الخميس، 12 فبراير، 2009

الحنين

بسم الله الرحمن الرحيم
السلام عليكم ورحمة الله وبركاته
كلنا لما بنبقى متضايقين من حاجه بنبقى عاوزين نسيب الدنيا كلها ونهاجر
او نسافر لأى مكان بعيد علشان نرتاح فيه
وبيكون متهيألنا اننا لو مشينا مش هنرجع تانى
بس لما الواحد فينا بيبعد عن بيته وعن اصحابه وعن اهله شويه
بيكون مش قادر يتحمل وهيموت ويرجع تانى ومش عارف ايه السبب
حتى لو كان المكان اللى هو عايش فيه بعيد ده مريح جدا وفيه كل حاجه هو عاوزها
انما دايما الحنين هو السبب وهو اللى بيرجعنا وهو اللى بيغلب
ومش هلاقى وصف او كلمات تعبر عن الحنين احلى من القصيدة بتاعة ميسون البحدليه
بتقول فيها :
لبيت تخفق الأرياح فيه .... أحب إلي من قــصــرمنيف
ولبس عباءة وتقرعيني .... أحب إلي من لبس الشفوف
وأكل كسيرة من كسربيتي .... أحب إلي من أكل الرغــيف
وأصوات الرياح بكل فج .... أحب إلي من نقر الدفـــوف
وكلب ينبح الطراق دوني .... أحب إلي من قط ألــيـــف
وخرق من بني عمي نحيف .... أحب إلي من علج عـنـوف
خشونة عيشي في البدوأشهى .... إلى نفسي من العيش الظريف
فما أبغي سوى وطني بديلا ً.... فحسبي ذاك من وطن شريف

ابيات جميلة جدا وعلى الرغم من ان ميسون اللى قالت هذه الابيات كانت زوجه لامير المؤمنين معاوية
الا ان حنينها لاهلها ووطنها كان السبب فى طلاقها منه
بس فعلا من اجمل الابيات اللى بتعبر عن الحنين

طبعا البونبونى لريمان والمصاصه لكيارا زى ما وعدت فى البوست اللى فات
والسلام عليكم ورحمة الله وبركاته

هناك 30 تعليقًا:

القلم السكندري يقول...

السلااام عليكم أيها المعتصم

كيف حالك؟

واسمح لي أن أتناول البوست بما هو أعم من موضوع الحنين

بل من جهة الأدب والشعر الذي كان يدّب في عروقهم.. فبه تأوهاتهم وتنهداتهم

وبالأحرفِ تتوجُّ أفراحهم.. وبها أيضاً تتلفعُ أحزانهم بالسواد

فما أجملها من عصور.. وما أرقه من أدب

وما أسخف عصر الإسفافِ في الكلمات الذي تتسافلُ فيه التعبيرات وخصوصا تعبيرات الشباب إلي ما دون الحضيض

شتان بين روضٌ يانع وبين خرابُ المزابل الغربية


تقبل تحياتي أخي الحبيب علي انتقائك الرائع

ريمان يقول...

ههههههههههههههه

ههههههههههههههههههههه


الله يخليك يا رب

بجد ربنا يعزك

الف الف شكر ع البونبونى


مكنتش متوقعه بجد المفاجأه دى

بالنسبه بقه للحنين

ياااااااااااه

انت جيت ع الجرح والله

انا كنت عايشه مع جدتى 16 سنه بس اما ماتت رجعت لبابا وماما واخواتى

بياخدنى دايما الحنين للبيت اللى اتربيت فيه وقضيت فيه اجمل اام حياتى

يوووه

خلاص انا دمعت

خلاص خلاص بقه

بجد قطعت قلبى

ريمان يقول...

يالهوى ع البونبونى



شكله حلو اووووووووووووووى


يا ترى طعمه ايه

mohamed ghalia يقول...

رائعة كلماتك يامعتصم
أحيانا يقذفنا الحنين فعلا
دمت بكل الود أخى

zainab يقول...

السلام عليكم

أخى المعتصم

أولا سلامتك يا معتصم أسأل الله العظيم رب العرش العظيم أن يشفيك و مرضى المسلمين أمين

أنا مش عارفه أدخل على النت أصله فاصل من عندى يعنى أنا دلوقتى قعدت بالصدفه ظبطه موجود ربنا يسهل و مايفصلش عشان أرد على التعليقات اللى عندى مش عارفه أرد عليها

ثانيا الحنين الله كلمه جميله قوى تحسها من لفظها
و الأبيات اللى انت ذكرتها فى منتهى الجمال و الروعه فعلا معبره قوى و الصوره اللى انت حطيتها جميله جدا اسمحلى أخدها أما البنبون و المصاصه هبقى أخدهم من كيارا و ريمان

تحياتى

fL0weR-giRL يقول...

السلام عليكم

اخي المعتصم موضوع جميل والقصيدة جميله جدا

انا فعلا ساعات بيجي في بالي ان انا عايزة اروح لمكان ماعرفش فيه حد خالص من الناس بس اكيد اكيد هشتاق لأهلي لأن مافيش زي حنيه الأهل في اي مكان

بس عايزة اقول حاجة بسيطة في حجات في القصيدة مش فاهمه معناها :)

اصل انا في العربي الله اعلم بيا

ولك كل الشكر والتقدير
:)*******************

موناليزا يقول...

ما اقسى الغربة حقا
فلا نشعر بقيمة وطننا الا اذا بعدنا عنها
كلماتالقصيدة جميلة اختيار موفق
وكاتبتها اول مرة اعرفها فبشكرك على تعريفنا بها

ملحوظة:بقية القراء مالهمش واجب الضيافة ولا ايه؟
عموما منعا للتكلفة هنكتفى بأى عصير:)

كيــــــــــــارا يقول...

هييييييييييييييييييييييييييه

مثاثات ليا وحدياااااااااااااا

كيــــــــــــارا يقول...

حارفين لو حد قلب لمثاثتي

هتحول لبابتي اللي هو الاسد سمبا وهبهدل الدونيااااااااااااااااااا

كيــــــــــــارا يقول...

او اخلي اخويا معتصم بقي يجيب حبايبه بالسلاح ويخلص بقي علسي اللي سولت نفسه انه ياخد مثاثتى


وبقي حندي مثاثاااااااااااااات

كيــــــــــــارا يقول...

فما أبغي سوى وطني بديلا ً.... فحسبي ذاك من وطن شريف

***********

يااااااااااه انت بتشتغل مدرس عربي ولا ايه شكلك دار علوم او حاجه زي كدا

بجد ابيات جميله اوي وفكرتني بناس الحنين ليهم مش بينتهي بس هي دي الدنيا

عارف الابيات دي تولع في اي حد مغترب

كيــــــــــــارا يقول...

ميرسي جدا جدا علي المثاثات :)

ghorBty يقول...

السلام عليكم ورحمة الله وبركاته

جزيت خيرا علي موضوعك الجميل

فعلا الواحد دائما بيحن للشئ اللي بيرتاح له وبيلاقي سعادته معاه

بس انا فيه مكان مهما قعدت فيه مش بحن لا ي حد ولا بفتكر حتي نفسي وبحس اني مش عايزه امشي منه ولما بمشي بحس اني قلبي سبته هناك وهو الحرم هناك بجد بتحس بالراحه الحقيقيه وحنينك لله بتحس انك لقيته هناك في الجو الروحاني الجميل ربنا يرزقنا جميعا ولا يحرمنا من النظر الي كعبته المشرفه ما دمنا علي وجه الارض ديه دايما دعوتي وانا هناك

غربتي

القلم السكندري يقول...

يعني انت يوم ما تحب تكتب تعليق يوديني منتجعات المريخ الشمالية تيجي تكتبه عندي؟؟؟

ياعم اكتبه هنا في الواسع وانا اجي اقري عندك :)

يلا ف بيتها ولا يهمك

مكانك ومطرحك برده

بس ابقي شوف لنا حد بقي يزورنا بعيش وحلاوة طحينية..


ولا ناوي تقضيها إضرابات




تصبح علي خير يا جميل

المعتصم يقول...

بسم الله الرحمن الرحيم
السلام عليكم ورحمة الله وبركاته
***************
أخى الحبيب ورفيق الكفاح (اللى لسه هنكافحه)المهندس حسام
وعليكم السلام ورحمة الله وبركاته
الحمد لله على كل الاحوال
ياسيدى اتناول الموضوع من اى حته تعجبك براحتك ياهندسه
احنا لو فتحنا فى المقارنه بين عصرهم وعصرنا اكيد يعنى هيكون عصرهم من كل النواحى مش من ناحية الادب بس ياهندسه
ومش عاوز اتكلم على الاسفاف علشان مانفتحش فتحه ومش هنخلص لاننا هنبقى عاوزين خمس سنين كلام ونقاش
شكرا على مرورك ونورت المدونه يا باشا
تحياتى ودمت بكل خير وود
*******************
اختى ريمان
تحياتى
يارب البونبونى يكون عجبك(شكله بس طبعا)هههههههههههههه
وبعدين لا شكر على واجب انا قلتلك البوست اللى فات انى هجيبلك بونبونى وانا احب اوفى بكلامى والحمد لله
على فكرة حياتنا بقت كلها جروح
الحب جرح والحنين جرح والغدر والخيانه وغيره وغيره كل اما نتكلم فى موضوع تحسى انه بقى خلاص هو ده الجرح الكبير اللى تاعبنا مش عارف ليه
يعنى مافيش حب صادق
ومافيش صداقه حقيقيه
وفيه استغلال وفيه كره
يوووووووووووووه حاجات كتير حلوة راحت وجه مكانها حاجات كتير وحشه
واحنا السبب
بقى انتى كنتى عايشه 16 سنه عند جدتك يانهار ابيض طب ومتحمله تقعدى فى بيتكم ازاى دلوقتى؟؟؟؟؟
الله يكون فى عونك بجد
بس من غير عياط(مش عاوزين نبل المدونه)
اه هو البونبونى شكله حلو واكيد طعمه هيبقى حلو برضو ههههههههههههههههههه
نورتينى وشكرا على مرورك
تحياتى ودمتى بكل خير وود
***************
اخى محمد غاليا
تحياتى
شكرا على رايك وعلى مرورك
على فكرة نظرة شكلها كده هتبقى مدونة جامده جدا ومستنيين اول نظرة بقى لما نشوف
نورت يامحمد
تحياتى ودمت بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
أختى زينب
وعليكم السلام ورحمة الله وبركاته
الله يسلمك وشكرا على دعواتك
حاولى تبقى تعمليله كمين علشان تظبطيه متلبس علشان ماتنفضيلناش كده كتير والا هنيجى نقطع السلك بتاع النت اللى عندكم كله(زى ماهعمل فى رفيق بعد شوية واحرق قلبه عليه)
الحنين كلمة جميلة جدا لانها حاجه بتكون ناتجه عن الحب الحقيقى يعنى مش بس حب لأ دى اكتر منه كمان
طب ماتاخدى الصورة هو حد يقدر يحوشك نطخه على طول ولو عاوزة اى حاجه تانى خديها على طول من غير استئذان هو احنا بينا كده يازينب دا انا اخوكى الكبير (وماتخافيش مش هقطع المصروف)
اه البونبونى والمصاصه عليكى وعلى ريمان وكيارا واتفاهمو انتو مع بعض
هههههههههههههههههههههههههههه
شكرا على مرورك ونورتى المدونه
تحياتى ودمتى بكل ود وخير
***************
اختى flower-girl
وعليكم السلام ورحمة الله وبركاته
تحياتى
اشكرك على رايك
ساعات كتير كلنا بنفكر فى كده وانا فعلا بعملها كتير واسيب البلد وانزل القاهرة وادور على شغل واقول انى هقعد هناك بعيد عن البلد ومشاكلها وكل حاجه مضايقانى فيها بس لا انا ولا غيرى بيقدر يبعد اكتر من فترة بسيطه ويلاقى الحنين اخده للرجوع تانى ويبقى هيموت علشان يرجع ومش عارف ايه السبب ااااه لو فيه دوا يمنع الموضوع ده ههههههههههههههههههه
ايه اللى انتى مش فاهماه وانا اقولهولك بالصعيدى(علشان تعرفى ان الفصحى ارحم)
والله يااختى كلنا ربنا يعلم بحالنا فى اللغه وده عيب خطير فينا ربنا يصلح الحال
شكرا على مرورك ونورتى المدونه
تحياتى ودمتى بكل خير وود
والسلام عليكم ورحمة الله وبركاته

المعتصم يقول...

بسم الله الرحمن الرحيم
السلام عليكمورحمة الله وبركاته
أختى الكريمه موناليزا
تحياتى
ياخبر ابيض وهو احنا نقدر نقصر برضو ده انا اعملكم عزومه مخصوص(وادبح فيها رفيق بتاع النت اهو اخلص منه وابقى ضربت عصفورين بحجر واحد)
اولا اشكرك على رأيك
ثانيا صحيح الغربه قاسيه جدا وصعبه خالص
انا يمكن كتبت البوست عن الحنين للبلد بس انا بصراحه كنت بفكر فى الحنين لحاجه تانيه وماكنش ينفع اكتبها(خلى ده بينى وبينك وماتقوليش لحد)
اما عن ميسون فدى مش مشهورة اوى يعنى الا لانها كانت زوجة امير المؤمنين معاويه ولما حنت لوطنها وعيشة البدو قالت ماقالت فطلقها معاويه وممكن تقرى القصه فى الرابط ده
http://www.reefnet.gov.sy/phpBB2/viewtopic.php?t=90564&sid=1bbb84d08b12c4466634fbf535f07324
شكرا على مرورك اختى الكريمة ونورتى المدونه
تحياتى ودمتى بكل الخير والود
****************
أختى كيارا
تحياتى
هههههههههههههه
كل ده علشان المثاثه !!!!!!!!
وماتخافيش محدش هيقرب لمثاثتك (والله قرب لسانى يتحول من كلامك ده)هههههههه
لا ياستى انا مش مدرس عربى ولا دار علوم على الرغم من انى كنت عاوز ادخلها بس ابويا رفض ودخلنى تجارة علشان ابقى محاسب زيه واهه الحمد لله لا طلت محاسب ولا طلت مدرس عربى
القصيده جميلة وكلها مشاعر حزينه وحنين للماضى الجميل حتى الرغم من صعوبة العيش فيه
وربنا يكفينا شر التوليع فى حد يعنى هما اللى فى الغربه مش كفايه عليهم اللى هما فيه
شكرا على مرورك ونورتى المدونه
تحياتى ودمتى بكل ود وخير
(هو انتى نويتى تحتلى المدونة ولا ايه)
****************
أختى غربتى
وعليكم السلام ورحمة الله وبركاته
تحياتى
شكرا على رايك ودعواتك
مش مختلف معاكى
انا بتكلم على الغربه والحنين للبنى ادمين والاماكن اللى لينا فيها ذكريات مع البشر والاهل
انما الحرم ده موضوع تانى خالص
هو فيه حد يبقى قاعد فى الحرم وهيفتكر اى حاجه تانى فى الدنيا برضو !!!!!!!
يعنى ابقى قاعد كده فى الحرم واقول ياسلام والله وحشتنى القعده قدام باب بيتنا مثلا
ماينفعش
الواحد هناك بيكون فى ملكوت تانى بعيد عن دنيا البشر بيكون قاعد مع رب البشر فى كل سعادة وحبور وسرور يبقى اكيد مش هيفكر فى حنين ولا اى حاجه تانى الا لو كان عبيط (متهيألى حتى العبيط مايعملهاش)هههههههههه
اللهم امين على دعائك وهو بالفعل دعاء جميل جدا وربنا يوعدنا بزيارة بيته الحرام ان شاء الله
شكرا على مرورك ونورتى المدونه
تحياتى ودمتى بكل خير وود
والسلام عليكم ورحمة الله وبركاته

المعتصم يقول...

حبيبى يابشمهندس والله
وبعدين مش بقولك انت رفيق الكفاح
يعنى عاوزنى اروح عند اخوانا البعدا وحدى
مش لازم حد ييجى معايا
وطبعا الحد ده بما اننا ممكن نكون هنطول هناك يبقى لازم حد يكون من الناس اللى بحبهم
ولا ايه
وبعدين دا انت هتبقى النائب بتاع حلف ابر ايجيبت
انا كنت عاملهالك مفاجأة وهقولك عليها فى اجتماع بكرة
بس ماعلينا اديك عرفت علشان تقدر المسئوليات الجسيمه اللى عليك
هههههههههههههههههههههههههه
ســــــــــــلام ياهندسة

كيــــــــــــارا يقول...

عاااااااااااااااا

تجاره برده

هو كل اللي حواليا تجاره ليه هه قول انت ليه بابا تجاره ومامما تجاره وكول قرايبني كمان تجاره الحمد لله انا فلت منهم

وبحدين دي مدونه اخويا يحني مدونتي احتلال ايه بس دي بتاحتي اثلا

المعتصم يقول...

بسم الله الرحمن الرحيم
السلام عليكمورحمة الله وبركاته
أختى كيارا
هههههههههههههههههههههههه
دا على كده احنا طلعنا قرايب بجد بقى
وبعدين يعنى هى مالها كلية تجارة وحشة يعنى ولا وحشة ولا تكونش وحشه وانا مش واخد بالى هه
احمدى ربنا انك نفدتى بجلدك من الكلية دى (يابختك)
بقولك ايه
ناتقولى لعمو او طنط او اى حد من العيلة (بتوع التجارة دول)يشوفلى شغلانه وتكسبو فيا ثواب
ههههههههههههههههههههههههههه
وبحدين ماانا عارف انها مدونة اخوكى يحنى مدونتك انا بس بنكش محاكى ليس الا ياستى المدونة كلها تحت امرك ياسلام وهو احنا نطول برده
تحياتى
ودمتى بكل ود وخير
والسلام عليكم ورحمة الله وبركاته

كيــــــــــــارا يقول...

هههههههههههههههههههه

طب مش قلت ليه كان عندي في الشغل طالبين بس المقدمين قدموا وامتحونوا وفي انتظار النتيجه

ان شاء الله اي فرصه تانيه هقولك هوا

هيييييييييييييييه

تصريح رسمى فهمى نظمي من المعتصم ان المدونه دي تاعتي هييييييييييييييييييييييه

المعتصم يقول...

ماشى المدونة بتاعتك وده تصريح رسمى نظمى فهمى
مش هنقول حاجه
انما حكاية ماقولتش ليه دى وانا هعرف منين وبعدين يعنى ابقى ازاى اخوكى الكبير وماتعرفيش انى عاوز اشتغل ؟؟؟؟؟؟؟ (مش غريبه شويه)
وبعدين امتحنوا !!!!!!!!!!!!!!!!!!!!
وهو انا كنت همتحن علشان اشتغل ولا ايه؟؟ لا طبعا
احنا نشتغل على طول من غير امتحانات ياكده يااما بلاش
دا اللى ناقص كمان انا انا امتحن
عجبت لك يازمن
يعنى هو مش كفايه على شركتكم انى هقبل اشتغل فيها (هما يطولو يشغلو صعايده) ده حتى انا هخوف لهم كل الشركات المنافسه واى حد يكح معاهم انا اللى هتصرف معاه
بعد دا كله تقوليلى امتحانات وكلام فاضى
داانا مكنتش بمتحن فى الكليه امتحن بعد الكليه ايه الزمن العجيب ده
ســــــــــــــــــلام

فتافيت يقول...

ايه ده بقى
يعني مصاصات وبونبوني .. طيب ما فيش حته شوكولا بيضة لاختك فتافيت ما كنش العشم يا عمدة

ماشي انا ماشي وقلبي ومدونتي غضبنين عليك

كده ولا حتى فتفوتة توفي ولا ايوتها حاجة ماااااااشي مااااشي

اهئ اهئ اهئ اهئ اهئ

:(((((((((((((

كيــــــــــــارا يقول...

وفحلا فحلا حندك حق انا اللي غلطانه ازاي مش كنت اقول ان فيه شغله عشان اخويا الكوبير يشتغل اما انا مش حندي حق

يالهووووووووووووووي شركه ايه بس دا المشتفسي اللي انا شغاله فيها

كمان اه لازمن تمتحن عارف الشغله اللي انا فيها انا امتحنت فيها 3 امتحانات انجح في امتحان يودني امتحان تاني عشان يتاكدو اني داديره (جديره)بالوظيفه وكل دا والسيلري مش بيكفى مواصلات حتى هيق هيق هيق

ان شاء الله ربنا هيرزقك بشغل كويس وهيباركلك فيه وانا من ناحيتي اول شغله هقولك والله

المعتصم يقول...

بسم الله الرحمن الرحيم
السلام عليكم ورحمة الله وبركاته
************
فتافيت هانم
لأأأأأأأأأأ كله الا زعلك وهو احنا نقدر برضو
ده انا شايلك انتى تورته مخصوص فى الدسس علشان محدش ياكل منها غيرك
برضو كده تظنى فيا الظن الوحش ده دا انتى الخير والبركة
انا كده بقى اللى زعلان منك عشان ظنك فيا :( وعاوز رد اعتبار ده انا حتى لسه جايبلك طبنجه هدية البوست اللى فات ولا لحقتى تنسى
نورتى المدونه
تحياتى ودمتى بكل خير وود
***************
كيارا
شوفتى بقى انك طلحتى خلطانه ومش حندك حق
ياخرابى وكمان بتشتغلى فى مشتفسى يعنى هى السرنجات ورايا ورايا واجهزة المحاليل والكانيولات والقطن والشاش والقساطر لا كده حرام بجد انا اتخنقت
وكل دى امتحانات لا ياستى يدورو على حد غيرى انا ماعنديش خلق لدا كله
وفى الاخر كمان المرتب مش بيكفى المواصلات ليه يعنى هو انا عليا ندر ولا حاجه
الله الغنى عن دى شغلانه ياستى مش عاوزينها
أختى الكريمة ربنا يكرمك على دعائك ليا واشكرك
وبجد تعليقك بيسعدنى
تحياتى ودمتى بكل خير وود
والسلام عليكم ورحمة الله وبركاته

بستان الحب يقول...

ابنى المعتصم كلماتك فيها شفافيه وصدق ،من الرائع ان يشعر الانسان بالحنين لوطنه وبيته والاروع أن يشعر بأن الله معه فى جميع حالاته وبالتالى سيقل شعوره بالغربه او الوحشه تدوينه رائعه دمت بالف خير

المعتصم يقول...

بسم الله الرحمن الرحيم
السلام عليكم ورحمة الله وبركاته
امنا الفاضله بستان الحب
تحياتى
نورتى المدونه واشكرك على اطرائك الجميل الذى لا استحقه
الحنين شعور رائع سواء كان للوطن او للاهل او للذكريات الجميلة
وبالفعل الاروع ان يشعر الانسان ان الله معه فى جميع حالاته وعندها لن يشعر الا بالسعاده وليس فقط يقل شعوره بالغربه والوحشة
سيدتى الفاضلة اسعدنى مرورك
تحياتى ودمتى بكل الود والخير
والسلام عليكم ورحمة الله وبركاته

القلم السكندري يقول...

المعتصم يقول...


وبعدين دا انت هتبقى النائب بتاع حلف ابر ايجيبت
انا كنت عاملهالك مفاجأة وهقولك عليها فى اجتماع بكرة
بس ماعلينا اديك عرفت علشان تقدر المسئوليات الجسيمه اللى عليك
***********************


طب بالله عليك وأنا راضي زمتك.. في حد بياخد النائب بتاعه معاه ورا الشمس؟؟

في كل الأحزاب النائب بيستني برة والزعيم بس اللي بيدخل

حتي عشان تلاقي حد يفعل لك قضيتك ويخليها قضية رأي عام ويدافع عنك

يا أخي طب حتي عشان تلاقي حد يجيب لك عيش وحلاوة

أنا شايف أنت تتكل علي الله وأنا قاعد مستنيك هنا لحد ما تيجي بالسلامة.. أنا خلصت فترة تجنيدي في منتجعات العادلي سيتي..






ياعم ربنا يعافينا ويعافيك أنت بتتشوق علي إيه . طب افتكرلنا حاجة عدلة



تحياتي للجميل اللي عايز يودينا نتفسح ف داهية

المستنصر بالله يقول...

اختيار الكلمات موفق لحاله الحنين

تحياتى لحضرتك

المعتصم يقول...

بسم الله الرحمن الرحيم
السلام عليكم ورحمة الله وبركاته
**********
حبيبى القلم السكندرى
واحشنى ياهندسة
بص بص انت شكلك كده بعت القضية وانا مش حاسس بالحماس اللى كان عندك انه زى الاول وشوف ياعم طالما انت مش عاوز تيجى معايا المنتجعات السياحيه براحتك وعلشان كمان مايكونش فيه اى نوع من القلق عندك انا بعفيك من منصب النائب هه
وتم تعيين الرفيق صميده حميده عبدالجبار مكانك وهو ده اللى هيطلع عنيهم
وبخصوص موضوع العيش والحلاوة انا مكنتش عاوزك تقلق انا كنت مظبط كل حاجه
يللا انت اللى خسرت انت حر دا انا شويه كده وكنت هرشح نفسى للكرسى الكبير وكنت انت هتبقى النائب بتاعى بس انت اللى عملتها فى روحك
هههههههههههههههههههههههههههههه
ســــــــــــــــلام ياهندسه
دمت بكل خير وود
*****************
أخى الفاضل المستنصر بالله
تحياتى
اسعدنى مرورك جدا ونورت المدونة وشكرا على رأيك
دمت بكل خير وود
والسلام عليكم ورحمة الله وبركاته