الاثنين، 16 يناير 2012

مرسى ابن المعلم الزناتى اتهزم يارجاااااااله



بسم الله الرحمن الرحيم

السلام عليكم ورحمة الله وبركاته

ازيكم كلكم عاملين ايه ؟

يارب تكونوا جميعا فى احسن الاحوال

(مش هكتب اعتذارات ومش هقول انى هرجع اكتب تانىفى المدونة علشان عارف ان الناس زهقت من كلامى)

المهم عاملين ايه فى البرد ده ؟؟

مش عارف الشتا السنه دى مالها كده جايه شديده قوووى

ربنا يسترها وتعدى على خير هو مش فاضل فيها غير شويه قليلين

**********


كنت واقف فى الفصل فى تانية اعدادى وكالعاده كتبت عناصر الدرس على السبورة

وبعد كده شرحت وهزرت مع الطلبه

وقوم انت ياهريدى قولى بنعمل دى ازاى

وقومى انتى يانعناعه قوليلى نسوى دى كيف

وهكذاااااا

الطبيعى بتاعى

وانا من النوع اللى مايحبش يقعد اثناء الحصه ( هما حصتين بصراحه)

وخلاص وتمام والحمد لله حسيت ان الدرس اكبر نسبة من الطلبه مستوعباه (الا من آبى)

فقررت انهم يكتبوا الدرس فى الكشكول

كله يطلع الكشكول ويكتب التاريخ والعنوان فى نص السطر

تمام وميه ميه وابتديت امليهم

وابص الاقى محمد قاعد مش بيكتب الدرس

- مش بتكتب ليه يامحمد بيه؟

- مش معايا الكشكول يااستاذ

- طيب طلع ورقه واكتب الدرس فيها ولما تروح ابقى انقل الدرس فى الكشكول

- هبقى انقله من زميلى

- معلش طلع ورقه وبلاش لماضه يامحمد واكتب الزفت ولا هو انت لازم كل حصه تتلامض معايا؟؟

- يلا طلع ورقه ( بشخط كده )

- حاضر حاضر

وانتهت الحصه وكملت باقى اليوم عادى جدا وروحت

بالليل كان فيه واجب عزاء كده فى قريه جنبنا وكان لازم اخد والدتى تعزى هى ومراتى

فطبيعى يعنى اخدت معايا المسدس (محدش يضمن الظروف والدنيا ليل)

وربنا سترها ورجعنا على بيت ابوياوانا هناك طلعت الحاجه اللى معايا على الترابيزة(بما فيها المسدس)

وبعد كده اخدت مراتى والواد صلاح وروحنا على شقتنا ببص لقيت انى نسيت المسدس فى البيت

قلت مش مهم مافيش داعى انى ارجع اجيبهابقى اخده بكره

وتانى يوم وانا رايح المدرسه ماشى فى امان الله انا وزميلى الاستاذ حسن مدرس اللغة العربية

واذ فجأة الاقى الدنيا خبطت فوق راسى وادوخ ومش عارف فيه ايه

واتعدل ابص ورايا الاقى الاستاذ حسن ماسك الواد محمد بيحوش فيه ويتخانق معاه ومحمد فيه فى ايده شومة خشب (اتاريه كان بيقولى حاضر حاضر )

واحوش ايدى من على دماغى الاقى دم والناس كلها اتلمت حواليا

المهم ربنا سترها واخدت اربع غرز بس

وندمت اشد الندم على انى ماروحتش جبت المسدس بتاعى من البيت واخدته معايا كنت ريحت محمد من الدنيا

بس اهه اللى حصل

بعد كده الحمد لله فصلت محمد فصل نهائى من التربيه والتعليم ( نوهاااائى )

ومعمولاله قضيه ومطلوب ضبطه واحضاره

وربنا يكرمه ويروح الاحداث قريب

**********

المهم ان فيه ناس كتيييييير مغلطانى انا انى قلت له اكتب الدرس

ياترى انا فعلا غلطان ؟؟؟؟

وادى يوم جديد من يوميات مدرس فى الصعيد

ههههههههههههههههههههه

( الله يرحمك ياابويا ماانا قلتلك انا ماانفعش ابقى مدرس ماسمعتش كلامى)

ســــــــــــــــــــــــــــــــــــــــــــلام

هناك 4 تعليقات:

موناليزا يقول...

مسدس!!!
عايز تقتل الولد بمسدس!!!
فى البرد ده رش عليه كوباية مية ساقعة :)
وبعدين حتى لو المسدس كان معاك ماهو خدك على خوانة يعنى كنت هتفوق للدم اللى بينزف منك ولا هتركز على النيشان..
بس شوف ربنا مابيعملش حاجة وحشة وكويس بجد انك نسيت المسدس
وكفاية أوى انه اتفصل وكمان رفعت عليه قضية يعنى مستقبله راح( خد بالك من نفسك بقى إذا كنت لما قلت له اكتب الدرس عمل فيك كده أمال بعد الفصل والقضية هيعمل إيه!!)

----------------

ربنا يحمى صلاح ويبارك لك فيه ماشاء الله زى القمر :)

القلم السكندري يقول...
أزال المؤلف هذا التعليق.
القلم السكندري يقول...

وماشي أعزل :)




السلام عليكم

كما أنت لم تتغير

رعاك الله من كل سوء

المعتصم يقول...

بسم الله الرحمن الرحيم
السلام عليكم ورحمة الله وبركاته
*******
موناليزا
تحياتى ومنورة بلوجر كله
اه مسدس ولو كان معايا ساعتها كنت قتلته فعلا
ماتقلقيش بعد موضوع الفصل والقضيه انا مأمن نفسى تمام
ثم ان اهله عارفين انى مجنون وممكن اقتله فخايفين وبكده تبقى الامور ارتاحت
هههههههههههههههههههههههه
نورتى المدونة بمرورك الجميل
ســـــــــــــــلام
**************
مين اللى حذف التعليق
هه مين مين ؟؟؟؟؟؟؟؟
****************
القلم السكندرى
حبيبى يابشمهندزز
والله العظيم واحشنى
يانائب حلفنا الهمام
شوفت بعد الثورة بقيت هفاء اهه وماشى اعزل من غير حراسات خاصه
هههههههههههههه
نورت المدونة واسعدنى مرورك جدا
********
والسلام عليكم ورحمة الله وبركاته