الثلاثاء، 24 مارس، 2009

إعتذار

بسم الله الرحمن الرحيم
السلام عليكم ورحمة الله وبركاته
اولا بعتذر لكل اللى دخل المدونة وسأل عليا وبشكره
بس النت كان عامل عمايله عندنا وفاصل من البلد كلها تقريبا
ويادوب لسه شغال من ساعات بسيطه
ومعلش سامحونى انى هغيب كمان كام يوم
لانى مسافر قاهرة المعز لدين الله الفاطمى بعد شويه وهاخد قطار الفجر
وادعولى ربنا ييسرلى الاحوال وارجع بسرعه
احسن انا مش بحب الزحمة بتاعة القاهرة خالص
تحياتى للجميع
والسلام عليكم ورحمة الله وبركاته

هناك 22 تعليقًا:

القلم السكندري يقول...

بسم الله الرحمن الرحيم

السلام عليكم ورحمة الله وبركاته

أيها السيدات والسادة.. التعليق الأول يأتيكم من القلم السكندري



إزيك يا حج

كيفك ياسيدي وفين ايامك

عاش من شافك


وبعدين لا سؤال ولا حتي جواب وعمال ابعت لك وانت ولاااااااا هنا

ماشي عموما لما ترجع بالسلامة بقي ان شاء الله يبقي ليك حساب عصيييير معايا ان شاء الله


يلا تروح وتيجي بالسلامة ان شاء الله

وغض بصرك شوية الا مش عارف بنات القاهرة حلوين شوية اليومين دول

في حاجة غريبة في الجو

mohamed ghalia يقول...

فى إنتظارك دوما
ترجع بالسلامة

MaNoOoSh يقول...

هييييييييييييييييييية
المعتصم جاى يعنى هاكل الشنجوتش اخيرا
هههههههههههههه
ان شاء الله توصل بالسلامة يا معتصم وترجع بالسلامة كمان وتكتبلنا موضوع جديد

norahaty يقول...

تروح وترجع بالسلامة
ياأستاذ معتصم
وانا كمان
رايحة
الشغل اهوة
فى سلامة الله انا وانت
وكل مسافر إن شاء الله
فى ارض الله الواسعة .
(هات لنا حاجة حلوة معاك من البندر
اه انا بقولك اهوه والا مش حيحصل طيب)

اصحى يا مصر : اسلام ديو يقول...

ايه ياعم معتصم
تروح وتيجى بالسلامة
متنساش تجيبلنا معاك حاجة وانتا جاى :d
تبقى تعالى عدى بس سلم على طروق لما ترجع
سلامى يا جميل

د. ياسر عمر عبد الفتاح يقول...

طيب دلوقت نقولك حمد الله على السلامة
ولا تروح وتيجى بالسلامة
مش عارف بقى؟؟
على العموم ربنا يوفقك وييسرلك الحال
انا برضه على فكرة بتخنق من القاهرة جداً جداً .. ومبقدرش أقعد فيها أبداً

fnoonh يقول...

اوه كمان هتغيب
يلا ان شاء الله ترجع بسرعة
ناطرينط اخي
يعني مستنينك على قول اللبنانيين
يلا ربنا يعينك في سفرك وتروح سالم وترجع غانم باذن الله
تحياتي وتقديري
فنونة

موناليزا يقول...

عودا احمدا
وتروج وتيجى بالسلامة ان شاء الله

عجبتنى قاهرة المعز لدين الله الفاطمى دى هو انت ناوى تروح القلعة ومش عايزنا نعرف:)

نبض الحياة يقول...

طبعا تيجى بالسلامة .
واحنا فى انتظارك.
دمت بكل خير .

ريمان يقول...

بقى الموضوع كده

وانا اللى فكرتك تقلان علينا

ومش عايز تعبرنا

ومش عايز تدخل مدونتنا

وانا قولت بقى اسيبك براحتك

هههههههههههههههههه


طب كويس اننا اطمنا عليك

وتروح وترجع بالسلامه ان شاء الله


ابقى طمنا عليييييييييييييييييك


سلم لى على ........ ولا بلاش بقى

ايوشة يقول...

ايون وانا اقول مش ظاهر ليه تروح وترجع بالسلامة اما موضوع النت ده تؤتؤ مش بيقطع عندى الحمد لله ولو حصل ممكن ابهدل شركة النت مفترية انا

القلم السكندري يقول...

السلام عليكم

ايه ياحج انت عجبتك القاهرة لزقت هناك؟؟

ده انا روحتها مرتين وجيت بعد البوست ده


شعبك العزيز مستنيك علي أبواب المدونة

بس خليبالك حد يغتالك ولا حاجة

المدونة مش متأمنة

د/عرفه يقول...

السلام عليكم
بتوحشنا يا عم
انت لما صدقت خرجت من الصعيد ولا ايه
هو مفيش نت فى القاهره
المهم يارب ترجع لينا بالسلامه
ومطولش اوى كده هناك

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
صديقى واخى الحبيب
القلم السكندرى
وعليكم السلام ورحمة الله وبركاته
ايها السادات والساده شرفنا بأول تعليق النهارده المهندس الهمام ونائب رئيس حلف ابر ايجيبت
الله يسلمك ياعمنا
بس انا مش مقصر انا مش لاقى سيادتك خالص
وبعدين سيادتك المفروض عارف الظروف وعارف ان الحلف بيتحارب من كل الجهات ومن ضمن وسائل الحرب محاولة قطع وسائل الاتصال بالقاعدة الجماهيريه العريضه
بس هيهيات وحياتك انت ظبطت رفيق بتاع النت (العميل)هههههههههههههه
بس ياريت العصير يكون تفاح او مانجه فريش لانى مش بحب المواد الحافظة
وشكرا على دعواتك يا باشا
بس موضوع غض البصر ده تقوله ليهم هما مش ليا انا اصل .......... ولا اقولك هبقى اقولك بعدين دى اسرار عسكريه انت عارف العدو ممكن يستعملها ضدنا
هههههههههههههههههه
نورت ياهندسه
تحياتى ودمت بكل خير وود
****************
صديقى العزيز محمد غاليه
تحياتى
الله يسلمك
عارف لو كان فيه فرصه انا كنت اتمنى انى اقابلك واتعرف عليك
انما تتعوض فى مرة تانيه ان شاء الله
نورت يامحمد
تحياتى ودمت بكل خير وود
*****************
منوووووووووووش
تحياتى
بقى دى عمله تعمليها برضووووووووووو
لأ لأ لأ لأ بجد انا زعلان منك
بقى اقف استناكى عند جاد ساعه الا ربع ومتجيش ؟؟؟؟؟؟؟؟؟؟
فى الاخر طبعا اضطريت انى اكل الشنجويتش بتاع الشاورمه بنفسى وعلشان الشنجويتش كانت حالته النفسيه تعبانه فقلت اجيبله اتنين كبده اسكندرانى يصبروه شويه
بس بجد مالكيش حق طب لما انتى كنتى شبعانه ماقولتيش ليه بس ؟؟
هههههههههههههههههههههههههه
الله يسلمك
وان شاء الله هنزل بوست جديد فى اول فرصه
بس اريح شويه
نورتى المدونة
تحياتى ودمتى بكل خير وود
*****************
Noahaty
ازيك يادكتورة
الله يسلمك
بس دى حركه برضو ؟؟؟
يعنى اروح عندكم ومافيش حتى عزومة مراكبيه على كوباية شاى مش غدوة
ياساتر ايه البخل ده ؟؟
تروحى الشغل(كل يوم)وترجعى منه بالف سلامه ياستى ان شاء الله
انا جبت الحاجه الحلوة من عند البحصلى ابقى تعالى بسرعه الحقى منابك
ههههههههههههههههه
تحياتى ودمتى بكل خير وود
****************
صديقى العزيز اسلام
تحياتى
الله يسلمك ياعمنا
تعالى خد منابك بسرعه من الحاجه الحلوة قبل ماتخلص
وان شاء الله جااااى علشان اشوف طروق واسلم عليه
نورت المدونة يا باشا
تحياتى ودمت بكل خير وود
*****************
د/ياسرعمرعبدالفتاح
تحياتى
يادكترة مش فارقه قول اى حاجه تعجبك
وشكرا على دعواتك
هى القاهرة جميلة جدا
بس انا بعيد عنك مش بطيق الزحمة بكرهها عمى
على الرغم من انى عشت فيها سبع سنين
ههههههههههههه
نورت يادكتور
تحياتى ودمت بكل خير وود
****************
فنونه
تحياتى
معلش دول كانو يومين كده وفى مشوار ضرورى شويه
واهو ياستى اعتبريهم اجازة
شكرا على دعواتك الجميلة
تحياتى ودمتى بكل خير وود
***************
اختى الكريمة موناليزا
تحياتى
الله يسلمك
اه ماهو انا يا إما اقول عليها قاهرة المعز لدين الله الفاطمى يا إما اقول عليها كايرو
اصل انا مخالف بعيد عنك
تصدقى عشت فى قاهرة المعز لدين الله الفاطمى سبع سنين وعمرى ماروحت القلعه !!!!!!! ومش عارف السبب على الرغم من انى نفسى اروحها خالص
يلا ماعلينا ربنا يسهل وابقى ازورها ان شاء الله
اقولك انا هبقى انظم رحله للقلعه للمدونين ونروح زيارة جماعيه
ايه رأيك ؟؟
ههههههههههههههههه
نورتى المدونه كلها
تحياتى ودمتى بكل خير وود
*****************
اختى نبض الحياة
تحياتى
شكرا على مرورك ودعواتك الجميلة
الله يسلمك
نورتى واسعدتنى زيارتك
تحياتى ودمتى بكل خير وود
****************
ريمان
تحياتى
اه الموضوع كده
وانتى دايما ظالمانى
وطبعا شايله فى نفسك منى علشان الموضوع اللى بالى بالك
وطبعا بتطلعى عليا اشاعات
ماشى ماشى
هههههههههههههههههه
وبعدين انا مااقدرش اتقل عليكى ياريمان وانا شوفت البوستين الاخيرين بس ماكنش فيه وقت انى اعلق عليهم ليس الا
....
الله يسلمك
وهبقى اقول للى بالى بالك انك بتسلمى عليه ههههههههههههههههههههههه
نورتى
تحياتى ودمتى بكل خير وود
**********************
ايوشه بنت خالى
منورة البلد كلها مش بس المدونة بتاعه اخوكى
طب لما انتى شايفه انى مش ظاهر اخطفى رجلك لبلدنا واسئلى عليا يمكن اتطخيت ولا حاجه
دى كلها فركة كعب يعنى حسبة ستين سبعين كيلو كده
طبعا من حقك تبهدلى الشركه فيخافو يقطعو عنك النت
انما انا غلبام ومسكين وواخد وصله من الواد رفيق فبيعملو فيا اللى هما عاوزينه
انما لينا رب برضو بيخلصلنا حقنا
واهو برضو رفيق بياخد اللى فيه النصيب
هههههههههههههههههههههه
نورتى
تحياتى ودمتى بكل خير وود
*****************
القلم السكندرى
صديقى الحبيب
ياعم هو انا لحقت اروح ؟؟؟ طب انتو بينكم وبينها يادوب ساعتين يعنى طاخ طاخ تروح وتخلص مشاويرك وترجع
انما احنا ناس غلابه بينا وبين القاهرة دى ست ساعات سفر يعنى بعيد عنك وعن السامعين شحططه وبهدله
بس الحمد لله عدنا الى مقر الحلف سالمين وفشلت كل المحاولات الاثمه لاغتيالى ومش عاوزك تقلق عمر الشقى بقى
هههههههههههههههههه
وانا عامل حسابى وجايب ناس تأمن المدونة من غير ماحد يعرف
بس انت ماتقولش لحد
****************
د/عرفه
وعليكم السلام ورحمة الله وبركاته
والله يادكتور وانتو كمان بتوحشونى قوى وربنا اللى يعلم
انما هى الظروف
والحمد لله على كل حال
اما موضوع النت فى القاهرة ده فانا مش بحب ادخل سايبر نت لانى مش ببقى واخد راحتى فيه وبيكون فيه متطفلين كتير خالص وعلشان كده مش بحب اروحه
والحمد لله رجعت اهه
تحياتى يادكتور ودمت بكل خير وود
والسلام عليكم ورحمة الله وبركاته

norahaty يقول...

السلام عليكم ورحمة
الله تعالى وبركاته
وحمدلله على السلامة
ياأستاذ معتصم
معلش يعنى بردون
كلمة على جنب كده
(هو البحصلى ده بتاع ايه؟)
ده يبقى قريب (الاصمعى)ولد عمه يعنى؟
معلش احنا بنسأل ونستفهم يعنى!

اللؤلؤة يقول...

حضرة الصعيدى الهمام
سلام الله عليكم وبركاته
تروح قاهرة المعز وترجع بالسلامة وربنا يصلح لك حالك وأ هكون بإنتظارك على محطة القطار وإنت راجع بالسلامة إن شاء الله

zainab يقول...

السلام عليكم و رحمة الله بركاته

أخى المعتصم

كيف حالك ؟

ان شاء الله تيجى بالسلامه و يارب ييسر لك الأحوال

تحياتى

الشيماء صلاح*shosho* يقول...

السلام عليكم

سبحان الله التعليقات عند بعضيها
كنت لسا جاي اقول لحضرتك مفتقدينك ووحشتني تعليقاتك عندي
بفتح لقيت "المعتصم الشرير" قلت مش معقول انا وبسمة لسا جايبين في سيرتك(مزورتش ولا حاجه؟)
وعلى فكرة انا قريت البوست بتاع حضرتك دا اول ماحطيته بس مكنتش فاضية اعلق
عالعموم تروح وترجع بالسلامه وربنا يكفيك شر الزحمة.. دا يعتبر اول تعليق معنويا لاني كنت هعلق اساسا بس زي ماقلت لحضرتك مكنتش فاضية

دمت في زحمة اصدي كما تحب..
تحيتي..

*عجبتني اوي اوي اوي "كمان كام يوم لانى مسافر قاهرة المعز لدين الله الفاطمى"
ماشاء الله مخلص في ذكر الاسماء

الشيماء صلاح*shosho* يقول...

ملاحظتش حاجة في الكومينت اللي فات
كل كلمة كتبت فيها "حضرتك"
ومتبتش ولا"هههههههه"
دا ان دل على شيء فانما يدل على اني خلاص بقيت رزينة وعاقلة (مش دائما طبعا مؤقتا)


سلام مشنكح..

المعتصم يقول...

بسم الله الرحمن الرحيم
السلام عليكم ورحمة الله وبركاته
************
Norahaty
ازيك يادكتورة
وعليكم السلام ورحمة الله تعالى وبركاته
الله يسلمك يادكتورة
لأ بردونك معاكى
البحصلى ده واحد واقف بعربية زلابيه فى شارع مصدق فى الدقى وهتلاقى جنب منه العبد بتاع البليله فى وش عمك طلعت مصطفى البنا
يعنى حاجه لوكل كده طبعا مالكيش دعوة بيها
بس ايه ده بسم الله ماشاء الله عليكى
نبيهه فعلا
عرفتى منين انهم قرايب الاصمعى ؟؟؟
بس هما مش ولاد عمه هما يبقو ولاد خالته لزم
هههههههههههههههههههه
اسألى براحتك مافيش اى مشاكل
تحياتى ودمتى بكل خير وود
*****************
اللؤلؤة
صديقى العزيز
وعليكم السلام ورحمة الله وبركاته
الله يسلمك ياغالى
بس انا رجعت من امبارح
(ابقى ركز شويه ياعم عمرو)
انا رجعت من غير ماتعرف علشان مااتعبكش معايا وتستنانى على المحطه وكده هههههههههههههههههههههههههه
نورت ياعمنا
تحياتى ودمت بكل خير وود
*****************
اختى زينب
وعليكم السلام ورحمة الله وبركاته
عروستنا الجميلة
تحياتى
انا الحمد لله يااختى الكريمة
الله يسلمك والحمد لله انا رجعت بلدنا
صحيح المشوار اللى كنت رايح له فشل فشل ذريع انما الحمد لله على كل حال وانا مبسوط لانى عملت اللى عليا
ربنا يكرمك يازينب ويفرح قلبك
نورتى المدونة
تحياتى ودمتى بكل خير وود
***************
شوشو هانم (لماضه)
وعليكم السلام ورحمة الله وبركاته
سبحان الله
بقى بتفتحى لقيتى المعتصم الشرير
ماشى ماشى
وكمان ماشى
وبعدين انا ضد الزوران ياماما
بس تعالى هنا
انتى وبسمة بتجيبو فى سيرتى ليه؟؟ وبتقولو عليا ايه ؟؟ اعترفى احسن لك
قولى بدل ماانتى عارفه انا ايدى طارشه
انتى حره انتى اللى جبتيه لنفسك هه

طبعا سيادتك ماكنتيش فاضيه تعلقى من غسيل الصحون ههههههههههههههههههههههههههههههههههه
بس انا ياشاطرة روحت ورجعت والحمد لله
على فكرة انا مش بعرف ادخل نت غير من على جهازى الشخصى لانى بحس وانا فى السايبر ان كل اللى قاعدين بيبصو ويقرو اى حاجه انا بكتبها وانه مافيش اى خصوصيه خالص
بس برضو مش اول تعليق ليكى
لا معنويا ولا ماديا
وماتحاوليش
قاهرة المعز لدين الله الفاطمى شوفتى الضمير ؟؟؟؟
ههههههههههههههههههههههههه
.............
تصدقى كده ممكن تتحسدى
كل كلمه كاتبه حضرتك حضرتك
لالالالالالالا كده كتير عليا
بس اقولك على حاجه برضو مهما حصل هتفضلى شعنونه ومجنونه
يعنى يافرحتى انا بحضرتك وانتى قبلها كاتبالى المعتصم الشرير
وكمان انا عارف انه حتى ولو عقلتى دا هيكون وضع مؤقت ومش هيستمر كتير اصل انا عارفك كويس ياشعنونه
وايه السلام المشنكح ده ؟؟ دا طالع جديد يعنى ولا ايه؟؟ ماعلينا
بس على فكرة حلوة الصورة الجديده احلى من اللى فاتت
تحياتى ودمتى بكل خير وود
والسلام عليكم ورحمة الله وبركاته

norahaty يقول...

السلام عليكم ورحمة
الله تعالى وبركاته
وصباح الخير يافندم
(صحيح المشوار اللى كنت رايح له فشل فشل ذريع انما الحمد لله على كل حال وانا مبسوط لانى عملت اللى عليا)
معلش استاذ معتصم خيرها فى غيرها
إن شاء الله تعالى .استبشر خيراً
بأذن الله ويعوض الله.

المعتصم يقول...

بسم الله الرحمن الرحيم
السلام عليكم ورحمة الله وبركاته
ازيك يادكتورة نورا
وصباح النور
(ايه اللى مصحيكى لغاية دلوقتى؟؟)
لأ عادى المشوار فشل فشل ذريع دى مش مشكله خالص يعنى
المهم انا الحمد لله مقتنع انى عملت اللى عليا والحمد لله وكل اللى يحصل بعد كده خير
شكرا على مرورك يادكتورة ونورتى
تحياتى ودمتى بكل خير وود
والسلام عليكم ورحمة الله وبركاته