حبة تهييس

بسم الله الرحمن الرحيم
السلام عليكم ورحمة الله وبركاته

كنت قاعد كده زهقان وشطحت بدماغى وسرحت
واتخيلت موقف غريب قووووووووووى
خير اللهم اجعله خير
قال ايه قال
البشمهندس اللى ماسك الحكم

(الريس بتاعنا يعنى)
واقف على المنصه وهو لابس الجلابيه
وقدام جموع الجماهير العريضه اللى بتهتف له
راح داخل دخلة سخنه قووووى
وراح رازع يمين كبيييييييييييييير وقال ايه:
على الطلاق بالتلاته ماهنستورد ولا حبة قمح تانى من اى حته
ولا اى سلعه تانيه
وهتزرعوا اللى هاتكلوه بايديكم

وغصب عن بوزكم هتشجعوا الصناعه الوطنيه
وعليا اليمين اللى هيبنى على قيراط ارض زراعيه
اذا لم يستصلح قصاده 10فدادين فى الصحرا
لاخرب بيته واصادر منه البيت اللى هيبنيه

واديه لاى شاب كويس هيستصلح العشر فدادين
والبلد اللى عاوزانا نشترى المنتجات بتاعتها
ماتبعتلناش المنتجات دى مشحونه فى الطيرات والسفن
لاااااااااااااااااااااااااااااااااااااااااااااااااااا على جثتى
البلد اللى عاوزانا نبقى زباينها

يبقى تيجى تبنى مصنع للمنتج بتاعها هنا
وبشرط ماتجيبش عمال من عندهم
يادوب ممكن نسمح بحدود 7 أو 8 موظفين اللى هيديروا المشروع
وهيكونوا هما اصحاب راس المال او من ينوب عنهم
والعماله من عندنا اهه وحاجه زى الفل
واللى مش عاجبه يخبط دماغه فى اتخن عمووود
وخدوا بقى القرار ده
ها........................
باب الاوضه انرزع قوى فطبعا انا اتخضيت وافتكرتها كبسة حكومه
وعرفوا انى كنت بحلم الحلم المهبب ده
طلع البشمهندز اخويا الصغير كان ناسى الموبايل بتاعه عندى
والحمد لله اتسترت ده انا كنت هخربها
هههههههههههههههههههههههههه
والسلام عليكم ورحمة الله وبركاته

طــــفولــة

بسم الله الرحمن الرحيم
السلام عليكم ورحمة الله وبركاته
الحمد لله رب العالمين
مصطفى باشا الصغنن اتحسن وابتدى يبقى كويس
بس اللى تاعبه شويه اليومين دول انه بيسنن
والحمد لله رب العالمين
*******
وبما ان كلامى وتعليقاتكم فى الفترة الاخيرة كانت عن الاطفال
وبرضو بما انى عايش فى مورستان هنا
بسبب بنت عمى اللى ولدت وربنا اكرمها بعبدالرحمن
والسبوع بتاعه بكرة ومصدعينى
يبقى هكتب النهارده عن الاطفال
مش عارف ليه مشغلين الاغانى بتاعة رمضان
يكونوا هيسموا الواد رمضان من ورايا ؟؟؟؟
ماعلينا
المهم ان اغانى رمضان فكرتنى بابن واحد جيراننا
الولد كان اسمه رمضان
وكان شقى قووووووى
فى يوم رمضان كان مشترى جاز(كيروسين)
وراجع والجركن اللى فيه الجاز وقع من ايده
وطبعا اتدلق منه شويه على الارض فى الشارع
اخد الجركن وروح
وشويه كده لقيت رمضان جايب حتة حديد
وبيحفر فى الارض
*بتهبب ايه يامنيل يارمضان عندك
- بطلع الجاز بتاعنا ياعم مصطفى
ههههههههههههههههههههههههه
مقدرتش امسك نفسى من الضحك
ومعرفتش اقنعه ان الجاز ضاع خلاص
وفى الاخر شخطت فيه علشان يروح
*********
صديقى العزيز والانتيخ بتاعى ابوعبده
(ربنا يخليله عبده يارب )
راجع من الشغل
دخل البيت لقى المدام ام عبده فى المطبخ
كتر خيرها بتحضر الغدا
امال فين الوااااااد
بيلعب جوا
دخل الاوضه يشوف ننوس عين ابوه عبده باشا
لقى عبده بيحط صباعه فى الفيشه بتاعةالكهربا
* ابوعبده : بتعمل ايه ياعبده
- عبده : عبده مش راضى ينور يابابا
وكان زعلان مووووت ان صباعه مش فايت فى فيشه الكهربا
ههههههههههههههههههههههههههه
بجد بجد الاطفال دول وعلى الرغم من كل شقاوتهم
الا انهم اجمل شيئ فى الدنيا
يارب يرزق كل اللى نفسه فى طفل ويفرح قلبه
وسلامو عليكم

اعتذار وطلب

بسم الله الرحمن الرحيم
السلام عليكم ورحمة الله وبركاته
معلش انا بعتذر عن تقصيرى فى الفترة اللى فاتت

وعدم المتابعه المنتظمه لمدوناتكم الحبيبه

بس ده كان لظروف صحيه

عارفين بقى الحر وعمايله وصداعه

وكمان الاسنان ووجعها

ده كان الاعتذار

اما الطلب بقى

فاانا عاوز منكم تدعو لابن اخويا الصغير

(اللى هو صورته فى البروفايل بتاعى )

بان ربنا يعجله الشفاء

وشكرا ليكم

والى لقاء قريب ان شاء الله

والسلام عليكم ورحمة الله وبركاته

الجالاكسى

انا راجل احب اسدد ديونى اول بأول
وربنا يسدد ماعلينا
طلباتك يافندم
ويارب تطلع من النوع المطلوب

ذكرى جميلة

10 يونيو

على الرغم من كل ماحدث
ستظل دائماً أجمل ذكرى فى حياتى
وسيبقى لكِ بقلبى مكان

لــــــــيـــــه + تحديث

بسم الله الرحمن الرحيم

انا بشكر كل اللى علق على البوست

وحاول انه يخرجنى من الحاله اللى كنت فيها

ومعلش اعذرونى لانى مش هرد على التعليقات

لان الكلام اللى انا قلته فى اول تعليق للدكتورة ستيته

هو هو الكلام اللى هقوله فى باقى التعليقات وهيبقى معاد

وانا والحمد لله احسن كتير

وعلى فكرة انا عارف ان الاسئلة دى مالهاش اجابه

وعارف كل الكلام اللى قولتوه كويس

بس هو الواحد ساعة مابيكون متضايق شويه

بيحب يفضفض

وادينى فضفضت معاكم

ورجعت زى الاول والامور كلها عادى خالص

واستنوا البوست بتاع بكرة

بسم الله الرحمن الرحيم

ليه لما الواحد يتعامل مع الناس بأدب

الناس تطمع فيه ومحدش يحترمه

ليه لما الواحد يتعامل بطيبه

الناس تقول عليه عبيط

ليه لما الواحد مايرضاش يسرق

الناس تقول عليه خواف ومش مفتح

ليه لما الواحد يبقى عنده حياء ويكون خجول

الناس تقول عليه مغفل ومش مدردح

ليه لما الواحد يشتغل بضمير ويعامل ربه علشان يحلل المرتب

يبقى هو ده حمار الشغل اللى لازم يعمل كل حاجه

وغيره قاعد مش بيعمل حاجه

ليه بقت البلطجه هى اللى بتجيب الحقوق لاصحابها

ليه بقت قلة الادب هى الحوار السائد والذى يجب ان يسود

ليه لما الواحد يحاول ياخد حقه بطرق مشروعه

عمره مابيقدر ياخده

وليه كمان لما بعد كده يحاول انه ياخده بأى طريقه

يتقال عليه بلطجى وبتاع مشاكل

الناس مالها ؟؟؟؟؟؟؟؟؟؟؟

فين الضمير والاخلاق ؟؟

فين الادب والاحترام ؟؟

فين الخجل والمحبه ؟؟

فين الود والتراحم ؟؟

كل ده بقى مافيش

مات خلاص

معلش مضطر ابعد شويه علشان اراجع نفسى

واشوف هل انا صح ولا غلط

ســــــــــــــــــــــــلام

من يوميات مُدرس

بسم الله الرحمن الرحيم

السلام عليكم ورحمة الله وبركاته

عمرى ماكنت اتخيل انى اشتغل مُدرس ابدا

انما هعمل ايه

نصيبى المهنى جه كده

والحمد لله على كل حال

طبعا اول يوم ليا فى العمل مش ممكن يتنسى

واول حصه ادخلها للطلبه دى مستحيل انى انساها

خصوصا انى مااشتغلتش مُدرس قبل كده

دخلت الفصل وانا مرعوب

وكانت الحصه دى عند تالته اعدادى

طبعا كان لازم ابتديها بالتعارف وكده

وحبيت الطف العمليه ومبقاش من اولها جد قووى يعنى

- نتعرف على بعض انا اسمى الاستاذ مصطفى

مُدرس الحاسب الجديد

كل واحد يقف ويقولى اسمه بالدور، ماشى ؟

وبداء التعارف

بعد كده

ابتديت اسئلهم عن مدى معرفتهم بالكمبيوتر

اتصدمت

وكنت عاوز استقيل

فى لحظتها

تخيلوا طالب فى تالته اعدادى

-اسأله تعرف تشغل الكمبيوتر؟؟

-يرد عليا ايوة يااستاذ ادوس على الزرار

-كويس خالص طب تعرف تقفله ؟؟

- ايوة يااستاذ اشد الفيشه من الكهربا

- نعم ؟؟؟؟؟

هههههههههههههههههههههههههههههههههههههههه

وتخيلوا بقى ان معظم زمايله شاطرين زيه كده

انا كنت ناوى امشى من المدرسه دى وماارجعش تانى

بس الموجه بتاع المادة(وهو صاحبى من قبل كده) هو اللى واسانى شويه

ده طبعا غير اللى شوفته من الساده الافاضل المدرسين

اللى المفروض انهم بيربوا اجيال ويعلموا نشئ صغير

اول ماشوفت الحاجات دى كلها كويس

عرفت احنا ليه متأخرين والمفروض نبقى من دول العالم التاسع

(احنا كتير علينا التالت بصراحه)

ههههههههههههههههههه

كفايه كده نكد ونبقى نكمل فى مرة تانيه ان كان فيه فى العمر باقى

انا كتبت البوست ده إحتفالا بظهور نتيجة النقل بمدرستنا الكريمه

(النتيجه المفروض انها كانت تظهر من 15يوم)

وبحب اشكر جهود الساده المعلمين الافاضل

وكمان مش هنسى دور رجال الامن والعاملين باستاد القاهره

وحسبى الله ونعم الوكيل

والسلام عليكم ورحمة الله وبركاته

حلم جميل

بسم الله الرحمن الرحيم

السلام عليكم ورحمة الله وبركاته

فيها ايه لما مايبقاش فيه موبايل كل شويه يرن

ولا يبقى فيه كمبيوتر ولا نت

فيها ايه لما الواحد يرجع من شغله

ياكل كده براحته

وبعدين يدخل ينام شويه ويصحى براحته

ويقوم من النوم كده فايق ومافيش اى حاجه مضايقاه

*************

النهارده انا حصل معايا كده

رجعت من الشغل

غيرت هدومى وصليت واكلت

وبعدين نمت

(مش عاوز قر وحسد)

وصحيت من النوم لقيت الموبايل فاصل شحن

قلت ادخل على النت شويه

لقيت النت كمان فاصل

الـــــــــــــــــــــــــــــلـــــــــــــــــــــه

ايه الجمال ده

لأ واللى اكتر من كده كمان

ان البيت كان رااااااااااااايق خالص

الحاج كان فى مشوار بعيد شويتين

وابن اخويا اللى انا شغال عنده مرجيحه كان مع ابوه

وامى ربنا يديها الصحه ويطول فى عمرها يارب

كان عندها ماتش غسيل ومش فاضيه (كالعاده)

لقيت الدنيا رايقه رايقه رايقه

وفيه كده حاله من الصفاء النفسى والروقان الذهنى والمعنوى

حسيت بحاجه حلوة كده من فترة ماحسيتش بيها

وعلشان كده قررت انى مش طالع من البيت النهارده

واخدت نص يوم كامل من الأنتخه (على رأى الدكتورة ستيته)

عقبال كده كل اللى نفسه يأنتخ ومش عارف

****************

انا قلت كفايه نص يوم وابقى اكمل فى يوم تانى

وفتحت الكمبيوتر اهه

بس هشغل الموبايل بكره ان شاء الله

بس بجد بجد

الدنيا من غير الحاجات دى بتبقى مريحه جدا

حاولوا تجربوا كده انكم تستغنوا عنها يوم وشوفوا

واسيبكم بقى واروح اكمل لعب (Games)

ياريت نزور المدونة دى

http://ramezabas.blogspot.com/

ونعلن تضامننا معاهم

ســــــــــــــــــــــــــــــــــــــــــلام