السبت، 24 أكتوبر 2009

الثــــــــــأر

بسم الله الرحمن الرحيم

السلام عليكم ورحمة الله وبركاته

اولا انا بشكر كل الناس اللى شاركت وقالت رأيها الجميل فى الموضوع اللى فات

وتقريبا كده فيه إجماع على رأى واحد

وإن كان الاسلوب فى سرده مختلف

وكمان بشكر كل اللى دعالى ودعا لأم مالك بالشفاء

......


النهارده بقى عاوز اننا نتكلم عن مشكلة الثـــأر

صحيح هى عندنا فى الصعيد بس

انما ده مايمنعش اننا نتكلم فيها ونقول رأينا فيها كقضيه

يعنى لما واحد يلاقى اخوه (لاقدر الله)او اى حد قريبه مثلا

وفيه واحد تانى قتله

ياترى رد فعله هيكون ايه؟؟؟

ياخد بتاره ولا يسيبه للحكومه هى اللى تتخذ معاه الاجراءات القانونيه؟؟؟

ولما الموضوع يبقى بسبب حاجه اى كلام ومايستاهلش والانسان اللى اتقتل ده هو اللى كان السبب فى المشكله

يبقى اهله يسكتوا ولا ياخدو بتاره

وهل الرأى يكون هو هو نفس الرأى لو كانت الحادثة دى بسبب قضية شرف مثلا ؟؟؟

.......

على فكرة ملحوظه صغيرة

مافيش عندنا فى الصعيد مهما كانت درجة التعليم حد مش بيفكر انه ياخد بتاره

لما بتحصل مشكله

احنا نتكلم كويس وحلو قوى وبكل عقل واحنا بعيد عن المشكله

انما اول ماالواحد تحصل المشكلة معاه هو

يبقى العار والعيب وازى اسيب حقى ودمى

.........

مستنى رأيكم فى الموضوع ده

ســـــــــــــــــــــــــــــــــلام

هناك 41 تعليقًا:

المعتصم يقول...

اخد انا اول تعليق
موضوع التار ده للاسف احنا اتربينا عليه
يعنى حاجه كده مانقدرش نبطلها وبقت فى دمنا
يعنى مهما قلنا وعملنا بيبقى الكلام فى الوسع وبعيد عن المشاكل غير الكلام اللى بيحصل فعلا لما الواحد يقع فى مشكلة
اول ماالواحد يقع فى مشكله وتحصل معاه حاجه لا اراديا كده تلاقى الواحد جاب حتة سلاح وراح طالع مدور على اى حد من الناس اللى كانت معاهم المشكله وراح هوووووب ضاربه بالنار ويحصل اللى يحصل بعد كده
انا عارف انكم كلكم هتقولوا كده غلط وده حرام
وكلنا عارفين كده وبنقوله لبعض
بس ده واحنا بعيد عن المشاكل مش فيها
مش عارف هنبطل الحكاية دى امتى
بس للاسف اللى اعرفه انه مش قريب
لاننا لغاية دلوقتى بنربى اولادنا على كده
اللى يضربك قلم تضربه اتنين
واياك اياك تسيب حقك مهما حصل
وانت وواد عمك على الغريب
وانت واخوك على واد عمك
اللى يبص عليك بصه مش قد كده حط صباعك فى عينه
وغيره وغيره كتير من النصايح اللى تودى فى داهيه
ربنا يصلح الحال ويهدى

موناليزا يقول...

كيفك يافندم؟أخبار صحتك ايه دلؤتى
يارب تكون بخير

اما عن الموضوع المثار قضيته للنقاش
فأنا عن نفسى رغم اقتناعى اننا مش فى غابة مثلا عشان يبقى ده التصرف بس الموضوع عاجبنى
وعشان محدش يستغرب هوضح ايه اللى عاجبنى فيه
عاجبنى انك تاخد حقك بايدك فى وقتها ومن الشخص اللى انت شوفته بعينك انه عمل معاك حاجة وحشة
مش لسه هتستنى بقى تروح تقدم بلاغ وعلى ما البوليس ييجى والخصم يكون جايب محامى يقدر يتلاعب بالقانون وانت تجيب شهود وهو كمان يجيب شهود متفبركين والمحامى يحفظهم الكلام اللى هيقولوه والموضوع ياخد سنين وفى الاخر الحكم ما يبقاش يرضيك لانك عايزه يكون من نفس الجزاء وده أصلاً لو أطبق عليه ومهربش خارج البلاد
وتقعد انت بحسرتك بقى وياريتنى كنت قطعته بايدى بدل بهدلة المحاكم وفى الاخر مخدش حقى

بس برضه مش عاجبنى اننا نعيش فى دايرة مغلقة ونفضل كده على طول والموضوع يتمد لاجيال ملهمش ذنب فى اى حاجة

يعنى اللى ضربنى اضربه وخلاص على كده يبقى الموضوع انتهى وزى مابيقولوا البادى اظلم
مش هو ضربنى مثلا فانا ضربته يقوم جايبلى العيلة يضربونى وانا عيلتى مش هتسكت وهكذا.. يبقى مش هنخلص

هذه وجهة نظرى البسيطة
وعلى جنب بجد انا بحب عوايد الصعايدة وطباعهم مهما تبان مختلفة وغريبة
بحس كده ان بجد لسه فيهم رجالة مازالوا محتفظين بدم الرجل الشرقى الحُر

هذا وكانت معكم موناليزا من مدونة الصعيدى الهمام المعتصم
شكرا والى اللقاء

----
معلش طلبت معايا اتقمص دور المراسلة الصحفية:)

♥نبع الغرام♥♪≈ يقول...

مممممممممممممممم


اخد تالت تعليق بقا

ثم نعواد بععد الفاصل

♥نبع الغرام♥♪≈ يقول...

بصراحه انا مش عارفه اقول ايه بس هو اللى بيحصل بجد فى الافلام والمسلاسلات دا حقيقى

ولو كان بالفعل حقيقى ليه مش يسبه الحكومه تتصرف فيه ماهو عشان واحد يموت والناس التانيه هتاخد اللثأر هيبقا واحد قصاد واحد يبقا كده الدنيا هتولع
مش بعرف الصاعيده دول دماغهم غريب شويتين

الحمد لله انا من المنصورة
واللى بيعمل كده قتل او لا قدر الله
الحكومه هى اللى بتتحمل المسؤلية وبتسيطر على الموقف
معلهش انا مش عارفه اتكلم
بس هتابع رودد الفعل عشان افهم اكتر

مودتى

المعتصم يقول...

موناليزا
اهلا اهلا اختى الكريمه
عاجبنى ردك قوووووووووووى
فعلا هو لو الواحد ياخد حقه فى لحظتها ومن غير مايسيب الامور تتطور يبقى زى الفل
بس للاسف مش بنقدر نسيطر بعد كده على تطور الاوضاع وبتحصل مشاكل كتير خالص
ووجهة نظرك البسيطه دى جميلة جدا
اسعدنى مرورك وتعليقك الجميل
ياحضرة المراسله الصحفيه الكبيرة
نورتى المدونة
تحياتى ودمتِ بكل خير وود

المعتصم يقول...

ايناس هانم اللى زعلانه
اهلا اهلا
بصى الافلام والمسلسلات دى مش واقعيه
لانه عندنا فيه حاجات كتير اغرب من اللى بيحصل فى الافلام والمسلسلات
بس احنا عندنا لما بيبقى فيه حاجه زى كده (قتل يعنى) بيبقى الجانى مدبر الجريمه بإحكام شديد جدا
يعنى مثلا بيبقى مجهز شهود يقولوا انه كان معاهم وقت حدوث الجريمه
او انه يكون فعلا عامل مشكله مفتعله مع حد ويكون فى قسم البوليس ومسلط حد تانى هو اللى ينفذ له جريمته دى والكل يبقى عارف انه هو المحرض
بس طبعا الحكومه لها الادله والقانون مش بيدى الناس حقها وعشان كده بنضطر ناخد حقنا بدراعنا
والا لو معملناش كده الناس تعايرنا ومانعرفش نعيش فى البلد
استنى لما تشوفى باقى التعليقات
ده انتِ هتسمعى كلام درر هيتقال
دا انا هتشتم شتيمه
ههههههههههههههههههههههههههههه
وبعدين مالهم بتوع المنصورة ياستى
دول احسن ناس
دا حتى انا نفسى اتجوز من عندكم
(الاقيش عندك عروسه ليا؟؟ وتكسبى فيا ثواب)
ههههههههههههههه
نورتى المدونة ياايناس
تحياتى ودمتِ بكل خير وود

adel يقول...

ااقولك انا من الاخر

بص ياعمونا
ده عمره ...ربنا اللي كاتب كل واحد هيموت ازاي و امتي
ومدام مات مقتول يبقي قدره

التار ده اي تخلف حتي لو في الشرف
القتل مش بيحل ولا بيرجع اللي راح

وزي ما قلت عند شيما النهاردة
للاسف مش كل اللي اتربينا عليه صح
احنا اضحكنا علينا اصلا

المعتصم يقول...

الواد عادل بتاع الحكومه
منورنى
انا معاك انها اعمار واللى مكتوب له يموت باى طريقه هيموت بيها
بس مش معاك انه تخلف
وخصوصا بقى فى الشرف
يعنى ايه لما واحد مثلا يغتصب اختك والحكومه تحبسه ست شهور وتسيبه
هل ده عدل ؟؟؟؟؟؟
انا ممكن اقول معاك انه تخلف فى اى مشكله تانيه الا الشرف
انا بفتخر اننا كصعايده بناخد حقنا فى الموضوع ده بالذات بدراعنا
واى واحد تسول له نفسه انه يعمل جريمه مخله بالشرف لازم يتقتل وكمان اللى قتله ماياخدش فيه يوم واحد سجن
والله ده رأيى
وكل واحد حر فى رأيه ياعمونا
ولا ايه ؟؟؟
ههههههههههه
نورت المدونة من على سرير المرض يادولا
ســــــــلام

ستيتة يقول...

السلام عليكم
شوف ياريس

لو فيه محكمة عدلة
وربنا يعافينا كلنا من نار فقد حبيب وكمان غدر
وبعدين هذه المحكمة حققت في الأمور بسرعة مش ثلاث سنين
وبعدين القاتل يا يقتل يا يدفع دية ده في حال ان اهل القتيل قبلوا ديةوتنفيذ الحكم يكون حاضره ولي الدم علشان ده حقه

بالله عليك وبذممك كان التار نسبته قلت قد ايه؟

لكن واحد عارف ان حبيبه اللي اتغدر قاتله في يوم ما ها يرجع يمشي قدامه تاني
بعد ما يقضي 15 سنة ويخرج بعد 12
ده غير لو في القضية لعب وشهود زور وبلاوي
يبقى اي كلام بنقوله نظري بحت

عندما نحقق العدل
يأمن الناس

لما راجل يبقى عارف ان دم ابنه قصاده دم القاتل
مش ها يرضى يفقد الأبن التاني في تار
لأنه فعليا ها يثأر لأبنه بس بيد السلطان اللي دي شغلته فعلا

ستيتة يقول...

اه نسيت بقى اقول لو القصة شرف

هل يدخل جهاز الأمن الهمام يلطش الطرفين قلم ويبقى كده برد نارهم
فين العدل
انا شايفة ان القتل اهون اقسم بالله الف مرة من اي شيء يمس الشرف

لو التحرك سريع وينصف المظلوم
كل شيء يقف حتى ولو مع مرور الزمن

تحياتي يا ريس

yoyo يقول...

مسائك سكر

ايه يا مستر دا يعنى
كاتب لبوست وكمان التعليق الاول
ايه الطمع دا يا ناس
ههههههههههههه
يالا ما علينا

ممممممم
التار ولا العار يا قبيسى
ههههههههههههههه
مشكلة موضوع التار دا فعلا مهما كانت درجة التعليم دا عادات و تقاليد اتربينا عليها صعب انها تتغير لانها مع الاسف بتكبر معانا و بنتربى عليها
على ما اسمع ان الام بتربى ابنها على الاخد بتار ابوه وشىء من العيب و قلة النخوة انك تعيش و مش تاخد بتارك وقتها بيكون فى نظرهم موتك ارحم

ههههههههههههههه
ربنا يستر عليك يا مستر

المعتصم يقول...

د/ستيته
منوره المدونة
وبلوجر والمناطق المجاورة
الله عليكى
هو ده الكلام
اوجزتى وانجزتى وشفيتى ووفيتى
((وكل الكلام الكبير اللى بيقولوه))
هههههههههههههههه
معاكى حق مليون فى الميه
انتِ بكده فاهمه القضيه صح
احنا لما نبقى عارفين انه القاتل ده هياخد جزائه الفعلى على جريمته اللى عملها وان الجزاء ده عادل
كده ممكن ظاهرة التار دى تختفى نهائى من بلادنا
انما للاسف مافيش عدل ومافيش اى حق بيرجع لصاحبه غير بدراعه
وهو ده القانون اللى ماشى عندنا

نورتينى واسعدتينى بكلامك اللى كله حكم
تحياتى ودمتِ بكل خير وود

المعتصم يقول...

د/ ستيته
ياباشا موضوع الشرف ده منتهى ومش عاوز نقاش ابدا
وبمناسبة الموضوع ده ياريت تدخلى دلوقتى على اليوم السابع تشوفى بلدنا حاصل فيها ايه
http://www.youm7.com/News.asp?NewsID=149033
وتابعى الموقف
الدنيا هنا مولعه
نورتى ياست الكل

yoyo يقول...

عارف يا مستر الموضوع دا كبير جدا و الله وخطير

الكلام بيكون كتير اوى لكن التنفيذ بيكون عكس كدا

ربنا يستر بقى
ربنا يحفظك بعيد عن التار و الكلام دا
وبعدين فين اونكل مجعاوى مش هيجى يساعدنى بقى ؟!
هههههههه

دمت اخى بالف خير وسعادة
تحياتى
يويو

المعتصم يقول...

مس يويو
تحياتى
ومسائك سكر زياده
مش عارف فعلا انا بقيت طماع اليومين دول ليه؟؟؟
شكلى كده اتعديت من العيال فى المدرسه
هههههههههههههههههههه

التار ولا العار ياهريدى
لان قبيصى طخوه الشهر اللى فات
هههههههههههههه
فعلا هى عادات وتقاليد بنتربى عليها وعلى الرغم من اننا عارفين ان فيها حاجات غلط الا اننا مش بنقدر مانربيش ولادنا عليها
درجة التعليم مش بتفرق خالص
انا اعرف واحد كان واخد اتنين دكتوراه منهم دكتوراه من لندن وكان استاذ جامعى فى جامعة اسيوط ولما اخوه اتقتل اخد بتاره ونسى كل الكلام النظرى اللى كان بيقوله عن التار والتخلف
واعرف كمان واحده ست ربت ابنها على انه ياخد تار ابوه وفعلا اخده بعد اربعين سنه بعد اما اتجوز وخلف وولاده كبروا
هههههههههههههههههههههه
دى قصص كتييييييييير
اه والله ربنا يستر عليا
دا انا غلبان ومسكين وماليش فى النظام ده
ههههههههههههههه
نورتى المدونة يا ايه
شكرا على مرورك

المعتصم يقول...

يويو
عمك نجعاوى مش فاضى شويه اليومين دول
ادخلى على اليوم السابع وانتى تعرفى هو مشغول فى ايه
انما اول مايفضى هبعتهولك على طول
هههههههههههههههههههه
نورتينى
واسعدنى مرورك الجميل ربنا مايحرمنى منك
ســـــــــــــــــلام

عمرو جويلى يقول...

السلام عليكم
حضرة الصعيدى الهمام
شوف ياسيدى قصية الثأر دى قضية
سيئة لما يترتب عليها من أحقاد
وضغائن بين أفراد المجتمع الواحد
وفى بعض الأحيان أفراد العائلة
الواحدة ولكن !!!!!!!
للقضاء على هذه الظاهرة لابد
من وجود قضاء عادل وأيضاً لابد من
سرعة الفصل فى قضايا الثأر بالذات
حتى يهدأ أهل القتيل ويشعروا بأن القانون قد إقتص لهم.
فكيف بشخص يقتل أخى أو أبى مثلاً
ويحكم عليه بالسجن ثلاث سنوات أو خمس
سنوات وبعد إنقضاء فترة العقوبة
أجده أمامى يرتع وبكامل صحته بالطبع
سيجن جنونى ولابد من أنى سأفكر بالأخذ بالثأر مهما تكن العواقب
خالص تقديرى

حفيدة عرابى يقول...

اولا
سلامة حضرتك
ثانيا
انا مش من الصعيد
بس بعترف ربنا مايكتب فكرة التار دى على حد
لكن فيها معانى النخوة والرجولة
هتقولى ده تخلف
انا معاك ومش موافقة عليها ابدا
ومقدرش اتحمل يوم القيامة الدم ده
لكن لو المشكلة دى عندى
اكيد النار هتاكل قلبى
ويمكن احتمال كبير انصاع للموروث الثقافى ربنا يستر

فى فيلم الارهاب والكباب
كان فيه مشهد جميل جدا
بيعبر عن رأى دكتورة ستيتة
لما ماسح الاحذية اعترف ان عليه تار
وان ايد الحكومة كانت سريعة اوى فى الحكم عليه
وبطيئة جدا انها تجيب حقه
ربنا يهدى نفوسنا ويكفينا شرها

الشعب لابد له من حكومه تشكمه يقول...

شوف هو موضوع التار ده لازم نتكلم فيه من نظره صعيديه بحته:) اه متبصليش كده يعنى متقوليش لو حد من قرايبك لقدر الله حصله حاجه حد فى عيلتنا هيشي الفرفر ويروح يموت اللى عمل كده.تؤ تؤ احنا هنستنى القضاء(شوفتنا واحنا مؤدبين)
نيحى باه للصعيد تعرف انى فى مره فكرت فى موضوع التار ده لقيت فى منه فى الدين(من وجهة نظرى طبعا) بمعنى ان زمان الصعيد بيكون فى قاضى عرفى وقعدة عرب وهكذا يعنى مش بيخضعوا للقوانين,واعتقد من هنا جات فكرة تطبيق الايه( ولكم فى القصاص حياه)هم تولوا بنفسهم عمل القصاص لكن المشكله باه فى الاستمرار يعنى انت قتلت مننا واحد اروح انا اموت واحد وبكده نخلص .لااااااااا بتبدأ باه سلسله لاتنتهى وواحد قصاد واحد على مر عشرات السنين.

دايما يقولك ازاى ننهى الموضوع ده انا شايفه ان الموضوع ده عمره مهينتهى لان دى موروثات وعمرها مهتتغير حتى لو عدى مليون سنه الفكره دى زى الشرف فى الصعيد,تقدر تمحى فكرة الشرف؟ لو قدرت, هتمحى فكرة التار.
ومش بقصد بشرف الكلمه بمعناها الحرفى لان الكمله اكبر من كده بكتير.

كيكى عوووووو يقول...

مفيش حاجة اسمها اتربينا عليه!!!!
هو انت عندك حق فى نقطة هتلاقى الى فى البلد اكيد تفكيره مختلف مثلا ع الى عايشين هنا يعنى مثلا لاقدر الله حد عندنا حصلوا حاجة اكيد الحكومة هى الى هتجيب حقنا لان دة الطبيعى بس اظن نادر اوى لو لقيت حد فى البلد لسة بيفكر التفكير العقيم دة!!!! احنا مش عايشين فى غابه يعنى!!!
نيجئ للاهم بتقول لو موضوع شرف دى بقى الناس كلها متجمعين فى التفكير دة ولاتقولى بلد ولامش بلد!!
للاسف تفكيرهم تصحيح غلط بغلط اكبر بقتل روح ياااااااااااااه دى كبيرة اوى ياجماعه!!!
بصراحه انا الموضوع دة مش شايفلوا غير حل واحد ان الواد يتجاب من قفا امه ويتجوزها بالبوليس اى حاجة المهم الموضوع يتحل بالعقل

موناليزا يقول...

لا تبيتن إلا وأنت خالى البال
ما بين طرفة عين وانتباهتها يغيرها الله من حال إلى حال

ونظراً لاقتناعكم بقدراتنا الخارقة على مهنة الصحافة وأمانة النشر:)
ونظراً لأن الموضوع أبسط من أن سيادتك تضايق(وماتعملش حاجة وتندم عليها طالما مقتنع بيها)
قررنا نحن موناليزا وانا فى قامل قواى العقلية أن نقدم لسيادتكم
شاى صعيدى فاخر

المعتصم يقول...

بسم الله الرحمن الرحيم
السلام عليكم ورحمة الله وبركاته
*********
اللؤلؤة
وعليكم السلام ورحمة الله وبركاته
صديقى العزيز المنوفى التمام
تحياتى واحتراماتى
معاك انها مش بتخلص وبتعمل حاجات كتيييير على مر السنين
بس انت قلت انه علشان نحل المشكله دى لابد من قضاء عادل
طيب عادل مش راضى نعمل ايه ؟؟؟
مافيش اختلاف انه لو وجد العدل لانتهت المشكله من جذورها
قلة العدل هى اساس المشكله يعنى لما واحد يشوف اللى قتل والده حر طليق هيبقى ايه شعوره؟؟
طبيعى نعذره لما ياخد حقه بايده
نورتنى بمرورك الجميل يااستاذنا
**********
لقد خلقنا الله احرارا
تحياتى والله يسلمك وميرسى على مجاملتك الرقيقه
وانا عارف انك مش من الصعيد انتِ بلديات خالى عرابى
هههههههههههههه
انا مش هقول انها تخلف
هو انتِ مااخدتيش بالك من كلامى انا من الناس اللى ممكن تاخد تارها لو حصل عندها مشكله لان ده حق ومش ممكن نسيب حقنا الا لو احنا مش رجاله
بس هى عاده سيئه نتجت من احساسنا بقلة العدل والظلم اللى بيقع على الناس فمن هنا نتج ان الناس بتاخد حقها بايديها
الجمله اللى اتقالت فى الفيلم صح مليون فى الميه
لان الشرطه مش بتعمل حاجه للقاتل لانه بيكون عامل حسابه ومستعد للموقف ده كويس بشهود الزور بقى وغيره
اما اهل القتيل فالشرطه علشان عارفه انهم عاوزين حقهم بتيجى عليهم بالقوى وتطلب منهم طلبات نقدر نقول عليها انها عبيطه
معاكى حق ربنا يهدى نفوسنا ويكفينا شرها
اللهم امين
نورتى المدونة بمرورك الجميل
***********
الشعب لابد له من حكومه تظبطه
اهلا اهلا ياشيما
حلاوتكم وانتو مؤدبين
هو انا عاوز اناسبكم من شويه
ههههههههههههههههههه
ابقوا استنوا انتو القضاء ويدينا ويديكم طولة العمر
انا مارضيتش اكتب اى ايه قرآنيه فى البوست علشان ماادخلش فى حوار دينى وممكن الكلام يتفهم غلط فقلت ابعد عن النقطه دى
انما احنا مؤمنين بده كويس
وحكاية القاضى العرفى دى راحت من زمان على فكرة مش موجوده دلوقتى الا فى البلاد النآيه
السلسله لما بتبتى مش بتنتهى ابدا ده صحيح ومافيش اى محاولات صلح بتشفع او تنفع انما هنعمل ايه مانقدرش نسيب حقنا
وهى فعلا الحكاية دى بقت مرتبطه بالشرف من ناحية ما
نورتينى بتعليقك الجميل ده
***********
كيكى عوووووو
منورة المدونة
فيه اتربينا عليه لان ده اللى بيحصل فعلا
واللى هيتغطى بالحكومه هيبات عريان لانها مش بتجيب لا حق ولا باطل
موضوع الشرف بالذات بقى ماينفعش فيه الا كده ومالوش اى حل تانى غير الموت
وعلى فكرة الموت بيبقى للاتنين الولد والبنت
طب ممكن سؤال:لو الولد اللى غلط مع البنت مسيحى نجوزهاله ازاى؟؟؟ ونصلح شرفها ونحل المسأله ازاى؟؟
حليها ياكيكى وانا مستنى ردك
اسعدنى مرورك
************
موناليزا
افهم من كده انى ماازعلش على اللى حصل؟؟؟
ماشى ولوانى مش قادر
بس اناهحاول لانه اللى حصل حصل وخلصنا
ماتنفعيش صعيديه على فكرة
هو ممكن تنفعى فكريا انما مش كلاميا هههههههههههههههههههههه
والدليل الشاى بتاعك
اولا فى فنجان والصعايده كيفهم فى الكوبايه
ثانيا خفيف والصعايده بيشربوه حبر بعيد عنك
هههههههههههههههههههه
عموما انا بشكرك جدا
وبجد اسعدنى مرورك
**********
والسلام عليكم ورحمة الله وبركاته

mohamed ghalia يقول...

مواضيعك كترت ياعمنا
بص انت معاك حق الواحد بره المشكلة رد فعلة بيختلف كتير وهو جواها
يعنى هقعد اقولك نسامح ونسيب القضاء العادل والكلام الكبير ده بس لو انا فعلا فيها موعدكش انى هقدر افكر بكل العقل ده
ربنا يكرمك ياصاحبى

mimi يقول...

التار مش في الصعيد وبس

ده في كل حد فينا

لو حد جرحني أكيد هفكر في الانتقام

سواء انا قدرت وعفوت

وسواء مقدرتش انتقم

أو خليت حد يقدر ياخدلي بتاري

التار موجود

والانتقام موجود

الموضوع مش قبلي وبحري

ولا شرق وغرب

دي طبيعة انسانية ...

بوست حلو اوي ... وفكرته عجبتني زي التاني بالظبط

تسلم أفكارك

سلامي الي والدك ... عامل ايه دلوقتي؟؟؟

مسدس صغير يقول...

التار ولا العار يا ردالة
لازم تموتى يا سوسو

فعلا انا معاك
طول ما الواحد بعيد عن المشكلة بيتكلم كلام حلو اوى
ساعة مبتحصل مبيفتكرش الكلام اللى كان بيقوله.
بس بردة لازم الدين هوه اللى يحكم افعالنا
والدين بيقول ان اللى بيقوم بالقصاص هم ولاة الامور
ومينفعش ابدا ان انا اخد قصاص من اى حد مهما كانت الاسباب
يلا ربنا يهديكو يا صعايدة
هههههههه
اشكرك على البوست الرائع
بس انا بقى اللى هاخد تارى منك
مالك انت ومال المسدسات؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
انا شايف صورة مسدس
طب مش ده يعتبر اعتداء على حق الغير؟؟
هتشوف
طووووووووووووووووخ
طوووووووووووخ
طووووووووخ
ههههههههه
سلاموز

Ahmed يقول...

انت ايه حكايتك ياعمنا
هتفضل تخوفنا كده وتربيلنا الرعب
برضه لما نحب نختلف معاك هنختلف ومش هنخاف من الثأر

بص ياجميل
مهما كان الموضوع تربيه وانه بيجري في دم الناس, لكن ممكن نغيره

هقولك مثال
لو جينا في أوائل الستينات واتكلمنا عن تنظيم الأسره, الناس هتضحك عليك وهيقولولك مستحسل ده يحصل
النهارده وبعد عقود فيه ناس كتير مقتنعه بضروره التنظيم

نفس الشئ
الموضوع ممكن يكون محتاج عقود تانيه عشان نربي أجيال بيؤمنوا بضرورة مواجهة الثأر وعدم الايمان به

المجاهد الصغير يقول...

السلام عليكم
لاءه طبعا مش معنى حد قتل حد من اهلى مثلا اروح اقتله والحكومه بئه تبقى لزمتها ايه سبوها تشتغل شويه اولا حرام ثانيا مش هستفاد حاجه بالعكس خسرت دنيتى واخرتى ودنيتى
اللهم اهدى المسلمين
وفقك الله لما يحبه ويرضاه

أخبار المدونات يقول...

مش عارف في جدول تحت الأضواء تابع معنا مدونتك علي

تحت الأضواء أخبار المدونين

ليس فقيرا من يحب يقول...

السلام عليكم

ازيك يا استاذ مصطفى

بص طبعا موضوع التار ولا العار ده
القصاص مشروع وكل حاجه بس واحد قصاد واحد وخلاص مش تبقى حلوانه فى سلوانه والعيلتين يخلصوا على بعض بس المفروض يعنى الموضوع يتعرض على اولى الامر

وبعدين يعنى ايه اتربينا عليها لو حاجه غلط المفروض بعد الواحد ما اتعلم وعرف الصح من الغلط يحاول قدر الامكان يغير نفسه لو كل واحد بدأ بنفسه مسير يجى يوم من الايام والوضع يتغير


ملحوظه

استاذ مصطفى انا خلاللللللااااااص
عرفت طريقك وهاديبك ياولد وهاقتلك
هربانلى فى المداونه بس على ميييييييييين انا دانا وهدان ولد ابو اسماعين والاجر على الله
نيهاااااااااااااااهاااااااااااااااى

ههههههههههههههههههههههههه

اقعد بالعافيه وهاديبك يعنى هاجيبك

هههههههههههههههههههههههههه

المعتصم يقول...

بسم الله الرحمن الرحيم
السلام عليكم ورحمة الله وبركاته
********
محمد غاليه
تحياتى
خلاص يامحمد ماتزعلش مش هنزل مواضيع لاخر الشهر
ههههههههههه
اهو انت برأيك ده جبت من الاخر وزى الفل
ربنا يخليك يامحمد يارب
نورت المدونة
************
ميمى شقاوة
انا شاكك فيكى من الاول ان فيكى عرق صعيدى
وحلوة كلمة الانتقام دى
ههههههههههههههه
معاكى حق طبعا لان الانتقام ده طبيعه موجوده ومش مرتبطه بمكان انما يمكن اكتر بتبان عندنا لاننا بننفذ على طول ومش بنستنى
ابويا زى الفل وعاوزين نجوزه ماعندكيش عروسه له؟؟؟
ههههههههههههههههه
اسعدنى مرورك ياميمى
***********
ابوصلاح حبيبى
التار ولا العار ممكن
انما سوسو تموت لأ
احنا مش بنموت الحريم ياعم متطلعش علينا سمعه بطاله احسن الناس تخاف مننا ولا حاجه
هههههههههههههههه
ولاة الامر مش بيعملوا حاجه ياعم المحامى
احنا بننفذ اللى المفروض ديننا بيقوله بس بايدينا
انت محامى وعارف كويس انه فيه مليون طريقه ممكن القاتل يفلت بيها من السجن والاعدام
فهل ده ينفع؟؟ هل ده يرضى ربنا؟؟
ربنا يهدى الجميع ياصاصا

بس انت لو رجعت للحقيقه هتلاقى نفسك انت اللى غلطان
قولى ليه ؟
اقولك
الاصل فى المسدسات والبنادق انها عندنا احنا(اومال هناخد التار بايه؟؟)
يعنى سيادتك تعديت على حاجتنا لما سميت المدونة مسدس وكمان من غير ماتستأذن من اى صعيدى
يعنى كده من الاخر تخاف على نفسك ياابنى
هههههههههههه
اه نسيت اقولك انا حطيت صورة المسدس حفاظا على مشاعير ومحاسيس الناس اللى بتزور المدونة انما احنا مش بنستخدمه الا فى الافراح وبس الحاجات التانيه ليها حاجات تانيه(فاهمنى طبعا)
ههههههههههههههههههههههههههه
نورتنى يابوصلاح
************

المعتصم يقول...

احمد افندى ابوالعلا
ايه ياسيدى
مش انت اللى عاوز تعمل انقلابات من ورايا يبقى استحمل بقى وشوف اللى هيجرالك وخلى صميده ينفعك
ههههههههههههه
على فكرة احنا معظمنا من اعداء فكرة تنظيم الاسرة او تحديد النسل
ياعم هو حد لاقى عيال دى عزوة اومال التار مين اللى هياخدو ؟؟؟
ونتخانق بمين احنا ؟؟
مش لازم الواحد يخلف له عشرة اتناشر عيل كده يقفوا فى ظهره
هههههههههههههههههههه
بضرو ارجع واقولك اننا تربينا على كده ومهما كان التعليم عالى مش بيغير حاجه من الموروثات بتاعتنا
التغيير صعب
واللى بيحاول انه ماياخدش بتاره يبقى بيسيب البلد ويروح يعيش بعيد عنها وبرضو الناس مش بتسيبه فى حاله
وبعدين فى احيان كتيرة بيكون حق ولازم ناخده وماينفعش اننا نسيبه
نورتنى ياهندزه
***********
المجاهد الصغير
وعليكم السلام ورحمة الله وبركاته
ازيك ياام انس
ههههههههههههههههه
انتِ اصلك ماتعرفيش اللى بيحصل هنا
لو سيبنا الموضوع للحكومه يبقى مش هناخد حقنا لحد مانموت والقاتل هيطمع ويفضل كده ومحدش يعرف يلمه ويموت تانى وتالت ورابع
لان الحكومه مش بتعمل اى حاجه
اخرها من سبعه لعشر سنين سجن بالكتير
شكرا على مرورك ودعواتك الجميلة
نورتينى
************
اخبار المدونات
شكرا على اهتمامكم
************
رانيا بنت ابواسماعين
وعليكم السلام ورحمة الله وبركاته
الله يسلمك انا تمام والحمد لله
القصاص مشروع وهو ده التار اللى انا بتكلم عليه انما للاسف العيلة اللى بيتاخد منها القصاص مش بتسكت وتموت حد تانى فترجع العيلة التانيه تاخد حقها وهكذا دواليك
مين قال انه حاجه غلط؟؟؟ اننا ناخد حقنا مش غلط
لان الشرطه والحكومه مش بتقدر حتى تنفذ القانون صح
القاتل ممكن بعد ماينفذ جريمته باربع ايام بس يبقى حر طليق فى الشوارع
وعشان كده احنا مش بنسيب حقنا وهو ده اللى حاكم الدنيا هنا ومش مخليها سايبه وفوضى

وشوفى بقى انا مابيهمنيش لا ولاد ابواسماعين ولا ولاد ابوابراهيم
انا عامل حسابى ومجهز السلاح والفرفر ومستنيكى وابقى ورينى هتهوبى ناحية هنا ازاى عااااااد
ههههههههههههههههه
نورتى يارانيا
تحياتى ودمتِ بكل خير وود
والسلام عليكم ورحمة الله وبركاته

موناليزا يقول...

طبعاً فرحانة:)

غير معرف يقول...
أزال المؤلف هذا التعليق.
غير معرف يقول...

السلام عليكم و رحمة الله و بركاته
أزي حضرتك يا استاذ / مصطفى
( و لكم في القصاص حياة يا أُولي الألباب )
( من قتل نفس بغير ذنب أو إفسادٍ في الأرض فكأنما قتل الناس جميعا )
الموضوع محسوم فالنفس بالنفس
خاصة في دولة ـ إن صح التعبير ـ غاب فيها كل شيء و نظام شرع لمبدأ ما حك جلدك مثل ظفرك .
و لكن سؤالي إذا كنت أنا سآخذ بثأري ممن قتل عزيز علي ، فمن سيأخذ ثأر وطن قتله مجموعة من المفسدين ؟؟

تحياتي و تقبل مروري

غير معرف يقول...

انا اخد بتاري لو الحكومه ما اخدتوش

السلام عليكم اولا .... بس الموضوع شائك علشان احنا صعايده

بس هو ده رأيي :).... لو القاتل واصل وقدر يفلت هتبقا تار تار مفيش كلام

تحياتي

طوبه فضه وطوبه دهب يقول...

لازم كل انسان متعلم يسيب القانون ياخد مجراه ويبقى واثق ان لو ما خدهوش القانون ربنا ما بيسبهوه وقانونه من قتل يقتل ولو بعد عين ايه ذنب انسان برىء لا يعرف حاجه ولا اشترك فى التار اصلا يتاخد منه التار وكل ذنبه ان ابن اللى قتل او اخوه او اصغر راجل فى العيله لو كل واحد هياخد حقه بايده يبقى هنعيش فى فوضى وغابه وربنا حرم قتل النفس ايا كان السبب هو المنتقم الجبار والعدل والقصاص دا بتاعه هو

د/عرفه يقول...

السلام عليكم

ايه يا عم المواضيع الكبيرة دى كل مرة كده موضوع مثير للجدل

بصراحة موضوع محتاج بوست بحاله مش مجرد تعليق

بس اين كان الموضوع مرتبط بالتقاليد وخلافه
لكن لا يصح ابدا ان الواحد ينصب من نفسه خليفة ويحكم هو على الناس
انعدام النظام والقضاء فى اى مجتمع شىء يدعو للفوضى والفتنة للمجتمع وهذا اكبر ضرر على اى مجتمع
موضوع الثار ربما يدور فى حلقة مفرغة تخطف شباب عائلتين بحالهم
الموضوع مثير للشفقة فعلا
ومحتاج حلول موضوعية من اهالى الصعيد
انعدام الشخصية القيادية المحبوبة فى القرية او المدينة او فى المجتمع برضه سبب فى تأخير حل المشكلة

وربنا يصلح الحال
ودعواتك

د/عرفه يقول...

السلام عليكم

ايه يا عم المواضيع الكبيرة دى كل مرة كده موضوع مثير للجدل

بصراحة موضوع محتاج بوست بحاله مش مجرد تعليق

بس اين كان الموضوع مرتبط بالتقاليد وخلافه
لكن لا يصح ابدا ان الواحد ينصب من نفسه خليفة ويحكم هو على الناس
انعدام النظام والقضاء فى اى مجتمع شىء يدعو للفوضى والفتنة للمجتمع وهذا اكبر ضرر على اى مجتمع
موضوع الثار ربما يدور فى حلقة مفرغة تخطف شباب عائلتين بحالهم
الموضوع مثير للشفقة فعلا
ومحتاج حلول موضوعية من اهالى الصعيد
انعدام الشخصية القيادية المحبوبة فى القرية او المدينة او فى المجتمع برضه سبب فى تأخير حل المشكلة

وربنا يصلح الحال
ودعواتك

د/عرفه يقول...

السلام عليكم

ايه يا عم المواضيع الكبيرة دى كل مرة كده موضوع مثير للجدل

بصراحة موضوع محتاج بوست بحاله مش مجرد تعليق

بس اين كان الموضوع مرتبط بالتقاليد وخلافه
لكن لا يصح ابدا ان الواحد ينصب من نفسه خليفة ويحكم هو على الناس
انعدام النظام والقضاء فى اى مجتمع شىء يدعو للفوضى والفتنة للمجتمع وهذا اكبر ضرر على اى مجتمع
موضوع الثار ربما يدور فى حلقة مفرغة تخطف شباب عائلتين بحالهم
الموضوع مثير للشفقة فعلا
ومحتاج حلول موضوعية من اهالى الصعيد
انعدام الشخصية القيادية المحبوبة فى القرية او المدينة او فى المجتمع برضه سبب فى تأخير حل المشكلة

وربنا يصلح الحال
ودعواتك

العلم نور يقول...

في الحقيقة هذا الموضوع اعتقد أنه نشا بسبب الإعلام والأفلام السينمائية التي كنا نراها خاصة في أفلام السبعينات والثمانينات.

وهي لا تعكس الواقع الفعلي وإن وجدت فهي حالات خاصة وليست كما صورتها السينما في تلك الفترة

المعتصم يقول...

بسم الله الرحمن الرحيم
السلام عليكم ورحمة الله وبركاته
************
موناليزا
منصورية الجنسية
صعيدية التفكير
خدى بالك كويس من نفسك
بس خلاص
ههههههههههههههههه
*************
حذفتى التعليق ليه؟؟؟؟
************
ســارهـ
وعليكم السلام ورحمة الله وبركاته
اهلا اهلا
ومبروك الحساب بتاع البشمهندز جوجل
ههههههههههههه
ربنا يخليكى انا بخير ويارب تكونى انتِ كمان بكل خير
هو ده الكلام ورأيك عاجبنى جدا بصراحه
واجابة سؤالك صعبه اكيد
هنا عندنا اللى مش بياخد تاره بيقولوا عنه انه مش راجل
يعنى الوطن دلوقتى مافيهوش رجاله
فيه اشباه رجاله
شوفى الناس اللى حاربت وشوفى النظرة اللى كانت فى عيونهم وقارنى بينها وبين اى نظرة ممكن تشوفيها فى عيون حد دلوقتى وانتِ هتعرفى الفرق
الفرق بين الناس اللى حاربت وثارت علشان تاخد بتارها والناس اللى رضيت بالذل والهوان من ناس المفروض انهم يتاخد منهم التار قبل غيرهم لانهم المفروض هما اللى بيحموا مصالح الناس وبدل كده اكلوا حقوقهم وخربوا بلدهم
لو هنتكلم فى الموضوع ده الكلام هيطول بس للاسف هيفضل كلام
مجرد كلام
اسعدنى مرورك الجميل
تقبلى تحياتى ودمتِ بكل خير وود
*************
فتاة من الصعيد
وعليكم السلام ورحمة الله وبركاته
هههههههههههههههههههههه
فظيعه يامروة
طب ماانتِ عارفه اللى فيها
وعارفه كويس انه اللى بينوى يقتل حد بيبقى مظبوط الشهود وحجة الغياب وطالع منها طالع بالتلاته
ماتلفيش حولين الموضوع
هههههههههههههههه
نورتى المدونة
تحياتى
***************
طوبة فضه وطوبه دهب
اهلا يادكتورة
لو اخدتى بالك انا قلت انه التعليم مالوش دخل فى الحكاية دى
وبعدين هو لو القانون بياخد فعلا القصاص من القاتل مكنش يبقى فيه تار الا فيما ندر
انما للاسف القانون بقى حاجه بتحمى القاتل وتظلم المقتول واهله
احنا ادرى بالموضوع ده من غيرنا
ومهما قلتِ (معلش يعنى سامحينى) ده كلام من بعيد انما لو عايشه معانا هنا وشايفه اللى احنا بنشوفه كان رأيك هيتغير
اما موضوع انه بقى القاتل هو اللى يتقتل مش حد غيره ممكن يكون معاكِ حق فيها
بس هو التفكير بيبقى الانتقام الشنيع يعنى انا ممكن اقتل ابنه عشان اخليه يندم على عملته مليون مرة فى اليوم لانها كانت السبب فى حرمانه منه
يعنى بقتله معنويا قبل جسديا
هى صحيح حاجه مش كويسه بس للاسف ده اللى بيحصل
نورتينى يادكتورة واسعدنى رأيك
تحياتى
****************
د/عرفه
وعليكم السلام ورحمة الله وبركاته
منور يامحمد
لما الواحد يلاقى حقه بيضيع والقانون هو اللى بيحمى الشخص اللى قتل والده او ابنه او اخوه
تخيل احساسه بيكون ازاى
اعتقد انه فى الحاله دى من حقه ينصب نفسه قاضى وجلاد يصدر الاحكام وينفذها بالطريقه اللى ترضيه
انا قلت ان الكلام من بعيد غير لما الواحد يبقى عايش فى قلب المشكله
معلش يامحمد انت بتتكلم من منظور العقل وانه لازم نلتزم بالقانون وشايف ان القانون بيرجع الحق لاصحابه
بس عن تجربه الكلام بتاع العقل والمفروض وكده مش بيحصل
وصدقنى لو انت عايش فى اللى احنا عايشين فيه هنا كان رأيك اتغير 180درجه
اما حكاية الشخصيه القياديه المحبوبه فدى موجوده
بس تبص تلاقى الراجل بينصح ويصلح بين العائلات وداير ياعينى يتحايل على ده شويه وده شويه ويقنع فى ده شويه وده شويتين
واول هو شخصيا ماتحصل معاه حاجه تبص تلاقى كل الكلام اللى كان بيقوله نزل على مافيش ولا كأنه سمعه قبل كده
متهيألى مافيش حلول موضوعيه ممكن تنفع معانا احنا خلاص اتكيفنا على كده ومش هنقدر نبطل
ربنا يصلح الاحوال يارب
ويارب يامحمد يكرمك وينجحك ويحققلك كل اللى بتتمناه
اسعدنى مرورك يادكتره
************
الشجرة الام
اولا تحياتى واهلا بحضرتك فى اول مرور بمدونتى المتواضعه
ثانيا حضرتك تقريبا مش مركزة فى الموضوع كويس على مايبدو انا بتكلم عن عاده فى الصعيد موجوده من سنين كتير جدا ومش قادين نبطلها من قبل ماتطلع السينما والافلام وكل ده
يعنى الراجل اللى اخد تار ابوه بعد ماابوه اتقتل بااربعين سنه متهيألى ماشفش تليفزيون اصلا
وعلى فكرة الواقع عندنا كتير جدا بيبقى اغرب من الخيال اللى فى الافلام
اسعدتنى زيارتك ويارب ماتكونش اخر زيارة
تحياتى ودمتِ بكل خير وود
والسلام عليكم ورحمة الله وبركاته