الله"
وبعدين الجمال مش شرط اساسي ماهي ممكن تكون حلوة وقمر 14 بس تعيشك عيشة غم
وممكن تكون وحشة بس معيشاك ملك

تحب تعيش ازاي بقى مع وحده حلوة وعين امك طالعه ولا واحد وحشة وعين امك مش طالعه اصدي وبالك مرتاح

يلا صلي واتكل على الله وابقى اعزمني انا في المنيا قريبة يعني ها؟؟

ربنا يوفقك وييسرلك اللي فيه الخير

المعتصم يقول...

بسم الله الرحمن الرحيم
السلام عليكم ورحمة الله وبركاته
اولا انا بعتذر عن التأخير فى الرد على التعليقات
**************
وسام
وعليكم السلام ورحمة الله وبركاته
تحياتى
والله صليت استخارة كتير
بس لسه مافيش حاجه ظهرت
انما ربنا يسهل
صحيح هى فيها كل الصفات اللى انا بقول عليها دى من ناحية الدين والاخلاق وكل ده
بس ماتنسيش الحتة بتاعة القبول
دى برضو مهمه
عموما خلاص انا ان شاء الله هروح اشوفها واللى فيه الخير يقدمه ربنا
وشكرا على مرورك الجميل ودعواتك الاجمل
تقبلى تحياتى ودمتِ بكل خير وود
****************
ايوشه بنت خالى
(وزيرة التربيه والتعليم سابقاً)
انتِ نورتى تانى
هههههههههههههههههه
ما انا كنت عاوز اعمل كده وقلت على الحل بتاع الصورة ده
طلعت هى دقرمه وناصحه وعرفت ان اللى هتاخد منها الصورة هتاخدها علشان توريهالى ورفضت الموضوع ده
انما ان شاء الله ربنا يسهل وهشوفها قريب واللى فيه الخير يقدمه ربنا
وانا كنت عارف ومتأكد انى مش ههون عليكى وانك اكيد اكيد مش هتحضرى فرحى ههههههههههههههههههههههههه
نورتى المدونه ياايه
تحياتى ودمتِ بكل خير وود
****************
د/ياسر
صديقى العزيز
هو بره البيت كان هيبقى احسن طبعا
انما الظروف لاتسمح بكده
وانا مكنتش اعرف ان الصحابه كانو بيستخبو ويعملو كمايت علشان يشوفو الستات اللى كانو هيتجوزوهم
جديده عندى دى
(هى مش الستات كانو بيلبسوا نقاب (برقع)برضو زمان ولا هو كان ايه النظام)
هههههههههههههههههههههههههه
عموما انا هروح ان شاء الله ولو فيه اى حاجه هقول اسمك على طول واجرى
هههههههههههههههههههههه
وماتقلقش احنا معندناش اى حد يتغصب على حاجه سواء كان زعيم او غير زعيم اطمن
والفرح هيبقى فى قصر الرئاسه اكيد انت عارفه طبعا
والله يبارك فيك وعقبال عندك كده ان شاء الله
هههههههههههههههههههههههههههههه
نورت يادكترة
تحياتى ودمت بكل خير وود
**************
ريمان
مش هتبطلى رخامه ابدا
وانتِ ايه اللى غايظك كده انى استشير اصحابى وحبايبى
متغاظه قووى ليه ؟؟؟؟؟؟؟؟؟؟
وبعدين حوشى حوششى الرياح الشماليه البارده اللى جايه من التكييف المركزى اللى فى المدونة بتاعتك
امشى يابت من هنا
امشششششششششششششى
هههههههههههههههههههههههه
**************
عقل مهوى
تحياتى
منورنى ياباشا
ماشى انا معاك انى مش هبقى عبدالحليم
بس ياريت ابقى زكى رستم كان نفسى
ههههههههههههههه
بس انت برضو ماوضحتش كن انت ازاى بقى
وبعدين ماهو كده انا انا برضو
يعنى انا اللى سألت على العروسه وعرفت انها مؤدبه وكويسه وانا اللى عاوز يتجوز (ومحدش غاصبنى)
بس المشكله كلها فى حكاية انى اشوفها دى بس
وده هيحصل قريب ان شاء الله وربنا ييسر
نورت المدونة
تحياتى ودمت بكل خير وود
***************
د/آية
تحياتى
حلوة حكاية انك تعمل مش فاهم وهى مش فاهمه والناس وكلكم فاهمين
ههههههههههههههه
مش هينفع برة البيت للاسف
انما امرى لله هروح البيت واللى يحصل يحصل بقى
وهبقى عامل حسابى وواخد معايا اتنين ولاد عمى واقفين بره
مع اول رنه يولعوا فى الدرة واخلع انا
هههههههههههههههههههههه
نورتى يادكتورة
تحياتى ودمتِ بكل خير وود
**************
زينب
وعليكم السلام ورحمة الله وبركاته
تحياتى
الحمد لله انك وخطيبك بخير ويارب دايما كده ومن احسن لاحسن ان شاء الله
والله يازينب زى مابقولك كده انا كنت لسه هدخل اسأل عليكى لقيتك سايبالى تعليق
قلت ياسبحان الله فعلا دى الاخوة فى الله
والحمد لله على كده
انا عارف ان موضوع الجمال ده نسبى
بس انا كنت بتكلم فى حكاية انى محرج اروح اشوفها فى بيتهم احسن مايحصلش قبول
بس ده كل الموضوع
انما كده خلاص هروح وامرى لله واللى ربنا رايده هيكون
وحاضر ياستى ان شاء الله هدعيلك على طول انتِ وخطيبك(عبدالبر)
هههههههههههه
نورتى المدونه ياعروستنا الجميله
تحياتى ودمتش بكل خير وود
******************
د/عرفه
تحياتى
منور يادكترة
سألت وكله تمام التمام واخلاقها زى الفل والحمد لله
واهلها ناس ممتازين
بس هى الحكايه انى خايف اشوفها مايحصلش القبول ليس الا
انما هروح وربنا يسهل وييسر ان شاء الله
وشكرا على مرورك الجميل ودعواتك يادوكتور
نورت المدونه
تحياتى ودمت بكل خير وود
************
زيزو
وعليكم السلام ورحمة الله وبركاته
تحياتى
الحمد لله رب العالمين انا فى احسن الاحوال وكله تمام
عملت الاستخارة
بس انى اشوفها برة البيت دة صعب شويه
ع العموم انا هروح البيت وربنا يسهل
ههههههههههههه
نورت ياصديقى العزيز
تحياتى ودمت بكل خير وود
***************
قيس بن الملوووح
اهلا اهلا يابشمهندس
نورت المدونة
كفيت ووفيت
ان شاء الله هعمل كده وربنا يقدم مافيه الخير
اسعدنى مرورك الكريم
تحياتى ودمت بكل خير وود
*************
اللؤلؤة
حضرة المنوفى التمام
تحياتى
انت اللى ليك وحشه ياعمرو والله
بس هى الظروف معلش
سامحنى
انا كنت بعلق عند الناس اللى بقالى كتير غايب عنهم ومدخلتش المدونة فى الليلة دى خالص وماشوفتش التعليق بتاعك ده معلش
انما ملحوقه ان شاء الله نتكلم على الميل قريب
ان شاء الله هروح اشوفها وربنا يقدم مافيه الخير
انا مش حاطط الجمال هدف بالنسبه ليا انا اهم حاجه عندى الدين والاخلاق بس برضو بيكون فيه قبول وارتياح نفسى وهو ده اللى انا هروح اشوفه وربنا ييسر
اسعدنى موروك ونورت المدونه ياعم المنوفى (يابتاع اعداء الحلف بتاعنا)
ههههههههههههههههه
تحياتى ودمت بكل خير وود
****************
م/الحسينى لزومى
تحياتى
اهلا اهلا برئيس وزراء الحلف الصعيدى
ههههههههههههههههههه
ان شاء الله هروح اشوفها وربنا ييسر
يابشمهندس انا من المحافظة بتاعة سيادتكم (متهيألى قلت لحضرتك قبل كده) وان شاء الله هعمل بوست قريب عن اسيوط وابعته لحضرتك تنزله فى مدونة اسيوط بلدى (بس يارب يعجبك)
ههههههههههههه
اسعدنى مرورك الكريم ونروت المدونه يابشمهندس واعذرنى على تقصيرى فى زيارتك من فترة بس هى الظروف
تحياتى ودمت بكل خير وود
****************
شوشو هانم
اهلا اهلا اهلا باختى الصغيرة القمرايه
تحياتى
حاضر ياستى
بس انا صليت استخارة (سألت عن الصلاة دى وقالولى تتصلى ازاى انا مكنتش اعرف هههههههههههههههههههههههه)
وان شاء الله هروح اشوفها وربنا يقدم مافيه الخير
وانا معاكى انها مش لازم تكون قمر14 بس انا بقول انه لازم يكون فيه قبول بغض النظر عن الجمال من عدمه
قبوووووووووووول وارتيااااااااااح
فهمتى ؟؟؟؟؟؟؟؟؟؟؟؟؟
ههههههههههههههههههه
ايه ده ؟ مش انتِ اختى الصغيرة ؟ ماتيجى تشوفيها معايا ؟؟ هههههههههههه
نورتى ياشوشو
تحياتى ودمتِ بكل خير وود
(ابقى سلميلى على ابى الشمقمق)
****************
والسلام عليكم ورحمة الله وبركاته

zainab يقول...

أخى المعتصم

أيوة كده توكل على الله و روح شوف العروسه و يارب يقدملك الخير يارب
عارف يا معتصم الحته دى لما اتخطبت انا و خطيبى اتكلمنا فيها ( عن الموقف لما تروح تشوف عروسه وهى تشوفك ياترا هتعجبوا بعض و لا لأ ) بس ده الطبيعى أمال يعنى هتشوفها ازاى صحيح ممكن تشوفها من بعيد بس فيه حاجات أهم طبعا لأنك أصلا المفروض حتى تتكلم معاها تشوف تفكيرها و كده يعنى تتعرفوا على بعض

يارب يا معتصم يرزقك ببنت الحلال

تحياتى و سلامى لمصطفى الصغنون

أختك زينب

hamada يقول...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية “رواية سنوية سنقوم بنشرها في الجريدة”
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
أرجوا إرسال مواضيعكم لأختيار الأفضل لنشره العدد القادم
أرجوا ارفاق الاعمال في ملف ورود
لمزيد من المعلومات بادروا بالاشتراك في الجروب الرسمي للجريدة
http://www.facebook.com/inbox/readmessage.php?t=1069922064069&f=1&e=-12#/group.php?gid=78080770039

hamada يقول...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية “رواية سنوية سنقوم بنشرها في الجريدة”
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
أرجوا إرسال مواضيعكم لأختيار الأفضل لنشره العدد القادم
أرجوا ارفاق الاعمال في ملف ورود
لمزيد من المعلومات بادروا بالاشتراك في الجروب الرسمي للجريدة
http://www.facebook.com/inbox/readmessage.php?t=1069922064069&f=1&e=-12#/group.php?gid=78080770039

كيــــــــــــارا يقول...

صلي استخاره وتوكل علي الله

والشكل مش كل حاجه

المهم القبول

ودا هتعرفه من اول لقاء

ربنا معاك

mimi يقول...

ماشي خلاص ... ماتزأش ... عرفنا
حب الفضول قتل القطة

سلامو عليكو

حتى تشرق الشمس يقول...

السلا عليكم ورحمة الله وبركاتة
لولولولولولولولولولوى
الف مبررررررررررررررررررروك
بص انا هقولك بصراحة
انت استخير قبل ما تروح لو ارتحت روح
ولو مرتحتش متروحش
انا افضل انك تروح
وبعدين عاوزة اقولك حاجة
بعد الزواج
الحلوة هتتعود على شكلها وهتبقى بالنسبة لك عادى
والوحشة نفس الشئ
اللى بيبقى هى الاخلاق والروح الحلوة
والالتزام
وخذ نية (فاظفر بذات الدين تربت يداك )
وزى ما تاتا كانت بتقول
من برة هلا هلا و من جوا يعلم الله
خذ بنصيحة مجربييين
وفقك الله الى كل خير
بس اوعى تنسى
الاستخارة الاستخارة الاستخارة
قبل ما تشوفها وبعد ما تشوفها

norahaty يقول...

السلام عليكم ورحمة
الله تعالى وبركاته
يااااااااااأستاذ
المعتصم المنتصر بأذن الله
جايالك من اللاب توب بتاع
اولاد اختى لاجل ما أطمن عليك
ياكبير الحلف الابر ايجيبت :ايه اخبارك؟
رحت المشوار اياك ولا ايشى الموضوع ؟
طمنا ياكبيرررررر الحلفلفلفلفلف :).

أم مالك يقول...

اول مرور على مدونتك
يكون فى الموضوع الحساس ده
على العموم صلى الاستخارة
وتوكل على الله ولوفيها خير لك
وانت فيك خير لها اعلم ان باذن
الله سيجعل القبول
بس انت طلع من دماغك ماسمعته
عن شكلها حتى لاتكون متاثر به
عندرؤيتها وربنا يكتب لك الخير
وابقى طمنا
عاوزين نفرح ياولاد
تحياتى

dreem يقول...

سلامو عليكو
اتكل على الله
بص الشكل ولو انه مهم للبنى ادمين بوجه عام مش الرجالة بس ,, لان العين تعشق كل جميل بس فيه حلاوة بتطغى على حلاوة الشكل وطبعا طبعا انت عارفها .. حلاوة الروح
ودى من وجهة نظرى المتواضعة هى الابقى
حلاوة الشكل بتخضع للمتغيرات انما حلاوة الروح صعب تتغير الا بمصايب هههههه
شد حيلك واتكل على الله وربنا يوفقك
سلامو عليكو

Sweet Violet يقول...

هو انت اتجوزت فعلا و لا ايه ؟؟

فينك يارئيس الحلف سابقا P:

طيب ادخل اقول عملت ايه طمنا عليك

يارب تكون بخير

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
أختى زينب
تحياتى
نورتى المدونة
وابقى سلميلى على عبدالبر
ومصطفى الصغنون بيسلم عليكى
وهتعرفى اللى حصل فى البوست الجديد
تحياتى ودمتِ بكل خير وود
***************
حماده
تحياتى
نورت المدونة بالزيارة
ربنا يسهل وابقى انضم للجروب اللى على الفيس بوك
بس معلش انا مش فاضى شويه اليومين دول
وان شاء الله يكون فيه تواصل
تحياتى ودمت بكل خير وود
**************
كيارا
تحياتى
اهلا اهلا بالناس المشهورين بتوع الجرانين
ههههههههههههههههه
صليت استخارة وعملت كل حاجه
وهتعرفى اللى حصل فى البوست الجديد ان شاء الله
نورتى المدونه
تحياتى ودمتِ بكل خير وود
**************
ميمى
تحياتى
وهو انا برضو اقدر ازق واحده من عاصمة جهنم
دا انا غلبان
ههههههههههههههههه
حلوة حكاية الفضول اللى قتل القطه ده
وهتعرفى اللى حصل فى البوست الجديد
تحياتى ودمتِ بكل خير وود
وعليكم السلام ورحمة الله وبركاته
***************
حتى تشرق الشمس
ام سلمى
اختى الكريمه
وعليكم السلام ورحمة الله وبركاته
ههههههههههههههههههههههههه
ايه الفرح اللى انتِ عاملاه ده ؟؟؟
استخرنا وروحنا
وهتعرفى اللى حصل فى البوست الجديدان شاء الله
تحياتى ودمتِ بكل خير وود
******************
الدكتورة نور
تحياتى
وعليكم السلام ورحمة الله وبركاته
والله تعبتى نفسك
وجايه من اللاب توب بتاع ولاد اختك
دا كتيييييير عليا الحقيقه قوووى
هههههههههههههه
هتعرفى اللى حصل فى البوست الجديد ان شاء الله
تحياتى ودمتِ بكل خير وود
************
أم مالك
تحياتى
اهلا اهلا بحضرتك فى اول زيارة
نورتى المدونة
ومعلش اسف على التاخير فى الرد
بس الظروف بتاعة الشغل اليومين اللى فاتو كانت صعبه شويه
ويارب ان شاء الله ماتكونش دى اخر زيارة
صلينا الاستخارة وتوكلنا على الله وروحنا وحصل .........
اقرى البوست الجديد اللى هينزل وان شاء الله تعرفى اللى حصل
نورتى المدونة بزيارتك
تحياتى ودمتِ بكل خير وود
**************
دريم
وعليكم السلام ورحمة الله وبركاته
تحياتى
اهلا اهلا بيكِ فى اول زيارة
ويارب ماتكونش اخر مرة
بصيت وعارف ان حلاوة الروح هى اللى هتفضل (محسسينى انى هتجوز شبح)
هههههههههههه
هتعرفِ التفاصيل فى البوست الجديد ان شاء الله
اسعدنى مرورك
تحياتى ودمتِ بكل خير وود
*************
سويت هانم
تحياتى
وهو انا اقدر برضو اعملها من وراكم !!!
مش معقوله يعنى
بس هى ظروف الشغل
امتحانات وتصحيح وكنترول ودوشه رهيبه
معلش انا اسف على التاخير
وهتعرفى اللى حصل فى البوست الجديد
تحياتى ودمتِ بكل خير وود
*********
والسلام عليكم ورحمة الله وبركاته

norahaty يقول...

ادينا منتظريين ياأستاذ
المعتصم المنتصر انت لما
نشوف !!بس ايه الحركات
دى البوست الجاى تعرفوا
اللى حصل ؟قصدك ايه ياعنى؟
تعملها حلقات اياك؟مسلسل .؟
طيب ادينا منتظريين بس مش
على نار (بعد الشر علينا)
لكن على الفوتية الوحيد
الصالح للاستخدام الحين
فى الشقة عندى:(
والبركة فى
الاسطى دوووكووو!

بـسـمـــة صـــــلاح يقول...

ايه ده ايه ده
الناس دي كلها علقت وانت امتى حطيت بوست اساسا الرايدر ابن الذين المفتري اللي بيعملها فيا..
دا انت تلاقيك رحت شوفتها وخطبت وخلصت وانا لسه مأخدتش رايي
عملت ايه من ورايا ها
ها
ها
ها

بقى كدا طيب تعالى قولي انك نزلت بوست
لا لا لا من يوم ما غبت الغيبه الطويله ورجعت وانت متغيييير خالص يا استاذ عصومي
ونسيتنا بس على فكره دا انا اللي حسدت نفسي
مرة بقول لشوشو الوحيد اللي عمره مايفوتلي بوست هو المعتصم
هئ هئ هئ شكلي مقولتش ماشاء الله
كتني نيله

المهم بقى
اولا استخارة
تانيا تشوفها
لو حصل قبول صلي بردو استخاره تاني
واتوكل على الله
لو محصلش قبول خلاص
لان دي هتبقى حياه كالمه متكامله
يعني بجد ربنا يعينك على التوهان دا
موقف صعب

ابقى طمني يا باشا
يلا سلاموز بالقشطه واللوز