الاثنين، 15 ديسمبر، 2008

الحمد لله

بسم الله الرحمن الرحيم

السلام عليكم ورحمة الله وبركاته

دلوقتى الحاله النفسية احسن والحمد لله رب العالمين والواحد بيحاول انه يرجع لطريق ربنا تانى ويبدأ مشواره من الاول وينسى بقى كل اللى فات ويحاول يكفر عنه لعل الله يتوب عليه ويغفر له

ومن الخطوات على طريق التوبة اننا عملنا كمجموعه من الجيران مسابقه للاطفال فى حفظ القران الكريم هدفها مش بس ان الاطفال تحفظ لمجرد الحفظ ولكن لجعل قلوب الاطفال تتعلق بالقران من ناحية وكمان تتعلق بالمسجد من ناحية تانيه وربنا يوفقنا فى ده لاننا عاوزين اطفالنا تكبر وهى متمسكه بدينها وطبعا ان شاء الله هيكون فيه متابعه لكل الاطفال اللى بيشتركو فى المسابقه وده بيكون عن طريق بعض الاخوة جزاهم الله خيرا وجعله فى ميزان حسناتهم يوم القيامه وهم من يقومون بالتحفيظ عملو كراسة متابعة للوالدين فى المنزل وعندما يقوم الطفل بعمل اى شيئ غلط تقوم الام او الاب بعمل علامه معينه يعرف منها المحفظ ان الطفل غلط وعندما يعمل اى شيئ كويس ايضا تضع الام او الاب علامة بالمعنى ده وهنحاول نتابع ان شاء الله ونحاول نقوم سلوك الاطفال بطريقه سليمة وعلى اساس دينى وكمان فيه عدة افكار اخرى صحيح ليست افكار جديده ولكنها قليلة التنفيذ وهى عن التكافل والمشروعات الخيريه وكلها تعمل على خير الامة الاسلاميه والتى تتمثل هنا فى بلدتنا الصغيرة وربنا يكرمنا ونقدرننفذالافكار دى وكمان نوصلها للبلاد اللى حوالينا وينفذوها وانا واثق انه يوجد شباب قادر على التنفيذ وعمل اشياء وافكار افضل مما نعمل نحن وكله فى الاخر سيعود بالنفع على امتنا وبلدنا

ولا تتخيلو حجم الاقبال من الناس على ماقمنا بطرحه من الافكار حول التكافل والمشروعات الخيريه

دعواتكم لينا بالتوفيق وان ربنا يقدرنا ونكون قد المسئوليه دى .

وفقنا الله واياكم لما يحب ويرضى

والسلام عليكم ورحمة الله وبركاته

هناك 5 تعليقات:

amato allah" هويتى إسلاميه " يقول...

السلام عليكم

ما شاء الله تبارك الله

حاجه جميـــله أوى


ربنـــا يوفقكم ويجعله فى موازين حسناتكم كل حرف قرآن الطفل بيتعلمه

ده فعلا اللى اسمه صدقه جاريه

لان كل حرف من القرآن الطف بيتعلمه بعد كده كل صلاه يصليها بالقرآن ده يكون فى موازين حسناتكم ان شاء الله

وفقكم الله لما يحبه ويرضاه

عابر سبيل يقول...

بسم الله الرحمن الرحيم
اولا شكرا علي قبوللك لتعليقي علي الموضوع الماضي وانا برضه اسمحلي اعلق علي الموضوع ده كمان انا بجد مبسوطة بالتحول ده من واحد مكتأب ومش عارف هو عايز ايه الي واحد ايجابي ومحب لعمل الخير وعلي فكرة صدق رسول الله عليه الصلاة والسلام الخير في وفي امتي الي يوم الدين وان احنا كلنا جوانا خير بس احنا ندور عليه
وفي حاجة كمان نعمتان مغبون فيها كثير من الناس الصحه والفراغ او كما قال عليه الصلاة والسلام
لازم نملي اوقات فراغنا بعمل الخير والله هنقرب من ربنا اكثر ونحس بحب ربنا وربنا هيفتح علينا
وعلشان التعليق يكون ايجابي عندي اقتراح لابد ان تستمر مع الاولاد في تحفيظ القرآن مهما حصل ومهما كنت مشغول وافتكر دايما انه العمل ده لله وجدد النيه والله المستعان
وحاجة كمان في اخلاق احنا للاسف افتقدناها فينا ياريت تاخد نيه وتعلم الاولاد دول وصدقني انت كمان هتتعلم معاهم
مثلا هناك سلبيات كتييييييير في مجتمعنا اساسها ثقافات خاطئه كالنظافة وهتلاقي الاولاد عندهم ثقافة اهلهم ان الشارع ده مش بتاعنا علشان كده نرمي فيه كل اللي في ايدينا وطبعا حال شوارعنا لا يخفي علي احد وده مننا مش من حد تاني وهتلاقي سلوكيات كتيير قوي
وكمان فكرة كمان وهي احياء السنن النبي عليه الصلاة والسلام مفبش حاجة الا وعلمها لينا علشان كده احييمعاهم سننه في الاكل والشرب واللبس وغيرهااااا
وربنا يوفقكم
والله المستعان
اللهم اهدي شباب المسلمين وانفع بهم
انا اسفه للاطاله بس ده ممكن يكون اخر مرورلي
ربنا يوقفكم الي ما فيه الخير

ghorBty يقول...

السلام عليكم ورحمة الله وبركاته

بجد ربنا العالم انا مبسوووطه اد ايه


هو دا الشغل والا بلاش

هو دا التحدي امام الصعاب

هو دا فعلا مواقف الرجال

ان شاء الله ربنا هيفتح عليك بالمدونه وبموضوع المسجد ويرزقك كل خير

والايام كفيله توضح لك دا وكمان ان شاء الله كل حرف هتعلمه للاطفال هيكون في ميزانك يوم الدين

واهل القرءان دول اهل الله وخاصته ما شاء الله ياااا رب يسر لك الاحوال

ابشر فالحمد لله لقد عدت الي طريق الله الي طريق الحق فالزم هذا الطريق ولا تعود بفكرك الي الوراء

فالعمر محسوب والانفاس محسوب ولن ينفعك الا عملك الطيب

مبارك عليك كل شئ حلو

جزيت خيرا

والزم الحمد فيزيدك الله من فضله

موناليزا يقول...

ربنا يوفقك لما فيه الخير
ويعينكم على ما اقدمتم عليه

المعتصم يقول...

بسم الله الرحمن الرحيم
السلام عليكم ورحمة الله وبركاته
******************
أختى الكريمة امة الله
وعليكم السلام ورحمة الله وبركاته
اسعدتنى زيارتك وشكرا على مرورك وآمين على دعواتك
ووفقنا الله اجمعين لما يحب ويرضى
تقبلى تحياتى وتقديرى ودمتى بود وخير
******************
اختى الكريمة عابرة السبيل
انا الذى يجب ان اشكرك على تعليقك وليس انت على تقبلى للتعليق فمن الخطاء ان يغضب الانسان من اى انتقاد نافع وهادف بل يجب عليه ان يدرسه جيدا ويستفيد مما فيه
أحمد الله على ماصرت اليه وان كان الفضل فيه لاخى الاكبر الذى يعمل بالسعوديه فهو صاحب الفكرة الرئيسيه وماانا الا مساعد ليس الا مجرد مشرف على التنفيذ فأنا لااحفظ الاطفال انما يحفظونهم مشايخ متخصصون فى القراءات حتى يكون الحفظ سليما والنطق ومخارج الحروف كله صحيحا
ولكن الحمد لله فقد بدأت اخرج من حالتى النفسيه واعود الى سابق عهدى بالحياة ولعل الله سبحانه وتعالى يتقبل منى
وسنحاول ان شاء الله ان نعلم اطفالنا ونتعلم معهم سنن نبينا الكريم - صلوات ربى وسلامه عليه- وان نحسن من سلوكياتهم ولعلنا نفلح ولو باليسير,
لكن مااحزننى انك كتبتى تقولين انه قد يكون اخرمرور لك على المدونه, لماذا؟ لماذا تبخلين بالنصيحه على اخ مسلم يحتاج اليها ؟
اشكرك على مرورك وبارك الله فيكى ودمتى بخير ووفقنا الله واياكم الى مافيه خير امتنا الاسلاميه
**********************
الاخت الكريمة غربتى
وعليكم السلام ورحمة الله وبركاته
ادام الله سعادتك وسرورك
والله يبارك فيكى على كل شيئ حلو
وشكرا على نصيحتك الغاليه الزم الحمد يزيدك الله من فضله وهذا حقيقى فعلا
اختى دمتى لى اختا ناصحه مرشده وجزاكى الله خيرا
وتقبلى تحياتى وشكرى
***********************
اختى الكريمة موناليزا
بارك الله فيكى وشكرا على مرورك
ووفقنا الله واياكى لما خير امتنا
تقبلى تحياتى وشكرى
ودمتى بود وخير
****************************
فيه حاجه غريبه
كل اللى كتب لى تعليق من الجنس اللطيف امال الرجاله اخوانى راحو فين ؟؟؟؟؟؟؟؟
انا بس بضحك
ادامكم الله لى اخوة واخوات يجمعنى بكم حب الله والعمل الصالح الطيب وشكرا لكم على وقوفكم بجوارى اوقات محنتى
ونلتقى دوما على خير بإذن الله
والله اسأل ان يجمعنى بكم فى كل خير
والسلام عليكم ورحمة الله وبركاته