الجمعة، 16 أكتوبر 2009

موضوع للنقاش

بسم الله الرحمن الرحيم

السلام عليكم ورحمة الله وبركاته

اولا انا بعتذر عن تقصيرى معاكم فى الكام يوم اللى فاتو

بس ده كان لظروف كده

وكمان البشمهندس بتاع العظام قالى مااقعدش كتير قدام الكمبيوتر

علشان الفقرات بتاعة الرقبه جالى فيها واوا

هههههههههههههههه

يعنى سماح (وكمان اخواتها شيماء وصفاء واسماء)

.............


نيجى بقى للموضوع اللى عاوز نتكلم فيه

وهـــــــــــــــــــو

هل ينفع ان الانسان يحكم على نفسه انه احسن من حد تانى ؟؟

بمعنى:

هل ممكن انى انا احكم على نفسى انى احسن من فلان ده

انا ممكن اكون شايف انه الشخص ده مقصر فى حاجات كتير

وانا شايف نفسى والحمد لله مش مقصر

فهل معنى كده انى ممكن اقول على نفسى انى احسن منه ؟؟

طبعا الحكم فى الحاله دى هيبقى على الظاهر بس

لاننا لنا الظاهر والله - سبحانه وتعالى - هو العالم بالسرائر

وكمان رسولنا الكريم - عليه الصلاة والسلام - قال
((اذا رأيتم الرجل يعتاد المساجد فاشهدوا له بالايمان))

يعنى مجرد رؤيتنا له بيروح المسجد نقول عليه رجل مؤمن

واحنا مش عارفين هو فعلا كده ولا لأ

يبقى ايه رأيكم بقى

ينفع انى احكم على نفسى مثلا بأنى احسن من حد انا شايف انه مش كويس؟؟

انا مش هرد على التعليقات هنا على انى صاحب المدونة

انما هشترك فى النقاش زى اى حد فيكم
..............
على الهامش كده
ماننساش كلنا ندعى لأم مالك
ان ربنا يشفيها ويعافيها ويحفظ لها نور عنيها
وياريت بجد نخلص فى الدعاء

ســـــــــــــــــــــلام

هناك 34 تعليقًا:

غير معرف يقول...

اولا الف سلامه لام مالك .... وربنا يشفيها يا رب

ثانيا احنا نحسن الظن بالناس .... هو معنى الحديث

يعني مالناش دعوه بالباطن او انه وحش


في ناس كتير قابلتهم موش كنت متخيله انهم كويسين كده .... واكتشفت انهم افضل مني كتيـــــــــــر .... رغم ان يمكن الظاهر للناس يوهم بعكس كده

تحياتي

غير معرف يقول...

اووووول تعليق

جميييييل

ناخد التاني واروح اصلي العشا :)

mimi يقول...

موضوع مهم يا مصطفي وشيق كمان
والحلو إننا هنتشارك الأراء

أنا من وجهة نظري .. مش ينفع إنسان يحكم علي نفسه بإنه أحسن من حد تاني

لأن التقوي هيا الفيصل ...

بس ممكن الإنسان يقيّم نفسه ويعرف اتجاهاته ... لكن الحكم علي الأخرين .. لأ مش هيعرف ... لأن الله وحده أعلم

وممكن الحد اللي انا شايفاه مش كويس يكون أحسن مني بس أنا اللي عارفة


(أم مالك مالها يا مصطفي ... معرفش عنها حاجة!!)

موناليزا يقول...

اولا: لا بأس طهور ان شاء الله والمهم تسمع كلام الباشمهندس على اعتبار انه خريج طب أسنان:)
ثانيا: ربنا يشفى الغالية أم مالك ويحفظ لها نور عينيها ويبعد عنها اى مكروه اللهم امين

ثالثا: ردا على الموضوع وباختصار شديد يحضرنى هذا المثل
"تعرف فلان آه عاشرته لأ يبقى ماتعرفوش"

واللى عايز يحكم على نفسه بجد يعرف آراء من حوله فيه فى غيابه

الشعب لابد له من حكومه تشكمه يقول...

اولا:سلامتك وبما ان اخويا حصله كده لان شغله كده قاعد على مكتب وفتره طويله:(
ففعلا الدكتور قال مش لازم يقعد كتير كده فانت كمان تسمع الكلام لان وجعها وحش.وسلامتك مره تانيه وربنا يعافيك انت وام مالك يارب وكل مريض.

ثانيا:
امممممممممم شوف انا مش من النوع انى بحكم على حد من المظهر ومحبش كده برضه بمعنى فى فتره من حياتى فى الجامعه كنا مش محجبين وبنلبس والكلام ده,بس كنا كلنا جروب كبير وكان اول اذان الضهر ميأذن واحنا فى الكليه كنا نروح مسجد الكليه ونلبس الاسدال ونقف نصلى,.الحمد لله ربنا انعم علينا كلنا بالحجاب وكمان فى مننا انتقب كمان.بس اقولك كنا كمظهر بنات روشين اه لكن افعالنا تجبر اى حد على احترامنا.

بس علشان اكون صادقه فى كلامى ومش بقول كلام كده اه انا فى اوقات بقول لنفسى انا افضل من دى ومينفعش اتقارن بيها ومتقوليش مظهر ومش مظهر لانها مش بتقتصر على مظهر وبس ولكن افعالها كمان,لما الاقى واحده او واحد بتعمل كل حاجه ومفيش عندها خطوط حمرا,دى مش عاوزنى احكم عليها؟؟؟؟؟؟؟؟
اومال انا بناء على ايه بختار اصحابى,لما الاقى واحده كل تصرفاتها غلط تقولى متحكميش عليها؟لا اطبعا احكم لانها هى اللى اجبرتنا على كده.

Ahmed يقول...

هوا ممكن انك تحكم على شخض من الظاهر
لكن موضوع مقارنه الشخص ده بنفسي او بأي حد هتكون صعبه اوي
لان المقارنه بتطلب معرفه بكل جوانب طرفي المقارنه وده مش موجود في الحاله ديه

يعني الحكم بشكل فردي ممكن لكن المفارنه صعبه

ريمان يقول...

سلاامتك الف سلامه


سلامه رقبتك



بص هقولك رايى


من رايى ان مينفعش حد يقول على نفسه ان احسن من فلان


لانه ميعرفش ايه اللى جوه فلان ده او مكانته الحقيقيه عند ربنا ايه


كذلك برضه مش يكون واحد بيصلى وكويس وعلاقته ميه ميه مع ربنا يبص لواحد بيعمل ذنوب ويقوله انا احسن منك


مين عرفه انه فعلا احسن منه؟

ممكن العاصى ده او اللى بيعمل ذنوب يموت موته احسن من العابد


لان بجد العبره هنا بالخواتيم


فانا ضد الفكره دى خالص ان واحد يقول فى نفسه انا احسن من فلان



تحياتى ليك ولصاصا الصغنن وبوسهولى كمان بالغيظه بالبت اللى خطباه غصب عنه ده

فاتيما يقول...

و الله يا مصطفى إنت بتسأل سؤال
حيوى جدا قعدت عمر اسأله
و صعب الاجابة عليه الأيام دى بالذات
بسبب الزيف اللى بقى مالى الناس
و مغمى الحقيقة عن العيون
كنت زمان بحكم بالشكل و التصرفات
و بعدين كبرت شوية فمبقتش احكم بالشكل و احكم على التصرفات
دلوقتى بقى
مبقتش احكم بالشكل خالص و لا التصرفات كلها
و بقيت احكم بنصها بس
ليه ؟
لأن اللى قصادى مهما كان قريب منى
مش هيعمل كل حاجة بحق و حقيقى دون رتوش
و اكيد عنده حاجات يخبيها عنى ...
زمان كنت انصدم قوى فى الناس خصوصا الكبار اللى هما المثل العليا
دلوقتى مبقاش فيه شىء يصدمنى
لأنى انا كمان ممكن اصدم اللى قصادى
منا مش ملاك و مفيش ف الكون ملائكة و لا حد كويس علطول و لا كامل الاوصاف
يبقى الحل إيه عشان مطولش عليك
مبقتش اطلق احكام على اللى قصادى
أى كان و التمسله اعذار لو اتصرف بشكل فج أو يبدو مغاير للعادات
و التقاليد أو حتى الدين
بحسب حساب إن اكيد فيه مبررات لتصرفاته و هيا اللى دفعته لذلك
و انا أيش اكون عشان احكم عليه بأنه وحش و انى انا احسن منه
طب ما يمكن انا احسن
لأنى متحططش تحت ضغط يخلينى اعمل زيه ؟؟
يبقى اعمل حساب قدام إنى ممكن اكون مكانه فى يوم من الأيام
و ساعتها هاطالبه إنه ميحكمش عليا
و يا حبذا يا مصطفى لو إن كل واحد يخليه فى روحه و لا يقارن نفسه بالناس عشان يريحهم و يرتاح هو كمان
معلش اخر بوست عندى عكننك
السماح يا زعيم الأبر إيجيبت

ستيتة يقول...

شفاك الله وعافاك اسأل الله العظيم رب العرش العظيم ان يشفيك

ام مالك معها قلوبنا قبل دعواتنا ويعلم ربي اني احبها فيه وربنا يحفظ عليها كل صحة وعافية

انت عاوز اللي مفروض والا اللي حاصل
وايه معنى اننا كلنا نقول كلام كبير قوي واحنا مش بنعمله؟

هل شفت حد ملتزم مظهريا ويعاملك بتعالي على انه لله اقرب؟
انا شفت كتير جدا
ومنهم عيال مش عارفين قفاهم من كعب رجليهم
كتيييييييييييييييييييييييييير


هل شفت حد كان لسه امبارح زفت طين ومع مصيبة اصابته قرر يتقرب لله فأول شيء عمله مش العلم ولكن اتخاذ مظاهر الورع والتقوى؟

هل فعلا فيه كتير حاسين انهم مش افضل من حد بل هم اقل من كل الناس؟

ياعزيز لو ظن اغلبنا أنهم ليسوا الأفضل علما او دينا او خلقا لسعى هذا المعظم ليكون احسن ولتحسنت اخلاقنا ومعاملتنا
لأننا ببساطة شايفين التانين احسن منا

لما بتمشي في الشارع بتحس بإيه ناحية الأخلاق والمعاملات؟
هو ده احنا من غير فلسفة

فهمت حاجة؟
تحياتي يا درش

المعتصم يقول...

بسم الله الرحمن الرحيم
السلام عليكم ورحمة الله وبركاته
تحياتى لكل اللى علق وقال رأيه فى الموضوع بصراحه
الكلام جميل وحلو
بس يمكن فيه منكم اللى مافهمش انا اقصد ايه
انا قلت احنا بنحكم على الظاهر
يعنى ماليش دعوة ده من جواه ايه لانى مستحيل اعرف حاجه زى كده
دى حاجه يعرفها ربنا بس
اما موضوع المظهر فمش بس المظهر
يمكن انا قصرت فى توضيح النقطه دى فى البوست
انا قصدى يعنى انه لما انا ابقى كويس ومحترم فى تعاملاتى مع الناس
وعلاقتى بربنا الحمد لله كويسه
وكل ده بينى وبين نفسى ومش بتمنظر او اتعالى بيه على حد
وفى نفس الوقت فيه انسان تانى ممكن نقول عليه سافل وسلوكه مش كويس والناس مش بتحبه خالص
ساعتها انا ممكن احكم على نفسى انى احسن منه وان ربنا انعم عليا بكده ولازم احمد ربنا على النعمه دى صح ولا لأ؟؟هو ده اللى انا كنت اقصده
طب ماانا ممكن لو العمليه حكم بالمظهر بس اشوف اى واحده مش محجبه مثلا واقول عليها كلام مش كويس
بس هل معنى كده انه كل واحده محجبه احسن منها ؟؟ لأ طبعا
فيه ناس بتكون محترمه جدا واخلاقها عاليه جدا بس فيه عندها نوع من التقصير فى ناحيه معينه وربنا بيعينها بعد كده وتحاول تصلح التقصير ده

بس طبعا ده مايمنعش انى مع الرأى اللى بيقول انه ماينفعش ان الانسان يحكم على نفسه مهما كان صادق معاها
لانه مهما حصل شايف انه صح فى كل تصرفاته وده هيخليه متحيز لنفسه بأى شكل او اى وضع
.............
ميمى
ام مالك تعبانه خالص وعنيها تعبانه
ياريت تدعيلها من قلبك ان ربنا يشفيها ويحفظ لها صحتها يارب
ويحفظ لها نور عنيها وينعم عليها من عنده بالصحه والعافيه

Sweet Violet يقول...

الف سلامة على أم مالك شفاها الله و عافاها
و الف سلامة عليك و اسمع كلام الدك علشان تكون كويس
*****
اما بقى الموضوع

جميل ان الانسان يعرف موقعه بين الجميع
لكن ماينفعش يقول انا احسن لان كده هو هيفضل محلك سر

adel يقول...

الف لاسمة عليك انت كمان :)
يعني تيجي عشان تسال و انا برد السلام اهون

ربنا يشفيك

بالنوسبة للحكم بقي
وانا اشاسا احكم ليه ..انا خليني في نفسي افضل
لان اكيد ربنا حلق الاحسن مني و الاوحش مني بس دخ مش موضوع المفروض ادقق فيه

معلش التعليقات قصيرة
عادل من فوق سرير المرض :)

fnoonh يقول...

طبعا الف سلامة على ام مالك اينعم مش عارفه مين هيا بس لازم ندعي لاي حد من اخوانا المسلمين ربنا يشفيها ويحفظها لاولادها ويدوم في عمرها بصحة وعافيه

ثانيا انا من وجهة نظري ان ممكن انا اقول على نفسي اني احسن من فلان ده بس مش بشكل عام ممكن مثلا يكون هوه بيكدب شوية وانا صادقه فهقول انا احسن منه اني مابكذبش كده يعني وفي الاخر الناس كلها عيوب والكمال لربنا وحده بس ممكن تكون انت احسن من غيرك وممكن تحكم على نفسك بكده

تقبل خالص تحياتي

ليس فقيرا من يحب يقول...

السلام عليكم

ازيك يا استاذ مصطفى يارب تكون بخير

يارب وسماح بقى على التقصير والتأخير

لظروف غصب


طبعا مينفعش احكم على نفسى انى احسن

من حد لان ربنا وحده اعلم بخائنه الاعين

وما تخفى الصدور واحنا كلنا بشر

جوانا الخير والشر وممكن انسان مظهره

يوحيلك بانه مش كويس او انك احسن

منه ويكون مكانته عند ربنا اكبر او

يتوب وتكون خاتمته خير والعكس برده

بعدين لو انا فتشت فى جوانب نفسى

وشفت عيوبى قبل مميزاتى عمرى ما هاشوف

نفسى افضل من حد

وختاما اسأل الله الكريم رب العرش العظيم ان يشفيك ويشفى ام مالك الحبيبه وجميع مرضى المسلمين شفاء لا يغادر سقما ولا الما

امين امين امين

المجاهد الصغير يقول...

السلام عليكم
طبعا منحكمش على الناس من الظاهر
لان الظاهر والباطن مكملين لبعض
اللهم ارزقنا الاخلاص فى القول والعمل

اللهم يرزقها الشفاء اللهم امين

mohamed ghalia يقول...

عمى وعم عيالى
ايه بس الأسئلة الكبيرة دى
اكيد صعب حد يتكلم عن نفسه أو يمدح
الناس هى الى بتشوف وتقرر
والنظرة دى بنختلف فى ناس بتخدع بالكلمات البراقة فى ناس كل الى يهما الفعل والسلوك والمعاملة

وألف سلامة على أم مالك

♥نبع الغرام♥♪≈ يقول...

السلام عليكم

ازيك يا درش
اخبارك ايه
الف سلامه عليك ربنا يشفيك يارب
وربنا يشفى امى الحبيبه ام مالك اللهم امين يارب العالمين

طبعآ موضوع جميل قووى
انا طبعآ مش ينفع امدح فى نفسى لان اللى بيتكلم عنه نفسه بيكون انسان مش كويس
انا الحمد لله احب التواضع قووى واكرة التعالى
وللاسف الانسان مش تقدر تحكم عليه الا بالمعاشرة
ربنا يكرمك ويطمنا عليك
مودتى

طوبه فضه وطوبه دهب يقول...

لا طبعا ما ينفعش لان الرسول نفسه عليه افضل السلام ما قالهاش على نفسه وهو سيد ولد ادم وخير خلق الله انما خيركم عند الله اتقاكم وليس بالمظاهر والشكل وبعدين ممكن اوى الانسان يفضل عمره كله شايف نفسه صالح وبيعمل عمل اهل الجنه وشايف انسان تانى فاسق وفاسد ويجى ولا عياذ بالله يموت على معصيه واللى كان شايفه وحش يموت على طاعه فانما الاعمال بالخواتيم يبقى غلط احكم وغلط انحاز وغلط اشوف نفسى احسن الناس حتى لو الناس كلها شافت كدا فمهما كنت كويس فى احسن منى ومهما شفت حد وحش فى نظرى الله اعلم نهايته ازاى دا رئى وربنا يشفى ام مالك ويعفو عنها ويخفف الالامها اللهم امين

رحلتنا في الحياة يقول...

الكلام كبييييييير وانا قريت البوست امبارح بس الكسل مع الاكتئاب خلانى مش عارفة ارد اقول ايه
اما النهاردة بصراحة والله مكسلة اكتب خلاص على الكيبورد ^_^
الله يخرب بيت الكسل اكيد هرجع تانى علشان ادلى بدلوى فى الموضوع ده :)

والف سلامة على ام مالك ربنا يشفيها ياااااارب ويعفو عنها
وربنا يشفيك انت كمان على اساس الصعايدة بياثر فيهم الحاجات البسيطة دى

رحلتنا في الحياة يقول...

انا جييييييت تانى علشان ارد وامرى الى الله اهو الكسل راح شوية بشوية الحق ارد قبل ما يرجع تانى :)
قريت امبارح مقال عن كاتب رواية عزرائيل معرفش اسمه بصراحة المهم قال كلمة عجبتنى فى الندوة اللى عاملها ان الحل اننا نرجع للصوفية فى حياتنا لان الصوفى بيرى دايما نفسه اقل من اى انسان وده مهما عمل من عبادات او محاولات للتقرب لله يبحس انه مقصر ومذنب
وعلشان كده بتلاقيه مش بيحكم على غيره ابدا بالتقصير وانه دايما شايف نفسه اقل من كل الناس
وده كان رده على سؤال تقريبا اطرحه بسبب موضوع الفكر الدينى اللى سيطر علىالمجتمع دلوقتى ان اصحب كل انسان بيشوف غيره اقل منه وانه بينظر لغيره نظرة تعالى
بصراحة كلنا مخطئين ومذنبين بس بدرحات ومفيش انسان يجى يقولى انا مش بغلط والله احط صباعى فى عينه ^_^
ده الواحد يفضل لغاية ما يموت يتمنى بس عفو ربنا ورضاه
يروح يفرد نفسه على خلق الله ويقول انه احسن منهم الله اعلم بالقلوب والسرائر ما ممكن اللى انت شايف انه مذنب وانه اقل منك ماشاء الله قلبه عامر بالايمان وذكر الله
انا عن نفسى مش هنكر انى كنت بحكم على الناس بالمظهر لكن اتغيرت والحمد لله اكيد المظهر شئ مهم لكن انا بيهمنى اكتر الجوهر وفى ناس ممكن حتى الحجاب مش لبساه بس ماشاء الله بجد على الخير اللى جواها والايمان اللى قلبها عامر بيه
الحل اننا نفكر دايما ان مفيش غير مطلق ولا فيه شر مطلق
وانا بردو لسه عند كلمتى اللى هيقول انه مش بيغلط هحط صباعى فى عنيه
وكفاية بقى علشان تعبت من الكتابة

SHAPE YOUR LIFE (ABOALI) يقول...

ياااااااااااهلا يا عم مش عارف
وياتريك مطأطأ يعم وعندك رقبة

على العموم بلاش جلوس وبحلقة كتير علشان الرقب غالى

المهم
موضوع الاحكام ده مسئلة نسبية
تعمتد انت نظرت الى اى وجهة
يعنى مثلا لو انت بتصلى وواحد لا يصلى جنبك
انت بالفعل احسن منه لو مافيش موانع شرعية عنده تمنعه من الصلاه

ده مثل يندرج تحته امثلة متنوعة

فعندما ترى شخص يحافظ على الامانة والاخر يضيعها بالتاءكيد الاخر افضل منه


اختصارا

الاحكام مسئلة نسبية

وبالفعل هناك اشخاص احسن وهناك اسوء



وربنا يجعله عامر

MaNoOoSh يقول...

ازيك يا رئيس حلفنا
ليك وحشة والله يا ريس

تأثير الفراشة يقول...

أولا ألف سلامة على حضرتك
و ألف سلامة على أم مالك ، نسأل الله الشفاء لكما و لكل مرضى المسلمين يا رب العالمين

بالنسبة لسؤال حضرتك ، ده سؤال خطير جداااا

إنما قبل ما أجيب عليه ، أحب أوضح نقطة ، بالنسبة للحديث اللى حضرتك ذكرته فهو بيشجع الناس على إيه؟؟ بيشجع المسلمين و يربى فيهم سلوك حسن الظن بالناس، و إن الانسان يحسن الظن فى أخيه المسلم لما يراه فيه من عبادة و لا يتشكك فى نواياه، فبكده يبقى عكس خاااااالص فكرة إنى أسىء الظن بالغير أو أظن بهم إنهم أقل منى

و أجيب عن سؤال حضرتك- و بقوة -إنه لأ، ما ينفعش أحكم على نفسى إنى أحسن من حد و هقول لحضرتك السبب
لأن الانسان لما يفكر بالطريقة دى ،فده من علامات كبر النفس ، و اللى هى أسوأ صفة ممكن تكون موجودة فى أى إنسان ، و علشان كده هى الصفةالوحيــــــدة اللى الرسول صلى الله عليه و سلم قال فيها " لا يدخل الجنة من كان فى قلبه مثقال ذرة من كبر"

يوجد صفات سيئة كتير لا نريدها أن توجد فى الانسان و لكن الصفة الوحيدة
اللى لو وجد منها و لو مثقال ذرة -حاجة كده لا ترى بالعين المجردة- لا يدخل الانسان الجنة بسببها هى الكبـــــــر

و هى الصفة اللى أصبح بها إبليس رجيما مطرودا من رحمة الله، و كان أول علامة للكبر- راقب كده كلمات إبليس كما حكاها القرآن-

( أنا خير منه خلقتني من نار وخلقته من طين )

، و تم وصف الموقف فى آيات أخرى تحكى هذا الموقف بإن إبليس (استكبر) ، استكبــــــــــر

و الإسلام لا يحضنا أبدا على كده، بل يحضنا على إننا لا نقلل أبدا بالناس أو نحقر منهم أو نشعر بأنفسنا محصننين و أفضل منهم ، و مافيش أروع من
حديث الرسول صلى الله عليه و سلم

"من عاير على مؤمن بذنب، لم يمت إلا و قد فعل مثله"
صدق رسول الله صلى الله عليه و سلم

يعنى ننصح بالحكمة و الموعظة الحسنة أيوة، و لكن نعاير أو نحقر من الإنسان ...أبدا

و غير كده الانسان لا يطّلع على القلوب لأن ربنا سبحانه و تعالى هو الأعلم بها ، و حتى إذا فرضنا إن الشخص ده سىء للغاية بشكل لا جدال فيه ، هل يعرف أحد خاتمة الشخص ده هتكون إزاى ؟؟
مش جايز ربنا سبحانه وتعالى يحسن خاتمته و يدخل الشخص ده الجنة ( مثل قصة قاتل المائة)، و الآخر اللى كان يظن نفسه أفضل ، فبكبر نفسه تكون خاتمته سيئة و يدخل النار( مثل القصة المعروفة فى السيرة)

و فى قصة حقيقية للإمام الشافعى إنه مرّ عليه جنازة و عرف إنها جنازة يهودى، فقال جملة كده في ما معناه إن اليهودى بموته أراح و هو أكيد فى النار، ...و فى نفس الليلة جاءه اليهودى فى رؤيا - رؤيا الميت حق لأنه فى دار الحق- و خاطبه باسمه " يا شافعى أنا الآن فى الجنة" و أكمل كلامه بأنه كان مسلما يكتم اسلامه و أحسن الله خاتمته فهو الآن فى الجنة ، و قال للإمام الشافعى بأنه لم يضمن الجنة بعد و لا يعلم كيف ستكون خاتمته....

فالغيب و القلوب علمها الكامل عند الله سبحانه و تعالى ، و ما الفائدة من الأساس التى من الممكن أن تعود على الإنسان أن يفكر هذه الأفكار ، و إذا فكر كده ، لابد أن يقف مع نفسه وقفة قوية لأنه ممكن يكون بيفتح على نفسه باب الكبر و التكبر و العياذ بالله

ففى النهاية لا يمكن أن نجزم أبدا من الأفضل عند الله ، ومن الذى سيحسن ختامه و من لا ،فالله وحده هو العليم

و فى اللحظة التى يظن فيها المرأ أنه أفضل من غيره، يبقى دق أول مسمار فى نعش إخلاصه لله عز وجل

أشكر حضرتك إنك أتحت الفرصة للتعبير عن رأى فى هذه المناقشة، جزاك الله خيرا
و أسأل الله أن يزرقنا جميعا الإخلاص و حسن الخاتمة و يبعد عنا الكبر و الغرور

دمت فى رعاية الله

شوكولاتة يقول...

ألف سلامة على أم مالك وياريت تطمنا عليها أول بأول يا أستاذ مصطفى

ثانيا الموضوع بتاعك حلو قوي بس انا شايفة أصل إن مبدأ الحكم على الأشخاص من حيث الأفضلية باطل لأن ببساطة ربنا عطى لكل واحد اللي يميزه لكن كلنا في النهاية متساويين تماما يعني انا ممكن ربنا يكون ميزني في المال وميز غيري في الصحة مثلا وهكذا وبعدين فيه جوانب كتيرة قوي إحنا مش بنبصلها واحنا بنحكم على الامور.

تحياتي

شوكولاتة يقول...

نسيت أقولك سلامتك من الواوا

Unknown يقول...

اللهم أشف أم مالك
وكل مرضى المسلمين
أجمعيــــــــــن

Unknown يقول...

وبعدين هو موضوع
محير شوية بمعنى كل
واحد فينا
شايف نفسه
احسن واحد الا
فيما ندر!بس حقيقة
كل واحد فينا برضه عارفة
هو ايه بالضبط بالضبط ولو
كابر امام الناس وقال انه احسن
واحد:معلش الأجابة ملعبكة شويــة

Unknown يقول...

بتروح لمهندسين
يعالجوك .....
اممممممممممممم
طيب طيب طيب فيها
حق عرب الحكاية دى بصحيح
انت مش عندك 2دكاترة فى الحلف
تسيبهم وتكشف برة:(
يافرحة الاعداء فيا:)

Unknown يقول...

بتروح لمهندسين
يعالجوك .....
اممممممممممممم
طيب طيب طيب فيها
حق عرب الحكاية دى بصحيح
انت مش عندك 2دكاترة فى الحلف
تسيبهم وتكشف برة:(
يافرحة الاعداء فيا:)

غير معرف يقول...

بسم الله الرحمن الرحيم

السلام عليكم

أنا جديد في عالم التدوين

دي مذكراتي بأكتبها بعد معاناة طويلة مع العادة السرية ,, المرة دي بجد نفسي أبدأ حياة جديدة ,, ربنا يثبتني

خطر على بالي إن دي تكون فكرة مدونتي , إني اشارككم أفكاري وذكرياتي , علشان الاقي حد يقويني ويشجعني , وكمان علشان اللي لسة هايبدأ يغرق في البحر اللي أنا غرقان فيه يلحق نفسه قبل فوات الأوان

أتمنى انكم تقبلوني وسطكم في عالم التدوين

أحمد عاطف يقول...

السلام عليكم

شكلي انا تاني تعليق بعد ال 30 :D

معتصم باشا منور مدونات مصر والمدونات الاجنبية كمان

من وجهة نظري ... بداية الحكم على النفس بالأفضلية هي بداية فتح الطريق للشيطان بأن يجعلن النفس تغتر

إلا من رحم ربي ... النفس بطبعها فيها حته أمارة بالسوء

تبدأ بالغرور ... والغرور يبدأ بشعور الإنسان بأفضليته عن الآخرين حتى وإن كان أفضل منهم

فربما يأتي انسان بفعل من أفعال أهل الضلال وهو ليس منهم فأحكم على نفسي بأنني أفضل منه رغم أني لست بأفضل منه

فيبدأ الغرور إلى التسلل إلى النفس

والغرور الخطيئة المفضلة لدى إبليس

بيبدأ منها يجر الانسان لكل الخطايا

ربنا يحفظنا ويحفظ جميع المسلمين

تحياتي

عمرو جويلى يقول...

حضرة الصعيدى الهمام
السلام عليكم
أولاً : حمداً لله على سلامتك وعوداً حميداً
ثانياً : شفا الله أم مالك وعافاها
ثالثاً : ألف مليون سلامة
رابعاً : بالفعل هو موضوع مهم جداً
ورأيك صريح جداً
وأسعد الله أوقاتك
وألف مليون سلامة عليك
دام قلمك صديقى
ودمت لنا مبدعاً

د/عرفه يقول...

السلام عليكم

كيف استاذنا
وحشنى كتير
بالنسبة للموضوع
ربنا بيقول
فلا تزكوا أنفسكم هو أعلم بمن إتقى

يعنى مينفعش نتكلم عن نفسنا
لكن لو الموضوع خدمة عامة وشايف نفسك جدير بتحمل المسئولية ممكن تقول انك تقدر تتحملها
زى سيدنا يوسف لما قال لملك مصر يجعله على خزائن الارض

والموضوع محتاج كلام كتير بس انا دماغى مش فاضية الصراحة

دعواتك

غير معرف يقول...

السلام عليكم
بصراحه دي اول مره ازور فيها المدونة الجميله دي
ربنا يكرمك عليها

ربنا يشفيك يارب ويبعد عنك الامراض
ويشفى ام مالك ويقومها بالسلامه
ويشفى جميع المرضى شفاءا تاما لايغادر سقما

معلش انا ليه ارد على السؤال اصلا ها انا احسن منه ولا لأ

ليه اسال نفسي السؤال ده
انا المفروض اشوف اخطائى واصلحها
واللى شايفه غلطان قدامى كذا حاجه اعملها
فى الاول اشوف هل انا باعمل الغلط ده ولا لا
واحاول انصحه ان استطعت
وادعى له وادعى لنفسي وللناس

طبعا فيه حاجه مهمه ان النصيحه تكون فى السر مش افضحه
وممكن لو شايف ان الخطا مكرر من ناس كتيره انبه الناس للخطا ده من غير ما اقول ان فلان بيعمله

طبعا ده عن الناس العاديه

معلش انا ماجاوبتش على السؤال لانى شايف ان الافضل ان الشخص يبعد عن السؤال نفسه لان كل واحد منا له اخطاؤه
ولكن خير الخطائين التوابون
فالافضل نتوب عن ذنوبنا
اسف للاطاله