السبت، 6 ديسمبر 2008

متضايق

بسم الله الرحمن الرحيم

السلام عليكم ورحمة الله وبركاته

فجأة وجد نفسه مخنوق ومش طايق اى حد او اى حاجه ومش قادر يتكلم مع حد ويقول ولو كلمة واحده من اللى جوا صدره وهتطلع روحه ,

كان يوم جمعه استحمى وبعدين اتوضاء وراح المسجد استمع للخطبة وهو شارد وفيه 100مليون حاجه فى دماغة واللى زودها ان الشيخ كان بيكرر الخطبة وكمان بيغلط فيها, بعد الصلاة طلع من المسجد ماسلمش على حد من الناس اللى يعرفها ومشى على طول رجع البيت لقى نفسه مش طايق راح واخد بعضه وطالع هايم فى الدنيا على راسه , تحاشى انه يروح اى حتة ممكن يلاقى فيها حد يعرفه فضل ماشى لما وصل على مشارف البلد , لقى الدنيا هادية ومنظر الخضرة جميل , دور على حتة ضليلة يقعد فيها ومش مهم التراب وقعد تحت شجرة بتبص على الترعه سرح فى الدنيا شوية وبعد كده لقى نفسه بيضحك من قلبه وهو مش عارف السبب فضل قاعد شوية وبعدين كان العصر بيدن قام عشان يرجع قابله واحد يعرفه واول ماشافه سأله : ايه التراب ده ؟ انت كنت فين ؟ فرد عليه : كنت برتاح .





( لو حد فهم حاجه يبقى يقولى والنبى )

هناك 8 تعليقات:

amato allah" هويتى إسلاميه " يقول...

البوست غريب شويه ,, لكن مش مشكله ,, اكيد اوقات الواحد بيكون محتاج يتكلم مع حد وكويس انك طلعت اللى جواك

وكل عام وأنتم بخير وإلى الله أقرب دوماً

أعاده الله علينا وعليكم وعلى الامه الاسلاميه بالخير واليمن والبركات

تقبل مرورى

amato allah" هويتى إسلاميه " يقول...

نيت أقول مباررك على شكل المدونه الجديد ,, هكذا أفضل

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة أمة الله
كل عام وانتى والامة الاسلاميه بكل خير
شكرا على مرورك
انا عملت المدونه دى عشان اكتب فيها اى حاجه مضايقانى يعنى عشان افضفض لانى بصراحه مش لاقى حد اتكلم معاه بحريه على الرغم من كثرة الاصحاب
مرة اخرى شكرا على مرورك الكريم وتقبلى تحياتى
والسلام عليكم ورحمة الله وبركاته

المعتصم يقول...

السلام عليكم
معلش نسيت ارد التهنئه
الله يبارك فيكى
وان كان شكل المدونةمش بيفرق معاياانا بس بحب اغير يمكن النفسيه تتظبط شوية

موناليزا يقول...

المهم انه ضحك فى الاخر
*************
ممكن تشيل تاكيد الكلمة حين ارسال التعليق

غير معرف يقول...

بسم الله الرحمن الرحيم
انا يمكن اول مرة اعلق علي موضوع في هذه المدونه لان بجد الموضوع شدني لان ده بقي للاسف حال معظم شبابنااليوم مش عارف هو عايز ايه ولا هو رايح فين ولا عنده ادني اهتمام لحال امتنا وما هي عليه الان
اين هم الامة انا كان نفسي الموضوع ده يبقي واحد متضايق لانه حامل هم امته وهذا اول اعتلراض
الاعتراض التانيهو خطبة الجمعة لما هو بيسمع الخطبة والامام ما بيغيرش في كلامهليه ماكنش هو ايجابي وقرأ وتعلم وقرر يقول هو الخطبة ويعملها زي ما هو عايز لانه شاب وعارف اكيد اللي في سنه عايزين ايه
الاعتراض الثالث انه حتي لما كان مخنوق ومش عارف يروح فين بص وشاق الطيبعة ومش يذكر ربنا ويقول سبحان الله الا انه للاسف تاه اكتر ربنا يرحمنا
التقييم الحال اللي هو فيها ده غفلة
انا اسفه ياريت تقبل تعليقي ده علشان انا مبحبش اللي بيحط دماغة في الرمل وكفايه بقي غفلة
ربنا يثبتك ويستخدمك في الخيروجميع شباب المسلمين

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى موناليزا
شكرا على مرورك على مدونتى الحزينه
وعلى رأيك المهم انه ضحك فى الاخر بس انا مش عارف انا ضحكت على ايه بصراحه
شكرا على المرور ودمتى بخير وود بإذن الله

المعتصم يقول...

بسم الله الرحمن الرحيم
السلام عليكم ورحمة الله وبركاته
اختنا الكريمة عابر السبيل
لكى كل تحية وشكر على المرور
اعتراضاتك فى محلها بس ممكن نناقش الموضوع واحده واحده ؟
الاعتراض الاول :انا معاكى ان معظم الشباب مش مهتم بحال الامة وانه ببساطه ضايع وشايف انه بيفكر فى مستقبل مش شايف فيه امل ومعاكى كل الحق فى اعتراضك
الثانى:خطبة الجمعة عارفه انا مرة صححت للشيخ غلطة وهو بيقرا فى الصلاة كانت خطبة الاسبوع اللى بعده كلها عليا والشيخ هيج الناس عليا بشكل لا تتخيليهواحنا اهلنا هنا ناس بسطاء جدا معظمهم اميين وشيخ الجامع عندهم ده حاجه مقدسة وانا لما بناقشه فى اى حاجه لازم عندهم ابقى انا اللى غلطان لانه ببساطه مهما كنت متعلم مش هعرف زى الشيخ
وبالنسبة لموضوع انى اخطب انا الجمعه بصراحه حاولت ولكن المنبر له رهبة عظيمة كل مااطلع عليه انسى الخطبه ومااعرفش اقرا من الورقه
الثالث : الحمد لله رب العالمين رد الفعل التلقائى عندى عند حدوث اى شئ هو ذكر الله ولما بكون قاعد وحدى ليا اذاكر بقولها وعدد تسابيح لازم اكملها بس احيانا الواحد بينسى صحيح وبيسرح فى حال الدنيا انما اكيد لما ضحك فى الاخر كان ذكر ربنا لانه لو ماكانش ده حصل كانت نوبة الضيق فضلت ملازماه وابسط دليل على كده انه قام على اذان العصر وراح المسجد
انا متقبل كل اعتراضاتك بصدر رحب لانها بنائه وبتصب فى مصلحة الفرد الشخصية ومصلحة امتنا الاسلامية
ربنا يوفقنا لما يحب ويرضى
امين يارب
شكرا على مرورك وتقبلى تحياتى
والسلام عليكم ورحمة الله وبركاته