الثلاثاء، 3 مارس، 2009

بحبك يامصر




بسم الله الرحمن الرحيم

السلام عليكم ورحمة الله وبركاته
بما اننا فى شهر مارس والشهر ده فيه عيد الام فأنا حبيت اننا نتكلم عن حب الام شويه
بس انا مش هتكلم معاكم عن الام اللى هى الام الفعليه
انا هتكلم عن الام المجازيه اللى هى بلدنا الغاليه مصر
عاوزين نتكلم عن حب مصر
مصر اللى عشنا وهنفضل عايشين فيها طول حياتنا
مصر اللى اتربى فيها اهلنا وكبروا فيها وربونا فيها
مصر اللى نفديها بحياتنا ودمنا
مصر اللى ربنا ذكرها فى القرآن وكرمها وفضلها عن كل بلاد العالمئ

مصر اللى كانت القائد للعرب وهتفضل كده على طول
مصر اللى العالم كله بيتمنى انه يكون مكانها ومنها
مصر اللى علمت العالم كله الرقى والحضارة
مصر اللى كانت منارة العلم
مصر ارض النيل
مصر التاريخ
مصر اللى طلع منها اعظم واكبر العلماء والمفكرين والادباء
مصر دى حاجه كبيرة خالص
ليه بقى انا حاسس ان حبها قل فى قلوبنا؟؟؟؟؟
لانى بصراحه فى الفترة الاخيرة ملاحظ ان فيه شباب معندهاش الحب لبلدها
وأى حد يسافر برة او يعرف حد سافر برة ورجع اتكلم معاه شويه
تلاقيه بيقول شعر فى بلاد بره
وبيقول ما قاله مالك فى الخمر فى مصر ويبدأ يقارن بقى
الشوارع هناك نظيفه وهنا الدنيا كلها زباله
الناس هناك بتتعامل بكل احترام وادب وذوق
والناس هنا بعيد عنك عاوزة تتحرق بجاز
المواصلات هناك سهله ومريحه
وهنا ياساتر يارب قرف وتعب وحاجه فظيعه
المصالح الحكوميه هناك حاجه زى الفل
وهنا الروتين والرشاوى والفساد
الاسواق هناك فيها كل حاجه متوفرة ورخيصه
وهنا بقى احتكار وغلا وبلا ازرق
وغيره وغيره كتييييييييييييييييييير
وكأنه لما كان عايش هنا مكنش عارف كل الحاجات دى
وكأنه مكنش واحد من الناس اللى وصلت بمصر للحال ده
وكأن مصر دى حاجه وحشه ومفيهاش اى حاجه كويسه
وبعد دا كله يقول انه بيحب بلده بس يعنى لو تنظف شويه
بس يعنى لو يبطلوا الحاجات الوحشه اللى فيها
بس يعنى لو يوفرو فيها الزبده اللورباك والقشطه المش عارف ايه
بس يعنى لو العربيات اللى ماشيه فى الشوارع تبقى كلها حديثه
وبس وبس وبس
فين الحب ده ؟؟؟؟؟؟؟؟؟؟؟؟؟
صحيح فيه عيوب كتير فى بلدنا
بس مين السبب فى العيوب دى ؟؟؟
مش احنا ؟؟؟؟
حتى ولو كان بشكل غير مباشر ؟؟
احنا بسكوتنا على الفساد وعلى كل حاجه وحشه
احنا بقبولنا للوضع اللى احنا فيه
احنا بكسلنا وعدم عملنا على التغيير للاحسن
احنا بعدم اللامبالاة اللى عايشين فيها
احنا بنظام الفهلوة اللى مش بنشتغل الا بيه
احنا بعدم العمل بتعاليم ديننا الحنيف والحرص عليه
احنا بمحاولة تقليدناالاعمى للغرب
احنا باستهتارنا وتسيبنا
وبعدين لو بصينا للبلاد التانيه دى هنشوف ايه ؟؟؟؟
الناس اللى هو بيتكلم عليها دى بتشتغل واى تقصير يقابله عقاب
فيه قانون الكل بيحترمه ومافيش فهلوة
هو لما يقعد يتكلم عن الرزق والشغل يقول انه هناك المعايش صعبه والفلوس اللى بيكسبها دى بيدفع بدالها من دمه واعصابه
طب مااحنا لو عملنا ده هنا فى مصر بلدنا
احترمنا القانون
حافظنا على نظافة الشوارع
احترمنا بعض
بطلنا فهلوة وتزويغ
راعينا ربنا فى شغلنا
لو كل واحد فينا عمل اللى عليه وحب البلد بجد من قلبه
هنبقى اعظم بلد
هنرجع مجدنا الغابر وحضارتنا البائده
انا مش عاوز كلامى يبقى كلام انشا ومن نوعية الخطب والمواعظ
انا عاوز نتكلم مع بعض ونحاول نفكر فعلا فى حلول عملية
يمكن نقدر من خلال كلامنا اننا نتوصل لحاجه تنفعنا وننفع بيها بلدنا
ومش عاوز حد يزعل من كلامى ويفتكر انى بتهمه بعدم حب البلد
لأ والله
انا اللى خلانى افكر اكتب الموضوع ده
حالة عدم الانتماء اللى شوفتها عند شباب كتير
لما نتكلم ونقول كلمة مصر الاقيه قال مصر ايه ياعم
هو احنا شوفنا منها ايه كويس
لاتعليم ولاشغل ولاعيشه ترضى ربنا
سخط وكره وبلاده فى المشاعر
ليه دا كله ؟؟
ياريت تشاركونى التفكير فى الموضوع ده


تحياتى ودمتم ودامت مصرنا الغاليه بكل خير وود وسعادة

والسلام عليكم ورحمة الله وبركاته

هناك 58 تعليقًا:

المعتصم يقول...

بسم الله الرحمن الرحيم
التعليق الاول ده
محجوز لشوشو هانم
علشان تعليقها الاخير على البوست اللى فات
اى خدمه ياست شوشو

mohamed ghalia يقول...

والله وإحنا كمان بنموت فى تراب مصر
ونفسنا نعمل أى حاجة

المعتصم يقول...

بسم الله الرحمن الرحيم
السلام عليكم ورحمة الله وبركاته
صجيقى العزيز محمد غاليه
تحياتى
ودايما منورنى يارب
معلش بقى يتعوض اول تعليق فى البوست الجاى ان شاء الله
(مااحنا نقابه واحده بقى)
بس ياعمنا انا بقول عاوز افكار مش بقول اننا بنحب مصر وخلاص
طب ماكلنا بنحب مصر
انا عاوز افكار توضح الحب ده عملى
تحياتى ودمت بكل خير وود
والسلام عليكم ورحمة الله وبركاته

اصحى يا مصر : اسلام ديو يقول...

مصر ليست الام فقط
ولكنها الحبيبة
متيجو كلنا نصحيها

ريمان يقول...

السلام عليكم

وسع وسع منك لييييييييه

ريمان جت


هق هق هق


قبل اى حاجه كده سلم لى على عريسى الصغنن

و.............


لا بلاش بقه عشان انا بتكثف


.................

اخى المعتصم


بقول لحضرتك ايييييييييييه

مصر دى مش امى

دى مرات ابويااااااااااااا

ههههههههههههه


بهزر والله


طبعا مهما شوفنا ومها روحنا وجينا مفيش زى مصر

والله بحبها بالرغم من اللى احنا بنشوه من ظلم ومن فساد

وعمرى ما تخيلت نفسى اعيش فى اى بلد تانيه غيرها

والله بعشق ترابها

انا بعترف اهو

ولو فى حاه فى مصر عايزه تتصلح هى ناسها

ونظامها
وحكومتها

احم احم ( وحاكمها ) اوعى تقول لحد ده بينى وبينك بس

تحياتى لك اخى

ريمان ( عروسه ابن اخوك الصغنن)

بـسـمـــة صـــــلاح يقول...

السلام عليكم ورحمة الله وبركاته
~~~~~~~~~~~~~~~~~
أنا جيييييييييييت
بسومة جت
ايه بردو مفيش ترحيب
ماشي ماشي
المهم بقى
والله حضرتك جيت على الجرح ياأستاذ دا أنا امبارح كنت بفكر في الموضوع دا
وبقول لنفسي أنا عايزة افضل في السعودية واروح مصر اجازات بس
بس حضرتك صحيت الحب اللي جويا لمصر
أنا بحبهاااااااااااااا
وعايزة
ارجعلهااااااااااااا
واقعد فيها كمان
الحل ياأستاذ زي ما انت قلت في البوست
وأولهم غننا نتمسك بتعاليم دينا الإسلامي
وربنا يرفع شأن مصر يارب
وعلى رأي ريمان والله الحكومة والنظام عايزينلهم تصليح
اصلهم خربوا
هههههههههه
ربنا يهدي
دمت بكل ود أخي الكبنن
تحيــ بسومة ــاتي(:

د/عرفه يقول...

والله انا بزعل زيك بالظبط من الكلام اللى بيتقال ده
وتلاقى كل واحد يزوغ من الشغل ويقول ما البلد فسدانه
وتلاقى كل واحد يرمى بقايا الحاجه اللى معاه فى الشارع ويقول ما البلد زباله
وتلاقى ناس كتير تسرق من المال العام وتقول ما البلد فقرانه
وتلاقيهم يستسهلوا الرشوه ويقولك دى هدايا
السلبيات دى كلها احنا مشاركين فيها
ولو كل واحد بدأ بنفسه وأخد على نفسه عهد إنه ميكونش مشاركه فى السلبيات دى
ده اول طريق التقدم
وربنا يسهل بقى فى باقى المشوار المهم نبدأه الأول

بـسـمـــة صـــــلاح يقول...

دا بقى رد على تعليق حضرتك في البوست اللي فات
~~~~~~~~~~
بالعكس والله مفيش اعتراض على اسمائكم دي اسماء حبيب قلبي الرسول صلى الله عليه وسلم
يعني اسمائكم حاجه تفرح وتشرح
ربنا يكرمكم ويسعدكم يارب
وبعدين مدارس ايه وأرف ايه بس ياجدو(هقلد شوشو)هههههههههه
البنات اتفقوا يغيبوا الاسبوع دا بمزاجهم
شفت الروقان بنعمل للمدرسه نظام بمزاجنا
عيال اخر زمن صحيح
ههههههههههههه
بلا مدارس بلا هم
هئ هئ هئ هئ
بس هنروح المدرسة الإسبوع الجاي
ادعيلي ال4 شهور الجايين يعدوا على خير
ربنا يستر
سلام بقى

حسام غانم يقول...

حب الوطن ده شيء فطري في البني آدم

ومهما كانت الظروف وحشة

ومهما قال إنه كارهها ومش طايقها

بس الحب والنتماء موجود

يا سيدي بص في عينه وهو يتفرج على ماتش مصر لما نجيب جون


تحياتي ..

اللؤلؤة يقول...

السلام عليكم
صديقى العزيز
كانا نحب مصر ولكن لأسف بعض الناس فاهمين غلط بأن مصر هى سبب معاناتنا مع إن مصر مظلومة زينا بالضبط بل بالعكس فنحن الذين أهدرنا كرامة مصر على متوى جميع المحافل
تحياتى

Sweet Violet يقول...

انت عايز حلول عمليه ؟؟

طيب نظرة بقى سوداويه جدااااا

و هتفتكر لما نتكلم حد هيعمل حاجه كله هيقول بحبها و المفروض كل واحد يبدأ بنفسه .. لكن الفعل لااا يوجد (ايه رأيك فى السواااااااااد ده ((: )

نظرة منورة كده و بيضه زى غسيل اريل (:

شعب مصر مهما قال انه بيكره البلد دى فى اول ازمة هتلاقيه بيفدى ترابها بدمه ( ايه رأيك بياض اهو حرمتكش انا من حاجه ؟؟ D: )

^^^^

تعالى بقى نتكلم جد شويه

البلد باللى بيحصل فيها و الكل ساخط عليها لكن تعالى كده اقرب حاجه احداث غزة و اللى حصل على مصر من ابنائها و الغلط فى البلد و اللى قال انا متبرى منها

بس لما جت الدول التانيه و غلطت فى مصر .. كل اللى كان ساخط على البلد اتحول 180 درجه . و بدأ يدافع و يقول و يتكلم عن مصر

و غنى ان كنت ناسى اللى جرا هات الدفاتر تنقرا

خلاصه القول الشباب مش هيفوق الا لما تيجى ازمه تخبطه على دماغه وقتها بس هتتعدل كل حاجه فى البلد بيما فيهم الحكومة

و ده مش تشاؤم اكتر من انه واقع من اللى بيحصل و التناقض الغريب مابين الناس .. و اننا شعب لازم يتحرك فى اخر لحظه مابنحبش احنا البراح ده بتاع الناس المرفهة ((:

fnoonh يقول...

جميل جدا يا معتصم موضوع جميل وانا والله بجد بحب مصر بس للاسف لما بسافر السعودية بعد مااخلص الاجازة الصيفية في مصر بحس بفرق كبير جدا زي ماحضرتك قولت في نظافة الشوارع وغلاء الاسعار وحجات تانية كتير
باسف جدا على حالة مصر لما اشوفها كده واشوف الناس فيها بالحالة دي واشوف الشباب بيطلعو من مدارسهم ويشتغلوا من بدري عشان يحوشو تمن تذكرة توديهم بلد خليجية ويبكده يخلصوا من قرف مصر واللي فيها ياااااااااااااااه دا حاجة تقهر والله بس على فكرة السبب في ده كله الحكومة وبعدين الناس الرضيت بالوضع ده وماحولتش تغير


تقبل خالص تحياتي وعلى فكرة مدونتك جميلة بمواضيعك البتنزلها دي وخصوصا البوست الفات بتاع الفشحاطات ده هههههههههههه


افنان

*shosho* يقول...

إحـــــــم إحـــــــــم

الباشا وصل
ههههههههههههه
انا محجوزلي التعليق الأول ياسلاااام دا أنا بقيت شخصية مهمة وانا معرفش
لا لا انا مش متعودة على الدلع دا هههههههههههه
~~~~~~~~~~~~~~~~~~
الموضوع جميل أوي أوي
انا كمان بستغرب من الناس دول اللي يطلعوا برة مصر ويرجعوا يسبوا فيها انا مش عارفه ايه عدم الانتماء للوطن دا
طيب ما انا قاعده هنا في السعوديه اه في نظام وكده بس بنشوف تعاملات زبالة اسفه على اللفظ دا بس دا فعلا اللي بيحصل
بابا بيشكي مر الشكوى من تعاملات الناس هنا واحنا كمان في المدارس
بيبقوا شايفين نفسهم علينا اوي
مش عارفه على ايه يعني
وبردو مش كلهم كدا بس أغلبهم
أنا بجد بعشق مصر مش بحبها بس بعشقها بكل حاجه فيها واحنا ماشيين منها راجعين السعوديه في الاجازة بعيط والله من قلبي
وياسلام بقى لما بنكون نازلين من العيارة في مينا مصر
والناس كلها حواليا بتتكلم مصري
ياااااااااااااه بجد بجد شعور جميل جدا محدش يحس بيه غير اللي مجربه
وانا واقفه كدا على أرض بلدي في وطني انا بين اهلي وناسي مش حاسه اني غريبة بجد بجد شعور يفوق الوصف
بجد بجد وحشتيني يامصر
~~~~~~~~~~~~~~~~~~~~~~~~~
اسفه على الكلام الكتير بس الحنين لمصر بقى اخدني
~~~~~~~~~~~~~~~~~~~~~~
اه صح اخبار المنيا ايه وحشتني والله
تعرف سمالوط؟؟
~~~~~~~~~~~~~~~~~~~~~~
بشكرك ياعمو على الميزات الخاصه دي هههههههه
متزعلش من عمو دي انا بهزر

يلا سلااااااااااااااااااااااام

*shosho* يقول...

اه صح لما تيجي ترد عالتعليقات ترد عليا انا الاول هو مش أنا أول تعليق
ههههههههههههه

بهزر
طبعا براحتك

تحياتي..

ايوشة يقول...

عندك حق احنا بنلوم ونشكى ومش شايفين اى شئ كويس فى البلد مع اننا احنا السبب فى الحالة اللى وصلت ليها بعدم مبالاتنا واستهتارنا بكل قيم ومبادئ فيها

موناليزا يقول...

اللى بيتغربوا دول بيطلع عينيهم بره واسأل اى حد اتغرب عن بلده
ايوه هناك وضع تانى بس طلع نزل غريب يعنى ممكن فى ثانية يترحل ولازم يبقى معاه الباسبور والاقامة طول الوقت
احنا بقى هنا فى مصر بلدك تمشى وقت مايعجبك وانت حاسس انها بلدك مش محتاج يكون معاك اقامة

السلبيات اللى فيها بسبب ناس انانيين مش اكتر من كده
بلدنا مش نظيفة طيب اسال نفسك لو معاك ورقة بسكوت ولا منديل فى الشارع وعايز ترميه هتعمل ايه؟ طبعا هترمى على الارض ولا هدور على سلة مهملات ولا هتتعب نفسك
وقيس على ده بقى كل حاجة
يعنى الخلاصة العيب مش فى مصر العيب فينا احنا
لو كل واحد بدأ يصلح من نفسه بلدنا هتبقى احسن من كده بمراااحل

معذرة لو الكلام بعصبية بس كله كوم ومصر كوم تانى لانها بلدى وافتخر
(على فكرة بما انك بتحب مصر يبقى الكلام موجه للى انت بتقول عليهم فى البوست)

المعتصم يقول...

بسم الله الرحمن الرحيم
السلام عليكم ورحمة الله وبركاته
***************
شوشو ايه اللماضه دى
مش كفايه حاجزلك اول تعليق
كمان عاوزة اول رد
انتى بقيتى طماعه ع الاخر
****************
اسلام
تحياتى
معاك حق
فعلا مصر هى الحبيبه وهى الام
بس احيانا من تصرفاتنا الغلط بزعل حبيبتنا مننا ولا ايه؟ هو ده اللى احنا عاملينه مع مصر
وبعدين ماانت قلت هتجيب المنبه ولسه ماجبتوش
شد حيلك شويه احسن دى معاد المدرسه راح عليها وهى لسه نايمة
نورت المدونة
تخياتى ودمت بكل ود وخير
**************
ريمان(عروسة ابن اخويا)
وعليكم السلام ورحمة الله وبركاته
وسعنا اهه حاضر لما نشوف اخرة الافترا ده ايه
وهو كمان بيسلم عليكى
ماشى انا معاكى اننا كلنا بنحبها بالرغم من الظلم والفساد
بس هى مصر مالها ومال الظلم والفساد؟؟
هو مش احنا اللى بنظلم ومش احنا اللى بنعمل الفساد ده
اللى يعيش فى مصر ويحبها صح عمره مايقدر يعيش فى اى بلد تانى فى العالم ولو كانت احلى بلد
ولو فيه حاجه عاوزة تتصلح فى مصر يبقى هى احنا وبس لاننا احنا السبب فى كل الباقى اللى بعد كده
(وماتقلقيش مش هجيب سيرة لحد)
اختى الكريمة نورتى البوست
تحياتى ودمتى بكل خير وود
****************
بسمة صلاح
وعليكم السلام ورحمة الله وبركاته
اهلا اهلا اهلا
الترحيب دا كله ومش عاجبك ؟ طب اعمل ايه تانى يعنى ؟؟
يسلام بقى انا صحيت الحب
يعنى هو كان نايم ؟؟؟؟؟ والكلام اللى قلتيه فى التعليق عندflower-girlفى المدونة بتاعتها كان ايه
الصنادل بتتقطع والجزم بتبوظ ومافيش مش عارف ايه والقشطه بتاعة المراعى
والكلام الفاضى دا كله ؟؟
كان حلم مثلا ؟؟؟؟
ياريت ماتخديش الامور بظواهرها مش معنى انه الشوارع هناك نظيفه يبقى هناك احسن من هنا
اسئلى نفسك ليه وانتى ماشيه هناك مش ممكن ترمى اى حاجه ف ايدك فى الشارع ؟؟ وليه هنا بسهوله الحاجه دى تترمى ؟
الحل اننا نرجع نتمسك بالدين وتعاليمه ونحاول نغير من نفسنا للاحسن مش بس عاوزين نغير النظام والحكومه ماهو احنا السبب فى خرابهم
وبعدين ماانا عارف انك ماتقدريش تعترضى على الاسامى اصلا
الله يرحم تعليم زمان
وربنا يسترها فى الاربع شهور اللى فاضلين خلينا نخلص من الهم ده بقى ههههههههههه
تحياتى ودمتى بكل ود وخير
****************
د/عرفه
تحياتى
ومبروك ياعم بالفوز بتاع النهارده ده خلاص كده نفدتو من شبح الهبوط هههههههه
..........
ماهى المصيبه فينا احنا وكل واحد يقولك يعنى هى جت عليا ماالبلد كلها خربانه هو انا اللى هصلح الكون
وعلى كده وقييييس كل حاجه تانى
بس الكارثه دلوقتى انه فيه شباب طالع شايف اهله ساخطه على البلد فماعندوش اى انتماء
يعنى اللى بيقولك هى جت عليا ساعة ماتحصل اى حاجه بتشوف عنده الروح الوطنيه والحب والانتماء انما دول ماعندهمش خالص وهنا بقى القلق الحقيقى
وعلشان كده عاوزين نحط رجلنا على اول الطريق زى ماقلت وربنا يسهل بعد كده
نورت المونه كلها يادكترة
تحياتى ودمت بكل خير وود
****************
صديقى العزيز/د. حسام غانم
(دكتوربرضو!هوانتو ورايا ورايا)
حب الوطن شيئ فطرى انا معاك
بس فيه شباب طالع دلوقتى ماعندوش الفطرة دى من كم اللامبالاة اللى شايفها والفساد والكلام المتير اللى بيتقال فطرته انتكست وصدق كل اللى بيسمعه
اما بخصوص ماتشات الكورة فصدقنى انا بشوف ناس نفسها المنتخب يتغلب (ده حقيقى وبجد)وبتدعى كمان عليه وبتزعل لما يفوز تخيل
عرفت ليه انا كتبت البوست ده
تحياتى ودمت بكل خير وود
****************
صديقى العزيز عمرو جويلى
وعليكم السلام ورحمة الله وبركاته
تحياتى
معاك حق فيه ناس فاهمه ان مصر هى السبب فى كل اللى احنا بنعانى منه ده ومش عارفين اننا احنا السبب فى كده بكل الصفات الوحشه اللى اكتسبناها
نورت المدونه ياصديقى العزيز
تحياتى ودمت بكل ود وخير
****************
سويت
تحياتى
المشكله انك بنظرتك السوداويه دى جيبتى من الاخر
بس على الاقل احنا نفسنا هنهتم ولو شويه على الاقل ممكن ده يعنى يسيب ولو تأثير بسيط برضو(معلش خليها عندى)
اما بخصوص النظرة المنورة اللى زى غسيل الاريال فدى ابتدت الناس تقاطعها بس بجد مش زى ماهما مش عارفين يقاطعو الاريال(ايه رايك انتى بقى فى السواد ده؟؟؟؟؟)
مين بقى اللى قالك ان كل اللى كان ساخط اتقلب 180درجه ياابله؟؟؟
فيه ناس كتير عامت على عوم الناس اللى شتمت وكانو بيرددو الكلام اللى قالوة وده عن نقاش وتجربه مع الناس

الله ينور عليكى فى موضوع الازمه ده بس انا خايف لاحسن يحصل بالعكس معانا ويزيد الطين بله(احسن احنا شكلنا معمولنا عمل ومدفون تحت ضفر نملةدكر)
وربنا يسهل ونبطل موضوع اخر لحظة ده ونتعلم نتحرك فى البراح والله البراح ده كويس هههههههههههههههه
مرورك اسعدنى
تحياتى ودمتى بكل خير وود
****************
فنونه
تحياتى
ميرسى على رايك
ماهو ده اللى انا بتكلم عليه انك بتشوفى الفرق وتزعلى على مصر بس مش بتفكرى اننا احنا اللى عملنا ده فى مصر ؟؟؟؟؟
وعلى فكرة بقى الحكومه مالهاش ذنب فى الموضوع ده
الذنب كله عند الناس
الشعب اللى موافق على حالته دى وساكت لازم تبقى حكومته بالشكل ده
ماهى الحكومه لو عارفه انه فيه ناس ممكن تغيرها لو ماعملتش لصالح البلد كانت هتشتغل وتعمر فيها
انما هى عارفه انه الشعب مبسوط وراضى يبقى وليه بقى نتعب نفسنا ماالشعب زى الفل اهه
ربنا يخليكى وعلى فكرة انا هنزل بوست تانى زى بتاع الشحطه ده
الطلب عليه زياده خالص وعمل شغل جامد
ههههههههههههههههههههههههه
تحياتى ودمتى بكل خير وود
****************
شوشو هانم
يعنى مافيش بعد كده دلع اهه
اول تعليق واول رد لما اشوف اخرتها معاكى
............
اهو انتى بالكلام اللى بتقوليه ده وبذكرك للشكوى اللى بيشتكيها والدك شايفه الموضوع من الزاويه الصح انه مش علشان ميزة فى البلد دى يبقى هى احسن من بلدنا لأ لأنهم مقابل الميزة دى بياخدو حاجات اكتر بكتير منها
.............
ولايهمك اتكلمى براحتك(احنا خفضنا التعريفه على المحلى والدولى كمان)
اخبار المنيا زى الفل وياستى ربنا يرجعكوا بالسلامه ان شاء الله بس ساعتها ماتقعديش تقولى هو احنا ايه اللى رجعنا هنا تانى ماكنا مبسوطين هناك ومش عارف ايه
وكمان طبعا اعرف سمالوط(طلعتى من سمالوط يبقى خليكى فى السعوديه احسن بقى هه)
وبعدين طب ماانا عمو بجد انتى عندك 15سنه وانا عندى 31سنه ابقى عمو ودى فيها ايه يزعل دى
تحياتى ودمتى بكل خير وود
*****************
ايوشه
تحياتى
المشكله اختى الكريمه اننا فعلا مش شايفين ومش مصدقين اننا السبب فى كل اللى احنا فيه
وعلشان نبرر ده بنرمى كل حاجه على الحكومه ونصدق بعد كده نفسنا انها هى السبب ومش قادرين نعرف اننا برضو السبب فى ان الحكومه تعمل اللى بتعمله فينا ده
احنا محتاجين حاجه تفوقنا علشان نعرف الغلط فين ونبتدى نصلحه
اسعدنى مرورك
تحياتى ودمتى بكل خير وود
*****************
اختى الكريمة موناليزا
تحياتى
معاكى حق بيطلع عنيهم وهما نفسهم بيقولو كده لما يتكلمو عن الشغل والفلوس بس هما برضو اللى بيقعدو يقارنو بين هنا وهناك ومش بيحسبو التعب والشقا والمقابل اللى بيدفعوه فى سبيل انهم يعيشو فى البلد التانيه دى
محدش فيه لما بيقعد يتمنظر ويترسم ويقول دا انا هناك بجيب وجبة الكنتاكى بمش عارف كام وباكل فى المطعم الفلانى ب قد ايه ومحدش يفتكر ساعتها انه مهما كان غريب ومش فى بلده وانه ممكن فى ثوانى بسيطه ياخد بالشلوت وبرة على بيتكم وانه ممكن لو ماشى مامعهوش الباسبور والاقامه يتمسك فى اى لحظة ويترحل
انما هنا يسلام الواحد بيمشى من غير بطاقه ولا فلوس ولا اى حاجه وزى الفل والله يعنى ساعات الواحد بيبقى مش ناقص بس انه يمشى من غير هدوم هههههههههههه
السلبيات بسبب انانيتنا وتسيبنا واستهتارنا وعدم نظافتنا سلوكيا وعقليا وكل العيوب اللى فينا بس احنا مش عارفين انها فينا وكل واحد يقول يعنى هى جت عليا انا !!!!
بس على فكرة ياموناليزا
مصر بتسلم عليكى وبتقولك ماتبقيش تتعصبى كده قوى ابقى خلى بالك طويل اليومين دول الضغط داير فى البلد وانتى لسه صغيرة
(خلاص ماشى انا مش هاخد الكلام عليا يبقى ولا يهمك زعقى براحتك واتعصبى براحتك بس ابقى خلى بالك من الضغط)
نورتى المدونه(واسفين اننا عصبناكى)
تحياتى ودمتى بكل خير وود
والسلام عليكم ورحمة الله وبركاته

القلم السكندري يقول...

السلام عليكم

ازيك يا زعيم

لك وحشة والله

بالأمس دخلت أعلق مرتين علي هذه التدوينة وفي كل مرة يحدث شئ بعد تمام كتابة التعليق وأخرج بدونه

ــــــ
بسم الله

بالنسبة لحب مصر كأرض.. كوطن.. كمسقط راس فلن يخالفك فيه أحد.. أو قل لن أخالفك فيه.. فهذه العاطفة مركبة فينا رغماً عنا.. بل وفي جميع الكائنات أن تتوق دائماً إلي المنزل الأول..

وكما قال الشاعر..

كم منزلٍ في الأرض يألفه الفتي.. وحنينه أبداً لأول منزلِ

ولكن..

حين يلتفّ العفنُ من حولك في كل شبرٍ يكادُ يخنقك..

حين يموج الغباء والتخلف والفساد.. وحين يسيطر اللادين

حين لا تجدُ مأمناً لا علي دين ولا علي عرض

حين تري حولك شعباً يُصرُّ علي أن يئد كل ثورة تكاد تخرجه من ظلمات الاستعباد الي نور الكرامة والآدمية

شعبُ ممسوخُ إلي مجردِ أفواهٍ تلثمُ نعال الطواغيت وتلعقُ راحتهم .. والسنةٌ تسبح بحمدهم


حين تجد نفسك مرغماً علي أن تحيا حياة اللاآدمية في كل شئ أو أن تعيش دائما في صراعاتٍ تبدأُ مع كل مشرقٍ ولا تنتهي حتي بعد أن تتوسد كوابيس الواقع في منامك

أنا هنا لا أتكلم عن الرفاهية التي يتحدث عنها البعض ولا عن "الزبدة اللورباك والقشة المش عارف ايه" كما تقول..

فأنا أقسم بالله علي استعدادٍ ان أعيش حياةً في منتهي البدائية وأن يسلب منها كل شئ إلا الكرامة والدين

مستعدٌ أن أحيا في إمكاناتِ بلادي مهما كانت متواضعة ولكن حين أجد حقوقي من هذه الإمكانات المتواضعة محفوفة بالكرامة .. مصونة بالدين.. معلوّة محكومة بشرع الخالق لا شرائع من زبالات طواغيت الغرب الكافر والشرق الملحد


ولا تقل لي أننا كلنا السبب فيما يحدث حولنا.. قل الأغلبية نعم..

لكن هناك من بذلوا سنوات العمر بل هناك من بذلوا أعمارهم وأرواحهم لتسود كلمة الله في بلادهم.. وليدفعوا لشعوبهم ثمن الحرية من دمائهم.. فما وجدوا غير الجحود والنكران.. وما خلفهم في دمائهم إلا سفهاءٌ سوافلُ عبيدٌ يلعبون بجماجمهم وبتاريخهم كرة الاستعباد

مصر اليوم أشبه ما تكون بحديقة غناء جميلة.. ولكن أهلها أبو إلا أن يحولوها حظيرة خنازير

فما يغني جمال الحديقة وسط قذارات الخنازير الفكرية واللادينية والمادية وقل ما شئت من أنواع المزابل

عفواً اخي الحبيب.. العفنُ لا يزكم إلا الأنوف الطاهرة.. أما التي خبثت وعفنت فالعفن لها كالمخدرات للمدمن

وأنا أعلمُ أنك من الأنفس الطاهرة التي يزكمها العفن. ولكني أرد علي فكرة قد تتسربُ إلي البعضِ خطأً.. أو قد يتغني بها البعض

مصرُ أمامها طريقانِ لا ثالث لهما::

أن تتوضأ بشرع الله من أرجاس طواغيتها ونجاسات الاستعباد الذي أدنه شعبها.. وأن تعود إلي محراب العبودية لله تخفضُ رأسها لتتوج بشرعه يحكمها

أو أن تأبي وتتظل تتمرغ في حمأة جاهليتها وأرجاسها..

وحينها .. لن يغن جمال الحديقة عن قذارة الخنازير..


أعتذر عن طول التعقيب.. ولكنّ النفس معبأةُ بما لو بسطته لما فرغتُ منه إلي يوم الدين

تقبل وافر التحية ..

ودمت بكل ود

القلم السكندري يقول...

تصويب خطأ مطبعي :)

ــــــــــــــــ

أن تتوضأ بشرع الله من أرجاس طواغيتها ونجاسات الاستعباد الذي (أدمنه) شعبها.. وأن تعود إلي محراب العبودية لله تخفضُ رأسها له لتتوج بشرعه يحكمها.......

ــــــــــــــ

كيــــــــــــارا يقول...

يالهووووووووووووووى عيد ام

انا كنت نسيت

الميزانيه خربت والحمد لله

هقرا وارجع

كيــــــــــــارا يقول...

بحببببببببببببك يابلدي وعمري ماكرهتك ولا استنكرتك

*shosho* يقول...

السلام عليكم
ازيك ياعمو (يعني اقولك ياعمو على طول؟؟)
اه من سمالوط وبعدين مالها سمالوط زي العسل هههههههههههههه
اه والله سمالوط أد مافيها قرف بس انا والله بحبها وبموت فيها وبشتاقلها جدا
جدا جدا
خلاص بئا كفاية دلع لحد كدا انا كدا حلاص رضيت واقتنعت

~~~~~~~~~~~~~~~~~
دمت كما تحب ياعمو مصطفى
تحياتي..

عابر سبيل يقول...

بسم الله الرحمن الرحيم
السلام عليكم ورحمه الله وبركاته
اولا موضوع في غايه الاهميه وحضرتك يمكن غطيت كل النقاط احنا فعلا من وقت قربي كنا بنحب بلدنا اكتر من كدا دلوقتي الواحد بيوعد مع الناس وخصوصا الشباب بيحس بعدم انتمائهم للبلد ديه وده شئ في غايه الخطورة ولو تاملنا حياة النبي عليه الصلاة والسلام وماذا فعل بيه اهل مكه وعلي الرغم من ذلك قال وهو خارج منها انك لاحب بلاد الله الي ولو ان اهلك اخرجوني منك ما خرجت
وسوف احكي قصه بسيطة تجسد حالنا الان وهي قصه ملك وضع مبلغ كبيرا من المال تحت صخرة ووضع الصخرة في وسط الطريق فكان الناس يمرون عليها ويقولون حد يرفع هذه الصخرة من يرفع هذه الصخرة (سلبيه)الي ان جاء رجل(ايجابي) ورفعها من الطريق وكانت النقود من نصيبه
المقصود من القصه اننا جميعا اصبحنا الان نقول البلد سيئه والاحوال زي الزفت ومفيش خير والناس كلها حراميه وغير ذلك ولو نظر كل منا بعمق لوجد نفسه جزء اصيل في هذه المشاكل كلها
وهذا هي البدايه
وجزاك الله خيرا علي هذا الموضوع
عابر سبيل

zainab يقول...

السلام عليكم و رحمة الله و بركاته

الله الله دا الحبايب كلهم منورين هنا ايه الهنا دا كله ماشاشء الله ربنا يبارك فيكم كلكم

معلش يا معتصم بالنيابه عنك هاه منورة يا بوسى و ياشوشو و ريمان ازيكم

أخى المعتصم

بجد يا معتصم انت طرحت موضوع مهم جدا جدا

وحشتيييييييييييييينى يا مصر

فعلا احنا لازم اللى نغير من نفسنا

أنا مديرى فى الشغل لما بياسفر الصين و يرجع يحكى عن النظام هناك و الشغل
ألاقيه يقول هناك الشغل شغل و الفسحه فسحه بيعطوا لكل شئ حقه

و احنا بصراحه مش أقل منهم فى حاجه بالعكس دا احنا مسلمين يعنى أحسن بس لو نطبق ياسلااااااااااااااااام

تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
*************
صديقى العزيز
واخى الفاضل
القلم السكندرى
وعليكم السلام ورحمة الله وبركاته
تحياتى ياهندسه وواحشنى والله انت كمان
يا باشا لو المدونة هتغلبك فى التعليق احنا نحذفها خالص
دا اسمه كلام برضو
احنا نقدر نغلب سيادتك ياعيب الشوم
...............
بالنسبة لحب مصر كأرض.. كوطن.. كمسقط راس فلن يخالفك فيه أحد.. أو قل لن أخالفك فيه.. فهذه العاطفة مركبة فينا رغماً عنا.. بل وفي جميع الكائنات أن تتوق دائماً إلي المنزل الأول..

وكما قال الشاعر..

كم منزلٍ في الأرض يألفه الفتي.. وحنينه أبداً لأول منزلِ
===========
اللى انت بتتكلم عليه ده حب الفطرة والبشمهندس اللى قال بيت الشعر الجميل ده هو ابوتمام
بس اللى شدنى وخلانى اعاوز اتكلم فى الموضوع انه حتى حب الفطرة ده ابتدى يبقى مش موجود ياباشا
............
ولكن
وقلت بعد ولكن دى العبر اللى فى الدنيا كلها
وانا معاك ودا كله صح
بس مين اللى خلى الشعب زى ماانت بتقول يصر على ان يئد كل ثورة
مش الثقافه الغلط والعادات الغبيه بتاعتنا واصرارنا وتمسكنا بمبادئ عقيمه زى وانا مالى ياعم خلينا ماشيين جنب الحيط واليومين دول كمان بيقولو ان قدرنا نمشى جوة الحيط هنمشى
ده اللى خلى الطواغيت عملو فينا كل اللى عملوة واللى لسه هيعملوة
............
صديقى العزيز اعلم ان هناك منا من يستطيع فى سبيل اعلاء راية الامه ان يعيش فى احلك الظروف واصعبها وان يتحمل الاهوال لكى يرفع من شأنها
ولكن عليه ايضا ان يحاول وان يسعى ويعمل على ان يصون كرامة بلاده وان يسعى ان يطبق شرع الله وشريعته وان يقاوم كل جبار اثيم وان يعمل على ضحد التيارات الفكريه الغربيه التى تريد بنا التهلكه
ليس كلنا السبب هناك من حاول ولكن البقيه خذلته هناك من ذاق مر العذاب كى يحقق اهدافه الساميه المتمثلة فى الحكم بالشريعه واعلاء كلمة الحق
انا لاانكر هذا
ولكن هل معنى انهم فشلوا وان البلد صار حالها هكذا ان نيأس ونترك شبابها يكرهوها ؟؟؟؟
هل معنى انهم قوبلوا بالنكران والجحود ان يتوقف الكل عن العمل ونقول بالبلدى ياعمى ماهى المراكب سايرة وخلاص
هلى نترك الحيقه الغناء الجميلة لتتحول الى حظيرة الخنازير فعليا
لابد ان نحاول حتى ولو فشلنا
على المرء ان يسعى وليس عليه ادراك النجاح
ليس بسبب ان الفساد زكم الانوف وصارت رائحته معتاده عند الاغلبيه ان نقول رفعنا ايدينا والا نتحرك او على الاقل نحاول
علينا محاولة العمل على ان نقودبلدنا الحبيب الى الطريق الاول وان نساعدها على الوضوء بشرع الله كما قلت كى تتطهر من كل رجس ونجاسة وحتى نخرج بها الى الازدهار والعلو والا نتركها مهما حاول البعض (المستفيد) ان تأبى ان تتطهر وان تظل فى حمأة الجاهلية وارجاسها
هذا دورنا وواجبنا كأبناء لها
اخى الكريم دوما نقاشك يسعدنى ويعطينى الامل فى شباب هذه الامه
الامل فى ان يثور هذا الشباب وينهض بأمته وينفض عنها كل الغبار ويعيد اليها مجدها الغابر وان يعيدها الى سابق عهدها
لا تعتذر ياصديقى عن الاطاله ابدا فكلماتك تسعدنى
تقبل تحياتى ودمت بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم ورحمة الله وبركاته
*************
كيارا
تحياتى
ايه هو انتى كنتى ناسيه عيد الام ؟؟؟
كويس ادينى فكرتك
واى خدعه طيرت لك الميزانيه كلها هييييييييييييييييييييييييييه
...............
ماشى ياستى ماكلنا بنحبها بس عاوزين يكون لينا دور ايجابى فيها مش بس نكتفى بالحب بالكلام نفسى اننا نعمل حاجه بجد ليها
علشان كده انا كتبت البوست ده
تحياتى ودمتى بكل خير وود
****************
شوشو هانم
تحياتى
وعليكم السلام ورحمة الله وبركاته
والله يعنى عاوزة تمشيها عمو مافيش مشاكل انا مش هتفرق معايا
(حتى على الاقل اعرف اعمل عليكم كبير بحق وحقيقى هههههههههههههههههه)
انما عمو يبقى عمو المعتصم مش مصطفى
وبعدين هو انا قلت حاجه وحشه لاسمح الله على سمالوط دى بلد زى الفل واحسن ناس
نورتى المدونة
تحياتى ودمتى بكل ود وخير
****************
عابر سبيل
وعليكم السلام ورحمة الله وبركاته
اولا حمدالله على السلامه
بقالك فترة منقطعه عننا لعله خير ان شاء الله
الموضوع مهم فعلا بس ليه بتقولى احنا من وقت قريب كنا(ليه كنا)بنحب بلدنا هو يعنى احنا دلوقتى بنكرهها !!!هو الحب موجود لسه بس المشكله ان الجيل الكبير لما بيتكلم عن البلد قدام الشباب الصغير مش بيقول ولا ميزة انما معظم الكلام بيكون نحل فى وبر البلد وطبعا المبررات معروفه الحكومه والفساد ودول ناهبين البلد ودول ودول وعلى كده على طول
يبقى ازاى واحد طلع فى جو كله كلام مزيف ومافيهوش ولا كلمه حلوة على البلد عاوزينه يحبها (هو ممكن يكون بيحبها من جواه بس مايعرفش كده)
ولما يتكلم بقى لازم يعمل زى ماسمع الكبار بيقولو البلد بقت زى الزفت ومابقتش زى زمان وياريت الواحد يشوف اى حته تانى ويروحها وكده
اهو انا نفسى اننا نحاول نعمل زى الراجل بتاع الصخرة اللى اخد الفلوس انما للاسف احنا عاملين زى الجماعه بتوع حد يشيل الصخرة دى من هنا
الله ينور عليكى ويرضا عنك
احنا بسلبيتنا اساس المشكلة وجذرها
وده اللى نفسى اننا نوصله للناس ونحاول نتحرك بقى
اختى الكريمة اسعدنى مرورك
تحياتى ودمتى بكل خير وود
******************
زينب (مدام عبدالبر مستقبلا)
وعليكم السلام ورحمة الله وبركاته
تحياتى ياعروسة
الحبايب متجمعين فى الخير ان شاء الله
وبعدين ياستى رحبى براحتك زى ماتكون المدونة بتاعتك واكتر شويتين
....
ايه ده ؟؟؟؟
مصر وحشتك ؟؟؟ ازاى يعنى ؟؟؟ هو انتى عايشه فى الهند ؟؟؟ ولا تكونيش روحتى الصين مع الجماعه اللى بتشتغلى معاهم
(ياخوفى لاخونا عبدالبر يطلع صينى واسمه يبقى عبدالبر سونج يانج)
مشكلتنا انه حتى الملحدين والكفار بيطبقو مبادئ ديننا فى الشغل واحنا لأ مش بنطبقها
يعنى الشغل شغل ومافيش اى تهاون مش ديننا بيقول كده ورسولنا الكريم قالنا ((ان الله يحب اذا عمل احدكم عملا ان يتقنه ))
هما بقى بيعملو كده واحنا بقينا كلنا فهلويه واساتذة تزويغ ومافيش شغل
يعنى احنا اللى خلينا نفسنا اقل منهم
نورتى المدونة ياعروسه
تحياتى ودمتى بكل خير وود
والسلام عليكم ورحمة الله وبركاته

بـسـمـــة صـــــلاح يقول...

السلام عليكم
ياسلام ياسلام
ماشاء الله على حضرتك بتحاسبني
هههههههههههههههههههههههههه
والله انا لما بكون في مصر او اي حته عمري ما رميت زباله في الارض
بابا علمنا ان كدا غلط وكان بيضربنا لو عملنا كدا
فبقت عادة فينا نحافظ على النضافه
في كل حته ولله الحمد
ههههههههههههههههه
وبعدين انا عاتبه على حضرتك
مش تيجي تباركلي على التاج الاول لمدونتي
بس هلتمسلك ال70 عذر زي ما الرنبي صلى الله عليه وسلم قال
يلا بقى
تصبح على خير
سلام

بـسـمـــة صـــــلاح يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههه
حلوة حلوة
ليه بس يازوزو تعملي كدا في المعتصم بس
والله دحكتني
خلاص يبقى مش عاتبه ولا حاجه
ربنا يسعدك يا أستاذ معتصم
روح نام وراك مدرسه
مواهاهاهاهاها(ضحكه شريره)
يلا سلام

القلم السكندري يقول...

عدنا..

السلام عليكم أخي الحبيب مرة أخري..

ــــــــــــــ

ليس المقصود أنني أدعوا إلي نفض الأيدي أو إلي التخاذل.. بل إن الحر لن يطيق حياة بلا جهاد وبلا ثورة ولو فكرية..

هي له كالأكسجين للأحياء

هي فقط كلماتٌ للإقرار بالواقع أن مصر اليوم كذا وكذا مما سبق وذكرته

لأن الإقرار بالداء هو أولي خطوات العلاج

أما لو ظللنا نتغني بحب مصر ونحن نري انتكاستها فلن يغنِ عنا ولا عن مصر شيئاً

نريد أن نقر ونعترف بالواقع المخزي وبمدي انحطاطه وتسافله.. فلعل في ذلك تهييجاً للنفوس المحبة الصادقة علي نفض هذا الانحطاط

أو لعل في هذا الاعتراف ميلاد الثورة في قلوب الأحرار

دمت بكل ود صديقي العزيز

norahaty يقول...

سلوك البعض منا
هو اللى أجبرنا على
نظام الفهلوة والمحسوبية
وخلافه !لما تلاقى غيرك بياخد
كل حاجة وانت مابتاخد شىء
لانك مش صاحب (المعلم)
وتتكلم وتشكى
وتفاجىء
ان الشكوى راحت
للى انت شاكيه لاجل مايبت
فيها يبقى ايه الحل ساعتها !

norahaty يقول...

بس عايزة اعرف
هى مين شوشو هانم
اللى انت حاجز لها
لها البنوار المخصوص ده؟
هو هنا فيه وساااااااايط
كمااااااااااااااااااااان
ولا أأأأأأأأأأأأأأأأأأأأأيه
النظااااااااااااااااااااااام؟:(

zainab يقول...

أخى المعتصم

السلام عليكم

لا يا سيدى ما تخافش خطيبى الحمد لله مصرى دمياطى

عايزاك كل ما تفتكرنا تدعى لنا ماشى يا معتصم عشان أدعيلك بعروسه حلوة

تحياتى

الازهرى يقول...

مصر هى نحن
وليست مجرد قلة تحكمها
مصر بابنائها فان كانوا جيدين هموا بها وصنعوا لها مستقبلها
اما ان نرتكن الى الحائط وننتظر من يبنى لها مجدها فليس هذا بالحب لها فى شىء ولن يكون هناك رقى

اما عن الاقتراحات فهى كثيرة وموضوعها يطول وان كنت احاول تلخيصه قدر المستطاع فى الفارس الاخير

fL0weR-giRL يقول...

السلام عليكم

أخي المعتصم

موضوعك حلو أوي عن حب مصر

ومين قال اٍن أحنا مش بنحبها بالعكس

مصر جميله وحبيبه وكل البنات بتحبها وكل البنات مجانين ياعم مين قدها يا عم قولي مين

وبعدين اٍنت كاتب عن الموضوع دا علشان نغلط ونقول حاجه كدا والا كدا عن مزايا ها الرائده ونلاقي نفسنا في خبر كان

هحكيلك علي حاجه

مره كنت قاعده انا وأختي غربتي بنتفرج علي tv جبنا القناه السعوديه لقيتهم جايبين اعلان وبيقولوا ( ارفع رأسك يا اخي فأنت سعودي ) وبعد شويه قلبنا علي قناة دبي لقيتهم في الفاصل كاتبين ( اٍماراتي وأفتخر ) قلت لغربتي أحنا كمان عايزين شعار للقناه الفضائيه المصريه قالت لي مفيش احلي من شعار ( مصري وأنتحر ) قلت لها هو دا الشعار والا بلاش كل لما نرجع من اي مشوار والا نشوف حاجه كدا والا كدا من المميزات الكتير اللي هنا نقول طبعا مصري وأنتحر استغفر الله العظيم
لما كنت في السعوديه ايام المدرسه كانوا بيقولوا نشيد في الحفلات عجبني اووي

( سعودي باٍيماني سعودي باٍسلامي علي الرايات موطنا وفي التاريخ عنواني )

حتي النشيد فيه اٍيمان واٍسلام

أما هنا بقا

بلادي بلادي بلادي لك حبي وفؤادي

مصر يا أزحم البلاد أنت جبتيلي اٍكتئاب

وشكرا جزيلا

انا مش فاضيه بس قلت لازم اعلق واضع بصمتي في حب مصر :)

انا بحبها بجد وياريت السلبيات اللي فيها تتعدل وحالها يرجع من تاني يفرح القلب

والسلام عليكم

المعتصم يقول...

بسم الله الرحمن الرحيم
السلام عليكم ورحمة الله وبركاته
****************
بسمة
تحياتى
وعليكم السلام ورحمة الله وبركاته
انا مش بحاسب حد بس ماتنسيش انك انتى اللى كتبتى الكلام ده بايدك صح ولا غلط؟؟ انا مش بنسى
انا بس كنت بفكرك
النظافه سلوك جميل جدا وزى ماالناس كلها حافظة النظافه من الايمان
بس هنا الفرق هو انتى مابترميش حاجه فى الارض انما لو شوفتى حد بيرمى حاجه ياترى ممكن تقوليله ان ده غلط؟؟
.....
اعتقد موقف التاج وضح
ومن تعليقك التانى عرفتى ان التاج اللى زينب وغربتى دبسونى فيه طلع عنيا هههههههههههههههههههه
وعلشان كده خفت اعلق عندك
(وبعدين اسمها ضحكتنى مش دحكتنى يابتاعة ثانويه عامه)
اما بخصوص المدرسه الصبح فياريت ترجع ايامها تانى انما للاسف هنجيبها منين(وش بيطلعلك لسانه)
هههههههههههههههههههههههههههههه
تحياتى ودمتى بكل خير وود
****************
اخى وصديقى العزيز القلم السكندرى
عود أحمد(ومتسألنيش احمد مين عشان مااعرفش اسم ابوة)
وعليكم السلام ورحمة الله وبركاته
صديقى العزيز انا اعرف تمام المعرفه بمقصودك من كلامك وكل ماتهدف الى قوله ولكن اعمل بطريقتك التى تعلمتها منك فلربما قرأه بعض ضعاف النفوس ودخل اليأس فى قلوبهم فأنا اتبع اسلوبك فى شحذ الهمه بالرد على كلامك والرد هنا ليس للتناقض او عدم الاقتناع وانما هو للتوضيح وبيان الموقف ليس الا
ولعلها تكون بالفعل اولى خطوات العلاج وندعو الله العلى القدير انا يعيينا ونستطيع ان نغير للاحسن
صديقى العزيز واخى الفاضل دوما نقاشك يثرينى ويسعدنى
دمت بكل خير وود
*****************
norahaty
تحياتى يادكتورة
معاكى حق ممكن تكون الفهلوة دى ناتجه عن طريق رد الفعل لبعض السلوك الغلط اللى بنشوفه واننا مش بنقدر ناخد حقنا غير بكده
اما بقى شوشو هانم دى
فشوشو دى مدونة عندها 15سنه واسمها شيماء صلاح وانا اسم والدى صلاح برضو وعلشان كده انا بعتبرها اختى الصغيرة وده سبب الدلع
انما سبب البنوار اللى محجوزلها انى وانا بكتب البوست ده وقبل ماانزله بدقايق بسيطه بعتتلى تعليق فى البوست اللى فات بتقولى انى انزل بوست جديد فعلشان كده انا خصصتلها البنوار الاول
انما واسطه ومحسوبيه عندى انا لايمكن ابدا مش انا مش انا مش انا مش انا مش انا مش انا مش انا مش انا مش انا
عاجبك كده ادينى علقت اهه شوفيلك حل بسرعه هههههههههههههههههههههههههههه
نورتى البوست يادكتورة
تحياتى ودمتى بكل خير وود
******************
مدام عبدالبـــــــر
اقصد اختى زينب
وعليكم السلام ورحمة الله وبركاته
تحياتى
ومين قال انى خايف عليكى ليه ان شاء الله احنا نسد فى اى حته فى العالم صين يابان ولا بيهمنا احنا جبابرة ياماما
بس ايه ده (دمياطى برضو)كنا عاوزين نحسن النسل شويه يازينب انما ع العموم كل اللى يجيبو ربنا كويس هههههههههههههههه
انا بهزر يازينب اوعى تزعلى(طبع بقى)
ربنا يكرمكم ويسعدكم ويرزقكم الرزق الحلال والذريه الصالحه يارب
ويجعلك وش السعد عليه ويجعل رزقك معاه زياده يازينب (يابنت فاطمه)امين يارب
طبعا مش هتبطلى الطبع بتاعكم ده يعنى هو انا لازم ادعيلك علشان تدعيلى بعروسه حلوة(دمياطيه مأصلة يازينب)
هههههههههههههههههههههههههه
تحياتى ودمتى بكل خير وود
*****************
اخى الفاضل الازهرى
تحياتى
كلامك مظبوط احنا مصر مش القلة اللى بتحكم
وعلشان كده عاوزين فعلا نعمل حاجه علشان نغير الوضع ونرجع بلدنا تانى لمكانتها الصحيحه ونبنى مستقبلها من اول وجديد ونصحصح من الكسل اللى بقينا فيه ده
ومستنى الاقتراحات على احر من الجمر بس يارب يوفقنا ونعرف ننفذها او على الاقل نحاول بنيه صافيه اننا نفذها
صديقى العزيز تحياتى ودمت بكل خير وود
*****************
flower-girl
وعليكم السلام ورحمة الله وبركاته
اختى الكريمه تحياتى
اولا مش هعقب على التشبيه بالغنوة هفوتها ياستى مافيش مشاكل
بس انتى لو فعلا بتتكلمى مع حد ممكن تلاقى الناس بتقول كلام يدل على انه حب البلد بقى حاجه غريبه وانه فيه شباب ابتدو يكرهوها
انا مش كاتب علشان نغلط ونروح المنتجعات السياحيه اياها بس انا بقول اننا نحاول نغير ونحاول نعمل اللى علينا علشان ربنا يكرمنا ونرجع البلد اللى بنحبها دى زى ماكانت واحسن
نرجعها لمجدها ولدورها القيادى بين الدول
نرجع رقيها وحضارتها وطيبة اهلها وشهامتهم
نرجع الحب بين الناس واللى مبقاش موجود دلوقتى
....
ياستى لو على الشعارات احنا احسن ناس تقولها بس انا مش عاوز كلامنا يبقى كده انا نفسى اننا نعمل حاجه حتى لو من غير كلام خالص كفيانا كلام وشعارات

احنا بنشكر سيادتك على بصمتك ووقتك الثمين بس انتى جايه بالاكتئاب بتاعك جاهزة مش احنا اللى جبناهولك
يلا روحى شوفيلك كام معادلة تحليهم ههههههههههههههههههههههههههههه
تحياتى اختى الكريمه
ودمتى بكل خير وود
والسلام عليكم ورحمة الله وبركاته

اللؤلؤة يقول...

السلام عليكم
صديقى العزيز
والله العظيم إنت إبن حلال لأنك فى بالى وفاتح صفحتك عشا أعلق لك رن جرس التليفون فسأنت دائما سباق بالخير صعيدى أصيل على قكرة أنا بحب العايدة جدا لأنهم رجالة وسكنت معاهم أربع سنوات وخاصة بتوع المنيا
تقبل تحياتى

اللؤلؤة يقول...
أزال أحد مشرفي المدونة هذا التعليق.
اللؤلؤة يقول...
أزال المؤلف هذا التعليق.
اللؤلؤة يقول...
أزال أحد مشرفي المدونة هذا التعليق.
اللؤلؤة يقول...

السلام عليكم
حضرة الصعيدى الهمام
لقد قبلتك أخاً وصديقاً عزيزاً وهذا شرف كبير لى وأتمنى أن تكتب لى إيميل الياهو بتاعك حتى نتحدث مع بعضنا إن لم يكن ذلك تطفلاً منى
تقبل مرورى

zainab يقول...

أخى المعتصم

ايه حكاية الأسماء اللى انت قاعد تألفها دى

يعنى يا سيدى لازم تألف مش مهم تأليف

وعالعموم هدعيلك من غير ماتدعى لى يا معتصم عشان تكون دعوةبظهر الغيب

ربنا يوفقك

تحياتى

د.توكل مسعود يقول...

السلام عليكم ورحمة الله وبركاته...وبعد

فبرجاء التنبيه... والتنويه....على الزائرين الكرام الذين يكتبون التعليقات القيمة..أنهم عند مخاطبة الإناث يكتبون:
شكرا "لكى"
"دمتى" بخير
"جزاكى" الله خيرا

والصحيح أنها تكتب بغير"ياء".
ويفرق بين خطاب الإناث وخطاب الذكور بالحركات،

فتوضع الفتحة على نهاية الكلمة عند مخاطبة الذكور فنقول: "لكَ"، "دمتَ"، "جزاكَ"
اضغط }ض{SHIFT+
وتوضع الكسرة على نهاية الكلمة عند مخاطبة الإناث فنقول: "لكِ"، "دمتِ"، "جزاكِ"
اضغط } ش{SHIFT+

هذا من باب حب اللغة العربية والغيرة عليها...
"واللى مش بيغير.. يبقى مش بيحب"
مع الاعتذار للفصحى

وتقبلوا شكرى وتحياتى

د.توكل مسعود يقول...
أزال المؤلف هذا التعليق.
خديجة عبدالله يقول...

ماشاء الله ..وأنا فاكرة نفسى جايه بدرى يلا خير :)
أولا : السلام عليك أخى الكريم
ثانيا: عشت 14 سنة بعيدة عنها إلا من إجازات بسيطة كل عام ولذا أعرف كم أحبها وكم كنت أشتاقها
ثالثا: رغم مابها فأعرف أنه بما كسبت أيديكم ولذا فلن أحملها وحدها ذلك
رابعا: لا يكفى الحب وحده أو الشعور وحده لاحداث التغيير .. منظومة متكاملة شعور وفكر وأخير سلوك
أريد مثلا أن تكون الشوارع نظيفة لا يكفى أن أنزعج من المنظر وأتذمر فقط لابد من فكر يميز فيفكر بحل عملى مثلا عمل جمعية أهلية تهتم بهذا ونشر التوعية بذلك بين الناس ... الخ
وفى النهاية تترجم الأفكار والمشاعر لسلوك خاص ومن ثم توجه عام
خامسا: عذرا للإطالة وجزاك الله كل خير يسعدنى زيارة حضرتك لمدونتى :) ونفعنا الله بما تكتب
وفقك الله لما يحب ويرضى ودمتَ بخير

المستنصر بالله يقول...

عدم الانتماء سببه واضح ان كل الفرص فى البلد لفئه واحده مسيطره على كل مقدرات البلد
زمان كانوا الناس متحملين علشان كان فيه احتلال لكن اللى بيحكمنا دلوقتى من اهل جلدتنا الناس حصل لها يأس
قله الانتماء لاحساسهم انهم مهضوم حقهم فى هذه البلد
بس لو دورت هتلاقى الحب موجود ولو حصل لمصر اى حاجه هتلاقى كل اللى بيقول الكلام دة اول واحد بيدافع عنها
موضوع جميل
واسف على التاخيير

تحياتى لحضرتك

المعتصم يقول...

بسم الله الرحمن الرحيم
السلام عليكم ورحمة الله وبركاته
************
اخت زينب
تحياتى
والله يازينب انا بهزر
اوعى تكونى زعلتى
انتِ عارفه انى مش ممكن ازعلك ابدا
انا بس كنت بغلس عليكى ليس الا
خلاص مش هنقول على العريس عبدالبر(ينفع صميده؟؟؟)
اما بخصوص حكاية يازينب يابنت فاطمة دى فعلشان انا معايا بنت عمتى اسمها زينب وعمتى اسمها فاطمه
بس ياستى ادى تفسير الموضوع
ياريت بجد ماتكونيش زعلانه
سماااااااااااااااااااااااااح يازينب
ههههههههههههه
وبعدين موضوع الدعاء ده يعلم ربنا كل مابفتكرك بدعيلك وربنا يقبله منى ويحققهولك يارب
تحياتى ودمتِ بكل خير وود
**********************
د/توكل مسعود
وعليكم السلام ورحمة الله وبركاته
اولا شرفنى مرورك الكريم
ثانيا فعلا مع حضرتك حق كلنا بنغلط الغلطات دى
اشكر حضرتك على التنويه واضافة المعلومه
واشكر لحضرتك حبك وغيرتك على لغتنا الجميله
تحياتى ودمتَ بكل ود وخير
****************
مين اللى بيكتب تعليقات ويحذفها هنا غيرى ؟؟؟؟؟؟؟؟؟؟؟؟؟؟؟؟؟؟؟؟؟؟
بقولكم ايه
اللى حذف التعليق يكتبه تانى بالذوق والا هستعمل العنف
انا حذرت اهه
هههههههههههههههههههههههههه
*****************
أختى خديجه عبدالله
وعليكم السلام ورحمة الله وبركاته
تحياتى
ياستى ماانتى جيتى بدرى اهه ومين قال انك متأخرة مااحنا لسه ماشطبناش وده المهم ولا ايه؟
ثانيا وثالثا ورابعا
انا معاكى فى كل ده
وصحيح اللى بيعيش بعيد عنها بيبقى عارف هو بيحبها قد ايه
واننا السبب فى كل اللى هيا فيه وهى مالهاش ذنب ومش لازم نحملها كل الوزر
واننا لازم يكون لينا دور فعال
اقولك على حاجه :
انا كل يوم فى الصيف بعد العصر اطلع اكنس قدام البيت وارش ميه واروق الدنيا وكل اما حد من الجيران يعدى يسلم وكده اقوله ماتبقى تخلى الواد الصغير يلم شوية الورق اللى قدام الباب دول علشان شكل البيت يبقى نظيف وعلى كده
بس هو واحد عمل زيى كده وبعده واحد تانى وهب لقيت الشارع كله بعد اسبوع بعد العصر بقى المعاد الرسمى للنظافه
كل واحد يطلع يكنس قدام بيتهم ويرش ويظبط المسائل
بس للاسف توقف الموضوع ده علشان الشتا
انما ربنا يسهل ونعيده تانى
فاحنا عاوزين نعمل زى كده فى مصر كلها ويارب الموضوع ينفع
وواحده واحده نبتدى بالنظافه وبعد كده يكون لينا دور فعال فى باقى المجالات ويمكن ربنا يكرمنا ونعرف نتغير للاحسن
خامسا بقى ولا يهمك وطولى براحتك
وكمان انا بجد اللى بسعد بمرورى بمدونتك اختى الكريمه
تحياتى ودمتِ بكل خير وود
****************
صديقى الفاضل
صاحب اليقين
المستنصر بالله
تحياتى
انا معاك وان عدم الانتماء بسبب الظروف وانه لما تحصل اى حاجه هتلاقى كل دول بيحبوا بلدهم وهما اللى هيدافعوا عنها
بس انا خايف ليحصل انه من كتر الظلم والقهر وان الشباب ده مش شايف ولا حسنة واحده فى البلد يتحول فعلا عدم انتماء حقيقى مش بس كلام
يعنى مثلا فيه موضوع كوميدى كده بتاع الجماعه اللى عاوزين يعملوا المجلس القومى للرجل على غرار المجلس القومى للمرأه بيقولوا فى ميثاقهم للمجلس ده انه لو مصر دخلت حرب مايدافعوش عنها
حاجه زى كده احنا ممكن ناخدها بمحمل الهزار بس انا شايف انه ممكن فيه ناس تاخدها جد وده السبب اللى خلانى اكتب الموضوع ده
ياصديقى العزيز ولا يهمك ولا تأخير ولا حاجه
اسعدنى مرورك
تحياتى ودمت بكل خير وود
والسلام عليكم ورحمة الله وبركاته

ريمان يقول...

السلام عليكم


كله وسع ولا لسه؟

وسع وسع منك ليييييييييه

انا كيييييييييييت


اخى المعتصم

البت زينب دى مالها بقى

بقول لحضرتك ايه

البت دى من يوم ما اتخطبت وهى اتمعرعت عليناااااااا

اااااااه

اتمرعت خالص

يلا يلا خليها تعيش لها يومين

قبل ما تتجوز

هههههههههه

وفيها ايه يعنى اما تقول عليه عبد البر؟

بس
كان المفروض تقول عليه فلحوس مثلا


هههههههههههههه

انا هشوفها حاضر زعلانه ولا ايه نظامها

بس حضرتك بقى عارف زينب مخها كبير قد السمسمه

اللؤلؤة يقول...

السلام عليكم
حضرة الصعيدى الهمام
شوف حاجة تانية وحبها أحسن أنا خايف عليك
هههههههههههههه
تقبل تحياتى

م/ الحسيني لزومي يقول...

الاخ/ معتصم
انا قلقان علي ولد العم بيرم لكن لان عندي مشلكة في النت فلا اتابع عموما انا اكتب عندة تعليق وربنا يطمنا عليه

zainab يقول...

أخى المعتصم و أختى ريمان

ماشاء الله عليكم انتم الإتنين عاملين حزب عليا كل ده يا ست ريمان عشان خاطر الأستاذ مصطفى الصغنون ماشى يا ستى بكره تلفى تلفى و ترجع لنا تانى هههههههههههههههه

جزاك الله خيرا أخى المعتصم على دعائك لى و كويس ان بنت عمتك اسمها زينب يعنى كل ما تشوفها تفتكرنى فتدعى لى

تحياتى و تمنياتى لكم بالتوفيق

ghorBty يقول...

السلام عليكم

كما قال الله عز وجل

إِنَّا كُلَّ شَيْءٍ خَلَقْنَاهُ بِقَدَرٍ

وقدرنا اننا مصريين فالحمد لله ليس لنا الاعتراض ولا التشكي

والانتماء والحب دا شئ فطري بحت حتي لو ادعينا اننا مش بنحبها هنلاقي غصب عننا بنحن لها للمكان اللي اتربنا فيه وكبرنا فيه ولينا فيه ذكريات حلوه او حتي مش حلوه

والموضوع من وجه نظري مش موضوع ارض ومكان اد ما هو اشخاص وعقول وتصرفات بشر واحكام وقوانين كل دا هو اللي بيكون سبب في راحتي فاقيم فيها او سبب في نكدي فاحب اني ابعد عنها ودا طبيعي كل واحد بيحب وبيفكر في الشئ اللي بيريحه ما اظنش حد بيحب وجع الدماغ

انا هكلم في الجزء اللي يهمني انا عن نفسي احب اقعد في مكان يهيأ لي الاستقرار واني احس بجو ديني يعينني علي الطاعه وليس العكس وعلي قول الشيخ العوضي الله يبارك له ( ما ينفعش نقول الشخص تدين والمجمتع حوله كدا زي بالضبط لو حطيت واحد وسط ميكروبات ونقول له اوعي تعيا )لازم يكون هناك اعانه من قبل المجتمع مش تلاقي منظر المتدين مكروه ومنظور له انه شئ سطحي كل دا المسئول عنه نظام دوله وفيه دول بتفرض علي اهلها الالتزام حتي لو كان الالتزام سحطي وشكلي ربنا هو سبحانه عليه الباطن ( اٍنما عليك البلاغ وعلينا الحساب )
ومش عيب ان الواحد يتمني يعيش في بلد يلاقي فيها الامان وراحه البال والاحترام اكتر من بلده

وبالنسبه اننا نحاول ونصلح ادينا بنحاول وبنعمل اللي ربنا هيحسبنا عليه وديننا بيدعونا اليه مش علشان بلد لا علشان دين واخلاق دين

جزاكم الله خيرا

غربتي

د.آيه يقول...

بسم الله الرحمن الرحيم
بارك الله فيك..
فعلا بزعل اوى لما بحس إن الشباب معدش بيحب مصر زى الأول ..
بس أنا مأيداك في كل كلمه..
تحياتى

ghorBty يقول...

السلام عليكم

خير ان شاء الله

اوعي يكون دا نتيجه بحبك يا مصر

يكون كرموك ورحت المنتجعات اٍيها

الله يعين

المعتصم يقول...

بسم الله الرحمن الرحيم
السلام عليكم ورحمة الله وبركاته
****************
ريمان
وعليكم السلام ورحمة الله وبركاته
تحياتى
مش عارف انا كنت خايف لتكون زعلانه بجد قلت اوسطك فى الموضوع
بس هى طلعت زى ماانتى قولتى مخها كبير هههههههههههههههههههههههههههه
وبعدين مااحنا سايبينها تتدلع اهه وهو احنا قلنا حاجه
لما نشوف اخرتها ياستى
هههههههههههههه
عريسك بيسلم عليكى صحيح(نايم على كتفى اهه)هههههههههههههههههههههههه
تحياتى ودمتِ بكل ود وخير
*******************
صديقى عمرو
وعليكم السلام ورحمة الله وبركاته
تحياتى
لأ ياسيدى انا هحبها هى واللى يحصل يحصل واحنا مش بنتهدد وانت عارف
(بامارة الجحش المكسر)ههههههههههههههه
تحياتى ودمت بكل خير وود
*****************
استاذنا الفاضل
م/الحسينى لزومى
تحياتى
واشكرك لاهتمامك وربنا يطمنا عليه ان شاء الله
تحياتى ودمت بكل خير وود
****************
اختى زينب
تحياتى
المفروض انك عارفه اننا عاملين عليكى حزب من المرة اللى فاتت ولا نسيتى
واه طبعا ريمان معايا علشان خاطر مصطفى الصغنون وهو شويه فى البلد ولا ايه
وبعدين ايه تلفى وترجعى لنا تانى ده ؟
احنا اللى بييجى عندنا مش بيسيبنا تانى ابدا ابدا على فكرة

اختى الكريمة انا بدعيلك لانك فعلا زى اختى وخصوصا انى معنديش اخوات بنات وسيبك من بنت عمتى لانى مش بشوفها كل خمس سنين مرة هههههههههه
وربنا يجعلى دعواتى لكِ من نصيبك ان شاء الله
تحياتى ودمتِ بكل خير وود
*****************
اختى الكريمة غربتى
وعليكم السلام ورحمة الله وبركاته
تحياتى
صحيح (انا كل شيئ خلقناه بقدر)
بس ليه ماتقوليش انه قدر مصر اننا احنا اللى بقينا منها مش احنا اللى قدرنا اننا نبقى مصريين
مصر لاتعيبها اى عيبه مصر احنا عيبها الوحيد
الحب والانتماء شيئ فطرى انا معاكى
بس مش معاكى فى موضوع اشخاص وعقول يعنى مثلا لو وجدتى الاحترام والعقول الواعيه والاشخاص العمليه فى دوله تانيه(ومالكيش دعوة بمكة والمدينه دلوقتى)زى مثلا فرنسا او ايطاليا او اى بلد ممكن تروحى تعيشى هناك ؟؟؟؟ اديكى اهه هتبعدى عن وجع الدماغ
هل ده ممكن ؟؟؟ مااعتقدش
اما بقى لما نيجى نتكلم عن الجو الدينى انا عارف انك بترتاحى اوى فى مكه طب وهو مين مش بيرتاح فى مكان زى ده هنا ده الشذوذ بتاع القاعده يعنى ممكن نخالف الفطرة بتاعة حب الوطن والانتماء فى سبيل اننا نقعد فى مكه علشان نصلى ونعبد ربنا
بس هل ياترى انتى هتعيشى هناك على طول؟؟ (هتقولى ياريت)
انما برضو ماينفعش يعنى انتى هتقعدى طول الوقت تعبدى وتصلى ومش هتشتغلى او تشوفى اى حاجه تانى فى الدنيا وراكى تعمليها ؟ اعتقد انه كده ماينفعش ولا ايه ؟
وبعدين هو مين اللى كان السبب فى اننا نبقى فى وسط الميكروبات علشان نقوله ماتعياش ؟ مش هو الشخص اللى بيقول ان الدنيا مليانه ميكروبات ومش عاوز يقعد فى المكان ده هو واحد من ضمن الاسباب اللى عملت الميكروبات دى
احنا السبب وحتى لو مكناش سبب مباشر
يبقى لازم علينا بدل مانقول عاوزين نعيش فى مكان مافيهوش وجع دماغ نقول وندعو للاصلاح واعادة الترتيب
وبعدين نظرة المجتمع اللى بتقولى عليها للمتدين دى مين السبب فيها برضو مش الناس اللى كانت بتاجر باسم الدين وكنتى تلاقى الواحد اول مالادان يأدن يسيب كل حاجه ويجرى على الجامع ودقنه قد كده بس بعد دا كله بيغش فى التجارة ومش بيتعامل بضمير فالناس دى هى اللى خلت نظرة المجتمع للمتدين بالشكل ده
انما لما الناس بتشوف حد متدين فعلا مش لغرض شوفى نظرة الاحترام والتبجيل اللى بتطون فى عنيهم
شوفى اسلوب معاملتهم له
شوفى تطوعهم لخدمته فى اى حاجه هو عاوز يعملها
يبقى واجب علينا اننا نحاول نصحح نظرة المجتمع مش نقعد نشتكى منها
وبعدين نظام الدولة اللى بتتكلمى عليه ده ماينفعش هنا
يعنى مثلا عندك دوله زى السعوديه لازم بعد الاذان كله يبقى فى المسجد والا الجماعه بتوع الامر بالمعروف مش عارف يعملو فيه ايه فبقت الصلاة عاده عند البعض وليست عباده وانا شوفت البعض منهم بيجرى على المسجد انما بعد مابيخرج بيعمل حاجات يندى لها الجبين وممكن مايعملهاش واحد مش بيصلى خالص
التدين لو لم يكن نابع من الشخص عن حب واقتناع معلش يعنى يبقى مالوش لازمه

واختلف معاكى كمان مرة لأن الانسان عمره ماهيلاقى الامان وراحة البال والاحترام الا فى بلده مهما كان

اختى الكريمه دوما رأيك يسعدنى ويثرينى
تقبلى تحياتى ودمتِ بكل خير وود
*********************
د.آيه
تحياتى
وبارك الله فيكى وجزاكى كل خير اختى الكريمة
اسعدتنى زيارتك لمدونتى المتواضعه ويارب ماتكونش اخر مرة
وربنا يفك ضيقة بلدنا ويرجعها تانى مصر المحروسه بايدين ولادها وشبابها
تحياتى ودمتِ بكل خير وود
والسلام عليكم ورحمة الله وبركاته

المعتصم يقول...

اختى غربتى
وعليكم السلام ورحمة الله وبركاته
تحياتى
اشكر سؤالك
والحمد لله كل خير
مجرد شوية تعب بسيط والحمد لله على كل حال
عارفه بقى تغير الجو والزكام وكده
وحتى لو كنت روحت المنتجعات السياحيه للعادلى جروب علشان بحب مصر مش هتفرق كتير ووالله هتكون اهون من حاجات كتير فى دنيتنا دى
تحياتى
ودمتِ بكل خير وود
والسلام عليكم ورحمة الله وبركاته

ريمان يقول...

السلاااااااااااام عليييييييييكم

انا كيييييييييييييت


ما توسع بقه منك ليه

الله؟

هو كل ما اجى الاقى زحمه كده


هههههههه

جايه اسبقك واقول كل سنه وحضرتك طيب

بمناسبه ذكرى المولد النبوى الشريف


ومش تنسى بقى تجيب حلاوه المولد لعريسى

ماشى؟

اتفقنااااااااااا



من حق

هى زينب لسه مش ردت عليك؟

انا بعتلها تعليق من يومها ومش ردت عليا ولا على حضرتك

معلش معلش

تلاقيها قاعده مع العريس

قصدى يعنى مشغوله بالعريس

قصدى يعنى بتتفسح مع العريس

قصدى يعنى بتتدلع على العريس

يوووووووووووه

هههههههههههه

شكلى لبخت

norahaty يقول...

السلام عليكم ورحمة
الله تعالى وبركاته
كل سنة وحضرتك بالف خير
ياأستاذ معتصم ياغواص فى
بحور قصائدنا العربية(الاصيلة)
وو(تفشحط الفشحاطُ مـن شحـف الحفـى **بـربـريٌ سـقـى الهيـهـعَ البُعـبـلِ

يامُدحـشـراً بالقحطلـيـن تحشـرفـت** شرافتـاه فـخـر كألـخُـر بُعـصُـلِ

ألا شاح أبو شكري على قـومٍ فغطَسهـم **ألا ليـت ابــو شـكـري مشلكل )
.......
ومرة تانية كل سنة وانت طيب

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
عروسة مصطفى الصغنون
ريمان هانم ابوالدهب
وعليكم السلام ورحمة الله وبركاته
كله وسع اهه
وبعدين هما عاملين الزحمة دى علشان عارفين انك جايه ومستنيينك
علشان تسلمى عليهم
كل سنة وانتى وامتنا الاسلاميه كلها بكل خير يارب
وطبعا انتى دايما سباقه بالخير
وبخصوص زينب
مش مشكله ياستى خليها تتفسح مع العريس او تقعد مع العريس
فوتى انتى الكبيرة برضو
بس على فكرة هى ردت عليا هنا فى التعليقات
...........
بجد ماتزعليش ياريمان يمكن انامااخدتش بالى مت التعليق انا شوفت بتاع الدكتورة نورا اللى بعدك وكنت هكتب البوست الجديد وعشان كده مارديتش عليه
سماح بقى
وهبقى اخلى العريس يتوسطلى عندك علشان ماتزعليش
اوك ؟؟
كل سنة وانتى طيبه وبكل خير يارب
تحياتى ودمتِ بكل خير وود
************
الدكتورةnorahaty
وعليكم السلام ورحمة الله وبركاته
تحياتى
وكل سنه وانتى طيبه وامتنا الاسلاميه طيبه وبكل خير يارب
وابقى شوفى بقى البوست الجديد
انا عارف انه هيعجبك اوى
تحياتى ودمتِ بكل خير وود
والسلام عليكم ورحمة الله وبركاته