الجمعة، 9 أكتوبر 2009

نعمة الرضا

بسم الله الرحمن الرحيم
السلام عليكم ورحمة الله وبركاته
نعمة الرضا دى من اعظم النعم اللى انعم بيها المولى عز وجل على الانسان
الرضا هو أن تشعر بالارتياح لما يختاره الله لك
كتير بنشوف الناس ساخطه ومش راضيه عن احوالها اللى عايشه فيها
والناس اللى عندها رضا عددهم قليل جدا
يعنى نشوف اللى مش موظف طبعا مش راضى بحاله ونفسه فى الوظيفه والشغل
طب هو معنى كده ان الموظف راضى بقى عن حياته وعيشته؟؟
نبص نلاقى برضو الموظف مش راضى وعايش ساخط
ولو رجعنا وشوفنا نفس الشخص اللى كان ساخط وكل امله فى الدنيا
انه يتعين فى حتة وظيفه يعيش منها
بعد ماحصل اللى كان بيتمناه برضو مش راضى وساخط ومش عاجبه حاله
على الرغم من اننا لو بصينا على الناس اللى عندها نعمة الرضا
ممكن يكون مستواهم المادى بسيط جدا ومع ذلك عايشين فى سعاده تامه ومصالحه مع النفس
والقليل اللى عايشين فيه ده مكفيهم وفايض منهم كمان
يعنى الاكل لما يبقى فول وطعميه تلاقيهم بيستمتعوا بطعمه ولا كأنه كباب من عند ابوشقرة
كوباية الشاى بقى اللى بعد الاكله الحلوة دى تبقى غاية المراد من رب العباد والحياة حلوة وزى الفل
وتسأل الواحد فيهم ايه اخبار الدنيا معاك ؟؟
يرد عليك بكل انبساط وقناعه ورضا ويقولك زى الفل والواحد لو طلب اكتر من كده يبقى طماع
ونشوف ناس تانيه صحتها زى الفل وعند اى شكوى بسيطه نجد السخط وعدم الرضا
فى حين نجد ناس ربنا ابتلاها بامراض خطيرة وبتعيش بيها سنين وهى بتعانى وبتتألم
ولما تتكلم مع واحد منهم تلاقيه بيقولك الحمد لله دى نعمة كبيرة من رب العالمين انا احسن من غيرى كتير
ياعم ازاى ؟؟ ده انت تعبان والناس كلها سليمه وصاحيه؟؟
يقولك ايوة بس فيه ناس تانيه برضو تعبانه عنى
وفيه ناس سليمه بس ربنا مش راضى عنهم
وسايبهم بصحتهم علشان يزيدوا فى الذنوب وبعدين انتقامه منهم هيكون شديد
انما احنا الحمد لله هما شوية التعب دول وانا عارف ان المولى عز وجل بيكفر بيهم ذنوب ممكن اكون عملتها وانا مش عارف
يبقى كده انا احسن منهم كتييييير
لانى على مااموت هيكون المرض ده طهرنى من كتير من الذنوب اللى انا ممكن اكون عملتها
ولو ماكنش فيه ذنوب تبقى حسنات بتتحط فى حسابى
عرفت بقى انى انا احسن منهم؟؟؟
بجد بجد نعمة الرضا دى نعمة عظيمه جدا
بس ياريت نعرف قيمتها
انما نقول لمين
كلنا ماشيين فى الدنيا مش عاوزين نستكفى منها
صحيح ربنا امرنا بالسعى والجد والعمل
انما ده مايكونش على حساب حاجات تانيه كتير
وبعدين احنا نسعى ونشتغل ونعمل اللى علينا ونرضى باللى ربنا قدره لينا وقسمهولنا
وزى ماربنا قال فى الحديث القدسى
((إن أنت رضيت بما قسمته لك، أرحت بدنك وعقلك، وكنت عندي محموداً.
وإن لم ترض بما قسمته لك، أتعبت بدنك وعقلك وكنت عندي مذموماً))
وقال رسولنا الكريم - صلى الله عليه وسلم -
((ارضى بماقسم الله لك تكن اغنى الناس))
انا كتبت البوست ده علشان انا شوفت ناس عندها النعمة دى
وشوفت هما عايشين سعداء ومبسوطين ازاى
وعلشان كده انا كتبته علشان اذكر نفسى بالنعمه دى واشرككم معايا
وبدعو المولى عز وجل انه ينعم علينا بنعمة الرضا
والسلام عليكم ورحمة الله وبركاته

هناك 48 تعليقًا:

آيوشة يقول...

احجز اول تعليق

آيوشة يقول...

ياسلاااااااااااااام ولاول مرة فى تاريخ مدونتك ايوشة تحتل التعليقات الاولى وبجدارة ^_^

آيوشة يقول...

طيب مع انى مش بعرف بيحتلوا ازاى بس نحاول نحتل برضو مفيش مانع نجرب

آيوشة يقول...

طيب انا بقول اروح اقرا احسن علشان شكلك هتضربنى :)

موناليزا يقول...

:) ياااه قد ايه موضوع جميل
وبجد مبسوطة لانك اتكلمت فى الموضوع ده
اللهم ارزقنا رضاك والجنة

آيوشة يقول...

ياااااااه الرضا بجد نعمة مش كتير مننا بيقدرها دايما ماما علشان هى الحكيمة للى بتعلم منها باستمرار تقولى اتعلمى تحمدى ربنا وتكونى راضية عن كل حاجة طبعا كتير جدا تلاقينى بتلامض معاها واقولها يعنى ماانا راضية امال انا بعمل ايه تقولى مهو باين من تصرفاتك انك راضية عن حياتك
طبعا فى قاعدة كده لازم كلنا نعمل بيها كلنا حافظنها بس بنطنش ومش بنفذها فى العبادة لازم ننظر للى اعلى مننا وفى الحياة ننظر للى اقل مننا علشان نشكر ربنا على نعمه
عدم الرضا شفته فى ناس ماشاء الله الفلوس هتغطيهم وياريت بيرضوا الا كل حياتهم نكد فى نكد واخوات هيخسروا بعض بسبب الطمع
وبالعكس والله فى ناس فى قمة البساطة وراضية بحالها وماشاء الله ربنا مديها رضا وراحة بال مفيش بعد كده

آيوشة يقول...

مش تفتكر خلصت لسه عندى كلام كتير استنه هحكى حكاية تانية ^_^


كل مرة رجل مر على رجل كفيف ومشول وتقريبا ابرص ولقيه بيحمد ربنا على نعمه فقاله انت فيك ايه علشان تحمد ربنا عليه قاله كفاية انه لسه عندى نعمة القلب الخاشع والدائم لذكر لله فى حين ناس كتير نسيت ربنا

تسلم ايديك بجد بوست جميل جدا

د/عرفه يقول...

السلام عليكم
كيفك حبيبى

وربنا يديم عليك الصحة والعافية دايما

ويديم علينا الرضا
لان تلك النعمة مصدر السعادة


ونسالكم الدعاء دايما

أحمـــــــــــــد أبو العلا يقول...

الرضا
هوا فيه اجمل من ديه نعمه

بس اللي معندهوش رضا عنده مكانه طمع
والطمع نار بتاكل في صاحبها لغاية ما تحرقه

حتى تشرق الشمس يقول...

السلام عليكم ورحمة الله وبركاتة
كيف حالك يا اخى الفاضل؟
انعم الله عليك بنعمة الرضا دائما
جزاكم الله خيرا كثيرا على كل حرف كتبتة ووضع فى ميزان حسناتك
دمت بالف خير

عاشقة الأحزان يقول...

السلام عليكم

الله عليك بجد موضوع فى قمة الروعة ربنا يبارك فيك يارب
والحمد لله على نعمة الرضا اللى كلنا عايشين فيها ولاذم نشكر ربنا على فضلة ونعمه الى لا تعد ولا تحصى
وبجد احنا احسن من غيرنا بكتير قووووووووووووى
ربنا يعزك يارب ويكرمك وجزاك الله كل الخير
ومتشكرة لحضرتك على شعار الحملة لنصرة الاقصى
بس ليه حضرتك معلقتش على الموضوع
ربنا يبارك فيك
مودتى
ايناس

المعتصم يقول...

بسم الله الرحمن الرحيم
السلام عليكم ورحمة الله وبركاته
**********
ايوشه بنت خالى
تحياتى
مبروك عليكى اول تعليق ياستى
وكمان اللى بعده
وبعدين بطلى لعب بقى
هو انتِ اتعلمتى من احمد يويو ولا ايه؟؟
ههههههههههه
***********
موناليزا
تحياتى
الحمد لله ان الموضوع عجبك
عارفه الموضوع ده كتبته اكتر من خمس مرات ومانزلتوش
وكنت كل مرة اكتبه بطريقه مختلفه واقول بعد كده اقراه واظبطه وانزله وبعدين مايحصلش
المره دى كتبته ونزلته فى ساعتها لانى كنت محتاج احس بالنعمه دى وافكر نفسى بيها لاننا ساعات كده بنشطح ومش بنحس بالنعمه اللى فى ايدينا
والحمد لله على كل حال
نورتينى بمرورك الجميل
***********
ايوشه هانم تانى
اسمعى كلام ماما يابت انتِ وبلاش لماضه
مراة خالى كلامها كله حِكم
وبعدين الرضا مالوش دعوة بالفلوس او الفقر
دى حاجه بتبقى فى القلب
شكرا على القصه الحلوة دى
وشكرا على مرورك الجميل ياايوشه
نورتينى
***********
د/عرفه حبيب قلبى
تحياتى
فى الاول بقى وقبل ماانسى
التعليقات بتاعتى مش بتظهر عندك ليه؟؟
خد بالك انت كده بتلعب فى عداد عمر مدونتك يامحمد انا حذرتك اهه
هههههههههههه
اللهم امين على دعواتك ونحن واياكم ان شاء الله
شكرا على مرورك الجميل يادكترة
نورت المدونة
****************
البشمهندزززززززززز
ابوالعلا
منور ياباشا
كلامك صح جدا
وان شاء الله ممكن ننزل بوست عن الطمع مرة تانيه
بس مش عارف ازاى حد عاقل يستبدل النعمه اللى زى الرضا دى بالنار بتاعة الطمع اللى مش هتخليه مرتاح ابدا
نورت المدونة ياهندزة
************

المعتصم يقول...

ام سلمى
وعليكم السلام ورحمة الله وبركاته
تحياتى
انا بخير والحمد لله اختى الكريمه
ربنا يكرمك ويعزك
وشكرا على مرورك الجميل
نورتى المدونة
****************
ايناس
تحياتى
وعليكم السلام ورحمة الله وبركاته
ايه ده انا متراقب بقى ؟؟
انا كنت لسه عندك وانتِ بتكتبى التعليق ده
لااااااااااا
كده غلط
مش انا
هههههههههههههههه
انا بصراحه زهقت من كتر الكلام ونفسى انه يكون فعل
اصل الكلمتين اللى هكتبهم مش هيزودو ولا ينقصوا
انا نفسى اننا نعمل حاجه بجدوالله ياايناس
والحمد لله على نعمة الرضا وربنا يديمها علينا يارب علشان نقدر نكمل حياتنا
نورتى المدونة بمرورك الجميل
ســـــــــــــــلام

فاتيما يقول...

حلو قوى البوست دا يا مصطفى
بس عاوزة اقولك من واقع خبرة مرض ابويا و رقدته فى السرير بلا حراك
لمدة تمن سنين و هوه كان شعلة نشاط
الخنقة وقت الشدائد مش كلها قلة رضا
جزء كبير منها بيكون خجل من صاحبها إنه بقى عب على الآخرين
و المدة طولت قوى
بابا كان بيحزن إنه مضطر يكون عبء على امى و علينا رغم إن محدش كان بيشتكى بس هوه كرامته بتبقى ناقحة عليه و دى مسألة طباعو حساسة زى ما بيقولوا ....
عشان كدا بقول دايما يا رب ياخدنى فى عز صحتى عشان مبهدلش حد معايا
ربنا يخفف عن كل الناس و يرزقهم نعمة الرضا يا أستاذنا

غير معرف يقول...

الأخ الكريم: مصطفى
السلام عليكم و رحمة الله و بركاته
أولا : جزاك الله خيرا على هذا الموضوع .
ثانيا : أسعد الناس هو من رضي بما قسمه الله له و هذا لا يتعارض مع ضرورة السعي و الاجتهاد .
نعمة الرضا تجعل الانسان يعيش في سلام مع نفسه و المجتمع من حوله .
عندما قرأت موضوعك تذكرت عبارة كتبها د/ مصطفى محمود في أحد كتبه:
( الأكفان ليس لها جيوب )
و معذرة على الاطالة ،،
سـارهـ

norahaty يقول...

بجد بجد نعمة الرضا
دى نعمة عظيمه جدا
فعلاً يااستاذ مصطفى
ولا ينالها الا الشكرون
لنعم الله عليهم :شاكرون
بحق وحقيق وليس كلاماً فقط.

norahaty يقول...

سجل كمــــان
انا التعليق
ال15يـــاسلام!!

norahaty يقول...

وعنداً فى ايوشة
انا مبسوطة انى
التعليق ال 16
وال17 عارف ليه
ياكبير المقام لأنك
لا تهمل رداً اولاً كان
او أخيرررررررررررراً

norahaty يقول...

وسمعت أمبارح حلقة
أنت تسأل وكومبو يرد
عليك كانت عن مدونة حضرتك
حلقة جميلة سمعتها كلها وذلك
من اجمل الصدف لانى تذكرت الميعاد
هذا اولاً وكمان ماكانش فيه عيان
واحد منتظر او بيكشف كانت العيادة
هوووووووووووو....سبحان الله!!!

adel يقول...

موضوع حلو و يارب الواحد يعرف دايما يرضي بحاله بجد

ABOALI يقول...

يا عينى يا راضى انت يا جميل

هههههههههههههه

كيفيك يا انسان
اتمنى ان تكون راضيا ان شاء الله

موضوع الرضا جميل تناولك فيه
لاءن الرضا مفتاح القبول والدخول الى جنان الله

والرضا مفتاح للرقى وايتاح فرصة للعقل والتفكير لينمو ويستغل وقته فى اشياء اخرى
بدل ان يستهلكها فى الجور على هذا وحسد هذا وكراهية هذا

ان مبدء الرضا بالموجود كما قولت لا يقتل الطموح
ولكن هناك ذلك الطموح الجميل مثل الصبر الجميل
بس كلنا لازم نتعلم صناعة الرضا
لاءن حياتنا نجيد فيها حسن التاءدب مع انفسنا حتى نجيد الرضا بما قسمه الله لنا


تحياتى الراقية لاءنسان راقى

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
فاتيما
اهلا اهلا ياام يوسف
منورة بلوجر كله
انا عارف وفاهم كويس اللى انتِ بتقصديه لانى جربته مع والدى وهو تعبان ولغاية دلوقتى كمان
انما انا اللى بتكلم عليهم مش المرضى انا كلامى عن الناس اللى فى كامل صحتها وفى احسن احوالها ومع ذلك مش راضيه ومش حامده لله فضله ونعمه عليهم
ولما ضربت المثل بتاع الانسان المريض ده بس علشان ناخد عِظه وعبره منه ليس الا
وكلنا والله يافاتيما بندعى بنفس الدعوة اللى قولتيها دى لأن المرض ده يعتبر هو الذل الوحيد للانسان
ربنا يعافينا ويعفو عنا
اللهم امين
اسعدنى مرورك ياام يوسف
*************
غير معرف
الاخت ساره
وعليكم السلام ورحمة الله وبركاته
اهلا اهلا منورة المدونة بقالك فترة مخصمانى مش عارف ليه
ههههههههههههه
يارب يكون خير
انا قلت ان الرضا مش بيتعارض مع السعى والجد والعمل بجهد
احنا نعمل اللى علينا ونرضى بما قسمه الله لنا بعد كده
لان قمة السعادة بتكون فى الرضا
وبعدين حتى اللى ماقراش للدكتور مصطفى محمود عارف ان الاكفان ليس لها جيوب
بس للاسف فيه ناس كتير بتنسى او تتناسى ده وفاكره انها هتعيش الى نهاية الدهر او انها هتاخد ثروتها معاها بعد ماتموت ومش بتكتشف الحقيقه المُرة غير على فراش الموت ربنا يعافينا
ياريتك تطولى تانى اكتر من كده لانى بستفيد من كلامك
نورتى المدونة واسعدنى مرورك
***************
دكتورتنا ووزيرتنا
الدكتورة نور
تحياتى لمعاليكى
معاكى حق الشاكرون بحق وحقيقى مش كلام
انما للاسف دلوقتى معظمنا كلام وخلاص

ومبروك عليكى التعليق ال 15 وال16 وال17 كمان
هههههههههههههههههههه
ربنا يعزك يادكتورة وبعدين انا اتعلمت الاحترام ده منكم
لما ادخل الاقى نفسى التعليق ال مش عارف كام وخمسين ومع ذلك بتردوا عليا ومش بتهملوا تعليقى وكأنى اول تعليق يبقى لازم اتعلم حاجه

اه وعلى رأى المثل رب صدفه خير من كوباية شاى(والعكس صحيح)
بس للاسف انا ماسمعتش الحلقه ومش عارف اسمعها على الموقع
بس اكيد طبعا يعنى كانت حلقه رخمة
ههههههههههههههههههه
مش عن المدونة بتاعتى
وكمان ماكنش فيه عيانين
يعنى مش بس مافيش كشوفات لأ وكمان حلقه عن مدونتى
بجد ليكى الجنه
ههههههههههههههههههههههههه
نورتينى يادكتورتنا
*************
عدوله حبيب قلبى
منورنى
بجد الانسان لما يبقى راضى عن حاله ومقتنع انه هو بيعمل اللى عليه بيبقى عايش فى سلام نفسى وسعاده غير محدوده
وبعدين احنا نعمل اللى علينا ونسعى بس الظروف جايه معانا كده طب لو اتضايقنا ايه اللى هيحصل ؟؟ ولا حاجه ومافيش اى حاجه هتتغير
انما الرضا بيخلينا متفائلين وعندنا امل فى بكرة
ولا انت ايه رأيك؟؟
هههههههههههههه
شكرا على المرور يا باشا
ســــــــــلام

المعتصم يقول...

لأ لأ لأ
انا مش مصدق نفسى
ابوعلى عندى هنا فى المدونة
مش معقوله
ثوانى اروح اجيب البندقيه واضرب كام طلقه تفاريح
ههههههههههههههههههه
ياباشا منورنى فى اول مرور لمعاليك
يا باشا شكرا على سؤالك
انا الحمد لله رب العالمين فى احسن الاحوال
وبحاول انى اكون راضى واشكر ربنا على نعمه عليا
......
الرضا مفتاح القبول والدخول الى جنان الله
والرضا مفتاح للرقى وإتاحة فرصة للعقل والتفكير لينمو ويستغل وقته فى اشياء اخرى
بدل ان يستهلكها فى الجور على هذا وحسد هذا وكراهية هذا
.......
الله عليك ياابوعلى وعلى اضافاتك الجميلة
اللى مش هقدر اعلق عليها او ارد لانها جابت الخلاصه فى الموضوع
بجد بجد اسعدنى مرورك وافادتنى اضافاتك
شكرا على المرور الجميل
نورت المدونة ياابوعلى
تحياتى

norahaty يقول...

لأ بجد كانت حلقة
حلوة جداً عن التدوينة
السابقة:باك تو سكول
ماكنتش رخمة بقولك
حتسمع الكلام ولا!!
هههههههههههههههه

ঔღঔ نـــوارة ঔღঔ يقول...

الله عليك فعلا نعمة الرضا دي من اعظم النعم

انا الحمد لله بحاول على قدر الامكان اكون راضية بالي ربنا قسمه لينا وبقول الحمد لله علطول

وبدايق جدا لما الاقي ناس ناقمة علطول وتلاقيها عندنها كل حاجة وبرضوا تقول معنديش ومعرفش ايه

بووست هايل بجد تسلم ايدك

وجعله الله في ميزان حسناتك :)

م/ الحسيني لزومي يقول...

يارب يفتح عليك وينعم عليك وعلينا بنعمة الرضا....انا سعدة جدا بهذا البوست
جزاك الله خيرا
واعذرني علي تقصيري في زيارتكم

ريمان يقول...

السلام عليكم


عارف لو الانسان راضى

باله هيرتاح


ومادام باله بقى مرتاح


هيعيش اسعد خلق الله



ربنا يرزقنا نعمه الرضا


احنا محتاجين بجد ناخد دروس فيها


عشان نرضى

ريمان يقول...

ماتقوليش لماضه هانم عشان متعصبش

فتاه من الصعيد يقول...

دي هي دي النعمه اللي بتخليك تشعر بكل نعم ربنا .... فتعيش سعيد

بمعنى ادق ... السعاده في الرضا

اتمنى لك دوام الرضا والسعاده

تحياتي

اللؤلؤة يقول...

حضرة الصعيدى الهمام
السلام عليكم
بالفعل
الرضا هو أن تشعر بالارتياح
لما يختاره الله لك وأعتقد يا
صديقى بأننا أصبحنا لا نؤمن
بقيمة الرضا لذلك أصبحنا نلهث
وراء المال وكل ماهو فى يد غيرنا
خالص تقديرى
إلى صديقى الغالى

mohamed ghalia يقول...

اللهم ارزقنا الرضا

ستيته حسب الله الحمش يقول...

بوست جمييييييييييييييل

هي قصة الرضا في طبع ابن ادم
لو عنده جبلين من دهب لقال اين الثالث
وده معنى مختلف عن السعي خالص

فيه ناس اغنياء وميملاش عينها التراب
وفيه ناس اغنياء والدنيا في ايدهم وتحت رجليهم وبينفقوا للتوسعة على بيوتهم وفيما يرضي الله

وفيه ناس فقراء وحاقدين وكل عيشتهم شكوى
وفيه ناس فقراء وراضين وفاهمين الحكم الربانية وطمعانين في رضا ربنا وحسن ثواب الآخرة

هي دي الدنيا
ودايما انا اقول
اللي ربنا يؤتيه نعمة الرضا فعنده كنز بس لو يعرف قيمته

تسلم ايدك
وربنا يرزقنا واياك نعمة الرضا

reem يقول...

ازيك يا استاذنا

واخبار باباك ايه ؟

ان شاء الله بخير يارب دايما

الرضا دى احلى حاجة في الدنيا

لو الواحد فعلا قدر يوصلها هيرتاح ايا كان وضعه

انا دايما بدعى ربنا انه ينعم عليا بنعمة الرضا

الرضا بكل شئ في حياتى والرضا بقضاء ربنا وحكمه

بوست حلو اوى بجد

yoyo يقول...

صباحك سكر
سمعنى سلام شحط محط كبير اوى اوى من عمك نجعاوى
ههههههههههههههههه
اخبارك ايه يامستر
ماشى ياعم ماشية معاك اهوا
لا تحضير ولا حصص
وانا مطحونة اهىء اهىء اهىء
ربنا مش بيحب الظلم
ههههههههههههههههه
ربنا يعينك و يوفقك يارب
تسلم ويسلم ليا سؤالك عنى يارب

بالنوسبة للبوست بقى
و الله انت تناولت الموضوع باسلوب حلو وبسيط اوى
بس دايما الانسان مش بيرضى باللى انقسم له دايما فى حالة من الطمع و الزيادة و الحوار الدائم اللى بيدور فى كلمتيين هو اشمعنى انا بقى ؟! ونظرة من السخط و عدم الرضا
بس سبحان الله احساس الرضا دا فيه جمال وقوة انك ترضى و تتعايش مع الواقع و تحبها و قتها ربناسبحان الله بيعوض الانسان ويجازيه كل الخير على صبره

كل انسان له نظر حوله هيجد انه احسن من غيره و انه فى نعمة يجب ان نشكر عليها ربنا
ربنا يرزقنا رضاه و الجنة اللهم آمين يارب
دمت اخى بالف خير وسعادة
تحياتى
يويو

yoyo يقول...

امممممممم
وانا عاملة اكح اكح
واقول مين بيجى فى سيرتى
هههههههههههههه
انا باعمل احتلال لا سمح الله
توء توء توء
دى كلها اوشاعات
هههههههههههههه

مرة تانية متشكرة جدا لسؤالك عنى
ويارب تكون بالف خير يارب
تحياتى
يويو

yoyo يقول...
أزال المؤلف هذا التعليق.
شوكولاتة يقول...

مش عارفة أرد أقول إيه بس لو هاتكلم بصراحة أنا تصرفاتي بتقول إن أنا مش راضية بس أنا الحمد لله بحس إن أنا من جوايا راضية أو على الأقل بقول أنا أحسن من غيري كتير

الحمد لله على كل شئ
تحياتي

مسدس صغير يقول...

انا رضينا بما قسمته لنا
فزد فى رضانا
فعلا الرضا ده نعمة كبيرة اوى من عند ربنا
ربنا يرزقنا الرضا الدائم
والله انت بوستاتك عايزة بوسة
بس بلاش عشان العدوى
ههههههههه
ربنا يكرمك
جزاكم الله خيرا
احييك على البوست يا ددرش

أحمد عاطف يقول...

الله يفتح عليك

وينور ما حواليك

ويرضيك

بحق كل كلمة حق كتبتها في البوست دا

تحياتي

الفراغ يقول...

ابنى الغالى...وزميلى العزيز
اهنيك على البوست ده بجد

ربنا يبارك فيك
كان نفسى اكتب نفس كلامك
بس انت كتبته احسن منى بكتير

ربنا ينفعنا جميعا بيه
ويجعله فى ميزان حسناتك
الرضا كنز ثمين نتمنى جميعا ان نمتلكه

المعتصم يقول...

بسم الله الرحمن الرحيم
السلام عليكم ورحمة الله وبركاته
**********
الدكتورة نور
منورة الدنيا
ربنا يكرمك بس للاسف انا كنت فى الشغل وماسمعتش الحلقه
وحاضر ياستى هو انا اقدر مااسمعش الكلام
بس من غير تهديد
انتِ عارفه انى انا بخاف بسرعه
هههههههههههههههه
********
نوارة بتاعة الجمال
ربنا يرضى عنك وعننا وينعم علينا بنعمة الرضا يارب
هو ممكن احيانا الواحد يبقى متضايق ومش حاسس من غضبه وضيقه بالرضا بس الحمد لله بنرجع تانى بسرعه ونحمد ربنا على نعمه الكتيرة علينا ونحاول نكون راضيين باللى ربنا كتبه لينا
نورتى المدونة يانوارة
***********
م/الحسينى لزومى
تحياتى
ربنا ينعم عليك وعلينا بنعمة الرضا
اللهم امين
انا اللى سعدت جدا بمرور حضرتك بالمدونة وان الموضوع عجبك
ومافيش تقصير ولا حاجه انا عارف ان حضرتك مشغول ولك عذرك
نورت المدونة يابشمهندس واسعدنى مرورك
***********
ريمان
اختى الكريمه
وعليكم السلام ورحمة الله وبركاته
(ينفع كده ماجبتش سيرة اللماضه اهه)
الانسان لو راضى مش بس باله اللى هيرتاح
ده هو كله على بعضه هيرتاح
وهو فيه اهم من الراحه ؟؟
ماهو طول ماالواحد مرتاح هيبقى سعيد ومبسوط وعايش زى الفل
ماتعرفيش مدرس خصوصى فى المادة دى؟؟
ههههههههههههه
ربنا يرضى عننا ويرضينا جميعا يارب
سلام يالماضه(بحب اغيظك مش عارف ليه)
هههههههههههههههههههههه
*************
فتاة من الصعيد
تحياتى يامروة
يعنى ممكن نقول عليها ام النعم؟؟
طالما هى اللى بتخلى الواحد يشعر بكل نعم ربنا عليه وبالتالى يعيش سعيد
ولا ايه ؟؟
ههههههههههههههه
ربنا يرزقن ويرزقك الرضا والسعاده
نورتى المدونة
**************
اللؤلؤة
صديقى المنوفى التمام
وعليكم السلام ورحمة الله وبركاته
ياصديقى العزيز للاسف كثير من مفاهيمنا الصحيحه ضاعت واندثرت ومعها كثير من قيمنا وقواعدنا الايمانيه التى تناسيناها ونحن نلهث وراء الماده
ومنها القناعه والرضا
ولكن مازال هناك بعض البصيص من الامل باننا نحاول نتمسك بالقليل الباقى لعل وعسى
اسعدنى مرورك ياصديقى العزيز
*************
محمد غاليه
اخى الحبيب
منور المدونة
بس قولى : هو المنايفه بيبقو متفقين ييجوا ورا بعض ولا ايه؟؟
ههههههههههههههه
اللهم امين على دعائك الجميل يامحمد
بيسعدنى مرورك دايما
*************
سوتيته
اختى الكبيرة
منورة المدونة

شوفى ياستنا
فيه طموح وفيه طمع
من الطموح انى اسعى وراء الجبل التالت بتاع الدهب وانا فى نفس الوقت راضى باللى عندى بس بسعى واشتغل
ليه لأ والله انا اسعى جه التالت خير وبركه ماجاش انا عندى اللى مكفينى

اما الطمع بقى هو اللى ناااس كتير بتعمله دلوقتى الواحد مش بيحمد ربنا على النعمه اللى فى ايده مهما كانت
ومهما كانت ظروفه احسن من غيره
ودايما عينه على اللى فى ايد غيره

حضرتك ضربتى الامثله الهايلة بتاعة الناس الاغنياء والفقراء فى الحالتين
وهى دى الدنيا

ربنا يكرمنا وينعم علينا بنعمة الرضا ويرضينا ويرضى عننا اللهم امين

بيسعدنى مرورك يادكتورة
**************

المعتصم يقول...

ريـــــم
تحيـــاتى
الله يسلمك
الحمد لله رب العالمين الوالد بخير وفى تحسن
معاكى حق فعلا الرضا احلى حاجه فى الدنيا لانه هو اللى بيكون سبب السعاده والراحه
ربنا ينعم عليكى ويرزقك بالرضا فى كل امور حياتك يارب
نورتى المدونة بمرورك
************
يــــويــــو
مساكِ سكر زيادة يامس
وعمك نجعاوى بيسلم عليكى
ههههههههههههه
ايه هو احنا هنبتديها قر ولا ايه؟؟
ليه كده ؟؟ هزعل منك وبعدين دى قدرات مدرسين ياامى
هههههههههههههه
ربنا يكرم يارب ويوفقك

احنا بنحاول يكون عندنا رضا باللى ربنا قسمه لينا
صحيح فيه حالات ساعات كده يكون الواحد فينا متضايق وغضبان ومش بيقدر يحكم على الامور كويس
ساعتها بنحس بعدم الرضا ده ونقول اشمعنى
انما الحمد لله شويه كده ونهدى ونرجع تانى نحمد ربنا ونشكره على نعمه الكتيرة علينا ونعرف اننا احسن من غيرنا كتير مهما كان باين العكس
لانه باختصار كل اللى ربنا بيجيبه لينا خير وعمر ماربنا بيجيب لنا حاجه وحشه ابدا

وامين على دعواتك الجميلة وربنا يرزقنا الرضا يارب
........
اوشاعات مين ؟؟
ده انتِ السبب فى ظهور ظاهرة الاحتلال على بلوجر
وانا عرفت من مصادر سريه وموثوق فيها ان اسمك راح عند الجماعه اياهم
خلى بالك بقى علان انتِ متراقبه
هههههههههههههه
ومافيش داعى للشكر احنا اخوات وده واجب وفرض عليا
نورتينى واسعدتينى بمرورك الجميل
**************
قلنا مليون مرة ماحدش يحذف التعليقات
انا بعد كده هضرب
انا بقول اهه
**************
شوكولاته
تحياتى
كلنا كده على فكرة لينا ساعات وساعات
ساعات نحس اننا مش راضيين عن حاجه خالص فى حياتنا
بس الحمد لله بنرجع ونحمد ربنا ونعرف اننا احسن من غيرنا كتير
ربنا يرزقنا الرضا من عنده ويرضينا ويرضى علينا
اللهم امين
نورتى المدونة
**************
مسدس صغير
ابوصلاح حبيب قبلى
الله عليك وعلى دعواتك الجميلة
اللهم امين
ياعم متشكرين على موضوع البوسه ده
بس انت عارف اديك موضوع العدوى والحاجات اللى ماشيه فى البلد اليومين دول ههههههههههههههههههههههههه
نورت المدونة ياابوالصلح
*************
احمد عاطف
تحياتى
اهلا بيك فى اول زيارة لمدونتى المتواضعه
واشكرك على رأيك وذوقك ومجاملتك
واتمنى يدوم التواصل
نورت المدونة بمرورك
************
الفراغ
ست الكل
تحياتى
منورة بلوجر كله
انا متعرض
لانه لو حضرتك كنتِ كتبتى عن الرضا اكيد كان هيبقى كلامك احلى من كلامى بكتيييييييييييييييير جدا
ربنا يرزقنا الرضا ويرضى علينا يارب
نورتينى ياست الكل
واسعدنى مرورك
تحياتى ودمتِ بكل خير وود
والسلام عليكم ورحمة الله وبركاته

معتز شاهين - باحث تربوي يقول...

اللهم ارضى عنا وارضينا

ويبقى التواصل

الشعب لابد له من حكومه تشكمه يقول...

من اسباب السعاده فى الدنيا هى نعمة الرضا..
ياااااااااااه الرضا دا لو فعلنا عملناه صح هتلاقينى متقبلين كل حاجه فى حياتنا من غير لا حزن ولا زعل ولا ياريت ولا لو...
اللهم الهمنا الرضا بعد القضاء يارب.

المجاهد الصغير يقول...

السلام عليكم
((ارضى بماقسم الله لك تكن اغنى الناس))
جعله الله فى ميزان حسناتك
بجد جزاكم الله خيرا على التذكره
وفقك الله

طوبه فضه وطوبه دهب يقول...

الرضا دا من اجمل نعم ربنا علينا ربنا يكتبها لنا ويديمها علينا نعمه اللهم امين ربنا يجعله فى ميزان حسناتك يارب

mimi يقول...

السعادة في الرضا

حتي لو راضي عن حاجة وغيرك شايفها غلط

بتبقي سعيد

بوست رزين جداااااااااااا

تحياتي

shams يقول...

جمييل جدا ودى نعمه لا ينالها الا المؤمن نعمة الصبر والرضا
في صحيح البخاري من حديث أبي هريرة رضي الله عنه عن النبي صلى الله عليه وسلم قال: ما يصيب المسلم من نصب ولا وصب ولا هم ولا حزن ولا أذى ولا غم، حتى الشوكة يشاكها إلا كفر الله بها من خطاياه .
الحمد الله رب العالمين