الاثنين، 16 فبراير، 2009

حلاوة المولد


بسم الله الرحمن الرحيم

دى علبة الحلاوة بتاعة اختنا موناليزا

والفوليه كتير اهه (نص العلبه فوليه)

اما الطبق الحلو ده

برضو بتاع موناليزا

ده بتاع التعويض

بس يارب ينفع وماترفعش عليا قضية

بسم الله الرحمن الرحيم



السلام عليكم ورحمة الله وبركاته


اولا كل عام وامتنا الاسلاميه بكل خير بمناسبة المولد النبوى الشريف وذكراه العطره


ثانيا


كنت راجع البيت وشوفت عند واحد بياع حلاوة المولد


طبعا الطفاسة نقحت واشتريت مشبك (اصل انا اعزه الحقيقه يعنى)


رجعت البيت لقيت الحاجه امى ربنا يديها الصحه ويطول عمرها نايمه


ومافيش عشا (هو انا لسه هسخن؟؟؟؟؟)


بس اكلت المشبك واسنانى صرخت (ده الطبيعى بتاعى مع الحلو)


بس بعد كده افتكرت موضوع انشاء( تعبير) كنت كتبته زمان وانا صغير عن المولد النبوى


الابلة منى كانت قايلة ان كل واحد فينا لازم يكتب موضوع عن المولد


وماذا يجب على كل مسلم ان يفعل فى مثل هذه المناسبة الشريفه


طبعا انا طول عمرى بليد فى موضوع الكتابة ده


والادهى انه ساعتها كنت فى سنة رابعه ابتدائى


بس هعمل ايه ده امر واقع


وعنها وكتبت الموضوع ده



بسم الله الرحمن الرحيم


الحمد لله رب العالمين وصلى الله على سيدنا محمد عليه الصلاة والسلام


اما بعد


((المولد النبوى هو الذكرى بتاعة مولد النبى عليه الصلاة والسلام


وهو اتولد فى شهر ربيع يوم الاتنين وكان ابوة ميت وامه السيده آمنه


واللى رباه بعدها جده عبدالمطلب واللى رضعته حليمه


وبعد ماجده مات رباه عمه ابوطالب


ويجب على كل اب مسلم ان يحضر لاولاده الصغيرين حلاوة المولد


وانه يجيب لهم مشبك كتير وبسيمة كتير ويزود الفوليه والسمسميه


وياريت تكون طريه وبلاش الحلاوة الناشفه عشان بتوجع السنان


وانه يخليهم يروحو الليلة الكبيرة ويخلى الكبار ياخدو الصغيرين معاهم


عشان النبى عليه الصلاة والسلام يرضى عنهم


وطبعا بعد ماهيرجعو هيبقو تعبانين مايروحوش المدرسة تانى يوم))


بعد كده طبعا الفصل كله كان بينقل من بعضه


بس كل واحد كان بيكتب الحلاوة اللى هو بيحبها


علشان نبقى مش غاشين من بعض هههههههههههههههههههههههه


بس ايه رأيكم فى الموضوع بتاعى ؟؟؟؟


رهيب صح ؟


هههههههههههههههههههههه



انما هو سؤال موجه لكل اللى هيقرا المدونة بقى


ماذا يجب على كل مسلم ان يفعل فى ذكرى ميلاد الحبيب عليه الصلاة والسلام


ومحدش يجيب سيرة الحلاوة لأن ده سبق ليا انا بس



والسلام عليكم ورحمة الله وبركاته

هناك 57 تعليقًا:

القلم السكندري يقول...

أضحك الله سنك ايها المعتصم


حلاوة وسمسمية وميروحوش المدرسة تاني يوم

ايه الروقان ده

بس حلاوة ايه ياريس

علي فكرة حلاوة هناك مش حلاوة مولد هه؟

الا تكون فاكر نفسك رايح مارينا ولا حاجة

العادلي سيتي حاجة تانية


ده أول تعليق

ليا تعليق آخر جاد

مش معقولة بقي هنقعد نهزر كدة علي طول

mohamed ghalia يقول...

خير الإحتفال هو اتخاذه قدوة
دمت بكل الود أخى

القلم السكندري يقول...

2

بسم الله

ليس حديثاً يقالُ بمناسبة المولد..

ولكنها كلماتٌ ينبغي أن تستصحب علي طولِ مسيرة العمر



ولن أتحدث عن الاتباع والتمسك بالسنة وهذه الكلمات التي بتنا نحفظها جميعا عن ظهر قلب

ولكنها تذكرةٌ بواقع متكرر من التعدي عليه صلي الله عليه وسلم.. سواء من كلاب الكفرة او من كلاب المنافقين الذين يطعنون دينه وسنته وشرعه ليل نهار.. من خلف ستار تسمّيهم بأسمائنا.. (ويحلفون بالله إنهم لمنكم وما هم منكم ولكنهم قومٌ يفرقون)

إن الصدر الأول كانو يتمتعون بحبٍ حقيقيٍ خالٍ من المزاعم والشعارات الجوفاء المفرغة من حقيقتها

فذاك البطل محمد بن مسلمة.. لما سمع النبي صلي الله عليه وسلم يقول:: من لكعب بن الاشرف فإنه قد آذي الله ورسوله.. وضع روحه علي كفهِ وقدمها فداءً لعرضه صلي الله عليه وسلم.. بادر إلي رأس الكلب فاجتزها ليكون عبرة لغيره.. ومثل هذه القصة كثير

إننا اليوم في العصر الذي كبّل فيه الطواغيتُ أيدينا وأرجلنا لن أتحدث عن جهاد النفس.. ولكن:: أتعجز الألسنة والأقلام؟؟

إن الله يقول:: (يا أيها النبي جاهد الكفار والمنافقين واغلظ عليهم)..

قال المفسرون :: وجهاد المنافقين بالحجة والبيان والغلظة عليهم في ذلك واجبة

إننا اليوم بحاجة إلي ندائه صلي الله عليه وسلم.. من لهم فقد آذو الله ورسوله.. من لهم ليصد هجماتهم عن شرعنا وديننا .. (إن المؤمن يجاهد بسيفه ولسانه) كما قال صلي الله عليه وسلم

لسنا بحاجة إلي الأيدي المرتعشة والأقلام المذعورة التي لا تعرفُ كيف تُسددٌ حميم الكلماتِ إلي نحور الأعداء

فصمتها أرحم من كلمات الهوان

ولكن أين أقلامُ الفوارسِ وألسنتهم إن عجزت السنان والسيوف؟؟

أين طعانهم حجة وأدلةً وبياناً وفضحا للباطل وهجاءً وتشنيعاً عليهم بلهيبِ الاحرف

قوموا إلي النفاق فدكوه علي رؤوس أهله وأئمته .. أعيدوهم إلي جحورهم مقصوصي الألسنة مفضوحي السوآت

(والذين جاهدوا فينا لنهدينهم سبلنا)


(ولينصرن الله من ينصره إن الله لقويٌ عزيز)

الازهرى يقول...

طبعا انا اتهددت وخفت وركبى اتكسرت من التخبيط فى بعضها
وخلاص رايح اعلن الاستسلام لكيارا بدون شرط او قيد
*********************
افضل ما نحتفل به فى هذا اليوم الجميل
ان نعاهد الله الا يكون هو اليوم الوحيد الذى نحتفل فيه بالصادق المصدوق
ولكن فى كل الايام وخير احتفالنا به هو ان نتبع سنته
وان نتمسك بما ترك لنا

تحياتى دوما

fnoonh يقول...

ههههههههههه بجد تعبير رائع بس انت كتبت على حلوى المولد مش عن يوم المولد بس بالنسبة لطفل رابعة ابتدائي طبيعي هيكون كده حلاوى ومراجيح وحجات من دي عموما تسلم ايدك

اما بالنسبة ليوم المولد فانا سمعت انه بدعة اننا نحتفل بيه وافضل اننا نتقي الشبهات بس واجب علينا نحب الرسول ونتقتدي بيه وبسنته في كل وقت

تقبل تحياتي ودمت بكل الود

ريمان يقول...

السلام عليييييييكم


طب بس ممكن اضحك شويه على موضوع التعبير ده


ههههههههههههه

ههههههههههههههههههههه

ههههههههههههههههه

طب هخلص ضحك واجى تانى

ريمان يقول...

خلاث خلصت

بس ايه موضوعات التعبير الجميله دى

هههههههههه

رجعت تانى اضحك

ايام ما كنا صغننين كنا بنكتب كلام يفطس من الضحك انا ليا مواقف برضه مع موضوعات التعبير

انا بحب المشبك اوى اوى بس برضه مش بعرف اكل منه عاشن دروسى كلها بتصوووووت صوييييت رهيب اما اى حاجه مسكره تدخل بؤى

بس لازم بجد ومن رايى اننا نحتفل باليوم ده بالصلاه على النبى محمد صلى الله عليه وسلم

وطبعا لازم فى جميع الاوقات نمتثل اوامره ونجتب ما نهانا عنه بقدر المستطاع

تحياتى ليك اخى

ريمان يقول...

على فكره


( البونبونى هو اللى عمل كل ده )

موناليزا يقول...

هههههههههههه
حلاة ايه بس؟ انت عارف موضوعك ده فكرنى بنشيد بحبه اوى للاطفال اسمه"محمد نبينا"لو ماتعرفوش قولى وانا اكتبهولك
فيه تقريبا نفس كلامك فى موضوع التعبير

ندخل فى المهم بقى
المفروض نعمل ايه
حسب جميع الفتاوى ماتعملش حاجة لانه يوم ذى اى يوم ولو كان ينفع نحتفل بيه كانوا الصحابة احتفلوا بيه
ولان فيه حديث شريف فيما معناه"لاتطرونى كما اطرت النصارى المسيح"
وذى ماقالوا قبل كده احنا المفروض طول الوقت على مدار السنة بنحيى سنة النبى عليه الصلاة والسلام ونكثر من الصلاة عليه ليس لان هذا فرض ولكن لان هذا سينفعنا يوم القيامة وسيزيد من حسناتنا
هذا والله اعلم

اللؤلؤة يقول...

السلام عليكم ورحمة الله
شرفت بزيارة مدونتك لأول مرة
أما عن الإحتفال بمولد النبى صلى الله عليه وسلم فأنا أعارضه لأن الإحتفال يجب أن يكون كل يوم وذلك عن طريق السير على نهجه
تحياتى
ويسعدنى التواصل معك

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
اخى وحبيبى القلم السكندرى
تحياتى
لأ صاحبك من يومه وهو دماغ ودماغ عاليه كمان امال ايه
ياخويا ماانا عارف ان حلاوة هناك غير حلاوة المولد ماتقلقش وبعدين احنا ناس لينا باع طويل فى المكان ده
دا حتى احنا مسميينه بيت عمتى يعنى اى واحد يعمل حاجه كده ولا كده ويتقبض عليه يقولك مافيش زيارة بس لحد بيت عمتى وراجع ماتقلقش
هههههههههههههههههههههههه
ماشى ياعم هزرنا كتير معاك حق
نلف لفه ونرجع تانى
سلام مؤقت
*************
أخى الكريم محمد غاليا
تحياتى
بجد بتنور البوست يامحمد
بس على فكرة انا ملاحظ انك بخيل شوية فى كلامك مش عندى بس انما فى كل تعليقاتك فى كل حتة بشوفها فيها
(على فكرة انا اى مدونه بدخلها بقرا التعليقات اللى فيها كلها)
هو انت ماشى على خير الكلام ماقل ودل
يعنى مابتنساش ابدا وتتكلم شويه اكتر
هههههههههههههه
انا بهزر معاك والله
اسعدنى مرورك
وتقبل تحياتى ودمت بكل ود وخير
***************
نرجع للهندسه
بس المرة دى بجد بقى
معاك حق والله ولكن اين نحن ورجال الصدر الاول وحبهم لله ورسوله وغيرتهم على دينه
نحن من قال فينا المختار صلوات ربى وسلامه عليه كثير ولكن كغثاء السيل
صديقى نعم تعجز الالسنة والاقلام وانت عارف اللى بيتكلم بيروح المنتجعات اللى بنهزر انا وانت عليها
مش هقدر اقولك غير ربنا يهدى العاصى واحنا بنحاول لعل وعسى
وبعدين مافيش حاجه بتيجى مرة واحده يعنى ماينفعش من حاله السبات العميق اللى كنا فيها نهب مرة واحده كده لأ هتيجى ان شاء الله بس عاوزين شوية صبر واكيد ربنا هيعينا وينصر دينه وكلامه الحق
اخى الحبيب الكلام يطول ولكن 000000
تقبل تحياتى ودمت بكل ود وخير
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
أخى الفاضل الازهرى
تحياتى
نورت المدونة (هما المشايخ بييجو على سيرة اى حاجه تتاكل مش كده)هههههههههه
ياعم سلامة ركبك دول كانو بقين كده وهو انا اقدر ياعم اقرب ناحيتك هو انا ناقص تدعى عليا تقطع خبرى هههههههه
بس كويس والله التهديد بقى بيجيب نتيجه اهه ههههههههههههههههههههه
00000000000000
كلامك زى الفل والله بس فين اللى ينفذ ؟ كلنا بنقول اننا عاوزين فعلا نمشى على سنة الحبيب ومش بس فى ذكرى مولده الشريفه ولكن طول السنة ونرجع بعد كده ابوك عند اخوك والدنيا تاخدنا وننسى
اخى الكريم اسعدتنى زيارتك جدا
تقبل تحياتى ودمت بكل ود وخير
*******************
فنونه
حمدالله على السلامه
والله ليكى وحشة كبيرة
ايه اخبار الامتحانات ؟؟ عملتى ايه ؟؟ طمنينى
يعنى عيل صغير عنده عشر سنين عاوزاه يكتب ايه؟؟اكيد هيكتب على الحلاوة والمراجيح والليلة الكبيرة ياعمى والعالم كتيرة
بس ايه رأيك ؟ مش من صغرى وانا نابغه فى الكتابة ؟هههههههههههههه
اكيد طبعا الاحتفالات دى بدعه وغالبا من العصر الفاطمى
احنا فعلا زى ماقلتى وزى ماذكر اخونا الازهرى قبلك لازم نحاول نتمسك بسنة الحبيب طول السنه وطول العمر بس ياريت نقدر
بجد بجد فرحت بتعليقك ورجوعك بالسلامه تانى
نورتى المدونه
تحياتى ودمتى بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
أختى ريمان
وعليكم السلام ورحمةالله وبركاته
والله كويس خالص اضحكى براحتك ياستى ولا يهمك دى حاجه تفرحنى
..............
بس ايه رايك من صغرى وانا كاتب ماليش حل واستاهل اخد جايزة نوفل فى الادب صح؟؟؟
لأ وايه اى موضوع اكتبه واقول فيه اللى انا عاوزة مش اللى مطلوب منى انى اقوله يعنى متمرد من يومى
اسكتى ع المشبك بحبه خالص بس فين الشنان بقى اللى تاكله يعوض علينا ربنا
لما بروح راس البر بجيبه مخصوص من عند حرات مش من عند بلبول ولا ابوطبل لأنى بحس انه عند حرات حلو والتانى بحس انه مضروب مش عارف ليه(اوعى حد من دول يطلع قريبك تبقى مشكله)
مش معاكى فى اننا فى اليوم ده لازم نحتفل لاننا لازم نحتفل برسولنا على طول ونحاول اننا نمشى على هديه عليه الصلاة والسلام صحيح هى بقت عاده بس احنا لازم نحاول نغير
المشكله اننا بنقول كده ومنقدرش وانا اول واحد يعنى انا عن نفسى جبت حلاوة المولد
...................
قبل ماتكتبى بوست جديد قوليلى وانا اظبطلك علبة بونبونى تمام علشان يطلع البوست حلو قوى زى اللى فات كده
هههههههههههههههههههه
(هو انتى بتعلقى ليكى ولزينب بلدياتك ولا ايه؟ طبعا ماهى مش فاضية)
تقبلى تحياتى ودمتى بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة موناليزا
تحياتى
حلاوة ايه بس ؟ الحلاوة هو انتو معندكوش حلاوة ؟ المشبك والسمسميه والفوليه والحمصيه وكده
لاحول ولا قوة الا بالله هبقى ابعتلك علبه
هههههههههههههههههههههههههههههه
كويس ان موضوعى ده فكرك بحاجه بتحبيها والبوست بتاع عزة ضحكك يعنى انا كده المفروض اخد منك تذكرة وانتى داخله المدونة بتاعتى هههههههههههه
طب ابقى ابعتى النشيد بقى علشان انا مااعرفوش بجد(احسن يكونو سرقو كلماتى علشان ارفع عليهم قضيه هما كمان) انا اعرف بتاع حماده هلال
حاضر ندخل فى المهم
الله ينور عليكى وعلى جميع الفتاوى
انا مش هعمل اى حاجه فى اليوم ده
حتى الشغل مش رايحه هه
انا هقضيه نوم كله ههههههههههههههههه
بجد بجد انا لو بايدى كنت مسكتك الافتاء مكان البشمهندز على
هو ده الكلام التمام
المشكلة اننا كلنا عارفين اننا لازم نمشى على سنة الحبيب المصطفى ومش بس فى اليوم ده لأ طول العمر بس مين يفتكر ومين ينفذ
ربنا يهدى
اختى الكريمة اسعدنى مرورك وتعليقك
ومستنى النشيد
تقبلى تحياتى ودمتى بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
اللؤلؤة
وعليكم السلام ورحمة الله وبركاته
أخى الكريم
انا من تشرف بزيارتك الجميلة ومرورك الكريم
اخى لو قرأت كل التعليقات(الا الاول طبعا لأنه تهييس بينى وبيت القلم السكندرى) هتلاقى الكل موافقك على رأيك وكلنا بنقول نفس الكلام ولكن المصيبه ان الناس اتعودت على الاحتفال باليوم ده بس وفيه نفضل نقول اننا لازم نمشى على السنة المطهرة ونتبع نهج النبى الحبيب فى كل حاجه ولكن يخلص اليوم وكأن الكلام اللى كنا بنقوله بيخلص معاه
ربنا يهدى
اخى الكريم نورتنى واسعدتنى زيارتك
ويسعدنى التواصل الدائم ان شاء الله
تقبل تحياتى ودمت بكل خير وود
والسلام عليكم ورحمة الله وبركاته

بـسـمـــة صـــــلاح يقول...

السلام عليكم
ازيك يا أستاذ معتصم
والله بكرة ان شاء الله اخر يوم امتحان
ربنا يستر وتكون خاتمتها مسك
ادعيلي
وبعد ما خلص هرجع بقى للتدوين عشان وحشتني المدونه اوي وكل اصحابي المدونين
بس ايه ده سديت نفسي على التمبلت بجد لو مش حلو قولي عشان اغيرة هو يمكن فاقع بس جميل مش كدا ولا ايه راي حضرتك
~~~~~~~~~ئ
معلش مقراتش البوست هبقى اقراه واعلقلك ان شاء الله انا رايحه انام بقى
ههههههههههه
دمت بكل ود
تحياتي(:

ريمان يقول...

هههههههههههه

السلام عليكم

حضرتك بتيجى راس البر عشان المشبك

طب والله راس البر نورت بحضرتك

على فكره يعنى

راس البر دى بتاعتنا

بتاعه الدمايطه

اااااااه خلى بالك يعنى

لا اى اى ولا زى زى ولا كل قط يتقاله يا مشمش

ههههههههههه

( ده مثل دارج عندنا )

بالنسبه لزينب بقه طبعا مشغوووووووووله

واكيد عارف السبب

ربنا يسعدها يا رب

وعقبال يا رب ما نفرح بحضرتك برضه

ونزغرط

سعيده بمرورى هنا والله

جزاك الله خيرا اخى

قيس بن الملووووح يقول...

شاكر زيارتكم وممنون لمشاعركم الجميلة رجاء دوام التواصل

fnoonh يقول...

مرسي على تعليقك عندي بجد اسعدني جدا وفرحت انه حد عارف يعني اني غبت ورجعت والحمدلله بس بكرة الشهادات وربنا يعين وتكون كويسة عشان اجازتي تكون سعيدة بجد

تقبل خالص شكري

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
اختى الصغيرة بسمة صلاح
وعليكم السلام ورحمة الله وبركاته
يارب تكونى خلصتى امتحانات النهارده وجاوبتى كويس وتطلعى الاولى زى كل سنة
وان شاء الله ربنا يوفقك وتجيبى المجموع اللى نفسك فيه وتدخلى الكلية اللى انتى عاوزاها
ولا يهمك ياستى ابقى اقرى البوست فى يوم تانى عادى يعنى
بس اللون فاقع قوووووووى وبيتعب العين ماليش دعوة
تحياتى ودمتى بكل ود وخير
**************
اختنا ريمان
وعليكم السلام ورحمة الله وبركاته
لا طبعا مش بروح راس البر عشان المشبك انا مش طفس للدرجة دى هههههههههههه
احنا بنروح نصيف هناك (كنا)كل سنة بدل اسكندرية علشان راس البر هادية وصغيرة
وايه خلى بالك راس البر دى بتاعتنا !!!!!! هو حد قالك اننا بنقول انها تبع اسيوط ولا حاجه ؟؟؟؟؟
ياستى بتاعتكم بتاعتكم طب ايه رأيك مش جايين السنة دى هه وافرحو بيها بتاعتكم دى هه
قال بتاعتنا قال
هو انتى فاكرة اننا لو عاوزين ناخدها هنغلب ؟؟ ابدا دا يادوب عربيتين مليانين صعايده يخطفو رجلهم لغاية هناك يجيبوها هى والبحر والنيل كمان ومش بعيد يجيبو عمك بلبول وابوطبل معاهم هههههههههههههههههههه
زينب ربنا يكرمها ويفرحها كمان وكمان ويتمم لها على خير يارب وعقبالك انتى كمان(ياخوفى لتعنسى وتقعدى فى رقبتنا)ربنا كريم وعنده الفرج
انا اللى بفرح خالص بمرورك عندى ياريمان
نورتينى
تحياتى ودمتى بكل ود وخير
************
الاستاذ قيس بن الملووووح
تحياتى يابشمهندس
ده انا اللى سعيد بالتعرف على مدونتكم الجميلة وان شاء الله يدوم التواصل
تحياتى ودمت بكل ود وخير
****************
فنونه
ياستى لاشكر ولا حاجه انتى اختى الصغيرة وان شاء الله تروجى تجيبى الشهاده تلاقيها زى ماكنتى بتتمنى واكتر وربنا يفرحك وينجحك
وان شاء الله تكون اجازة سعيده وكلها فرحه بإذن الله
تحياتى ودمتى بكل ود وخير
والسلام عليكم ورحمة الله وبركاته

موناليزا يقول...

السلام عليكم ورحمة الله وبركاته
اذيك اخى الكريم
بالنسبة لانواع الحلاوة فطبيعى عارفاها:) بس انا كنت اقصد ايه دخل الحلاوة فى الاحتفال بمولد النبى رغم ان كتير بيستنوا المولد مخصوص عشانها لكن انا بعتبرها حاجة حلوة بتتاكل ومش شرط ابدا يكون ليها مناسبة:)
بس برضه افتكر انك قلت هتبعت لى علبه( يعنى دبست نفسك) وانا فى انتظارها وكتر الفولية:)

حتى الضحك بقى له تذاكر!! اهو انت كده صدمتنى (شوف هتدفع لى تعويض ازاى بقى) :)


النشيد:"محمد نبينا"
محمد نبينا أمه آمنة
أبوه عبدالله مات ما رآه جده اللى رباه
وأبو طالب عمه كان بيخفف عنه
ستنا حليمة مرضعة نبينا
كانت دايما تقوله
جانا السعد جانا اتولد فى مكة
ومات فى المدينة

(اى خدمة)

هنتلكك ولا ايه طبعا هتروح الشغل ومفيش نوم (ده مالوش دعوة بالفتوى خالص على فكرة)

:) الله يكرمك مش اوى كده ده انا غلبانة هاجى جنبه ايه الراجل ماشاء الله صاحب علم دينى احنا مجرد مجتهدين(حرام تظلم الراجل)

اهو ده الكلام
والسلام ختام

*shosho* يقول...

السلام عليكم ورحمة الله وبركاته
ازيك يا أستاذ معتصم

ههههههههههههههههههههههههههههه
ههههههههههههههههههههههههههههه
ههههههههههههههههههههههههههههه
أنا بجد كنت هموت من الضحك موضوع تعبير رائع
إنت مكنتش بتكتب موضوع عن مولد النبي كنت بنكتب عن الحلاوة والاجازة والراحة


يجب علينا كمسلمين اننا نحقق محبة الرسول صلى الله عليه وسلم باتباعه
مش في ذكرى مولده بس في كل وقت
لإن سنته صلى الله عليه وسلم هي أساس حياتنا

~~~~~~~~~~~~~~
دمت كما تحب

تحيتي لك..

بـسـمـــة صـــــلاح يقول...

ههههههههههههههههههههههههههههههههههههههههههههههههههههههههههه
لا يا أستاذ معتصم إنت نابغة النابغين كمان ايه التعبير دا أنا مقدرتش أمسك نفسي من الدحك وقرأته للبيت كله
فضايح هههههههههه
والله دحكتني وأنا مليش نفس النتيجه منكده عليا آخر نكد والله بس الحمد لله على كل حال
~~~~
أما من ناحية رأيي في الموضوع أنا بقول اننا نتبع الرسول ونجعلة قدوتنا وننتهج سنته هو دا الحل ودا مش بيجي بجد غير لما حب الرسول صلى الله عليه وسلم يبقى قوي في قلوبنا ويتعمق كمان
بس سبحان الله على أحوال الناس دلوقتي
ربنا يهدينا للطريق الصح
آمين يارب
~~~~~~~~~~
سوري طولت عليك بس التعليقات والتدوين وحشني وحاسه عندي طاقة رغي فزيعه هههههههه
يلا دمت بكل ود وخير وسعادة
وبجد فرحتني ان حضرتك متابع ومهتم ربنا يكرمك
تحيــــــــاتي(:

كيــــــــــــارا يقول...

هههههههههههههههههههههههههههههههههه

موتني من الضحك وانا في مود مش قادره اضحك فيه

ازيك عامل ايه شكلك كنت شقى موت

طبحا طبحا طالعلي

***********

بالنسبه ليا الاحتفال بالرسول هو اننا نتبع سنته

المعتصم يقول...

بسم الله الرحمن الرحيم
أختى الكريمة موناليزا
وعليكم السلام ورحمة الله وبركاته
تحياتى
الله يسلمك انا الحمد لله كويس
(على فكرة ازيك بحرف الزين مش الذال مش انتى مش بيهون عليكى تغيرى الفصحى بالعامية!!يبقى تكتبى صح بقى هه)
ايه اللى ايه دخل الحلاوة بالمولد احنا اتولدنا لقينا الحلاوة ليها علاقه وطيده بالمولد ده حتى اسمها حلاوة المولد وانا ماليش دعوة بالموضوع ده والله دا من زمان يعنى مش انا اللى عملته
وطبعا بما انه فيه علبة حلاوة رايحه على البيت بقينا نعرف الحلاوة اهه وكمان بنتشرط ونقول كتر الفوليه
حاضر من عنيا الاتنين
يسلام واحنا فى ديكى الساعه لما نبعت اغلى واحلى علبة حلاوة لأختنا أمة الله موناليزا دااحنا نبعتها بكل سرور وحبور وسعادة(ايه الكلام الجامد ده)
بقى انا عاوز اخد تمن التذاكر قم تدبسينى فى تعويض
صحيح هى الرجاله تروح فين من مكر الستات
ماشى ياستى التعويض اللى تطلبيه انا تحت امرك قولى انتى بس
النشيد حلو وبسمع العيال بيقولوه فى شارعنا وشكرا خالص على انك بعتيه
ماليش دعوة
انا الفتوى الاولانيه عجبانى اكتر وهى اللى همشى عليها انا حر مافيش شغل ولا لف على الصيدليات وهقضيه نوم واكل فى الحلاوة
اما بخصوص البشمهندز على انا برضو مصر على انك تنفعى تمسكى مكانه (انامغلطتش فى الراجل لاسمح الله)
هههههههههههههههههههههههههه
اختى الكريمة بجد بجد مرورك بيسعدنى
نورتى المدونة
تحياتى ودمتى بكل ود وخير
والسلام عليكم ورحمة الله وبركاته

المعتصم يقول...

بسم الله الرحمن الرحيم
شوشو هانم
وعليكم السلام ورحمة الله وبركاته
بعد الشر عليكى من الموت
اضحكى ياستى زى ماانتى عايزة ولا يهمك ربنا يبسطك كده على طول
والف مبروك على النتيجه (اللى مش عجباكى)
كلامك صح عن محبة رسولنا الكريم بس ياريت فعلا ننفذه
تحياتى ودمتى بكل ود وخير
*****************
بسمة هانم (اشمعنى شوشو يعنى)
تحياتى
ضحكتى وكمان سيحتيلى فى البيت كله !!!
كويس انكم ماتعرفوش اسمى والا كان والدك قابل اخويا الكبير عندكم فى المملكه وقاله على الفضيحه دى ولا تلاقى اخوكى محمد عنده فى المدرسه اللى هو شغال فيها الحمد لله
ياريت فعلا يبقى حب الرسول فى قلوبنا مش فى كلامنا بس ساعتها هنعمل كل حاجه هو كان بيعملها وهنمشى على سنته الشريفه
ياستى ارغى براحتك ولا يهمك معاكى اذن بكده لغاية بس ماتفوقى من دوشة الامتحانات والنتيجه
وبعدين بتكتبى بدال فظيعه تكتبى فزيعه وعاوزة تجيبى 100فى ال100 طب ازاى؟؟؟؟؟ههههههههههههههههههههههه
تحياتى ودمتى بكل ود وخير
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى كياراهانم(ادعو لشوشو هى السبب)
تحياتى
الحمد لله انك ضحكتى وانا مبسوط انى كنت السبب فى كده
بس ايه اللى مخليكى فى المود الوحش ده ؟
الحمد لله انا كويس صحيح انا فى مود زى المود بتاعك ويمكن اكتر شويه والسبب كنت كاتبه فى بوست وهنزله مكان البوست ده بس الحمد لله انى نزلت البوست ده مكانه على الاقل علشان تضحكى
اكيد طبعا كنت شقى(بس فى الخباثه)واكيد اكيد وطبحا طبحا طالحلك مش اخوكى الكبير (ماهى الدنيا دلوقتى ماشيه بالشقلوب )ههههههههههههه
صح بس نتبع السنة فعلا وليس قولا زى مابنعمل
اسعدنى مرورك
تقبلى تحياتى
ودمتى بكل خير وود
والسلام عليكم ورحمة الله وبركاته

د/عرفه يقول...

هههههههههههههههههه
والله فعلا ضحكت
ما شاء الله عليك
وهى نظره الصغيرين للمولد
بس بتكون كارثه لو هى دى نفس نظره الكبار للمولد
آسف على عدم تعليقى فى الموضوعات اللى فاتت

انت تسال والكمبيوتر يجيب يقول...

دعوه
الأخ العزيز/او الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

zainab يقول...

أخى المعتصم

السلام عليكم و رحمة الله و بركاته

أولا أعتذر عن التأخير فى الرد

ثانيا كل سنه و انت طيب و كلنا طيبيبن بمناسبة المولد النبوى الشريف
اللهم صلى على سيدنا محمد

ثالثا ياسلام على الحلاوه احنا كان عندنا مشبكك قريب هو فعلا طعمه جميل قوى

انت عارف عندنا حلاوة كمان اسمها جزاريه لونها أحمر و فيها مكسرات جميله قوى

و حلوة الوصيه اللى انت كتبتها لكل أب شكلك كده مش كنت بتحب المدرسه مش عارفه ليه احنا و احنا صغيرين مش كنا بنحب المدرسه

يجب على كل مسلم فى ذكرى ميلاد الحبيب عليه الصلاة والسلام أن يححيى سنته باتبعها

تحياتى

موناليزا يقول...

ايه التعويض الجميل ده:)
مشكور جدا على علبة الحلاوة والتصحيح اللغوى
على فكرة ممكن ماتروحش الشغل فى اليوم ده فى حالة واحدة بس






انه يكون يوم جمعة:)

فتافيت يقول...

يا عمدة انا ماعنتش جاية تاني كل ما ادخل لاقي حاجة حلوة لحد وانا لا خلاص مش عايزة .. عادي بقى هاعمل بوست اجيب حاجات حلوة لكل اللي العرفهم وهاسيبك انت من غير حاجة.. اقولك

انا هاجيب لهم كلهم مشبك وفولية وسمسمية وطرية علشان ما توجعش سنانهم ومش هاجبلك حاجة بس ها

ام عن موضوع الانشا ده فظييييييييييع.. بس انا طول عمري اسلوبي كويس في الكتابة حتى في ثانوي جايبة 58من 60 .. يعني 29 من 30 في كل سنة عااااااااااااااااااااااا

نرجع بقى للمولد.. هو بدعة وكل بدعة ضلالة

الرسول صلى الله عليه وسلم محتاج اننا نحي السنة .. مش نعمل ليلة كبيرة

ومع ذلك برضو بحب الحلاوة جدا

تحياااااااااااااتي

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
د/عرفه
تحياتى
ياعم ربنا يبسطك كمان وكمان وتضحك كده على طول
هى فعلا نظرة الاطفال بتكون كده مش للمولد بس دى كده لكل حاجه وكل مناسبه تانيه يعنى فى الاعياد بتكون علشا اللبس الجديد وفى المواسم التانيه بتكون علشان الاجازات من المدرسه والزيارات والخروج وعلى كده على طول
بس فعلا الكارثه انه فيه ناس بتبص للموضوع بنفس نظرة الاطفال ومش بيفكرو حتى فى انهم يقولو اننا لازم نتبع سنة الحبيب المصطفى عليه الصلاة والسلام
ربنا يهدى العاصى
ياعم ولا يهمك يعنى هى التعليقات بفلوس لو كانت بفلوس كنت هزعل علشان اللى مكنتش هاخده منك انما كده عادى وبعدين انا عارف برضو انك مش فاضى واكيد كلنا بيكون لينا عذر فى ساعات كتير ولا يهمك يادكتور
شرفتنى بمرورك
تحياتى ودمت بكل خير وود
*************
انت تسأل والكمبيوتر يجيب
والله يااخوانا عارف معاد البرنامج وكنت بسمعه زمان لغاية فترة قريبه بس هى الظروف اللى بتخلى الواحد لابيسمع راديو ولا تليفزيون
انما ربنا يسهل وابقى ادخل على المدونة بتاعتكم ان شاء الله
شكرا على الدعوة(قال يعنى بعاتينهالى مخصوص ههههههههههههههههههههه)
**************
اختى زينب
وعليكم السلام ورحمة الله وبركاته
ايه ده ايه ده
مين دى
عروستنا الجميلة هنا
منورة والله العظيم
وبعدين انتى بتتاسفى على ايه يازينب ؟
انا عارف انك مش فاضية ياستى ومقدر وكمان احنا مافيش بينا الكلام ده
دا انتى اختى الصغيرة وان شاء الله ربنا يسعدك ويكرمك ويفرحك كمان وكمان وبعدين ريمان كانت قايمة بالواجب وزياده كانت بتعلق ليكى وليها
وكل سنة وانتى واحنا وكل المسلمين طيبين وعلى سنة حبيبناالنبى ماشيين اللهم امين
كان عندكم مشبك قريب ؟ ايه ده ؟ دا انتو البلد اللى اخترعت المشبك يعنى المفروض يبقى عندكم على طول وبعدين فيكم بقى؟؟ مش هتبطلو بخل ؟ مش بيهون عليكم تاكلوة وبتبيعوه لينا وتاخدو تمنه يباى منكن ياباااااااااى
لأ ثوانى هنا انا مش عارف ايه الحلاوة التانيه دى وكده سخنت فى نفوخى لازم اكل منها ماليش دعوة انتى متاكده ان الاسم اللى كتبتيه ده صح ؟ علشان انا هبعت اجيب منها
طبعا كنت بكره المدرسه على الرغم من انى كنت شاطر(فاكرة انتى موضوع ال44على مستوى العالم ده)ومش عارف ايه السبب فى الكره ده بس متهيألى ان كل الاطفال كده
وبعدين يجب على كل مسلم انه ييحى ويتبع السنة فى كل وقت ياابله مش فى ذكرى المولد بس ماتوقعيناش فى الغلط يازينب
نورتى المدونة
تحياتى ودمتى بكل ود وخير
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
أختى موناليزا
تحياتى
طبعا انا فرحان ان التعويض لاقى القبول
وياستى لاشكر على واجب هو مش انا اللى دبست روحى فى علبة الحلاوة يبقى خلاص انا لما بقول كلمة يبقى لازم انفذها(ومش بعمل زى حنفى واقول خلاص هتنزل المرة دى ههههههههههههههه)
اما بخصوص التصحيح اللغوى فبصراحه ده رد على حكايه ضعى المنديل وحطى المنديل
انتى عارفه الصعايده قلبهم اسود ومش بيسيبو تارهم ههههههههههههههههههه
شوفى بقى انا سخنت فى دماغى يوم جمعه يوم مش جمعه مافيش شغل يعنى مافيش شغل هه بس خلاص
وبعدين طول عمرنا نعرف انه بيبقى يوم اتنين انتى هتغيريه علشان تودينى الشغل وتقولى الجمعه
برضو مش رايح هه
ههههههههههههههههههههههههه
شكرا على مرورك ومتابعتك
تحياتى ودمتى بكل خير وود
***************
فتافيت هانم
ايه بس اللى مزعلك منى وهو انا اقدر على زعل معاليكى برضو
بس يعنى مش كل مرة هقولك انى ببقى شايلك منابك من الحلاوة فى درج المكتب بعيد عن كل العيون احسن حد ياكله من ورايا
فكده مش معقوله يعنى تزعلى كل مرة واقولك على مكان الحلاوة اهم دلوقتى عرفو ولو حد اخد الحلاوة بتاعتك انا ماليش دعوة بس هه
وبعدين انا عارف انك مش هيهون عليكى تجيبى الحلاوة والمشبك والفوليه وماتقوليليش انا عارف انك قلبك طيب وبتقولى كده بس وانتى مقموصه
وكمان يعنى هتبقى عامله حفلة حلاوة وماتقوليش امال مين اللى هيضرب نار فى الحفلة دى طبعا لو انا مش موجود يبقى مافيش حد
شوفتى بقى ازاى
طول عمرك اسلوبك كويس فى الكتابة ماشى بس انتى اتكلمتى عن اسلوبك وانتى فى الثانويه انما انا كتبت عن موضوع كتبته فى رابعه ابتدائى يعنى عشر سنين
وكمان كانت بتقع منك درجه يعنى خايبه
نيجى بقى للمولد معاكى حق طبعا والمفروض اننا نحيى السنة على طول بس للاسف دلوقتى ناس كتير مش بتفكر غير فى الحلاوة
عليه العوض ومنه العوض
تحياتى ودمتى بكل خير وود
والسلام عليكم ورحمة الله وبركاته

ghorBty يقول...

هكذا كانت طفولتنا مليئه بالبراه واحلامنا فيها بسيطه ممزوجه بالامل

فليتها تعود

او تعود لنا احلامنا البسيطه

او يعود مثل ذلك الزمن

:

يجب علينا شئ واحد لا اكثر

وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانتَهُوا وَاتَّقُوا اللَّهَ إِنَّ اللَّهَ شَدِيدُ الْعِقَابِ

:

غربتي

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة غربتى
تحياتى
صدقتى والله فكم كانت طفولتنا واحلامها جميله بريئه صادقه فى كل شيء وبسيطه
بالفعل ياليتها تعود
.....
تحدثت وكل من علق على البوست كثيرا على مايجب على المسلمين ان يفعلو فى وكثر كلامنا ومع احترامى لهم ولرأيهم فقد اتيتى بالخلاصه ومايجب علينا فعلا
أختى الكريمة اشكرك على مرورك الجميل
(ماتنسيش تاخدى بقى من الحلاوة اللى جبتها علشان موناليزا كانت قايلالى انها هتديكى منهاهههههههههههههه)
تقبلى تحياتى ودمتى بكل خير وود
والسلام عليكم ورحمة الله وبركاته

اللؤلؤة يقول...

السلام عليكم ورحمة الله
أخى الكريم:
أشكرك على زيارتك وتعليقك المتميز . أما عن المعلومات المتوفرة عندى فإن إرم ذات العماد فقد اختلف فيها المؤرخون ولآثريون فمنهم من قال إنها فى سوريا وبالتحديد مدينة إيبلا حيث تم اكتشاف مؤخرا ارشيف مدينة إيبلا يذكر المدينة بالإسم فى سجلات معاملاتهم التجارية وفى قول ثانى إنها مدينة فى اليمن وقول آخر إنها مدينة تقع بين اليمن وعمان ولكن يا صديقى لم تحدد للآن مكان إرم ذات العماد بالتحديد...
تحياتى
وأشكرك على دوام التواصل

بستان الحب يقول...

ابنى المعتصم فى مولد الحبيب المصطفى صلى الله عليه وسلم نتذكر مانحن فيه من نعمه الا وهى نعمة الاسلام ونحيى سنته ونسير على هديه وندعو الله ان يسقينا من يده الشريفه شربه هنيئه لا نظمأ بعدها ابدا ،بابى انت وامى يا رسول الله .جزاكم الله خيرا تذكره رائعه

zainab يقول...

أخى المعتصم

جزاك الله خيرا على دعواتك لى ربنا يسعدك انت كمان يارب

و يسعد حبيبتى ريمان يارب

بعدين انت لسه مصر على البخل هههههه

لا يا سيدى ده مش بخل بس تقدر تقول من كترها فى دمياط لكن عشان هى بعيده عنك بتحبها قوى

اه الجزاريه دى جميله قى انا عن نفسى بحبها بجيب منها علبه ليا لوحدى و ممنوع الإقتراب منها فى البيت

بعدين طبعا يا معتصم لابد من اتباع سنه سيدنا محمد عليه الصلاة و السلام دائما

تحياتى

zainab يقول...

أخى المعتصم

ايه ده مش معقول انت عارف بلبول هههههههه

ده انت كده مايتخافش عليك

بص انا هقولك على واحد تانى حلو قوى و مشهور ( البدرى )

و ربنا يخليكى يا ريمان يا بلدياتى شايف واقفه معايا بتعلق لى ههههههههه

تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
*************
اللؤلؤة
وعليكم السلام ورحمة الله وبركاته
اخى الكريم عمرو
تحياتى
(ولو انى ليا ذكريات مش تمام مع اسم عمرو هههههههههههههههههه)
انا اللى بشكرك لاهتمامك برأيى المتواضع واهتمامك بالرد والتوضيح
بارك الله فيك وجزيت خيرا اخى
وبالفعل فقد قرات معلومات مختلفه عن مكان ارم ذات العماد ومافيش لها مكان محدد بدقه
مشكور اخى ونورت
تحياتى ودمت بكل خير وود
*************
بستان الحب
ست الكل
تحياتى
منورة المدونة والبلوجر كله ومحافظة اسيوط والمحافظات اللى جنبها كمان
صدقتى ياست الكل فالحمد لله على نعمة الاسلام وكفى بها نعمة ولعلنا نذكر انفسنا بهذه النعمة ونحاول العمل باخلاص واجتهاد اكبر لكى ننال رضا الله عز وجل عنا
اسعدنى مرور حضرتك جدا
تقبلى تحياتى
ودمتى بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم ورحمة الله وبركاته
عروستنا الجميلة زينب
تحياتى
فيه واحده تشكر اخوها الكبير على انه بيدعيلها اول مرة اشوف دى بصراحه
ربنا يسعدك ويفرحك ويسعد حبيبتك ريمان ان شاء الله وربنا يكرمنا ونلاقيلها عريس انا كان نفسى اجوزها للواد اخويا الصغير بس هو اتجوز يلا ربنا يسهل ونلاقى حد تانى وعلى العموم لو مجاش حد فيه ابن اخويا عنده شهرين اهى تستناه لما يكبر شويه مش مشكله ههههههههههههههههههههه
ماشى ياستى مش هنمشيها بخل هنقول زهق علشان هى فى وشكم على طول بس على فكرة احنا برضو عندنا المشبك على طول موجود فى المحلات يعنى مش حجه بس هفوتها عشان خاطرك يازينب
اما بقى الجزاريه دى فان شاء الله بكرة ولا بعده هشوف اى حد مسافر دمياط واقوله يجيبلى منها هه
وبعدين بتقوليلى (بعدين طبعا يا معتصم لابد من اتباع سنه سيدنا محمد عليه الصلاة والسلام دائما)طب ماانا اللى قايلك كده جبتى ايه جديد انتى دلوقتى هه(وش مطلع لسانه)ههههههههههه
شوفى احنا صعايده عفاريت ونعرف كل حاجه فى اى حته يعنى انا اعرف بلبول وابوطبل وحرات والبدرى والوخرى كمان امال ايه ماهو احنا قبل مانروح اى حته لازم نعرف مين اللى هناك علشان نبقى عاملين حسابنا هههههههههههههههه
ياستى ربنا يخليكى لريمان ويخليلك ريمان ويخليكم انتو الاتنين لبعض ويديم بينكم الحب والود ويسعدكم ويفرحكم
هى الحقيقه كانت قايمة بالواجب وزياده
الا قوليلى صحيح هو اسم العريس ايه؟؟
وماتخافيش ده سر ومش هقوله لحد (اوعى يطلع اسمه عمرو الله يسترك)
اوعى تزعلى انا بس بحب انكش معاكى
تحياتى اختى الكريمه
ودمتى بكل ود وخير وسعاده
والسلام عليكم ورحمة الله وبركاته

ريمان يقول...

لا لا لا


عيب كده

تفرح بيا ايه بس

انا لسه صغننه

عيب تفتح عينى على الكلام ده

عييييييييييب


والله لاقول لامى بقه


هههههههههههههههه


ان شاء الله نفرح بحضرتك الاول باذن الله

وبعدين صعايده مين وبتاع مين ومين اصلا اللى يسمح ان حد ياخد راس البر

بص حضرتك


انا متنازله عن دمياط

لكن راس البر

لااااااااااااااااااااااء

ريمان يقول...

وبعدين لو هتفتح عنيا تانى على الكلام ده وتقولى نفرح بيكى ومش عارف ايه انا هقول للقلم السكندرى


اه هفتن عليك


احترس بقه

ريمان يقول...

طب بقولك ايه

قصدى يعنى بقول لحضرتك ايه يا فندم

احم احم


انا قرات رد حضرتك على تعليق زينب

وعرفت ان حضرتك ناوى تجوزنى اخوك الصغير بس هو اتجوز

بس هو عنده ابن

انا موافقه اتزوج ابن اخوك الصغنن وهو بقى على قدى اهو

طب اجيب البزازه قصدى الشبكه امته يعنى واجى

طب والبامبرز بكام قصدى يعنى المهر كام؟

ومش تنسى تقولى العنوان من فضلك

المعتصم يقول...

بسم الله الرحمن الرحيم
السلام عليكم ورحمة الله وبركاته
اختى ريمان
تحياتى
ههههههههههههههههههههههه
بجد انتى دمك خفيف خالص وزى العسل
بس خلى بالك احنا لو عاوزين ناخد راس البر هناخدها بس احنا اللى سايبينها بمزاجنا ده للعلم بس
ثانيا يعنى انتى بتهددينى بحسام (القلم السكندرى)دا النائب بتاع الحلف بتاعى ههههههههههه يعنى مش هينفعك ببصلة
ثالثا الواد مايتعيبش عنده شهرين وزى القمر وانا شاريله بامبرز يكفيه سنتين لقدام مالكيش حجه اهه
اسألى ماما وهى على طول هتقولك انه عريس لقطه ومايتسابش والحقى اتجوزيه قبل ماتخطفه واحده غيرك
ههههههههههههههههههههههههههههههههه
تحياتى
ودمتى بكل ود وخير
والسلام عليكم ورحمة الله وبركاته

ريمان يقول...

لا لا لاء

الحق اتجوزه ايه بس

تؤ تؤ


احنا لسه هندرس اخلاق بعض

امال ايه؟

وبعدين مكنتش اعرف ان الاخ القلم السكندرى اسمه حسام

ما شاء الله اضفت الى معلوماتى

شكرا لهذه المعلومه

وبالنسبه لموضوع راس البر والله تحت امركم ما خلاص بقى هنبقى نسايب

المعتصم يقول...

ايوة كده اعقلى
وبعدين تدرسى اخلاقه ايه
دا انتى اللى هتربيه يعنى حاجه مضمونه مليون الميه
الا اذا بقى انتى معرفتيش تربيه يبقى دا ذنبك انتى واتحملى بقى

المعتصم يقول...

صحيح على فكرة هو اشمعنى حسام اللى بتهددينى بيه يعنى ؟؟؟؟؟؟؟؟؟
يعنى مش لاقيه غير صاحبى والنائب المخلوع بتاعى وتهددينى بيه ؟؟؟؟؟

fL0weR-giRL يقول...

السلام عليكم

الموضوع بتاعك خطير ههههههههههههههههههههههههههههههههه

بس حلوة حكايه يروحوا تعبانين ومايرحوش المدرسه تاني يوم هههههههههههههههه

طبعا انا اعتقد ان الي بيعملوه من الموالد دي بدعه وان اليوم دا نقعد نصلي شكر لله عشان بعث سيدنا محمد بنور الأسلام وهدانا بيه وخرج الناس من الظلمات الي النور

مش نروح الموالد ونتفرج علي الطبل والحاجات الهبل ديه

الموضوع حلو

لك كل الشكر والتقدير

^_^

zainab يقول...

أخى المعتصم

ربنا يبارك لك و وعايزاك تدعى لى على طول ماشى اتفقنا

أختى و حبيبتى ريمان

ايه ده كله ايه ده كله أنا قلت أبارك لك خلاص ههههههههههههه على ابن اخو معتصم اللى جابلك يخليلك ابقى اعزمينى على الفرح ههههههههه

خلاص يا معتصم هتناسبوا الدمايطه اوعى تقول بعد كده علينا بخلا هاه

و بعدين عايز تاخد راس البر و انتى يا ست ريمان هوافقه ونقعد من غيرها هههههههههههههه

تحياتى

اللؤلؤة يقول...

صديقى العزيز
بحثت جيدا عن مدينة إرم ذات العماد بعد عرض موضوع دمشق وتعليقك . فوجدت التالى :
إختلف المؤرخون والأثريون على تحديد مكان المدينة فمنهم من قال أن مينة إيبلا قامن على أنقاضها ومنهم من قال أنها مكان مدينة حضر موت باليمن
هذا للعلم والأمانة
تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
***************
flower-girl
وعليكم السلام ورحمة الله وبركاته
اختى الكريمه
تحياتى
ربنا يجعلك تضحكى كده على طول ان شاء الله
بس شوفتى العبقريه الطفوليه مالهاش حل
هههههههههههههههههههههههه
احنا المفروض لو بنفهم نصلى صلاة الشكر دى باستمرار مش بس فى يوم ذكرى مولد الرسول
انما تقولى لمين ؟ ربنا يهدى
اسعدنى مرورك اختى الكريمه
تحياتى ودمتى بكل خير وود
******************
عروستنا الجميلة
زينب
تحياتى
ياستى انا بدعيلك من قلبى ان ربنا يكرمك ويسعدك ويفرحك ان شاء الله انتى وكل بنات المسلمين اللهم امين
شوفتى ريمان خلاص بقيت تبعنا رسمى اهه هنجوزها للواد مصطفى الصغير خلاص
واتفقنا على كل حاجه وظبطنا المسائل
وبعدين ماتخافيش قوى على راس البر مااحنا سايبينها اهه ومش هناخدها انما ماتسخنوهاش فى دماغنا انتو ماتعرفوش الصعايده ياجدعان نيجى ناخدها بجد
هههههههههههههههههههههههههههههههههه
تحياتى يازينب(برضو ماقولتيش اسمه)
ودمتى بكل خير وود
*****************
صديقى العزيز ا/عمرو
تحياتى
واشكر اهتمامك بتعليقى وجهدك للرد عليه وانا بجد ممنون جدا لتوضيحك وصدقك فى نقل المعلومه
بارك الله فيك وجزاك كل خير
تحياتى ودمت بكل خير وود
والسلام عليكم ورحمة الله وبركاته

القلم السكندري يقول...

السلام عليكم ايها المعتصم

كيف الحال ياريس

ايه الغيبة دي كلها

معلش والله معرفتش ارد عليك اليوم لاني كنت مشغول بس شوية بس بإذن الله غدا نتحدث

ونتحدث

وتصبح علي خير

احلام صعيدة

سوري.. سعيدة :)

علي محـمــــــد يقول...

السلام عليكم

انا اول مره ادخل لمدونتك .. وهي مدونه جميله جداً..بس الموضوع ده مع انه مش اخر موضوع الا اني حبيت اعلق فيه وأسألك هو المدرسه طلبت منكم تعبير عن المولد ووالا طلبت منكم انكم تقولون لها ايه افضل الحلويات المفضله عندكم ؟ :)

بصراحه تعبير ظريف ومضحك

في امان الله

المعتصم يقول...

بسم الله الرحمن الرحيم
الاخ الفاضل على محمد
وعليكم السلام ورحمة الله وبركاته
تحياتى لك
طبعا اهلا بيك فى اول زيارة ويارب ماتكونش الاخيرة
اما موضوع التعبير ده فكان حاجه كده تحفه
انت عارف العيال الصغيرة بقى وكلامها هههههههههههههههههههه
هى المدرسه طلبت اننا نكتب عن المولد النبوى
بس واحنا مالنا احنا هما يقولو براحتهم واحنا نكتب براحتنا
وبعدين دى كانت رساله موجههة لابويا علشان يعرف انا بحب ايه فى الحلويت ويكتر منه (لؤم عيال بقى)هههههههههههههه
نورت اخى الكريم واسعدنى مرورك
تحياتى ودمت بكل خير وود
والسلام عليكم ورحمة الله وبركاته

ايوشة يقول...

هههههههههه لالا ايه بس ده ايه الشطارة دى حضرتك نابغة بجد ومن انت طفل لا بجد طفل عبقرى وعفريت كمان ههههههههههه
لا والله البوست تحفة تحفة تحفة انا مش قادرة امسك نفسى من الضحك
وبوستى ايه بئا مش يجى حاجة جنب البوست ده
اما بالنسبة للاحتفال ان شاء الله هحاول اتبع سنن مكنتش بلتزم بيها اوى وهبدا بيها من قبل ذكرى المولد النبوى وربنا يقدرنى استمر عليها على طول