السبت، 15 أغسطس 2009

رغى وكلام فاضى



بسم الله الرحمن الرحيم


السلام عليكم ورحمة الله وبركاته


اولاً كل سنة وانتم طيبين بمناسبة شهر رمضان العظيم
اعاده الله علينا وعلى امتنا الاسلاميه والعربيه بكل خير
ويارب السنه الجايه كل واحد يكون محقق احلامه
امين
............


ثانيا بما انى مهيس خالص ومش عارف اكتب حاجه وهموت علشان انام
قلت اكتب اى حاجه وخلاص
لان الناس كلها افتكرتنى اختفيت تانى
امبارح نايم الساعه خمسه صباحا بعد فاصل من الرغى والهزار
مع مجموعه زى العسل من المدونين فى مدونة الدكتورة ستيته وكان الكلام اون لاين
وطبعا كان عندى شغل واضطريت اصحى الساعه 7 وربع الصبح علشان اروح المدرسه
والمدرسه دى مشوارها مشواااااااااااار
اولا مالهاش مواصلات خالص
قريه كده نائيه فى حته مجهوله فى بلدنا
بروح اركب عربيات بتاعة قريه تانيه وانزل على الطريق واكمل مشى لغاية مااوصل
المشى رياضه طبعا انا عارف دى بس الجزمة بتاعتى صعبانه عليا قوووى والله
كل يوم بتشيل كميه تراب بالعبيط ده غير الحاجات التانيه طبعا
وبعد رحلة العوده اللى بتزيد فى تعبها عن رحلة الذهاب قلت هنام شويه
يطلعلى مشوار من تحت رجليا لأسيوط المحافظة
ودى بعيد عنكم بينا وبينها 65 كيلو بس
يعنى ساعه بالعربيه فى عز جهنم الحمرا فى عز الظهر
وطبعا على ماالمشوار خلص ورجعت كان اليوم انضرب
وبعد كده كان لازم اعمل كام مشوار فى البلد هنا تبع الشغل
ولسه يادوب راجع وبنام على نفسى
ان شاء الله هبقى انزل لكم بوست فيه الحكايه بتاعة العريس
اللى انطخ علشان مسك ايد عروسته يوم الفرح
وده علشان خاطر الدكتورة ستيته مش مصدقه
هههههههههههههه
وكل سنه وانتم طيبين وبخير ورمضان كريم (واحمد ومحمد وعمر وسيد وحسين ........ وعيشوا انتو بقى)

ســــــــــــــــــــــــــــــــــــــــــــــــــــــــــــــلام

هناك 38 تعليقًا:

موناليزا يقول...

كل سنة وانت بخير ويارب يبلغنا رمضان واحنا جميعا فى احسن حال
---
بالنسبة بقى للموضوع
اولا : غريبة انى ماشوفتكش امبارح فى اللقاء:)
ثانيا:هو مش حضرتك مدرس برضه واحنا فى أجازة يبقى شغل ايه اللى الساعة سبعة الصبح؟
ثالثا: بعد المشوار الكتير ده انا لو منك كان زمانى نمت أصلاً:)
رابعا: عجبتنى حكاية العريس اللى انضرب بالنار عشان مسك ايد عروسته:)
(اصلهم بيقولوا عليا أصلى صعيدى ومش معقول اكون من وجه بحرى:)
بس يا ترى مين اللى طخه؟؟

رامز عباس يقول...

هو العريس انطخ علشان مسك ايد العروسة طب انا انصك تعيش في القاهرة احسن

المعتصم يقول...

موناليزا
تحياتى
وكل سنه وانتِ طيبه وبخير وامين على دعواتك الجميلة
....
انا كنت فى اللقاء بس فى الاخر
يعنى انا من الجماعه بتوع الليل واخره
ده انا وعادل وبدراوى ومصرى جدا وشقاوة مراهقه ونوارة وستوته اللى مقفلين ال1000 تعليق
بس بصراحه انا كنت مهييس منهم على الاخر وضحكت كتيييييير خالص
اه مدرس واحنا فى الاجازة
بس انا بروح المدرسه يوم فى الاسبوع علشان امضى ولازم اكون هناك على 9وطبعا بما انةالمواصلات متوفرة جدا يبقى لازم اصحى براحتى خالص ولا ايه رأيك؟؟ ههههههههههه
انا حاولت انام بس ماعرفتش
عجبتك حكاية العريس !! مش عارف ليه كنت متوقع كده هههههههههههههههه
تصدقى ان انا كنت شاكك فيكى انك اصلا من هنا بس بتموهى ههههههههههههههههه
اللى طخه ياستى يبقى ........
خليها للبوست وانت تعرفى
ههههههههههههههههههههه
نورتى المدونة
تحياتى
********************
رامز عباس
منور ياباشا
واعيش فى القاهرة ليه
ماانا متكيف مع جو الرعب ده
وبعدين مش هعرف اعيش فى القاهرة لانه عندهم كله عادى وانا اخوك ماليش فى العادى ده خالص
ههههههههههههههههههههههه
نورت المدونة بمرورك
ســــــــــــــــلام

Unknown يقول...

حبيت اسلم واصبح
صبـــــــــاح الفل
وكل سنة وانت فى اتم صحة
وأكمل عافيـــــــــــــــة
يااستاذ المنتـــــصر المعتصم

المعتصم يقول...

الكتورة نور
صباح الفل والورد كمان
وكل سنة وحضرتك طيبه وفى احسن احوال دايما
بيسعدنى مرورك بمدونتى
نورتينى

رامز عباس يقول...

أولا أنا معلق قبل الدكتورة نور يبقي تعلق علي الباشا الاول

الزهايمر اشتغل ولا ايه


ثانيا تعليق حلو بمدونتك ولكن


انت هتقر عليا اني سافرت اشم هواء


طب وريني هتعمل زيي ازاى

المعتصم يقول...

رامز افندى عباس
منور المدونة
ده اولا
ثانيا بقى انا رديت عليك يامعلم بس فى الرد على تعليق موناليزا
لانى مش برد على كل تعليق منفرد انا لما يكون فيه كذا تعليق برد عليهم كلهم بالدور وبيكون فيه فاصل بين الاسماء
انما كلهم بيكونوا فى تعليق واحد
يعنى انت ظلمت الزهايمر
انما ياريت انت اللى تركز شويه
وبعدين خلى بالك الدكتورة نور دى وزيرة الصحه النسويه فى الحلف بتاعى
هههههههههههههههه
هعمل زيك ازاى ؟؟؟؟؟
اقولك
هجيب طشت كبيييير واملاه ميه واجيب مروحه واحطها الناحيه التانيه
وكرسى بلاستيك كده زى الكراسى اللى بتبقى على الشط للجماعه اللى مش بيعرفوا يقعدوا على الكراسى القماش وشمسيه حلوة كده
واقنع نفسى انى على البلاج وعييييييش
ولا الدموع يامعلم
هههههههههههههههههههههه
هو احنا هنغلب ياابنى
ده احنا صعايده يعنى عفاريت
ههههههههههههههههه
نورت يارامز

غير معرف يقول...

كل سنة وأنت مصطفى كما أحبه وأعرفه


ماذا يحدث لو انقطع اللقاء الأون لاين وأنت تتحاور مع من تحاورهم، ومرة واحدة كدة الاتصال عملها معاك، في نقطة مصيرية من أحداث الحوار، أكيد كان هايبقى شكلك مش ولابد..

عموما زي ما معاليك قلت.. رغي وكلام فاضي

دمت بخفة دمك المعتادة

Sweet Violet يقول...

ربنا معاااااااك فى كل اللى قولته ده
هو ده شغل ولا عذاب ؟؟
يلا منتظرة ان شاء الله القصه
و كل سنة و انت طيب
^_^

EMMY BABY يقول...

كل سنة وانت طيب يا معتصم

ورمضان كريم

هههههههههههههههههه انت متاكد ان ده شغل ولا بيعاقبوك علشان حاجة عملتها

بعبش كدة

بس بجد بجد حكاية العريس دى بحق وحقيق ولا هزار

طول عمرى اسمع عن الصعايدة فى التلفزيون ههههههههههه
بس مش لدرجة الحاجات دى تبقى حقيقة

مهو يوم الفرح اومال هيمسكها يوم ايه ؟؟؟؟؟؟؟؟؟؟؟؟؟؟؟

مش يوم الفرح ده يعنى جوزها ولا انا دماغى لفت

مستنية القصة بجد

تحياتى
ايمى

ستيتة يقول...

انا مستنية القصة على احر من الجمر
اصل بلدنا دي فيها من العجايب ما لا يخطر على عقل بشر

كل سنة وانت طيب وربنا يعينك على لفة الكعب الداير اليومية دي

يالا شهل شوية

مش بحب استنى

مناخيري بتطول مع الإنتظار والتشويق والسسبنس

ريمان يقول...

كل سنه وانت طيب

ربنا يبلغنا رمضان يا رب

عمرو جويلى يقول...

حضرة الصعيدى التمام
السلام عليكم
كل سنة وسيادتك بخير ودايماً سباق بالخير
صعيدى بقى وأهل كرم
ههههههههههه
بالنسبة لعدم حضورى اللقاء فلا تتخيل مدى حزنى على عدم حضوره ولكن الحاجة عندنا تعبانة وكل يوم فى حال حتى أنى أصبحت غير مهتم بالمدونة ولا بأى شىء
فعذراً شديداً
ولك كل تقديرى

عمرو جويلى يقول...

حضرة الصعيدى التمام
السلام عليكم
كم أنا سعيد بنقدك البناء لى وهذا يدل أنك تقرأ ما أكتبه وواعتراضك يا صديقى أن الثورة بدأت عام 1855م واستمرت عشرون عاما حتى تمكن المسلمون من الحصول على الإستقلال عام 1865م وسؤالك هنا هو
كيف إستمرت الثورة عشرون عاماً وإعلان الإستقلال بعد عشر سنوات من بداية الثورة
والإجابة ياصديقى أنه تم إعلان الإستقلال
بمجموعة الولايات والمدن التى تحت أيديهم أما الولايات الأخرى التى ما زالت تحت الإحتلال الصينى فاستمرت فى الثورة
عذراً على الإطالة
ولك كل تقديرى

غير معرف يقول...

فين

Kiara يقول...

كل سنة وانت طيييييييييييب

وايه المشوار اللي حسيت اني تعبتلك فيه دا

وبعدين انطخخخخخخخخخخ

لاااااااااااااااا لازمن اعرف الحوكاااااااية

غير معرف يقول...

ينفع كده يامستر
تخلينى الف معك كعب داير
لما دماغى لفت
بجد انا تعبت لك خالص
والجو عندكم صعب خالص
لسة الوالدة راجعة من هناك
وراجعة متاثرة وتعبانة من الجو
بس انت من اسيوط منين
والله حاسة اننا فى الاخر حنطلع قرايب
انا مولودة فى اسكندرية
لاكن اصل الوالد اسيوط
وكمان اختى الوحيدة متزوجة هناك
ويمكن فى الاخر تطلع بن عم ولاد اختى
مش يمكن
عموما اختى فى بلد اسمها الغنايم بحرى
شوف بقى حنطلع قرايب ولا ايه
وصحيح ايه حكايه العريس
الحقنا بالبوست دنيا فيها العجب
تحياتى

adel يقول...

÷ههههههه
انا مش قالتالك بلاش سهر
ههههههههههههه

انا مستني الحكاية زي د/ستيتة كده :):)

كل سنةو انت طيب و رمضان كريم :):)

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
غير معرف
منور ياكاتبنا الكبير
وكل سنه ومعاليك طيب وفى احسن الاحوال
ابدا ياسيدى تانى يوم كنت هنزل اعتذار رسمى نظمى فهمى(ده واحدقريب كيارا)واقول فيه ان النور اتقطع ولا كان هيبقى شكلى وحش ولا حاجه لان الحوار بتاعى معاهم مكانش فيه اى نقاط مصيريه ده كان عن الكشك اصل انت مش عارف زى حلاتى ههههههههههههه
يللا رغى بقى
نورت يا باشا بس ابقى ادينى امارة
**************
سويت هانم
تحياتى
منورة بلوجر
وكل سنه وانتِ طيبه
اكيد طبعا عذاب مش شغل
بفكر استندل ومااقولش القصه
ههههههههههههههههههههه
نورتى معاليكى
**************
ايمى بيبى
تحياتى
وكل سنه وانتِ طيبه ياايمان
الله اكرم واكرم
مش عارف بس وانا صغير كنت شقى خالص فممكن اكون عملت حاجه وحشه وبيعاقبونى عليها احتمال كبييير هههههههههههههههههه
هى حكاية العريس حقيقيه
بس انا بفكر استندل ومااقولهاش واخليكم كده على نار
هههههههههههههههههههههه
وبعدين هو يمسك ايدها ليه؟؟؟ بتاع ايه يمسك ايدها يعنى ؟؟؟
صحيح هو كان يوم الفرح وهو جوزها ومسك ايدها علشان ينزلها بعد الفرح ماخلص كمان يعنى هاياخدها على البيت
بس مايمسكش ايدها برضو
هههههههههههههههههههههههههه
نورتى ياايمى
***************
د/ستوته
تحياتى
ايه رأيك العب الدنيئه ومااقولش القصه؟؟؟؟؟
ههههههههههههه
كل سنه وحضرتك طيبه وبكل خير
وايه حكايه بونكيو ومناخيره معاكى
ههههههههههههههه
اسعدنى مرورك
**************
ريمان هانم(اللماضه كلها)
تحياتى
وكل سنة وانتِ طيبه
مختفيه فين بقالك فترة؟؟؟؟
ده انا كنت قلقان عليكى خالص حتى روحت هاكونا مطاطا ومالقيتكيش هناك قالوا مشيت فى اول توك توك
نورتى المدونة بمرورك الجميل
**************

المعتصم يقول...

اللؤلؤة
صديقى العزيز
وعليكم السلام ورحمة الله وبركاته
كل سنه وانت طيب ياحضرة المنوفى التمام
والف لابأس على الحاجه وان شاء الله ربنا يعجلها الشفاء
وياريت تبقى تطمنى عليها باستمرار دى والدتنا برضو
وبعدين ولا يهمك كنت موجود معانا بروحك وقلبك الطيب
..........
العمليه مش نقد بناء انما هى اندهاش من نقطه كان فيها لبس عندى واشكر اهتمامك بالتوضيح والشرح
وكده تمام ياباشا
ووصلت المعلومه
كل الشكر لك اخى الحبيب
نورت المدونة
**************
غير معرف
مين؟؟
***************
كيارا
كل سنه وانتِ طيبه
المشوار ده طابور الذنب اليومى بتاعى
هههههههههههههه
اه انطخ وياريتها جت عليه هو وبس
مش عارف استندل ومااقولش ولا قلبى الطيب هيخلينى اقول؟؟
لسه مش عارف
هههههههههههههههههه
نورتى المدونة ياكيارا
*****************
ام مالك
تحياتى
ماانا قلت لحضتك خليكى انتِ فى البيت ماسمعتيش الكلام
طب اديكى تعبتى اعمل ايه انا دلوقتى
ده حتى الجو عندنا هنا زى الفل
ولا درجة الحرارة بتوصل خمسين ولا فيه تراب ولا رطوبه ولا اى حاجه
هههههههههههههههه
وكمان بعد ده كله طلعنا قرايب اهه
انا كنت حاسس الدم بيحن برضو
ههههههههههههه
بس من اول مركز فى اسيوط من بحرى واسمه ديروط انما الغنايم بعيده عنى شويه ييجى ساعه ونص كده بالعربيه
انما ده مايمنعش انى ابن عم ولاد اختك وكمان ابن خالتهم
حكاية العريس الطلب عليها شديد قوى وبفكر استغل الظروف ةاخد فلوس من الناس
هههههههههههههههههه
اسعدنى مرورك
تحياتى
***************
عادل بتاع الحكومه
منور يازعيم
وكل سنه وانت طيب
طب انت قلت بلاش سهر انما تعمل ايه فى اللى مش بيسمع الكلامبعدين عاف انا ضحكت فى الليل دى ضحكصا لما انت قلت خبوا عيالكم المعتصم جه
فاكر
كانت ليله وسهرة مميزة فعلا
اما موضوع الحكايه ده فبفكر انى ادق فى النداله ومااحكيش
ههههههههههههههههههههههه
ايه رأيك؟؟؟؟
ولو انا عارف نفسى قلبى طيب وهحكى فى الاخر هههههههههههههههههههههههنت المدونه ياعدله
ســــــــــــــــــــــلام

Sweet Violet يقول...

(بفكر استندل ومااقولش القصه)

هق هق طب اعملها كده وشوف الانقلاب اللى هيحصل فى بلوجر
و ضرب النار اللى هيحصل فى المدونة بتاعتك
ال تستندل ال
هع و مين اصلا هيسمحلك بكده
و كمان تعالى هنا
انت استأذنت مين قبل ماتفكر هه
هو الواحد علشان مش فايق يعنى
يبقى خلاااااااااااااااااص ولا ايه
لاااااااااا .. ارجع لعقلك احسن لك
×_×

م/ الحسيني لزومي يقول...

تقبل الله منا ومنكم صالح الاعمال وكل عام وانتم بخير

غير معرف يقول...

هههههههههههههههههه

يخرب عقلك كل المشواير دي وانت مش نايم اساسا

انا يومها صابتني غيوبة ونمت للعصر ربنا يعينك بجد انا مستغربة بتسهروا كتير وبتروحوا تاني يوم الشغل كدا عادي :]

واخيرررررررررا عرفت سر الرشاقة بتاعتك مع انك بتاكل اكل القرية كلها طبعا من عذاب الشغل والمشي الرياضة يابختك ياعم بتاكل ولا يبان عليك وبنحسدك وبنقر عليك وبرضوا مش بتتاثر هههههههههههههههههه

وبعدين العرررريس يستاهل طبعا معقوول تيجي من القريب ومتجيش من الغريب وبعدين يمسك ايدها بمناسبة ايه الشرررررررررف غالي ياخويا

ههههههههههههههههههههه

بلاش ندالة بقى وقولنا القصة احنا بنتظرها متتاخرش والا هنضرب بالنار :]

ههههههههههههههه

كل سنة وانت طيب يارب

يوميات شاب منوفى يقول...

ياعم الحاج لما العريس مش هيمسك ايد العروسة فى الفرح هيمسكها امتى الناس دى بتستهبل هما مش عارفين الى حصيل جوة ولا اية على العموم فى انتظار القصة

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
سويت هانم
ايه الدخله الشمال دى؟؟
خلى بالك انا مش بتهدد
وورينى هتعملى ايه وهتضربى نار على مين
ده العريس مسك ايد العروسه مات فيها 6 وانتِ هتضربى نار هنا وفاكرة الموضوع سهل كده دى يموت فيها عمك بلوجر واعوانه
ههههههههههههههههه
وبعدين اناافكر براحتى وزى مااناعاوز
وورينى هتعملى ايه هه
*************
المهندس/ الحسينى لزومى
تحياتى
كل سنة وحضرتك طيب وتقبل الله منا ومنكم صالح الاعمال يارب
نورت المدونة
**************
نوارة
تحياتى
كل المشاوير دى!!!!
طب وايه يعنى انا متعود على كده وساعات كتير بطبق باليومين صاحى
وبعدين فين هو اكل القريه اللى انا باكله ده حرام عليكى
انا كده ياعينى عليا دايما مظلوم ومحسود على الفاضى
ههههههههههههههههههههه
مش قال والنبى كله الا الشرف
ههههههههههههههههه
ياعينى العريس راح فى الكزوزة واخد خمسه تانى معاه
اممممممممممممممم مش عارف اقول ولا لأ
بس على فكرة انا مش بتهدد ومتعود جدا على ضرب النار بس ورونى شطارتكم
ههههههههههههههه
كل سنه وانتِ طيبه
نورتى المدونة بمرورك الجميل
****************
يوميات شاب منوفى
المعلم رامى
منور ياباشا وكل سنه وانت طيب
ورمضان كريم
يحصل اللى يحصل جوه مش موضوعنا انما يمسك ايدها قدام الناس عيب
ههههههههههههههههههههه
نورت المدونة ياعم رامى
ســــــــــــــــلام

Unknown يقول...

السلام عليكم ورحمة الله وبركاتة
كيف حال حضرتك؟
يا رب تكون بالف خير
كل عام وانت بالف خير
زكان الله فى عونك
بس انا على كدا زوجى لة الجنة
لان شغلة فى العاشر من رمضان واحنا سكنين فى الجيزة
وبيمشى من البيت 6ونص
ويرجع على المغرب8 يعنى
دا لو مش وراة مشاوير تانية
ربنا يعنكم
دمت بالف خير وكل عام وانت الى الله اقرب

Ahmed يقول...

كل سنه وانت طيب ياجميل
ربنا يبلغنا رمضان ويرزقنا خيره

ايه ياعم حكاية العريس ده بس؟

لا لا ممكلة الجنوب لازم تتمدن شويه مش طريقه ديه يعني (وش مطلع لسانه)

mohamed ghalia يقول...

باشا
كل سنة وانت طيب
ربنا يكرمك ويسعدك دايما

مسدس صغير يقول...

كل سنة وانت طيب
وبخير
رمضان كريم
المفروض وزارة التربية والتعليم يسلموك فى اول كل سنة 10 جزم لزوم الشغل
ههههههههه
كل سنة وانت طيب

غير معرف يقول...

نزلت امتى البوست ده عاااااا
المدونة عندى بتخرف اكيد ومش الريدر مش بيقرا الجديد يعنى غيرت المتصفح ومفيش فايدة يلا ما علينا
كل سنة وانت طيب ورمضان كريم على الامة الاسلامية كلها اللهم امين يارب العالمين
وبعدين يعنى مش عايزة احقد بتشتغل فى قرية فى بلدكم نفسها يعنى فين الازمة هااااا هاااااااا فين الازمة ويعنى المشوار لاسيوط هو اللى ازمة امال الناس اللى من اسيوط وبتشغل فى مراكز وطالع عنيها تعمل ايه بس :(

وبعدين عريس ايه اللى انطخ ده ليه انتم عايشين فين بالظبط هههه لا بجد والله عايزة اعرف الموضوع ده اى نعم انا مبسوطة من الاب الشهم اللى عمل الحركة دى هههههه بس عايزة اعرف الحكاية كلها

ايوشة انا على فكرة بس مكسلة اسجل دخول على بلوجر :)
شفت الكسل وصل لفين

غير معرف يقول...

انت مهيس ع الاخر

بس انا موش مستغربه من العريس اللي طخوه ده 00000 بس عايزاك تكتب كمان عن عدد الاسلحه الناريه والعدد والعتاد اللي لابد يتواجد في كل بيت في بعض مناطق الصعيد0000 علشان نخوفهم زياده نياهاهاها

وربنا يعينك في شغلك 00000 هو انت بتشتغل في مجاهل افريقيا :)

mimi يقول...

كل عام وأنتم بخير

ورمضااااااااان كاررررريم

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
حتى تشرق الشمس
وعليكم السلام ورحمة الله وبركاته
ام سلمى
كل سنه وانتِ طيبه
ورمضان كريم
كده زوجك له الجنه بس ياريت يبقى ياخدنا على جناحه وهو داخل
هههههههههههههه
ربنا يعينه ويقويه
نورتى المدونة
***************
المشمهندز احمدابوالعلا
منور ياباشا
كل سنه وانت طيب
مملكة الجنوب من غير شوية الحركات دول ماتبقاش مملكة الجنوب ولا ايه؟؟؟
ع فكرة انا ناوى اجوزك من عندنا ايه رأيك؟؟؟
هههههههههههههههههههههه
نورت يابشمهندس
****************
صديقى واخى الحبيب
محمد غاليه
بتاع السعاده
كل سنه وانت طيب وبكل خير ودايما فى سعاده
نورت يامحمد
****************
مسدس صغير
ابوصلاح
كل سنه وانت طيب وبكل خير
عاوزك ترفعلى قضيه على الوزير ذات نفسه علشان يجيبلى الجزم
ههههههههههههههههههه
نورت ياباشا
*****************
ايوشه بنت خالى(الكسل كله)
كل سنه وانتِ طيبه
ورمضان كريم(مش هتعزمينى عندكم على الفطار؟؟؟
*هو عمك بلوجر كله بيخرف اليومين دول مش عندك انتِ بس عند الناس كلها
*كل ده ومش عاوزة تحقدى اومال لو هتحقدى هتعملى فيا ايه؟؟
الناس اللى بتشتغل فى مراكز تانيه بيبقى الموضوع اسهل جدا لان المراكز ليها مواصلات ياابله انما البلد اللى انا بروحها مالهاش مواصلات دى اوسع شارع فيها متر ونص

وبعدين عادى يعنى لما العريس ينطخ بس مش الاب هو الشهم ده اخوها هو اللى طخه وعشان اطرك انتِ مش هقول الحكايه هه
هههههههههههههههههههه
****************
فتاه من الصعيد
كل سنه وانتِ طيبه ورمضان كريم
بس بقى علشان انا زعلان منك بجد
هبقى اكتب نبذه مختصره عن كمية السلاح اللى بتبقى موجوده فى البيوت
يابنتى انا بشتغل فى مجاهل الصعيد ودى اوعر من مجاهل افريقيا
ههههههههههههههههه
نورتِ يامروة
****************
ميمى بوخارست
منورة المدونة
كل سنه وانتِ طيبه ورمضان كريم
نورتى المدونة بمرورك الجميل
ســـــــــــــــــــلام

ليس فقيرا من يحب يقول...

السلام عليكم

يا اهلا يا اهلا بالمدرسين

انا كمان زمل بس لسه ربنا مكرمش

ولحقت الميرى ههههههههههههههههههههههه

برافو عليهم يطخوا العريس هو يمسك

ايد عروسته بامارة ايه هههههههههههههههههههههههههه
كل سنه وحضرتك طيب

رمضان كريم

رحلتنا في الحياة يقول...

عزومة فطار مرة واحدة هو بعد ما الناس كلها عرفت انك بتتعشى بكشك وبسبوسة ومعرفش ايه حد يستجرى يعزمك على حاجة طيب ده لو حد فكر يعزمك هيكون عايز يستلف ولا يعمل قرض علشان يجيب اكل يكفيك
:)
وبعدين الحكاية هعرفها هعرفها باذن الله هى حصلت فين فى ديروط بسيطة تليفون صغير لواحدة من اصحابى هناك واكيد هى عارفة والبلد صغيرة ومش بيستخبى فيها حاجة واعرفها وانزلها فى المدونة عندى قبلك واحرق عليك البوست p:
وبعدين انا مش بحقد ولا حاجة انا بقر بس هو حد لاقى شغل فى الزمن ده


كل سنة وانت طيب وكل سنة وانت الى الله اقرب

المعتصم يقول...

ليس فقيرا من يحب
وعليكم السلام ورحمة الله وبركاته
اهلا يارانيا
كل سنه وانتِ طيبه ورمضان كريم
ربنا يرزقك بالشغل اللى بتحبيه يارب
(بس نصيحه من اخوكِ بلاش التدريس)
هههههههههههههههههههههه
ماعندناش احنا الكلام الفاضى ده
قال يمسك ايدها قال
هههههههههههههههههههه
نورتى المدونة
*******************
ايوشه بنت خالى
اهلا اهلا
طلعتى بخيله تبقى من اسيوط نفسها
ماانا عارفهم الاسايطه دول
وبعدين انتِ هتسيحيلى كشك وبسبوسه وبليله وحاجات تانى كتير
وايه يعنى
اكل براحتى ومطرح مايسرى يمرى
هههههههههههههههههه
طب انا كنت ناوى انزل البوست بتاع العريس بكره
انما مش هنزله علشان خاطر عيونك
ورينى بقى شطارتك واعرفى الحكايه ونزليها فى بوست لو جدعه
هههههههههههههههههههههههههه
بس انا عارف انك مش هنعرفيها
لانه حت صحباتك مايعرفوش دى اسرار بلد ياامى
انتِ فاكره الموضوع بسيط؟؟؟؟؟؟
ورينى الشطاره يللا
وانا ادعمل اى حاجه تقوى عليها لو عرفتى
هههههههههههههههههههههههه
ايه رأيك ؟؟؟؟؟؟؟؟؟؟؟؟؟
مستنى اهه
معاى بكره كله لغاية بالليل متأخر
ماشى ؟؟؟؟؟؟
اتفقنا؟؟؟؟؟؟؟؟؟؟؟؟؟
ســــــــــــــــــلام يابخيله

غير معرف يقول...

ايييييييه مين اللى بخيلة دى ومالهم الاسايطة ان شاء الله اذا كان احنا نفسنا بنعيب على بعض كدا الناس برة تقول ايه وتاخد عننا سمعة وحشة أوى على فكرة
بس بصراحة انا مش هعرف اتوصل للحكاية لسبب طلع انى معرفش حد فى ديروط واللى كنت افتكر انها من ديروط طلعت ابنوب وطلعت اوووووت :(
يبقى خليك كريم ونزل البوست علشان نستفيد منه ونحاول نتفادى الاخطاء اللى وقع فيها العريس دى فى المستقبل يعنى الواحد لما ربنا يكرمه ويجوز وبعد سنين بيحلم يجوز ينطخ هههههه لا بجد انا هستنى البوست بكرة






ايوشة وبردو مكسلة :)

تأثير الفراشة يقول...

ربنا يعينك و يقويك على هذه المشقة

كل عام و حضرتك بخير و إلى الله أقرب بإذن الله

اللهم أعنا على ذكرك و شكرك و حسن عبادتك

رمضان كريم