الأربعاء، 21 يناير 2009

التاج لغربتى والاسئلة للعبد لله

بسم الله الرحمن الرحيم




ده كان التاج اللى بعتته الاخت زينب لاختنا غربتى وبعد كده الاتنين اتفقو ودبسونى فيه ولانى مقدرش ارفضلهم طلب هجاوب عليه وامرى الى الله
بسم الله نبداء
س 1 – بدأت تدون امتى ودخلت عالم التدوين ازاى ؟
جــ1 – بدأت تدوين فى شهر نوفمبر 2008 وساعتها كانت نفسيتى تعبانة شويتين لان البنت اللى بحبها اتجوزت بعد ماابوها رفض انى اتجوزها لظروف ماديه والله اعلم فكنت متضايق ومش لاقى حد اكلمة فى الموضوع ده فلقيت بالصدفه الصفحه اللى هى بتاعة ازاى الواحد يعمل مدونة طقت فى دماغى الفكرة وقلت اكتب اللى نفسى اقوله فيها وعلى فكرة كتبت فيها حاجات كتيرة خالص بس بعد كده كنت بمسحها يعنى هى بالنسبة ليا نوع من انواع الفضفضه
س 2 – مين اكتر حد بتحب تعليقه على بوستك الجديد؟
جـــ2 – اكتر حد بحب تعليقه على البوست الجديد كل اللى بيعلقو عندى لانهم والحمد لله رب العالمين ناس محترمين وفكرهم عالى ومثقفين واهم من ده كله ناس ملتزمين وبيدونى النصيحه السليمة لو كنت على خطاء وبيشجعونى لو كنت على صواب
س 3 – ايه اهم حاجه اتعلمتها من التدوين ؟
جـــ3 – اهم حاجه اتعلمتها من التدوين مش عارف بصراحه بس هو حسن كتير من حالتى النفسيه وكمان كان سبب فى بداية رجوعى الى الطريق القويم (وده موضوع كبير شويتين)
س 4 – حاسس ان التدوين له تأثير ؟
جـــ4 – اكيد التدوين له تاثير لان اى واحد لما بيتناقش مع اى حد تانى بيكون فيه نتيجه للنقاش ده هى دى بالظبط نفس نتيجة التدوين وتأثيره انا بعرض موضوع واللى بيقراه بيعلق عليه ونتناقش فيه
س 5 – اذكر خمسة احلام تخص مستقبلك ؟
جـــ5 – خمس احلام تخص مستقبلى:
أ‌- ان شاء الله ربنا ينصر امتنا الاسلاميه وتتوحد ونحرر بيت المقدس (ده بالنسبة للامة)
ب‌- ان شاء الله ربنا يكرمنى واروح الحج واصلى فى الكعبة
جـ - ان شاء الله مشروعى يكبر وينجح ولا الحوجه للوظيفه الحكومى اللى ذلتنا
د- ان شاء الله ربنا يوفقنى ويرزقنى زوجه طيبه بنت حلال على خلق تشاركنى مستقبلى
هـ - ان شاء الله ربنا يرزقنا الذرية الصالحه ونعرف نربيهم على دينه ويكونوا من اعمالنا اللى تبقالنا بعد مانموت
س 6 – اذكر على الاقل شخصين متواجدين فى حياتك حاليا كنت تود وجودهم من زمن ؟
جـ6 – شخصين متواجدين دلوقتى كنت اتمنى تواجدهم من زمن مش عارف بس انا متهيألى ان كل واحد فى حياتى له ميعاد معين بييجى فيه علشان حاجه معينه تحصل فبالتالى يبقى ماينفعش انهم كانو يبقو موجودين زمان
س 7 – على من تطلق الرصاص ؟
جــ7 – كتييييييييييييييييييييييييييييييييييييييييييييييييييييييييييييييييير
س 8 – ماهى السعادة من وجهة نظرك ؟
جـ8 – السعادة حاجه بسيطه جدا تتمثل فى القناعه والرضا يعنى الواحد يعيش عيشه بسيطه وهو راضى وقانع ويؤدى فروض ربنا ويبعد عن معصيته يبقى ملك الكون كله ويبقى اخر انبساط
س 9 – كيف تصل الى السعاده ؟
جــ9 – نصل للسعاده عن طريق الرضا بقضاء الله وقدره ونعمل اللى علينا وبعد كده نسيب الباقى على ربنا
س 10 - هل السعادة وهم ام انها حلم صعب ؟
جـ10 – السعاده مش وهم دى حقيقيه جدا بس هى صعبه شوية لاننا بعدنا عن طريق ربنا وهو اللى بيرزقنا السعاده دى وانشغلنا بالبحث عن الدنيا فشغلتنا ونستنا السعاده
س 11 – ماهى اكثر اللحظات التى شعرت فيها بالسعاده ؟
جـ11 – اكثر اللحظات التى شعرت فيها بالسعادة اول حاجه هفتكرها لانها كانت قريبه جدا لما جه مصطفى الصغير ابن اخويا للدنيا وده كان يوم 16/12اللى فات كنت طاير بيه طيران
وكمان لما الواحد ربنا يقدرة ويعمل حاجه كويسه ويشوف فعلا جزاء عمله من ربنا عز وجل وازاى بينعم عليه وييسرله اموره
س 12 – هل انت متفائل وعندك امل ؟
جـ12 – موضوع متفائل ده بيكون متوقف على الحاله النفسيه بس هو والحمد لله فى اغلب الوقت متفائل ويحدونى الامل
س 13 – ايه اكتر شيئ بتحبه واكتر شيئ بتكرهه ؟
جـ13 – اكتر شيئ بحبه الهدؤ والسكون ولذلك انا من عشاق الليل (لعدم الازعاج فيه)
واكتر حاجه بكرهها هى الجدل على الفاضية والمليانه انا بكره الجدل جدااااا فى اى حاجه
س 14 – ضع مرادف او تعريف من عندك لكل كلمة ؟
جــ14 – مرادفات :
الحب : شعور جميل ربنا مايحرم حد منه
الحنان: اكيد الامومة
الرحمة: نعمة من الله عز وجل
التفاؤل:من اسباب السعادة
السعادة: القناعه والرضا وطبعا ده برضا ربنا عنى
س 15 – ماهى مواصفات فتاة احلامك ؟
جـ15 – مواصفات فتاة الاحلام انها تكون مؤدبه على خلق تراعى ربنا فيا وتكون ست بيت شاطرة ومتكونش عصبية وتكون عاقلة وراسية كده ومش طماعه وكمان دمها خفيف
س 16 – صفات تتمنى ان تكون موجوده فيك ؟
جــ16 – صفات اتمنى انها تكون موجوده فيا : نفسى اكون مثقف لانى ساعات كتير بحس انى جاهل وكمان نفسى ابقى جريئ اكتر واكون اجتماعى اكتر لانى منطوى ع الاخر
س 17 – اصعب موقف حصلك واطرف موقف ؟
جــ17 – اصعب موقف حصل كان والدى تعبان شوية وكنت فى البيت وحدى وفجأة اغمى عليه ومكنتش عارف اتصرف ازاى واخواتى الاتنين كانو فى القاهرة وعلى الرغم من ان قرايبنا جنبنا فى البيت الا انى محبيتش انهم يشوفوه فى الحاله دى اتصلت بدكتور صيدلى صاحبه جه قعد معاه واداله حقنة فوقته على ماجبت الدكتور هو صحيح بعد كده تعب تانى انما نقلناه المستشفى وربنا انعم عليه بالشفا
اطرف موقف بقى لما كنت فى قاهرة المعز و كانو عاملين العربيتين بتوع الستات فى المترو فى الوسط وكان الموضوع ده لسه جديد وانا مااعرفش انا اعرف ان اول عربيتين هما بتوع الستات ومتعود انزل السلم اركب العربيه اللى فى الوش على طول واركب الاقى كل اللى فى العربيه ستات ايه ده وشى جاب الوان ومحدش فيهم قالى حاجه كانو يبصو عليا ويضحكو انا فضلت واقف جنب الباب نزلت المحطة اللى بعدها وركبت العربيه التانيه يااااادى النيله هو القطر كله ستات ولا ايه وقاعد دماغى هتفرقع من الكسوف وكل الدم اللى جسمى جه بقى فى وشى وودانى مش احمرت لا ده الدم كان طالع منها بعد كده بمحطتين لاحظت انه فيه رجاله لسه عايشه اهو وبتركب المترو وجه اتنين يركبو ففيه واحده قالتلهم دى عربية الستات طب ماتقولى ياحاجه من الصبح حرام عليكى عنها ونزلت زى الصاروخ كان موقف مهبب
س 18 – الصفات اللى بتحبها وتكرهها فى نفسك ؟
جـــ18 – الصفات اللى بحبها فى نفسى الاصرار والصبر والصفات اللى بكرهها الخجل والطيبة الزيادة
س 19 – حاجه عملتها قبل كده وتتمنى تعملها تانى ؟ وحاجه عملتها قبل كده وماتتمناش تعملها تانى ؟
جــ19 – حاجه عملتها قبل كده واتمنى اعملها تانى انى ارجع اختم القرآن حفظ بإذن الله اما الحاجه اللى عملتها ولا اتمنى انى اعملها تانى هى محاولة الانتحار بعيد عنكم
س 20 – ايه رايك فى الحب وبكل صراحه ؟
جــ20 – ماقلنا الحب شعور جميل لأى حد ولأى حاجه يعنى الواحد لازم يحب الناس ويحب شغله ويحب حياته وبالتأكيد مش هيحب ده كله الا لما يكون فى الاول وفى الاخر بيحب دينه ومتمسك بيه
س 21 – لخص الحياة فى سطر واحد ؟
جــ21 – الحياة هى امتحان لينا اما اننا ننجح فيه وندخل الجنة او نفشل والعياذ بالله وعالنار عدل
س 22 – امتى وليه تخبى دموعك وضحكتك ؟
جــ22 – انا بخبى دموعى على طول لدرجة انى احيانا بكون لوحدى ومش بعرف اعيط لان ده عندنا بيعتبر ضعف والراجل المفروض ميكونش ضعيف
اما الضحكة مش بخبيها الا لو كانت هتجرح اللى قدامى
س 23 – لو جتلك الفرصه تعبر عن شعورك تجاه شخص معين هتقوله ايه قدام الناس ؟
جــ23 – عادى هقوله كل حاجه موجوده فيه بكل صراحه واحيانا بكل بجاحه على الرغم من انى خجول على الاخر بس دى فرصة بقى مش هتتعوض
س 24 – اكتر حاجه بتعملها فى يومك ؟
جـ24 – اكتر حاجه بعملها فى يومى دى مش عارفها دى حسب الشغل يعنى ممكن انام وممكن اقعد قدام النت وممكن لا دى ولا دى وادور الف على الصيدليات كله حسب الشغل
س 25 – مثلك الاعلى اللى تتمنى تبقى زيه ؟
جــ25 – طبعا هو قدوتنا الرسول عليه الصلاة والسلام مافيش شك فى كده بس لما بنشوف حد كويس فى اى حاجه وناجح بنحب نكون ناجحين زيه فى الحاجه دى
س 26 – الحاجه اللى لو ربحتها اكنك ملكت العالم كله ؟
جــ26 – الحاجه اللى نفسى اكسبها هى رضا ربنا عنى بعد كده مافيش حاجه تفرق معايا
س 27 – نقطة ضعفك ؟
جــ27 – نقطة ضعفى هى الطيبة الزياده عن اللزوم (خاربه بيتى )
س 28 – لو تحب تهدى التاج ده لشخص تهديه لمين ؟
جــ28 – مش ههديه لحد



ولا اقولك تعالى هنا يا ابلة زينب انا بهديكى التاج ده اهداء شخصى جدا ولازم تجاوبى على كل الاسئلة اجابات مستفيضه وتشرحيها شرح وافى

من أعمالكم سلط عليكم

ههههههههههههههههههههه

انا جاوبت على الاسئلة بصراحه شديده جدا واللى شجعنى على كده انه مافيش حد يعرفنى معرفة شخصيه فلو فيه بعض اجاباتى معجبتش حد يبقى يقولى رايه بس يراعى يعنى انه مافيش حد كامل وان الكمال لله سبحانه وتعالى
والسلام عليكم ورحمة الله وبركاته

هناك 32 تعليقًا:

fnoonh يقول...

فنونة اول تعليق

تكمل قراءة وتيجي بسرعة اوك

fnoonh يقول...

مشاء الله ردك على الاشئلة عقلاني جدا و جميل
وفعلا مافيش انسان كامل والكمال لله وحده بس ربنا يزيدك ايمان ورضا ويجعلك في تقدم دائم للاحسن فالاحسن ويرزقك كل التتمناه واهمها زي ماقولت رضا الله عليك

دمت بكل الود

zainab يقول...

أخى المعتصم

لسه و الله بضحك على موقف المترو ده حتة موقف يهلك من الضحك و الله موقف فعلا نكته

إن شاء الله ربنا يرزقك زيارة بيته الحرام و كل اللى بيتمناه عشان انا كمان بتمنى أزوره و يرزقك الزوجه الصالحةو الذريه الصالحة

بس كان نفسى أعرف مين الكتيييييير اللى عايز تتطلق عليهم الرصاص ؟

إجاباتك ماشاء الله عليها
ربنا يبارك لك و يوفقك إلى ما يحب و يرضى

انتى بتهدينى التاج أفهم من كده ان ده تار و بتخلصه منى

تحياتى

موناليزا يقول...

جميل صراحتك وشجاعتك فى الاجابة
وفقك الله دائما لما فيه الخير


----------------------------------
ادعوك لزيارة هذا الرابط
http://kollonamoqawma.blogspot.com/

zainab يقول...

أخى المعتصم

بالنسبة للتاج ان شاء الله هجاوب على أسئلته بس ادينى فرصه كام يوم لأنى عامله حفلة صغيرة فى المدونه عندى يوم 24 بمناسبة عيد ميلاد بوسى انت طبعا مش محتاج لعزومه
وبعد الحفلةبكام يوم هنزل التاج إن شاء الله

تحياتى

عابر سبيل يقول...

بسم الله الرحمن الرحيم
السلام عليكم ورحمه الله وبركاته

اولا حقق الله لك ما تريد وتتمني مع انه في حاجه ممكن تكون فاتت عليك في الامنيات
انت اتمنيت دينا والاخرة مالهاش نصيب من الاحلام وده للتذكرة فقط قال تعالي (ربنا اتنا في الدنيا حسنه وفي الاخرة حسنه) وهذه دعوة للدنيا والاخرة
اما بخصوص الطيبه هي طبعا مطلوبه واد ايه احنا اليومين دول بنعاني من ناس مافيش في قلوبها رحمه يبقي لما يكون حد مننا كويس وعنده الصفه ده يبقي خير بس المذموم فيها هي الزياده لان الشئ اللي بيزيد عن حد بيتقلب ضده
والمؤمن كيس فطن
اما بخصوص الخجل فممكن التغلب عليه بالاحتكاك بالناس وذلك يكون عن طريق العمل الخيري والله هيكسبك خبرات في التعامل والاعتماد علي النفس وكيفيه السيطرة عليها وستكون اكثر جراة اجمع تبرعات فكر مع الاصحاب في افكار جديدة لمساعدة الناس روحوا للناس واسئلوا عليهم وهكذا ( والحكايه ده مجربه)
الله المستعان
واخيرا جزيت كل خير ونفع الله بك

عابر سبيل في ثواب دكتور نفساني ومحلل سياسي

ghorBty يقول...

السلام عليكم ورحمة الله وبركاته

ماشاء الله اسمي منور البوست جزاك الله خيرا

ما شاء الله علي الاجابات كمان ربنا يحقق لحضرتك كل ما تتمني وزياده كمان وان النصر مع الصبر

بالنسبه لدخولك عالم التدوين دا علي فكره مش صدفه مفيش اي شئ في الدنيا صدفه كله قدر ( انا كل شئ خلقناه بقدر ) ولحكمه ولعل دخولك في الوقت دا بالذات من حياتك هو خير كتير لك فاحمد الله واشكره وداوم علي ذلك

اما الطيبه الزايده ديه فالحمد لله برضوه مع انها مش مطلوبه في عصرنا دا الا ان الواحد بيعامل ربنا وبس وربنا هو اللي بيجازي وبيده الثواب فهي مطلوبه في مواقف ومع ناس معينه وفي نفس الوقت في ناس ما يتنفعش معاهم غير السك علي دماغهم علشان يتعدلوا

واضم صوتي لصوت اختي عابر سبيل لازم يكون ليك دور في اي عمل تطوعي اكيد فيه جمعيات خيريه عندكم دور واشترك معاهم بجد هتحس بدنيا غير الدنيا وهتحب دنيتك جدا وهتحس ان لك قيمه وهدف عايش عشانه غير انك هتتعلم حاجات كتير وكمان هتنمي في شخصيتك حاجات كتير جدا ودا عن تجربه انا من الناس بقول كنت فين من زمان عن العمل التطوعي دا خلا لحياتي معني وشكل تاني جرب وهتدعيلنا

وربنا يوفقك في عملك ويرزقك رزق حلال ويبارك لك فيه اهم شئ البركه في الرزق مش كتره والله


ممكن اطلب طلب رخم شويه

ياريت تشيل صورة الست العصبيه الي محطوطه ديه عايزين ندون مضبوط ومن غير فتن :)

وادعوك لزيارة مدونتي الجديده خواطر غربتي

http://khawter-ghorbty.blogspot.com/

جزاك الله خيرا


غربتي

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى فنونه تحياتى وتقديرى
نورتى المدونه سواء اول تعليق او اخر تعليق
وبعدين انا اى حد يعلق عندى هنا لازم يبقى من العشرة الاوائل ليه بقى ؟
لان كل اللى بيعلقو عندى مايكملوش عشرة وانا اللى بكمل التعليقات
شكرا على ردك ودعواتك وربنا يكرمك ويرزقك بكل اللى نفسك فيه اللهم امين
تقبلى تحياتى ودمتى بكل خير وود

المعتصم يقول...

بسم الله الرحمن الرحيم
السلام عليكم ورحمة الله وبركاته
اختى زينب تحياتى
اضحكى اضحكى ربنا يخليكى ضاحكه كده على طول يارب بس كان موقف يعنى ماقولكيش زى ال؟؟؟؟؟؟؟؟
شكرا على دعواتك وربنا يحققلك كل اللى بتتمنيه يارب
الكتير اللى نفسى اضربهم بالنار
منهم مثلا دكتور ربنا فاتح عليه بس مادى فيه واحد مراته كانت تقريبا بتموت وكانت اتعاب العمليه 700جنيه والراجل مش معاه غير 300بس ولازم تعمل العمليه فورا والراجل قاله اعملها العمليه وانا هروح استلف من اى حد بس الحقها رفض غير لما ياخد الفلوس على بعضها يقوله بس دى ممكن تموت يقوله مش مشكلتى وساعتها مكانش معايا فلوس تكمل والله فسيبت الدكتور ومشيت ورفضت انى ابيع له شغل وبضاعه من اللى معايا
هى دى عينة من الناس اللى تستاهل تضرب بالرصاص
وبعدين لازم اهديكى التاج امال اسيب تارى عندك يعنى ؟ ماينفعش احنا مانسيبش تارنا ابدا (التار ولا العار ياهريدى)
*******************
ااااااااااااااااااااااااه
انتى هتتلككى ببوسى وعيد ميلادها عشان تعرفى تذاكرى كويس وتجيبى درجات عاليه مش كده ؟ يالهوى ع البنات
( ان كيدكن عظيم )
مش بتقولى مكنتيش بتيسبى الورقه فاضيه وبتطلعى قبل الوقت بحاجه بسيطه ؟
يعنى دحاحه من الاخر موس مذاكرة
اخوكى بقى كان عادى خالص بالنسبه له الموضوع ده واطلع اول مانص الوقت يادوب يعدى ايوة امال ايه انا لازم اطلع اول واحد (ده من كتر الشطارة)
وبعد كده اى حد يسأل اقوله انا بطلع الاول هههههههههههههههه صعايده بقى
تقبلى تحياتى ودمتى بكل خير وود

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى موناليزا
تحياتى وتقديرى
اشكرك على رأيك ودعائك
انا عديت بسرعه كده على كلنا مقاومة وهرجعلها تانى ان شاء الله وهى بتنادى بكلام انا كنت بقوله من اول مااعلنو وقف اطلاق النار اننا مانقولش خلاص ان الموضوع خلص ونستنى لما تحصل كارثة تانى واننا لازم بقى نتحرك ونحاول نعمل حاجه بجد ونكون عمليين
تقبلى تحياتى ودمتى بكل ود وخير

zainab يقول...

أخى المعتصم

أنالازم أضحك على الموقف فعلا موقف يموت من الضحك

أما بالنسبه للدكتور هقول حسبى الله ونعم الوكيل فعلا عايز الضرب بالنار ايه خلاص ماعندوش رحمة

**********

أنا والله مش بتلكك ببوسى و لا هى حجه
لو نزلت التاج مش هيلحق النهارده 23
و بوسى عيد ميلادها 24
أعمل ايه ؟؟؟؟؟؟

انا فعلا مااتعودتش أسيب ورقة الإجابه و ان شاء الله هجاوب على اسئلة التاج بس يارب الإجابه تكون كويسه و اجيب درجات حلوة

ماشاء الله عليك الأول مرة واحده كده فى (الطلوع بدرى من الإمتحان)


تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى عابر سبيل
وعليكم السلام ورحمة الله وبركاته
تحياتى وتقديرى
وشكرا على مرورك وطول بالك انك تقرى التاج كله (انا عارف انه رخم شوية)
وشكرا على دعائك ولك بالمثل ان شاء الله
هنختلف فى نقطة ان الاخرة مالهاش نصيب هنا بقى يبقى انتى مركزتيش كويس انا اول مااتمنيت طبعا كانت حاجه لعموم الامه بعد كده اتمنيت انى اروح الحج وبعده الرزق الحلال فى مشروعى وبعده الزوجه الصالحه اللى تعفنى وتعينى على الدنيا وبعدها الذرية الصالحه اللى تكون بمثابة عمل خير باقى لى بعد مماتى يدعيلى واخد منه ثواب
صحيح كل ده فى الدنيا انما نتايجه بتكون فى الاخرة
وهو احنا بنعمل فى الدنيا ليه ؟ مش عشان الاخرة
ولا انتى كنتى عاوزانى اقول مثلا انا بتمنى انى اروح الجنة طب ماهو اكيد اى واحد فى الدنيا حتى ولو كان كافر بيتمنى ده بس انا اتمنيت اللى يودينى ليها وقد قال نبينا الكريم صلوات ربى وسلامه عليه ((اعمل لدنياك كأنك تعيش ابدا واعمل لآخرتك كأنك تموت غدا ))صدق رسول الله صلى الله عليه وسلم
وهو من لاينطق عن الهوى قدم عمل الدنيا عن عمل الاخرة لانه هو الطريق الى عمل الاخرة وطريق الجنة
انا لما ربنا يكرمنى وانجح فى عملى اولا العمل (الحلال)عبادة ثانيا هيزيد من صدقاته وزكاته وكده وعلى ذلك قيسى باقى الامنيات اللى اتمنيتها
موضوع الطيبه ده مش مزعلنى ولا حاجه والله بس انا بحب كده ساسعات اقول الواحد لو مش طيب زياده كان عمل وكان سوا
بس والله الطيبه دى بتنفع قوووى وربنا علشان انا والحمد لله طيب وبعامل الناس بقلب ونيه صافيه دايما يوقف لى ولاد الحلال وكام مرة فيه ناس بتحاول تستغل ده وبعد كده اكتشف ان ربنا سبب اى سبب من عنده ورحمنى من اذاهم والحمد لله رب العالمين انا طيب اه انما مش بينضحك عليا ( المؤمن كيس فطن )
موضوع الخجل ده وراثى فى عيلتنا والسبب فيه امى ربنا يديها الصحه وطولة العمر هى اللى عودتنا عليه بس مش معنى كده يعنى انى بسيب حقى ولا حاجه انا فى الشغل وفى الحياة العامه الحمد لله كويس بس هو زياده خالص لما بيكون التعامل مع ستات او يكون الموضوع فيه هزار وكده انا ماليش فى الهزار انا ممكن اسمع واضحك انما اشارك وارد وكده ده مش من طبيعتى وخلاص ماينفعش اغيرها وقالو الطبع يغلب التطبع
اما حكاية جمعية خيريه وانا اشترك ليه اذا كنت انا والناس هنا فى منطقتنا عاملين مشروع خيرى زى الفل الحمد لله بس احنا نداوم عليه ومانقصرش وربنا هيكرمنا ان شاء الله اخر كرم
انا عارف انى طولت عليكى وكمان رخمت
بس والله انا بستمتع بالحوار معاكى وكمان بستفيد منه جدا
تقبلى تحياتى وتقديرى
ودمتى بكل خير وود

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الاميرةالمتوجه(كل البوست ده بسببك)غربتى
وعليكم السلام ورحمة الله وبركاته
تحياتى وتقديرى
اكيد اسمك منور ولازم ينور اى مكان يتوجد فيه لانك انسانه محترمة وملتزمة وعلى رأى المثل اللى ربنا يحبه يحبب فيه خلقه واحنا والحمد لله رب العالمين محبتنا لله وفى الله
اشكرك على دعواتك ولكى بالمثل ان شاء الله
اما حكاية صدفه دى فصحيح طبعا ان كل حاجه قدر بس جرى لسان حالنا بكلمة صدفة واعتدنا عليها ليس الا
مين قال ان الطيبه مش مطلوبه فى زماننا ده بالعكس بس هو الواحد يخلى باله شوية
اما العمل التطوعى ففيما يبدو انك نسيتى انى زمان قلت لك على مشروع المسجد ومافيه من تحفيظ ومشروع تكافل وكده
صدقتى والله المهم البركه فى الرزق مش كترة (دى الفلوس اليومين دول زى مايكون راكبها عفريت بتتبخر )
بخصوص الصورة ده طلب مش رخم ولا حاجه وحاضر انا هشيلها دلوقتى على طول وبعدين بما انك النهاردة الاميرة المتوجه يبقى الاميرة ماتطلبش الاميرة تصدر فرمانات واجبة التنفيذ(مش عارف ايه ده هو انا الظاهر عليا اتعلمت البكش )
على فكرة انا زورت المدونه لما كنتى كاتبه عنها فى المدونة الاولى بس مكتبتش تعليقات
اختى غربتى تقبلى تحياتى وتقديرى ودمتى بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم
اختى زينب
هو الموقف صحيح يضحك ع الاخر بس للى شايفه من برة انما اللى كان فيه وخصوصا لما يبقى بيتكسف جدا من الستات زى حلاتى كده بيبقى كارثه
وبعدين انتى مش راضية تعترفى انك بتتلككى ليه ؟ لأ هى تلاكيك ماانتى ممكن تجاوبى على التاج وتنزليه فى مدونة وتحتفلى ببوسى فى المدونة التانيه
انما طبعا علشان دحاحة مذاكرة مش راضية ده انتى غلبتى الموس ده انتى بقيتى مشرط جراحه
اقولك على حاجه
انا صحيح كنت مكبر دماغى بس كنت شاطر وكنت مرشح انى اكون معيد فى الكليه بس جيت فى اخر سنة وفى الامتحانات بتاعة نهاية العام وتعبت جدا وجالى مرض كده فى جهاز المناعه بعيد عنك كان هيقطع خبرى ووالدى كان رافض يخلينى ادخل الامتحانات من اساسه ومع ذلك اصريت ودخلت ونجحت والحمد وتقديرى العام كان جيد
ودرجاتى وترتيبى على الكليه ال44 يعنى برضو من الخمسين الاوائل على مستوى الجمهوريه هههههههههههههههههههه
تحياتى
ودمتى بكل ود

غير معرف يقول...

اول مره ادخل المدونه هنا
بس بجد لقيت انسان جميل صادق
الطيبه الزياده اهم مميزاته فى زمن الطيبه بقت عيب وضعف شخصيه
بدعوا ربنا انه يكرمك بالبنت اللى تقدر طيبتك دى
يا ريت تشرف مدونتى

zainab يقول...

أخى المعتصم

مش عارفه ليه انت مصر أنى بتلكك !

أنا جاوبت على التاج خلاص و فى المسودة دلوقتى يعنى جاهز للنشر و عشان ماتقولش عليا بتلكك هنشره دلوقتى و هعمل حفلة بوسى فى مدونتى التانيه (نور على نور)

ربنا يوفقك يارب و سلامتك ومبروك انك طلعت ال44 الحمد لله

تحياتى

zainab يقول...

على فكرة نسيت أقولك انا بحب أقرأ التعليقات اللى بتدور بينك وبين عابر سبيل وغربتى
ماشاء الله ربنا يحميكم

المعتصم يقول...

بسم الله الرحمن الرحيم
السلام عليكم ورحمة الله وبركاته
الفراغ
تحياتى وتقديرى ياسيدتى
ونورتى مدونتى المتواضعه واسعدتنى زيارتك جدا
واشكرك على حسن ظنك بى وعلى دعوتك الجميلة اللى انا كمان نفسى ربنا يحققهالى
مريت مرور سريع على مدونة حضرتك ووجدتها تفيض حنيه وحب
ربنا يديم عليكى حب اولادك ويديم لهم حبك ليهم وميحرمكوش من بعض
تقبلى تحياتى وتقديرى
ودمتى بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى زينب تحياتى
لسه جاى من مدونتك الجميلة وقريت اجاباتك على التاج وربنا يكرمك ان شاء الله ويحققلك كل اللى بتتمنيه ويرزقك بواحد ابن حلال يصونك ويحبك ويشيلك جوه نن عنيه
(لسه عندك اتنين تاج كمان هههههههههه)
انا لما كنت بقولك انتى بتتلككى كنت بنكش معاكى بس علشان تنزلى التاج وقد كان عشان تعرفى ان الصعايده لما يحطو حاجه فى دماغهم لازم يعملوها
وكل سنة وبوسى طيبه ومستنيين الحفله لما نشوف هتبقى عامله ازاى
هو البوفيه هتكون ايه ظروفه بوفيه مفتوح كده ونشهيص ولا هنقضيها ساندويتشات؟؟؟
تعليقات غربتى وعابر سبيل مش مجرد تعليقات بالنسبة ليا انما هى حوار مفيد فى كل الاحوال سواء كانت نقد فهو بنااء او كانت مدح فهو للسعى للاحسن
ودايما انا المستفيد من الحوار معهم
شوفتى الرابط اللى حطيته فى اخر موضوع بتاع عابر سبيل حاجه كده تموت من الضحك ابقى اقرى التعليق هناك وادخلى على الموقع شوفيه وقوليلى رأيك
دمتى بكل ود وخير
والسلام عليكم ورحمة الله وبركاته

zainab يقول...

أخى المعتصم

أنا عارفه انك بتهزر وع العموم انا خلاص نزلت التاج وخلصت منه

ربنا يعينى على اللى جاى

أما بالنسبه لبوسى وانت كمان طيب أنا جبت التورته ابقى هات السندويتشات وانت جاى ماشى أنا عارفه ان الصعايده كرماء

أنا روحت عند عابر سبيل و شوفت تعليقك و رديت كمان

قال ايه (مجلس قومى للرجل )هو ده اللى كان ناقص
لا وايه كمان البنات تأدى الخدمة العسكريه

اوعى تكون عضو في المجلس ده

تحياتى

عابر سبيل يقول...

بسم الله الرحمن الرحيم
السلام عليكم ورحمه الله وبركاته
اولا انا اللي بشكرك علي سعه صدرك لتعليقاتي (انا عارفه نفسي كويس)
ثانيا اسمح لي ان استمر معاك في الخلاف بخصوص نقطة الاخرة ولدي رأي ممكن يكون صح وممكن يكون غلط
ان مافيش حد مننا هيدخل الجنه بعمله وانما برحمه الله عز وجل
ولو احنا بنعمل اعمال كويسه وعارفين ان احنا صح ليه الرسول عليه الصلاة والسلام اوصانا بان احنا ندعوا ونتمني دخول الجنه بل الفردوس الاعلي منها كمان
(اللهم اني اسألك الجنه وما قرب منها من قول او عمل)
ولي طلب عند حضرتك
انك تدعي الاخوانا الفلسطنين بالشفاء والنصر وتذكر بيها كل من تستطيع وتوصيه بالدعاء لهم ولو حتي في سجده واحدة من كل فرض
وربنا يتقبل منا ومنكم صالح الاعمال
عابرسبيل

ghorBty يقول...

المعتصم

جزاك الله خيرا كثيرا علي حسن ظنك فاللهم اغفر لي ما لا تعلمون واجعلني خيرا مما تظنون ولا تؤاخدني بما يقولون

وبارك الله فيك وربنا يجعلنا واياك ممن يستمعون للقول فيتبعون احسنه والصورة الجديده احلي واحلي فكرتني بالمقوله

من جد وجد ..وجد ايه بقا انا نفسي اعرف بس اللي في الصورة اكيد وجد وجع الدماغ و ضعف النظر غير كدا ما ظنش

دمت بخير

غربتي

Anas Alaa يقول...

إجاباتك رائعة
كنت عايز تنتحر يا مفتري :D
و موقف عريبة الستات ده كان جميل جدا :D
و التدوين كان سبب ف التزامك . دي حاجه جميلة جدا . ابقى ابعت لي القصة بقى ع الايمايل . عايز أعرفها
ربنا يوفقك

♥..~*شـــوشـــو هـــانــم*~..♥ يقول...

بسم الله ماشاء الله عليك
لا بجد شخصيتك جميله
ربنا يحققلك كل حاجة انت عايزها
ويرضى عنك يارب

تحيتي لك

المعتصم يقول...

بسم الله الرحمن الرحيم
السلام عليكم ورحمة الله وبركاته
*******************
أختى عابر سبيل
وعليكم السلام ورحمة الله وبركاته
تحياتى
انتى بتشكرينى ليه ؟ احنا متعودين نتكلم مع بعض ونتناقش ونستفيد من الحوار يبقى الموضوع ده عادى وكمان انا بستمتع بده
هنرجع للاختلاف
هو انا قلت حاجه تبين ان كلامى عكس كلامك؟انتى من ساعة مااخدتى حبوب الصراحه ومش عارف مالك مش مركزة
انا قلت ان عمل الواحد الكويس فى الدنيا هو الطريق للجنة فى الاخرة وانا لسه مصر على كلامى
ايوة طبعا انتى معاكى حق اننا كلنا هندخل الجنة برحمة ربنا عز وجل لاننا مهما عملنا فى الدنيا من طاعات وشكر وحمد مش هنوفى مقدار نعمة واحده من نعم ربنا الكتير علينا وبالتالى اكيد اكيد هندخل الجنة برحمة ربنا بينا مش بعملنا
بس مش معنى كده اننا نتكل على كده ومانعملش فى الدنيا ومنسعاش للنجاح فى اعمالنا
العمل فى حد ذاته عباده وبجانب العمل الواحد بيحاول على قدر استطاعته انه يكون ملتزم ودى الطريقه اللى بنسعى بيها اننا ننول رحمة ربنا عز وجل علشان يرحمنا وندخل جنته
مش عارف احنا مختلفين ليه فى الموضوع ده على الرغم من اننا بندور حول نفس النقطه
اما طلبك التانى فمش هرد عليكى لانك المفروض ماتطلبيش منى حاجه زى دى
تقبلى تحياتى ودمتى بكل خير وود
******************
أختى غربتى
تحياتى
انتى انسانه ملتزمة ومحترمه وعلى خلق وذات عقلية جميلة
لذلك انتى تستاهلى كل اللى يتقال عليكى واكتر شوية
وبعدين هو انا كل مااحط صورة هتطلعيلى فيها حاجه من امبارح وانا بدور على الحاجه بتاعة صاحبنا من جد وجد ده ومش لاقيها لما تعبت
انما وعد منى اول ماالاقيها عبعتلك على طول من غير كلام
بس اسكتى الواد اللى فى الصورة ده صعبان عليا بيفكرنى بنفسى زمان ليلة الامتحان وانا بدور على كتاب الماده اللى همتحنها ومش لاقيه
تقبلى تحياتى ودمتى بكل خير وود
********************
أخى انس
تحياتى
نورتنى بوجودك
واشكرك على رأيك فى الاجابات
اه كنت هنتحر فعلا واخدت براشيم بقى وحاجات وكده بس ربنا سترها
انت متعرفش دماغ الصعايده دزمة قديمة
وطالما انك عاوز تعرف القصه (اى قصة)
هبقى ابعتلك قصة الانتحار اهى مسلية شوية ههههههههههههههههههههه
شكرا على مرورك
ودمت بكل خير وود
******************
أختى شوشو هانم تحياتى
منوره المدونة كلها
شكرا على حسن ظنك بشخصى وكمان على دعواتك الجميلة ولكى بالمثل ان شاء الله واهم حاجه ان ربنا يرضى عننا
نورتينى ياشوشو (اخبار المذاكرة ايه)
تقبلى تحياتى ودمتى بكل خير وود
والسلام عليكم ورحمة الله وبركاته

zainab يقول...

أخى المعتصم

الأخت مرمر قامت بتوضيح سوء التفاهم اللى حصل

وربنا يبارك لنا فى الحاجه ( أم محمد ) و يعطيها الصحه و لها كل الإحترام والتقدير

تحياتى

المستنصر بالله يقول...

اجاباتك فعلا صادقه وجميله
عجبنى جدا موقف المترو
وحمدا لله على سلامه الوالد
ربنا يرزقك بالزوجه الصالحه ويعوضك خيرا

تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
*********
أختى زينب اشكرك على مرورك وعلى دعواتك للحاجه والدتى
ربنا يكرمك
دمتى بكل خير وود
**********
أخى المستنصر بالله
تحياتى
اسعدتنى زيارتك واشكرك على رأيك وحسن ظنك بشخصى
مش عارف ايه حكاية موقف المترو ده
هو بصراحه دمه خفيف وعشان كده انا مش قادر انساه بس برضو افتكرو انى انا كنت فى موقف لا احسد عليه
الحمد لله الوالد فى تحسن مستمر نحمد الله ونشكر فضله
وشكراعلى دعواتك ولك بالمثل ان شاءالله
تقبل تحياتى
ودمت بكل خير وود
والسلام عليكم ورحمة الله وبركاته

zainab يقول...
أزال المؤلف هذا التعليق.
المعتصم يقول...

بسم الله الرحمن الرحيم
السلام عليكم ورحمة الله وبركاته
ههههههههههه
وده مين بقى اللى بيكتب تعليقات وبعدين يحذفها؟؟؟؟؟

zainab يقول...

أخى المعتصم

التعليق اللى اتحذف عندك كنت طلبت فيه تعيد تعليقك على البوست الجديد عندى لما تعليقك اتحذف من عندى
بس لما لا قيتنى طلبت نفس الطلب عندى فى تعليقاتى فى مدونتى
قلت أمسح التعليق عندك مالاوش لازمه التكرار

تحياتى

رحلتنا في الحياة يقول...

اوك خلاص عفونا عنك مش مهم تجاوب على التاج مه ان اسئلته مختلفة ربنا يوفقك فى حياتك يارب وتحقق اللى بتتمناه