محتاج دعواتكم

بسم الله الرحمن الرحيم

السلام عليكم ورحمة الله وبركاته

طبعا الناس فاكرة انى مختفى بسبب رمضان

وانى واخد اجازة رمضانيه

بس الموضوع مش كده ابدا والله

انا كنت ناوى انزل فى رمضان كام بوست كده من التراث دمهم خفيف

وحكايات عن البخلاء وحاجات قديمه كده حلوة

بس تأتى الرياح بما لاتشتهى السفن

الوالد تعبان ومحجوز فى المستشفى الجامعى بقاله 5 ايام

وانا متواجد معاه باستمرار واول مرة اسيبه دلوقتى مضطر علشان استحمى بس واغير وراجع تانى

ياريت واحنا فى الايام المفترجه الجميلة دى تدعوله بالشفاء لان الحاله المرة دى صعبه جدا

اسف لو كنت بنكد عليكم فى رمضان

ســــــــــــــــــــــــــــــــــــلام

حكاية العريس

بسم الله الرحمن الرحيم

السلام عليكم ورحمة الله وبركاته

كل سنه وانتم طيبين

ورمضاااااان كريييم

طبعا الناس كلها مستنيه تعرف حكاية العريس اللى انطخ علشان مسك ايد عروسته يوم الفرح وهو بينزلها من الكوشه علشان يروحوا بيتهم

وطبعا كل واحد وواحده فيكم راسم احداث للحكاية فى دماغه

زى ابه ده مسك ايدها ياولد طخه بسرعه وكده

انما الموضوع غير كده خااااااااااالص

وطبعا انا يؤسفنى انى هخيب ظنكم ومايطلعش فيها السسبنس اللى كنتوا متخيلينه

ده لايمنع طبعا انها فيها سسبنس انما مش بنفس الحجم

طبعا كلكم دلوقتى اتخنقتوا منى ومن الرغى بتاعى

هههههههههههههههههههههههههه

نخش على الحكايه

.............

هنسمى العريس احمد والعروسه منى ماشى؟

منى بنت كويسه اتقدم لها ابن عمها(بسطويسى) علشان يتجوزها ولكن ابوها رفض

وبعد كده بفترة بسيطه جدا اتقدم احمد وخطبها وابوها وافق وهى قبلت

طبعا النار مسكت فى قلب بسطويسى وحاول بشتى الطرق انه يطلع قدامهم ان احمد ده وحش ماعرفش

واتكتب الكتاب والناس اتفقوا على يوم الفرح

وهوووووب جه اليوم الموعود وطبعا فرح عندنا يعنى ضرب نار للصبح

وكل عيلة لازم تتفشخر بكمية السلاح اللى عندها قدام العيلة التانيه وكل الناس تبقى معلنه حالة التأهب والاستنفار ولا كأنهم طالعين حرب

جه عمنا بسطويسى يوم الفرح وراح متخانق مع عويس اخو العريس

يبقى عويس ضرب بسطويسى

جه سيد اخو العروسه يدافع عن بسطويسى ابن عمه وراح ماسك عويس ومظبطه والدنيا هاجت وماجت

الناس الكبار هدوا الجو شويه

انما الشباب كان سخن خلاص

فضلوا على الحال ده شويه مابين شد وجذب ومناوشات من كلا الطرفين

لحد ماخلاص الفرح خلص والعريس والعروسه هيتزفوا ويروحوا على بيتهم

العريس نزل من الكوشه وبيمسك ايد عروسته

راح عمنا بسطويسى قايل لسيد اخوها وكمان بيمسك ايدها ايه قلة الحيا دى

هووووووووووووووووووب الخناقه قامت وماقعدتش وفى النص احمد اخد رصاصه ومات

طبعا عويس اخوه ماسكتش راح طاخخ بسطويسى وسيد

يبقى طاخ من هنا على طاخ من هناك مات سته من العيلتين

بــــــــــــس هى دى الحكاية

بس على فكرة الحكايه دى حصلت من فترة كبيره جدا

يعنى تاريخ

انما مايمنعش انه لما حد مننا يعوز يتلكك لحد ممكن يعملها تانى

ههههههههههههههههههههههههههههه

وكل سنه وانتوا طيبين
ســــــــــــــــــــــلام

رغى وكلام فاضى

بسم الله الرحمن الرحيم

السلام عليكم ورحمة الله وبركاته

اولاً كل سنة وانتم طيبين بمناسبة شهر رمضان العظيم

اعاده الله علينا وعلى امتنا الاسلاميه والعربيه بكل خير

ويارب السنه الجايه كل واحد يكون محقق احلامه

امين

............

ثانيا بما انى مهيس خالص ومش عارف اكتب حاجه وهموت علشان انام

قلت اكتب اى حاجه وخلاص

لان الناس كلها افتكرتنى اختفيت تانى

امبارح نايم الساعه خمسه صباحا بعد فاصل من الرغى والهزار

مع مجموعه زى العسل من المدونين فى مدونة الدكتورة ستيته وكان الكلام اون لاين

وطبعا كان عندى شغل واضطريت اصحى الساعه 7 وربع الصبح علشان اروح المدرسه

والمدرسه دى مشوارها مشواااااااااااار

اولا مالهاش مواصلات خالص

قريه كده نائيه فى حته مجهوله فى بلدنا

بروح اركب عربيات بتاعة قريه تانيه وانزل على الطريق واكمل مشى لغاية مااوصل

المشى رياضه طبعا انا عارف دى بس الجزمة بتاعتى صعبانه عليا قوووى والله

كل يوم بتشيل كميه تراب بالعبيط ده غير الحاجات التانيه طبعا

وبعد رحلة العوده اللى بتزيد فى تعبها عن رحلة الذهاب قلت هنام شويه

يطلعلى مشوار من تحت رجليا لأسيوط المحافظة

ودى بعيد عنكم بينا وبينها 65 كيلو بس

يعنى ساعه بالعربيه فى عز جهنم الحمرا فى عز الظهر

وطبعا على ماالمشوار خلص ورجعت كان اليوم انضرب

وبعد كده كان لازم اعمل كام مشوار فى البلد هنا تبع الشغل

ولسه يادوب راجع وبنام على نفسى

ان شاء الله هبقى انزل لكم بوست فيه الحكايه بتاعة العريس

اللى انطخ علشان مسك ايد عروسته يوم الفرح

وده علشان خاطر الدكتورة ستيته مش مصدقه

هههههههههههههه

وكل سنه وانتم طيبين وبخير ورمضان كريم (واحمد ومحمد وعمر وسيد وحسين ........ وعيشوا انتو بقى)

ســــــــــــــــــــــــــــــــــــــــــــــــــــــــــــــلام

لقاء المدونين

بسم الله الرحمن الرحيم
السلام عليكم ورحمة الله وبركاته

النهارده وفى الازهر بارك كان يوم جميل جدا
وحصل اللقاء المنتظر للمدونين
صحيح فيه ناس كتير ماجتش
انما برضو فيه ناس كتير اتصلت وسلمت
من مصر ومن بره مصر
وكان اللقاء ممتع والجو أُسرى وعائلى
وكنا بالظبط زى مانكون نعرف بعض من زمان
******
انا وصلت الساعه 9 ونص ودخلت الجنينه
واستنيت عند الباب
واول واحده اتصلت بيا هى فاتيما (مدونة روح قلب ماما)
ودخلت وقعدت معايا نستنى الناس بعد كده الكل هل
ودى الناس اللى حضرت اللقاء
(طبعا الترتيب مش مهم)
الدكتورة ستيته (مش عارفه)
خالد فوده
رامز عباس
محمد غاليه (هل تبحث عن السعاده)
المهندس احمد ابوالعلا
بدراوى (طعم البيوت)
عادل (البلد دى فيها حكومه)
ايمى بيبى

اينو(رقة الاحساس)
مبتسمه دائما
كيكى فكك منى
دموع ملائكيه
د/ياسر عمر عبدالفتاح(ومضات)
مصطفى (هرتله )
فاتيما (روح قلب ماما)
عم صلاح (فشكووول)
الاستاذهانى (نط فى الكوز)
ميمي(ميمايا)
عيش احلامك
صلاح (مسدس صغير)
وكان الكلام فى الاول بعد التعارف
ازاى كل واحد فينا دخل عالم التدوين ونوع الكتابه فى المدونة بتاعته
وكمان اتصلت المدونة ايناس علشان تسلم علينا
وام مالك اتصلت وسلمت وخصوصا على الدكتورة ستيته
وبعد كده الناس اتكلمت فى السياسه شويه بس مش كتير
وكمان فى موضوع ال دى اس ال وقانون الاستخدام العادل
واننا لازم نعمل اعتراض على الحاجاات بتاعه وزارة الاتصالات
والهبل اللى كل شويه يألفوة فى العقود بتاعة الاشتراك فى خدمة النت
وبعد كده الكلام بقى عن عيوب التدوين ومميزاته
وكل واحد من الموجودين قال رأيه عن اكتر حاجه هو شايف انها
من عيوب التدوين واكتر حاجه هو شايف انها من المميزات
ثم كان الحوار عن الاختلاف فى الاراء وازاى نتقبل نقد الاخرين من غير تجريح او اهانه
واننا ماعندناش ثقافة تقبل النقد بصدر رحب
وبعدين رامز قال قصيده كتبها من وحى المكان
وبعد كده مصطفى (هرتله)قال 3 قصايد من الديوان بتاعه
وبعدين رد عليهم وزير الصحه حدا الحلف بتاعنا الدكتور ياسر
بقصيدتين باللغه العربيه الفصحى(صعايده بقى ومحدش يقدر علينا)
وبعد كده الناس ابتدت تمشى علشان اللى وراه مشوار واللى مسافر
واللى مش فاضى ومزوغ من الشغل(سورى يابشمهندس احمد)
وبعدين قعدت انا ومحمد غاليه وايمى بيبى واخت محمد
ايمى بيبى واخت محمد كان بيلفوا شويه فى الجنينه
وانا محمد كنا بنحاول نصور شوية مناظر كده

بس للاسف الصور طالعه وحشه خالص علشان الكاميرا بتاعة تليفونى مش قد كده
وبدين جه اتصال لمحمد من ابوعلى (shape your life)
وجه عند البوابه وبعد كده دخل قعد معانا لغاية الساعه 6 ونص
بس بصراحه شخصيه جميلة جدا ومثقف وله حضور ودمه خفيف خالص
وبعد كده قام ابوعلى مشكورا بتوصيلنا
وصل محمد واخته لغاية محطة المترو
ووصل ايمى لغاية اقرب شارع لبيتهم وانا لغاية شارعنا
وانتهى اللقاء بس كان يوم جميل جدا والحمد لله
وكفايه عليكم كده علشان انا تعبان على الاخر
ولو كنت نسيت حد من الناس اللى حضرت ماكتبتش اسمه او مدونته
يسامحنى علشان انا مكتبتش فى ورق انا بكتب من الذاكرة
والزهايمر يدينى العذر
والسلام عليكم ورحمة الله وبركاته

اللقاء

بسم الله الرحمن الرحيم

السلام عليكم ورحمة الله وبركاته

ان شاء الله لقاء المدونين هيكون بعد يومين

والناس اتفقت انه هيكون فى الازهر بارك

ده كويس وجميل وزى الفل

انما الحوسه بقى انه ماحدش عارف هو هيبقى فين جوه الازهر بارك

يعنى المفروض انه يكون فيه مكان محدد نتقابل فيه

انما المشكله اننا قلنا الازهر بارك وسكتنا

فمعلش اخوكم مارحش الازهر بارك قبل كده ومايعرفش ايه الكافيهات اللى فيها جوه

فياريت اى حد يعرف اى كافيه جوة يلحقنى بيه بسرعه

اشوفكم يوم السبت ان شاء الله

ســــــــــــــــــــــــــــــــــــــــــــــــــــــــــــــلام