الأحد، 6 ديسمبر 2009

أقــــــــــــــــــدار (تحديث صغنون)



بسم الله الرحمن الرحيم
السلام عليكم ورحمة الله وبركاته
********
نظرا للظروف النتيه البحته
وان الدنيا عندنا فى شبكة المعلم رفيق متلخبطه على الاخر
انا بعتذر على تأخرى فى الرد على تعليقاتكم الجميلة
وربنا يسهل والدنيا تتظبط واعرف ادخل على النت تانى
بدل الشحططه اللى انا فيها دى
(كان معكم المعتصم ابوالعافيه من سيبرلقيه فى سكته وهو مروح)
************
دى قصه قصيرة كنت كتبتها من فترة
صحيح انا مش ناشرها كلها هنا ومختصر فيها على قد مااقدر
بس ياريت تقولولى رأيكم فيها
وفى تصاريف الاقدار
*******
هو اسمه عصام
وهى اسمها ريهام
كان بينهم قصة حب جميلة جدا
عصام كان بيحب ريهام لدرجة الجنون
واول ماربنا اكرمه واشتغل شغلانه كويسه
راح جرى على والد ريهام وخطبها منه
ووالدها وافق لانه لقى عصام مايتعيبش
شاب كويس وابن ناس محترمين واخلاقه عاليه
وكان الاتنين عصام وريهام عايشين فترة خطوبه فى منتهى السعاده اللى فى الدنيا
كل البنات اللى تعرف ريهام بتحسدها على عصام
وكل الولاد اللى يعرفوا عصام بيحسدوه على ريهام
ماهى كمان بنت ناس كويسين ومؤدبه وجميلة ومثقفه
وفى يوم تعب عصام شويه
وراح للدكتور فطلب منه شوية تحاليل
راح لمعمل تحاليل بتاع دكتور صاحبه
وعمل التحاليل المطلوبه كلها
وهو قاعد مع الدكتور صاحبه بتاع التحاليل
سأله هل ممكن يكون التعب ده له تأثير على علاقته بريهام بعد الجواز
(على اساس ان التعب كان فى الكلي)
صاحبه طمنه وقاله انه زى الفل ودى حاجه ماتقلقش
بس هو كان فيه حاجه مش مريحاه فى الموضوع
وطلب من صاحبه ده انه يعمله تحاليل القدرة على الانجاب
الدكتور رفض فى الاول وبعدين وافق لما لقى الاصرار الكبير من عصام
وكانت الصدمه انه فعلا عنده مشاكل ممكن تعوق عملية الانجاب بعد الزواج
كانت حالته صعبه جدا واصر انه يصارح حبيبته بالحقيقه
وفعلا صارحها وقالها انه ممكن ماتكونش ام بسبب مرضه ده
وطلب منها انها تفكر كويس وتاخد قرارها
هل هتستمر معاه وترتبط بيه وتضحى بأمومتها
ولاا هترفض وتتمسك بغريزة الامومه وتسيبه وتضحى بحبها
وبعد كام يوم
اتصلت ريهام وبلغته قرارها انها مش هتقدر تعيش من غير ماتكون ام
وتم فسخ الخطوبه وساب لها كل الهدايا والحاجات اللى كان جايبهالها
واتنقل فى شغله لمكان تانى وساب البلد
وبعد اربع سنين نزل فى اجازة
وماشى فى الشارع وقابل ريهام صدفه
وقفت عشان تسلم عليه
وهو وقف وابتسم لها
سألته عن احواله اتهرب منها وسألها عن احوالها
ردت عليه: ان ربنا خلصلك حقك منى ومقبلش ظلمى ليك
وانى اتطلقت من جوزى بسبب انى مش هقدر اجيب له الذريه اللى كان بيحلم بيها
لأنى عاقر
وفجأة انتبهت لحاجه وسألته والحت فى السؤال:
مين البنوته اللى زى القمر اللى على كتفك دى؟؟؟؟
رد عليها: دى ريهام بنتى الكبيرة

**********

انتهت
***********
السؤال هنا لو انت مكان عصام كنت هتعمل اللى هو عمله؟؟
بمعنى تانى ممكن تصارح خطيبتك او حبيبتك بحاجه ممكن تهدد مشروع زواجكم بالفشل؟؟
ولو انتِ مكان ريهام ياترى رد فعلك هيبقى زيها ولا العكس ؟؟ وعلى اى اساس؟؟
************
والسلام عليكم ورحمة الله وبركاته
************

هناك 47 تعليقًا:

اللؤلؤة يقول...

حضرة الصعيدى الهمام
السلام عليكم
كل عام وأنت بكل خير
وكل عام وأنت إلى الله أقرب
خالص تقديرى

اللؤلؤة يقول...

حضرة الصعيدى الهمام
السلام عليكم
قصتك جميلة ومعبرة عن حالة من
الإبداع والتميز
والصراحة مفيش أحلى منها
أتمنى لك مزيداً من الإبداع
والتميز والتقدم
دمت صديقى بكل خير

اللؤلؤة يقول...

حضرة الصعيدى الهمام
السلام عليكم
بالفعل إنه هو القدر
وهذه هى الدنيا يا صديقى
يوم لك ويوم عليك
دمت صديقى بكل خير

آيوشة يقول...

بالنسبة ليه هو هيعلى فى نظرى اكتر لما يصارحنى بالحقيقة باى حاجة اصل المفروض تبقى الصراحة والوضوح فى كل شئ وهو ساب لها حق الاختيار
انما بالنسبة لموقفها مش هلومها لكن المراة عموما مشاعر الامومة اقوى من اى شئ فى الدنيا وفى ست مش هترضى انها تستمر مع انسان مش بينجب
لكن لو انا هشوف الموضوع عادى مش لانى مش بحب الاطفال او مش عاطفة الامومة قوية لا بس علشان انا بمؤمن بان ربنا عنده كتير جدا ومحدش عالم الغيب
وبعدين اللى يلاقى انسان محترم وعلى خلق وبيحبها تسيبه ليه علشان عيال فى علم الغيب الله اعلم لما تجيبهم يطلعوا عنيها ويخلوها تتجنن :)
اعرف ناس ماشاء الله على الحنية اللى فى قلبها لاى طفل بتشوفه بس الحمدلله على كل حال ربنا حارمها من نعمة الانجاب وهى راضية وموافقة تكمل مع الانسان اللى اخترته وان شاء الله ربنا يبارك لها ويكرمها على صبرها مع انى واثقة 100 فى ال100 انها نفسها بجد تكون ام بس عمرها ما حتى تقدر تبين ده قدام جوزها علشان ايمانها بربنا كبير
واعرف واحدة جوزها كان عارف من قبل الجواز انه احتمال مش ينجب ومش صارحها وفضلت بعد الجواز تقنع فيه يرحوا للدكتور وهو طبعا رافض لغاية ما عرفت الحقيقة انه كان بيكدب عليها مكنش قدامها غير انها ترضى وتسكت مع انه كداب وكان المفروض يسب لها حق الاختيار بس علشان هى نتيتها سليمة وبنت طيبة ربنا كرمها بطفل بعد كام سنة
كل شئ نصيب وموضوع العيال ده فى علم الغيب

شموع دافئة تحت زخات المطر يقول...

و عليكم السلام و رحمة الله و بركاته

قصة جميلة
و كما قلت هي الاقدار
و هذا قدرهما

اما بالمسبة لسؤالك

حسنا يتوجب عليه اخبارها
لان كل انثى تكتسحها عاطفة الامومة الجياشة
و هو ان امتنع عن اخبارها فقد يظلمها
و هي له الاختيار بينه و بين حلم الامومة

لكني لست معها قي قرارها
رغم انه حق مشروع


لان الذرية بيد الله
يرزق من يشاء بغير حساب
فحتى و ان كان عقيما فبيد الله ان يرزقه الخلف و لو بعد الف عام
كما انه كان انسانا جيدا و اكيد
انه على خلق و دين
وكذلك تحمل له و يحمل له مشاعرا نبيلة

تقبل مروري اخي

adel يقول...

1-الحقيقة لازم لان حتي لو عرفت بعد الجواز ممكن تخلعه
يبقي قول افضل

2-انا مش شايف انها غلط انها تتدور علي امومتها
بس في نفس الوقت لو الحب اللي بينهم حقيقي مبيفرقش قوي و بيتمسكوا ببعض و انا شفت الحكاية دي في حالات كتير قوي قوي

أميرة علي كوكب مهجور يقول...

لا هو غلطان في صراحته
ولا هي غلطانه في قرارها
مش نصيب بعض وده قدر ربنا

موناليزا يقول...

:) الله
جميلة بجد
ربك كريم وكبير اوى
بس ازاى يسمى بنته ريهام بعد الندالة اللى عملتها معاه؟؟!!!
عموما
بما انك الكاتب ياريت المرة الجاية ماتخليش البطل يسمى بنته على اسم حبيبته الندلة:)
---
بالنسبة للاسئلة رغم انى متعودة ان انا اللى بسأل بس وماله عريس جديد برضه ولازم نوجب معاه:)


لو انا مكان عصام طبعا هقولها
وانا ناوية ان شاء الله يوم ماافكر انى اتزوج لازم اعمل تحاليل شاملة وكاملة عشان نكون على نور من أولها:)
رغم ان الموضوع ده ماعدتش اختيارى وبقى اجبارى بس فيه ناس بتزوره وبيعدى
انا بقى كالعادة مابعديش حاجة كده:)

اما بقى لو مكان ريهام
امممممم
سؤال محير
لانى مش عارفة اجاوب بشخصية موناليزا الطيبة الساذجة بتاعة زمان اللى اكيد كانت هتقف جنبه حتى لو مكنتش تعرفه قبل كده
ولا موناليزا المجروحة المظلومة اللى مش عارفة حتى هى اتظلمت ليه وده خلاها معدتش طايقة حد ولا عايزة تضحى بنفسها عشان حد
بس ممكن أقول وبشخصيتى العقلانية السوية المعتدلة انى لو بحبه بجد اكيد هقف جنبه ومش هبقى عايزة غير انى بس اكون معاه
أما بقى لو مابتحبوش او بتحبه بس بتحب نفسها اكتر اكيد هتتصرف زى الاخت ريهام

ستيته حسب الله الحمش يقول...

درش باشا
ازيك يا صاحب قصص الفجرية

القصة عادية جدا يا حضرة رئيس الحلف
عارف ايه اهم شيء في الحياة؟
مش الصراحة مع الحبيب او الخطيب
لكن الصراحة مع النفس

فيه بنات كتير كتير متعدش كل حلمهم فعلا فعلا هو الأمومة
يمكن اكتر كمان من حلم الحب والزوجية

وفيه بنات شكل تاني وصنف تاني تعشق الحياة بلا التزامات والأطفال متفرقش معاهم

وفيه بنات تفرق معاهم بس اصلا هن ولا فكروا في الموضوع قبل الجواز وبعد الجواز يبقوا ها يموتوا على العيال

وفيه بنات نفسها في العيال بس لو لقت نصها التاني تنسى قصاده الدنيا وما فيها

الشاهد من الكلام ده كله
الصدق مع النفس مش عيب
ومش ندالة ابدا

فيه فرق بين زوجة تسيب جوزها علشان مبيخلفش "وده انا شفته بعيني" .. وفيه فرق بين زوج يثبت مراته الجميلة سنين طويلة جوا الجواز بدعوى "ميهمنيش تجيبي لي عيال او لأ" ويسيبها بعد فوات كل قطارات الحياة ويجري على نغة يجيب منها عيل وهو عنده خمسين ستين سنة "ودي برضه شفتها بعيني"

وفيه فرق بين ناس تحدد أولوياتها وصدقها مع نفسها وهم لسه بيختبروا مشاعرهم
الخطوبة دي فترة اختبار وليست فترة إلتزام

لا هي اتحرمت من العيال تخليص لذنب الخطيب
ولا هو ربنا جبر خاطره علشان غلبان ومسكين
دي اقدار وقسمة ونصيب

ودمت زخرا للحلف وأبر إيجيبت :)

سـارهـ يقول...

السلام عليكم و رحمة الله و بركاته
كيف حالك يا أستاذ / مصطفى ،،
أولا : خلق الله الكائنات الحية الراقية ( في التصنيف ) نوعين ذكر و أنثى . لذلك لابد في الإنسان أن نفرق بين النوع المذكر و صفة الرجولة بما تحمله عباءة هذه الكلمة من صفات كثيرة ( الإحترام ، تحمل المسؤولية .....)
ثانيا : إذا كانت الزوجة الصالحة هي خير متاع الدنيا فإن الزوج الرجل الصالح هو ايضا خير ما في الدنيا بعد طاعة الله فما بالك إذا كان رجل و محب ايضا فهو خير خير ما في الدنيا .
ثالثا : أنا أؤمن بالعلم و لكن نحن مسلمون لابد لنا في قراراتنا ترك مساحة لمشيئة الله الذي يقول كن فيكون و ان نضع ذلك في حساباتنا .
لذلك فبطل قصتك برهن في اختبار صعب انه رجل و محب و من خسرت فهي ريهام لان هذا الكيان التي اجتمعت فيه الصفتين قد لا تقابله مرة ثانية في حياتها .
معذرة على الإطالة .

تقبل تحياتي .

الشعب لابد له من حكومه تشكمه يقول...

اولا عاوزه اقولك ان كومنتك عندى اتسببلى فى حالة ضحك متواصله لمده نص ساعه ,دا انتو شايل فى قلبك جامد اوى:))

نيجى باه على القصه:(
طبعا انت بتسال الرجال لو انت مكان عصام هتصارح ولا لا..نعكسه باه علشان اعرف ارد.
اه اصارح طالما عرفت يباه لازم اصارح مع انى اصلا ضد موضوع الكشف اللى مطلعينه قبل الزواج ده,حاجه سخيفه جدااا .بس طالما عرفت حاجه لازم اقول.هتكون الماصرحه اسهل قبل الزواج.

**لو انا مكان ريهام,
لو انا بحبه هضحى بكل حاجه علشانه,
لان الاولاد دول رزق من ربنا ,
يهب لمن يشاء الذكور ويهب لمن يشاء الاناث ويجعل من يشاء عقيما,
هعترض انا باه على اراده ربنا,
واكيد ربنا هيكافئنى ويكافئه على الصبر ده,
وممكن اخلف وابنى يطلع مريض واتمنى انى اشوفه يتسريح من المه ويموت وممكن وممكن....
ووممكن اتجوز واحد ويطلع برضه مش بيخلف او انا ...


هتجوزه والخيره فيما اختاره الله:)بس اكون عارفه ومتاكده انه بيتقى الله ومحترم وبيحبنى.
(اجنن وانا رومانسيه مش كده :))

totti.2 يقول...

السلام عليكم
انا تامر صاحب مدونه chemistry & tehcnology
لو سمحت ممكن تعمل تبادل اعلانى نصى مع مدونتى
اللينك بتاعها اهه
http://chem2tech.blogspot.com
لو وافقت ارجومنك الرد على اللينك ده
http://chem2tech.blogspot.com/2009/09/blog-post.html
اتمنى الموافقه
مستنى ردك

أحمـــــــــــــد أبو العلا يقول...

بص ياعم الجميل

خلينا بس نشيل العواطف على جنب شويه ونقول رأينا من غير زعل

طبعا لو مكن عصام لازم اقول, داحنا كده دخلنا في حاله الحرام والحلال

بس بالنسبه لريهام, مش لازم تكون هيا غلطانه وانها كده ندله


بص واحد من حقوقها انها تكون ام, ومش مصيبه لو قررت انها تدور على الحق ده, والقدر في الاخر بيدي وياخد على حسب اراده ربنا. بس كونها انها ترفض بسبب الموضوع ده مش شرط يكون ده قله اصل فيها لانه من حقوقها

norahaty يقول...

ولما انت كاتبها
من مدة ايه اللى
فكرك بيها النهاردة
أحنا مش عايزين (بايت)
احنا عايزين صابح يازعيم
خلاص عرفت احنا عايزين ايه؟

norahaty يقول...

خلاص حأبطل اهوة
وأتكلم جد مااااشى
الذرية والولد شهوة
مش كتير يقدروا يحرموا
نفسهم طواعية منها !
وبالتالى(لو)مكان خطيبة عصام
حأفضها سيرة وانهى الأرتباط!
اما عصام ففى رأى عين العقل
ما فعله :المصارحة :(مؤلمة
لكن اسلم جداً

norahaty يقول...

لي سؤال يازعيم
بدال أنت دخلتنا
لجنة الأستمحنان بقى:
كانت يبقى ايه
الوضع لو قابلها
وهى مطلقة ومعها ولدين
تؤام وهو لم يتزوج ولم ينجب

norahaty يقول...

انـا ماشية أهوة
من غير ما حتى ابل
بقى بكوباية شاى
وأنا جاية من الجيزة
لحد عندكم فى الصعيد

ABOALI يقول...

جميل الكلام اوووووووووى عن العلاقات بين البشر
لانها تنقسم بين علاقات سامية وراقية
ودى علاقات تستمر مهما كانت الاحداث
يعنى موضوع زاى الانجاب ده مش هاءثر لاءن ممكن الزوجة لو عملت تحاليل تتطلع غير مهيئة للانجاب

وهناك علاقات متوسطة
يحب فيها الطرفان بعضهما ولكن حب النفس اقوى
ودى حالة الطرفان اصحاب القصة
اينعم جمع الحب بينهما ولكن
الحبيب عرف ان الصراحة هى عنوان نفسه
وهى عرفت ان الامومة اقوى من الحب
وغالبية تلك العلاقات المتوسطة
ارتقائها الى علاقات سامية يكون صعب
اما العلاقات الاخرى فتكون علاقات هامشية
كالاعجاب والزمالة وشد الانتباه وهكذا
ودى تعتمد على شخصية كلا الطرفين
ويمكن ان تتدرج بسهولة الى علاقات سامية


ومع كل تلك العلاقات
لا نستطيع ان نحكم ان هذا صح وهذا غلط
لان تلك العلاقات دول ومتكررة وكلنا فى اشياء نكون فى منتهى الرقى واشياء فى منتهى الهامشية وهكذا

لذا كلها صح
ولكن على حسب رؤية الناظر اليها

القصة تعبر عن حياه نحيا فيها ولكن لا ندرك حكمتها وليس لنا قدرات تشكيل واعادة هيكلة الاحاسيس لتناسب الوضع القائم
بل قررات صعبة

المهم وفى النهائية علميا" ليس هناك رجل عاقر
التطور العلمى بفضل الله حل الكثير من تلك الامور


بس صيغة القصة جميلة ومؤثرة احييك عليها يا درش

ولكن سؤال لك

اذا حصل هذا وكنت لا زلت غير متزوج فهل تتزوج تلك ريهام من جديد

تحياتى

فتاه من الصعيد يقول...

سؤال صعب جدا

بس انا لو مكان ريهام ممكن اقبل بشرط ان يكون في تفاهم كمان لازم اكون عارفه ان الشخص اللي مختاراه هيقدر يعوضني

كمان فكره انه صارح بالمشكله دي دليل انه شخص كويس

تحياتي

خواطر شابة يقول...

انا لو مكان عصام مكنتش اصلا حأعمل التحليل وحاسيب الامور على ربنا هو اللي عارف الغيب ولو فرضا انضربت على دماغي وعملته أكيد حأصارحها واتحمل اللي يجرالي ماانااللي جبته لنفسي ولي ضربته ايده ميشتكيش
اما لو انا مكان ريهام في حالتين لو ده زواج صالونات يعني مفيش لاحب ولا نيلة حأقوله لا وحأتمسك بخيار الامومة لان ده حقي وحتى لو ده متحققش لاي سبب من الاسباب مثلا اني متزوجش او اكون عاقر فده حيكون شئ قدري مش انا اللي اخترته
امالو كنت متنيلة على عينه وبحبه فمفيش حاجة حتخليني اتخلى عنه والاولاد رزق من الله يهبه لمن يشاء ومين عارف الامل دائما في ربنا انه يجازيني على هذا الاختيار ويكرمني بطفل وماذلك على الله ببعيد
تحياتي لك

reem يقول...

ازيك يا استاذ مصطفى

عامل ايه ؟

عاوزه اقولك انت احترت اسم لبطلة القصة غالى اوى على قلبي

هو كان صح لما صارحها

وهى مش كانت غلط لما اختارت لان دا حقها اولا واخيرا حتى لو اختلف معظمنا معاها

احنا كلنا بنبص للموضوع من ناحية عاطفية وبس

لكن انا لومكانها كنت هاختار البقاء مع عصام خاصة ان في حب زى ما قلت

لكن لكل انسان تفكيره وهى مش غلط ابدا

مش تنسى تحط اللينك الجديد بتاعى وانت حر لو نزلت بوست من الدرر بتاعتى ومش طلع عندك في الريدر

ريمان يقول...

القصه رهيبه

رهيبه بجد

انا هقولك رايى لو انا بدل ريهام

وبكل صراحه

انا طبعا غريزه الامومه جوايا اقوة من اى عاطفه تانيه

وكل بنت بتحلم تكون ام

لكن مقدرش اقبل فكره انى اخلف من حد مش بحبه

انا لو كنت بدالها كنت هتمسك بحبى ده لو كنت بحبه بجد

اللى بيحب بجد مش بيتنازل عن حبيبه ابدا

هتقولى بس ده مش بيخلف

بس انا مش هلاقى سعادتى الا مع ده

محدش هيملى عنيا غير ده

مقدرش اشوف راجل غير ده

يبقى هسيبه ازاى وادور على حد تانى اجوزه واخلف منه؟

انا عارفه ان ده ممكن يبقى كلام روايات لكن والله انا جاوبت بكل صراحه

ريمان يقول...

مصطفى

انا متغاظه اوى من انصار السنه ده عمال ينشر فى المدونات تعليق بعنوان ايها الزانى ايتها الزانيه


ده بيقذفنا ده ولا ايه؟

طب ينشر المقاله بس من غير المطلع ده

ده كده بيوجه الكلام لصاحب المدونه او صاحبتها

ايه ايها الزانى

ايها الزانيه دى

فى ايه

انا والله دخلت عنده اديتله كلمتين فى العضل

م/محمود فوزى يقول...

السلام عليكم
جزاكم الله خيرا على القصه الجميله جدا دي
انا عن نفسي احيي عصام على ما فعله
وانا لو مكانه - باذن الله - اعمل اللى عمله ومش هاتاخر

طبعا لازم الامور تبقى واضحه قبل الجواز
الصراحه حلوه
وكمان ميبقاش فيه غش من الاول
واللى بيحب حد بيحب له الخير حتى ولو مش معاه
ده معنى مهم لازم الناس تاخد بالها منه
وعلى فكره برضه مش شرط يكون موقف ريهام كله غلط
يعنى انها طبعا الافضل انها تكمل الجواز وتدعى ربنا بالابناء
والله قادر على كل شيء

لكن اذا كانت هى حاسه ان الموضوع ممكن ياخد وقت وانها مش هاتقدر تنتظر بدون اطفال
فاعتقد انها كانت صريحه معاه ويمكن لو غصبت على نفسها فهى ممكن تبقى مكتئبه وحزينه وساعتها لاجواز هايكون غم

فهى تفكر كويس قبل اتخاذ القرار وكمان تصلى صلاه استخاره وربنا يعمل اللى فيه الخير
اشكرك مره تانيه
سلام

حنين يقول...

السلام عليكم
يعنى اول مره اجى المدونه احتار الحيره ديه ....
القصه جميله جدااا
عصام كان قراره صح لازم يقول بس قراره غلط انه يعمل التحليل يعنى مافيش داعى ونسيب الحاجات دى لله
وريهام مش ندله هى غريزه الامومه عند اى واحده فطره يمكن الراجل لو فى الموقف ده ممكن يوافق لو بيحب مع انه بعد الجواز هيرجع فى كلامه بعكس البنت بعد الجواز لو عرفت هتتمسك به بس فى معلومه برضه ان الناس لما يكونوا بيحبو بجد مش بيشوفوا حاجه غير حبهم يعنى كان ممكن تتمسك به .
مع تحياتى حنين

موناليزا يقول...

:)iam so happy for you

المجاهد الصغير يقول...

السلام عليكم
جزاكم الله خير
سبحان الله والحمد الله ولا اله الا الله
لو كانو فضلو مع بعض كانت حياتهم تكون غير مستقره بتاتا لانها تريد الاطفال من داخلها لو تظاهرت بذلك ولتوجه اللوم دوما اليه ويحس هو بالضعف والشعور بالذنب ....
وقدر الله ومشيئته فوق كل شئ

حسن ارابيسك يقول...

المعتصم
الحقيقة عجبتني جداً قصتك القصيرة والتي هي من واقع الحياة وتحدث في واقعنا بلا شك وبأشكال مختلفة وظروف مختلفة لكن الحقيقة اختيارك للقصة دي رائع لبعض الحكم التي بها مثلا الإنسان لو يعلم الغيب لاختار الواقع ودائماً لابد للإنسان أن يضع مشيئة الله فوق كل شئ ولايجب علينا أن نلوم ريهام وأن نشمت فيها ولم تظلمه في شئ بل ظلمت حالة الحب فقط فكان من حقها حسب المعطيات ان لاتحرم نفسها من كونها تود أن تصبح أماً وهذا طلب عادل ومن صميم تركيب المرأة
اخي العزيز بجد قصتك رائعة الاختيار
تحياتي
حسن ارابيسك

سمسم/سما يقول...

السلام عليكم
اول زيارة هنا
اولا انا كنت كتير جربت افتح هالمدونةى بس دايما كان ينكتبلي غير مصرح
ما بعرف انت امتى وزعت تصاريح للدخول
واليوم بالصدفة فتحت
وبالنسبة للقصة
اكيد حلوة بس بتحير
بحس انو تفكيرنا ممكن يتغير
لما نكون احنا بالموقف بشكل فعلى
يمكن يكون رتايي هيك وممكن هيك
وممكن يكون في تدخلات من الاهل
وشغلات تانية
يمكن لو كان خطيبي وبحبو ةصعب اسيبو
هاد علاوة عن اني انسانة تؤمن جدا بحديث الرسول صلى الله عليه وسلم
ان لكل داء دواء
هاد غير الدعاء لله الي ممكن يشفينا لوحدو
وتحياتي لك على اسلوبك القصصي

mimi يقول...

طيب السيبرات قفلت ولا إيه؟

وأونكل رفيق إيه أخبار النت عنده ؟

طمنا عليك

z!zOoOo يقول...

السلام عليكم

ازيك يا اونكل معتصم يا زعيم حسب الصعايده

يارب تكون بخير

واحشني والله

ايه يا عم الغيبه ديه

ربنا يرجعك لينا بالسلامه

ندخل في الجد بقي

اولا طبعا انا بأيد عصام جدا

ولو كنت مكانه كنت من المؤكد إني هعمل زي ماهو عمل

اصل المشكله يا حج معتصم يا خويا الحاجات ديه ماينفعش حد يخفيها

الصراحه مهمه قوي في الحاجات ديه

لأني ماقدرش اظلمها قدام ربنا وقدام نفسي

وبعدين اتخيل شيء إتبني علي الغش هيبقي اخرته طلاق وكره وكمان هيسيب جرح في الاتنين

يعني عين العقل الي هو عمله

انا بقي لو كنت الطرف التاني

وعرفت إن خطيبتي مش هتقدر تخلف

انا مقتنع بحاجه اولا انا مرتبط بإنسانه عشان شخصها

مش هينفع في الحلوه ابقي معاها وفي المره اتخلي عنها ديه مش اخلاق صعايده وانت عارف

:)

يعني لو كده مش هسيبها خالص إلا لو هي اصرت علي كده

يعني لو حسيت إنها فعلا مش عايزاني

يبقي ده قرارها ومش هينفع افرض نفسي عليها

وبعدين مش بعيد فعلا يكون فيه نصيب بعد كده ونخلف ربنا قادر علي كل شيء

وبعيد عن ده كله القصه حلوه قوي

وفي لحظه ما كنتش عارف ابقي مع مين فيهم كل واحد فيهم عنده حق

وكل واحد فيهم مش عايز يظلم التاني

وإحترمت عصام جدا لما عمل كده وف لحظه ربنا كافئه علي صدقه وصبره

وعرفت بعد كده بقيمته

وإنه لو كان مكانها مكانش هيرفضها زي ما هي عملت رغم إنه لو مكانها كان هيبقي قادر

علي فكره انا سمعت قصص حقيقه حصلت لناس اعرفها زي كده

وفيه ناس كمان ماعرفهاش

يعني فيه واحد اتجوز واحده عايز يخلف ولد وكل مره تجيب بنت

اخر ما زهق طلقها واتجوز غيرها

برضه خلف بنات

وهي اتجوزت وجابت 3 ولاد

شوفت النصيب

ماحدش يقدر يعاند الاقدار

المهم في الاخر انك تكون بخير

وتنورنا من تاني وتطمنا عليك

تحياتي الصعيديه

:)

م/ الحسيني لزومي يقول...

نحن مقبلون علي لحظات حرجه في تاريخ مصرنا
انتخابات مجلس الشعب 2010
انتخابات الرئاسه 2011
هل اعددت نفسك لتقول كلمتك
هل سجلت نفسك في الجداول الانتخابيه
اذا كنت قد سجلت نفسك ادعو غيرك
الحمله الشعبيه للقيد بالجداول الانتخابيه
باقي من الزمن 45 يوم

موناليزا يقول...

هى السايبرات كلها قفلت ولا إيه؟

لعل المانع خير

مدونون من اجل الاقصي يقول...

السلام عليكم
قصة حلوة
بس بصراحة مفيش حد يلومها
ونلومها لي
ده حقها
وغالبا في مجتمعاتنا
الست تضحى علشان جوزها
لكن لو كانت المشكلة من عندها
غالبا في احسن الحالات يتجوز عليها من غير ميطلقها
وكمان ده من حقو
منقدرش نلوم حد

MaNoOoSh يقول...

ازيك يا ريس الحلف

تصدق موقف صعب قوي
حتى اصعب من ان الواحد يتخيل رد فعله هيكون ايه

ঔღঔ نـــوارة ঔღঔ يقول...

ليك وحشة ولهي

معلش عالتقصير بس عندي شوية ظروف

يارب تكون بالف خير :)

فتافيت يقول...

جيت بس ارمي التماسي.. لحسن تقولوا ان انا ناسي :)

ازيك يا عمدة واخبارك ايه؟؟
يارب تكون بخير
كل سنة وانت طيب

norahaty يقول...

يااااااااااازعيم
طمنا عليك وأرجع تانى

كيــــــــــــارا يقول...

بيب بيب اعوعا

انا جيت بئا اخيراااااااااا

هقولك

ممكن جدا اتنين مش في اي مشكلة فيهم ومش يكون ليهم نصيب من الخلفه بتكون بوقت ربنا وحده اعلم بيه

رايي هقف معاه رغم ان مشاعر الامومه عندي ملهاش حد

الا اني هفكر في اي طريقه اننا نسعد بعض نكفل طفل اي شي

مش احسن لو في طفل واللي معايا موش طيقاه !!!

م/ الحسيني لزومي يقول...

عام سعيد وكل عام انتم بخير
نحن مقبلون علي لحظات حرجه في تاريخ مصرنا
انتخابات مجلس الشعب 2010
انتخابات الرئاسه 2011
هل اعددت نفسك لتقول كلمتك
هل سجلت نفسك في الجداول الانتخابيه
اذا كنت قد سجلت نفسك ادعو غيرك
الحمله الشعبيه للقيد بالجداول الانتخابيه
باقي من الزمن30 يوم

z!zOoOo يقول...

ايه يا عم معتصم

فينك كل ده

بذمتك فيه رئيس حزب يغيب كل ده

يا شماته الحكومات والاحزاب فيا

مخصوم منك ( الي تحبه بس إحنا بنرسم عشان نبين إن مفيش كوسه ) ....... يوم

واي حد هيتسيب ويغيب مخصوم منه 365 يوم

هو حر بقي

ارجع بقي يا رئيس الحلف وطمنا عليك

يارب تكون بخير

:)

كل سنه وانت طيب

هستني تطمني لما ترجع

z!zOoOo يقول...

فينك يا زعيم الحلف

يارب تكون بخير

وتطمنا عليك

غير معرف يقول...

السلام عليكم
اخبارك ايه يااستاذ معتصم
ارجو من الله ان تكون في اتم صحه
اولا الف مبروك ع الخطوبة وربنا يتمم ع الف خي ويرزقك بالذريه الصالحه
ثانيا معلش تعليقي ع قصتك جه متاخر شويه
طبعا ريهام المفروض مش كانت تضحى بحبها ع خاطرر اى شئ والانجاب ده ف ايد ربنا بس يعنى زى ماحصل هو ربنا رزقه لانه صارحها ومش حب انه يضحك عليها وهى عشان مش صبرت وضحت بيه ربنا حرمها من الانجاب
ع العموم انا بدعى ربنا انه مش يحرم حد من الانجاب
ومعلش ع الاطاله اسفـــــــــــــــــــــــــه

غير معرف يقول...

السلام عليكم
اخبارك ايه يااستاذ معتصم
ارجو من الله ان تكون في اتم صحه
اولا الف مبروك ع الخطوبة وربنا يتمم ع الف خي ويرزقك بالذريه الصالحه
ثانيا معلش تعليقي ع قصتك جه متاخر شويه
طبعا ريهام المفروض مش كانت تضحى بحبها ع خاطرر اى شئ والانجاب ده ف ايد ربنا بس يعنى زى ماحصل هو ربنا رزقه لانه صارحها ومش حب انه يضحك عليها وهى عشان مش صبرت وضحت بيه ربنا حرمها من الانجاب
ع العموم انا بدعى ربنا انه مش يحرم حد من الانجاب
ومعلش ع الاطاله اسفـــــــــــــــــــــــــــــــــــــه

غير معرف يقول...

السلام عليكم
اخبارك ايه يااستاذ معتصم
ارجو من الله ان تكون في اتم صحه
اولا الف مبروك ع الخطوبة وربنا يتمم ع الف خي ويرزقك بالذريه الصالحه
ثانيا معلش تعليقي ع قصتك جه متاخر شويه
طبعا ريهام المفروض مش كانت تضحى بحبها ع خاطرر اى شئ والانجاب ده ف ايد ربنا بس يعنى زى ماحصل هو ربنا رزقه لانه صارحها ومش حب انه يضحك عليها وهى عشان مش صبرت وضحت بيه ربنا حرمها من الانجاب
ع العموم انا بدعى ربنا انه مش يحرم حد من الانجاب
ومعلش ع الاطاله اسفـــــــــــــــــــــــــــــــــــــه

غير معرف يقول...

السلام عليكم
اخبارك ايه يااستاذ معتصم
ارجو من الله ان تكون في اتم صحه
اولا الف مبروك ع الخطوبة وربنا يتمم ع الف خي ويرزقك بالذريه الصالحه
ثانيا معلش تعليقي ع قصتك جه متاخر شويه
طبعا ريهام المفروض مش كانت تضحى بحبها ع خاطرر اى شئ والانجاب ده ف ايد ربنا بس يعنى زى ماحصل هو ربنا رزقه لانه صارحها ومش حب انه يضحك عليها وهى عشان مش صبرت وضحت بيه ربنا حرمها من الانجاب
ع العموم انا بدعى ربنا انه مش يحرم حد من الانجاب
ومعلش ع الاطاله اسفـــــــــــــــــــــــــــــــــــــه

ABOALI يقول...

ايه يا انسان
طمنا عليك
مش عوايدك يا صعيدى
ولا احداث نجع حمادى اثرت فيك ولا ايه

طمنا يااااااااااا انسان