الأربعاء، 29 أبريل، 2009

قصيدة بحبها

بسم الله الرحمن الرحيم
السلام عليكم ورحمة الله وبركاته
ريمٌ عَلى القاعِ بَينَ البانِ وَالعَلَمِ" ...."أَحَلَّ سَفكَ دَمي في الأَشهُرِ الحُرُمِ
رَمى القَضاءُ بِعَينَي جُؤذَرٍ أَسَدًا" ...."يا ساكِنَ القاعِ أَدرِك ساكِنَ الأَجَمِ
لَمّا رَنا حَدَّثَتني النَفسُ قائِلَةً" ...."يا وَيحَ جَنبِكَ بِالسَهمِ المُصيبِ رُمي
جَحَدتُها وَكَتَمتُ السَهمَ في كَبِدي".... "جُرحُ الأَحِبَّةِ عِندي غَيرُ ذي أَلَمِ
رُزِقتَ أَسمَحَ ما في الناسِ مِن خُلُقٍ" ...."إِذا رُزِقتَ اِلتِماسَ العُذرِ في الشِيَمِ
يا لائِمي في هَواهُ وَالهَوى قَدَرٌ" ...."لَو شَفَّكَ الوَجدُ لَم تَعذِل وَلَم تَلُمِ
لَقَد أَنَلتُكَ أُذنًا غَيرَ واعِيَةٍ".... "وَرُبَّ مُنتَصِتٍ وَالقَلبُ في صَمَمِ
يا ناعِسَ الطَرفِ لا ذُقتَ الهَوى أَبَدًا".... "أَسهَرتَ مُضناكَ في حِفظِ الهَوى فَنَمِ
أَفديكَ إِلفًا وَلا آلو الخَيالَ فِدًى".... "أَغراكَ باِلبُخلِ مَن أَغراهُ بِالكَرَمِ
يارب تكون عجبتكم
والسلام عليكم ورحمة الله وبركاته

هناك 28 تعليقًا:

ستيته حسب الله الحمش يقول...

ومن عجب أن هذا عربي واللي احنا بنكتبه عربي
سبحان الله
ده عربي غير شكل يا ناس

طيب مش تحط الترجمة على الفيلم ولا ها نفهم كده لوحدنا؟

طبعا كنت عاوزة استنى شوية واشوف اللي ها يدخلوا ويخافوا يقولوا انهم مش فاهمين حاجة ويبدأوا ينقدوا في الفراغ الحلزوني المنبثق من الثقافة اللوزعية لأبن المفأع

انا اللي فاهماه وحساه اقل كتير قوي قوي من اللي مش فاهمة وشه من قفاه

ماشي يا رئيس

MaNoOoSh يقول...

اقطع دراعى من لغلوغة ان كنت فهمت حاجة غير كام جملة كدة من ع الناحية اشمال.. انما الناحية اليمين مخاصمانى ومش راضية تتفهم.
فين الترجمة يا معتصم؟

fnoonh يقول...

ورجعت تاني تمتعنا بابداعك واختياراتك الجميلة
انا اعرفها القصيدة دي بابا مرة قرأها قدامي وفسرهالي واعجبت بيها جدا جدا
اختيار جميل تسلم ايدك
تقبل خالص تحياتي وتقديري

mimi يقول...

مش فاهمة حااااااااااااااجة
ترجم للعامية من فضلك
وخدني علي أد عقلي

ايوشة يقول...

ههههههههه على الرغم انى لغة عربية وبموت فى الشعر العربى القديم بس فهمت طشاش بس احفظ السر ده وبلاش تقوله لحد علشان انا بدور على شغل الايام دى ومحدش هيشغل مدرسة عربى مش بتعرف تفهم يعنى :))
لا بجد القصيدة على الرغم من صعوبة كلماتها الا انها مفهومة نوعا ما دى بتتكلم عن واحد بيحب واحدة تقريبا اسمها ريم ولا انا غلطانة هروح اجيب معجم مختار الصحاح واجى اترجم بالكلمة والحرف اوعى تمشى خليك
صحيح كلمة اخيرة يخرب بيت اللى يزعلك وخلاك تقرا الشعر ده ههههههههه

د. ياسر عمر عبد الفتاح يقول...

صلي الله عليه وسلم
تسلم إيدك فكرتني بيها

أنا بحبها برضه جداً
فعلاً ليه حق يبقي أمير الشعراء

موناليزا يقول...

ياااه ياراجل
حمدالله على السلامة
عموما بماانك قلت ان القصيدة دى انت بتحبها يبقى تشرحهالنا:)

د/عرفه يقول...

بصراحة هو يعنى ارحم من الشعر اللى قبل كده
يعنى فهمت شوية كده على خفيف
ههههههههههههه
بس عايزين نعرف قرار القصيدة دى



اه صحيح نسيت
مش عايزك تزعل على ضياع الدورى
بصراحة الاسماعيلى اللى يستاهل
وخيرها فى خيرها
ههههههههههههه

mohamed ghalia يقول...

القصيدة روعة بجد أحسنت الإختيار
دمت فى سعادة

ايوشة يقول...

جيت انفذ واعدى واترجم القصيدة مش علشانك علشان الناس الغلبانة دى اللى نفسها تفهم
القصيدة اسمها نهج البردة لاحمد شوقى وبداها بالتغزل بالنساء كعادة الشعراء قديما بدا القصيدة بالتغزل او بالبكاء على الاطلال
*******
1 - ريم على القــــــاع بين البان والعلم *** أحل سفك دمى في الأشــهر الحرم
ريم يقصد بها الغزالة او الظبى وهنا الشاعر بيوصف امراة بانها مثل الغزالة التى من جمالها قتلته فى الاشهر الحرام اللى كانت معروفة عند العرب بانها يحرم فيها القتال وده تاكيد على مدى جمالها واللى شبه بانه قاتل فى اشهر يحرم فيها القتال
وعتقد كلمة البان بتدل على الرشاقة زيعا زى الغزالة اللى خفة حركتها

*************

2 - رمى القضــــاء بعيني جؤذر أسدا *** يا ساكن القــاع، أدرك ساكن الأجم
3 - لما رنا حدثتني النفــــــس قائلة *** يا ويح جنبك بالسهم المصيب رمي
4 - جحدتها و كتمت الســــهم في كبدي *** جرح الأحبـــــة عندي غير ذي ألم

وهنا اعتقد بيقول ان القضاء اصابه وعين الجؤذر اعتقد اللى هوا الجمل وده دليل على جمال عنيها والله اعلم وبعدين بستنجد انها تدركه وتترفق به
ولما رنا يعنى لما اقتربت منه حدثته نفسه قائلة ويحك لقد اصابك المحب بسهمه
كتم المه بعدما اصابه هذا السم لان جرح الاخبة عنده غير ذى الم يعنى من غير الم او بالبلدى كده عندنا جرح الحبيب زى اكل الزبيب ويعدين هو من شدة حبه بيلتمس العر لمحبوبته واصبح لديه خلق التسامح واصبح بيلتمس العذر للناس
************
يا لائِمي في هَواهُ وَالهَوى قَدَرٌ" ...."لَو شَفَّكَ الوَجدُ لَم تَعذِل وَلَم تَلُمِ
لَقَد أَنَلتُكَ أُذنًا غَيرَ واعِيَةٍ".... "وَرُبَّ مُنتَصِتٍ وَالقَلبُ في صَمَمِ
يا ناعِسَ الطَرفِ لا ذُقتَ الهَوى أَبَدًا".... "أَسهَرتَ مُضناكَ في حِفظِ الهَوى فَنَمِ
أَفديكَ إِلفًا وَلا آلو الخَيالَ فِدًى".... "أَغراكَ باِلبُخلِ مَن أَغراهُ بِالكَرَمِ




هنا بيقول للناس اللى بتلومه على حبها لا تلومونى لان الهود قدر ولو اصابك الوجد مثلى فلن تلمنى ابدا على وجدى وبيكلم انه قلب الناس اللى بتلومه دول فى صمم لا تعى ولا تحس بما هو فيه لانهم لم يجربوا فهم ينامون وهو لم يذق النوم من الهوى

وكفاية كده علشان تقريبا انا بتكلم غلط خالص وكانت معاكم ايوشة من بيتنا هههههههههه
بس بجد والله لو تعرف الترجمة ياريت تنزلها علشان عجبتنى الابيات دى واستفزتنى فى نفس الوقت

ghorBty يقول...

السلام عليكم

لا بجد جميله وكلها احاسيس راقيه جدا محتاجه لمجمع البحوث اللغويه..

احب اشكر اختي ايوشه علي الترجمه اللي اكدت لي اد ايه الشاعر كان بيعاني ومحدش حاسس به بس دلوقتي كلنا قلوبنا معاه والله يرحمه ..

تسلم وعودا حميدا للتدوين ..

بـسـمـــة صـــــلاح يقول...

احم احم احم
وزير السكافه وصل ياجدعان
افسحوا الطريق لوزيرة السكافه العسوله


طبعا جميل وبليغ
بس ياريت تكلف نفسك وتشرحهولي اصل في حاجات اشكلت عليا
(وش مكسوف وخده احمر اوي)
يادي الكسوف وزيرة السكافه مش فاهمه
يانهووووووووووووووووووووي
دا بيني وبينك عيب تقول للناس
بلاش فضايح

المهم
انا فاهماه طبعا وجميل جدا
وممكن نرشحه يكون امير الشعراء

طيب انا ماشيه دلوقتي عشان ورايا اعمال في شغل
سلام عليكم

Sweet Violet يقول...

احم احم هو بص يعنى انت قولت بتحبها و بما انك اخويا الكبير و انا بثق فى ذوقك لا طبعا مش كنت هقول حلوة ((:

لكن بعد ترجمة آيوشة هقول انها كويسة غير كده لا يمكن كنت هتعتع من هنا الا لما تنزل الترجمة علشان اقول حلو ولا لأ

طبعا امال ايه هو حد قالك انى نابغة فى اللغة العربية ولا ايه .. دى حتى كانت عدوى الاول فى المدرسة )):

mimi يقول...

زبدة ومربي وشاي

ما تقولوا كده م الأول

وضرب الحبيب زي أكل الزبيب

mimi يقول...

والله يا ايوشة انت مية مية
طلعتي مثقفة وتستاهلي جايزة من المدونة ديا
حلة محشي أو صحن مهلبية

fnoonh يقول...

انت شوفت التاج ايوة شوفته ولازم تجاوب انا كتبت اسمك والدعوة مني يعني اجبارا مش اختيارا ايوة بئه
ولا نزعل ههههههههههههههههه
لا لا لا لازم تجاوب
تحياتييييييييي
ونشوف التاج في البوست الجاي اوك اتفقنا

الشيماء صلاح*shosho* يقول...

المشكلة الكبيرة بقى اللي تكسف
اني مفهمتش حاجه :(

متقولش عني غبية...

تقبل مروري الغبي اللي مفهمش حاجه خالص
تحيتي..

المعتصم يقول...

بسم الله الرحممن الرحيم
السلام عليكم ورحمة الله وبركاته
************
د/سوتيته
تحياتى
لالالالالالالالالالالالالالالا
انا كده هزعل منك
تبقى وزيرة التعليم العالى وتقوليلى حط الترجمة على الفيلم
مش انتى اللى تقولى الكلام ده
امال سيبتى ايه للعيال البايظه اللى بنحاول نعلمها
وبعدين ماحدش يقدر ينتقد فى الفراغ الحلزونى علشان احنا اممناه وبقى تبع حكومه الحلف خلى بالك وابن المفأع مسك منصب مهم معانا(هتشوفيه فى الاجتماع الجاى)هههههههههههههههههه
دى قصيدة نهج البردة لأمير الشعراء احمد بك شوقى وكتبها فى معارضة قصيدة البردة للامام البوصيرى فى مدح الرسول عليه صلوات الله وسلامه
بس هو عمل زى الشعراء الفطاحل لما كانو يبتدو قصيده لازم يبتدوها بالغزل الجميل
نورتى يادكتورة
تحياتى ودمتِ بكل خير وود
**************
منوووووووووش
تحياتى
وتقطعى دراعك ليه بس ؟ بعد السر عليكى
وبعدين انتِ عاوزة الترجمه ليه ؟؟ ده عربى ومالكيش دعوة بيه انتِ خليكى فى مونش واللوحات اللى ب80مليون وسيبى الحاجات دى للناس الغلابه اللى زى حلاتى هههههههههههههههههههههههههه
نورتى واسعدنى مرورك
تحياتى ودمتِ بكل خير وود
***************
فنونه
تحياتى
ربنا يكرمك على ذوقك وعلى مجاملتك الرقيقه
وربنا يخليك بابا واضح انه ذواق للشعر الجميل
وفعلا هى من اجمل القصايد اللى اتقالت فى مدح الرسول الكريم-صلى الله عليه وسلم-
بصى بقى بلاش احراج بموضوع التاج ده انا مش راضى اكتب تعليقات عندك فى المدونة بسببه يبقى بلاش حكاية الاجبارى دى
وكمان انا مش فاضى بجد اليومين دول سيبينى كده لما افضى وابقى اعمليلى انتِ تاج وانتِ اللى تألفى الاسئلة ووعد منى ساعتها هجاوب عليه
نورتى المدونه ياافنان
تحياتى ودمتِ بكل خير وود
**************
ميمى
تحياتى
اهلا بيكِ منورة المدونه
طب يعنى مش فاهمه حاجه استنى شويه وبلاش الفضايح دى على الملأ كده وشوفى باقى الناس هتقول ايه
واهو طلع بعد كده زبده ومربى وشاى اهه (تقريبا انتو فهمتوا احمد بك شوقى غلط لانه مكنش فاتح لا مطعم ولا حلوانى)هههههههههههههه
وبخصوص حلة المحشى متهيألى وزيرة التربيه والتعليم تبعى(ايوشه بنت خالى)مش بتاكل الحاجات دى(والا ماكانش جالها انيميا)وعلى العموم هى تأمر بس وتقول على اللى نفسها فيه واحنا فى الخدمه
ههههههههههههههههه
شكرا على زياراتك الجميلة
نورتى المدونة واسعدنى مرورك
تحياتى ودمتِ بكل خير وود
****************
ايوشه بنت خالى
ووزيرة التربيه والتعليم بحلفنا العظيم
تحياتى لمعاليكى
بقى لغة عربيه وماتعرفيش نهج البردة ياايه (ياخراااااااااااااااابى)
ليه كده حرام عليكى دا امير الشعرا لو عرف كده هيزعل منك خالص
عارفه
انا كنت ناوى اعمل تعديل وزارى النهاردة واعفيكى من منصبك فى الاجتماع بتاع الحلف واضم الوزارة دى للدكتور ياسر بتاع الصحه علشان هو الوحيد اللى فتح نفسى فى التعليقات انما لحقتى نفسك بالتعليق التانى والشرح الجميل ده
وعلى فكرة الشرح حلو وقريب جدا من المعانى المطلوبه ماهو كل واحد لازم يشرح باسلوبه مش لازم نحفظ
(معلومه على الماشى كده الريم هو الغزال صحيح بس الغزال الابيض اللى هو اجمل انواع الغزلان)
وعلى فكرة كمان انا عاشق للشعر العربى القديم اللى بالفصحى ومش بحب الشعر الجديد بتاع لاوزن ولا قافيه ده ومش شرط انى افهمه انما بحس بحلاوة الكلمات وبحبها حتى لو مش فاهمها
ههههههههههههههههههه
نورتى المدونة
تحياتى ودمتِ بكل خير وود
***************
د/ياسر عمر عبدالفتاح
وزير الصحه(وكنت هتبقى وزير التعليم)
تحياتى يادكترة
اللهم صلى وسلم وبارك وزد وانعم على سيدنا محمد
الله يخليك دا انت الوحيد اللى رفعت من روحى المعدنيه
دى من اجمل القصايد اللى انا قريتها وبحبها جدا
نورت المدونة يادكترة(متنساش الاجتماع النهاردة بعد الصلاة علشان نشوف هنعمل ايه فى موضوع الخنازير ده قبل ماييجى عندنا من الاعداء)
هههههههههههههههههههه
تحياتى ودمت بكل خير وود
*****************
موناليزا
اختى الكريمه
تحياتى
هههههههههههههههههههههه
الله يسلمك (الحمد لله كده يبقى كله تمام)
اما بخصوص الشرح فده من تخصص زميلتك فى مجلس الوزرا بتاعة التربيه والتعتيم ايوشه بنت خالى
ولو نزلتى تحت شويه هتلاقيها كاتبه تعليق فيه الشرح
نورتى المدونة واسعدنى مرورك
تحياتى ودمتِ بكل خير وود
***************
د/عرفه
تحياتى
كويس انك فهمت على خفيف فيه غيرك ماجبش حاجه خالص
ههههههههههههههههه
قرار القصيدة ممكن تقراه فى تعليق ايوشه التانى اللى تحت تعليقك بشويه
ههههههههههههههه
وتزعلنى ليه يامحمد !!!! وفين الزعل ده !!
انتو سيبتوا الماتش للاسماعيلى ودى هزيمه هتتكتب لكم وبرضو احنا اللى هناخد الدورى فى الاخر هههههههههههههههههههههههههههههههههه
اسماعيلى ايه اللى يستاهل يامحمد خليك راجل حقانى
تقدر تقولى الاسماعيلى ده ماجاش وبقى كويس قوى كده ليه غير فى الاخر
علشان بتوع الاهلى هما اللى فرطو واصابهم شوية غرور ومستواهم بالتالى نزل ساعتها بس ظهر الاسماعيلى
وبعدين انت عاوز تقارن فريق واخد 104 بطوله بالفرق الكسر دى
هههههههههههههههههههههههههههههه
بجد بجد جمهور الزمالك ده صعبان عليا
ليكم رب اسمه الكريم
ههههههههههههههههههههه
نورت المدونة يادكترة
تحياتى ودمت بكل خير وود
***************
صديقى العزيز
محمد غاليه
تحياتى
معلش انا مفصر معاك انا عارف انما اعذرنى يامحمد بجد اليومين دول الدنيا ملخبطه معايا جامد
وشكرا على رأيك فى القصيده
ايوة كده ارفع من روحى المعدنيه
احسن دا البنات جننونى اللىمش فاهمه واللى عاوزة الترجمه واللى واللى
تحس انهم ماكانوش فى مدارس عربى زى حلاتنا هههههههههههههههه
نورت يامحمد واسعدنى مرورك
تحياتى ودمت بكل خير وود
**************
اختى الكريمه غربتى
تحياتى
وعليكم السلام ورحمة الله وبركاته
انتِ كمان طلعتى زيهم ياغربه !!!!!
لا انا كده هزعل منك
دى قصيده فى مدح الرسول ومن اجمل ماكتب امير الشعراء احمد بك شوقى وماتعرفيهاش !!!!!!!!
صحيح انا كاتب الحته بتاعة الغزل اللى فى الاول بس كنت ناوى اكمل باقى المدح بعد كده
انما دلوقتى هفكر تانى بصراحه
وعلى العموم كويس ان ايوشه شرحت شويه وسهلت المسائل الى حد ما
هههههههههههههههه
الله يسلمك ونورتى المدونة بمرورك
تحياتى ودمتِ بكل خير وود
***************
البت بسومه اختى الصغيرة
ووزيرة السكافه بتاعتنا
تحياتى لمعاليكى
عارفه كان ممكن مع اول كلمتين فى التعليق تتشالى من المنصب بس لحقتى نفسك بعد كده
وعلى فكرة بقى من هنا ورايح انا هعمل للوزرا امتحان فى اللغه العربيه زى بتاع الكادر بتاع المدرسين
ههههههههههههههههههههههه
يلا روحى شوفى شغلك بسرررررررررررررعه
هههههههههه
وعليكم السلام ورحمة الله وبركاته
تحياتى ودمتِ بكل خير وود
***************
سويت هانم
(اهلا ببتوع المعارضه)
تحياتى لسموك
انا عارف ومتأكد انى طالما قلت بحبها يبقى لازم تقولى انها مش حلوة بس هو مين هياخد برأيك !!
والحمد لله ان ايوشه نزلت الترجمه
وبعدين انا عاوز اعرف لما واحده صحفيه كبيرة وكاتبه قديرة زيك كده وبتكره اللغه العربيه امال بتكتبى ازااااااااااى؟؟؟؟؟
حلمنتيشى ؟؟؟؟؟؟؟؟؟؟؟؟؟؟
(وانا اقول كل اما اكلم حد علشان يشغلك يرفض بشياكه وذوق ليه)
هههههههههههههههههههههههههه
نورتى المدونه
تحياتى ودمتِ بكل خير وود
******************
شوشو هانم
تحياتى
وهقول عنك غبيه ليه بس
ماكل اللى قبلك مافهموش يعنى هى جت عندك انتِ ووقفت
عادى
ابقى اقرى التعليق التانى بتاع ايوشه يمكن تفهمى منه حاجه
هههههههههههههههه
نورتى ياشوشو
وابقى سلميلى على ابى الشمقمق
تحياتى ودمتش بكل خير وود
***************
والسلام عليكم ورحمة الله وبركاته

غير معرف يقول...

بالرغم من ان القصيدة دي أنا عارف هي لمين.. بس شاعرها ده نكـــرة

ومنافق

دمت بود

بس شوف لنا حد تاني

hamada يقول...

جروب جريدة الصباح العربي بيت المدّونين العربي
http://www.facebook.com/home.php#/group.php?gid=78080770039

المعتصم يقول...

بسم الله الرحمن الرحيم
السلام عليكم ورحمة الله وبركاته
***********
غير معروف
محمد افندى
تحياتى
مليون مرة قبل كده اتكلمنا فى موضوع ان امير الشعراء منافق
وانت عارف نقطة الخلاف اللى بينا فى الموضوع ده
وبعدين يابتاع انت انت بتقول على احمد بك شوقى نكرة طب اسكت احسنلك
وورينى ابداعات سيادتك انت يااللى مش نكرة
بقولك ايه ماتخلينيش اضربك لما اشوفك ولم الدور
وبعدين تعالى قولى هو مين من الشعراء لم يتهم بالنفاق ؟؟؟؟؟؟؟؟؟
كلهم من قديم الازل والتهمه دى ملازمه ليهم (وان شاء الله قريب هتهمك بيها)
واحنا لما بنتكلم على شاعر بنتكلم على جمال معانيه وعلى اسلوبه ومالناش دعوه بشخصه
يارب بقى تبطل كلامك العبيط ده
ســــــــــــــــلام
************
حماده
تحياتى
نورت المدونة بالزيارة وشكرا على دعوتكم الكريمه
وان شاء الله هزور الجروب فى اقرب فرصه
تحياتى
والسلام عليكم ورحمة الله وبركاته

ريمان يقول...

ههههههههههههههههههه



ههههههههههههههههههه




فكرتنى باللى اول ما يعروفا ان اسمى ريمان يقوموا على طول يقولوا بيت الشعر بتاع ريم على القاع ده

هههههههههههههههههههه


على العموم انا اجدع منك اهو


بزورك بالرغم من انك بتقول ان مالكش نفسى تعلق عندى

براحتك خالث

على فكره

النت والله فصل ساعتها

بلاش تبقى سىء الظن كده

خديجة عبدالله يقول...

طبعا خدت وقت عشان أفهم :) بس الحمد لله فهمت
جميلة جدا وطبعا معقدة جدا دى حتى القصايد اللى حضرتك بتكتبها أسهل منها على الاقل مش بنتعب نفسنا ونفهم بتكون وااااضحة جدا بالعكس

الحمد لله النت اتصلح حاله وعدنا لنتابع ابداعاتكم ودمت حضرتك بكل خير

نبض الحياة يقول...

السلام عليك ورحمة الله وبركاته
الحمد لله اخيرا البلوجر قبلنى انى ادخل لانه كان بيكتبلى سجل نفسك
القصيدة جميلة طبعا
وحمدلله على السلامة
دمت اخى بكل خير

المعتصم يقول...

بسم الله الرحمن الرحيم
السلام عليكم ورحمة الله وبركاته
**************
ريمان
تحياتى
كويس والله ان البوست ضحكك
بس معنى كلامك انه فيه ناس كتير اهه تعرف القصيده دى
والمفروض تشكرى الوالد والوالده انهم سموكى اسم حلو كده(ولو انى شايف يعنى انك .....ولا بلاش)ههههههههههههههه
ماهو اكيد طبعا انتى اجدع منى
وهو انا اقدر انكر
بس انا ماقولتش انى ماليش نفس اعلق عندك
انا قلت انى مش هعلق علشان كنت زعلان
فيه فرق
ومش عارف انتِ دايما ظالمانى كده وبتقولى عليا سيئ الظن ليه بس
انا ممكن اكون رخم اه انما سيئ الظن لأ
ههههههههههههههه
نورتى المدونة
تحياتى ودمتِ بكل خير وود
****************
خديجة عبدالله
اختى الكريمه
تحياتى
ماهو اكيد لازم تاخدى وقت لانها بالفصحى اللى مابقيناش نستخدمها خالص فى حياتنا
بس الحمد لله انك فهمتى
حرام عليكى ياخديجه القصايد اللى انا بحطها التانيه دى اولا مش انا اللى بكتبها دى قصايد برضو لشعراء فطاحل بس هى صعبه حبتين تلاته اربعه
انما دى اسهل كتير واجمل فى المعانى
نورتى المدونة
تحياتى ودمتِ بكل خير وود
***************
نبض الحياة
اختى الكريمة
تحياتى
وعليكم السلام ورحمة الله وبركاته
الله يسلمك
معلش كان فيه شوية لعبكه كده بينى وبين بلوجر انتِ عارفه الصعايده بقى
هههههههههههههههه
اكيد لازم تقولى القصيده جميلة مش لغة عربيه !!
والله يسلمك مرة تانيه
اسعدنى مرورك ونورتى المدونه
تحياتى ودمتِ بكل خير وود
والسلام عليكم ورحمة الله وبركاته

غير معرف يقول...

برضه أفاق..

غير معرف يقول...

ومنافق..

غير معرف يقول...

بس مش قصدي معاليك طبعا يا زعيم