الخميس، 1 أكتوبر 2009

Back 2 School


بسم الله الرحمن الرحيم


السلام عليكم ورحمة الله وبركاته

كل سنه وانتوا طيبين
المدارس خلاص هتفتح بكره
وهنرجع تانى لوجع القلب والصحيان بدرى


(صحيح انا كده كده بصحى بدرى بس بمزاجى انما ده صحيان غصب عنى)
ونرجع تانى ندور على الكشاكيل والكراسات
وعملت ياحبيبى الواجب ولا نجيب الفلكه
واسكت يابابا واسكتى ياماما
وياحسن هاتلى العصايه
ياخرااااااااااااابى ماكنا مرتاحين
وكمان كله كوم وموضة انفلونزا الخنازير السنه دى كوم
مش هنخلص بقى من الجماعه اللى زى الفل
اللى كل واحد فيهم عامل فيها ابوالعريف
وجاى المدرسه يفتش ويشوفنا هنعرف نحوش الانفلونزا عن العيال ولا لأ
وطبعا مش هنخلص من الفتاوى اللى زى الفل بتاعتهم
وياسلام بقى على الكارثة الكبيرة فى اول يوم
الساده الافاضل المدرسين زمايلنا

والعاده المنيلة بستين نيلة بتاعتهم
لازم اول يوم نقابل بعض ناخد بعض بالاحضان وهاتك يابوس
(وانا مابحبش اصلا ابوس حد)
واللى تلاقيه بقى عنده زكام
واللى واكل بصل ع الصبح
واللى عنده هسهس واللى عنده استبحس وغيره كتيييير
وماتقدرش تقوله لأ يزعل منك
والكل يغلطك بقى الراجل جاى يسلم عليك وانت ترفض
بجد اخص عليك انت وحش
وبما انى رخم بطبعى والحمد لله مش بسلم على الابلوات
(وهما مش بيطيقونى اصلا)
ماهى مش ناقصه
دى تقعد تقول هو انت لسه مااتجوزتش
ودى تقولك طب ليه
ودى تقولك طب انا عندى ليك عروسه تحفه
(اختها طبعا)
ادب واخلاق وجمال ماتحكيش
(وفى الاخر تطلع شبه عيشه الكيلانى)
ياسلااااااااااام لو مااقدرش اروح اول يوم
بس بشرط انهم تانى يوم يعتبرونى روحت ومايعملوش معايا مراسم الترحيب نفسها
اييييييييييييييييييييه ماعلينا
هنعمل ايه بس قدر ولابد منه وربنا يسترها
(لو غبت عنكم شويه ابقوا اسألوا عليا احسن يكون جالى اسمه ايه ده من كتر السلامات)

واه من الكارثة التانية
وهى تسليم الكتب
اللى هى اصلا جاية ناقصه
والعيال وطلباتهم الغريبه بقى
اللى ييجى يقولك يااستاذ انا عاوز اغير الكتاب
ده ليه ياحبيبى
اصله ماعليهوش نقطه حمرا زى الكتاب بتاع زيزو
وشويه وييجى زيزو يقولك يامستر انا عاوز كتاب غير ده
ليه يازيزو
اصله عليه نقطه حمرا يعنى مش نضيف


وحسبى الله ونعم الوكيل


وصبرنى ياااااااااااااااارب


ســـــــــــــــــــــــــــــــــــــــلام

هناك 67 تعليقًا:

اسماء واحلام فى وجدانى يقول...

اول

تعليق

لاول مرة

فى التاريخ

اسماء واحلام فى وجدانى يقول...

الحقيقة انا كنت جاى اعزمك انا ويويو على حب العزيز لاقيت التعليق الاول فاضى بصراحة طمعت فيه
وبعدين حضرتك لو جيت بدرى ممكن تاخد راحتك عند ماما الفراغ بس ده لو سيبنا لحضرتك الفرصة دى
اصلها ارزاق

المعتصم يقول...

اسماء واحلام فى وجدانى
منور ياعم احمد
ومبروك عليك اول تعليق
بس بص انا مش بحب حب العزيز
شوف حاجه تانيه تعزمونى عليها
يا اما تدونى حقى ناشف وانا ابقى اتصرف
ماشى ياعمنا
ههههههههههههه
وبعدين حكاية بدرى دى بتحكمها الظروف مش بايدى
وانا سايبلكم انتوا ياعم الحكاية دى
انا ماليش فى الاحتلال ده
دا انا غلبان ومسكين
نورت المدونة بمرورك الجميل يابوحميد

yoyo يقول...

صباحك سكر يا مستر
هو انا كدا مش عارفة اجى الاول ابدا كدا عندك
ينفع كدا يا احمد
ماشى ماشى
يبقى نحجز التعليق التانى

yoyo يقول...

امممممم
و الله انا كمان مش بحب حب العزيز دا
ايه رايك فى ايس كريم تمام كدا
ولا شيكولاتة جالكسى
ولا انت تحب ايه
اختار كدا

اسماء واحلام فى وجدانى يقول...

سبحان الله يا معتصم انا حاسس ان مدونتك هتشوف حرب اهلية انت فاكر حرب امبارح شكلها كده هتكمل هنا

yoyo يقول...

ههههههههههههه
و الله انت عسل
قبل ما ادخل كنت لسه بحضر و حسبى الله و نعمة الوكيل
اختك ادبست فىسنة اولى ابتدائى و كمان جزء من تانية
اهىء اهىء اهى ء
مش حرام دا يا مؤمن
مش اقولك على اللى هيحصل ليا بقى
لنا الله واللهى

yoyo يقول...

عشان مش بيقولوا جاية وناوية حرب
ادينى هابدا من موقعى هذا بالسلام
صباحك سكر يا شريك
صباحك سكر يا احمد
صدق لك وحشة من احتلال امبارح
هيييييييه دنيا

yoyo يقول...

ما انا كنت حرة نفسى ايه اللى خبطنى فى عقلى كدا
اهىء اهىء اهىء
ماشى يابابا ماشى يا ماما
ادينى بسمع الكلام لما اشوف اخرتها

امال البنات بقى مشكلة والله وكارثة لازم كل يوم بوس واحضان ايه يا جدعان هو مولد ما احنا كنا لسه مع بعض
هو يعنى السلام بالايد مش ينفع
ناس دماغ و الله

وكمان بقى موضوع ياحبيبتى هو انت مش اتخبطى( اتخبطى ) و العريس اللى بتتكلم عنه كانه رشدى اباظة ولا احمد رمزرى و تلاقيه فشر الشاويش عطية
ياحسرة قلبى ياانا

mimi يقول...

الناس دي صاحية من أمتي؟

mimi يقول...

يا ستار

أحمد هنا يبقي مش هتنام يا مصطفي خاااالص النهاردة

mimi يقول...

لو بصيت ولقيت يويو هنا هعرف ان فيه احتلل عندك

المعتصم يقول...

يويو
صباحك سكر زيادة يا مس
وبعدين مين اللى قال انك مش الاول
انتِ اول تعليق بحكم الاقدميه هنا فى المدونة ولا عزاء لاحمد
هههههههههههههههههههه
***********
ونمشيها ايس كريم وكمان شكولاته جلاكسى وانا اللى عازمك كمان ياستى
***********
اسماء واحلام فى وجدانى
بقولك ايه ياعم احمد
هو انت جاى تعملى قلق فى المدونة ولا ايه
خلى بالك علشان انا متراقب وممكن ياخدوك معايا هه
وشويه كده وهرش ميه قدام باب المدونة خلى بالك من هدومك لتغرق
هههههههههه
*************
يويو
بتحضرى!!!!!!!
بتحضرى ايه يابنتى؟؟
هو احنا لسه عارفين الدنيا هيحصل فيها ايه
انتِ شكلك غاويه تعب على فكرة
هههههههههههههه
اولى ابتدائى
لا اله الا الله
ربنا معاكى ويعينك
ده انا اعدادى ومش قادر عليهم
بجد ربنا يكون فى عونك
لأ بقى وايه كلهم مش عاوزين المدرسه وعاوزين يروحوا مع ماماتهم وهاتك ياعياط
هههههههههههههههههههههههههههه
وانتِ بقى اللى لازم تحلى الازمه دى
ربنا يقويكى

mimi يقول...

روح يا مصطفي بحق جاه المصطقي .. ربنا يبعد عنك :-

الأبلوات الرخمات
والمدرسين الرخمين
والأجهزة العطلانة
والأسئلة الخيبانة
ويارب اللقاء اللي جاي
يصحه تحضره معانا

أمين

أمين

أمين يارب العالمين

adel يقول...

ههههه
ربنا معاك بجد

حلوة حكاية النقطة الحمرا

ملقيش معاك صورة ليها :):)

ابقي طمني صحيح عليك من الانفلونزا دي

وخلي بالك في واحدة من الابلوات متكلمة عليك
ههههههههههه

mimi يقول...

يلا رد عليا علشا أمشي

وترد عليا بشيكولاتة كادبوري ...

إشمعني يويو ... عاااااااااا

المعتصم يقول...

يويو
ادى اخرة اللى يسمع كلام الكبار
ههههههههههههههههههههه
وفعلا مش عارف العاده الهباب دى لازمتها ايه
ماله السلام بالايد ماهو زى الفل
الواحد يسلم ويروح يغسلها وتمام التمام
انما الاحضان والكلام الفاضى ده الواحد كده لازمه يستحمى
ههههههههههههههههههههه
ونفس قصة العروسه لازم تتكرر معاكِ بس بشكل تانى طبعا
ماهى العادات كلها واحده فى كل حته
لنا الله بجد
ويقدرنا ونصبر
******************
ميمى شقاوة
اهلا اهلا
موضوع صاحيين من امتى ده انا مااعرفوش
انما هو احمد موجود
بس هو ليه الزعر ده من وجوده
وبعدين احتلال اختلال انا مش بتهدد
انا هسيب باب المدونة مفتوح واروح انام وبعد مايخلصوا لعب يبقو يقفلوا ويروحوا
هههههههههههههههههههههههههه

المعتصم يقول...

ميمى
يارب يسمع منك يارب
امين على دعواتك الجميلة
من بقك لباب السما دوغرى
**************
عادل
حبيب قلبى
منور المدونة
والله ياعادل من قبل مااقرا تعليقك وانا بضحك
بس بجد هو ده اللى بيحصل
دى العيال تجنن ياجدع
يااستاذ الجلده دى مقطوعه وتغيرهوله
يرجع معلش يامستر انا عاوز الكتاب الاولانى وعلى كده بقى طول النهار
وهبقى احاول اصورلك النقطه الحمرا واحنا بنوزع الكتب
هههههههههههههههههه
وانا عارفها اللى متكلمه عليا دى
بس بلغها يادولا انها تنسى
قولها مش مصطفى ياقطه
دوريلك على عبيط غيره
هههههههههههههههه
نورت ياعدول
*****************
ميمى
ياسلام بس ده
ياباشا انت تؤمر
شكولاته كادبورى وجلاكسى وتوبليرون كمان
طلبات معاليكى اوامر واجبة التنفيذ
ده كفاية الدعوتين الحلوين اللى قلتيهم دول
هههههههههههههههههه
نورتى ياميمى هانم

merc19 يقول...

ازيك يامصطفى
معلش ابقى خد احتياطاتك السنه دى واكيد مش هيكون حد واكل بصل ع الصبح كده ده اول يوم له فرحه ههههههه
وعموما انا حاسه ان الدراسه كلها اسبوع وهيأجلوها وبكره تشوف وبعدين دول رفعو الغياب يعنى خلاص المدرسين هيروحو يسلمو ع بعض وبس
وانا من نحيتى ه اوطالب الحكومه توزع مع الكتب صابون وكلور ولبان وبيرفيوم عشان خاطر مستر مصطفى يبقى مرتاح نفسيا شويه
وكفايه احباط بقى خلينا نشوف بعنينا المهازل دى
وكل سنه وانت طيب

مسدس صغير يقول...

هههههههههههه
هتعمل ايه بس
مفروض عليك وعلينا
ربنا يصبرنا كلنا
انا بردة عايز اغير الكتاب عشان عليه نقطة سودة ومعليهوش نقطة حمرا
هههههه
كل سنة وانت طيب

المعتصم يقول...

merc19
تحياتى
والله يسلمك
انا واخد احتياطاتى كويس ماتقلقيش عليا (جايب الكمامه والصابون والديتول ومظبط الدنيا)
هههههههههههههههههه
اما موضوع البصل الصبح ده فهو اللى مش مضمون لانه ممكن يكون فيه واحد عميل وغد وعاملها مخصوص علشان يعكنن عليا
تصدقى بقى انى انا على دا كله مش عاوز الدراسه تتأجل !!!!!!!
اه والله اصل انا بعيد عنك كفحتى واحب الشغل تخيلى
انا اشكى كتير ممكن انما ده فى البراح كده والوسع انما احب الشغل
انا بقى عاوز الحكومه بس توزع الكتب واحنا نبقى نشترى الصابون على حسابنا
دى الكتب كلها ناقصه
تخيلى تانيه اعدادى كتبها ناقصه العربى والعلوم والرياضيات
يعنى المواد الاساسيه
وحاضر كفاية احباط
البوست الجاى مش هيبقى احباط خالص هيبقى نكد
من عنيا
واديكى رايحه وهتشوفى بعنيكى
هههههههههههههههه
ســـــــــــــلام
**************
ابوصلاح حبيب قلبى
بتاع المسدس
منور ياعمنا
هنعمل ايه بس
العمل عمل ربنا
ومن عنيا ياصاصا نغيرلك الكتاب يعنى هى جت عليك انت
ده حتى انت ولدنا ياصلاح
ههههههههههههههههه
كل سنه وانت طيب
نورت المدونة

الشعب لابد له من حكومه تشكمه يقول...

ههههههههههههههههه ياعييييييييينى انت كمان عندك ناس حاطه مناخيرها فى حياتك اوعى يكونوا بيقولولك شد حيلك:)

عيييييييييييييييييش ربنا معاك

رحلتنا في الحياة يقول...

ياساتر عليكم يعنى ربنا كرمكم بشغل مدرسين اااااااااااد الدنيا وانتم بتتبطروا علي الشغل
ياريت انا كنت اشتغلت السنة دى كان ربنا كرمنا بجد وفى هوجة الانفلونزا دى بما انى مش ببطل اصابه بيها
حتى دى الواحد منحوس فيها ومش مكتوب له :(

شفت بقى القر والحسد جاى منين
وبعد يايويو هانم تحبى نبدل الامهات تاخدى ماما اللى مش عايزة تشغلنى وتتدينى مامتك :)

موناليزا يقول...

كل سنة وانت طيب
ربنا يكون فى عونك(نحن السابقون وانتم اللاحقون) بس الحمدلله ربنا تاب عليا
ماهو انا ماكنتش هتحمل التحكمات البايخة اللى طالعة فى المقدر جديد:)
بجد الحمدلله ربنا مابيعملش حاجة وحشة

بالنسبة بقى لموضوع القبلات والاحضان ده انا طبعا متفقة معاك جدا بس انا غيرك تماما يعنى رفضى بيكون فعلى لدرجة ان ايام الجامعة لما تيجى واحدة جديدة تتعرف عليا انا وصحباتى كلهم يسلموا عليها بوس واحضان وقبل ما تيجى عندى يقولولها خدى بالك موناليزا بتكتفى بالمصافحة
وبعد كده اللى بيتعامل معايا بيتعود
فمن موقفى هذا بطالب سيادتكم بالرفض الفعلى:)

سؤال شرير على جنب: انت ليه ماخطبتش لغاية دلؤتى؟:)

شوكولاتة يقول...

ايه ده انت فتحت المدونة في ميدان التحرير ولا إيه كل الناس دي لحقت تعلق جم امتى دول ده انا الريدر بتاعي قاري البوست من شوية صغيرين أنا كنت مكسلة اجي علشان عندي شغل كتييييييييييييييير

وبعدين إيه حكاية جالاكسي وكادبوري وتوبليرون اللي انت عمال توزعهم عادي كده ايه فاكرني مش جاية ولا إيه

آه صح البوست الجديد نازل بكره بليل إن شاء الله علشان ماتجيش التعليق رقم 13 وتقولي الريدر وهاحطك في البلاك ليست
خلاص قد ازعر من انعر

سلام

fnoonh يقول...

ههههههههههههههههههههههههههه
بجد بوست جميل وخلاني اضحك اينعم ماضحكتش من زمان بس بجد تضررك فيه جميل جدا
والله فعلا ربنا يعينك المدرسين هنا مطحونين والله لو كنت تشوف المعلمات في السعودية اول يوم بيعملوا ايه تتحسر تحسر لم تتحسره من قبل بيجيبولهم بوفيه خمس امتار فيه مالز وطاب من الاكل قال ايه جايين وتعبانين ولازم كده ولو تشوف المخفي اعظم واعظم يلا ربنا معاك ويعينك
اقولك فكرة لو واحد جه يبوسك قوله مابسلمش غير على ستات ولو واحده جت تسلم قولها مابسلمش غير على رجاله

دكـــــتور جدا يقول...

السلام عليكم
ومبروك الدراسة !!

حفيدة عرابى يقول...

طيب ليه تقليب المواجع ده؟
ربنا يصبرنا ويقوينا ويسترها معانا

ستيتة يقول...

ايه ده
هاو يووووووووووووووو دير
مش قلت لك انا شبه عائشة الكيلاني
مش عجبك عائشة الكيلاني؟
طيب لما نشوف نقاوة عينك يا سيدي
هههههههههههههههههههههههههههههه

ربنا يسلم بيكم كلكم يارب
مدرسين وعيال وشعب غلبان
طيب اقول لك حل

ما تاكل انت شخصيا بصل واللي يجي ناحيتك ها يفر فرار الغزالة من فم الأسد
ههههههههههههههههههههههههههههههه

والله ضحكتني
وخاصة الصورة

fL0weR-giRL يقول...
أزال المؤلف هذا التعليق.
fL0weR-giRL يقول...

ياااااااااااااااااارب يصبرك ياأستاذ مصطفي

بجد عندك حق المهنه دي تخنق هاع

ربنا يصبرك علي تسليم الكتب هههههههههه

وملكش دعوه بالأبلوات انت عارف الستات بيحبوا يتكلموا كتيررررررر جدااااااا

انا طبعا مش منهم خالص ههههههههه

** تقبل مروري **


^_^

Ahmed يقول...

هههههههههه

ااااه حاسس بيك اوي وشكلك مبؤوء بأه سوده وكل دوده ودوده تعبان

ربنا يعدي السنه ديه على الخير عشان الهسهس اللي الحكومه عيشت الناس فيه من الانفلونزا

اهي مصاصه نلعب بيها شويه

غير معرف يقول...

ههههههههه

كل نقطه وانت طيب.... وابقا قول عندي انفلونزا وانت تلاقي الكل جرى من قدامك :))

بس ايه ده .... هو انت بتضرب العيال .... ايه الافترا ده يا استاذ مصطفى

طوبه فضه وطوبه دهب يقول...

bgd rbna ysabarkom wyr7amkom bra7mto

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
الشعب لابد له من حكومه تشكمه
ايه الاستغراب دا كله؟؟؟
يعنى هو مافيش حد بيحشر مناخيره الا عندكم ولا ايه؟؟
دى اكتر ناس فى البلد
وطبعا الجملة الاعتياديه الشهيرة ماتشد حيلك
لحد ماحيلى قرب يتقطع من كتر الشد فيه
نروتى ياشيما هانم
***************
ايوشه بنت خالى
هو احنا كده مايعجبناش العجب
يعنى قاعدين فى البيت مش نافع
شغالين مش نافع
مااحنا فراعنه بقى
عارفه كان نفسى تشتغلى هو اسبوع واحد وكنتِ هتقولى حقى برقبتى وتقعدى فى البيت تانى وحياتك
وبعدين زعلانه على الانفلونزا ليه؟؟ ماتستعجليش على رزقك
ههههههههههههههههه
اما موضوع البدل ده تتكلمى فيه انتِ ويويو مع بعض انا ماليش دعوة
انا امى عجبانى واحسن واحده فى الدنيا
ههههههههههههههههههههههههههههه
*************
موناليزا
وكل سنه وانتِ طيبه
ايييييييييييه دنيا مش دايمه لحد
يابختك عقبال ماربنا يتوب عليا انا كمان واشتغل شغلانه بحبها
الحمد لله على كل حال
اما بقى موضوع القبلات والاحضان ده بحاول والله اهرب منه بقدر المستطاع وبصدر العبيطه للناس دى بس فيهم ناس بتبقى رخمه قوى وبتلح فى الموضوع ده بشكل غبى
وربنا يسترها
اما بقى اجابة سؤالك الشرير
فهقولك زى مابقول كل مرة
لسه النصيب ماجاش ادعيلى ببنت الحلال
هههههههههههههههههه
****************
شوكولاته
ايه القر ده بقى؟؟
وبعدين انا ذنبى ايه طيب يعنى اقول للناس ماتجوش تعلقوا لحد ماشوكولاته تيجى مثلا
ربنا يعينك على الشغل اللى عندك
وخدى بالك انا شايلك نصيبك من الشوكولاته على جنب وهو انا اقدر برضو اعمل حاجه كده ولا كده من ورا ضهرك فى موضوع الشوكولاته ده
دا انتِ الكبيرة برضو
حاضر ان شاء الله هحاول اجى بدرى علشان اشوف البوست الجديد وربنا يستر من التعليق ال13
ههههههههههههههههههه
*************
فنونه هانم
منورةالدنيا
الحمد لله ان البوست ضحكك
ده شيء يسعدنى بجد
لانى بصراحه كنت قلقان عليكى من حالة الحزن اللى كنتِ فيها
ماخليناش بقى نتحسر اكتر مااحنا متحسرين حرام عليكى
فى السعوديه دول ناس مرفهين وعلشان كده بياخدو المدرسين بتوعنا هما اللى يعلموهم هناك
يعنى احنا برضو الاساس
ماهو المدرس مايبقاش مدرس من غير مايتمرمط كده علشان يكتسب الخبرات اللازمه للمهنه
هههههههههههههههههه(بضحك على نفسى)
وبعدين الفكرة بتاعتك ماتنفعش
لأن الرجاله والستات كلهم مع بعض فى مكان واحد ومش هعرف اهرب منهم
هههههههههههههههه
ربنا يسترها ويعدى بكرة على خير
***************
ضكتور جدا
وعليكم السلام ورحمة الله وبركاته
الله يبارك فيك يادكترة وعقبال مانباركلك قريب
نورت المدونة

المعتصم يقول...

لقد خلقنا الله احرارا
حفيدة عمنا عرابى
يامرحب
ايه ؟؟؟
بفك عن نفسى حبتين معاكم
ماافكش يعنى وافرقع من اللى هيتعمل فينا بكرة ولا ايه؟؟
ربنا يسترها ويعديها على خير
**************
الدكتورة ستوته
ياكبيرة انا مقدرش طبعا
ده انا ضارب بيها المثال من حلاوتها المفرطه وجمالها الفتان
بس على فكرة يعنى لو عائشه الكيلانى كانت شبهك كانت دخلت مسابقة مس ايجبت وهى مطمنه انها هتاخد المركز الاول
(اعتقد كده صلحنا الدنيا اهه)
ههههههههههههههههه
مااقدرش اكل بصل مش بحب ريحته
وكمان حتى لو ممكن اكله مش معقوله يبقى على الصبح كده
دا انا اقعد طول اليوم مش طايق نفسى
وبعدين دول لو واكل لهم ايه مش بتفرق معاهم زى مايكونوا نحسوا خلاص
والحمد لله ان الصورة ضحكتك دى حاجه تبسطنى
نورتى يادكتورتنا
*************
100 مرة قلنا محدش يحذف تعليقات
بعد كده هجيب الفلكه من حسن هه
**************
فلور جيرل
اهلا ياعلومنجيه
يسمع منك ربنا يارب
وربنا يعدى اليوم ده على خير
انا عاوز يبقى ماليش دعوة لا بالابلوات ولا بالمدرسين
(انا عارف انك مش منهم خالص حتى بأمارة البوست الاخير ده بتاعك)
هههههههههههههههههههههههههه
اسعدنى مرورك
*************
احمد ابوالعلا
اهلا ياهندزه
اسكت يااحمد ياخويا ع اللى انا فيه
يللا ربنا يسترها ويعديها على خير من الهسهس والبخبخ وغيره كتير
وعلى رأيك اهو نلعب بيها شويه زى مالعبنا بغيرها قبل كده
نورتنى ياابوحميد
***************
فتاة من الصعيد
اهلا يامروة
وانتِ طيبه ياستى
انا كنت ناوى اقول بس افتكرت انى هروح الاقيهم كلهم عندهم انفلونزا يعنى مش هتفرق معاهم
وعشان كده بفكر اقلبها عليهم
اللى يقول عنده انفلونزا مااسلمش عليه عشان العدوى مش ينفع كده

اه انا مفترى وبضرب العيال ايه عندك مانع؟؟؟؟
ماهى العيال دى لو من اولها ماعرفوش انى ممكن اظبطهم مش هيذاكرو ولا هيحترمونى ولا هيعملوا اى حاجه غير استهزائهم بيا
يبقى ندبح القطه من اولها احسن
وبعدين انا مش مقضيها ضرب على طول
انا ولله الحمد يمكن من اكتر المدرسين فى المدرسه اللى الطلبه بيحبوهم على الرغم من الفترة البسيطه اللى قضيتها هناك
وبعدين مش عاجبك اشتكينى فى الوزارة هه
(ماهو اللى مايعرفش)
**************
طوبه فضه وطوبه دهب
شكرا على مرورك الجميل
وربنا يسمع منك
ويسترها معانا ويعديها على خير
نورتى المدونة
**************

ليس فقيرا من يحب يقول...

مالهم الابلوات بقه يا استاذ مصطفى

وش شرير هههههههههههههههههه

ربنا معاك يارب ويعينك

وعقبالنا يارب لما نشتغل مش مهم لما

تيجى على قد البوس مش مشكله هههههههههههههههه

الا بالمناسبه يا استاذ مصطفى هو انت

ليه مخطبتش لدلوقتى عندى ليك عروسه

كويسه هههههههههههههههههههههههههههه

ربنا معاك

اقعد بالعافيه

غير معرف يقول...

ههههههههههههههههههههههه
ههههههههههههههههههه

وربي متت من الضحك

استنى اعطي قلبي زقة وراجعة

:]

غير معرف يقول...

شربات ياخواتي

بس انا رايي تروح اول يوم وانت مستعد عالاخر خد كمامة واشرب بيكربونات و خد رشاش معقم وكل لوازم الحرب البشرية

بوووووس ورش واحضضضضضضضن و رش

وبكدا نضمن سلامتك :]

فكره هايلة صح

وبالنسبة للابلات اتجوز ياخويا وريحهم بقى

وبعدين ومالها عايشة الكيلاني

اساسا اخريتك مش هتلاقي غيرها يا استاذ معتصم

ال معتصم عن الجواز ال

وطبعا تستاهل تاخد عايشة ولاعضلات ولاجمالات عشان عمرك ترفض اختي

(وش مطلع لسانه )

وبعدين انت بتكبت مشاعير الاولاد ليه بقى كل واحد حر بكتايه

الي عاوز نقطة انقطه ولا مش عاوز امسحه ههههههههههههه

بجد خد بالك من نفسسسسسسسك

وربنا يوفقك باول يوم عكننة اقصد دراسة

دمت بحفظ الرحمن

موناليزا يقول...

تعرف لو كنت قريب شوية كنت جبتلك كذا عروسة وانت تختار براحتك لان الحمدلله أغلبية اللى اعرفهم فيهم نفس المواصفات المطلوبة
بس تقول ايه فى بنات وجه بحرى اللى الغربة بتاكلهم لو خرجوا فى آخر الشارع:)

فرحانة جدا بالخبر اللى قولتهولى ولو انى عايزة اعرف التفاصيل:)

الشاى بالنعناع يافندم مايغلاش عليك بس لما تصلح الاجهزة(ما هو انا كمان مخى صعيدى):)

عمرو جويلى يقول...

حضرة الصعيدى الهمام
السلام عليكم
إنت لحقت زهت من مهنة التدريس
أمال إحنا بقالنا 17 سنة خدمة
نعمل إيه ؟؟؟ وبعدين إنت
هتنباس يعنى هتنباس يا عباس
تقبل مرورى

غير معرف يقول...

لا والله اعرف ... بابا وماما كانوا مدرسين .... وكان امل حياتي اطلع مدرسه .... بس هما موش رضيوا .... يظهر خافوا عليا اتهزق ....

اصلهم عارفين اني ما بحبش الضرب .... العيال بتصعب عليا :)

عمرو جويلى يقول...

حضرة الصعيدى الهمام
السلام عليكم
الواحد مرعوب من موضوع إنفلونزا
الخنازير ومش عارف يعمل إيه وأنا
متأكد إن الموضوع مش فى دماغ المسؤولين
تقبل مرورى

♥نبع الغرام♥♪≈ يقول...

السلام عليكم

ربنا يرفع عنا البلاء قادر يا كريم

بجد ربنا يسترها معانا
وانا معاك
حسبى الله ونعمه الوكيل

دمت بكل الخير

♥نبع الغرام♥♪≈ يقول...

مممممممممممم

انا شايفه احتلالات وناس بتلعب عندك اهى

كويس والله عشان تبطل قر عليا

هههههههههههههههههههههههههههه

غير معرف يقول...

السلام عليكم
أشكـر حضرتك على دوام التواصل
وموضوع إنفلونزا الخنازير ده مخوف
الناس كلها وربنا هو الستار
خالص تقديرى

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
ليس فقيرا من يحب
تحياتى
الابلوات احسن ناس وهو انا اقدر اكح برضو
وان شاء الله ربنا يكرمك وتشتغلى قريب بس ماتبقيش بقى ساعتها تقولى كانى ومانى ودكان الزلابانى انتِ اللى عايزة اهه مافيناش من عياط
ماخطبتش ليه لغاية دلوقتى ؟؟
امممممممممممم
ممكن نأجل الاجابة على السؤال ده مؤقتا
طب ياترى مين بقى العروسه ؟؟؟ زينات صدقى؟؟؟؟
هههههههههههههههههههههه
الله يعافيكى
***************
نوارة هانم بتاعة الجمال
الحمد لله انك ضحكتى ده يفرحنى
انا على اتم الاستعدادات ياافندم
معايا الكمامه والصابونه والديتول ناقص ايه تانى؟؟ونديها الصبح بيكربونات
وحلوة فكرة بوس ورشششششش دى مفتكسه
ههههههههههههههههههه
اما بقى بالنسبه للجواز ماانتِ عارفه اللى فيها طيب
وبعدين انا هتجوز نجلاء فتحى يعنى عائشه الكيلانى ماتنفعش
ههههههههههههههه
وحاضر ياستى هخلى بالى من مشاعير العيال وهظبطلهم الكتب اللى بنقطه واللى من غير نقطه وربنا يسترها ومش انا اللى يتنقط فى الاخر
ههههههههههههه
نورتى يانوارة
****************
موناليزا
هنتلكك بقى
يعنى اجى اسكن فى المنصورة عشان اتجوز!!مافيش اى واحده عندكم زهقانه وعايزة تسيب بلدهم خالص؟؟؟؟
التفاصيل هبقى ابعتها مرة تانيه
مش مصلح الاجهزة ومش عاوز الشاى بتاعك هه
انا بعمل شاى ولا احلى ولا اروع ولا احمدشوبير هه
دى ماكانتش كوباية شاى دى
***************
اللؤلؤة
وعليكم السلام ورحمة الله وبركاته
حضرة المنوفى التمام
تحياتى
ياباشا مازهقتش ولاحاجه بالعكس انا بحب الشغل جدا بس انا بقول اللى بيحصل ليس الا
وبعدين انت ربنا يصبرك ويقويك
17 سنه كتييير قوى هو مافيش حسن سير وسلوك فى التربيه والتعليم ولا ايه؟؟
هههههههههههه
وبعدين مسئولين ايه اللى الموضوع فى دماغهم
لو كان فى دماغهم كانو عملوا اى حاجه انما لاحياة لمن تنادى
هما بس عملولنا المقابر الجماعيه وكفايه على كده
وحسبنا الله ونعم الوكيل
اسعدنى مرورك ياعمنا
****************
فتاة من الصعيد
مايصعبش عليكى غالى يامروة
بس هو احيانا بيبقى مافيش حل غير الضرب
تخيلى السنه اللى فاتت وفى اول حصة لقيت تور داخل الفصل من غير استئذان ولما بكلمه بجح فيا طب لو ماضربتوش كان شكلى هيبقى ايه قدام باقى زمايله؟؟؟ فاانا استغليتها فرصه بقى وخليته عبره ومن ساعتها الكل اتعدل
***************
ايناس الاحزان
وعليكم السلام ورحمة الله وبركاته
اهلا يانوسه
امين على دعواتك
واعتقد ان الشعب كله بيقول حسبنا الله ونعم الوكيل
فعلا ربنا يسترها
دول جهزولنا المقابر الجماعيه اللى بالجير الحى فى الجبل
شوفتى المصيبه
هو ده اللى فالحين فيه وبيجهزوه بسرعه
منهم لله

اه شوفتى اتعديت منك بس لسه برضو على قدى يعنى
انما مش احتلالات بالكوم زى ناس
اول ماالبوست ينزل تلاقى عندهم خناقات وضرب نار وتكسير وتعوير
احنا برضو غلابه
جتنا نيله فى حظنا الهباب
ههههههههههههههههههههههههههههه
نورتى يانوسه
**************
العصفورة
وعليكم السلام ورحمة الله وبركاته
انا اللى بشكرك على التواصل وعلى مرورك الجميل دوما
ولا نملك الا الدعاء للمولى عز وجل ليرفع عنا البلاء ده
ويسترها علينا وعلى ولادنا
اسعدنى مرورك
ودمتِ بكل خير وود

تأثير الفراشة يقول...

ربنا يعين حضرتك بإذن الله

و ربنا يستر على العام الدراسى السنة دى
و بالنسبة للترحيب فعندى لحضرتك اقتراح ، وهو أن تذهب للمدرسة بالكمامة

منها وقاية و منها تكون قدوة للطلبة و المدرسين فى أول يوم دراسة

بالتوفيق لحضرتك إن شاء الله

كيكى عوووووو يقول...

عاااااااااااااااااااااا
انا مش مصدقة اصلا انها بدأت!!!
مش متخيله ازاى هصحى بدرى هنرجع تانى للضرب ع القفا1!!

mohamed ghalia يقول...

ربنا يصبرك ياعمنا

المعتصم يقول...

بسم الله الرحمن الرحيم
السلام عليكم ورحمة الله وبركاته
*************
تأثير الفراشة
اهلا اهلا يادكتورة نهى
منورة الدنيا
للاسف ماشفتش الاقتراح بتاعك غير بعد مارجعت من المدرسه
انما الحمد لله عدت على خير ومن غير احضان ولا حاجه
مش باقى بس غير ان ربنا يكملها بالستر وتعدى السنه دى على خير
شكرا على مرورك الجميل
************
انت تسأل والكمبيوتر يجيب
طب انا ببقى الساعه 9 الا عشرة دى فى المدرسه
انما هحاول اتابع المدونه
**************
كيكى عووووووووووو
ايه حكاية الضرب على القفا دى
عرفينى
انا لسه مستجد
علشان ابقى عامل حسابى وجاهز
هههههههههههههههه
نورتى ياكيكى
*************
محمد غاليه
صديقى العزيز
تحياتى
وشكرا على مرورك الجميل يابوحميد
تحياتى ودمت بكل خير وود

Unknown يقول...

كل سنة وأنت
طيب النهاردة بقى
بدأت عندنا فى الجيـزة
والزحمة حتبقى للركب
ربنا يعينا علـى
تعدية الشارع:)

انت تسال والكمبيوتر يجيب يقول...

الأخ العزيز صاحب المدونه المتميزه
السلام عليكم ورحمة الله وبركاته
نرجوا الا يكون لديك مانع لو قدمنا حلقه من برنامجنا الأذاعى من أذاعة مصر الرئيسيه عن مدونتك ...وسنعلمك بموعد أذاعتهاالذى ننشره فى مدنة برنامجنا بعد العشره مساء كل يوم ثلاثاء...وكافة التفاصيل فى هذه الدعوه
نحن اول برنامج أذاعى عن النت والمدونات ويذاع يوميا عدا الجمعه التاسعه وعشر دقائق صباحا على موجات الأذاعه الرئيسيه لمصر
نحن نطرح موضوعات الحلقات قبل اذاعتها فى مدونتنا لبعلق عليها اصحاب المدونات او غيرهم من الزائرين
ونذيع هذه الموضوعات مع التعليقات ومقتطفات من مدونات اصحابها اذا رغبوا
وبذلك نجمع لأول مره بين الأعلام التقليدى والنت
مدونتنا
http://netonradio.blogspot.com

بـسـمـــة صـــــلاح يقول...

السلام عليكم
ازيك يا أستاذ معتصم بيك
يارب يارب يارب تكون بخير
ها انهرده الأحد
ياترى عملت ايه امبارح
بجد والله من قلبي انت صعبان عليا
ربنا يفكك من الشغلانه دي بشغلانة احسن منها مليون مرة

بجد البوست بتاعك لذيذ
وابقى جيبلي كتاب عليه نقطة بمبي
هع هع هع

دعيتلك وانا صايمه على فكره

ادعيلي بأه ربنا ييسر موضوعي مع الجامعه الهباب دي اللي كرهتها قبل ما ادخلها

تحياتــ أختك الصغننة

المجاهد الصغير يقول...

السلام عليكم
ربنا معكم
ولكن اخويه مدرس وبيقول مجاش فى الفصل الا
8عياااااال بس
جعله الله فى ميزان حسناتك وتقدر ان شاء الله تغير منهم الى الافضل

ريمان يقول...

ههههههههههههه



شر لا بد منه



انا بقى بسبب موضوع انفلونزا الخنازير الحضانات قفلت


يعنى هقعد فى بيتنا


ههههههههههههههه


شر البليه ما يضحك


صوتوا عليا

ريمان يقول...

هو الواد مصطفى الصغنن بقى عسل كده ليه

riham attya يقول...

ههههههههههههههههههههههههه

معلش يااستاذ مصطفى انا هقول كل سنة وحضرتك طيب متاخرة شوية

بس بجد انت حسستنى ان اول يوم ده كابووووووووووووووووووووووس

بس عارف حضرتك مع احترامى لكل المدرسات
انا كنت بمووووووووووت من حكاوى القهاوى اللى كنا بنسمعها منهم
انا بكره التدريس للسبب ده

ويارب محدش من زمايل حضرتك يشوف التوبيك ده لحسن اللى مزعلش منك فى المدرسة هيزعل هنا وخصوصا موضوع البصل ده ههههههههههههههههههه

وبعدين انا لفيت حل لحضرتك لكتاب زيزو صاحب النقطة الحمرا حضرتك ممكن تبدل الكتب للاتنين زيزو ياخد كتاب زميله والتانى ياخد كتاب التانى يوووووووووووووه ايه اللخبطة دى الله يعينك

Unknown يقول...

جميل يا مستر
بتفكرنى بفيلم رمضان مبروووك
لسة شايفه من اسبوعين
ربنا يوفقك

قم للمعلم وفه التلطيشا
كاد المعلم ان يكون قتيلاً

مع كامل احترامى ليك طبعاً
:-)

المعتصم يقول...

بسم الله الرحمن الرحيم
السلام عليكم ورحمة الله وبركاته
*************
الدكتورة نور
وزيرتنا المنورة
تحياتى
وكل سنه وانتِ طيبه ياافندم
وربنا يعينك على الزحمة
بس ابقى نزلى السيكيورتى قبل معادك بساعه علشان يقدروا يفضولك حته تعدى منها الشارع للناحيه التانيه
هههههههههه
نورتى يادكتورتنا
***********
انت تسأل والكمبيوتر يجيب
وعليكم السلام ورحمة الله وبركاته
بالتأكيد لايوجد اى مانع بل بالعكس ده شيء يسعدنى ويشرفنى
بس المشكله فى ميعاد اذاعة الحلقات الخاصه بالبرنامج انها فى التاسعه وعشر دقائق صباحا واكون انا فى عملى وطبعا مش بعرف اسمع البرنامج على الرغم من انى كنت متابع قديم له(ايام ماكنت مدمن راديو)
شكرا على اهتمامكم الجميل
واسعدنى مروركم وفى انتظار الموعد
تقبلوا تحياتى
***************
بسمه صلاح
وعليكم السلام ورحمة الله وبركاته
الله يسلمك يابسمه هانم
اخبار سموك ايه ؟؟ يارب تكونى بخير
مايصعبش عليكى غالى
الحمد لله اليوم عدى على خير والكل كان عامل زى حلاتى ومتوجس خيفه بس يعنى مايمنعش كام حضن على خفيف كده
بس ده اهون كتير من اللى بيحصل كل مرة الحمد لله
انتِ هشيلك كتاب عليه نقطه موحموحى
ههههههههههههه
شكرا على دعواتك الجميلة وربنا يتقبل منك ولكِ بالمثل ان شاء الله
ايه انتِ من اولها زهق كده ؟؟ لااااااااا كده ماينفعش الصبر طيب علشان الدنيا تبقى حلوة وتعرفى تظبطى امورك كويس طولى بالك
ربنا يكرمك يارب وييسرلك الامور
نورتى يابسومه هانم
**************
المجاهد الصغير
وعليكم السلام ورحمة الله وبركاته
اهلا اهلا ام انس
يابخت اخوكى
انا المدرسه بتاعتى العيال فيها جهابزة وبيحبوا التعليم حضروا كلهم
ولما قسمناهم يومين يوم للولاد ويوم للبنات بقوا برضو ييجوا مع بعض
شكرا على دعواتك وربنا يعينا عليهم
نورتى المدونة بمرورك
**************
ريمان لماضه هانم
يالههههههوووووووووووووووووووووى
ياخرررررررااااااااااااااااااابى
ياختى ياختى ياختى ياختى ياختى
(هه اصوت تانى؟؟؟؟)
ههههههههههههههه
وبقيتى عاطله من قبل ماتشتغلى ياريمو
ماكنش يومك
ههههههههههههههههههه
..........
مالكيش دعوة بالواد مصطفى الصغير علشان البت بسمه بتغير عليه انا بقولك اهه
يعنى ممكن تعملك مشكله وانا خايف عليكى
ههههههههههههههههه
نورتى يالماضه
************
ريهام عطيه
وكل سنه وانتِ طيبه
ولا يهمك متأخره متأخره عادى يعنى
اول يوم فعلا بيبقى كابوس لانه لما يعدى على خير يبقى كله تمام بعد كده وهيمشى والدنيا هتبقى حلوة

مش كل المدرسات رغيات على فكرة
انما فيهم ناس تطفش انا معاكى
الحمد لله بقعد بعيد عنهم انا ماعنديش روح وخلق ليهم
وبعدين هو التدريس كده كده يتكره

وحتى لو زمايلى شافوه ايه يعنى انا مش بتبلى على حد فيهم انا بقول واقع بيحصل فعلا وانا مش بقف على حد بشوط على طول ماتقلقيش
الحمد لله فلت من حكاية الكتب واتدبس فيها واحد زميل تانى الله يكون فى عونه انا اتلككت بحاجه تانى
ومتشكرين على الحلول اللوزعيه ياست ريهام
انما قوليلى بقى ربع ساعه علشان اكتب تعليق عندك ومااعرفش ليه بقى؟؟ خلى التعليقات فى صفحه منفصله احسن
نورتى المدونة بمرورك ويارب ماتبقاش اخر زيارة
*************
بدراوى
انت قديم قوى ياشعراوى
الفيلم ده من زمان ده انا سمعت اللى نزل بعده بتاع رجب شعبان رمضان مبروك
وبعدين ياشعراوى لما تكتب شعر يبقى تكتبه صح
قم للمعلم وفِهِ التلطيشا
كاد المعلم ان يموت قتيلا
بس خد بالك بقى انا علشان كنت من اكتر الناس المرددين لهذا البيت عامل حسابى كويس وبروح المدرسه معايا السلف دفنس بتاعى(ومش اى سلف دفنس يابنى ده دفنس صعيدى يعنى ربنا يكفيك شره)
ماتقلقش ياابوحميد اخوك جامد
هههههههههههههه
وبعدين الاحترام واضح جدا بصراحه
نورت يا احمد
ســــــــــــــــــــــلام

عالم حبيب يقول...

ربنا يعينك وعام دراسي سعيد :)

المجاهد الصغير يقول...

القرضاوي يدعو لجعل الجمعة القادم "يوم غضب" لنصرة الأقصى
ياريت نكون يد واحده ونشارك
التفصيل "موقع امل الامه"

semsem يقول...

كل سنة وانت طيب

انت تسال والكمبيوتر يجيب يقول...

الصديق العزيز المعتصم
حلقة برنامجنا الأذاعى انت تسال والكمبيوتر يجيب على الأذاعه الرئيسيه لمصر يوم الخميس8-10-2009 خصصناها لمدونتك
والبرنامج يذاع التاسعه وعشر دقائق صباحاعلى موجات البرنامج العام 819 المتوسطهاو على موجات اف ام حسب كل منطقه فى مصر او على القمر الصناعى نايل سات قسم الراديو البرنامج رقم1 كما يوحد رابط فى مدونتنابالضغط عليه والأنتظار قليلا يمكنك ان تسمعنا الرابط تحن صورة المشتركين فى البرنامج الى اليسار فى مدونتنا
http://netonradio.blogspot.com

عابر سبيل يقول...

بسم الله الرحمن الرحيم
السلام عليكم ورحمه الله وبركاته
اولا كل سنة وانت طيب بمناسبة الدراسة ووجع القلب زي ما قلت
بس عارف انا عايزة اقول حاجه صغيرة اوي ليه كلنا بنعتر الدراسه هم علي قلوبنا مش بس واحنا طلبه لأ و مدرسين كمان عارفة انت لازم تحب اللي انت بتعمله ودرسه للاولاد كمان بحب وياريت كان عندنا في مدرسنا فرصه ان احنا نقلد المعلم الاكبر النبي عليه الصلاة والسلام اللي كان بيعلم الصحابه وعلم معاهم امه كامله الي يوم الدين واستحلم الاذي واستحمل اللي معندوش اي فن في التعامل زي الاعراب وغيرها من المواقف
عايزة اقولك اتعلم من النبي وخلي دماخ العيال تشتغل شويه ببقي اللي بنخليها توقف تماما عن التفكير باسلوبنا الخاطئ في التعليم
وهضرب مثال بسيط في في تعليم النبي للصحابه لما قال عليه الصلاة والسلام اتدرون من المفلس بصيغة سؤال وكل من الصحابه يتخيل الرد وكان عليه الصلاة والسلام لا يسخر من رأي احد لان لكل منا وجهه نظر
وصية لي اولا انظر الي ما تعمل ومدي اهمية هذا العمل واعقد او جدد النيه واستعن بالله وابدأ وربنا يوفقك فانت في يديك اجيال فهم امانه من يدري قد يكون ممن تعلمهم هم من يفتح الله علي ايديهم
والله المستعان
عابر سبيل

المعتصم يقول...

بسم الله الرحمن الرحيم
السلام عليكم ورحمة الله وبركاته
************
عالم حبيب
تحياتى نورتنى بأول زيارة ويارب ماتكونش الاخيرة
وشكرا على مرورك الجميل
************
المجاهد الصغير
هحاول ادخل موقع امل الامه واشوف انا اقدر اعمل ايه واشارك ازاى
شكرا على اهتمامك
************
غير معرف
مش عارف انا متهيألى المقاله دى قريتها قبل كده
بس هبقى ادخل على الموقع واتأكد
شكرا على المرور
(بس ياترى انت مين؟؟؟؟)
*************
semsem
وكل سنه وانتِ طيبه
وشكرا على المرور الجميل
************
انت تسأل والكمبيوتر يجيب
اشكر اهتمامكم وان شاء الله هسمع الحلقه بس بعد ماارجع من الشغل على الموقع
ومرة تانيه انا بيسعدنى التواصل معكم
**************
عابر سبيل
وعليكم السلام ورحمة الله وبركاته
وكل سنه وانتِ طيبه اختى الكريمه
والله وحشتنى ارائك ومناقشاتك وحتى اختلافنا فى الرأى
ولعل اسباب الغياب تكون خير ان شاء الله
..........
اولا اعتبار ان الدراسه هم ده مش علشان الدراسه فى حد ذاتها
علشان الامور الغريبه اللى بتحصل فيها من تحكمات فاضيه لناس جاهله ماتعرفش حاجه ناس حافظه اكتر منها فاهمه هى بتعمل كده ليه
انا عن نفسى بستمتع جدا وانا بشرح والا حظ ان الطلبه فاهمين ومندمجين معايا فى الدرس
انما المشكله انك لما تبقى عاوزة تعملى ونفسك مفتوحه للشغل ويطلع واحد مابيفهمش ويحسسك انك ولا حاجه وانك مش بتصلحى لأ بالعكس انتِ كده بتخربى العمليه التعليميه
اعتقد ساعتها هيبقى شعورك زى شعور باقى الناس اللى بتعتبر الدراسه هم على قلبها
صحيح واجب علينا اننا نحاول تقليد قدوتنا ومثلنا الاعلى رسولنا الكريم عليه افضل الصلوات والسلام
بس احنا بنحاول انما قدرنا او فشلنا دى حاجه مش بايدينا يااختى الفاضله
وبعدين رسولنا الكريم كان مكلف مش بتعليم شوية حاسب او كام درس ممكن مايكونش لهم لزوم ده كان مكلف من قِبل رب العالمين بنشر اسمى الرسالات وهى رسالة الدين الاسلامى فما مافيش وجه للمقارنه فى الحالتين
وبعدين انتِ داخله فيا شمال ظلم
ليه بقى ظلم
هل انتِ تعرفى انا بعلم العيال ازاى ؟؟ او بعمل معاهم ايه علشان يتعلموا؟
بتقولى اسلوبنا الخاطئ فى التعليم ومين قالك انى انا بشرح باسلوب خاطئ انا ماليش دعوة بسياسه وزارة التربيه والتعليم انا كل اللى يربطنى بالوزارة المنهج وبس
انما طريقة الشرح والاسلوب ده بتاعى وانا بحاول اول حاجه اعملها انى احبب الاولاد فى الماده بتاعتى وبعدين افهمهم الدروس ومش علشان ينجحوا فيها وخلاص طب ماانا قادر انى انجحهم وخلاص من غير مايعرفوا حاجه او يفهموا حاجه انما دى بتبقى حاجه تفيدهم فى المستقبل
وبعمل امتحان واجيب جوايز من فلوسى الخاصه للطلبه الشاطرين علشان باقى زمايلهم يغيروا منهم ويحاولوا يعملوا زيهم
وشوفى بقى اللى بيتقال عليا من الزملاء ايه انما ده مش معناه انى انا هغير اسلوبى لانى انا شايف ان دى رسالتى لغاية ماربنا يكرمنى بالشغل فى الحاجه اللى بحبها
اعتقد يااختى الكريمه انك هاجمتى من غير مايكون هناك داعى للهجوم
انا بحترم رأيك جدا وكتير كنا بنتناقش ونرد على بعض انما المرة دى انا وضحت موقفى وانا شايف انى انا والحمد لله بعمل اللى عليا ودى انتِ مش هتقدرى تحكمى عليها يبقى مافيش داعى للنقاش فيها تانى
وموضوع الامانه الحمد لله ومش هتكلم فيه علشان مافيش حد ينفع يتكلم عن نفسه
نورتى المدونة بمرورك وياريت ماتطوليش الغيبه
تحياتى ودمتِ بكل خير وود
والسلام عليكم ورحمة الله و بركاته

أحمد عاطف يقول...

معتصم

الله يحظك

فكرتني بالاستاذ عماد مدرس الرياضيات بتاعنا

الله يكون في عونك

المهم شوف عروسة كده من الابلوات اللي معاك

اكيد فيهم واحده شبه سعاد محمد اهي ارحم من عيشة الكيلاني