بسم الله الرحمن الرحيم
السلام عليكم ورحمة الله وبركاته
اولا انا بشكر كل الناس اللى دخلت عندى المدونة
وقدمت واجب العزاء فى والدى الله يرحمه
وبجد ياجماعه انتوا مش عارفين كلامكم أثر فيا ازاى
شكرا للجميع
للى بيزورنى ويعرفنى باستمرار وكمان للناس اللى كانت اول زيارة ليهم علشان يواسونى بكلماتهم الجميلة
**********
طبعا انتوا عارفين قصة تععينى مدرس
(ده انا كنت كاتبها فى بوست مستقل قبل كده )
وطبعا عارفين المعاناه الرهيبه اللى بعانيها فى المواصلات علشان اقدر اوصل لمدرستى الحبيبه مقر عملى الفريد والعبقرى
علشان ادرس للجهابزة الافذاذ اللى بديهم كمبيوتر
المهم كل يوم الصبح وانا رايح المدرسه فى الطريق بعد شارعنا بشويه كده
اقابل واحده ماشيه فى الاتجاه العكسى يعنى انا رايح وهى جايه
اطلع بدرى عن معادى اقابلها فى نفس المكان
اتأخر شويه عن معادى برضو اقابلها فى نفس المكان
الاول ماكنتش بهتم بالموضوع ده ومكنتش بفكر فيه اصلا
لغاية ماالحكاية دى بقيت ملفته للنظر بشكل كبير جدا
كل يوم نتقابل تقريبا فى نفس المكان مهما كنا متأخرين او طالعين بدرى
مش عارف ايه ده ؟ فيه توارد خواطر مش عادى فى المواعيد او الظروف الوقتيه بتاعتنا
انا بعد كده اهتميت بصراحه انى اسأل واشوف دى مين
عرفت انها بشتتغل مُدرسة لغة عربيه فى مدرسه قريبه من بيتنا
وهى بنت ناس كويسين وقمة فى الادب والاخلاق الحقيقه
انا ساعتها كنت لسه باعت المراسيل علشان يتوسطوا بينى وبين ابو خطيبتى الانسهN
ومكنش الرد جانى ففكرت انهم لو رفضونى انى اتقدم فعلا للبنت دى
وهى فيها كل المواصفات المطلوبه
بس طبعا النصيب حكم والحمد لله ربنا اكرمنى وانعم عليا بخطيبتى فلغيت طبعا الفكرة من نافوخى
بس كنت برضو كل يوم وانا طالع الصبح اقابلها
حتى انا احيانا كنت بتعمد انى اتأخر عن معادى بشكل كبير وبرضو الاقيها رايحه شغلها
وساعات كمان وانا راجع الاقيها راجعه هى كمان
المهم جينا بقى اتفقنا انا ووالد خطيبتى على اننا نروح نجيب الشبكه (فاكرينها طبعا)
وفى اليوم ده الصبح شوفتها وضحكت وهى كمان بصت فيا وضحكت مش عارف ليه
رجعت من المدرسه لبست واتشيكت واخدت عربيه وروحت اجيب العروسه واروح بيها عند الجواهرجى علشان تختار الشبكه
ودخلت انا وعروستى عند الجواهرجى ولسه بنقول على اللى هى عاوزاه وابص الاقى البنت دى داخله هى وعريسها علشان يختاروا شبكتهم
هههههههههههه
بصينا لبعض باستغراب فى الاول وبعد كده احنا الاتنين انفجرنا فى الضحك والكل مستغرب الموقف جدا
ولما بيسألوها ايه الموضوع
قالت الاستاذ ده كل يوم الصبح اقابله وانا رايحه الشغل حتى لو اتأخرت الاقيه متأخر
ولو طلعت بدرى بلاقيه هو كمان طالع بدرى زى مايكون بيراقبنى
لدرجة انى فكرت انه فعلا بيراقبنى وعاوز يخطبنى ولا حاجه
بس مش معقوله يعنى بيراقبنى وجايب خطيبته معاه هنا يختارلها الشبكه
هههههههههههههههههه
ولغاية النهارده كل يوم وانا رايح الشغل اشوفها ونضحك احنا الاتنين ونصبح على بعض بس من غير كلام بهزة راس خفيفه كده
شوفتوا الصدفه اللى كنت عاوز احكيلكم عليها
بجد مش حاجه غريبه واننا احنا الاتنين نجيب شبكتنا فى نفس اليوم ومن عند نفس الصايغ
يلا بقى كفايه عليكم صداع لغاية كده
ومرة تانيه بشكركم
ســـــــــــــــــــــــــــــــلام
هناك 31 تعليقًا:
حمد الله ع السلامه يا استاذ مصطفى
الصدفه غريبه سبحان الله
عموما الف مبروك ليك وليها
تحياتي
فتاة من الصعيد
تحياتى يامروة
الله يسلمك
يارب تكونى بخير
فعلا الموضوع قعد شاغلنى فترة لان الصدفه دى غريبه فعلا ومش قادر ابطل استغراب منها
ربنا يبارك فيكى
وشكرا على مرورك الجميل
نورتى المدونة
حضرة الصعيدى الهمام
السلام عليكم
نورت مدونتك مرة أخرى
مبروك الشبكة وكما يقولون
رب صدفة خير من ألف ميعاد
أما موضوغى عن وشهد شاهد من أهلها
فهو معرف أن القدس إسلامية ولا شك فى
هذا ولكن هناك تحريف للحقائق وتزوير للتاريخ وللأسف يوجد من بيننا من يساعدهم فى ذلك وأنا أحاول أن ألقى
الضوء على آراء أناس منهم
خالص تقديرى
1-حمدلله علي السلامة
2-عودة احمد
هههههههههه
3-ايه ياعم الصدف دي
هي لو حلوة و انا مكانك كنت سيبت خطيبتي عند الصايغ :):)
حمدالله على سلامتك
ربنا يكرمك يارب ويارب تكون اخر الاحزان
وطبعآ سبحان الله ان فى ذلك لحكم
ربنا يسعد ايامك ومافيش احسن من الصدف دى
بتمنالك السعاده من كل قلبى
انا بيحصلي صدف زي ده برضه
بش مش لدرجه اني هروح اشتري شبطه و الاقيها قدامي
ده يبقي اخطبها بقي هي رخره و يبقي الفرح فرحين ^_^
...
مليون مبروووك لييييك ^_^
حمدالله علي السلامة
رغم ان الغيبة طالت بس ماشي نعديها
بس بجد صدفة روعه
وعلي فكرة البوست دا فيه مسج حلوة اوي
ألف حمد الله على السلامة يا رئيس أبر إيجيبت
انا البوست اللي كتباه فرحني لأنك وياسر وعمرو دخلتوا وبقى لكم كتير قوي غايبين
ربنا يكرمك يا مصطفى ويتمم لك على خير
ياعم ما إنتوا جيران
وارد يعني كل الصدف
لكن بتاعة الصايغ دي لوحدها
دي كاركتير
ياسبحان الله
النصيب غلاب فعلا
ارزااااااااقك بقى
السلام عليكم يااستاذ مصطفى
حمدلله على السلامة ربنا يجعلها يارب اخر الاحزان
مفيش حاجة فى الدنيا دى صدفة هى اقدار مقدرة وسبحان الله قدر حلو اوى
على جنب بقى كده سلامى لعمتى ههههه
وسلامى لخطيبة ابن عمتى بقى :)
هههههههههههههههههههههه
سبحان الله فعلا
بس صدفه جميله
اعتقد انك مش هتنساها
الف مبروك وان شاء الله تظل حياتك ممتلئه بالبسمه والفرح.
السلام عليكم و رحمة الله و بركاته
هي خطى كتبت علينا لنمشيها ...
و وسط كل هذا قد نمر بما نسميه الصدفة خلال مشوارنا في الحياه
لتظل ذكرى تبعث في انفسنا ابتسامة أو تلمع في أعيننا دمعة كلما تذكرناها
دمت بكل خير
عودا أحمدا:)
نورت عالم التدوين
وفعلا صدفة غريبة بس جميلة
وليه كنت مأخرها علينا كل ده!!
بس يلا عفا الله عما سلف:)
أحلى حاجة بجد فى الدنيا لما تحس ان ربنا باعتلك حد مخصوص عشان يضحك فى وشك
حتى لوماتعرفوش
تعرف للحظة فكرتها الانسة"ن" وكنت هقولك رب صدفة خير من الف ميعاد:)
ربنا يسعدكم ويكملكم على خير
مبروك ليكم انتم الاتنين ورب صدفه خير من الف ميعاد ههههههههه
اولا البقاء لله ولو انها جاية متأخر ..
ثانيا ... الصدف دي شئ جميل اووي ورب صدفة خير من اي ميعاد :D
ثالثا .. الف مليون مبروك وربنا يسعدك يارب
رابعا .. تقبلني زائرة خفيفة علي مدونتتك الرائعة دي ^_^
ساعات فعلاً الصدفة
أحسن من الف ميعــاد
بس مش دايماً يعنى:ساعات !
المهم انت فين
يازعــيم الحلف
مش لك صـــوت ليه
اين صوتك يامواطن:)
الله يرحمه والدك
هى صدفة غريبة بس حلوة ههههههههههههههههههههه
على فكرة انا سمية كمال الدين فيلسوفة القرن ال 21
ودى مدونتى الجديدة
كيفك مصطفى
يارب تكون تمام
وحشنى بجد
للقدر احكام
والف مبروك ليكم
وربنا يتمملكم بخير دايما
حاجة غريبة جدا يكونش عليكو جوست
وعادت الغيبة من جديد!!!
لعل المانع خير
مبروك الخطوبة
انا برضو كنت بقابل واحدة كل يوم و انا رايح الشغل في نفس المكان لكن كانت سيدة اكبر مني بكثير
ييجي بعشرين سنة مش عارف راحت فين دلوقتي ممكن تكون سابت الشغل او طلعت على المعاش
وحشتنا يااستاذ المعتصم
المنتصر بأذن الله تعــالى
رئيس حلفنا ابر ايجيبت
عايزين نشوفك ونطمن عليك
وياريت لمّا تظهر وتبان عليك
الامان تجيب لنا معاك من هناك
من الصعيد الجوانى اى حاجة أحنا
راضيين(أهـ راضيين)ومش حنقول لأ على
أى حاجة تجيبها موافقون بالأغلبية
السااااااااااااااااااااااااااااحقة.
طمنا عليك ياراجل ياطيب وعلى من عندك أهناك ياولدى يامصطفى:)
السلام عليكم:
سبحان الله,اقرأ وأنا مو مستوعبه الموقف,فعلاً هالحياه بتسير فيها مواقف عجيبه,لكن أللي حصل لك فعلاً أمرة عجيب..
ربنا يوفكم كلكم,ومن خيرة يرزقكم..
وألف ألف مبروك شبكتكم,ربنا يسعدكم..
بحفظ الرحمن~
اين انت يازميل الهم التدريسى
يارب يكون خير
ممكن تكون عملت مفاجأة وماعزمتناش على الفرح يازعيم الحلف:)
فى الاول البقااااء لله
وانت بجد وشحننى اوى اوى اوى
ونفسى اكلمك فى اقرب وقت انا قبلت حضرتك فى المركز الدولى
السلام عليكم ورحمة الله وبركاتة
البقاء لله
والله ما كنت اعرف غير دلوقتى
متأسفة
رحمة الله وجعلة فى اعلى عليين ان شاء الله
اما الصدفه دى
فكانت جامدة جدا
كويس ان خطيبتك مسبيتكش
وروحت اتأدمتلها
كان هيبقى مقلب بجد
دمت بالف خير
ايييييين انت يا استاذنا
مختقىىىىىىى فين
طمنا عليك
يارب تكون بالف خير
الف مبروك يامدرس:)
ربنا يتمم لك بخير
طبعا عرفت الخبر من بيت العمدة عند فاتيما:)
بارك الله لكما وبارك عليكما وجمع بينكما فى خير
يالهووووي يعني انا غيبت وجيت وانت لسه مش نزلت بوستات جديده
انا زحلانة من اخويا الكبيررررررررررر
السلام عليكم ورحمة الله وبركاته
ايه الغيبة دى كلها بقى
طيب قولنا محاضرات بقى وامتحانات
ومشغول فيها لكن خلاص دى النتيجة ظهرت
يارب تكون نجحت :)
ولا انت شكلك اتجوزت ومعزمتنيش P:
إرسال تعليق