الجمعة، 12 مارس 2010

صــــــــــــــــــدفه

بسم الله الرحمن الرحيم
السلام عليكم ورحمة الله وبركاته
اولا انا بشكر كل الناس اللى دخلت عندى المدونة
وقدمت واجب العزاء فى والدى الله يرحمه
وبجد ياجماعه انتوا مش عارفين كلامكم أثر فيا ازاى
شكرا للجميع
للى بيزورنى ويعرفنى باستمرار وكمان للناس اللى كانت اول زيارة ليهم علشان يواسونى بكلماتهم الجميلة
**********
طبعا انتوا عارفين قصة تععينى مدرس
(ده انا كنت كاتبها فى بوست مستقل قبل كده )
وطبعا عارفين المعاناه الرهيبه اللى بعانيها فى المواصلات علشان اقدر اوصل لمدرستى الحبيبه مقر عملى الفريد والعبقرى
علشان ادرس للجهابزة الافذاذ اللى بديهم كمبيوتر
المهم كل يوم الصبح وانا رايح المدرسه فى الطريق بعد شارعنا بشويه كده
اقابل واحده ماشيه فى الاتجاه العكسى يعنى انا رايح وهى جايه
اطلع بدرى عن معادى اقابلها فى نفس المكان
اتأخر شويه عن معادى برضو اقابلها فى نفس المكان
الاول ماكنتش بهتم بالموضوع ده ومكنتش بفكر فيه اصلا
لغاية ماالحكاية دى بقيت ملفته للنظر بشكل كبير جدا
كل يوم نتقابل تقريبا فى نفس المكان مهما كنا متأخرين او طالعين بدرى
مش عارف ايه ده ؟ فيه توارد خواطر مش عادى فى المواعيد او الظروف الوقتيه بتاعتنا
انا بعد كده اهتميت بصراحه انى اسأل واشوف دى مين
عرفت انها بشتتغل مُدرسة لغة عربيه فى مدرسه قريبه من بيتنا
وهى بنت ناس كويسين وقمة فى الادب والاخلاق الحقيقه
انا ساعتها كنت لسه باعت المراسيل علشان يتوسطوا بينى وبين ابو خطيبتى الانسهN
ومكنش الرد جانى ففكرت انهم لو رفضونى انى اتقدم فعلا للبنت دى
وهى فيها كل المواصفات المطلوبه
بس طبعا النصيب حكم والحمد لله ربنا اكرمنى وانعم عليا بخطيبتى فلغيت طبعا الفكرة من نافوخى
بس كنت برضو كل يوم وانا طالع الصبح اقابلها
حتى انا احيانا كنت بتعمد انى اتأخر عن معادى بشكل كبير وبرضو الاقيها رايحه شغلها
وساعات كمان وانا راجع الاقيها راجعه هى كمان
المهم جينا بقى اتفقنا انا ووالد خطيبتى على اننا نروح نجيب الشبكه (فاكرينها طبعا)
وفى اليوم ده الصبح شوفتها وضحكت وهى كمان بصت فيا وضحكت مش عارف ليه
رجعت من المدرسه لبست واتشيكت واخدت عربيه وروحت اجيب العروسه واروح بيها عند الجواهرجى علشان تختار الشبكه
ودخلت انا وعروستى عند الجواهرجى ولسه بنقول على اللى هى عاوزاه وابص الاقى البنت دى داخله هى وعريسها علشان يختاروا شبكتهم
هههههههههههه
بصينا لبعض باستغراب فى الاول وبعد كده احنا الاتنين انفجرنا فى الضحك والكل مستغرب الموقف جدا
ولما بيسألوها ايه الموضوع
قالت الاستاذ ده كل يوم الصبح اقابله وانا رايحه الشغل حتى لو اتأخرت الاقيه متأخر
ولو طلعت بدرى بلاقيه هو كمان طالع بدرى زى مايكون بيراقبنى
لدرجة انى فكرت انه فعلا بيراقبنى وعاوز يخطبنى ولا حاجه
بس مش معقوله يعنى بيراقبنى وجايب خطيبته معاه هنا يختارلها الشبكه
هههههههههههههههههه
ولغاية النهارده كل يوم وانا رايح الشغل اشوفها ونضحك احنا الاتنين ونصبح على بعض بس من غير كلام بهزة راس خفيفه كده
شوفتوا الصدفه اللى كنت عاوز احكيلكم عليها
بجد مش حاجه غريبه واننا احنا الاتنين نجيب شبكتنا فى نفس اليوم ومن عند نفس الصايغ
يلا بقى كفايه عليكم صداع لغاية كده
ومرة تانيه بشكركم
ســـــــــــــــــــــــــــــــلام