الأحد، 29 مارس 2009

خبر(المفروض انه حلو)



بسم الله الرحمن الرحيم



السلام عليكم ورحمة الله وبركاته






نايم فى امان الله(لسه يادوب واكل معلقتين رز بس مع الملايكه وهكمل)ولقيت الحاج داخل عليا الاوضه
*الله اكبر اصحى دى الدنيا مقلوبه
- الله اكبر ولله الحمد ومين الحمار اللى قلبها ؟ هو احنا عارفين نعيش فيها وهى عدله؟؟ وبعدين يعنى هى كانت عدله اصلاً ؟؟ انا شاكك فى الموضوع ده
* خبر حلو
- خير القدس اتحررت ؟
* لأ
- يبقى اللى بالى بالك مات وولده مش هيمسك مكانه وانت هترشح نفسك للمنصب؟
* لأ
- هيعملوا كاس العالم 2010فى اسيوط ؟
* لأ
- امال ايه بس ؟
* انت هتتعين
- طارق عامر اتصل بيك وقالك ان العملاء بتوع البنك الاهلى عاملين اضراب بسببى وانهم هيرضخوا اخيرا ويعيينونى ؟
* لأ
- بسسسسسسسسسسس كده يبقى مافيش غير سامح فهمى أكيد طلبك وقالك انه هيعيينى رئيس مجلس ادارة شركة بترول اسيوط صح؟؟
* لأ
- لا اله الا الله (مع دوسه مش خفيفه على طقم الشنان)
* انت هتتعين مدرس
- حسبى الله ونعم الوكيل
* فى مين ياابن ال00000
- مش انت ياحاج ربنا يخليك لينا وهو انا اقدر برضو ,, بس مش كنت سيبتنى نايم احسن ؟؟
* قوم علشان تحضر الورق
- دلوقتى ؟؟ حاضر
طبعا انا نفسى افتكر مين الجزمة اللى قدملى فى المسابقه دى وبعدين ماانا كنت مقدم فى مليون مكان اشمعنى دى اللى رشقت يعنى ؟؟ ولا هو علشان انا بكره التدريس عمى واكتر ؟؟
بصراحه انا مش عاوز اودى الورق ومنفض للعمليه بس الدنيا كلها مغلطانى وابويا زعلان منى بسبب الموضوع ده
مش عارف اعمل ايه ؟؟ بس انا عمرى مااتخيلت نفسى مدرس خالص , وبعدين انا اصلا ماانفعش مدرس نهائياً انا معنديش موهبة وفن توصيل المعلومه حتى لو انا فاهم الحاجه دى كويس خالص مش بعرف اشرح مش كده يبقى حرام ؟؟؟؟؟؟؟؟
حد يشور عليا اعمل ايه
اخلص الورق واقبل الوظيفه دى ؟؟ ولا انفض واكبر دماغى ؟؟
بجد مش عارف


والسلام عليكم ورحمة الله وبركاته

هناك 47 تعليقًا:

د. ياسر عمر عبد الفتاح يقول...

هوه خبر حلو على فكرة
ألف مبروك
يا عم فيه حاجات كثير مبنبقاش متصورين نفسنا فيها ومع ذلك لما بنعملها ونجتهد فيها شوية بنلاقينا ماشيين زى الفل
وبعدين جرب .. هتخسر ايه يعنى؟؟
بجد إن شاء الله هتبقى مدرس كبير قد الدنيا وتدى دروس خصوصية
بس تبقى اعملى ديسكونت لما أجيبلك الواد حمادة ابنى اللى أنا أصلاً لسه مجبتهوش
الف مبروك مرة تانية

د. ياسر عمر عبد الفتاح يقول...

وأول تعليق كمان
ده شىء جميل

ستيتة يقول...

تستخير طبعا
وتخلص الورق فورا
اذا لم تفعل ما تحب فحب ما تفعل زي خالتك ستيتة
نفسها في محل كشري وربنا كتب عليها تدريس في الجامعة

وبعدين يا باشا انا بحجز للبنت دروس تانية ثانوي من دلوقت

خد عندك
مدرسة الأنجليزي بتدي ساعتين ب 30 جنية والحصة فيها 40 تلميذ وتلميذة
يعني الساعتين ب 1200 جنيه
بتدي اربع ايام في السنتر ده
يعني الأسبوع في سنتر واحد بس ب 4800 جنيه

مين قال ان التدريس وخاصة الرياضة مش كويس ده انت الست ام مصطفى دعيالك

انت بس اتعب سنتين تلاتة علشان تفهم الفولة وتدر التمتحانات السابقة
وبعد كده ها نبقى عليك طوابير

ربنا يوفقك
وان كان نفسك في شغل بنك
اقبل دلوقت باللي مقسوم وحاول كتير في اللي نفسك فيه

انا حاجزة للواد عفرتو عندك من دلوقت
ده مطلع حبابي عنيا بره في الماث

هههههههههههههههههههههه
اهم حاجة ان الحاج مدكش بحاجة في نوفوخك وانت بتحسبن ههههههههههههههههههه

المعتصم يقول...

بسم الله الرحمن الرحيم
السلام عليكم ورحمة الله وبركاته
********
د.ياسر عمر عبدالفتاح
تحياتى ياكترة
منور بجد
الله يبارك فيك
بس اعمل حسابك انا برضو مش هسيب الحتة بتاعتى اللى على الرصيف الا اما اخد خلو رجل
ايووووووووووة
دى الناس كلها واخده نص متر وانا بارك على متر وربع يعنى ماينفعش اسيبهم كده بالساهل
لازم اقبض برضو
وكمان ماتفرحش قوى كده علشان حماده
انا مش هبقى مدرس رياضيات
لانهم سابو دبلومة المحاسبه اللى عاملها واخدونى بدملومة الكمبيوتر
يعنى مدرس حاسب لتقع قصدى حاسب الى
على العموم ربنا يسهل واللى فيه الخير هو اللى ربنا هيعمله
نورتنى يادكتور
ومبروك ياعم على اول تعليق
هههههههههههههههه
تحياتى ودمت بكل خير وود
**********
د/ستيته
تحياتى
الدكتور ياسر اخد منك اول تعليق انا ماليش دعوة انتى اللى اتاخرتى
كلهم قالولى خلص الورق وبعدها ربنا يبقى يعدلها ونفس الكلمتين اللى بتقوليهم دول
بس مش عارف
انا يعنى
ماعلينا
اااااااااااااه هو انتى قاعده تحسبيهم
لا ماتخافيش انا مش من دول
انا هتعين مدرس حاسب الى
شكل الدبلومه بتاعة المحاسبه مش مقتنعين بيها وعجبتهم دبلومة الكمبيوتر
يعنى مافيش دروس ولا حصص ولا اى حاجه
هما ال300 ملطوش العمى اخر كل شهر والحمد لله على كده
وطلعت خالتك ام محمد(مش ام مصطفى)كانت بتدعى تقريبا وهى مش متوضيه او كنت انا مزعلها فى حاجه فدعت نص نص
الحاج فوتها مؤقتاً
انما انا عارفه مش بينسى حاجه وعامل زى الجمل بيخزن وعند اول تلكيكه هبقى اقولك هاتى الخيط والشاش والبلاستر وتعالى الحقينى لانهم هنا هيخافو حتى يربطولى الجرح (ده اذا فضل فيه بواقى من النفوخ اصلاً)
بس على فكرة انا وبابا اصحاب خالص
نورتى المدونه يادكتورة
تحياتى ودمتى بكل خير وود
والسلام عليكم ورحمة الله وبركاته

Kiara يقول...

توكل علي الله

تيجي نبدل :)

محمد حويحي يقول...


)':

fnoonh يقول...

استخير ربنااهم شئ وتوكل علية ومش هيخيبك ابدا
اتمنالك التوفيق وربنا يجعلكالافضل
تقبل تحياتي

حسام غانم يقول...

وافق وافق

الشرح ده الواحد بيبقى متخيله صعب بس هتلاقي نفسك كويس

جرب مش هتخسر

رحلتنا في الحياة يقول...

خيااااااااااااااااااانة هتتعين ااقر واحسدك وكمان مدرس انت خريج ايه اصلا قول اعترف دلوقتى حالا انت كمان ليك فى الكوسة
انا هعمل فيك جميل واقدم شكوى اشمعنا يعنى تشتغل وغيرك قاعد يهش وينش :(
هههههههه
لا بجد اتوكل على الله واشوف جو الشغل ايه والتدريس معاك انه رزل ويقرف وحاجة تسد النفس وخصوصا فى اسيوط يعنى الله ينور على العيال ذكاء ذكاء
بس جرب وخصوص ان المعلمين بئا ليهم كادر خاااااااااص
وموضوع انك مش هتعرف توصل معلومة صدقنى دى احساس اى حد وانت فاكر ان المدرسين اللى بيشتغلوا دول بيفهموا مكنش التعليم حاله بئا كده
وعقبال ما اشتغل انا كمان

رحلتنا في الحياة يقول...

انت مدرس ايه صحيح ؟؟؟؟؟؟؟؟؟؟؟؟

mohamed ghalia يقول...

ياعم استخير وسير على بركة الله
لغاية متلاقى حاجة أحسن
ربنا يكرمك وبالتوفيق

د/عرفه يقول...

السلام عليكم
الف الف مبروك
ان شاء الله خير
اظن انك هتكون متميز
وطالما انك بتحب تعبر عن رايك وعن فكرتك
اظن انك هتعرف توصلها برضه للطلبه
استخير ربنا
وان شاء الله هتكون تمام

عمرو جويلى يقول...

حضرة الصعيدى الهمام
السلام عليكم
ألف مبروك يا عم صلاح
مهنة المدرس مهنة راقية
ومهنة ضمير
دمت بيكل الخير

ghorBty يقول...

السلام عليكم

من يتوكل علي الله فهو حسبه

استخير الاول وخد لك نيه في الموضوع وقدم الورق مادام ليس امامك فرصه افضل وان شاء الله تكون فتحه خير

(وعسي ان تكرهوا شيئا وهو خير لكم )

مش كل حاجه نحبها وعايزينها بنقدر ناخدها وساعات كتير ربنا بيرزقنا بشيء احنا مش عايزينه ومش بنحبه وبنستعجب جدا ساعتها ونقول مش معني الحاجه ديه اللي جت وكله لحكمه لا يعالمها الا الله واكيد تقدير الله لنا هو الخير وان كنا لا نري ذلك

ربنا يصلح لكم الاحوال وييسر لكم اللي فيه الخير لكم في الدنيا والاخره

سلام عليكم

موناليزا يقول...

ودى عايزة سؤال طبعا تقبل
هو حد لاقى شغل اصلا اليومين دول
توكل على الله والخيرة فيما اختاره الله
وياسيدى لو احتاجت حاجة احنا فى الخدمة انا بكالوريوس علوم وتربية على فكرة يعنى تربوية وأجيد ممارسة المهنة:)
وبعدين عيب تشتم اللى قدملك فى المسابقة دى ده بدل ماتشكره:)
بص انت تحضر ورقك وتكون مستعد للوظيفة بكل ما اوتيت من قوة وياسيدى لو ماعجبتكش (مش هتسيبها ولا حاجة بس ابقى دور على وظيفة تانية وانت بتشتغلها برضه وبعدين بالتعود هتحبها وهتاخد عليها وعلى الطلبة وهتلاقى الموضوع كويس)
بس عشان ماتاخدش موقف اول اسبوع مش هتبقى طايق نفسك وهتبقى مستغرب الجو وعايز تروح من اول حصة (انا كنت كده:)) ماتقلقش دى حالة عارضة هتزول سريعا


ياااه الف مبروووك وعقبال باقى الشباب

ريمان يقول...

ههههههههههههههههههه


ههههههههههههههههههههههههه

هو حد لاقى تعيين اليومين دول

بس يا رب انا اما اتخرج الاقى تعيين


بس اصلا انت متخرج من كليه ايه ولا نظامك ايه

طب دى فرصه كويسه انا شايفه كده

وخير والله من عند ربنا


انت بس كل اللى مطلوب منك هتشخط شخطتين فى العيال وتضربهم عصايتبن

بس وتزعق زعقتين

وتشد فى شعرك شدتين

ههههههههههههههههههه

دى مهنه سهله خالث خالث


على العموم الف الف مبروك

wesoooooooooo يقول...

يألف نهار أبيض
يألف نهار مبروك
أتكل على الله مدرس مدرس هو حد لاقى
ده حتى قوم للمدرس وافه التبجيل
حد يطول ربنا يوفقك يارب
عاوزين الحاجه الساقعه
ربنا يوفقك يااااااارب

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
ايه كمية القر اللى بتتقر عليا دى ؟؟ ليه كده ؟؟ دا انا بقول عليكم حبايبى يطلع منكم كل ده ؟؟ مكنش العشم
ههههههههههههههههههههههه
***************
كيارا
تحياتى
اوكى انا موافق نبدل
بس لما اعرف الاول انتى بتشتغلى ايه ؟ مش يمكن حاجه بكرهها هى كمان
وبعدين ينفع نبدل واعيش فى بلدنا علشان انا مش بحب زحمة كايرو خالص
صحيح بغيب كده واروح اتفسح كام يوم هناك انما العيشه الدائمة مقدرش ابدا
ههههههههههههههههههههه
نورتينى
تحياتى ودمتى بكل خير وود
***************
عقل مهوى
تحياتى
انا عاوز اعرف انت مبسوط ولا زعلان ولا ايه ظروفك معايا ياعمنا
وعاوز اعرف اكتر مين اللى بيكرهك قوى ده ودلك عليا
انما معنى الوش اللى حاطه ده
انك موافق على الشغل
مش كده برضو ؟؟
طب ايه رأيك وبالعند فيك







هوافق انا كمان
ههههههههههههههههههههه
تحياتى ودمت بكل خير وود
************
فنونه
تحياتى
ونعم بالله
وشكرا على دعواتك الجميلة
نورتى المدونة
تحياتى ودمتى بكل خير وود
**************
د/ حسام غانم
تحياتى يا باشا
على رأيك نجرب ومش هنخسر حاجه
وبعدين ده مدرس حاسب الى يعنى كمبيوتر
مش هتبقى معضلة قوى يعنى
بس اللى غايظنى انى مش هعرف ادى دروس خصوصيه
هههههههههههههههههههههههه
نورت يادكتور
تحياتى ودمت بكل خير وود
**************
ايوشه
تحياتى
وانا بقول زوران من الصبح ليه
وشرقان وطالعه عنيا
كل ده علشان عرفتى
ياساتر عليكى
انا ياستى خريج كلية تجارة بس خدى بالك انا لو ليا فى الكوسه مكنش ده بقى حالى انا دفعة 2001
اشتكى للى عاوزة تشتكيله براحتك خالص احنا ولا بيهمنا ياماما
وكمان على فكرة انا هاخد خلو رجل فى المكان بتاعى على رصيف العاطلين
هههههههههههههههه
عارفه بقى انى مش شايل هم العيال قوى يعنى زى ماشايل هم المدرسين اللى هيبقو معايا فى المدرسه ؟؟؟
طب العيال وغبيه وهحاول اشرحلهم انما اعمل ايه فى المدرسين الاغبياء دول ؟؟؟
انتى هتقرى على الكادر من دلوقتى ؟؟
ارحمينى شويه انا لسه هتعين بعقد يعنى ماليش فى موضوع الكادر ده
خفى شويه ربنا يسترك لاحسن الاقى نفسى فى حضن توك توك بكرة
هههههههههههههههههه
وربنا يكرمك وتشتغلى انتى كمان يارب حتى ترحمينى شويه
ههههههههههههه
انا هبقى مدرس حاسب الى قد الدنيا
هههههههههههههههههههههههههه
تحياتى ودمتى بكل خير وود
***************
محمد غاليه
صديقى العزيز
تحياتى
ونعم بالله
والله دى ارزاق
وانا هحاول وربنا يسهل
نورت المدونة يامحمد
تحياتى ودمت بكل خير وود
***************
د/عرفه
صديقى واخى الحبيب
وعليكم السلام ورحمة الله وبركاته
الله يبارك فيك (ماتفرحش قوى كده انا متعينتش فى قناة السويس)
هو من ناحية متميز انا هبقى متميز جدا
ليه بقى ؟؟
هروح على معاد الحصه بالظبط ومعنديش حاجه اسمها حصه احتياطى ومش عارف ايه وشغل المدرسين ده واللى هيتكلم معايا هوريه العين الحمرا والخضرا والمحمحى كمان
اما عن موضوع توصيل المعلومه ده مش عارف والله ربنا يسترها ومنقصرش
نورت البوست يامحمد
تحياتى ودمت بكل خير وود
***************
اللؤلؤة
صديقى العزيز
وعليكم السلام ورحمة الله وبركاته
الله يبارك فيك ياعمنا
راقيه منين ياعم دول مش لاقيين ياكلو
هو انت فاكر انهم هنا زى المدرسين بتوع بحرى اللى الواحد فيهم بيقفل كل يوم كام الف جنيه ؟؟؟
لا هنا غلابه
وعلى فكرة الضمير بتاع المهنه فى غرفة الانعاش وربنا يستر عليه
هههههههههههههههههههههه
تحياتى ودمت بكل خير وود
***************
اختى غربتى
وعليكم السلام ورحمة الله وبركاته
تحياتى
هو انتى قافله التعليقات عندك ليه؟
ونعم بالله
الله ينور عليكى (وعسى ان تكرهوا شيئا وهو خير لكم )
بجد ربنا يكرمك جبتى من الاخر
وشكرا على دعواتك الجميلة
اسعدنى مرورك
تحياتى ودمتى بكل خير وود
وعليكم السلام ورحمة الله وبركاته
*************
الابله موناليزا
تحياتى
ههههههههههههههههههههههههه
حاضر هقبل
(ماانا معمول عليا حصار هنا وكملت بيكى)
ياستى حصلنا الشرف وفرحانه قوى انك تجيدى ممارسة المهنه ؟؟ غريبه
ماعلينا
بس خدى بالك انتى اللى دبستى نفسك فى المساعدات اللى بعد كده
ههههههههه
وبعدين عيب ليه انى اشتمه
مش انا عرفته
طلع الواد الجزمة اخويا الصغير وطول النهار من امبارح وانا مش راضى اخليه يدخل الاوضه وكل اما اشوفه اقوله ياجزمة ياعميل ياخاين ياوغد
هههههههههههههههههههههههه
وبعدين ماانا اصلا عندى الشغل التانى من دلوقتى وربنا يسهل الامور ويستمر
موضوع انى احب الغلانه دى مااعتقدش انا عارف نفسى كويس
انما هو ممكن اتعود على ضغوطها
الله يطمنك يعنى الاعراض هتزول بسرعه الحمد لله دا انا كنت خايف لتطول تبقى مشكله وكنت عامل حسابى واشتريت مسكن للالم
الا بالحق بقى الشيئ بالشيئ يذكر هو انتى مدرسة ايه بقى بالظبط ؟؟؟
ده لو مفيهاش اى نوع من انواع الاحراج يعنى
والله يبارك فيكى
بس صعب الطلب اللى بتدعى بيه ده
شوفى حاجه اسهل
لانه طول ماالرجاله ماسكين البلد باقى الشباب هيفضلوا كده
حسبى الله ونعم الوكيل
وبعدين مين اللى قالك انى انا شباب
انا خلاص قربت اودع ياخرااااااااابى
ههههههههههههههههههههه
نورتى المدونة
تحياتى ودمتى بكل خير وود
**************
ريمان هانم(طالما عجباكى قوى)
تحياتى
انتى يابنتى جايه تقرى عليا ؟؟؟
ماانا متخرج بقالى 8 سنين من الكليه ومعايا اتنين دبلومه واحده محاسبه وواحده كمبيوتر
بطلى الطبع المهبب اللى فيكى ده وسيبى الناس فى حالها حرام عليكى
ههههههههههههههههههههه
انا خريج كلية تجارة سيادتك
وانا على فكرة تلاته نظام
(اه وحياتك دلوقتى بقيت تلاته نظام)
طالما انك انتى شايفه انها فرصه كويسه يبقى خلاص
انا هسيبها
هههههههههههههههههههههههههههه
الشخط والضرب والزعيق كله موجود وسهل
بس هى اخر حاجه دى اللى صعبه شويتين
حكاية تشد فى شعرك شدتين
(اصل انا بعيد عنك اقرع ومش فاضل فى نفوخى غير حوالى 16 شعره يعنى لو شديت مش هيبقى فاضل حاجه فاانا بقول استنى لحد مااتجوز وبعد كده ابقى اشدهم واخلص منهم بالمرة)
هههههههههههههههههههههه
الله يبارك فيكى
نورتى المدونة
تحياتى ودمتى بكل خير وود
******************
Wesooooooooooo
تحياتى
ايه ده ؟ هو انتى لسه فاكرانى ؟؟
معقوله دى ؟؟
هههههههههههههههههههه
نهار ابيض ونهار مبروك كل ده علشان هبقى مدرس حاسب الى
امال لو كنت اتعينت فى شركة بترول بقى كان هيبقى ايه
نهار محمحى ونهار هيثم(دا اسم الدلع بتاع مبروك)
وبعدين ايه حكاية هو حد لاقى هو حد لاقى دى
انا بسمعها كتير قوووووى اليومين دول
زمان عارضنا بيت الشعر ده وقلنا
قم للمعلم وافه التلطيشا .. كاد المعلم ان ......... ولا بلاش احسن
دا انا خلاص هبقى تبع النقابه بتاعتهم
وبالنسبه للحاجه الساقعه سيادتك دى هتبقى بعد اول قبضيه
هجيب منين دلوقتى ؟؟ ولا انتو عاوزينى استلف واداين ؟؟
ههههههههههههههههههههه
ربنا يخليكى ياوسام
نورتى المدونة
تحياتى ودمتى بكل خير وود
والسلام عليكم ورحمة الله وبركاته

عاشقه الرومانسيه يقول...

اقولك تعمل ايه؟
صلى استخاره
وربنا يقدر لك الخير
وعسى ان تكرهوا شيئا وهو خير لكم

المعتصم يقول...

بسم الله الرحمن الرحيم
السلام عليكم ورحمة الله وبركاته
عاشقةالرومانسيه
تحياتى
اهلا بيكى فى اول زيارة
منورانى
على الرغم من انى كنت زعلان منك بسبب الحركه اللى عملتيها فى كيارا
انما لما اتصالحتو انا فرحت بكده
.....
مافيش قدامى حل تانى غير كده
استخارة وربنا يقدم اللى فيه الخير
وربنا يسهل
شكرا على مرورك ونورتى المدونة
تحياتى ودمتى بكل خير وود
والسلام عليكم ورحمة الله وبركاته

رحلتنا في الحياة يقول...

ايوة ياعم مدرس حاسب الى اه وحاسب تقع كمان
ربنا يوفقك يارب
صحيح سورررررررررى نسيت والله اقول موضوع ان مدونة ماما فراغ مش بتفتح عندك والله نسيت خالص ومش عارفة نسيت ازاى :(
على العموم اكيد هى مش هتزعل ولا حاجة لو زعلت هبئا افهمها انا وحتى لو تزعل مش كفاية عليك الشغل كمان :)

د. ياسر عمر عبد الفتاح يقول...

يا عم روح انت بس وأنا ححجزلك مكانك لحد ما تتصرف
لو الدنيا ظبطت معاك والشغل كان كويس يبقى خلاص .. نشوفك إيجار جديد ولا حتى نبيعهولك .. لو الشغل مزهزهش معاك ترجع تلاقى الرصيف بيتك ومطرحك مستنيك
مع إنى زعلان على فراقك .. دى عشرة رصيف

ريمان يقول...

( وش ميت على نفسه عالارض من الضحك فطسان )



هههههههههههههههههههه

هههههههههههههههههههههههههه


ههههههههههههههههههههههههههههه


ههههههههههههههههههههههههههه


متخرج من اييييييييييه

؟؟؟؟؟؟؟؟؟؟؟؟؟؟؟؟

من كليه تجاااااااااااااااااره

؟؟؟؟؟؟؟؟؟؟؟؟

يالحلولى ياحلولى

حالوا يا حاااااااالووووووووو

طب ازاى متخرج من تجاره وهتتعين مدررررس


انت شكلك كده بتاكل بعقلنا جوافه

MaNoOoSh يقول...

انت لسة نايم يبنى
حرام عليكوا خلصتوا الرز بلبن..
وانا اقول يا ربى كل ما اجى انام ملحقليش حتى معلقة!!!!
يللا قوم حضر ورقك بسرعة وتوكل على الله
محدش عارف يمكن تكون دى بداية لحاجة بتحبها ان شاء الله
ربنا يوفقك ويرزقك بالحلال دايما

خديجة عبدالله يقول...

ألف مبااارك يا أخى الكريم
أى فرصة عمل جوه البلد دى كويس أحسن من بره الغربة مرة اسأل مجرب :(
الحمد لله على كل حال
ربنا يعينك يحسن الطلبة اليومين دووول لسانهم طوووويل جدا :)
بس حضرتك معانا كمدونين بتوصل المعلومة صح يبقى مؤكد إن شاء الله توصلها للتلاميذ
حضرتك طبعا استخير واستشير وإن شاء الله ربنا يقدرلك الخير ويرضيك بيه
واحنا هندعى لحضرتك بالخير إن شاء الله

رحلتنا في الحياة يقول...

شكل رفيق قطع عنك النت :)

المعتصم يقول...

بسم الله الرحمن الرحيم
السلام عليكم ورحمة الله وبركاته
***************
ايوشه بنت خالى
تحياتى
مش هتبطلى قر عليا
حرام عليكى دا انا غلبان ومسكين ومش هتحمل
وبعد كده لو جرالى حاجه هتموتى نفسك من الزعل على ابن عمتك انا عارف
هههههههههههههههه
وبعدين سيادتك نسيتى وهى زعلت وفى البوست اللى نزلته امبارح مااخدتيش بالك من التقريع اللى انا اخدته ولا ايه ؟؟
بس خدى بالك لو اتكرر الموضوع ده انا مش بسيب حقى
اه
عشان بس تبقى عارفه
بعد كده اقولك على الحاجه تعمليها طوالى احسن لك
ههههههههههههههههههههه
وخفى قر عليا شويه الله يسترك
نورتى المدونة
تحياتى ودمتى بكل خير وود
****************
د/ياسر عمر عبدالفتاح
تحياتى
منورنى يادكتره
لا ياحلو عاوزنى امشى واسيبلك الرصيف من غير خلو رجل ؟؟؟؟؟؟؟؟؟؟؟
كان غيرك اشطر
دول متر وربع وعلى ناصيتين كمان
ايه ده
انت مش عارف دول يعملو كام دلوقتى ؟؟
وبعدين اديك شايف اللى بيقعد فيهم ربنا بيكرمه وبيتعاقدو معاه اهه
يعنى انا كده ممكن انزل اعلان واقول على اموضوع ده
تلاقى الناس اتلمت وعملت مزاد علنى عليه علشان ولادهم يشتغلوا
انا علشان انت حبيبى بس والعشرة والعيش والملح
هديك فرصه تانيه انك تفكر
انما بعد كده انا هبقى عملت اللى عليا وعدانى العيب وقزح ست فدادين
هههههههههههههههههههههههه
نورت يادكتور
تحياتى ودمت بكل خير وود
*************
ريمان
نعم نعم نعم نعم ياحلوة اخواتك
(انا اللى هفردلك الملايه والبطانيه كمان هه)
مالها بقى كلية تجارة
ايه مانشبهش ولا مانشبهش
وبعدين هو فيه حد لاقى الجوافه اليومين دول
دا الكيلو بخمسين قرش بحالها
وبعدين ياابله انا معايا دبلومه فى المحاسبه يعنى ينفع اشتغل مدرس رياضيات وكمان معايا دبلومه فى الكمبيوتر ودى اللى هشتغل بيها مدرس حاسب الى

وبطلى لماضه بقى يابتاعة كلية العيال
ههههههههههههههههه
تحياتى ودمتى بكل خير وود
************
منوووووش
تحياتى
هو انتو كلكم عليا ولا ايه
اسيب ابويا تطلعيلى انتى
انتو عدوكم ان حد شافنى نايم
هو فيه اشاعه طالعه عليا انى اسرائيلى ولا حاجه
علشان تعملو فيا كده
يعنى معرفش انام فى البيت ده ولا فى البلد دى 15 ساعه بس على بعض
اعوذ بالله
ايه ده
وبعدين بلاش ظلم انا ماليش تقل قوى على الرز ابولبن
يعنى مش انا اللى خلصته
روحى ارمى بلاكى على حد غيرى
ادينا بنحضر الورق وربنا يسهل واللى فيه الخير هو اللى هيكون
هههههههههههههههههه
نورتى المدونه
تحياتى ودمتى بكل خير وود
**************
خديجه عبدالله
تحياتى
الله يبارك فيكى يااختى الكريمه
(بس يعنى مالكلام كتير ملقتيش غير مبارك يعنى طب مشيها مبروك ولا هو مكتوب علينا انه ينطلنا فى كل حاجه وحالف ليعكنن علينا فى اى مناسبه وخلاص؟؟)
هههههههههههه
وبعدين الغربه مرة صدقنى واسال مجرب ايه الموضوع ؟؟ هو انتى كان جايلك عقد عمل فى كولالمبور ولا ايه ؟؟
الحمد لله رب العالمين
لااااااااااااا مش انا يااختى لسانهم طويل على نفسهم والا بالجزمة على طول واللى مش عاجبه يبقى بالمطوة ونقص له نص متر من لسانه علشان يقصر ويبقى زى الفل وانا وهو والزمن طويل
مش احنا اللى يحصل معانا كده
وبعدين التعبير عن شيئ بتحبه لازم يختلف عن الشرح فى فصل فيه شوية طلبه الله اعلم اذا كانو عاوزين يتعلمو ولا لأ
انا لسه النهارده الصبح واحد قالى اكتب له ورقه فى الشارع وانا بملى البيانات يقولى المؤهل بتاعه دبلوم تجارة انا ازبهليت طب ازاى وانت مش عارف تملى شويه بيانات فى ورقه
حسبى الله ونعم الوكيل
اشكر مرورك الكريم يااختى ودعواتك الجميله وربنا يجازيكى كل خير
نورتى المدونة
تحياتى ودمتى بكل خير وود
*************
ايوشه بنت خالى
وهو رفيق يقدر يعملها الا لو كان النت فاصل من الشركه نفسها
هو عارف العواقب كويس من اخر مرة
ماتقلقيش على ابن عمتك
انا بس كنت فى مشوار برة البيت
وبعدين انا مش برجع من برة الا على الساعه 11.30او 12 كده(بغيظك)
هههههههههههههههههههههههه
تحياتى ودمتى بكل خير وود
والسلام عليكم ورحمة الله وبركاته

رحلتنا في الحياة يقول...

ابن عمتى والله شكلى بعدين هتعود على الكمة ده ههههههههه
ده رابط التاج فى المدونة عندى لاززززززم تحله

http://ayoshaa2.blogspot.com/2009/03/tag-tag-ur-it-22.html

القلم السكندري يقول...

السلام عليكم

كيف الحال ياحضرة الزعيم

وإيه أخبارك ومختفي فين كل ده


شوف يا سيدي الفاضل

انت تروح تخلص الورق الأول ومتضيعش الفرصة وبعد كدة نبقي نتفاهم بقي في موضوع انا انفع ف الوظيفة دي ولا منفعش

وساعتها لو مقتنعتش محدش هيوقلك لازم تروح وتكمل الطريق

لكن لو بعد كدة رأيك اتغير وده وارد هتندم

ومسألة توصيل المعلومة مش موهبة بقدر ما هي فن ممكن اي حد يتعلمه ويجيده


لا تضيع الفرصة

احنا ف بلد كل حاجة بتتفرض عليك تقريباً.. ولو متفرضش عليك نوع الوظيفة هيتفرض عليك ممارسات تانية كتير جواها برده كفيلة بأنك تكرهها


ليا معك كلام كثير


في حفظ الله مؤقتا

Unknown يقول...

السلام عليكم ورحمة الله وبركاتة
الف مبروووووك على الوظيفة
ورأى انك تقبل وتجرب لو عرفت تشرح كويس كمل اما لو معرفتش يبقى خلاص سيبها
ولو عرفت وان شاء الله هتعرف
هيكون دا مدخل كويس جدا انك تطلع لنا جيل مسلم محترم ملتزم من خلال الحاجات اللى هتعلمها للاولاد
ربنا ييسرلك الخير كلة
واقولك استخير وربنا يوفقك ان شاء الله
دمت بكل خير

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
ايوشه بنت خالى
تحياتى
وفيها ايه لما تتعودى عليها
عادى يعنى
هههههههههههههههههه
انا قلتلك انى ماليش فى موضوع التاجات دى
اوك متفقين ولا ايه النظام ؟؟
تحياتى ودمتى بكل خير وود
**************
الصديق الحبيب
والاخ الفاضل
القلم السكندرى
وعليكم السلام ورحمة الله وبركاته
تحياتى يا باشا
ياراجل سيبك من البكش والاونطه بتاعتك دى
انت اللى مش بلاقيك على الماسنجر خالص
الحمد لله رب العالمين الاحوال ماشيه وكده رضا وعال العال
ابتديت فعلا فى تخليص الاوراق المطلوبه وربنا يسهل(ولو ان اكتر حاجه بكرهها هى التعامل مع موظفين الحكومه حاجه كده لاطعم ولا لون ولاشكل بعيد عنك)
واللى فيه الخير يقدمه ربنا
انا بس روحت علشان الوالد مايزعلش وبعد كده تتعدل
.....
وبعدين اديك رجعت اهه تتكلم فى السياسه
يعنى انت مش قادر تبطل
وده معناه انك وافقت ولو ضمنيا على النيابه (بتاعة الحلف ماتفهنيش غلط)
هههههههههههههههههههه
ان شاء الله نتقابل قريب واستمتع بالحديث معاك
تحياتى ياهندسه ودمت بكل خير وود
والسلام عليكم ورحمة الله وبركاته
*****************
حتى تشرق الشمس
اختى الكريمة ام سلمى
تحياتى
الله يبارك فيكى(مش قوى كده يعنى انا مش هستلم فى رئاسة الجمهوريه)
اللى فيه الخير يقدمه ربنا
بس انتى متفائله قووى على فكرة
انا العيال هتجيلى جاهزة يعنى مش هعرف اعلمهم حاجه وربنا يسترها عليا وعليهم
دا انا اللى خايف اتعلم منهم
ههههههههههههههههههه
نورتى المدونة
تحياتى ودمتى بكل خير وود
والسلام عليكم ورحمة الله وبركاته

zainab يقول...

أخى المعتصم

السلام عليكم

شكرا يا معتصم لسؤالك عليا جزاك الله خيرا

معلش اعذورنى قلقتكم بس انت عارف بأه دماغى فيها مليون حاجه بفكر فيها و بالطبع مش مركزه

ادعيلى ربنل يصلح لى الحال و ييسر الأمور

صحيح كيف خال مصطفى الصغنون أخباره ايه ؟؟

أختك زينب

zainab يقول...

أخى المعتصم

بالنسبه لموضوع الشغل صلى استخارة و اللى فيه الخير ان شاء الله ربنا ييسره

تعرف يا معتصم ناس كتير تتمنى تشتغل اليومين دول و تبقى فى وظيفه حكوميه

ربنا يوفقك ان شاء الله

تحياتى

بـسـمـــة صـــــلاح يقول...

السلام عليكم ورحمة الله
طبعا زيارتي متأخرة غصب عني يااستاذ معتصم
وحضرتك لابقيت تطل ولا تسأل مع انك كنت من الناس المنتظمين عندي هئ هئ هئ
المهم بقى
بجد مش عارفه اقولك ايه
بس صلي استخارة
وطيع والدك وطاعة الوالدين سبب للسعادة
ربنا يوفقك وابقى طمنا عنك
سلام عليكم
اختك الصغننه بسومة

ايمان روحي يقول...

هههههههههههههههههههه
ربنا يعين حضرتك بس بجد موقف لا تحسد عليه
سبحان الله
التدريس حضرتك اكيد كنت بتدعي ربنا وانت بتصلي انك تدرس وتبقي مدرس قد الدنيا
متخفش ربنا ماردش دعائك واستجابلك
هههههههههههههههه
ربنا يعينك
بس علي فكرة مهنة التدريس طعمه والله بس تجنن
لم تلاقي حل ابقي قلنا
دي اول زيارة ليه لحضرتك
وانشاءالله مش الاخيرة
تحيـــــأتي

نبض الحياة يقول...

بجد بجد بعتذر لتأخرى فى التعلق لان النت سىء للغاية
ولانى اتعودت اكون فى التعليقات الاولى .
وبالنسبة للخبر دة فهو طبعا حلو جدا
واهم حاجة انك تبدأ باستخارة وتقدم على الخطوة دى واللى فيه الخير يقدمه ربنا لعل هذه الخطوة تكون بداية لما تريد .
وربنا يرزقك الخير حيث كان ويكرمك ان شاء الله .
توكل على الله ..
تحيااااااااتى لك .

المعتصم يقول...

بسم الله الرحمن الرحيم
السلام عليكم ورحمة الله وبركاته
***************
اختى زينب
تحياتى
عامله ايه ؟ يارب تكونى فى احسن الاحوال
ولا يهمك احنا بس بنحب نطمن عليكى
وربنا يكرمك وييسرلك الاحوال يارب

مصطفى الصغنون كويس ولله الحمد
وبقى شقى خالص ومعفرت
ههههههههههههههههههههههه
وارث من ابوه
ههههههههههههههههههه
....
الحمد لله رب العالمين انا كملت الاوراق وخلاص مش باقى بس غير انى ادفع اشتراك النقابه واستلم الشغل الاسبوع اللى جاى
والحمد لله على كل حال
وبعد كده اللى فيه الخير ربنا يعمله
اسعدنى مرورك يازينب
تحياتى ودمتى بكل خير وود
*****************
سمو الاميرة بسمه
وعليكم السلام ورحمة الله وبركاته
انا مابقيتش اطل واعدى عندك فى المدونة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يامفتريه
حرام عليكى
يمكن فيه بوست واحد ولا حاجه بس هو اللى وقع منى
انما انا دايما اى بوست جديد بدخل واشوفه واعلق عليه كمان
حرام عليكى بلاش ظلم
ههههههههههههههههههههه
وبعدين ولا يهمك من التأخير
عادى انا عارف انك مشغوله
والشغل الحمد لله هروح استلم الاسبوع اللى جاى وربنا ييسر الاحوال
نورتى سموك
تحياتى ودمتى بكل خير وود
********************
ايمان روحى
تحياتى
اولا اهلا بيكى فى اول زيارة للمدونة وياريت متكونش اخر زيارة
ثانيا حرام عليكى بقى انا اقول انى بكره التدريس عمى وانتى تقوليلى انى كنت بدعى ربنا انى ابقى مدرس كده بقى فيه اسقاط سياسى فى الجملة دى
افهم من كده ان ربنا بيقبل دعواتى بالمقلوب ولا ايه ؟؟؟؟
ههههههههههههههههههههههههه
وبعدين مين اللى قالك ان مهنة التدريس طعمه ؟؟؟؟ انا سألت قالولى ميلكانا
عموما انا مش بحب الجبنه خالص لا الطعمه ولا الميلكانا
ههههههههههههههههههههههههه
واول ما الاقى الحل اكيد هبقى ابلغك انتى وبسمه صاحبتك
ههههههههههه
اسعدنى مرورك ونورتى المدونة
تحياتى ودمتى بكل خير وود
****************
نبض الحياة
تحياتى
نورتى المدونة
وبعدين بتعتذرى ليه ؟؟؟
عادى يااختى الكريمه حصل خير
كلنا النت بيعمل معانا مواقف بايخه ولا يهمك
المهم انك نورتى المدونة بمرورك
مالناش غير ربنا نتوكل عليه والحمد لله على كل حال
وانا خلصت الاوراق ومش باقى غير اشتراك النقابه هدفعه واروح استلم الشغل الاسبوع اللى جاى ان شاء الله
وربنا يسهل
نورتى المدونة وشكرا على مرورك
تحياتى ودمتى بكل خير وود
والسلام عليكم ورحمة الله وبركاته



تحياتى ودمت بكل خير وود
والسلام عليكم ورحمة الله وبركاته

رحلتنا في الحياة يقول...

انا عديت موضوع التاج بمزاجى بس مكنتش عايزة اعمل دماغ الصعايدة واصر على موقفى بس يلا عفونا عنك وانا ملاحظة انك رغى رغى ولا قولتش انت اشتغلت ولا لسه هتفضل تتكلم كده لغاية ما الوظيفة تروح منك وبعدين تقول انى قريت عليك وحسدتك صح ولا غلط
ومين الولد الصغنون اللى فى ملف التعريف ده عندك ابنك ولا انت وانت صغير ومتقوليش انه ابنك انت متجوز من قبل ما تشتغل :)

المعتصم يقول...

ايوشه هانم بنت خالى
يامراحب يامراحب
اولا نورتى
ثانيا سيادتك انا خلصت كل الاوراق مش فاضل غير انى انزل اسيوط يوم الاحد ان شاء الله واسدد فلوس النقابه وارجع استلم العمل فى مدرسة اعداديه
خلاص ارتحتى
اما الواد الحليوة ده الصغنون
فيبقى ابن اخويا الصغير
واسمه على اسمى( مصطفى )
وانا مش متجوز بس كان ينفع يعنى عادى انى اتجوز من قبل كده مافيهاش حاجه
موضوع الشغل مش هو العقبه اللى تخلى حد فى بلدنا مايتجوزش
بس انا اللى كبرت الجمجمه من الموضوع ده لغاية ماربنا يرزقنى بنصيبى واللى مش عارف هيبقى بطيخه حمرا ولا قرعه
ربنا يسترها
هههههههههههههههههههه
تحياتى ياباشا

رحلتنا في الحياة يقول...

هههههههههههه ربنا يخليهولكم يارب وربنا يوفقك وان شاء الله تكمل نص دينك ومش تكون البطيخة قرعة هههههه بس هفضل اقر بردو لغاية ما اشتغل انا كمان :)

المعتصم يقول...

ايوشه
ربنا يخليكى ويفرح قلبك ان شاء الله
عارفه
لما بقعد العب معاه بنسى اى حاجه تانيه فى الدنيا مهما كانت
ولما بيضحك انا ببقى فرحان وسعيد قووووى كانى انا اللى بيضحك
وااااااااه لما يعيط مش بستحمل وببقى هتجنن لغاية مايسكت
بس هطلعه عفريت
ههههههههههههههههههههههههههه
قرى براحتك ولا يهمك يعنى هتقرى على ايه يااختى
ربنا يكرمك وتشتغلى الشغل اللى نفسك فيه يارب
ســــــــــــــــــــــلام

ايمان روحي يقول...

ههههههههههههههههههه
يــــــــــــــارب تلاقي الحل
بس يـــــــــاخوفي يكون الحل
هو العــــــمـــــــــل
بجد هتبقي مدرس محصلش
ههههههههههه
بس بجد يارب تطلع منها علي خير
ويتحقق حلمك
وتفتك منها وربنا يرزقك بالشي اللي بتحبوا
امــــــيــن
ولازم طبعا تحكيلنا اخر التطورات
هههههههه
وبسمه تحكيلي او انا احكيلها
بالتوفيق
تحيــــاتي

حسام غانم يقول...

السلام عليكم

ازيك يا معتصم

ليك تاج عندي

المعتصم يقول...

بسم الله الرحمن الرحيم
السلام عليكم ورحمة الله وبركاته
*************
ايمان روحى
تحياتى
اهلا بيكى
منورة المدونة
هو لغاية دلوقتى الحل هو العمل فعلا
ومش لاقى حاجه غيره
وانا عند وعدى
اول ماالاقى حل غيره هبلغك على طول
اسكتى دا انا هبقى حتة مدرس ياخراااااااااابى ماليش حل
عمرك شوفتى مدرس مايعرفش يدرس ازاى ؟؟
وكمان مش عارف كشكول التحضير يتكتب فيه ايه؟؟؟؟؟؟؟؟
وبعدين انا مش بحب دوشة العيال
والمصيبه بقى انى هبقى مدرس اعدادى
يعنى الطلبه بتوعى فى ارخم سن خلقها ربنا
هههههههههههههههههههه
دا ضحك الغيظ
هههههههههههههههههههه
شكرا على دعواتك الجميلة
وربنا ييسر الاحوال
واكيد طبعا هحكى على الاحداث اللى هتحصل
ده مش بعيد اعمل حلقات تدوينيه واسميها يوميات مدرس
هههههههههههههههههههههههههه
والنبى فكرة
على فكرة اجاباتك على التاج جميلة خالص
نورتى المدونة واسعدنى مرورك
تحياتى ودمتى بكل خير وود
******************
د/ حسام غانم
تحياتى
منور المدونة يادكترة
بس للاسف ياباشا
انا مش بتاع تاجات انا
كان غيرك اشطر يامعلم
التاج ده جانى حوالى 6 مرات وانا رفضت اجاوبه يبقى دلوقتى لو جاوبت عليه منك ناس كتير هتزعل وانا ياعم محبش حد يزعل منى
سماح بقى يادكتور
(مين سماح دى ؟؟ تعرفها؟؟)
هههههههههههههههه
تحياتى ودمت بكل خير وود
والسلام عليكم ورحمة الله وبركاته

zainab يقول...

أخى المعتصم

السلام عليكم

على فكرة انا نسيت أقولك من فترة كده نزل عندنا فى دمياط مسابقة تعيينات و وظائف و أخدوا كل خريجى تجارة اللى عندنا بس عارف اتعينوا ايه مدرسين حاسب ألى فى المدارس

هو انت صحيح هتدرس ايه ؟؟؟؟؟

تحياتى و دعواتى لك أخى بالتوفيق و النجاح و سلامى لمصطفى الصغنون ربنا يحميه و يبارك فيه

♥..~*شـــوشـــو هـــانــم*~..♥ يقول...

السلام عليكم ورحمة الله وبركاته
طبعا مش محتاجه تفكير نفض للموضوع واوعى تخلص ورق ولا بتاع هو حضرتك عايز تخرب شباب الأمة ازاي يعني توقف تدرس لالالالالالالالا انا مش قادرة اقبل الفكرة نهائيالا بجد يعني انا اخاف على مستقبل اللي انت هتدرسهم
نياهاهاهاهاهاها غلاسة زي السكر صح

احم نتعدل بقى
شوف هوا مفيش غير حل واحد اللي هو انك تصلي استخارة واللي يحصل هوا اللي فيه الخير لانك في الصلاة دي بتستشير ربنا وطبعا ربنا مش هييسرلك حاجة وحشة
(تعرف صلاة الاستخارة ولا لاء؟)
***********
وبالنسبة لسؤال البوست اللي فات لسا مفكرتش فيه كويس بس باذن الله هجاوبك عليه متخافش

يلا سلام مأنكج مشنكح متنح..

المعتصم يقول...

بسم الله الرحمن الرحيم
السلام عليكم ورحمة الله وبركاته
************
اختى زينب
وعليكم السلام ورحمة الله وبركاته
تحياتى
هى هى نفس المسابقه يازينب وهى هى برضو نفس الوظيفه
يعنى هيشغلونى بتاع اناشيد مثلا
هبقى اسطى حاسب الى
ومرسيه خالص على دعواتك وعلى سلامك على مصطفى الصغنون
ربنا يكرمك ويوفقك يارب وييسرلك كل الامور
(هو الفرح امتى يازينب؟؟؟)
تحياتى ودمتى بكل خير وود
****************
شوشو هانم لماضه
وعليكم السلام ورحمة الله وبركاته
بقى مش عاجبك انى ابقى مدرس ؟؟؟؟؟؟
طب بالعند فيكى هخلص الورق واستلم هه
دا انا هبقى مدرس ماليش زى
وابقى شوفى الشباب العبقرى اللى هيطلع من تحت ايديا
على الاقل هيبقو اشطر منك
وبعدين هو كل حاجه تقريبا خلصت خلاص ومش باقى غير انى اسدد فلوس النقابه بكرة فى البنك وبعدها اروح استلم مهام الوظيفه
واخبطى دماغك فى اتخن حيطه عندكم
ههههههههههههههههه
وبعدين يعنى هو انتى هتعملى فيها ام العريف قال لسه مافكرتش قال يعنى هتجيبى التايهه
طب ادينى مستنى لما اشوف هتقولى ايه ؟؟
ولو انا عارف انه هيبقى كلام فاضى(وش بيطلع لسانه)ههههههههههههههههه
تحياتى ودمتى بكل خير وود
والسلام عليكم ورحمة الله وبركاته