الثلاثاء، 8 سبتمبر، 2009

إفـــــــــــــــرررراااااااااااااااااج

بسم الله الرحمن الرحيم
السلام عليكم ورحمة الله وبركاته
الحمد لله رب العالمين
والدى طلع النهارده من المستشفى قبل المغرب
واخد إفرررررراااااااااااااااااااااااااااااااااااااج
صحيح هو لسه تعبان شويه
انما الحمد لله احنا كنا فين وبقينا فين
14يوم من العناء المتواصل فى المستشفى
وطبعا كلكم عارفين يعنى ايه مستشفى حكومى حتى لو كانت بفلوس
وطبعا مش هقدر اجيب سيرة المستشفى من غير مااذكر العلامه المسجله بتاعتها
وهى الصراصير
اه الصراصير او بمعنى اصح جحافل الصراصير
وياسلام بقى على ملائكة الرحمة
ياناس هو فيه كده
لا بجد بجد حاجه ماتتوصفش
مش عارف بصراحه الممرضات دول يعنى الواحد يديهم حقهم ازاى
يعنى لو كل مرة مكنتش أعد البرشام واعرف نوع العلاج
كان زمان ابويا راح فى ابو خليعه
الجرعه تبقى 200 يجيبوا هما 400
وبدل ماهما 6 برشامات يجيبوا 3
وخد من ده كتييييييييييييييييييييييير
يللا ماعلينا
بس مش هجيب سيرة زكريا اللى هو التمرجى او العامل اللى هناك
اللى هو عاوز قبل ماتنده عليه تأبجه طبعا والا هيصدرلك الطرشه
ولا حياة لمن تنادى
واه بقى على الدكاترة الحلوين
النواب الصغيرين
اللى عاملى فيها انه احمد زويل
واللى فاكره نفسها خليفة مدام كورى فى الملاعب
اما الكبار فحدث ولا حرج
وحسبى الله ونعم الوكيل
ده انا شفت ايام سواااد فى الهبابه دى الله لا يرجعها
***********
وبحب طبعا اشكر كل الناس اللى دخلت هنا
ودعت من قلبها لوالدى بالشفاء
واخص منهم
*لقد خلقنا الله احرارا(الزميلة فى رحلة التعب التعليمى)
*بدراوى(حبيب قلبى اللى زعلان من الدنيا)
*البشمهندز احمد ابوالعلا(والله حاسس انك صاحبى من زمان مش عارف ليه)
*عاشقة الاحزان(نوسه بتاعة هايأكلونا بطاطا وحزينه علشان كده)
*محمد غاليه(اخويا الصغير على الرغم من انه منوفى)
*ستيته حسب الله الحمش(اختى الكبيرة ياناااااااااااااااااااااااااااااااااس )
*فاتيما(الحنان كله)
*ريمان(لماضه هانم)
*ميمى (بتاعة بوخارست واصل الشقاوة)
*اللؤلؤة(صديقى العزيز التمام ومنوفى برضو)
*عادل بتاع الحكومه(اخف دم وكمان بلدياتى )
*د/ياسر عمر(اخويا بتاع الرصيف(هو عارف) بس بجد اخويا اخويا)
*زيزو(بلدياتى وحبيبى ومشروع نصاب فاشل)
*ام مالك (دى بقى مش عارف اقول عليها ايه بجد ام فعلا يااخوانا وكله كوم وانها كل يوم تتصل بيا تتطمن ده كوم تانى )
*مسدس صغير(ابوصلاح حبيب قلبى وهيبقى ابو نسب لانى نويت اتجوز من عندهم)
*ميخو (بتاع التحكم الالى والشكولاته)
*الفراغ (ست الكل )
*نوارة (الجمال كله وكانت هتبقى خالت العيال بس مافيش نصيب بقى)
*ايوشه بنت خالى العزيزة
*مروة (الناطق الرسمى باسم فتيات الصعيد)
* شيما (بتاعة الجماعه المشكومين اللى احنا مالناش دعوة بيهم خالص)
*بستان الحب (امنا الفاضلة )
*فلور جيرل (العلومنجيه)
*شارم (بتاع الاعدام )
*غربتى (الاميرة)
كل الشكر ليكم بجد وخصوصا للناس اللى كلمونى فى التليفون
وحسسونى انى فعلا ليا اخوات تانيين غير اللى كانو معايا فى المستشفى
دلوقتى اسيبكم واروح انام شويه علشان هموت من النعس
ســـــــــــــــــــــــــــــــلام

هناك 34 تعليقًا:

مسدس صغير يقول...

الحمد لله على العودة
ربنا يشفيه ويعافيه
الحمد لله الذى انجاكم من المستشفيات الحكومية
هههههههه
حمد الله على سلامة الحاج
وحمد الله على سلامتك

مسدس صغير يقول...

وكمان اول تعليق؟؟؟؟؟؟؟؟
وكمان عاوز تناسب من عندنا؟؟؟؟؟
دا احنا هنفرفروك
ههههههه

ايوشة يقول...

الف حمدلله على السلامة والحمد لله على سلامة الحج ربنا يتمم شفاءه على خير يااااااارب
وبصراحة كفاية انه خرج من المستشفى انا عارفة اللى بيحصل فى المستشفيات وخصوص المستشفى الجامعى :(

adel يقول...

حمدالله علي سلامته و ربنا يكمل شفاه علي خير

وبعدين ايه شكرا دي ياعمونا
مفيش بينا الكلام ده

بس ابقي سيب اسم المستشفي عشان لو في حد من بحبه هابعته هناك خميس و جمعة

ايوشة يقول...

هع هع هع عادل عايز تبعت الناس اللى مش بتحبها المستشفى دى لا بجد يازين ما اخترت ربنا ما يكتب على انسان ابدا يروحها تانى اللهم امين يارب العالمين

عاشقة الأحزان يقول...

الف مليون حمدالله على السلامه

ولا شكر على واجب وان شاء الله ربنا يتم شفاه على الف خير
ومتشكره قووى على مرورك الكريم

مودتى
ايناس

ghorBty يقول...

السلامـ عليكمـ

الحمد لله رب العالمين

ربنا يتم شفاه علي خير ويجعله طهور له ان شاء الله

وان شاء الله بعد الايام الصعبه ديه يجي الفرح والهنا في بيتكمـ يااارب

norahaty يقول...

حمدلله على سلامة
الوالد وربنا يكمل
شفائه هو وجميع مرضى
المسلمين اجمعـــــــين.
أسفين على التـاخير ياريس
بس رمضان بقى انت عـــارف
ارجو قبول العذر يازعيم حلفنا
ياطيـــــــــــــــــــــــــب

norahaty يقول...

كل كلمة فى
التدوينة انا
موافقاك عليها
من اول(الصرصور)
الى مدام كورى ود.زويل:(

فاتيما يقول...

اومال بس زعيم الإبر و بتاع
فين يا عم الزعامة دى ؟؟
شوية ممرضات و تمرجى يعملوا كدا معاك ؟!!!
زعيم اونطة بقى و لا إيه؟؟
يلا بلد مبتقدرش ى
و الله لا يعدها أيام يا مصطفى
ألف مليون سلامة للوالد و إن شاء الله ربنا يزيح عنه و ميحتاجش يروح المنتجع دا تانى إلا لزيارة مرضى بس
و سلامتك انت كمان انا عارفة المرافق للمريض بيشوف العجب و بيبقى عاوز راحة اكتر من المريض نفسه
ربنا يديك الصحة و المهم إن بعد كل المعاناة دى اطمنا على صحة الوالد و الحمدلله
خالص ودى يا زعيم

fL0weR-giRL يقول...

حمد لله علي سلامه والدك

ويارب مايرجعك للمستشفي دي تاني

ابدا ابدا

والله المستعان لازم نصبر اهي بلدنا ولازم نتقبل العيشه فيها ههههههههه


^_^

فتاه من الصعيد يقول...

الف حمدلله على سلامه الوالد..... ويا رب يكون بخير

طبعا انت كنت في مستشفى جامعه اسيوط .... يا رب تولع باللي فيها بس من غير عيانين

عارف كنت هكتب بوست عن المستشفيات الحكومي في الصعيد .... كان هيخلي اهل القاهره يحسوا ان القصر العيني ده منتجع طبي ..... بس بقا خلاص بطلنا تدوين :D

صحيح عيب لما تشكرني على اجب لازم اعمله ..... انا اصلا حاسه اني قصرت معاك يا استاذ مصطفى

الفراغ يقول...
أزال المؤلف هذا التعليق.
الفراغ يقول...

الف مبروك خروجه من المستشفى
وربنا مايعدها ايام عليكم ولا على غيركم
وربنا يخليلكم الحاج وماتتحرموش منه بفضل بركات الشهر الكريم

ويلا كفايه اللى راح واصحى وشوف اللى جاى
ليلة القدر على الابواب تنتظرك
شد حيلك
رمضان كريم

ضكتور جدا يقول...

حمد لله على عودة الوالد
ورمضان كريم

أم مالك يقول...

الحمد لله الحمد لله الحمد لله
وانا اول واحدة عرفت البشرى الحلوة
لان وانا بتصل قلت لى كتبوا له خروج
النهاردة
خاوا بالكم معاه يامصطفى ولو انى
عارفة ان مفيش حد قصر منكم
وابشر يامصطفى بخير الدنيا والاخرة
ببرك بوالدك
حفظكم الله من كل سوء
تحياتى

ستيته حسب الله الحمش يقول...

الف بركة يا مصطفى
حمد لله على سلامته
ويارب ربنا ما يحوجنا ولا يحوج الوالد لمستشفيات حكومية او خاصة
كل مستشفيات مصر زفت صدقني
حتى اللي بيسفحوا البشر
انعدام ضمير تام
المهم ان ربنا طمنكم عليه
وربنا ما يعيدها

تحياتي وخالص دعواتي

حررروووف يقول...

ربنا يشفية ويعافية يارب
ويخلهوللك
حمدلله علي السلامة
دمت بالف خير

غير معرف يقول...

السلام عليكم و رحمة الله و بركاته
استاذ : مصطفي
حمداً لله على سلامة الوالد، و طهور ان شاء الله .
ربنا يتم عليه الشفاء و عليك بأن تدعو له بدعاء سيدنا أيوب
(( ربي إني مسني الضُر و أنت أرحم الراحمين ))
و كل عام و حضرتك للرحمن أقرب

سـارهـ

mimi يقول...

سيبك أنت

مش أسمي منور البوست بالله عليك؟؟؟؟؟

طب قر واعترف مش كده برده؟؟؟؟!!!

ههههههههههههههههههههههه

أي خدمة ماهي دي أصول الشقاوة برده

نورت بيتك ومدونتك

وحمد الله علي سلامة والدك

كل سنة وانت طيب

المعتصم يقول...

بسم الله الرحمن الرحيم
السلام عليكم ورحمة الله وبركاته
************
مسدس صغير
ابوصلاح حبيبى
منور المدونة
الله يسلمك والحمد لله انه نجانا بس ربنا يستر ومانرجعش تانى
.........
مبروك ياعم على اول تعليق
اما موضوع النسب ده فانا قلت احاول احسن النسل واجيب حاجه كده مستورده من عندكم يمكن ربنا ينفخ فى صورة اجيالنا القادمه
بس على فكرة احنا المسدسات مابتعملش فينا حاجه
دور على حاجه تكون فعاله اكتر علشان تعرف
ههههههههههههههههه
نورت ياباشا
*****************
ايوشه بنت خالى
تحياتى
الله يسلمك
اسكتى على مستشفى الجامعه دى يالهوى
يللا الحمد لله على كل حال وشكراعلى دعواتك
نورتى ياايه
***************
عادل بتاع الحكومه
منور ياعمنا
الله يسلمك
مش يمكن شكرا دى تكون مش ليك انما علشان تحرج ناس تانيه ماسألتش!!!
ههههههههههههههههه
ياسلام غالى وماطلبتش مستشفى الجامعه بأسيوط قسم العلاج الخاص او العام مش هتفرق وحياتك بس انت ابقى ابعت واحنا هنوصيلك عليه
ههههههههههههههه
نورت يادولا
****************
ايوشه بنت خالى تانى
ربنا يشفى كل من كان مريض يارب
ومايكتب على حد انه يدخل المستشفى ابدا
بس الواد عادل اصل محبته زيادة شويه وكمان محبه صحيه حبتين
ههههههههههههههههههههه
****************
عاشقة الاحزان
ايناس بتاعة البطاطا
تحياتى
والف مليون الله يسلمك وشكراعلى دعواتك
وعلى فكرة ده مش اول مرور ليا عندك بس انا فيه مدونات كتير بزورها انما مش بعلق فيها
نورتى المدونة ياايناس
****************
غربتى
وعليكم السلام ورحمة الله وبركاته
تحياتى
الحمد لله رب العالمين
ربنا يخليكى على دعواتك الجميلة
اسعدنى مرورك
****************
الدكتورة وزيرة الصحه
منورة المدونة
بس استنى بقى لبعد العيد علشان فيه تعديل وزارى محدود فى الوزارة بتاعتك
هههههههههههههههه
الله يسلمك وشكرا على الدعوات الجميلة
وهو انا علشان طيب يتنفضلى كده
حاش وكلا
(حلوة حاش وكلا دى)
وبعدين كمان موافقانى فى كلامى؟؟؟
امال افهم بقى سيادتك شغلتك ايه فى الوزارة لما الدنيا ماشيه كده؟؟
لالالالالالالا
كده شكلك عاوزة تستقيلى من المنصب
بس بجد بقى ده مايمنعش انه فيه دكاترة محترمين جدا وعلى قدر كبير من العلم والاخلاق فى نفس الوقت واسمحيلى اقول على واحد منهم اسمه عصام مدرس مساعد
بس ايه قمة الادب والاخلاق والعلم وبيحسس اللى قدامه انه جاى المستشفى مخصوص علشانه
ههههههههههههههه
يلا ربنا يصلح الاحوال
ومن هنا لبعد العيد تتعدل
ههههههههههههههه
نورتى يادكتورة
****************

المعتصم يقول...

فاتيما
ايه الدخله الشمال دى؟؟
ليه العنف ده؟؟
وبعدين اه انا زعيم وتعالى شوفى انا عملت ايه فى الممرضات والتمرجى
وحياتك ظبطهم وفيهم كمان اللى انضرب بالاقلام
اه والله الاقلام وبعد كده حاله انعدل
هههههههههههههه
الله يسلمك وشكرا على دعواتك وربنا يسمع منك احسن ده شكله عاوز يعيد هناك وربنا يسترها
اسكتى على حالى ده انا شفت اللى محدش شافه هناك والحمد لله على كل حال
وفى الاخر بتقوليلى يازعيم هو انتِ بعد التشريد ده كله خليتى فيها زعامه
على العموم ماشى مقبوله منك علشان خاطر يوسف باشا الوزير المستقبلى فى حلفنا المصون
هههههههههههههههههه
نورتى ياام يوسف
****************
فلور جيرل
الله يسلمك وشكرا على دعواتك وربنا يسمع منك
وادينا صابرين(والهام شاهين كمان) هنعمل ايه يعنى ده قدرنا ومافيش منه فرار والحمد لله على كل حال
نورتى يابتاعة الكيميا
هههههههههههههههه
***************
فتاة من الصعيد
مروة هانم اللى بطلت تدوين
تحياتى
الله يسلمك
اكيد طبعا كنت فى الجامعه هى دى عاوزة سؤال يامروة
يارب تولع يارب تولع يارب تولع يارب تولع........الى مالا نهايه
بس على فكرة برضو القصر العينى مش الامله يعنى ده الواد ابن عمتى عمل فيه حته عمليه صغنونة سابو فى بطنه فوطه صفرا
يعنى عيب لما اشكرك وممكن نعديها انما قصرتى معايا ازاى بقى؟؟ يعنى كنتِ هتيجى تزورينا فى المستشفى وتجيبى معاكى اتنين كيلو موز؟؟؟ الدنيا صيام ومحدش بياكل
هههههههههههههههههه
نورتى المدونة يامروة
******************
مين اللى حذف التعليق ؟؟؟؟
مش هنبطل الحركات دى؟؟؟
مسيرى هعرفك
******************
الفراغ
ست الكل
منورة الدنيا
الله يبارك فى حضرتك ويسلمك وينعم عليكى بالصحه يارب
وشكرا على دعواتك الجميلة
والله هو كفاية اللى راح بس ده مش بمزاجى وربنا يسترها فى اللى جاى ادعيلى
وبعدين انا شادد لدرجة انى خايف لينقطع منى
الله اكرم
وكل سنه وحضرتك طيبه
اسعدنى مرورك
***************
ضكتور جدا
الله يسلمك يادكترة
والله اكرم
بس اوعى انت كمان تعمل زى العيال بتوع زويل وكورى
ازعل منك
على فكرة مدونتك حلوة بس لما دخلتها لقيت غالبيتها اناشيد وكده وانا ماليش فى الموضوع ده
ياريت تنوع من المواضيع
نورت المدونة يادوك
*****************

المعتصم يقول...

ام مالك
امنا الفاضله
تحياتى
وفعلا حضرتك اول واحده عرفتى بعد اخويا اللى كان معايا فى المستشفى لانى مكنتش لسه متأكد وماقلتش لحد
ربنا يكرمك على اللى عملتيه معايا وبجد مش عارف اشكرك ازاى
ربنا يكرمك ويعزك ويفرح قلبك بولادك يارب
نورتى المدونة بمرورك
**************
د/ستيته
الله يبارك فيكى ويسلمك
ويسمع منك يارب
ماانا عارف ان كل المستشفيات زفت والله وربنا مايكتب على حد دخولها ابدا
انعدام ضمير دى كلمة قليله على اللى بيحصل هناك
ده فيه واحد الدكتور نسى يكتبله العلاج وعلى ماافتكروا كان الراجل دخل على اخرها وشويه وخلع والدكتور واقف يبص بكل بلاده وغباء ولا كأنه هو السبب وحسبى الله ونعم الوكيل
نورتى المدونة وشكرا على مرورك الجميل
****************
حرررووف
تحياتى
اهلا بيكى فى اول زيارة
الله يسلمك وشكرا على دعواتك
على فكرة احنا زمل فى موضوع المحاسبه ده بس انا مااشتغلتش بيه
وبعدين مهما كبرت وبقيت كلمات هتفضل الحروف هى الاصل اللى بيكون الكلمات
نورتى المدونة بمرورك الجميل
**************
غير معرف
الاخت ســارهـ
(ماهو انا مش عارف اقولك ساره بس ولا اقولك مدام ولاتكونى لسه صغنونه وانسه نمشيها الاخت ساره احسن حاجه واهو كلنا اخوات فى الاسلام مش كده برضو؟؟)
وعليكم السلام ورحمة الله وبركاته
الله يسلمك وشكرا على دعواتك الجميلة
وشكرا على مرورك الجميل
نورتى المدونة
****************
ميمى شقاوة
سيبتنى اهه
حاضر
اكيد طبعا اسمك منور البوست والمدونة وبلوجر كله
ياخبر
هو فيه حد يقدر يقول غير كده
دا احنا نطخه على طول
الله يسلمك وبيتى منور بزواره اللى دايما ماليينه عليا
وكل سنه وانتِ طيبه
*******************
والسلام عليكم ورحمة الله وبركاته

reem يقول...

الف حمد لله على سلامة باباك

وسورى للتأخير

وان شاء الله مش تحتاج انت ولا الوالد ولا اى حد للمستشفيات سواء حلوة ولا وحشة

ربنا يتمم شفاء الوالد على خير ويخليه لكم يارب

اللؤلؤة يقول...

حضرة الصعيدى الهمام
السلام عليكم
أولاً يا صديقى : كل عام وأنت بكل خير
ثانياً : حمداً لله على سلامة والدك ويارب يكمل شفاه على خير
ودمت بكل الخير

الشعب لابد له من حكومه تشكمه يقول...

ايه ده البوست ده نزل امتىىىىىىىى؟ ينفع كده؟:(
الحمد لله على سلامة والدك وان شاء الله ربنا يكمل شفاه ويعافيه يارب ويخليه ليكم...

أحمـــــــــــــد أبو العلا يقول...

ألف حمدلله على سلامة الوالد ويارب يديم عليه الصحه والعافيه وعليكم كلكم السعاده

خلاص ياسيادة الريس شوف بقى الحلف وخلي بالك منه احسن يعمل انقلاب من وراك

ربنا يتم نعمته علي الوالد وعلينا جميعا

كيكى عوووووو يقول...

ياكزوفى يا كزوفى!!!
والله لسة عارفة عاااااااااااااااالف سلامة عليه والحمد الله بعد ما اخد افرااااااااااج ما اتمسكتش عندهم تحرى ولا حاجة

المعتصم يقول...

السلام عليكم ورحمة الله وبركاته
************
ريم
الله يسلمك
ولا يهمك من التأخير
وشكرا على دعواتك الجميلة ومرورك الاجمل
نورتى المدونة
**************
اللؤلؤة
حضرة المنوفى التمام
وعليكم السلام ورحمة الله وبركاته
تحياتى ياعمنا
وكل سنه وانت طيب
وشكرا على دعواتك الجميله
نورت المدونة
*****************
الشعب لابد له من حكومه تظبطه
البوست نزل من يومين واهه نفع اهه
ههههههههههه
الله يسلمك وشكرا على دعواتك الجميلة
نورتى المدونة ياشيما هانم
*****************
البشمهندز
احمد ابوالعلا
منور
الله يسلمك ياباشا
وشكرا على الدعوات الحلوة
لاتقلق خلاص رجعنا للحلف
بس بينى وبينك لو فيه حد عاوز يعمل انقلاب انا هساعده وهعمل نفسى مش عارف لغاية ماهو يمسك الحكم ويعرف المقلب اللى شربه
هو فيه حد يمسك حكم الصعايده ياعم
ده يبقى .......
هههههههههههه
نورت المدونة ياعمنا
**************
كيكى عووووووووووو
تحياتى
كزوفك على ايه بس
ولا يهمك
الله يسلمك
بس تعرفى انى حاسس انى انصبت فى العمليه دى
وشكل الاصابه خطيرة وربنا يستر وماتستلزمش كام يوم فى السرير
ههههههههههههههههه
نورتى المدونة بمرورك
*****************
والسلام عليكم ورحمة الله وبركاته

د. ياسر عمر عبد الفتاح يقول...

الف مليون مبروك
طبعاً أنا أسف علي التقصير معاك
بس والله أنا كمان عندي ظروف ,, وحتي مبدخلش علي المدونات من كام يوم
ولسه شايف الخبر الجميل ده

ربنا يتم شفاه علي خير

ঔღঔ نـــوارة ঔღঔ يقول...

الف الف الحمد لله على سلامته

طبعا وجوده في البيت ارحم من قرف المستشفى
فكرتي ايام ماكنت نايمة مع حماتي بالمستشفى الي هي المفرووض تكون اكبر واحسن مستشفى بغزة

الدكتور مش بيلف عالمرضى الا كل فين وفين ولا ملائكة الرحمة الي مش بيجيبوا الدوا اساسا :} قرفونا في عيشتنا وطفشنا من المستشفى كله :]

الموووووووهم الحمد لله على سلامته وربنا يتمم شفائه

دمت بالف خير

المعتصم يقول...

د/ياسر عمر عبدالفتاح
تحياتى ياوزيرنا
الله يبارك فيك ياعمنا
وتسلم من كل شر
ولا تقصير ولاحاجه والله انت عملت الواجب وزيادة
وان شاء الله تكون الظروف اللى عندك انتهت على خير بإذن الله
نورت يادكترة
وشكرا على اهتمامك
*******************
نوارة بتاعة الجمال والحلاوة
تحياتى
الله يسلمك يارب
واكيد طبعا وجوده فى البيت ارحم مليون مرة من وجوده فى المستشفى
بس ايه ده هو انتوا كمان عندكم الدكاترة زى هنا؟؟
بس على مين دا انا كنت بخلى الدكتور ييجى يشوفه كل ساعتين
وملايكة الرحمة كنت مخلى عنيهم وسط راسهم وفى معاد الدوا لازم قبلها بربع ساعه يكونوا جاهزين والا مش هيخلصوا من الوش اللى هعملهولهم
اومال ايه ده انا زعيم حلف قد الدنيا مش وبس
ههههههههههههههههههههههههههه
نورتى المدونة يانوارة
وشكرا على مرورك الجميل

شوكولاتة يقول...

الف حمد لله على سلامة والدك وربنا مايرجعها أيام ولايوريك حاجة وحشة في حد تاني أبدا وربنا يجعل ثواب صبره على المرض في ميزان حسناته إن شاء الله

تحياتي

المعتصم يقول...

شكولاته
تحياتى
الله يسلمك ويسمع منك ربنا
اهلا بيكى فى اول مرور بالمدونة
وشكرا على دعواتك الجميلة
نورتى