السبت، 6 يونيو 2009

لــــــــيـــــه + تحديث

بسم الله الرحمن الرحيم
انا بشكر كل اللى علق على البوست
وحاول انه يخرجنى من الحاله اللى كنت فيها
ومعلش اعذرونى لانى مش هرد على التعليقات
لان الكلام اللى انا قلته فى اول تعليق للدكتورة ستيته
هو هو الكلام اللى هقوله فى باقى التعليقات وهيبقى معاد
وانا والحمد لله احسن كتير
وعلى فكرة انا عارف ان الاسئلة دى مالهاش اجابه
وعارف كل الكلام اللى قولتوه كويس
بس هو الواحد ساعة مابيكون متضايق شويه
بيحب يفضفض
وادينى فضفضت معاكم
ورجعت زى الاول والامور كلها عادى خالص
واستنوا البوست بتاع بكرة
بسم الله الرحمن الرحيم
ليه لما الواحد يتعامل مع الناس بأدب
الناس تطمع فيه ومحدش يحترمه
ليه لما الواحد يتعامل بطيبه
الناس تقول عليه عبيط
ليه لما الواحد مايرضاش يسرق
الناس تقول عليه خواف ومش مفتح
ليه لما الواحد يبقى عنده حياء ويكون خجول
الناس تقول عليه مغفل ومش مدردح
ليه لما الواحد يشتغل بضمير ويعامل ربه علشان يحلل المرتب
يبقى هو ده حمار الشغل اللى لازم يعمل كل حاجه
وغيره قاعد مش بيعمل حاجه
ليه بقت البلطجه هى اللى بتجيب الحقوق لاصحابها
ليه بقت قلة الادب هى الحوار السائد والذى يجب ان يسود
ليه لما الواحد يحاول ياخد حقه بطرق مشروعه
عمره مابيقدر ياخده
وليه كمان لما بعد كده يحاول انه ياخده بأى طريقه
يتقال عليه بلطجى وبتاع مشاكل
الناس مالها ؟؟؟؟؟؟؟؟؟؟؟
فين الضمير والاخلاق ؟؟
فين الادب والاحترام ؟؟
فين الخجل والمحبه ؟؟
فين الود والتراحم ؟؟
كل ده بقى مافيش
مات خلاص
معلش مضطر ابعد شويه علشان اراجع نفسى
واشوف هل انا صح ولا غلط
ســــــــــــــــــــــــلام

هناك 23 تعليقًا:

ستيتة يقول...

السلام عليكم
اولا هدي نفسك شوية ومتاخدش كل شيء على أعصابك الله يكرمك
انا خدت قلم محترم من زميل عشرة عمر دفعتي حافظ قرآن ماشي طول النهار يقول لك قال الله وقال الرسول إمام جامع كادر اخوان مطلوب امن دولة

يعني من الآخر مش ممكن تتوقع منه القلم
يبقى الناس التانية تتوقع منها ايه؟
القلم ده مش بينيمني من كام يوم
مش علشان مقدرش ارده
ولا علشان في نفس اللحظة مكنتش اقدر اخليه يلف حوالين نفسه
ولكن ببساطة يا مصطفى لأن مش تخصصي أقلام فعلا

شوف عالم البشر بحر مليء بالقروش وكمان مليء بالدرافيل وبرضه فيه الشعب المرجانية الثمينة

المصريين اتهبشوا في عقلهم ولكن لو انت بتعامل ربنا في الناس مفروض لا تحزن على ما فاتك ولا تفرح بما آتاك وتبتغي الوسطية حتى في الحزن والفرح

عامل الناس لله اللي يطلع منهم كويس خير وبركة وكسبت كنز "وقليلا ماهم"
واللي يعاملك وحش اجرك على الله ومخسرتش حاجة لأن اللي عند ربنا مش بيضيع

ناقص اقول لك شيء واحد بس اكتسبته من عيشتي وسط دنيا البشر وانا عمري ما كنت وانا صغيرة بفوت حقي
مش مهم اللي يقول عليك بلطجي
المهم ان الشخص ده ها يعمل حساب انه يجي ناحيتك الف مرة لو حاول تاني

اما عن شغلك بما يرضي الله فده اللي بيحلل الرزق وبيحلي العيشة المرة


القصة انه كله يكون بصدق لله
الله لا تأخذه سنة ولا نوم
الله يدافع عن الذين آمنوا

اللي يقول لك انت عملت كذا
رد عليه بالآية القرآنية

لا يحب الله الجهر بالسوء من القول إلا من ظلم وكان الله سميعا عليما

تحياتي وخالص دعواتي

المعتصم يقول...

د/ستيته
وعليكم السلام ورحمة الله وبركاته
انا اهدى انسان فى العالم على فكرة
بس هو فيه مشكله صغنونة جدا عندنا هنا
اننا اتربينا على ان الهدؤ ده نوع من انواع الضعف
زى الحب بالظبط
يبقى الواحد فينا بيحب وتيجى السيرة يلعن ابو الحب واللى بيحبوا
هههههههههههههههههه
المهم
ولله الحمد باخد حقى وفى وقته وبالادب والاحترام ومافيش حد يقدر يقول تلت التلاته كام
وانا عارف ان الدنيا مليانه ناس كده وناس كده
يعنى فيه وحش وفيه كويس وفيه وفيه
بس انا اللى تاعبنى ان كتييييييييير من الناس بقت عاوزة تبقى من النوع الوحش وفاكرين انهم بكده شاطرين
انا ولله الحمد بعامل ربنا فى كل حاجه بعملها وقبل مااعمل اى حاجه بشوف دى حلال ولا حرام
دى ترضى ربنا ولا لأ
واشوف انا بكده ابقى عملت اللى عليا ولا لسه مقصر
انما الادب والاحترام فيه ناس بتفهمه غلط وبتاخده على انه خوف وضعف
وده مايعجبنيش والناس دى لازم يكون ليا وقفه معاهم
ولازم يفهموا الامور صح
علشان بعد كده الدنيا تمشى موزونه كويس وماتختلش
اما عن الشغل فمهما حصل وحتى لو انا حاولت انى اقصر فيه مش هعرف لانها بقت عاده وطبع فيا انى اعمل شغلى على اكمل وجه والحمد لله
انما شغلى بس شغل غيرى لأ
ولو اضطرنى ده انى اكون احيانا بلطجى وقليل الادب
معلش انا اسف يادكتورة على الكلمتين البايخين دول
بس انا بجد متضايق من ناس كتييير
وفيه اوضاع كتيير شايفها غلط ومش عارف اصلحها
نورتى المدونة
ودايما كلامك بيكون فيه حلول جميلة لمشاكلى
تحياتى ودمتِ بكل خير وود
والسلام عليكم ورحمة الله وبركاته

zainab يقول...

السلام عليكم

اخى المعتصم

ايه بس اللى حصل خير يارب ان شاء الله

عارف الرد على أسئلتك ايه يا معتصم ان احنا بعدنا عن دينا عن تعاليم الإسلام

ربنا يسعدك و يبعد عنك السوء

ترجع بالسلامه ان شاء الله

موناليزا يقول...

وتفتكر ده الحل.. إنك تبعد!!!
تعرف كل أسئلتك دى سألتها لنفسى قبل كده ولما لقيت مفيش إجابة تريحنى قررت ماعدتش اسأل بس برضه قررت انى مش هتغير وان لو كل العالم اتجمع ضدى عشان يخلونى وحشة أنا مش هكون كده
لانى ببساطة براعى ربنا وبتعامل معاه هو مش مع عباده
تعرف لو فكرت انى اتعامل مع البشر باللى يستاهلوه هبقى شريرة اوى
وانا ماحبش اكون كده مش عشان انا ملاك بس عشان أنا مقتنعة تماما أنى أمة الله وان حُرمة المسلم عند ربنا كحُرمة الكعبة.
طب اقولك على حاجة يمكن تستغربها_يمكن إيه ده أنت أكيد هتستغربها زى أى حد بيتعامل معايا عن قرب_ شوفت نحلة واقفة قريب منى اوى وكان ممكن تقرصنى بس برضه كان سهل انى اموتها بالكتاب اللى كنت ماسكاه فى ايدى بس افتكرت انها من مخلوقات الله وتركت المكان(لا تقرصنى ولا اموتها)
عموما بما انك قررت تبعد وهتقعد مع نفسك فياريت لو لقيت اجابة على تساؤلاتك تعرفنى ينوبك فيا ثواب:)
على فكرة لو مالقتش اجابة او استنتجت نفس استنتاجى هتدفع غرامة لانك بعدت
لانى بكده هبقى وفرت عليك المشوار وانت برضه صممت تروحه:)

تأثير الفراشة يقول...

كلام حضرتك فعلا ممكن بيدور كتير فى الأذهان، إنما لما تشوف كده افتكر الحاجات اللى تهون عليك
أولا: حديث الرسول صلى الله عليه و سلم"بدى الإسلام غريبا و سيعود غريبا و طوبى للغرباء" صدق رسول الله صلى الله عليه و سلم

فالناس اللى تلاقى معاييرها اختلت دول صدقنى بجد، مايتزعلش منهم قد ما يتزعل عليهم

فالواحد حقيقى يحمد الله إنه مش كده "الحمد لله الذى عافانى مما ابتلى به غيرى و فضلنى على كثيرا من خلقه تفضيلا"

و إدعى لهم بالهداية ، لأن مفاهيمهم
مغلوطة و مش مميزين الصح من الغلط

حضرتك ذكرتنى بحبكة لرواية -سمعت عنها-اسمها وادى العميان، و كان فيها شخص واحد بس مبصر راح يعيش فى وسط وادى كااامل من العميان، فأصبح مش قادر إنه يتأقلم ، لأن كلهم بيجمعوا على حاجات غير اللى هو بيقولها، و بيغلطوا كلامه- مع إن هو اللى شايف ،و كلامه فعلا فى محله- ، فبدل ما يثبت على موقفه ، بدأ إنه يشك فى نفسه و يحس إنه مش متأقلم لغاية ما فى الآخر...فقأ عينه علشان يصبح أعمى زيهم
ّّّّّّّ!!!!!!!!!!!!!!

و طبعا اللى ربنا بيبتليه بكف البصر، فده ثوابه كبير عند الله، إنما اللى بتشوفه دلوقتى هو عمى القلب و البصيرة، فمهما كتر العميان ،فلابد أن نظل مبصرين

و الغلط مهما كتر هيفضل بررررضه غلط،و الصح مهما قل ،فهيفضل برررررضه صح، و فى النهاية..لا يصح إلا الصحيح

أنا عارفة إن حضرتك ممكن تكون عارف كويس كل الكلام اللى أنا قلته ده، و لكنى حبيت أذكره من باب التواصى بالحق و التواصى بالصبر كما جاء فى سورة العصر

أدعو الله لك و لى و لنا جميعا بالثبات على الحق و ألا نفتن فى زمن كثرت فيه الفتن

أتمنى لك كل التوفيق

السلام عليكم و رحمة الله و بركاته

رحلتنا في الحياة يقول...

كلامى هيختلف عن كل اللى علقوا مش هقول كلام عن الاخلاق والقيم اللى اندثرت وراحت ولا الكلام ده
هقولك تسمع كلامهم واعمل زيهم علشان هما يرتاحوا اكسب الناس واخسر نفسك
ارضى الناس واغضب ربك علشان تقدر تعيش فى الدنيا
وطبعا انت مش هتقدر تعمل كده فالحل انك تنسحب وتستسلم وتبان قدام الناس ضعيف
مفيش حل تالت انى افرض نفسى وفكرى ورايى ومبادئ وقيمى على الناس كلها اللى عجبه عجبه واللى مش عجبه يخبط دماغه فى اجدعها حيطة
واللى يقولى بم اخذق عنيه الاتنين لو كل واحد فكر انه ينسحب ومش يصلح الدنيا من حواليا يبقى احنا اول ناس هنتعاقب لو ربنا ارد لينا عقاب لافعالنا لاننا شفنا المنكر ومش غيرنها

عمرو جويلى يقول...

حضرة الصعيدى الهمام
السلام عليكم
أشكر لك طرحك الذى دار فى ذهنى ولكن يا صديقى بعدنا عن تعاليم ديننا الحنيف وأصبحت الحياه المادية تتملك من قلوبنا ويطرت علينا مباهج الدنيا فكلن ذلك وضعنا ولوعدنا لعاد كل شىء جميل
دمت بكل الخير

د. ياسر عمر عبد الفتاح يقول...

والله عندك حقي يا زعيم
لو عرفت ليه أمانة عليك تقولي


هدي نفسك
محدش واخد منها حاجة

د/عرفه يقول...

السلام عليكم

اهلا اخى الحبيب

يارب نكسب النهاردة اهم حاجة


بالنسبة للموضوع
اظن ان الواحد يعمل اللى عليه واللى ير ضى ربنا

فى نفس الوقت يكون قوى ومش اى حد يستضعفه ويمشى كلامه عليه

اظن ان ده ممكن فيها لما يكون الانسان محترم وطيب وفى نفس الوقت قوى

اظن ان ده ممكن اوى

المشكلة ان الناس لما بتلاقى حد ضعيف
بتستقوى عليه

المؤمن دايما قوى ودايما محترم مهما كان اللى حواليه مش محترمين

تحياتى

z!zOoOo يقول...

السلام عليكم

ازيك يا معتصم يارب تكون بخير

عذرا أني مش متابع

انا مش هعلق علي البوست انا بس هقولك عايز اشوفك

ياريت سيادتك لما تدخل ضيف إيميلي وسيبلي نمرتك وانا لما هدخل تاني هكلمك نحدد معاك اشوفك فيه ونتكلم احسن من كلام المدونات ده

ومعلش اني مش بخل نت كتير بس وقتي ضيق قوي اليومين دول

هيكون لينا كلام مطول عن كده

ربنا يقوينا علي الدنيا الأماره بالسوء ديه

في رعايه الله

MaNoOoSh يقول...

زي منت رديت على ستوتة يا معتصم.. انت بتعمل اللى عليك وبس.. ومنتش مضطر تعمل شغل حد تاني.. واللى مش عاجبه الحيطان ماليه البلد ويخبط دماغة فى أجدعها حيطة.

وهى دي الخلاصة.. ارضى ضميرك ومتعملش شغل غيرك (الا لو حسيت ان حد محتاجك فعلا وهتفرج عنه كرب بمساعدتك ليه).

غير معرف يقول...

السلام عليكم

انا عايزة اقو ل لحضرتك حاجة مهمة
والله العظيم كل شخص بيتعامل مع الناس بكل أدب واحترام وود وحياء ممكن فعلا زى ما قلت يعاملوك سئ ويضحكوا عليك
بس والله هما من جواهم بيحترموك جدا وكما تمنوا لو يبقوا زيك و يمكن ده يكون سبب لحقدهم عليك والله حقيقي مش كلام
بالظبط زى الشخص الفهلوى الرخم ايللي واخدها بالدراع تلاقي الناس تبقى مستخفية دمه و احيانا حباه لكن من جواهم لا يحملوا له اى مشاعر احترام وبيبقوا عارفين انه شخص تافه وهوائى ولا يعتمد عليه في اى شئ ولا يحمل مسئولية وكل ما يفتكروه يضحكوا
لكن الشخص ايللي حضرتك بتتكلم عنه او انت كل ما يفتكروك مش هيصدر من الناس اى شئ غير تعابير كلها اعجاب بشخصيتك وانك انسان محترم
جربها على نفسك وافتكر شخصية محترمة وشخصية هوائية
على فكرة انا كنت كده لحد فعلا ما اكتشفت والناس دى او ناس منهم وحواليهم هم ايللي قالولى كده

اما مسالة الشغل انت مدرصس وبتاخد مرتب ولازم تحلل المرتب ده مش مهم اى حد المهم ربنا وصدقنى انا واثقة ان الطلبة بتحترمك جدا وبتقدرك
وده ربنا هيشلهولك فى حياتك وفي الاخرةانا اسفة جدا انى طولت في الكلام بس انا عارفة شعورك عشان انا مريت به لكن انا دلوقتى واثقة في نفسي جدا ومتاكدة ان انا الصح وببعد عن ايللي يضايقنى من الناس او مواقف
تحياتى ليك

القلم السكندري يقول...

السلام عليكم ورحمة الله وركاته

صديقي العزيز..

أولا أجيبك علي كل تساؤلاتك:

لأنك في عصرٍ كل قيمة فيه غريبة.. وأعظمُ القيم دين الله وقد عاد غريباً

عاد القابض فيه علي دينه كالقابضِ علي الجمر..

عاد الناسُ وارتكسوا إلي ما هو أدني من حمأة الجاهلية.. وسأذكر هنا موقفاً يدلل علي الفارقِ بين جاهلية الأمس وجاهلية اليوم..
في جاهلية الأمس كان حلف الفضول، وهو الحلف الذي اجتمع فيه جاهليون ليتفقوا علي أن يردوا الظلم عن كل من دخل مكة.. وشارك فيه النبي صلي الله عليه وسلم وقال ما أود أن لي به حمر النعم ولو دعيت الي مثله في الإسلام لأجبت

هكذا كان العرب الجاهليون وشهامتهم..

أما الآن.. فحتي شهامةُ العرب قد دُفنت مع ما دفنوه من أخلاقٍ وقيم..

أخي .. قبل أن تذهب لتراجع نفسك.. تذكر::

(وإن تطع أكثر من في الأرض يضلوك عن سبيل الله)

تذكر: (بل أنتم يومئذٍ كثير ولكنكم غثاء كغثاء السيل)

الغثاء الذي يتمرغُ في حمأة سلوكيات الجاهلية المعاصرة ليس بمقياس


الغثاء ينبغي أن يبقي في أذهاننا غثاءً لا قيمة له ولا يلتفتُ إليه


اقبض علي دينك وعلي مبادئك.. وخذ حقك لا تفرط فيه إلا أن يعلم الظالمُ أن عفوك عن مقدرةٍ عليه.. وإلا: فابطش بأمثاله واسعي إلي ردعه ما استطعت إلي ذلك سبيلا..

واحتسب ذلك قبل أن يكون أخذاً لحقك أن يكون تأديباً له علي ظلمه

فرج الله عنك.. وشرح صدرك.. وثبتك علي دينه..

والسلام

ـــــــــــــــــــــ


بالمناسبة.. قمت بالتعليق علي الموضوع قبل السابق ولكن يبدو أنك حذفت التعليق :).. لا بأس عليك

غير معرف يقول...

الاجابه سهله جدا يا استاذ ...... لأن الشر سهل والخير صعب جدااااااااا
الخير فيه جهاد......ولأن الوقت وقت استسهال فده تلاقيه كتير
لو انت من ذوي العزيمه يبقى تخليك كده.... ولو حد لامك قوله لو جدع تعرف تعمل زيي؟......خليك على الدرب يا استاذ معتصم...... زي ما قلت سابقا.....الرجال نادرون ولكن الذكور كثر

رحلتنا في الحياة يقول...

انت لسه زعلان وبتسال ليه ؟؟؟؟؟؟
طيب انا بقى هى كل يوم هنا فى المدونة
اخرب فيها زى ماانا عايزة لغاية ما يبان لها صاحب يدافع عنها والا هعلن الاحتلال الكامل على جميع اراضى المدونة وافرض سيطرتى وابقى ورينا انت ولا الصعايدة هيعملوا ايه



طبعا كلام هزار علشان تبتسم مش لازم تتضحك ابتسم بس
انت صح وكل الناس اللى تعرف ربنا وماشية فى طريقه صح مهما السحب غطت الشمس نورها بتحجب ولا بتفضل منورة
وزى ما الناس قالوا هنا الناس دى بتنتقدك لمجرد انها عارفة ومتاكدة انك صح وعايزاك تكون زيها ومش هترضى عنك الا لما تعمل الغلط زيها لكن من جواهم بيحترموك جدااااااا
متزعلش من تعليقى الاولانى المود كان طالب معايا انى ااغتت فيه
بس انا مش بهزر بجد هاجى كل شوية اغتت هنا لغاية ما تبطل النظرة السوداوية دى وعلشان ولو انت بان عمتى زى ما بتقول صحيح اتعلم منى ازاى بكون كوية قدام الناس دى ههههههههههه
لا بجد والله انا مضايقة انى اشوف شباب المسلمين كده فى اكتئاب وعذاب والم فوقوا بقى شوية الاسلام محتاج شباب قوى عنده عزيمة واصرار
اتمنى اشوف رد على كلام الناس ده النهاردة ومش تتحجج برفيق هااااااا والا هسلطته فعلااااااا يفصل عنك النت وترجع تانى للعصور البدائية :)
ربنا يفك كربك وحزنك ويبعدك عن اى حيرة

z!zOoOo يقول...

السلام عليكم

ارجو الرجوع الي اخر موضوع عندي

لرؤيه التحديث في اخر الصفحه للأهميه

وعذرا للإزعاج

Sweet Violet يقول...

لانك فى زمن اختلاط المفاهيم

و كمان بقى انت بتشخط ليه هه ده انا كنت حاسه انك هتطلع تولع فى الجهاز عاااااااااااااا

كل ده علشان النسكافيه خلاص ياعم نشربه عشر مرات بس فى اليوم ^_^

روق كده و بلاش تاخد كل حاجة على اعصابك

واتعامل باخلاقك و عامل ربنا فى معاملتك مش الناس علشان مش تضايق

انا عايزة بوست بقى غير ده هه

مش كفايه مش لحقت البوست اللى فات )):

Unknown يقول...

السلام عليكم ورحمة الله وبركاتة
يا نهار ابيض كل دى كمية فين
فين الواد انا عاوز الواد ؟
يا عم اضحك كدا
وروق
واقولك انا لما بتجيلى الحالة دى بجدد نيتى
وافضفض لربنا
وبعدها كل حاجة بفضل الله بتتحل
فمتقلقش خالص
انت صح ان شاء الله
بدل براعى ربنا وضميرك فى عملك ربنا هيبارك لك
ومن ارضى الله فى سخط الناس
رضى الله عنة وارضى عنة الناس
كما اتذكر يعنى
دمت بالف خير
ومتبعدش عالم التدوين كدا هيبقى فى حاجة مش صح فية لو بعدت
دمت بالف خير وعقل وضمير ابلة حكمت
قصدى استاذ مصطفى
ههههههههههههههه
ربنا يعزك

Unknown يقول...

وللاسف ياأستاذ منتصر
بلدنا رايحة لجهة مايعلم
بيها الا اللى خلقها ربنا
يستر علينا جميعاً.كل تساؤلاتك
ملهاش جواب الا ان احنا بقينا
فى زمن الوحوش وعايشين معاهم كمان:(

Unknown يقول...

ومعلـــــــــــــش
هدى اعصابك يا أستاذ
معتصم المنتصر بأذن الله

ريمان يقول...

فين الضمير والاخلاق ؟؟
فين الادب والاحترام ؟؟
فين الخجل والمحبه ؟؟
فين الود والتراحم ؟؟



كل ده راح فى الكازووزه


ايه ده يا مصطفى

انت لسه الوقتى جاى تسأل الاسئله دى؟

انت لسه فاكر الوقتى ؟

انت لسه حاسس القوتى ان معادش فى اخلاق ولا ضمير فى الزمن ده؟


يااااااااه

ده انت يا اخى جيت متاخر اوى

والوقتى اما اكتشفت الحاجات دى قولت هتبعد عشان تراجع نفسك

للدرجه دى الحاجات دى اثرت فيك

لاء بس انت حسيت بالحاجات دى متاخر

انا بقه حسيت بيها من قبلك بزماااااااااااان وكنت فى الاول زيك كده باخد جمب وازعل واعيد حساباتى انما الوقتى اتعودت

انت كمان مع مرورو الوقت هتتعود زينا كلنا كده

روق بقى روق

الشعب لابد له من حكومه تشكمه يقول...

لو لقيت اجابه على اسألتك دى ياريت تقولهالى لانى سألت نفسى فى مرات(مبحبش افتكرها) نفس اسألتك وفى الاخر قلت لنفسى لان ببساطه مش كل الناس زىى...وربنا يسامح الجميع.:)
بس على فكره فى ناس كتي كويسين لما بصيت حواليا كويس شوفتهم :)
تحياتى وبلاش تسأل اسأله هتتعبك اكتر مهتريحك

الفراغ يقول...

انت فعلا كويس جدا..وعشان كدا زرتنى ورديت عليا
واشكرك على صراحتك فى التعليق
لانى فعلا حاسه بعبأالرد على التعليقات
لكن كلامى هنا فى مدونتك بعتبره مكسب وفى نفس الوقت تعليق على كلامك
المهم ان كلنا زيك كدا
واتعلمنا زيك كدا
شغلى وبس وناخد حقنا وبس لانهم فعلا ناس تخاف وماتختشيش