الاثنين، 28 سبتمبر 2009

يوميات مُدرس (عكننة الموجهين)

بسم الله الرحمن الرحيم

السلام عليكم ورحمة الله وبركاته

اولا انا بشكر كل الناس اللى سألت عليا

وبشكر مرورهم الجميل ودعواتهم الاجمل

وربنا مايحرمنى منكم ابدا يارب

*********

صحيت من النوم الساعه6.30 الصبح فايق كده

وليا مزاج اروح المدرسه اظبط شويه حاجات هناك قبل الدراسه ماتشتغل

بعد الطقوس اليوميه المعتاده طلعت من البيت وركبت العربيه

وبعد رحلة العذاب اللى قلتلكم عليها قبل كده وصلت المدرسه على الساعه 8 كده

كنت واخد معايا الغلايه والشاى والنعناع ومروق المسائل على الاخر

عملت واحد نعناع محترم وبعدين طلعت العده

الاسطوانات بتاعة الويندوز والاوفيس والسى دى روم وال دى فى دى روم بتوعى

وكمان المفك التست والبيلور علشان اعرف اظبط الكيسات بتاعة المعمل

وابتديت اركبهم على الاجهزة واحط الاسطوانات وافرد النسخه

ولقيت المدير بينده عليا

سلامات وطيبون وكل سنه وانت طيب والكلام ده كله

وبعد اذنك ياباشا علشان مش فاضى

طيب اتفضل ربنا يقويك

خمسه كده وتعالى كلم علشان الباشا الموجه بتاع المتابعد جه

حاضر ياعم حسن

نزلت اهلا وسهلا ومش عارف ايه

الباشا اخد لفه فى المدرسه وكل اما يشوف حاجه يقول انا هكتب مذكرة كده غلط ده انتو تروحو فى داهيه

انا هعمل انا هسوى

وكأنه اول مرة يجى المدرسه بتاعتنا على الرغم من انه كل اسبوعين مشرفنا

ليه دا كله يااستاذنا بس؟؟؟؟

علشان انفلونزا الخنازير

طب وهى انفلونزا الهباب مالها ومال القزاز المكسور؟؟

ده بيعمل تيار هوا وممكن يتعب الاولاد

والله ؟؟؟؟ تصدق مكنتش اعرف وهو على كده احنا لازم نقفل كل الشبابيك ؟؟؟

طبعا

وايه كمان؟؟

قعد واتجعص وحط رجل على رجل وابتدى يقول :

اولا الدراسه هتبقى 3 ايام و3 ايام

يعنى سبت واتنين واربع لمجموعه

والمجموعه التانيه حد وتلات وخميس

والطلبه اللى تشكوا انهم مصابين تحجزوهم فى فصل لوحدهم

طب معلش ياباشا سؤال والنبى

اتفضل

مين بقى اللى مستغنى عن عمره وهيدخل يشرح للطلبه دول؟؟؟؟؟؟

ماليش دعوة

نعم يااخويا

انا مااعرفش انا التعليمات بقولهالكم وخلاص

طب كده تبقى الحصص اتضاعفت يعنى اللى بيدى 20 حصه هيدى 40 حصه دى حلها ايه؟؟

مااعرفش هو اكيد الوزارة هتشوفلها حل بعدين

بعدين امتى ياعم ؟؟ المدارس بعد كام يوم

هو كده واللى مش عاجبه يخبط دماغه فى الحيط ويستقيل استحملوا البلد شويه دى ظروف قهريه الله عليكم

طب مااحنا طول عمرنا واحنا مستحملين فى القهريه وفى الغير قهريه

هو كده ولازم تتصرفو وتظبطو المدرسه قبل ماالدراسه تبداء والا هتاخدوا جزاءات كبيرة

طب ياعم ادونا الميزانيه واحنا نشتغل

ده انا ماليش فيه روحو اشتكوا بتوع الشئون الماليه انا ماليش دعوة

طبعا بعد البقين الحامضين دول نفسى كانت مفتوحه للشغل جدا جدا جدا

المدير بيقولى اطلع كمل شغل يامصطفى

نعم ؟؟؟ شغل ايه اللى اكمله ؟؟ انا مش مسئول عن صيانة الاجهزة دى ادونى بلاغ اعطال

كتبت البلاغ ومضيت عليه واديته للمدير وطلعت لميت العده بتاعتى وانا بدعى على الموجهين وعلى التربيه والتعليم وعلى الظروف وعلى ..... ولا بلاش احسن

ويبقوا يقابلونى لو الاجهزة دى بقى اتصلحت دا انا مبلغ يجى 9 مرات السنه اللى فاتت

وحسبى الله ونعم الوكيل يعنى مقدرش المنيل يتأخر يوم واحد كان زمانى ظبطت الاجهزة

ادى اللى واخدينه منهم العطله وقلبة الدماغ على الفاضى

ودى طبعا السياسه العليا فى البلد واحنا بنفذها على بعض

وكفايه كده علشان انا متغاظ وممكن اخبط فى الحلل

ســـــــــــــــــــــــلام

هناك 80 تعليقًا:

غير معرف يقول...

Wait !!!

بـسـمـــة صـــــلاح يقول...

دا ايه دا
لا مليش دحوة انا اول كومنت

بـسـمـــة صـــــلاح يقول...

والتاني كمان

بـسـمـــة صـــــلاح يقول...

اقولك حاجه

بجد اتنرفزت اتنرفزت اتنرفزت
دا ايه دا
اذا انا اللي مش في الموقف اتخنقت
ربنا يعين حضرتك بجد

نفسي قبل ما اموت افتخر ببلدي ولو ثانية
والله العظيم حرام اللي بيحصل دا


ربنا يصبرنا


استمر في يوميات مدرس دي وانقظنا كل ماده كدا
هع هع هع
اصل انا منقوطه لوحدي فمش هتفرق
اهو نكتسب خبرةههههههههه

ربنا يرزقك بشغلانه احسن من كدا مريحة ومرتبها حلو
ويرزقك ببنت الحلال يابني
آآآآمين يارب

تقبل مروري
أختك الصغننة بسومة النعومة

بـسـمـــة صـــــلاح يقول...

احم احم انا سألت وحدرتك بردو مسألتش

خد بالك اصل انا قنبلة موقوته
نياهاهاهاهاهاهاهاهاهاهاها

Remas يقول...

ازيك يا استاذ مصطفى

تصدق انا مرعوبة وخايفة من موضوع المدارس دا

مش عارفه هاودى بناتى ازاى في الوضع دا وهما صغيرين يعنى الخوف عليهم اكتر

وانت كلامك قلقنى هما لسا دلوقتى جايين يشوفو هايعملو ايه

طيب كانو فين من زمان وكمان بيقول مش له دعوة امال مين اللى ليه دعوة

تصدق من انت بس اللى نفسك كانت مفتوحة واتقفلت انا كمان كدا دلوقتى

حسبنا الله ونعم الوكيل

والله يكون في عونك

المهم هدى نفسك انت للاسف بلدنا اصبحت كلها كدا

دكـــــتور جدا يقول...

ههههههههههههه
ربنا معاكم
تقبل تحياتي

fL0weR-giRL يقول...

هههههههههههههههههههههههههههه
ههههههههههههههههههههههههههههههه
ههههههههههههههههههههههههههههههههههه
لحظه هو الموجه داه كدا شكله كبير في السن وبيخرف

هو الهوا اللي بينقل العدوه اكذا الأعلانات بيقولوا فيها لازم التهويه وفتح الشبابيك لكن المراوح لا واكيد طبعا المدارس مافهاش مراوح والله بلد تكسف

الله يكون في عونك ياأستاذ مصطفي وانا لو مكانك كنت مسكت الكرسي وخبطه علي راسه بيه هههههههههههه عم بمزح طبعا هههههههههههه

والمدرسين اكيد لو واحد عنده حاجه منكن يتعدي استغفر الله بجد دوله غريبه ومش عارفه تتصرف في المرض الغبي داه

ياربي احفظ كل المسلمين ومتبقاش نهايتهم الموت بسبب خنزير احنا اصلا مش بنحبهم وملناش علاقه فيهم يااااارب ابعد عنا المرض ياااااارب ويحفظنا


** تقبل مروري **

المجاهد الصغير يقول...

السلام عليكم
عرض متميز
وحسبنا الله ونعم الوكيل على الروتين الى هيرجعنا لوررررررررررررررا
تعلم ان فى امريكا اول الدول المنتشر فيها هذا الوباء لا تأخر الدراسه؟؟؟

عمرو جويلى يقول...

مصطفى باشا
السام عليكم
هى دى دولتنا والتربية والتعليم
جزء منها
لا نظام ولا تخطيط لأى حاجة
ومفيش حد عارف حاجة
الدراسة يوم السبت القادم ولسه مجلس المحافظين هيجتمع يوم الثلاثاء لمناقشة خطة المحافظات فى التعامل مع إنفلونزا الخنازير
تقبل مرورى

amr imam يقول...

هذا قدرنا ويعيننا الله علية
انا جاى ادعو حضرتك لتشريفى
انا بتكلم فى موضوع مهم عن الادمان
وتجربتى معاة وانتصارى علية
انا نفسى اكبر عدد من الناس يستفيد
ولو بالعظة وبما ان حضرتك مدرس يبقى ان شاة الله عدد كبير ممكن يستفيد بالتجربة دية من خلالك
مع فائق تحياتى

adel يقول...

سعد الله
الله يرحمه

مفيش فايدة

الطلبة متموتش لكن المدرسين تموت عادي

والله مشروع قومي رائع

وحلوة قوي حكاية درس الاول و بعدين اشتكي دي

بس ااقولك
لا يأس مع الحياة ولا حياة لمن تنادي

طوبه فضه وطوبه دهب يقول...

agmal syasa wat3m syasa ah el takhbet fl 7lal dah el bald fshada mra nst7mlha shwya matol 3mrha msta7mlana wmaklana wmshrbana wmortbat blhabal mdyana b3d kol dah manst7mlhash shwya azma wt3dy wsba7 el n3na3

المعتصم يقول...

غير معرف
مش فاهم
هى wait يعنى استنى صح؟
استنى ايه؟؟؟؟؟
اوعى تكون انت او انتى من ولاد ابواسماعين
انا مش بتهدد
***********
بسمه هانم احتلال
وزيرة السكافه عندنا
نمشيها ياافندم اول تعليق ومحدش يقدر يكح
كح كح كح
بس ماتقلقيش لسه الامل موجود قولى يارب
ممكن قبل ماتموتى(بعدالشرعليكى)تحصل حاجه تخليكى تفتخرى يامسهل
وياحضرة القنبلة الموقوته النت لسه راجع النهارده بالراحه عليا ده انا اخوكى الكبير عيب تشخطى فيا كده قدام الناس خليها بينى وبينك
ههههههههههههههه
نورتى يابسومه هانم
**************
ريم
تحياتى
الله يسلمك
مش انتِ لوحدك اللى مرعوبه دى البلد كلها مرعوبه وللاسف الحكومه عندنا ماعندهاش تخطيط لاى حاجه والناس مش فاهمه اى حاجه فى اى حاجه
بس ان شاء الله خير لانى لغاية دلوقتى على مابسمع يعنى ان كل الحالات اللى ظهرت المصابين فيها جايين من برة يعنى احنا نبعد عن اى حد جاى من برة ونخلينا جوه وربنا يسترها ان شاء الله
هههههههههههههههه
نورتى المدونة
***************
ضكتور جدا
منور بلوجر يادكترة
وايه الصور النار دى ياعم
هههههههههههه
شكرا على المرور الجميل
************
فلور جيرل
تحياتى ياكيميائيه
هو الموجه كبير فى السن بس مش بيخرف
ليه بقى لان مدرستنا احنا فيها مراوح
شوفتى ازاى
وكمان هى دى الاوامر والتعليمات اللى بلغوهم يبلغوها للمدارس يعنى الراجل مش جايب حاجه من بيتهم
وامين على دعواتك
نورتى المدونة بمرورك الجميل
*************
المجاهد الصغير
وعليكم السلام ورحمة الله وبركاته
تحياتى اختى الكريمه
حسبنا الله ونعم الوكيل فعلا
بس هو انتِ شايفه انها لسه هترجعنا لورا!!
ماهى رجعتنا فعلا
هههههههههههههههههه
نورتى المدونة بمرورك
**************
اللؤلؤة
صديقى العزيز المنوفى التمام
وعليكم السلام ورحمة الله وبركاته
ياعمنا يجتمعوا ولا مايجتمعوش مش هتفرق كتير
يعنى هما هيعملوا ايه؟؟ ولا حاجه
لانه اصلا هما مش فارقه معاهم حاجه ومافيش حد فيهم عارف حاجه
ماعلينا ربك هو الستار
نورت المدونة ياباشا
**************
عمرو امام
تحياتى
اهلا بيك فى اول زيارة
هو قدرنا ونحمد الله على كل حال وندعوه بصلاح الاحوال يارب
ان شاء الله نزورك ونستفيد من تجربتك ونتعلم منها لانها فى موضوع خطير ومهم فعلا
نورت المدونه واسعدنى مرورك
************
عدوله
حبيب قلبى
بلدياتى العزيز
منور بلوجر كله ياعمنا
اسكت على الرغم من انى مش بحب سعدالله الا انه قالها حكمه مافيش فايده
اييييييييييه الله يرحمه
وبعدين انت مش فاهم الحكمه من ورا الموضوع ده
المدرسين كتير ونسبة البطاله عاليه يعملوا ايه؟؟؟ يموتوهم فى الوبا ويعينوا غيرهم ويبقوا ضربوا غرابين بزلطه واحده
خليك ناصح يادولا
نورتنى ياباشا
***************
طوبه فضه وطوبه دهب
تحياتى
اهلا بيكى فى اول زيارة ويارب ماتكونش الاخيرة
والله كل واحد حر فى رأيه اجمل سياسه واطعم سياسه انتِ حره
انما انا مقدرش اخبط فى الحلل ده انا غلبان وعاوز اتجوز وافرح بنفسى
مش عاوز اروح العنبوكه المسماه منتجعات العادلى السياحيه
اصل الحاجه هناك غاليه قوى وانا ظروفى ماتسمحش
خلينا جنب الحيط الله يسترك
ههههههههههههههههه
نورتى المدونة بمرورك الجميل
تحياتى ودمتم بكل خير وود

بـسـمـــة صـــــلاح يقول...

احم احم احم
انا كييييييييييييييييييت

بـسـمـــة صـــــلاح يقول...

واد ياعمو معتصم

اصدي يا اخويا الكبير
المصيبه اني مش عارفه اكون مؤدبه
هههههههههههههه

مش كنت تستنى شوية تعلق على البوست الجديد
يلا اتفضل اتفضل
المدونه مدونتك
تعالى اقرا وهتعرف اجوبة اسألتك

اسكت مش بابا كلمني وعيط عليا في الموبايل
هتعرف السبب لما تيجي
تعالى في انتظارك

تشااااااااااااو

غير معرف يقول...

هههههههههههه

البلد دي بلد ورق والنعمه.... وانت غلطان اوساسا ان عندك ضمير .... اديهم ورق مذكرات وانت تبقا المدرس المثالي

عاجبني تعامل الحكومي مع انفلونزا الحلاليف ..... كده اضمن ان المرض هينتشر ويتوغل ويتسرب .... وهتقفلوا المدارس بعد اسبوع وترتاح وتنام في البيت

عود احمد :)

أبو العريف يقول...

ههههههههههههههه

ربنا يكون في عونك والله

ولله هو دا حال بلدنا

اللي عاجبه يقعد

واللي مش عاجبه

البلد تفوت جمل

انا شخصيا مش عاجبني

وسبت البلد

بس هرجع وارضي بالامر الواقع وابوس ايدي شعر ودقن كمان

اصل الغربه مره

شوكولاتة يقول...

سؤال صغنن بس يا أستاذ مصطفى هوه سعادته موجه إيه بالظبط عربي ولا كمبيوتر ولابيعمل إيه في دنيته علشان جاي يتكلم عن أنفلونزا الخنازير وهوه إيه معلوماته عنها اصلا اللي خلى الحكومة مش فاهمة حاجة سعادته يعني هايفهم وكله كوم وموضوع الإزاز كوم تاني ده أنا قربتت أكسر إزاز بيتنا كله
معلش استحملهم بقى واصبر عليهم

عودُ أحمد نظيف
هع هع

حفيدة عرابى يقول...

الناس دى بتبقى حافظة مش فاهمة

انا حسيت انك بتتكلم عن مدرستنا

كل واحد مش فاهم حاجة بييجى يضيع الكلمتين اللى فهمناهم بالعافية

بس ملحوظة صغيرة

الطلبة اللى بعدالشر هيجى لهم انفلونزا هيبقوا فى غرفة العزل مش فى فصل
يعنى محدش هيشرح لهم
اما موضوع احنا نموت دى او نشتغل 40 حصة مفيش فيها اى مشكلة

مادام الاستاذ الوزارة قال ماتعترضش يااستاذ

رحلتنا في الحياة يقول...

السلام عليكم ورحمة الله وبركاته
ازيك يابن عمتى صح ولا انا نسيت انت بتقولى يابنت خالى يبقى انا اقولك يابن عمتى صح كده ^_^

اولا احب اسجل اعجابى بصورة الولد المتختخ ده جميل أوى اصل بموت فى العيال المقلبظة دى :)

ثانيا مش عارفة ليه انت محسود تصور مكملتش سنة فى الشغلانة وماشاء الله مصايب التعليم كلها بتتكركب وراء بعض هههههههه دور على مين اللى حسدك

وبعدين انت زعلان ليه كل يوم روح الشغل بشاى والنعناع وسلاطاتك باباغنوجك وعيش حياتك وتروح ليه وتوجه دماغك مع عيال مش بتفهم ده حتى العيال اصلا مش هتروح وابقى قابلنى لو عيل شاف وش مدرسة السنة دى اصل العيال دول شياطين هتلاقى العيل منهم يعمل نفسه عيال ومعرف ايه امه تقوله لا ياعين امك ارتاح فى البيت
المثل بيقول ضربوا الاعور على عينه
والاعور ده التعليم وهو خربان خربان
وقريبا اكيد هيلاقوا حل هيسرحوا العيال بورد فل فى الميادين اهو يعملوا باكلهم :)

رحلتنا في الحياة يقول...

صحيييييييييييييح انا ماخدتش العيدية وبطلوا بخل بقى ولو العيدية موصلتنيش فى المدونة انا هبلغ عنك اولاد ابو اسماعين اللى معرفش دول مالهم بيك بس تقريبا كده شكلك عليك تار وخايف منهم :)

غير معرف يقول...

ازيك يامصطفى عامل ايه
عارف يامصطفى انا لسة متصلة بمدرسة
مالك النهاردة والسكرتيرة قالت لى لاالوقت
حيتقسم 3 ايام و3 ايام ولاحاجة
ومفيش اى استعدادات للمدرسة غير عادية ورغم انها مدرسة خاصة الاان كثافة الفصول كبيرة
ولغاية دلوقت مش عارفة حنعمل ايه
هل حوديه ولامش حوديه
وزعلانة قوى من الحوار بتاع الموجه
وزعلى علشان خلاك ماتكملش صيانة
الاجهزة يعنى حتى الناس اللى عندها ضمير
المسئولين فى بلادنا مصرين يسدوا
نفسهم
تحياتى

توتة المخنوقة يقول...

اذيك يا مصطفى عامل ايه

والله انا اتخنقت من الموجه ده

وربنا يستر على التعليم وعلى الطلبه من البلاوى الى بتتحدف عليهم

وربنا معاك انشاء الله

Ahmed يقول...

ههههههههههه

عسل يامصطفى انت والحلل بتاعتك ديه

يعني الراجل مغلطش
وانت مغلطتش
والمدير مغلطتش
والمسؤلين مغلطوش
انا شايف ان عم عبده بتاع الكنتين هوا اللي غلطان وعشان كده لازم نعدمه رميا بالصرم في ميدان الرمايه

اه يابلد اتقلب حالها من بدري ومش باينله عدله قريب

Kiara يقول...

40 حصة ايه الافترا داااااااااااا

كويس اني نفدت اني اطلع مدرسة كان زماني اتبهدلت

ربنا يكون في عونك ياااااااااااااارب

المعتصم يقول...

بسم الله الرحمن الرحيم
السلام عليكم ورحمة الله وبركاته
**********
بسمه هانم
جيتى تانى ليه ؟؟ هه
انا زعلان منك
مااستنيتش وروحت تانى ياستى ولقيت الخبر اللى زعلنى منك بتاع جامعة الازهر
وكتبتلك السبب هناك
تشااااااااااو
************
فتاة من الصعيد
ازيك يامروة
هيحصل هيحصل ماتستعجليش
قال وانا اللى كنت ناوى اخلى العيال يبقوا اشطر منى فى الكمبيوتر
شوفتى الخيبه
التعامل الحكومى بتاعنا زى الفل
ايه عاوزة تعملى فينا ايه ده احسن تعامل حصل مع الحلاليف وانفلونزتها فى اى حته لحد دلوقتى خلى بالك
ويسمع منك ربنا(بس هما لما هيقفلوها المرتبات هتفضل ماشيه مش كده برضو؟؟؟)
وعلى فكرة احمد عاوز العود بتاعه
ههههههههههههه
نورتى يامروة
**************
ابوالعريف
تحياتى
اهلا بحضرتك فى اول زيارة
وياسيدى عاجبنا شئنا ام ابينا
لانه حتى الغربه مش راضيه بينا
وبعدين احنا عارفين ان البلد تفوت فيل مش بس جمل
وابقى حط للغربه شوية سكر (بس مش سكر الاسرة)يمكن تبقى حلوة شويه
وخلى بالك من النمل
ههههههههههه
نورت المدونة واسعدنى مرورك
*************
شكولاته
تحياتى
سعادته بشمهندز عربى
عيب عيب
ازاى تقولى ايه معلوماته؟؟ده راجل موجه قد الدنيا يعنى يعرف كل حاجه
وموضوع القزاز ده كدهكده محلول ماتقلقيش هما العيال لو القزاز اتركب هيخلوه يومين على بعض
دى سهله دى اسهل حاجه فى الموضوع
وادينى مستحمل وصابر ومتولى كمان
هو العود طلع بتاع نظيف طب وحياة نينته الحجه ماهو واخده هه
ههههههههههههههه
ســـــــــــلام
***************
لقد خلقنا الله احرارا
عم عرابى
زميلتنا فى الكفاح المرير
تحياتى
ماهما كلهم زى بعض فى مدرستنا فى مدرستكم مش فارقه كتير
وبعدين غرفة العزل فى فصل لوحدهم مش هتفرق كتير برضو يعنى هى غرفة العزل دى مش فى المدرسه ولازم حد ياخد باله منهم ولا هندخلهم ونسيبهم لما يموتوا؟
وبعدين 40 حصه 40 حصه احنا قدها وقدود
بس المشكله انهم 6 ايام يعنى 40 على ال6 فيها6.66يعنى تقريبا كل يوم 7 حصص
يعنى بسيطه خالص ده كلام فاضى
نفسى اقعد مع الوزير لوحدنا
اااااااااااااااااااخ
نورتى يا مس
ههههههههههههههههه
**************

مسدس صغير يقول...

على العموم الموجة كان قاعد معايا
وخليته قرا الكلام ده كله
وقالى الراجل ده
مرفود
مرفود
مرفود
بالتلاته
هههههههه
ما علينا
استمر فى المسيرة صلح الكومبيوترات
وميهمكش
هههههههه
ربنا يحفظنا
مصر امانة فى رقبتك يا درش
كل سنة وانتى طيب

الشعب لابد له من حكومه تشكمه يقول...

سيبك انت اهم من الشغل تظبيط الشغل بدل متهو الفصول الراجل بيقول نقفل الشبابيك وكل حاجه مااشاااء الله دكتور بيتكلم:)
وبعدين اصبر هتلاقى ناس بتفتى كتيييييييييييير الصبرررررررررر

اكتر حاجه زعلتنى ان جالك احباط اصلى مجربه الاحساس ده لما تكون متحمس جدااااااا وفجاه كلمه تقلب الدنيا:(

المعتصم يقول...

ايوشه بنت خالى
وعليكم السلام ورحمة الله وبركاته
مظبوط كده وتمام على الاخر
انتِ بنت خالى وانا ابن عمتك كده صح
اولا بقى دى عقدة ياناصحه لانك رفيعه هههههههههههههههههههه
ده علم نفس مش وبس ولعلمك انا حاطط الصورة دى علشان اغيظك بيها
ههههههههههههههههه
ثانيا تصدقى انا حاسس انى محسود بجد وعاوز اروح لواحد شيخ يقرا عليا ويرقينى
ههههههههههههههههههههههههههههههه
بس اللى انا اعرفه ان التعليم طول عمره مصايب مش من اول ماانا اتعينت وبس ولا انتِ شايفه غير كده
وبعدين مين اللى قال انى انا زعلان
بالعكس مش فارقه معايا بس يورونى هيجدولوها ازاى بقى لو هما ناصحين
يعنى جدول الاسبوع كله يتحط فى 3 ايام بس ازاى ؟؟؟؟ لو عملوها وحطوا الجدول انا اشتغل وانا منشكح جدا
وعلى فكرة ده شاى ونعناع وكركديه وتيليو كمان وحياتك وجايب ماج لونه موحموحى يهوس عامل للمدرسين زمايلى وش
هههههههههههههههههههههههه
بس العيال عندى بيروحوا المدرسه وده لسبب وجيه وهو ايه بقى ؟؟؟
انهم مايروحوش الغيط فيروحوا المدرسه اسهل
لانه حتى لو عمل عيان يبقى لازم يقعد عيان اليوم كله علشان اول مايفلفص كده ولا كده على الغيط على طول يبقى المدرسه اسهل من كل النواحى اهو طول اليوم بيلعب وفيه قرد واقف قدامه بيسليه (اللى هو انا) ويضحكه
........
وبعدين عيدية ايه اللى انت عاوزاها
ايه ده ؟؟ مافيش بتاع من الاحمر خالص
نقول البلد فى ازمه وظروف قهريه تقولى عيديه
وكمان انا مابتهددش ولو ماتعرفيش سكة ولاد ابواسماعين قوليلى وانا ادلك عليهم(دا حتى اسماعين ده حبيبى الانتيخ)
ههههههههههههههههههه
نورتى يابنت خالى
**************
ام مالك
تحياتى
منورة المدونة كلها
الحمد لله رب العالمين انا فى احسن الاحوال وادعيلى كتير علشان يمكن اتصل بيكى قريب واقولك على خبر كويس بس دعواتك
وهتكونى كالعاده اول حد يعرف الخبر ده
شوفى حضرتك هو لغاية دلوقتى مافيش حاجه رسمى بتقول انها هتبقى 3 ايام انما ده اقتراح علشان يخففوا بيه كثافة الفصول علشان الزحمة والعدوى
انما اى قرار رسمى نظمى فهمى(ده قريب كيارا انا معرفوش)لسه مافيش
والمفروض انه هيبقى الوضع العادى
وربنا يستر
وبعدين انا شايف انك تستنى شويه وماتخليهوش يروح المدرسه من اولها كده لغاية ماالعمليه تبان ملامحها ونشوف حكومتنا الرشيده(بتاعة بكار)هتعمل ايه وهتتصرف ازاى
وبعدين ماتزعليش قوى يعنى من الموجه
اهو وفر شوية التعب وشوية التراب اللى كنت هشمهم من الاجهزة
ههههههههههههه
اسعدنى مرورك ونورتى المدونة
***************

المعتصم يقول...

توتة المخنوقه
ازيك ياتوتة عامله ايه
فينك بقالك فترة يعنى كده ولا حس ولاخبر
ليكى وحشه ياشيخه
ههههههههههه
يعنى هو التعليم هيحصله ايه اكتر من اللى حاصل له
مش فارقه كتير صدقينى
انما ايه حكاية مراحل التطور اللى عندك فى المدونة دى
شوفيلها حل وابقى قوليلى
هههههههههه
نورتى المدونة
***************
البشمهندز ابوالعلا
ربنا يبسطك كمان وكمان ياعم احمد
لأ بقولك ايه لا الراجل غلط ولا انا غلطت ولا المدير غلط ولا المسئولين غلطوا
دا زكريا هو اللى غلط
وانا شايف انه هو اللى يقعد مع العيال المصابين فى الاوضه الضلمه ايه رأيك؟؟
هههههههههههههههههه
نورتنى ياهندسه
*****************
كيارا
كل سنه وانتِ طيبه وبكل خير
وعيد ميلاد سعيد يارب وربنا يحققلك كل اللى انتِ بتتمنيه ان شاء الله
وان شاء الله فى السنه الجديده يحصل المراد من رب العباد وتعزمينا على الفرح وبعون الله هحضره بس انتِ اعزمينى
........
نفدتى بجلدك من التدريس
بس انا اللى غلطان مش كنت بادلتك لما انتِ عرضتى البدل الوظيفى
يلا خيرها فى غيرها انا مايهونش عليا برضو بهدلتك ياكيتى
ههههههههههههههههه
نورتى المدونة وابقى سلميلى على سويت هانم اختنا الصغيورة
***************

mimi يقول...

هوا بالنوسبة لأول تعليق يعني ...

ده حجز ولا إيه؟

ومين اللي يستني..

ولا معناها أصبر واتأني ؟

mimi يقول...

حلوة فكرة يوميات مدرس...

مع إني من أنصار إلغاء العام الدراسي الحالي ..

وإيه يعني هيحصل إيه؟

ولا حاجة

أنت بس هتفضل تشرب في شاي ونعناع

والطلبة تاخد الدراسة من منازلهم ولا وجع دماغ خاااااالص

mimi يقول...

مصطفي .........


هيا دي مصر يا مصطفي

بس أنا بجد معجبة بالموجه ده ..

شكله كده عامل فيها فاهم كل حاجة..

انشر صورته البوست الجاي

mimi يقول...

وقوللـه ميمايا بتسلم عليك

yoyo يقول...

صباحك سكر يا مستر مصطفى

حمد لله على سلامتك
حمد لله على سلامة النت والله
هههههههههههه
يارب دايما منور مدونتك يارب

دا مش موجه بقى دا الحاج تبع جهاز الرقابة و المتابعة الناس اللى بتجى بالخير بقى وتقولك هاعمل و اسوى و تقارير زى الزفت و المولد دا
واصلا المدارس كلها عاوزة ابادة مش صيانة
اه يا بلد اه
الله يرحمك و يبشبش الطوبة اللى تحت راسك يا عم سعد قالها و خلع
مفيش فاااااااااااااااايدة ولا حتى خالتك عاااااااااااااااايدة
ربنا يتولانا بقى

و الله موضوع فصل العزل دا هيبقى كارثة
احنا عاملين زى اللى هيضحى بالام و الجنين وكمان الاب بالمرة عشان الدكتور يعيش هههههههههههه
ربنا يستر و يحفظنا كلنا يارب

دمت اخى بالف خير وسعادة
تحياتى
يويو

المعتصم يقول...

مسدس صغير
ابوصلاح حبيب قلبى
منور سيبك انت
وبعدين انا اصلا لو انت ماكنتش قلت للموجه انا كنت هبعتله الرابط بتاع المدونة علشان يقرا الكلمتين دول علشان انا اتفش
وبعدين عارف انت كده تبقى عملت فيا جميل مش هنسهولك
انا من الاساس مكنتش عاوز الشغلانه دى فيرفدونى بقى
وتبقى بركه ياجامع جت منهم ولا جتش منى
ومش هكمل المسيرة ومش هصلح حاجه
هو حد قالك عليا ميكانيكى
ومصر كانت مستنيانى انا لما اجى واصلح الكمبيوترات يااخويا
طب مش مصلح هه وورينى انت والمفتش هتعملوا ايه
هههههههههههههههههههههههه
كل سنه وانت طيب ياباشا
نورت المدونة
******************
الشعب لابد له من حكومه تظبطه
اهلا اهلا ياشيما باشا
هما الجماعه بتوع المنصورة متفقين مع بعض ولا ايه؟؟
ماعلينا
بقولك ايه مش عاوز تريقه الناس دى فاهمه وعارفه كويس هى بتعمل ايه
وبعدين فصول ايه اللى نهويها دى انتِ عاوزة العيال يجيلها برد وتتعب
ياساتر عليكى وعلى الشر بتاعك
وانا صابر اهه لدرجة انى قربت اغير اسمى
وكمان على فكرة انا بقالى كتير قوى بيجيلى احباط وبقيت متعود عليه جدا ولما تفوت عليا فترة كده من غير مااحبط ببقى زعلان كده وناقصنى حاجه
ده مافيش حاجه فى حياتى يابنتى مافيهاش احباط يعنى هى جت على دى
انا خلاص اتعودت
مش عاوزك تزعلى انا مايهونش عليا انى اكون السبب فى كده
هههههههههههههههههههه
نورتى المدونة ياشيما
ســــــــــــــــلام

المعتصم يقول...

ميمى شقاوة
تحياتى
بالنسبه لاول تعليق انا نفسى مش فاهم ايه الموضوع
يكونش تهديد يابت ياميمى وانا مش واخد بالى
يكون ده واحد تبع الولولا الحمرا
مش عارف
.......
ونلغى العام الدراسى ليه بس
والخبرا بتوعنا يعملوا ايه لما نلغيه
يقشروا بطاطس؟؟
اهم شغالين وهيظبطوها ماتقلقيش
وبعدين ضربوا الاعور على عينه
يعنى هو هيحصل اكتر من اللى حاصل
هو انتِ شايفه التعليم نافع قوى
قولى ياباسط
.........
نعم ياميمى
لا ياميمى دى مش مصر دى مدرستنا الاعدايه المبجله
(هو انتوا كل حاجه تحشروا مصر فيها كده اعوز بالله منكم)
بجد معجبه بالموجه ده
انا ممكن اجيبلك رقم تليفونه
انما ايه بجد بجد عامل فاهم فاهم يعنى ولا لما تشوفيه بيتكلم ياخرااااشى تقولى هو ده اللى هيحلها ويعدل المايله
موضوع الصورة بقى انا نسيته انما فى اقرب فرصه هبقى اصطاده كده وهو معدى واهبش منه كام صورة على الموبايل انشر منهم واحده فى المدونة وابعتلك الباقى على الميل
ههههههههههههههههههههه
وحاضر سلامك هيوصل ماتخافيش
من عنيا الجوز
نورتى ياشقاوة هانم
*************
يويو
صباحك سكر زياده يامس يويو
الله يسلمك
المدونة منورة بزوارها الكرام احسن ناس
.....
تصدقى انه موجه لغه عربيه
بس هما ساعات بيطلعوا كده متابعه ماهو احنا فى الاجازة ومش لاقيين حد يعكننوا عليه فى دوس العربى يقولك اعكنن على اى حد الاقيه فى المدرسه ان شاالله الفراش
المفروض ان مدرستنا ليها صيانه شامله وتجديدمن السنه اللى فاتت تخيلى
وحتى خالتك عايده التانيه مش موجوده ليه كده بس طب مكنتيش قلتى وكنتِ سيبتينى على عمايا احسن
لازم يعنى تزعلينى كده
حرام عليكى
ده انا كنت فاكر انها هى اللى هتحل الموضوع ده
ههههههههههههههههههههههههه
اما بقى موضوع فصل العزل ده حتى الدكتور ياعينى هيضحوا بيه
علشان السيد الوزير يعيش
وتحيا مصر
وربنا يسترها علينا
عموما انا مش خايف من انفلونزا الخنازير على فكرة
انا خايف من انفلونزا الحمير اللى ابتدت تنتشر على الاخر بين العقول القياديه فى البلد وربنا يسترها
نورتى المدونة ياايه بمرورك الجميل
تحياتى ودمتِ بكل خير وود

merc19 يقول...

اول زياره
انا متبعاك من فتره بس مش بلحق اعلق
انا من قنا وطبعا انت عارف حال مدارسنا بس اللى عمله الموجه ده مش جديد ده اللى بيحصل ع طول بيشيل ايده من المسؤليه عشان كده يامصطفى لو ف حاجه من الواجبات اللى عليك الحق اعملها احسن السمك الكبير بياكل الصغير وبعدين انت بتخوفنى ليه انا يوم السبت ده هيعتبر عيد ميلاد ليا عشان اول مره هشتغل فيه مدرسه هههههههه
طبعا صعبت عليك ع فكره هى لا من تخصصى ولا من مؤهلى بس برده انت عارف مفيش تخصصات اليومين دول مش هطول عليك اكتر
من كده (كل عام دارسى وانت طيب)باااااااااى

د.آيه يقول...

سلام عليكم
ازيك يا أستاذنا ..
يااااااااه فكرتنى بالمدارس و الله .. بتاع زم ان دي..
ربنا يكون في عون حضرتك ..
و سؤال مين اللي يشرح للطلبة المصابين مهم جدا ..
مخطرش في بالي بصراحة ..الله المستعان ..
و هدى نفسك مفيش حاجه مستاهلة

كــركــبــة دمـــاغ ㋡ يقول...

مستر مصطفىىىىىىىىىىىىىىى


من زمان قوي قوي قوي ماجتش هنا

اول حاجه

ازي حضرتك يا فندم

عامل ايه

وازي صحتك ؟؟

والف حمد لله على سلامة والدك اللي هو عموووو يعني

ربنا يتم شفاه على خير ويديله الصحه وطولة العمر يااااااااااااارب

كل سنه وانت طيب بقى بمناسبه رمضان والعيد والحاجات اللي خلصت دي

وكل سنه وانت طيب بمناسبه 6 اكتوبر

انا اول حد يهنيك اهو ههههههههههههه



بالنوسبه للبوست بقى

ربنا عمااااااااك يا استاذ بقى

كله في سبيل الطلبه والجيل اللي زي الفل اللي هيطلع على ايد حضرتك


هو انتو عندكو طلبه اصلا ولا دي اوشاعه ؟؟هههههههههههههه

الصبر طيب يا مستر

معلش ان شاء الله اخرة ده كله خير

وربنا ع الظالم والمفتري

وحسبي الله ونعم الوكيل

وانا بحب الحكووومة ههههههههههههههه

سلام يا اونكل وبجد انا متابعه بس مقصرة في الردود معلش سامحني ..

كــركــبــة دمـــاغ ㋡ يقول...

ربنا معاااااااااااااااااك *

ده تصليح بس عشان انا عارفه نيتك وحشه ههههههههههههههههههههه

ستيتة يقول...

تؤتؤتؤتؤتؤ يا معتصم
احنا بنقابل كل يوم بقدر الله ناس تستاهل الشنق
ناس أغبياء بالسليقة
ناس سيئة ومعمولة علشان تسود عيشتنا
وفعلا في نفس اليوم بيقدروا يقفلوا اليوم

لكن تاني يوم لازم تروح تظبط الأجهزة
تظبطها لله وعلشان العيال يتعلموا وعلشان البلد دي رايحة للخراب بصاروخ
خلينا احنا مندقش في نعشها اخر مسمار

ربنا ياخد المفسدين واعوانهم والأغبياء اللي بيكروهونا في عيشتنا فوق البيعة

المعتصم يقول...

merc19
اهلا بيكى فى اول زيارة
واهلا بناس قنا واهلها اجدع ناس
على فكرة ليا اصحاب كتير من عندكم
هههههههههههه
اللى عمله الموجه ده عادى جدا وبيحصل كل اما يكون فيه حاجه كده ولا كده
انما انا واجبات ايه اللى عليا؟؟
انا الحمد لله فى السليم وكله تمام وزى الفل وعلى فكرة بقى انا من السمك الكبير هه
ههههههههههههههه
وماتخافيش خالص روحى الشغل يوم السبت وتفائلى خير كده وهتلاقى الدنيا لونها موحمحى كده ومزهزهها
ويعنى هو انا اللى كان تخصصى تدريس ماانا خريج تجارة شعبة محاسبة واشتغلت مدرس خليها على الله
ولا يهمك طولى براحتك انا مش بصدع بسرعه
هههههههههههههههههه
كل سنه وانتِ طيبه
بااااااااااى
***************
د/ايه
وعليكم السلام ورحمة الله وبركاته
ازيك انتِ يادكتورتنا وازى حبيبى محمد
يارب تكونوا بخير جميعا
هههههههههههههه
انتِ ماكبرتيش قوى على المدارس ياايه
مش للدرجه دى
محدش هيشرح للمصابين اصلا وبعدين احنا نحجزهم ليه ؟؟ عشان يعدوا باقى المدرسه؟؟ احنا نسيبهم فى الشارع عشان يعدوا البلد كلها ونخلص ايه رأيك مش كده احسن؟؟
هههههههههههههه
انا هادى وزى الفل على فكرة هو مين اللى قال انى متعصب
انتوا هتطلعوا عليا اشاعات
ههههههههههههههههههه
نورتى يادكتورة
***************
شقاوة مراهقه
تحياتى
انا عارف انك من زمان ماجيتيش
بس ولا يهمك
والحمد لله انا تمام وعمو اللى هو بابايا الحمدلله كويس (شويه يعنى)
وامين على دعواتك وشكرا ليكى
وكل سنه وانتِ طيبه بكل المناسبات اللى قلتيها دى كلها
هههههههههههههههههههههههه
والله انا عرفت انها معاك مش عماك بلاش الضمير الغامق ده
وكله فى سبيل الطلبه يهون
وبعدين احنا عندنا الطلبه اكتر من الهم على القلب اللى عاوز انا ممكن اديله ببلاش بس هو ييجى
وربنا على الظالم والمفترى واكيد يعنى كلنا بنحب الحكومه(هو فيه حد يقدر يقول غير كده)
وحسبنا الله ونعم الوكيل
نورتى المدونة
****************
د/ستوته
تحياتى
طب وايه الجديد فى كده ماكل يوم بنقابل وهنقابل يعنى هما هيخلصوا مثلا
المشكله مش فى كده المشكله انه عرف ان الاجهزة عاوزة صيانه وكتب ده وتخيلى حضرتك انه لو اتعرف انى فكيت جهاز منهم اتحول للتحقيق واخد جزا علشان ده مش اختصاصى عندهم
انا عندهم مدرس اشرح وبس مش بتاع صيانه
ومالهمش دعوة هما بأنى معايا شهاده دوليه فى التجميع والصيانه ولا انى كنت شغال فى حاجه زى كده اصلا قبل التدريس
ده روتين ولازم يتنفذ والمدير ربنا يعمر بيته قاله على اللى انا كنت بعمله والباشا يعمر بيته هو كمان عرف وكتب
يبقى انا هوجع دماغى واتعب نفسى وكمان اخد جزا ومش بعيد فى الاخر اطلع انا اللى مبوظ الاجهزة دى
طب وعلينا بايه بقى
انا اقعد فى بيتنا محترم وهعمل شغلى اللى انا منوط بيه على اكمل وجه انما مش هعمل حاجه زياده عنه وبس
انا كده مش بساعد فى دق المسمار الاخير لانه للاسف المسمار الاخير اندق من زمان
وربنا يسمع منك يادكتورة
نورتى المدونة بمرورك
ســــــــــــــــــــــــــلام

غير معرف يقول...

عمو المعتصم
السلام عليكم
كل عام وحضرتك بخير
وعوداً حميداً
وأشكر حضرتك على الزيارة
للأسف لا يوجد أى نوع من أنواع
التخطيط أو التنظيم
خالص تقديرى

ريمان يقول...

هههههههههههههههههههههه


اتجعص يعنى ايه؟


لا لا قول قول ماتخبيش


عايزه اعرف ماليش دعوه

والله يا مصطفى انا مش عارفه بجد ايه اللى بيحصل ده
غير كده مش عارفه ايه النظام السنه دى


طب ما الاحسن بقه يأجلوا الدراسه سنه وبلاش وجع الدماغ ده اللى احنا فيه

الدراسه بعد كام يوم ومحدش عارف النظام ازاى وبجد مكثفين الجهد على المدرس وظالمينه

ربنا يسترها السنه دى ويعديها على خير


اما اقوم اعملى كوبايه نعناع

اشمعنى انت يعنى

موناليزا يقول...

انت عارف المثل اللى بيقول "جه يكحلها عماها"
أهو الموجه ده عمل كده بالظبط
بدل ما ياخد قاعدته ويمشى زى كل مرة قال الكلمتين اللى حافظهم بدون ان يعمل حسابه ان يرد باجابات مقنعة

فكرنى بموجهة كانت بتتعامل مع زميلاتى على انهم تلاميذ وهى المدرسة وبما انى كنت التخصص الوحيد فى المدرسة حتى هى نفسها ماكنتش متخصصة فى مجالى فكنت بتكلم معاها باللى درسته لقيتها متعرفش عنه حاجة هى حافظة النشرة اللى جاية من الادارة وبتقولها وخلاص

بص نصيحة اخوية يعنى صلح الاجهزة وظبطها
والشاى بالنعناع على حسابى:)

شاب مفقوع يقول...

صحيح يا ولاد

العلم لا يكيل بالبتنجان

اللي عايز اعرفه

مين هايدخل يشرح للطلبة المصابة

ولا هيدوهم اجازة مرضية

شكل كده كل مدرس متعين بعقد جديد هيدبسوه في الشرح واهو اختبار لقوة التحمل

المعتصم يقول...

بسم الله الرحمن الرحيم
السلام عليكم ورحمة الله وبركاته
*************
العصفورة
وعليكم السلام ورحمة الله وبركاته
تحياتى
وكل عام وانتِ بخير
وشكرا على مرورك الجميل
بس يعنى هو اشمعنى المرة دى اللى للاسف
ماهو كل حااجه فى بلدنا مافيهاش تخطيط يعنى هى جت على دى
عديها عديها
هههههههههههههههه
نورتى المدونة
***************
ريمان هانم لماضه
تحياتى
اتجعص يعنى ايه
اقولك ياستى وامرى لله
يعنى قعد قعده كده كلها تكبر
قعد على طرف الكرسى ورجع ظهره لورا وحط رجل على رجل وبصلنا كده على اننا مصابين بالانفلونزا
ههههههههههههههههههه
وعلى فكرة بقى بعد كل الدوشه والهيصه دى مش هيعملوا حاجه ولا النظام هيتغير وكل حاجه هتفضل زى ماهى
وهتشوفى وتقولى الواد مصطفى قال
انا عارف العالم دى كويس دول بتوع كلام وبس هو فيه حد فيهم عنده دماغ علشان يقعد بقى ينظم ويظبط ويشوف حلول
دى عالم رايقه يابنتى ومش عاوزة وجع النافوخ
يلا ربنا يسترها بجد
انما قوليلى بقى انا بشرب نعناع ايزيس (يعنى اورجنيك من ابوفتله)هتشربى انتِ بقى زيه؟؟؟؟؟؟؟؟؟؟؟؟؟؟
هههههههههههههههههههههههههههههه
نورتى المدونة يالماضه
**************
موناليزا
تحياتى
هى عميا من الاول على فكرة هو بس زود الكحل حوالين العنين شويه
وبعدين هما تقريبا كل الموجهين كده الا القليل منهم
وعلى فكرة هما مش بيتكلموا فى التخصص ابدا انما فى حاجات عايمه كده علشان الاحراج انما فى التخصص بيخافوا احسن واحد يطلع فاهم ويزنقهم وتبقى وحشه فى حقهم لانهم مايعرفوش اى حاجه فى اى حاجه
بلاش فضايح بقى ان الله حليم ستار
اما بخصوص الاجهزة فمعلش بقى مش هقدر اصلحها على الاقل دلوقتى (راجعى الرد بتاعى على الدكتورة ستيته وانتِ تعرفى السبب)
وانا مستنى علبة الشاى الليبتون ابوفتله(درجة اولى)وعلبة نعناع ايزيس (اورجنيك)
واما اشوف هتبعتيهم ولا لأ بقى
هههههههههههههههههههه
نورتى المدونة
******************
شاب مفقوع
اهلا اهلا
منور الدنيا فى اول زيارة
وبعدين المقولة دى بتاعة العلم لايكيل بالبتنجان كل يوم بتثبت صحتها عن اليوم اللى قبله على فكرة
وهتبقى نظريه علميه تدريسيه اساسيه فى مناهجنا التربويه
هههههههههههههههههه
اما بقى بخصوص العيال المصابين دول يبقى ياعم الله الغنى عن العقد بتاعهم انا كده كده بتلكك اسيب الشغل واقعد فى البيت استنى العدل احسن
ههههههههههههههههههههههههه
اسعدنى مرورك ياعمنا
تحياتى وودى

بـسـمـــة صـــــلاح يقول...

عاااااااااااااااااا
ايه سدة النفس دي
بعدين انا مقدرش ادخل اي جامعة عاديه
لاني متخرجه من ازهر
عااااااااااااااااااااا

بجد نكدت عليا

بس الأزهري قالي دا المعتصم بيدحك عليكي
ههههههههههههههههههههههههه
انا بهدي النفوس
ههههههههههههههههههههه

بـسـمـــة صـــــلاح يقول...

اه ثحيح حدرتك زحلان مني ليه
وبعدين هو الواد اللي في الثورة دا ختيبي ولا ايييييييييييه
انا خلاث هدخل الكامحه ومفيش عرثان
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

قول للواد ختيبي يعبرني هو بيتقل ولا ايه

موناليزا يقول...

طب انا كنت هعمل الشاى بالنعناع عشان تصلح الاجهزة بمزاج:)
دلؤتى بقى هعمله ليه بعد ردك المقنع على الدكتورة ستيتة:(
بس كل اللى اقدر انصح بيه دلؤتى انك
تشترى كمامة وتاخد احتياطاتك وانت داخل الفصول:)
وربنا معاك ويتولانا برحمته

المعتصم يقول...

بسمه صلاح
إخييييييييييه عليكى
أزهريه
ع العموم ربنا يوفقك
وانا مش قصدى اسد نفسك ولاحاجه
انا بس حكيتلك على اللى حصل معايا
وبعدين طالما الازهرى قالك ماتصدقيش يبقى هو ادرى ويعرف عنى
صدقيه هو
...........
وانا زحلان منك علشان طلعتى ازهريه
بس ادى كل الموضوع
اه هو الواد صفاصيفو العسل اللى فى الصورة ده
بس هو مش احنا كنا فسخنا الخطوبه برضو على ماافتكر
هههههههههههههههههههه
ماتستعجليش على العرسان بكره يبقوا اكتر من الهم على القلب يااختى
هههههههههههه
ســــــــــلام
*************
موناليزا
افهم من كده انه مافيش شاى ولا نعناع ولاحتى كوبايات فاضيه
ماشى ماشى
بس خليكى فاكراها
وماتقلقيش انا عامل حسابى كويس
جايب كمامه وزجاجة ديتول علشان غسيل الايدين ده غير الصابون اللايف بوى
مظبط الدنيا على الاخر
وربنا يسترها علينا بعد دا كله
ســــــــلام(بس خدى بالك انا زعلان من حكاية الشاى دى)

GiGi world يقول...

بحيي حضرتك على المدونه الرائعه دى
عجبنى قوى اراء حضرتك فى كام تعليق
تقبل مرورى

المعتصم يقول...

GiGi World
اهلا بيكى فى مدونتى المتواضعه
نورتى المدونة بمرورك
ويارب ماتكونش اخر زيارة
اسعدنى مرورك
تحياتى

موناليزا يقول...

مايرضينيش زعلك يافندم
عرفنى بس انك صلحت الاجهزة وانا ابعتلك أحلى كوباية شاى بالنعناع:)

والى ان يتم التصليح ممنوع الزعل منعا نهائياً نظراً لخطورته على الصحة وعلى الأمن العام فى نواحى المدونات المختلفة فى الفترة الحالية

♥نبع الغرام♥♪≈ يقول...

السلام عليكم
انا هنا جايا ادحرج التماسى على الورد اللى قاعد على الكراسى
حمدلله على سلامتك وسلامتى ياقمر
ومتشكره قوووووووووووووى لذوقك
مودتى
ايناس

د.آيه يقول...

احنا الحمد لله تمام
مكبرتش اه بس مش عارفة حاسه انه بعيد و بعدين فكرتنى بمدرستى بتاع الابتدائى اصل احنا كنا كبار بقي في ثانوى و لا كأنها مدرسة .. هههههههه
المصابين يعدوا الناس يعنى و الله كنت في الصيدلية الناس كلها داخلة حالتهم صعبة و ناس برد و سخونية و الواحد خاف بصراحة انا بفكر حتى في الاسرة اللي فيها مصاب و العياذ بالله هيعزلوه ازاى و هو هيكون خايف يعدي الباقي مش عارفه احساسه هيبقي ايه ؟؟ او انانى و عايز الناس كلها تدعى هههههه
ربنا يستر

اقصوصه يقول...

امممم

انا دايما اقول ان التدريس

اصعب مهنه على وجه الارض!

نبض الحياة يقول...

والله هم يضحك وهم يبكى
والواحد مش عارف يلاقيها منين ولا منين
ربنا يلطف بينا ...
ربنا يصلح الاحوال ويولى من يصلح لأن خلاص مبقاش فى ضمير فى اى حاجة
وعلى الدنيا السلام ...

ليس فقيرا من يحب يقول...

غلايه وشاى ونعناع ههههههههههههههههه

طب صباح الروقان

ههههههههههههههههههههه

يا سيدى خبط فى الحلل براحتك يعنى حد

هيسمعك اصلا وبعدين سيبك من الشغله

اللى تقصر العمر دى دا ولاد ابو

اسماعين ارحم ياعم

تحياتى لحضرتك ولكل المدرسين وربنا معانا جميعا يارب

ليس فقيرا من يحب يقول...

وادى التعليق ال62 غرامه على تأخيرى

ليس فقيرا من يحب يقول...

وال63 غرامه تأخير برده

ليس فقيرا من يحب يقول...

ال64 علشان خاطر اهل البلوجر جميعا

ليس فقيرا من يحب يقول...

وال65 علشان خاطر المدرسين

الامرا الطيبين اللى طلعان عينهم

وسمعنى ضرب نار والضوء الشارد

طوى طوى طوى

هههههههههههههههههههههههههههههههه

ليس فقيرا من يحب يقول...

يلا يا اخويا اتمسى بالخير

واقعد بالعافيه وسلامو عليكم

د/عرفه يقول...

السلام عليكم

كيفك حبيبى مصطفى


إنت عارف انا اكتر حاجة بكرهها الروتين وخصوصا الروتين اللى بيعيق العمل
زى الاجهزة العطلانة

وكما التعليمات اللى جاية من فوق واللى بتعالج اخطاء قديمة ومش بيتحركوا للخلل الموجود الا على حسب التعليمات
زى ما قولت على الازاز مثلا

ده بس مثال حى للى بيحصل عندنا من خلل

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
موناليزا
معلش بقى انا دماغى ناشفه
وعند فى عند مش مصلحهم هه بقى
وبرضو زعلان
يعنى تستخسرى فيا كوباية شاى ومش عاوزانى ازعل وانا بقول اختى الطيبه تطلعى زيهم
هههههههههههههههه
************
عاشقة الاحزان
نوسه
وعليكم السلام ورحمة الله وبركاته
وصل ياباشا احلى مسا
والف حمدالله على السلامه
نورتى المدونة يانوسه
*************
د/ايه
الحمد لله رب العالمين
اه احساس انه بعيد ده ممكن
طب شوفيلها انتِ حل يادكتورة نعمل ايه فى المصابين؟؟؟؟؟؟
وبعدين هو فيه دور كده وداير على الناس كلها اليومين دول ده حتى اخدته بتاع البرد والسخونيه
ربنا يسترها علينا جميعا يارب ويتولانا برحمته
نورتى المدونة يادكتورتنا
**************
اقصوصه
منورة المدونة
بس على فكرة مهنة التدريس مش هى اصعب مهنه على وجه الارض
اصعب مهنه هى مندوب التأمين على الحياة (بتاع شركات التأمين) اللى بيقعد يقنع الواحد انه يدفع فلوس علشان لما يموت الورثه بتوعه ياخدوها
هههههههههههههههههههههههههه
اسعدنى مرورك الجميل
**************
نبض الحياة
تحياتى
مش بيقولوا شر البلية مايضحك
اهو هو ده اللى احنا فيه شر البلية
ربنا يصلح الاحوال ويسترها علينا يارب
انما قوليلى بقى انتِ منفضة للمدونة لييييييييييييه؟؟؟
نورتى المدونة
****************
ليس فقيرا من يحب
(ولا نقول رانيا تعويضات!!)
هههههههههههه
اه غلاية وشاى ونعناع وكمان كركديه وتيليو ويانسون فيها حاجه دى
وحياتك بفكر اخد معايا ضومنه
هههههههههههههههههههههههه
يعنى انتِ عاوزانى اخبط فى الحلل وعلشان انا عارف بختى زى الفل ممكن يسيبوا الناس كلها ويسمعونى انا
طب والعيال اللى مستنيه تلعب جيمز على الاجهزة اللى انا هصلحها دى اسيبها لمين ساعتها
حرام عليكى
ههههههههههههههههه
ايدى على كتفك انا من الاول ماكنتش عاوز اشتغلها
شوفيلى انتِ اى شغلانه فى اى حته تانيه وانا استقيل من بكره
بكره ايه من امبارح
اسكتى اسكتى
مش ولادابواسماعين جاتلهم انفلونزا
هههههههههههههههههه
وبعدين ايه التعويضات دى كلها بس
كلفتى نفسك ليه
هو احنا بيناالكلام ده برضو
عموما ماشى ياستى ونردهالك قريب
وسمعنى سلام ذئاب الجبل
عووووووووووووووووووو
ههههههههههههههه
نورتى المدونه يارانيا
وعليكم السلام ورحمة الله وبركاته
***************
د/عرفه
حبيب قلبى
وعليكم السلام ورحمة الله وبركاته
انا الحمد لله تمام وزى الفل
المهم تكون انت والاسرة كلها بخير يارب
فيه حاجات كتير تتكره فى بلدنا يامحمد
وقبل الروتين العقول اللى مش بتفكر قبل ماتطبق الروتين العقيم ده
ولا تشوف هى بتعمل ايه وهل ده فى الصالح ولا لأ
ناس تحس ان مخها مصدى من زمان كده
اييييييييه ماعلينا
ربنا يصلح الاحوال
ويسترها علينا يارب
نورتنى بمرورك الجميل يادكترة
الا هو اخبار هنرى ميشيل ايه(لازم اغيظك مش قادر احوش نفسى)
هههههههههههههههه
*************
والسلام عليكم ورحمة الله وبركاته

غير معرف يقول...

هههههههههههههههههههه

ياعيني عليك وعلى شبابك

شكلهم كدا ناوين يضحوا فيكم يالمدرسين

مهتمين بالمدرسة والزجاج الي انكسر وانتوا محدش معبركم :]

انا برايي الطلاب والمدرسين يعملوا اضراب ومحدش يروح المدراس

وان شاء الله محد اتعلم

بلا وجع قلب

لو عندي اولاد مكنتش بعتهم ولا على رقبتي

ربنا يعينك بجد المواصلات لوحدها مصيبة انت ناقص يابني

:(

غير معرف يقول...

هييييييييه

التعليق الـ 70 ^ـ*

رقم مميز ما

من يومي مميزة

كح كح

المعتصم يقول...

نوارة اللى منورة الدنيا
ياعينى عليا وعلى شبابى ؟؟؟ ليه؟؟؟
هو فيه حد قالك انى هتجيلى الانفلونزا؟؟
يكون جابها يعنى من الكنترول؟؟؟؟
قوليلى الله يسترك
ههههههههههههههههه
وبعدين اضراب ايه ده اللى انتِ بتقولى عليه
لاينكن ابدا
احنا ناس العلم عندنا لايكيل بالبتنجان وهنتعلم يعنى هنتعلم حتى اخر نفس فى اخر مدرس واخر طالب
(وبكده نبقى ضربنا عصفورين بحجر واحد وخلصنا من المدرسين والطلبه فى نفس ذات الوقت)
اسكتى وماتفكرينيش بالمواصلات الله يسترك
بفكر اعمل جمعيه واشترى سكوتر اروح بيه المدرسه
ايه رأيك
ههههههههههههههه
ومبروك عليكى الرقم المميز
خلى بالك ده مش بيطلع لأى حد
انما علشان تعرفى بس انك غاليه
ههههههههههههههههه
نورتى المدونة بمرورك الجميل

بستان الحب يقول...

المعتصم كل عام وانتم الى الله اقرب عشت فى تدوينتك وكأنى اسير فى طرقات المدرسه مع هذا الموجه وفعلا تخيلت منظره وكمان من الممكن ان اصف لك شكله على كل حال ليس امامك الا الصبر (وجعلنا بعضكم لبعض فتنه أتصبرون )يسر الله لك امرك

المعتصم يقول...

بستان الحب
امنا الفاضلة
تحياتى
وكل عام وحضرتك بكل خير وعلى طاعه والى الله اقرب واقرب
صدقتى والله فليس امامنا الا الصبر
واعاننا الله عليه
اسعدنى مرورك الجميل
تحياتى ودمتِ بكل خير وود

الفراغ يقول...

اهلا يا مصطفى
والله الحال فى مصر مش احسن من عندكم
بس يمكن الوزاره هنا شغاله احسن
نظرا للمتابعات اللى مابتنتهيش
عموما اعمل اللى عليك لربنا
كلنا هنا ماحدش عامل حسابنا احنا المسئولين فى المدارس
الخوف كله على الطلبه
وبرضه الحمد لله مالناش غير ربنا
معلش هو كدا حالنا
كل متابع جاى يتنطط علينا وعامل نفسه ابو العريف
واهو كله بيخبط فى كله ومحدش فاهم حاجه وفى النهايه ربنا يستر علينا وعلى البلد

المعتصم يقول...

الفراغ
ست الكل هنا
يامرحبا يامرحبا
منورة المدونة وبلوجر كله
بالعكس بقى ياست الكل احنا الحال عندنا احسن من عندكم
ليه بقى ؟؟؟
لان عندكم الجماعه بتوع الوزارة والمتابعه دول قارفينكم كل يوم وكل لحظة
انما احنا عارفين انهم يومين بس وكله هينام فى الطراوة تانى ومحدش هيتابع وهيسيبونا نعرف نشتغل
يعنى هما متابعتهم دى هى اللى هتحوش الانفلونزا
بالعكس دول اصلا بيعطلوا الشغل
هههههههههههههههههه
ربنا يستر علينا وعلى الطلبه
واهم من ده كله يصلح الحال
نورتى المدونة ياست الكل
واسعدنى مرورك الجميل
تحياتى ودمتِ بكل خير وود

Unknown يقول...

السلام عليكم
انا جاية بس أقولك
أن انا زعلانة اوىىىى
علشان وزيرة الصحة فى
حلف ابر ايجيبت المحترم كانت
عيانة وعندها زكااااان
وطالبة المانجة والبرتقال
بنفسها وبعدين رئيس الحلف
ما يجى يزورها وهو محمل بالهدايا
يبقى ليا حق ازعل ولالأ؟اودى وشى
من وزززززيرررر الصحة فى الاحلاف
التانية فين؟قولى انت؟اتفضل قول
كلى ودان مفتحة ومطرطقة
وسامعة دبةالنملة..قوووووول:)

Unknown يقول...

وان كان عن
المفتشين فحدث
ولا حرج ولو انفتحنا
فى الكلام عنهم مش حادخل
الجنة ابداً ابداً ابداً
..........
اينعم انا خفيت
الحمد لله لكن برضة
مستنية المانجة ولا
البرتقان حتى؟

المعتصم يقول...

الدكتورة نور
تحياتى
والف سلامه عليكى
بعد الشر عليكى
وانا اسف بجد والله
فعلا انا قصرت معاكِ
وبكرة الصبح ان شاء الله اول ماتصحى من النوم
هتلاقى العربيه واقفه قدام العمارة
محملة 12 قفص مانجه (من ام الكيلو ب15جنيه دى علشان الميزانيه مخسع شويه اليومين دول)وكمان 12 قفص برتقان مشكلين شويه سكرى وشويه بلدى علشان العصير وشويه من ابوصره علشان الاكل
والف بعد الشر عليكى ان شا الله اللى يكرهوكى
ان شاالله وزير الصحه اللى فى الحلف اللى بالى بالك
ويبعتوه يتعالج عند عمو فؤاد ومايلاقولوش سرير فاضى
.............
وبعدين بلاش نجيب فى سيرة المفتشين احسن
الجنه احسن من سيرتهم برضو
نورتى المدونة يادكتورة
وياريت تسامحينى على التقصير بجد
والف سلامه عليكى
تحياتى

Unknown يقول...

مسمحينك سعادة الاستاذ
انت برضه ريس الحزب
ولازمن ولابدن نسامحك
مع انى كان معروض
عليا منصب كبير
وزيرة كهربا:)
(حنورررررر)
فى حتة تانية
لكن معلش
خلينا
فى أبر ايجيبت برتى
وبسسسسسسسسسسسسسسسسسسسسس.

المعتصم يقول...

الدكتورة نور
وزيرتنا ونوارتنا
اولا ياافندم نشكر سِعة صدركم
وتسامحكم وعطفكم على شخصنا المسكين
ثانيا ياافندم انتِ منورانا من غير كهربا
وانا كنت عارف ومتأكد انك مش هيهون عليكى الحلف ومش هتقدرى تسيبنا مهما كانت الاغراءات
حتى لو كانت كهربا
وبعدين يعنى تسيبى وزارة الصحه وتروحى تمسكى الكهربا والزباله
ماينفعش طبعا
ربنا يجعلك دوما ذُخراً لحلفنا المسكين
هههههههههههههه
نورتى يادكتورتنا