الثلاثاء، 27 يناير 2009

الصداقة

بسم الله الرحمن الرحيم

السلام عليكم ورحمة الله وبركاته

من النعم الكثيرة اللى انعم ربنا عز وجل علينا بها نعمة الصداقة

الصداقة هى الوجه غير المرئى للحب

الصداقه هى التى تجمع بين شخصين لغير غرض الا الود والمحبة فى الله

ولكن هل مازال فى زماننا هذا صداقه حقيقيه من التى نتكلم عنها ؟

زمان قالوا فى المثل الصديق وقت الضيق

وقال الشاعر(اعتقد المتنبى) :

خليلك انت لا من قلت خلى ... وإن كثر التجمل والكلام

فنحن كثيرا مانقول اننا فى زمن المصالح والماديات

زمن انتهى منه الحب وصار فيه كل شيئ بثمن

فهل هناك فى هذا الزمن توجد صداقه حقيقيه ؟

قديما قالو المستحيلات ثلاث : الغول والعنقاء والخل الوفى

ياسبحان الله يعنى مش فى زماننا بس ده من زمان والموضوع صعب

وعشان كده من السبعه الذين يظلهم الله فى ظله يوم القيامه كما اخبرنا رسولنا الكريم

(( رجلان تحابا في الله اجتمعا عليه وتفرقا عليه ))

وقد سئل ابوحيان عن اطول الناس سفرا: فقال من سافر فى طلب صديق

وقال الشاعر

جزى الله الشدائد كل خير ... عرفت بها عدوى من صديقى

وقال الامام الشافعى

صديق ليس ينفع يوم بؤس --- قريب من عدو في القـياس

ومـا يبقي الصـديقُ بكل عصر--- ولا الإخوان إلا للتآسي

عبرت الدهر ملتمسا بجهدي --- أخـا ثقة فألهـاني إلتماسي

تنـكرت البلادُ ومن عليها --- كـأن اناسـها ليـسوا بنـاس

انا كنت عاوز اكتب عن الصداقه واقول فيها كتير لقيت ان الموضوع كبير جدا

وان فيه ناس كتير مش مؤمنه بإن فيه حاجه اسمها صداقه فعلا وان كل اللى بين الناس

مجرد علاقات شغل ومصالح ومنفعة

بس انا شايف انه فعلا فيه صداقه حقيقيه وانه فيه ناس بيكون بينها ود وحب خالصين لله مش علشان مصلحه او علشان شغل وده عن تجارب شخصية ولله الحمد(بس هما بصراحه قليلين شوية انما موجودين)

انا كتبت البوست ده علشان اعرف ايه رأيكم فى الموضوع

ياترى فيه فعلا صداقه حقيقيه؟

ولا زى ماكتير من الناس قديما وحديثا بيقول انه مافيش حاجه اسمها صداقه؟

ياريت اللى يكتب تعليق يقولى رأيه فى الموضوع بصدق

فى انتظار ارائكم

والسلام عليكم ورحمة الله وبركاته


هناك 16 تعليقًا:

zainab يقول...

السلام عليكم و رحمة الله و بركاته

أخى المعتصم

أنا من وجهة نظرى شايفه ان فيه صداقه حقيقيه

الصداقه الحقيقيه شئ جميل طبعا

اسمح لى أقول معنى الصديق ايه ؟؟؟؟

ص : الصدق
د : الدم الواحد
ي : يد واحدة
ق : قلب واحد


الصديق الحقيقى هو الذى يظن بيك الظن الحسن و يلتمس لك العذر

الصديق الحقيقى هو الذى يكون معاك فى السراء و الضراء فى الفقر و الغنى

الصديق الحقيقى هو الذى يؤثرك على نفسه ويتمنى لك مايتمناه لنفسه

الصديق الحقيقى هو الذى ينصحك إذا رأى عيبك و يشجعك على العمل الصالح

الصديق الحقيقى هوالذى يحبك فى الله دون مصلحه

الصديق الحقيقى هو الذى يدعو لك بظهر الغيب

وكما قال الإمام الشافعى

"سلام على الدنيا إذا لم يكن بها صديق صـدوق صـادق الوعـد منصـفـا"

أعتذر إن كنت طولت شويه

لكن فعلا الكلام عن الصديق محتاج كلام كتير

تحـيـاتـى

موناليزا يقول...

موضوع مميز حقا
متفقة معاك فى ندرة وجود الصديق الحقيقى
ولكنه بالفعل موجود حتى وان قل
فالصديق من لايتخلى عنك وقت الضيق
الصديق من اذا قلت صدقك واذا وقعت ساندك واذا هوجمت دافع عنك
ولذلك من له صديق هكذا نصيحة لايفرط فيه ولا بكنوز الدنيا

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
أختى الكريمة زينب
وعليكم السلام ورحمة الله وبركاته
تحياتى
انا معاكى انه فيه صداقه حقيقيه بس للاسف قليلة حبتين تلاته اربعه
الناس دلوقتى مبقاش حد فيهم فاضى يسأل على حد او يقف جنب حد هو مالوش عنده مصلحه (اللهم الا من رحم ربى)وكل واحد بيقول وهو انا فاضى اشوف اللى ورايا احسن
الصداقه شيئ جميل جدا يمكن كمان هى احلى من الحب أو هى نفسها الحب والمقولة بتاعة ان االصدقه هى الوجه الغير مرئى للحب اكيد صحيحه
بس يعنى ممكن نختلف فى حكاية التعريف دى
صدق ماشى انما دم واحد ازاى يعنى يعنى لو انا Aموجب ماينفعش اصاحب واحد فصيلته Oسالب مثلا (انا بهزر يازينب)
وبشكرك على رأيك وتعليقك الجميل خالص ده وبجد نورتى المدونه وبعدين ياستى ابقى طولى براحتك ده مش بيزعلنى بالعكس بيسعدنى
تقبلى تحياتى وتقديرى
ودمتى بكل خير وود
**************
أختى موناليزا
تحياتى وتقديرى
وكمان شكرى (يعنى شكرى ماهوش نفس )على رفعك من روحى المعنويه وبتقوليلى موضوع مميز !!وهو انا اروح فين فى الكلام الجامد اللى بتكتبيه (انامش بنافق والله)
مش قال(الصديق الحقيقى)موجود بس نادر شويتين
يعنى كلامى مطلعش غلط اهه اقول ايه للعلوج اللى لما الواحد يتلكم معاهم يقولوه انت اللى مش بتثق فى حد وواخد الدنيا كده قفش ماالناس زى الفل وادينا كلنا اصحاب وزى الفل
بس ساعة ماالواحد بيحصل له اى موقف مايلاقيش حد جنبه منهم وكل واحد يطلع بمليون حجه (ربنا مايحوجنا لحد فيهم)
وشكرا كمان على النصيحه الغاليه ففعلا من له صديق حقيقى لازم مايفرطش فيه ابدا
اسعدتنى زيارتك جدا
تقبلى تحياتى وتقديرى
ودمتى بكل خير وود
والسلام عليكم ورحمة الله وبركاته

القلم السكندري يقول...

السلام عليكم

أخي الحبيب المعتصم

بالنسبة للصداقة الحقيقية فهي موجودة بالفعل.. ولكنها نادرة

هناك من (الرجال) من رأيتهم بأُم عيني قد يلقي بنفسه في ما هو غنيٌ عنه من التهلكة لإنقاذ أخٍ له في الله من بعض الضيق

كنا بادئ الأمر نتعجبُ من هذا التفاني مع من لا تجمعه به قرابة أو صداقة قوية.. لكن الشدائد مختبرُ الرجال

وقد أنعم الله عليّ بمعرفة أمثال هؤلاء في الشدة والرخاء

إلا أنهم نُدرةٌ بحق

والسعيد من وفقه الله لأمثالهم ولو لأخِ صدق واحدٍ منهم

قد يختلف الفكر

ولكنّ الرجولة يستحيلُ أن يغيرها أي اختلافٍ بينكما


ثم بعد ذلك لا أنسي أن أشكر تعقيبك القوي علي مدونتي

دمت معتصما

وبود

المعتصم يقول...

بسم الله الرحمن الرحيم
السلام عليكم ورحمة الله وبركاته
اخى الفاضل القلم السكندرى
وعليكم السلام ورحمة الله وبركاته
نورتنى يابشمهندس
احنا متفقين على ان الصداقه الحقيقيه موجوده بس نادرة شويه
والحمد لله ومن فضله عز وجل على شخصى الفقير ان انعم عليا بمثل هذا الصديق والذى كما تكرمت وذكرت فعلا تختلف طباعنا بشكل كبير ولكننا ولله الحمد والشكر اكتر من الاخوات ويمكن اذكر موقف بسيط من مواقفه معايا
كان والدى فى المستشفى وكانت مصاريف علاجه كتيرة شوية والحمد لله كانت معايا فلوس ومستورة بس لقيت حاجه غريبه ابناء العمومه اللى هما المفروض يقفو جنبى وعمهم تعبان ماكنش الموضوع فارق معاهم وهو صديقى ده ماكنش معاه فلوس اول ماعرف باع من ذهب مراته وجابلى فلوس وجه المستشفى ولما رفضت اخدهم زعل وحلف وبعد كده دخل يسلم على والدى انا اللى كنت بسكته من كتر العياط بتاعه واولاد عمى واقفين برة الاوضه يتكلمو ويضحكو مع بعض
الحمد لله الذى رزقنى بجانب نعمة الكثيرة نعمة اضافيه وهى هذا الصديق
اشكر مرورك ياهندسه ونورت مدونتى المتواضعه واسعدتنى زيارتك
تقبل تحياتى وتقديرى
ودمت بكل خير وود
والسلام عليكم ورحمة الله وبركاته

القلم السكندري يقول...

أخي الكريم

رجاء مراجعة بريدك

تقبل تحياتي

د/عرفه يقول...

بصراحه انا شايف ان الانسان بيفقد كتير اوى لو معندهوش اصدقاء بجد

وفعلا النوع الحقيقى من الصداقه دى موجود

احلى احساس الواحد ممكن يحسه
لما يلاقى ناس حواليه بتحبه بجد

zainab يقول...

أخى المعتصم

بالنسبه لدم واحد عديها ( هو انت كل حاجه هتقف عليها )


أنا معاك فى ان الصداقه الحقيقيه قلت جدا بس هى فعلا لسه موجوده

وبالنسبه لموقف أولاد عمك الظاهر ان دى بقت حاجه طبيعيه مش عندكم بس يا معتصم لا دى عندنا كمان وفى كل حته

مش عارفه ايه اللى بيحصل ده
الدنيا حصل فيها ايه
شكلى كده هسيب موضع الصداقه و اتكلم فى صلة الرحم

بس عارف ممكن يكون ليك صديق حقيقى و ظروفه تشغله عنك بس أكيد وقت الفرح هتلاقيه و وقت الحزن هتلاقيه واقف معاك و لا انت ايه رأيك ؟؟؟؟؟؟؟؟

واسمح لى أرد على موضوع الصداقه عندى فى المدونه بخاطرة كنت كتبتها لصاحبة عمرى ناس ربنا يسامحهم فرقوا بينى وبينها بس الحمد لله عشان هى صديقتى بجد مابعدناش كتير


تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
******************
د/ عرفه
تحياتى
اشكرك على مرورك بمدونتى المتواضعه ونورت يادكتور (على الرغم من انك زملكاوى)
احنا مش مختلفين فى ان الصداقه الحقيقيه موجوده بس احنا بنقول انها قليله شويتين صحيح الواحد له ناس قريبه منه وبتحبه انما دول قليلين مش فى حجم الناس بتاعة المصالح وكده
اسعدتنى زيارتك يادكتور
تقبل تحياتى
ودمت بكل خير وود
*******************
أختى زينب هانم
تحياتى لسيادتك
حاضر ياستى هعديها
ومش كل حاجه هقف عليها بس انا بحب انكش معاكى بس
حكاية ولاد عمى دى بقت منتشرة فى الدنيا كلها ده صحيح بس دى كارثه وانهيار فظيع فى قيمنا واخلاقنا
لما ابناء العم اللى هما اقرب الاقربين للواحد مايبقوش خايفين عليه وبيحبوة امال مين اللى هيخاف عليه ويحبه ؟؟؟
اقولك احنا نجيب ناس من الصين تخاف عليناوتحبنا(مش كل حاجةدلوقتى بقت صينى)
حسبى الله ونعم الوكيل
اكيد معاليكى عندك حق فى موضوع انه ممكن يكون للواحد صديق حقيقى بس الظروف شاغلاه انما اول ماالواحد يحتاجه بيلاقيه على طول وده فعلا بيكون انسان هايل وبيبقى على الرغم من ظروفه ومشاغله وهمومه تحت امر صديقه فى اى لحظة يحس انه محتاجه فيها وبيسيب كل مشاغله وكل حاجه وراه ويسرع للوقوف جنب صديقه سواء فى الفرح او فى الظروف الصعبه ويمكن كمان فى الظروف الصعبه اكتر لانه فى الفرح بيبقى فيه كدابين زفه كتير انما فى الاوقات الصعبه مابيكونش فيه حد الا المخلصين بس ودول قليلين خاااااالص
بصى يازينب انتى ماتستأذنيش انتى تعملى كل اللى انتى عاوزاه على طول وانا يسعدنى ان البوست بتاعى يفكرك بحاجه انتى كنتى كاتباها قبل كده
وليه ربنا يسامحهم اللى فرقو بينكم؟؟؟
ربنا يجازيهم على قد فعلتهم
وطالما انك وصاحبتك بتحبو بعض والصداقه اللى بينكم كانت لله يبقى حتى لو بعدتو عن بعض فكل واحده فيكم هتفضل تحب التانيه حتى لو ماقالتش كده
والحمد لله انكم مبعتدوش كتير
شكرا على مرورك ونقاشك يا اختى الكريمة وتقبلى تحياتى
ودمتى بكل خير وود
والسلام عليكم ورحمة الله وبركاته

zainab يقول...

أخى المعتصم

بالنسبه لكلامك " لما ابناء العم اللى هما اقرب الاقربين للواحد مايبقوش خايفين عليه وبيحبوة امال مين اللى هيخاف عليه ويحبه ؟؟؟ "

أنا كتبت قبل كده فى الموضوع ده خاطره و ان شاء الله هبقى نزلها فى المدونه

القرايب اللى هما المفروض يكونوا أقر الناس خلاص ماعدوش موجودين

عايز تجيب ناس صينيين
ياااااااه هما الصينيين ورايا ورايا مش كفايه انى بتعامل معاهم فى شغلى
بس بجد ناس فى قمة الإلتزام و الدقة

تحياتى

zainab يقول...

أخى المعتصم

خلاص انا نزلت البوست
معلش دوختك معايا

تحياتى

عابر سبيل يقول...

بسم الله الرحمن الرحيم
السلام عليكم ورحمه الله وبركاته
موضوع الصداقه ده من اهم الموضوعات
ربنا يجعله في ميزانك خالصا لوجه الكريم
ولي خاطرة عن موضوع الصداقه او الصحبه
لو تأملنا حياة النبي عليه الصلاة والسلام سنجد ان الصحبه كان لها دور مهم في حياة النبي عليه الصلاة والسلام وان من اصحاب النبي عليه الصلاة والسلام ابو بكر رضي الله عنه وهو رفيق النبي عليه الصلاة والسلام في الهجرة
مش النبي عليه الصلاة والسلام كان ممكن يهاجر لوحده ولكن ممكن ان تكون رحله الهجرة تكريم لابي بكر وايضا اراد النبي عليه الصلاة والسلام ان يعلمنا ان نستعين في الشدائد بالصديق
والله اعلم
اما بخصوص السؤال عن وجود اصدقاء بجد في الزمن ده اقول الحمد لله هم موجودين
وانا اعتقد ان الاصدقاء دول رزق فانا احمد الله عز وجل علي اصحابي ربنا يبارك لهم كلهم ويزقهم ما يتمنوا ويهديهم ويهدي بهم ويجعلهم من اهل الفردوس الاعلي من الجنه اللهم امين
اما بخصوص من يقف معاك وقت الشدة او الصديق وقت الضيق كما يقولون فهذا
صحيح ولكن دعونا نوسع هذا الدائرة بان لا نضيق العلاقه علي هذا الاختبار الذي قد يفشل فيه الكثيرون فلدي رأي قد يكون صواب او لا ان الصديق هو من يأخذ بيدي واتعلم منه او يعنني علي ان اتخلص من عاداتي السيئه او يأخذ بيدي لعمل الخير او بمعني اشمل هو من يؤثر في واتأثر به
وان كان وجود المخلصين في هذه الايام صعب فلو رأيت هذا الصديق فتمسك انت به وحاول ان تكتسب مودته وان لم يسال عنك فبادر انت بالسؤال عنه هيفتكر ده ليك وممكن تلقيه في يوم بيتصل ويقولك انا افتكرتك النهاردة وقلت اشوفك انا فعلا مقصر ولو حتي مكالمه وده لو انتم بعادين عن بعض بس ده لو كان فعلا صديق بجد لان بجد احيانا بننشغل والدينا بتخادنا
اما الناس اللي بتعرفك علشان مصلحتها بيتعرفوا والواحد بيقول ان الحمد لله ان صدقاتهم لم تدم وانا عن نفسي لما بقابل النوع ده منهم باخد منهم جنب وتقربيا بوقف التعامل معاهم ربنا يبعدهم عننا
يمكن مكنش عرفت اوصل وجهه نظري لان الموضوع كبببببببببببببببير يحتاج الي صفحات
وتقبل الله منا ومنكم صالح الاعمال
عابر سبيل

المعتصم يقول...

بسم الله الرحمن الرحيم
السلام عليكم ورحمة الله وبركاته
*********
أختى زينب تحياتى
شوفت البوست الجديد وبصراحه هو هايل
مشاعر جميله وحب صادق
ربنا يديم الحب بينك وبين صديقتك يارب
تحياتى
ودمتى بكل خير وود
***********
أختى عابر سبيل
وعليكم السلام ورحمة الله وبركاته
تحياتى
ونورتى
انا متفق معاكى فى ان الصحبة فى الهجرة كانت تكريم للصديق وكمان درس لينا من رسولنا الكريم عليه الصلاة والسلام ولازم نستفيد منه
وفعلا الاصدقاء دول بيبقو رزق والحمد لله ان رزقك واسع ياستى وان ربنا انعم عليكى باصدقاء كويسين
وحكاية الصديق وقت الضيق هى واسعه وشامله
المثل مش محدد وقت الضيق ده امتى بالظبط ممكن وقت يكون الواحد فيه زعلان يبقى وقت ضيق وواجب الصديق هنا انه يقف جنب صديقه ويواسيه ويشد من أزره
يعنى جملة وقت الضيق جمله شامله مش بس معناها انه وقت الضيق ده يكون فى الازمات الماليه وبس لأ ده احيانا المسانده النفسيه بتكون اهم مليون مرة من المساعده الماليه
معاكى فى اننا لازم نحافظ على الاصدقاء اللى نلاقى فيهم الصدق والحب فى الله ولله واننا احنا اللى لازم نسعى اننا نوطد علاقتنا بيهم لانهم كنز مش ممكن حد يفرط فيه ويمكن ده كان محتوى تعليقات الاخوة اللى علقو على الموضوع
أختى الكريمة دائما رأيك ونقاشك يسعدنى
تقبلى تحياتى وتقديرى
ودمتى بكل الخير والود
والسلام عليكم ورحمة الله وبركاته

fL0weR-giRL يقول...

السلام عليكم
الصداقه بجد موضوع جميل جدا
وان الواحد من غير صديق بيحس بالوحدة واي شخص في عيوب ومميزات اكيد الشخص الي انت هتصحبوا داه في حاجات بتعجبك فيه جدا وفي حاجات ماتعجبكش فيه بس انا رأيي ان اهم الصفات اللي مفروض تكون موجودة في الصديق الأمانه والصدق يعني يكون محل ثقه وفي بيت شعر بيلخص الكلام داه
(((اذااردت صديقا بغير عيب فعيش واحيدا من غير صاحب ))) واحنا بشر والبشر مش معصوم من الخطأ
وشكرا لك
:
:
واتمني زياره مدونتي المتواضعة.........

المعتصم يقول...

بسم الله الرحمن الرحيم
السلام عليكم ورحمة الله وبركاته
الاخت الكريمة
flower-girl
وعليكم السلام ورحمة الله وبركاته
تحياتى ونورتى المدونه
كلامك مظبوط والصداقه حاجه هايله وفعلا الواحد من غيرها بيبقى وحيد فى الدنيا
بس مش شرط ان الطباع تكون واحده علشان نبقى اصدقاء
عادى ممكن الطباع تختلف المهم الاساسيات تكون واحده
يعنى ماينفعش واحد مش ملتزم مثلا يبقى صديق لواحد ملتزم ومتمسك بدينه لازم واحد فيهم يأثر على التانى واذا ده محصلش يبقى العلاقه بينهم مش هتعيش ومش هيبقى فيه صداقه وكده
واكيد الامانه والصدق من اهم الصفات اللى لازم تتوفر فى الصديق
كلامك جميل جدا
واشكرك على مرورك
تقبلى تحياتى
ودمتى بكل خير وود
والسلام عليكم ورحمة الله وبركاته

غير معرف يقول...

شكرالك